Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
X: Upāsaka-Vagga

Sutta 93

Kiɱdiṭṭhika Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[185]

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Anāthapiṇḍiko gahapati divādivassa Sāvatthiyā nikkhami Bhagavantaɱ dassanāya.|| ||

Atha kho Anāthapiṇḍikassa gahapatissa etad ahosi:|| ||

'Akālo kho tāva Bhagavantaɱ dassanāya,||
patisallīno Bhagavā,
manobhāvanī yām pi bhikkhūnam||
akālo dassanāya,||
patisallīnā manobhāvanīyā bhikkhu,||
yan nūnāhaɱ yena aññatitthiyānaɱ paribbājakānaɱ ārāmo ten'upasaɱkameyyan' ti.|| ||

Atha kho Anāthapiṇḍiko gahapati yena aññatitthiyānaɱ paribbājakānaɱ ārāmo ten'upasaŋkami.|| ||

2. Tena kho pana samayena aññatitthiyā paribbājakā saŋgamma samāgamma unnādino uccāsaddā mahāsaddā aneka-vihitaɱ tiracchāna kathaɱ kathentā nisinnā honti.|| ||

Addasaɱsu kho te aññatitthiyā parībbājakā Anāthapiṇḍikaɱ gahapatiɱ dūrato'va āgacchantaɱ,||
disvā aññamaññaɱ saṇṭhapesuɱ:|| ||

'Appasaddā bhonto hontu,||
mā bhonto saddam akattha.|| ||

Ayaɱ Anāthapiṇḍiko gahapati āgacchati samaṇassa Gotamassa sāvako.|| ||

Yāvatā kho pana samaṇassa Gotamassa sāvakā gihī odātavasanā Sāvatthiyaɱ paṭivasanti,||
ayaɱ tesaɱ aññataro Anāthapiṇḍiko gahapati.|| ||

Appasaddakāmā kho pana te āyasmanto appasadda vinītā appasaddassa vaṇṇavādino||
app eva nāma appasaddaɱ parisaɱ viditvā upasaɱkamitabbaɱ maññeyyā' ti.|| ||

Atha kho te aññatitthiyā paribbājakā tuṇhī ahesuɱ.|| ||

3. Atha kho Anāthapiṇḍiko gahapati yena te aññatitthiyā paribbājakā ten'upasaŋkami.|| ||

Upasaŋkamitvā tehi añtitthiyehi paribbājakehi saddhiɱ sammodi,||
sammodanīyaɱ kathaɱ [186] sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinnaɱ kho Anāthapiṇḍikaɱ gahapatiɱ te aññatitthiyā paribbājakā etad avocuɱ:|| ||

'Vadehi gahapati kindiṭṭhiko Samaṇo Gotamo' ti?|| ||

'Na kho ahaɱ bhante Bhagavato sabbaɱ diṭṭhiɱ jānāmī' ti.|| ||

'Iti kira tvaɱ gahapati,||
na samaṇassa Gotamassa sabbaɱ diṭṭhiɱ jānāsi,||
vadehi gahapati kiɱdiṭṭhikā bhikkhū' ti?|| ||

'Bhikkhūnam pi kho ahaɱ bhante na sabbaɱ diṭṭhiɱ jānāmī' ti.|| ||

Iti kira tvaɱ gahapati,||
na samaṇassa Gotamassa sabbaɱ diṭṭhiɱ jānāsi,||
na pi bhikkhūnaɱ sabbaɱ diṭṭhiɱ jānāsi,||
vadehi gahapati,||
kiɱdiṭṭhiko'si tvan' ti?|| ||

'Etaɱ kho bhante amhehi na dukkaraɱ vyākātuɱ yaɱ diṭṭhikā mayan' ti.|| ||

'Iŋgha tāva āyasmanto yathā sakāni diṭṭhi-gatāni vyākarontu,||
pacchā petaɱ amhehi na dukkaraɱ bhavissati vyākātuɱ yaɱ diṭṭhikā mayan' ti.|| ||

4. Evaɱ vutte aññataro paribbājako Anāthapiṇḍikaɱ gahapatiɱ etad avoca:|| ||

'Sassato loko,||
idam eva saccaɱ,||
mogham aññan' ti.|| ||

Evaɱ diṭṭhiko ahaɱ gahapatī' ti.

