Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XVII: Jāṇussoṇi-Vagga

Sutta 172

Dutiya Adhamma Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Adhammo ca bhikkhave veditabbo,||
dhammo ca,||
anattho ca veditabbo attho ca,||
adhammañ ca viditvā dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban ti.|| ||

Idam avoca Bhagavā||
idaɱ vatvā sugato uṭṭhāy āsanā vihāraɱ pāvisi.|| ||

3. Atha kho tesaɱ bhikkhūnaɱ acirapakkantassa||
Bhagavato etad ahosi:|| ||

"Idaɱ kho no āvuso Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho.|| ||

"Adhammo ca bhikkhave veditabbo,||
dhammo ca,||
anattho ca veditabbo attho ca,||
adhammañ ca viditvā dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban" ti.|| ||

Ko nu kho imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā ti?|| ||

Atha kho tesaɱ bhikkhunaɱ etad ahosi:|| ||

'Ayaɱ kho āyasmā MahāKaccāno satthu c'eva saɱvaṇṇito,||
sambhāvito ca viññūnaɱ sabrahmacārīnaɱ,||
pahoti cāyasmā MahāKaccāno imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Yan nūna mayaɱ yen'āyasmā MahāKaccāno ten'upasaŋkameyyāma.|| ||

Upasaŋkamitvā āyasmantaɱ MahāKaccānaɱ etam atthaɱ puccheyyāma.|| ||

Yathā no āyasmā MahāKaccāno vyākarissati,||
tathā naɱ dhāressāmā ti.|| ||

4. Atha kho te bhikkhu yen'āyasmā MahāKaccāno ten'upasaŋkamiɱsu.|| ||

Upasaŋkamitavā āyasmanta MahāKaccānena saddhiɱ sammodiɱsu,||
sammodanīyaɱ kathaɱ sārāṇīyaɱ vītisāretvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhu āyasmantaɱ MahāKaccānaɱ etad avocuɱ:|| ||

Idaɱ kho no āvuso Kaccāna Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban" ti.|| ||

Tesaɱ no āvuso amhākaɱ acirapakkantassa Bhagavato etad ahosi:|| ||

'Idaɱ kho no āvuso Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban" ti.|| ||

Ko nu kho imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā ti?|| ||

Tesaɱ no āvuso amhākaɱ etad ahosi:|| ||

"Ayaɱ kho āyasmā MahāKaccāno satthū c'eva saɱvaṇṇito sambhāvito ca viññūnaɱ sabrahmacārīnaɱ,||
pahoti cāyasmā MahāKaccāno imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Yan nūna mayaɱ yen'āyasmā MahāKaccāno ten'upasaŋkameyyāma,||
upasaŋkamitvā āyasmantaɱ MahāKaccānaɱ etam atthaɱ puccheyyāma.|| ||

Yathā no āyasmā MahāKaccāno vyākarissati,||
tathā naɱ dhāreyyāmā" ti.|| ||

Vibhajitu āyasmā MahāKaccāno ti.|| ||

5. Seyyathā pi āvuso puriso sāratthiko sāragavesī sārapariyesanaɱ caramāno mahato rūkkhassa tiṭṭhato sāravato atikkamm eva mūlaɱ atikkamma khandhaɱ sākhāpalāse sāraɱ pariyesitabbaɱ maññeyya,||
evaɱ sampadam idaɱ.|| ||

Āyasmantānaɱ satthari sammukhībhūte taɱ Bhagavantaɱ atisitvā amhe etam atthaɱ paṭipucchitabbaɱ maññatha.|| ||

So h'āvuso Bhagavā jānaɱ jānāti,||
passaɱ passati,||
cakkhubhūto||
ñāṇabhūto||
dhammabhūto||
brahmabhūto||
vattā pavattā atthassa ninnetā amatassa dātā dhammassāmī Tathāgato.|| ||

So c'eva pan'etassa kālo ahosi,||
yaɱ tumhe Bhagavantaɱ yeva upasaŋkamitvā etam atthaɱ puccheyyātha.|| ||

