Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
X: Upāsaka-Vagga

Sutta 99

Thera Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Upāli yena Bhagavā ten'upasaɱkami.|| ||

Upasaɱkamitvā Bhagavantaɱ abhivādetvā eka-m-antaɱ [202] nisīdi.|| ||

Eka-m-antaɱ nisinno kho āyasmā Upāli Bhagavantaɱ etad avoca:|| ||

'Icchām'ahaɱ bhante araññe vanapatthāni pantāni senāsanāni paṭisevitun' ti.|| ||

2. Durabhisambhavāni kho Upāli araññe vanapatthāni pantāni senāsanāni,||
dukkaraɱ pavivekaɱ||
durabhiramaɱ ekatte,||
haranti maññe mano vanāni samādhiɱ alabhamānassa bhikkhuno.|| ||

Ye kho Upāli evaɱ vadeyya:|| ||

'Ahaɱ samādhiɱ alabhamāno araññe vanapatthāni pantāni senāsanāni paṭisevissāmi' ti.|| ||

Tass'etaɱ pāṭikaŋkhaɱ:||
saɱsīdissati vā||
uppilavissati vā.|| ||

3. Seyyathā pi Upāli mahā-udakarahado.|| ||

Atha āgaccheyya hatthināgo sattaratano vā||
aṭṭharatano vā.|| ||

Tassa evam assa:|| ||

'Yan nū nāhaɱ imaɱ udakarahadaɱ ogāhetvā kaṇṇasandhovikam pi khiḍḍaɱ kīḷeyyaɱ,||
piṭṭhisandhovikam pi khiḍḍaɱ kīḷeyyaɱ,||
kaṇṇasandhovikam pi khiḍḍaɱ kīḷitvā||
piṭṭhisandhopikam pi khiḍḍaɱ kīḷitvā||
nahātvā ca||
pivitvā ca||
paccuttaritvā yena kāmaɱ pakkhameyyan' ti.|| ||

So taɱ udakarahadaɱ ogāhetvā kaṇṇasandhovikam pi khiḍḍaɱ kīḷeyya,||
piṭṭhisandhovikam pi khiḍḍaɱ kīḷeyya,||
kaṇṇasandhovikam pi khiḍḍaɱ kīḷitvā||
piṭṭhisandhovikam pi khiḍḍaɱ kīḷitvā||
nahātvā ca||
pivitvā ca||
paccuttaritvā yena kāmaɱ pakkameyya.|| ||

Taɱ kissa hetu?|| ||

Mahā h'Upāli attabhāvo gambhīre gādhaɱ vindati.|| ||

Atha āgaccheyya saso vā biḷāro vā.|| ||

Tassa evam assa:|| ||

'Ko cāhaɱ ko ca hatthināgo?|| ||

Yan nū nāhaɱ imaɱ udakarahadaɱ ogāhetvā kaṇṇasandhovikam pi khiḍḍaɱ kīḷeyyaɱ,||
piṭṭhisandhovikam pi khiḍḍaɱ [203] kīḷeyyaɱ,||
kaṇṇasandhovikam pi khiḍḍaɱ kīḷitvā,||
piṭṭhisandhovikam pi khiḍḍaɱ kīḷitvā||
nahātvā ca||
pivitvā ca||
paccuttaritvā yena kāmaɱ pakkameyyan' ti.|| ||

So taɱ udakarahadaɱ sahasā appaṭisaŋkhāya pakkhandeyya.|| ||

Tass'etaɱ pāṭikaŋkhaɱ:||
saɱsīdissati vā
uppilavissati vā.|| ||

Taɱ kissa hetu?|| ||

Paritto h'Upāli attabhāvo gambhīre gādhaɱ na vindati.|| ||

Evam eva kho Upāli yo evaɱ vadeyya:|| ||

'Ahaɱ samādhiɱ alabhamāno araññe vanapatthāni pattāni senāsanāni paṭisevissāmī ti.|| ||

Tass'etaɱ pāṭikaŋkhaɱ,||
saɱsīdissati vā||
uppilavissati vā.|| ||

4. Seyyathā pi Upāli daharo kumāro mando uttānaseyyako sakena muttakarīsena kīḷati.|| ||

Taɱ kiɱ maññasi Upāli?|| ||

'Nanvāyaɱ kevalā paripūrā bālakhiḍḍā' ti?|| ||

Evaɱ bhante.|| ||

Sa kho so Upāli kumāro aparena samayena vuddhim anvāya||
indriyānaɱ paripākam anvāya||
yāni tāni kumārakānaɱ kīḷapanakāni bhavanti.|| ||