Aññataro pi paribbājako Anāthapiṇḍikaɱ gahapatiɱ etad avoca:|| ||

'Asassato loko,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

Aññataro pi kho paribbājako Anāthapiṇḍikaɱ gahapatiɱ etad avoca:|| ||

'Antavā loko,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

Aññataro pi kho paribbājako Anāthapiṇḍikaɱ gahapatiɱ etad avoca:|| ||

'Anantavā loko,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

Aññataro pi kho paribbājako Anāthapiṇḍikaɱ gahapatiɱ etad avoca:|| ||

'Taɱ jīvaɱ taɱ sarīraɱ,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

Aññataro pi kho paribbājako Anāthapiṇḍikaɱ gahapatiɱ etad avoca:|| ||

'Aññaɱ jīvaɱ,||
aññaɱ sarīraɱ,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

Aññataro pi kho paribbājako Anāthapiṇḍikaɱ gahapatiɱ etad avoca:|| ||

'Hotī Tathāgato param maraṇā,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

Aññataro pi kho paribbājako Anāthapiṇḍikaɱ gahapatiɱ etad avoca:|| ||

'Na hoti Tathāgato param maraṇā,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

Aññataro pi kho paribbājako Anāthapiṇḍikaɱ gahapatiɱ etad avoca:|| ||

'Hoti ca na hoti ca Tathāgato param maraṇā,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

Aññataro pi kho paribbājako Anāthapiṇḍikaɱ gahapatiɱ etad avoca:|| ||

'N'eva hoti,||
na na hoti Tathāgato param maraṇā,||
idam eva saccaɱ mogham aññan' ti.|| ||

Evaɱ diṭṭhiko ahaɱ gahapatī' ti.|| ||

 


 

5. Evaɱ vutte Anāthapiṇḍiko gahapati te paribbājake etad avoca:|| ||

'Yvāyaɱ bhante,||
āyasmā evam āha:||
'Sassato loko,||
ida meva saccaɱ mogham aññan' ti||
evaɱ diṭṭhiko ahaɱ [187] gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 

Yo p'āyaɱ bhante,||
āyasmā evam āha:||
'Asassato loko,||
ida meva saccaɱ mogham aññan' ti||
evaɱ diṭṭhiko ahaɱ gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 

Yo p'āyaɱ bhante,||
āyasmā evam āha:||
'anantavā loko,||
ida meva saccaɱ mogham aññan' ti||
evaɱ diṭṭhiko ahaɱ gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 

Yo p'āyaɱ bhante,||
āyasmā evam āha:||
'Taɱ jīvaɱ taɱ sarīraɱ,||
ida meva saccaɱ mogham aññan' ti||
evaɱ diṭṭhiko ahaɱ gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 

Yo p'āyaɱ bhante,||
āyasmā evam āha:||
'Aññaɱ jīvaɱ,||
aññaɱ sarīraɱ,||
ida meva saccaɱ mogham aññan' ti||
evaɱ diṭṭhiko ahaɱ gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 

Yo p'āyaɱ bhante,||
āyasmā evam āha:||
'Hotī Tathāgato param maraṇā,||
ida meva saccaɱ mogham aññan' ti||
evaɱ diṭṭhiko ahaɱ gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 

Yo p'āyaɱ bhante,||
āyasmā evam āha:||
'Na hoti Tathāgato param maraṇā,||
ida meva saccaɱ mogham aññan' ti||
evaɱ diṭṭhiko ahaɱ gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 

Yo p'āyaɱ bhante,||
āyasmā evam āha:||
'Hoti ca na hoti ca Tathāgato param maraṇā,||
ida meva saccaɱ mogham aññan' ti||
evaɱ diṭṭhiko ahaɱ gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 || ||

