Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XI: Samaṇasaññā-Vagga

Sutta 107

Dhovana Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Atthi bhikkhave dakkhiṇesu janapadesu dhopanaɱ nāma tattha hoti annam pi pānam pi khajjam pi bhojjam pi leyyam pi peyyam pi naccam pi gitam pi vāditam pi.|| ||

Atth'etaɱ bhikkhave dhopanaɱ,||
n'etaɱ n'atthiti vadāmi.|| ||

Tañ ca kho etaɱ bhikkhave dhopanaɱ hīnaɱ gammaɱ pothujjanikaɱ anariyaɱ anattha saɱhitaɱ,||
na nibbidāya||
na virāgāya||
na nirodhāya||
na upasamayā||
na abhiññāya||
na sambodhāya||
na nibbānāya saɱvatta ti.|| ||

Ahañ ca kho bhikkhave ariyaɱ dhopanaɱ desissāmī.|| ||

Yaɱ dhopanaɱ ekantanibbidāya virāgāya nirodhāya upasamāya abhiññāya sambodhāya nibbānāya saɱvattati.|| ||

Yaɱ dhopanaɱ āgamma jātidhammā sattā jātiyā parimuccanti,||
jarādhammā sattā jarāya parimuccanti,||
maraṇadhammā sattā maraṇena parimuccanti,||
sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti.|| ||

Taɱ suṇātha,||
sādhukaɱ manasikarotha,||
bhāsissāmī ti.|| ||

Evaɱ bhante ti kho te bhikkhu Bhagavato paccassosuɱ||
Bhagavā etad avoca:|| ||

3. Katamañ ca taɱ bhikkhave ariyaɱ dhopanaɱ yaɱ dhopanaɱ ekanta nibbidāya virāgāya nirodhāya upasamāya [217] abhiññāya sambodhāya nibbānāya saɱvattati,||
yaɱ dhopanaɱ āgamma jātidhammā sattā jātiyā parimuccanti,||
jarādhammā sattā jarāya parimuccanti,||
maraṇadhammā sattā maraṇena parimuccanti,||
sokaparidevadukkhadomanassupāyāsadhammā sattā sokaparideva dukkhadomanassupāyāsehi parimuccanti?|| ||

Sammādiṭṭhikassa bhikkhave micchādiṭṭhi niddhotā hoti,||
ye ca micchā diṭṭhipaccayā aneke pāpakā akusalā dhammā sambhavanti,||
te c'assa niddhotā honti,||
sammādiṭṭhipaccayā ca aneke kusalā dhammā bhavanā pāripūriɱ gacchanti.|| ||

Sammāsaŋkappassa bhikkhave micchāsaŋkappo niddhoto hoti,||
ye ca micchāsaŋkappapaccayā aneke pāpakā akusalā dhammā sambhavanti,||
te c'assa niddhotā honti,||
sammāsaŋkappapaccayā ca aneke kusalā dhammā bhāvanā-pāripūriɱ gacchanti.|| ||

Sammāvāc'assa bhikkhave micchāvācā niddhotā hoti,||
ye ca sammāvācā paccayā aneke pāpakā akusalā dhammā sambhavanti,||
te c'assa niddhotā honti,||
sammāvācāpaccayā ca aneke kusalā dhammā bhāvanā-pāripūriɱ gacchanti.|| ||

Sammākammantassa bhikkhave micchākammanto niddhoto hoti,||
ye ca micchākammantapa ccayā aneke pāpakā akusalā dhammā sambhavanti,||
te c'assa niddhotā honti,||
sammākammantapaccayā ca aneke kusalā dhammā bhāvanā-pāripūriɱ gacchanti.|| ||

Sammā ājīvassa bhikkhave micchāājīvo niddhoto hoti,||
ye ca micchāājīvapaccayā aneke pāpakā akusalā dhammā sambhavanti,||
te c'assa niddhotā honti,||
sammāājīvapaccayā ca aneke kusalā dhammā bhāvanā-pāripūriɱ gacchanti.|| ||

Sammā vāyāmassa bhikkhave micchāvāyāmo niddhoto hoti,||
ye ca micchāvāyāma paccayā aneke pāpakā akusalā dhammā sambhavanti,||
te c'assa niddhotā honti,||
sammāvāyāma paccayāca aneke kusalā dhammā bhāvanā-pāripūriɱ gacchanti.|| ||

Sammāsatissa bhikkhave micchāsati niddhotā hoti,||
ye ca micchāsatipaccayā aneke pāpakā akusalā dhammā sambhavanti,||
te c'assa niddhotā honti,||
sammāsatipaccayā ca aneke kusalā dhammā bhāvanā-pāripūriɱ gacchanti.|| ||

Sammāsamādhi'ssa bhikkhave micchāsamādhi niddhoto hoti,||
ye ca micchāsamādhipaccayā aneke pāpakā akusalā dhammā sambhavanti,||
te c'assa niddhotā honti,||
sammāsamādhipaccayā ca aneke kusalā dhammā bhāvanā-pāripūriɱ gacchanti.|| ||

Sammāñāṇassa bhikkhave micchāñāṇaɱ niddhotaɱ hoti,||
ye ca micchāñāṇapaccayā aneke pāpakā akusalā dhammā sambhavanti,||
te c'assa niddhotā honti,||
sammāñāṇapaccayā ca aneke kusalā dhammā bhāvanā-pāripūriɱ gacchanti.|| ||

Sammā vimuttissa bhikkhave micchāvimutti niddhotā hoti,||
ye ca micchāvimutti paccayā aneke pāpakā akusalā dhammā sambhavanti,||
te c'assa niddhotā honti,||
sammāvimuttipaccayā ca aneke kusalā dhammā bhāvanā-pāripūriɱ gacchanti.|| ||

Idaɱ kho taɱ bhikkhave ariyaɱ dhopanaɱ,||
yaɱ dhopanaɱ ekanta nibbidāya virāgāya,||
nirodhāya,||
upasamāya abhiññāya sambodhāya nibbānāya saɱvattati,||
yaɱ dhopanaɱ āgamma jātidhammā sattā jātiyā parimuccanti,||
jarādhammā sattā jarāya parimuccanti,||
maraṇadhammā sattā maraṇena parimuccanti,||
sokaparidevadukkhadomanassupāyāsadhammā sattā sokaparideva dukkhadomanassu pāyāsehi parimuccantī ti.|| ||

 


Contact:
E-mail
Copyright Statement   Webmaster's Page