Seyyathīdaɱ:|| ||

Vaŋkaɱ,||
ghaṭikaɱ,||
mokkhacikaɱ,||
ciŋgulakaɱ,||
pattāḷhakaɱ,||
rathakaɱ,||
dhanukaɱ,||
tehi kīḷati.|| ||

Taɱ kiɱ maññasi Upāli?|| ||

'Nanvāyaɱ khiḍḍā purimāya khiḍḍāya abhikkantatarā ca||
paṇītatarā cā' ti?|| ||

Evaɱ bhante.|| ||

Sa kho so Upāli kumāro aparena samayena vuddhim anvāya||
indriyānaɱ paripākam anvāya||
pañcahi kāmaguṇehi samappito samaŋgi-bhūto paricāreti:||
cakkhu-viññeyyehi rūpehi iṭṭhehi kantehi manāpehi piyarūpehi kāmūpasaɱhitehi rajanīyehi;||
sota-viññeyyehi saddehi iṭṭhehi kantehi manāpehi piyarūpehi kāmūpasaɱhitehi rajanīyehi;||
ghāṇa-viññeyyehi gandhehi iṭṭhehi kantehi manāpehi piyarūpehi kāmūpasaɱhitehi rajanīyehi;||
jivhā-viññeyyehi rasehi iṭṭhehi kantehi manāpehi piyarūpehi kāmūpasaɱhitehi rajanīyehi;||
kāya-viññeyyehi [204]||
phoṭṭhabbehi iṭṭhehi kantehi manāpehi piyarūpehi kāmūpasaɱhitehi rajanīyehi.|| ||

Taɱ kiɱ maññasi Upāli?|| ||

'Nanvāyaɱ khiḍḍā purimāhi khiḍḍāhi abhikkantatarā ca paṇītatarā cā' ti?|| ||

Evaɱ bhante.|| ||

5. Idhaɱ kho pana vo Upāli Tathāgato loke uppajjati arahaɱ Sammā-sambuddho vijjā-caraṇa-sampanno sugato loka-vidū anuttaro purisa-damma-sārathī satthā deva-manussānaɱ buddho Bhagavā.|| ||

So imaɱ lokaɱ sadevakaɱ samārakaɱ sabrahmakaɱ sassamaṇa-brāhmaṇiɱ pajaɱ sadeva-manussaɱ sayaɱ abhiññā sacchikatvā pavedeti.|| ||

So dhammaɱ deseti ādikalyāṇaɱ majjhe kalyānaɱ pariyosāna kalyāṇaɱ sātthaɱ savyañjanaɱ kevala paripuṇṇaɱ parisuddhaɱ brahmacariyaɱ pakāseti.|| ||

Taɱ dhammaɱ suṇāti gahapati vā gahapatiputto vā aññatarasmiɱ vā kule paccājāto.|| ||

So taɱ dhammaɱ sutvā Tathāgate saddhaɱ paṭilabhati.|| ||

So tena saddhāpaṭilābhena samannāgato iti paṭisañcikkhati:|| ||

'Sambādho gharāvāso rajāpatho,||
abbhokāso pabbajjā:||
na yidaɱ sukaraɱ agāraɱ ajjhāvasatā ekanta paripuṇṇaɱ ekanta parisuddhaɱ saŋkhalikhitaɱ brahmacariyaɱ carituɱ;||
yan nū nāhaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyan' ti.|| ||

So aparena samayena appaɱ vā bhogakkhandhaɱ pahāya||
mahantaɱ vā bhogakkhandhaɱ pahāya||
appaɱ vā ñātiparivaṭṭaɱ pahāya||
mahantaɱ vā ñātiparivaṭṭaɱ pahāya||
kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajati.|| ||

So evaɱ pabbajito samāno bhikkhunaɱ sikkhāsājīvasamāpanno pāṇātipātaɱ pahāya||
pāṇātipātā paṭivirato hoti,||
nihita-daṇḍo nihita-sattho lajji dayāpanno sababbapāṇabhūtānukampī viharati.|| ||

Adinnādānaɱ pahāya||
adinnādānā paṭivirato hoti,||
dinnādāyī dinna-pāṭikaŋkhī athenena sucibhūtena attanā viharati.|| ||

Abrahmacariyaɱ pahāya||
brahmacārī hoti,||
[205] ārā-cārī virato methunā gāma-dhammā.|| ||