Yo p'āyaɱ bhante,||
āyasmā evam āha:||
N'eva hoti,||
na na hoti Tathāgato param maraṇā,||
ida meva saccaɱ mogham aññan' ti||
evaɱ diṭṭhiko ahaɱ gahapatī' ti,||
imassa ayam ayasmato diṭṭhi attano vā ayonisomanasikārahetu uppannā paraghosappaccayā vā.|| ||

Sā kho pan'esā diṭṭhi bhūtā saŋkhatā cetayitā paṭiccasamuppannā,||
yaɱ kho pana kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ, taɱ dukkhaɱ,||
yaɱ dukkhaɱ, tad eva so āyasmā allīno,||
tad eva so āyasmā ajjhapagato.|| ||

 


 

[188] 6. Evaɱ vutte te paribbājakā Anāthapiṇḍikaɱ gahapatiɱ etad avocuɱ:|| ||

'Vyākatāni kho gahapati amhehi sabbeh'eva yathā sakāni diṭṭhi-gatāni,||
vadehi gahapati,||
kiɱ diṭṭhiko'si tvan' ti?|| ||

'Yaɱ kho bhante kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ.|| ||

Yad aniccaɱ,||
taɱ dukkhaɱ.|| ||

Yaɱ dukkhaɱ,||
taɱ "n'etaɱ mama,||
n'eso'ham asmi,||
na me so attā" ti||
evaɱ-diṭṭhiko kho ahaɱ bhante' ti.|| ||

'Yaɱ kho gahapati kiñci bhūtaɱ saŋkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ,||
taɱ dukkhaɱ,||
yaɱ dukkhaɱ,||
tad eva tvaɱ gahapati allīno,||
tad eva tvaɱ gahapati ajjhupagato' ti.|| ||

'Yaɱ kho bhante kiñci bhūtaɱ saɱkhataɱ cetayitaɱ paṭiccasamuppannaɱ,||
tad aniccaɱ,||
yad aniccaɱ,||
taɱ dukkhaɱ,||
yaɱ dukkhaɱ,||
taɱ "n'etaɱ mama,||
n'eso'ham asmi'||
na meso attā" ti||
evam etaɱ yathābhūtaɱ sammappaññāya sudiṭṭhaɱ,
tassa ca uttariɱ nissaraṇaɱ yathābhūtaɱ pajānāmī' ti.|| ||

Evaɱ vutte te paribbājakā tuṇhībhūtā maŋkubhūtā pattakkhandhā adhomukhā pajjhāyantā appaṭibhānā nisīdiɱsu.|| ||

7. Atha kho Anāthapiṇḍiko gahapati te paribbājake tuṇhībhūte maŋkubhūte pattakkhandhe adhomukhe pajjhāyante appaṭibhāne viditvā uṭṭhāy āsanā yena Bhagavā ten'upasaɱkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Anāthapiṇḍiko gahapati yāvatako ahosi tehi aññatitthiyehi paribbājakehi saddhiɱ kathāsallāpo,||
taɱ sabbaɱ Bhagavato ārocesi.|| ||

'Sādhu sādhu gahapati,||
evaɱ kho te gahapati moghāpurisā kālena kālaɱ saha dhammena suniggahītaɱ niggahetabbā' ti.|| ||

Atha kho Bhagavā Anāthapiṇḍikaɱ gahapatiɱ dhammiyā kathāya saɱdassesi,||
samādapesi samuttejesi sampahaɱsesi.|| ||

Atha kho Anāthapiṇḍiko gahapati Bhagavatā dhammiyā kathāya sandassito samādapito samuttejito sampahaɱsito [189] uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

8. Atha kho Bhagavā acirapakkante Anāthapiṇḍike gahapatimhi bhikkhu āmantesi.|| ||

Yo pi so bhikkhave bhikkhu vassasatusampanno imasmiɱ dhamma-vinaye,||
so pi evam evaɱ aññatitthiye paribbājake saha dhammena suniggahitaɱ nigganheyya yathā taɱ Anāthapiṇḍikena gahapatinā niggahītā ti.|| ||

 


Contact:
E-mail
Copyright Statement   Webmaster's Page