Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XII: Paccorohaṇi-Vagga

Sutta 113

Paṭhama Adhamma Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Adhammo ca bhikkhave veditabbo anattho ca,||
dhammo ca veditabbo attho ca,||
adhammañ ca viditvā anatthañ ca||
dhammañ ca viditvā atthañ ca||
yathā dhammo yathā attho,||
tathā paṭipajjitabbaɱ.|| ||

3. Katamo ca bhikkhave adhammo ca anattho ca?|| ||

Micchā-diṭṭhi,||
micchā-saŋkappo,||
micchā-vācā,||
micchā-kammanto,||
micchā-ājīvo,||
micchā-vāyāmo,||
micchā-sati,||
micchā-samādhi,||
micchā-ñāṇaɱ,||
micchā-vimutti.|| ||

[223] Ayaɱ vuccati bhikkhave adhammo ca anattho ca.|| ||

Katamo ca bhikkhave dhammo ca attho ca?|| ||

Sammā-diṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi,||
sammā-ñāṇaɱ,||
sammā-vimutti.|| ||

Ayaɱ vuccati bhikkhave dhammo ca attho ca.|| ||

Adhammo ca bhikkhave veditabbo anattho ca,||
dhammo ca veditabbo attho ca,||
adhammañ ca viditvā anatthañ ca||
dhammañ ca viditvā atthañ ca||
yathā dhammo yathā attho,||
tathā paṭipajjitabbanti||
iti yaɱ taɱ vuttaɱ,||
idame taɱ paṭicca vuttan ti.|| ||

 


Contact:
E-mail
Copyright Statement   Webmaster's Page