Musā-vādaɱ pahāya||
musāvādā paṭivirato hoti,||
sacca-vādī sacca-sandho theto paccayiko avisaɱvādako lokassa,||
pisunaɱ vācaɱ pahāya||
pisuṇāya vācāya paṭivirato hoti;||
na ito sutvā amutra akkhātā imesaɱ bhedāya,||
amutra vā sutvā na imesaɱ akkhātā amūsaɱ bhedāya,||
iti bhinnānaɱ vā sandhātā sahitānaɱ vā anuppadātā samaggārāmo samaggarato samagganandī samaggakaraṇiɱ vācaɱ bhāsitā hoti.|| ||

Pharusaɱ vācaɱ pahāya||
pharusāya vācāya paṭivirato hoti,||
yā sā vācā neḷā kaṇṇa-sukhā pemanīyā hadayaŋgamā porī bahujana-kantā bahujana-manāpā,||
tathārūpiɱ vācaɱ bhāsitā hoti.|| ||

Samphappalāpaɱ pahāya||
samphappalāpā paṭivirato hoti||
kāla-vādī||
bhūta-vādī||
attha-vādī||
dhamma-vādī||
vinaya-vādī||
nidhānavatiɱ vācaɱ bhāsitā hoti||
kālena sāpadesaɱ pariyantavatiɱ atthasaɱhitaɱ.|| ||

So bījagāma-bhūtagāma-samārambhā paṭivirato hoti.|| ||

Ekabhattiko hoti,||
rattuparato virato vikālabhojanā.|| ||

Nacca-gīta-vādita-visūka-dassanā paṭivirato hoti.|| ||

Mālāgandha-vilepanadhāraṇamaṇḍana-vibhusanaṭṭhānā paṭivirato hoti.|| ||

Uccāsayana-mahāsayanā paṭivirato hoti.|| ||

Jātarūpa-rajata-paṭiggahaṇā paṭivirato hoti.|| ||

Āmakadhañña-paṭiggahaṇā paṭivirato hoti.|| ||

Āmaka-maɱsa-paṭiggahaṇā paṭivirato hoti.|| ||

Itthīkumārika-paṭiggahaṇā paṭivirato hoti.|| ||

Dāsi-dāsa-paṭiggahaṇā paṭivirato hoti.|| ||

Ajeḷaka-paṭiggahaṇā paṭivirato hoti.|| ||

Kukkuṭa-sūkara-paṭiggahaṇā paṭivirato hoti.|| ||

Hatthigavāssavaḷavā-paṭiggahaṇā paṭivirato hoti.|| ||

Khetta-vatthu-paṭiggahaṇā paṭivirato hoti.|| ||

Dūteyya-pahiṇa-gamanānuyogā paṭivirato hoti.|| ||

Kaya-vikkayā paṭivirato hoti.|| ||

Tulākūṭa-kaɱsakūṭa-mānakūṭā paṭivirato [206] hoti.|| ||

Ukkoṭana-vañcananikatisāciyogā paṭivirato hoti.|| ||

Chedanavadhabandhanaviparāmosa-ālopasāhakārā paṭivirato hoti.|| ||

So santuṭṭho hoti kāyapārihārikena cīvarena kucchipārihārikena piṇḍapātena yena yen'eva pakkamati||
samādāy'eva pakkamati.|| ||

Seyyathā pi nāma pakkhī sakuṇo yena yen'eva ḍeti,||
sapattabhāro'va ḍeti.|| ||

Evam eva bhikkhu santuṭṭho hoti||
kāyapārihārikena cīvarena kucchipārihārikena piṇḍapātena yena yen'eva pakkamati,||
samādāy'eva pakkamati.|| ||

So iminā ariyena sīlakkhandhena samannāgato ajjhattaɱ anavajjasukhaɱ paṭisaŋvedeti.|| ||

6. So cakkhunā rūpaɱ disvā na nimittaggāhī hotī nānuvyañjanaggāhī||
yatvādhikaraṇam enaɱ cakkhundriyaɱ asaɱvutaɱ viharantaɱ abhijjhā- domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

Sotena saddaɱ sutvā na nimittaggāhī hoti,||
nānuvyañjanaggāhī,||
yatvādhikaraṇame taɱ sotendriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati sotendriyaɱ,||
sotendriye saɱvaraɱ āpajjati.|| ||

Ghāṇena gandhaɱ ghāyitvā na nimittaggāhī hoti,||
nānuvyañjanaggāhī,||
yatvādhikaraṇame taɱ ghānendriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati ghānendriyaɱ,||
ghānendriye saɱvaraɱ āpajjati.|| ||

