Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XVII: Jāṇussoṇi-Vagga

Sutta 169

Saŋgāravo Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

2. Atha kho Saŋgāravo brāhmaṇo yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Saŋgāravo brāhmaṇo Bhagavantaɱ etad avoca:|| ||

"Kiɱ nu kho bho Gotama orimaɱ tīraɱ,||
kiɱ pārimaɱ tīran" ti?|| ||

3. Pāṇātipāto kho brāhmaṇa orimaɱ tīraɱ,||
pāṇātipātā veramaṇī pārimaɱ tīraɱ.|| ||

Adinnādānaɱ kho brāhmaṇa orimaɱ tīraɱ,||
adinnādānā veramaṇī pārimaɱ tīraɱ.|| ||

Kāmesu micchācāro kho brāhmaṇa orimaɱ tīraɱ,,||
kāmesu micchācārā veramaṇī pārimaɱ tiraɱ.|| ||

Musāvādo orimaɱ tiraɱ,,||
musāvādā veramaṇī pārimaɱ tīraɱ.|| ||

Pisunāvācā orimaɱ tīraɱ,||
pisunāya vācāya veramaṇī pārimaɱ tīraɱ.|| ||

Pharusā vācā orimaɱ tiraɱ,||
pharusāya vācāya veramaṇī pārimaɱ tiraɱ.|| ||

Samphappalāpo orimaɱ tiraɱ,||
samphappalāpā veramaṇī pārimaɱ tiraɱ.|| ||

Abhijjhā orimaɱ tīraɱ,||
anabhijjhā pārimaɱ tīraɱ.|| ||

Vyāpādo orimaɱ tīraɱ,||
avyāpādo pārimaɱ tīraɱ.|| ||

Micchādiṭṭhi orimaɱ tīraɱ,||
sammādiṭṭhi pārimaɱ tīraɱ.|| ||

Idaɱ kho brāhmaṇa orimaɱ tīraɱ,||
idaɱ pārimaɱ tīranti.|| ||

Appakā te manussesu ye janā pāragāmino,||
Athāyaɱ itarā pajā - tīram evānudhāvati.|| ||

Ye ca kho samma-d-akkhāte - dhamme dhammānuvattino,||
Te janā pāram essanti - maccudheyyaɱ suduttaraɱ.|| ||

Kaṇhaɱ dhammaɱ vippahāya - sukkaɱ bhāvetha paṇḍito,||
Okā anokaɱ āgamma - viveke yattha dūramaɱ.|| ||

Tatrābhiratim iccheyya - hitvā kāme akiñcano,||
Pariyodapeyya attānaɱ - cittaklesehi paṇḍito.|| ||

Yesaɱ sambodhiyaŋgesu - sammācittaɱ subhāvitaɱ,||
Ādānapaṭinissagge - anupādāya ye ratā,||
Khīṇāsavā jutīmanto - te loke parinibbutā ti.|| ||

 


Contact:
E-mail
Copyright Statement   Webmaster's Page