Jivhāya rasaɱ sāyitvā na nimittaggāhī hoti,||
nānuvyañjanaggāhī,||
yatvādhikaraṇame taɱ jivhāndriyaɱ asaɱvutaɱ viharantaɱ abhijjhā domanassā pāpakā akusalā dhammā atvāssaveyyuɱ,||
tassa saɱvarāya paṭipajjati||
rakkhati jivhāndriyaɱ,||
jivhāndriye saɱvaraɱ āpajjati.|| ||

Kāyena phoṭṭhabbaɱ phūsitvā na nimittagāhī hoti,||
nānuvyañjanaggāhī||
yatvādhikaraṇam enaɱ kāyendriyaɱ asaɱvutaɱ viharantaɱ abhijjhā domanassā pāpakā akusalā dhammā atvāssaveyyuɱ,||
tassa saɱvarāya paṭipajjati,||
rakkhati kāyendriyaɱ,||
kāyendriye saɱvaraɱ āpajjati.|| ||

Manasā dhammaɱ viññāya na nimittaggāhī hoti,||
nānuvyañjanaggāhī,||
yatvādhikaraṇam enaɱ manindriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati manindriyaɱ,||
manindriye saɱvaraɱ āpajjati.|| ||

So iminā ariyena indriyasaɱvarena samannāgato ajjhattaɱ abyāsekasukhaɱ paṭisaŋvedeti.|| ||

7. So abhikkante paṭikkante sampajānakārī hoti,||
ālokite vilokite sampajānakārī hoti,||
sammiñjite pasārite sampajānakārīhoti,||
saŋghāṭipattacīvaradhāraṇe sampajānakārī hoti,||
asite pīte khāyite sāyite sampajānakārī hoti,||
uccāra-passāvakamme sampajānakārī hoti,||
gate ṭhite nisinne sutte jāgarite bhāsite tuṇhībhāve sampajānakārī hoti.|| ||

So iminā ca ariyena sīlakkhandhena samannāgato||
iminā ca [207] ariyena indriyasaɱvarena samannāgato||
iminā ca ariyena satisampajaññena samannāgato vivittaɱ senāsanaɱ bhajati||
araññaɱ rukkhamūlaɱ pabbataɱ kandaraɱ giriguhaɱ susānaɱ vanapatthaɱ abbhokāsaɱ palālapuñjaɱ.|| ||

So araññagato vā||
rukkhamūlagato vā||
suññāgāragato vā||
nisīdati pallaŋkaɱ ābhujitvā ujuɱ kāyaɱ paṇidhāya||
parimukhaɱ satiɱ upaṭṭhapetvā.|| ||

So abhijjhaɱ loke pahāya vigatābhijjhena cetasā viharati,||
abhijjhāya cittaɱ parisodheti||
vyāpāda-padosaɱ pahāya||
avyāpannacitto viharati sabba-pāṇa-bhūta-hitānukampī,||
vyāpāda-padosā cittaɱ parisodheti;||
thīnamiddhaɱ pahāya||
vīgata thīnamiddho viharati ālokasaññī sato sampajāno,||
thīnamiddhā cittaɱ parisodheti;||
uddhaccakukkuccaɱ pahāya||
anuddhato viharati ajjhattaɱ vūpasannacitto||
uddhaccakukkuccā cittaɱ parisodheti;||
vicikicchaɱ pahāya||
tiṇṇavicikiccho viharati akathaɱkathī kusalesu dhammesu,||
vicikicchāya cittaɱ parisodheti.|| ||

8. So iminā pañcanīvaraṇe pahāya||
cetaso upakkilese paññāya dubbalīkaraṇe vivicc'eva kāmehi||
vivicca akusalehi dhammehi||
savitakkaɱ savicāraɱ||
vivekajaɱ pīti-sukhaɱ||
paṭhamaɱ-jhānaɱ upasampajja viharati.|| ||

Taɱ kiɱ maññasi Upāli?|| ||

'Nanvāyaɱ vihāro purimehi vihārehi abhikkantataro ca paṇītataro cā' ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā araññe vanapatthāni pantāni senāsanāni paṭisevanti||
no ca kho tāva anuppatta sadatthā viharanti.|| ||

9. Puna ca paraɱ Upāli bhikkhu||
vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ||
dutiyaɱ-jhānaɱ upasampajja viharati.|| ||

Taɱ kiɱ maññasi Upāli?|| ||

Nanvāyaɱ vihāro purimehi vihārehi abhikkantataro ca paṇītataro cā ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā [208] araññe vanapatthāni pantāni senāsanāni paṭisevanti||
no ca kho tāva anuppattasadatthā viharanti.|| ||

Puna ca paraɱ Upāli bhikkhu pītiyā ca virāgā upekkhako ca viharati sato ca sampajāno,||
sukhañ ca kāyena paṭisaŋvedeti,||
yaɱ taɱ ariyā ācikkhanti||
'Upekkhako satimā sukha-vihārī' ti,||
tatiyaɱ-jhānaɱ upasampajja viharati.|| ||

Taɱ kiɱ maññasi Upāli?|| ||

Nanvāyaɱ vihāro purimehi vihārehi abhikkantataro ca paṇītataro cā ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā araññe vanapatthāni pantāni senāsanāni paṭisevanti||
no ca kho tāva anuppattasadatthā viharanti.|| ||

Puna ca paraɱ Upāli bhikkhu sukhassa ca pahāṇā||
dukkhassa ca pahānā||
pubb'eva somanassa-domanassānaɱ atthaŋgamā||
adukkhaɱ-asukhaɱ upekkhāsati||
pārisuddhiɱ||
catutthaɱ-jhānaɱ upasampajja viharati.|| ||

Taɱ kiɱ maññasi Upāli?|| ||

Nanvāyaɱ vihāro purimehi vihārehi abhikkantataro ca paṇītataro cā ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā araññe vanapatthāni pantāni senāsanāni paṭisevanti||
no ca kho tāva anuppattasadatthā viharanti.|| ||

Puna ca paraɱ Upāli bhikkhu||
sabbaso rūpa saññānaɱ samatikkamā paṭigha-saññānaɱ atthaŋgamā nānattasaññānaɱ amanasi-kārā||
'ananto ākāso' ti||
ākāsānañcāyatanaɱ upasampajja viharati.|| ||

Taɱ kiɱ maññasi Upāli?|| ||

Nanvāyaɱ vihāro purimehi vihārehi abhikkantataro ca paṇītataro cā ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā araññe vanapatthāni pantāni senāsanāni paṭisevanti||
no ca kho tāva anuppattasadatthā viharanti.|| ||

Puna ca paraɱ Upāli bhikkhu||
sabbaso ākāsānañcāyatanaɱ samatikkamma||
'anantaɱ viññāṇan' ti||
viññāṇañcāyatanaɱ upasampajja viharati.|| ||

Taɱ kiɱ maññasi Upāli?|| ||

Nanvāyaɱ vihāro purimehi vihārehi abhikkantataro ca paṇītataro cā ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā araññe vanapatthāni pantāni senāsanāni paṭisevanti||
no ca kho tāva anuppattasadatthā viharanti.|| ||

Puna ca paraɱ Upāli bhikkhu||
sabbaso viññāṇañcāyatanaɱ samatikkamma||
'n'atthi kiñcī' ti||
ākiñcaññāyatanaɱ upasampajja viharati.|| ||

Taɱ kiɱ maññasi Upāli?|| ||

Nanvāyaɱ vihāro purimehi vihārehi abhikkantataro ca paṇītataro cā ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā araññe vanapatthāni pantāni senāsanāni paṭisevanti||
no ca kho tāva anuppattasadatthā viharanti.|| ||

Puna ca paraɱ Upāli bhikkhu||
sabbaso ākiñcaññāyatanaɱ samatikkamma||
'santame taɱ, paṇītametan' ti||
[209] n'eva-saññā-nāsaññāyatanaɱ upasampajja viharati.|| ||

Taɱ kiɱ maññasi Upāli?|| ||

Nanvāyaɱ vihāro purimehi vihārehi abhikkantataro ca paṇītataro cā ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā araññe vanapatthāni pantāni senāsanāni paṭisevanti||
no ca kho tāva anuppattasadatthā viharanti.|| ||

Puna ca paraɱ Upāli bhikkhu||
sabbaso n'eva-saññā-nāsaññāyatanaɱ samatikkamma||
saññāvedayitanirodhaɱ upasampajja viharati.|| ||

Paññāya c'assa disvā āsavā parikkhīṇā honti.|| ||

Taɱ kiɱ maññasi Upāli?|| ||

Nanvāyaɱ vihāro purimehi vihārehi abhikkantataro ca paṇītataro cā ti?|| ||

Evaɱ bhante.|| ||

Imam pi kho Upāli mama sāvakā attani dhammaɱ sampassamānā araññe vanapatthāni pantāni senāsanāni paṭisevanti||
no ca kho tāva anuppattasadatthā viharanti.|| ||

Iŋgha tvaɱ Upāli,||
saŋghe viharāhi,||
saŋghe te viharato phāsu bhavissatī ti.|| ||

 


Contact:
E-mail
Copyright Statement   Webmaster's Page