Yathā vo Bhagavā vyākareyya,||
tathā naɱ dhāreyyathā ti.|| ||

6. Addhāvuso Kaccāna Bhagavā jānaɱ jānāti,||
passaɱ passati,||
cakkhubhūto||
ñāṇabhūto||
dhammabhūto||
brahmabhūto||
vattā pavattā atthassa ninnetā amatassa dātā dhammasāmi Tathāgato.|| ||

So c'eva panetassa kālo ahosi,||
yaɱ mayaɱ Bhagavantaɱ yeva upasaŋkamitvā etam atthaɱ puccheyyāma.|| ||

Yathā no Bhagavā vyākareyya,||
tathā naɱ dhāreyyāma.|| ||

Api c'āyasmā MahāKaccāno satthu c'eva saɱvaṇṇito,||
sambhāvito ca viññūnaɱ sabirahmacārīnaɱ,||
pahoti c'āyasmā MahāKaccāno imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Vibhajat'āyasmā MahāKaccāno agarukaritvā ti.|| ||

7. Tena h'āvuso suṇātha sādhukaɱ manasikarotha bhāsissāmī ti.|| ||

'Evam āvuso' ti kho te bhikkhu āyasmato MahāKaccānassa paccassosuɱ.|| ||

Āyasmā MahāKaccāno etad avoca:|| ||

Yaɱ kho no āvuso Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho|| ||

"Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban" ti.|| ||

Katamo c'āvuso adhammo,||
katamo ca dhammo,||
katamo ca anattho,||
katamo ca attho?|| ||

"Pāṇātipāto āvuso adhammo,
pāṇātipātā veramaṇī dhammo,||
ye ca pāṇātipātapaccayā aneke pāpakā akusalā dhammā sambhavanti,
ayaɱ anattho,||
pāṇātipātā veramaṇīpaccayā ca aneke kusalā dhammā bhāvanā-pāripūriɱ gacchanti,
ayaɱ attho.|| ||

Adinnādānaɱ āvuso adhammo,||
adinnādānā veramaṇī dhammo,||
ye ca adinnādānapaccayā aneke pāpakā akusalā dhammā sambhavanti,
ayaɱ anattho,||
adinnādānā veramaṇīpaccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Kāmesu micchācāro āvuso adhammo,||
kāmesu micchācārā veramaṇī dhammo,||
ye ca kāmesu micchācārapaccayā ca aneke akusalā dhammā sambhavanti,
ayaɱ anattho,||
kāmesu micchācārā veramaṇīpaccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Musāvādo āvuso adhammo,||
musāvādā veramaṇī dhammo,||
ye ca musāvādapaccayā aneke pāpakā akusalā dhammā sambhavanti,
ayaɱ anattho,||
musāvādā veramaṇīpaccayā ca aneke kusalā dhammā bhāvanā-pāripūriɱ gacchanti, ayaɱ attho.|| ||

Pisunāvācā āvuso adhammo,||
pisunāya vācāya veramaṇī dhammo,||
ye ca pisunāvācāpaccayā aneke pāpakā akusalā dhammā sambhavanti,
ayaɱ anattho,||
pisunāya vācāya veramaṇīpaccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Pharusāvācā āvuso adhammo,||
pharusāya vācāya veramaṇī dhammo,||
ye ca pharusāvācāpaccayā aneke pāpākā akusalā dhammā sambhavanti,
ayaɱ anattho,||
pharusāya vācāya veramaṇīpaccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Samphappalāpo āvuso adhammo,||
samphappalāpā veramaṇī dhammo,||
ye ca samphappalāpapaccayā aneke pāpakā akusalā dhammā sambhavanti,
ayaɱ anattho,||
samphappalāpā veramaṇīpaccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Abhijjhā āvuso adhammo,||
anabhijjhā dhammo,||
ye ca abhijjhāpaccayā aneke pāpakā akusalā dhammā sambhavanti,
ayaɱ anattho,||
anabhijjhāpaccayā aneke kusalā dhammā bhāvanā-pāripūriɱ gacchanti,||
ayaɱ attho.|| ||

Vyāpādo āvuso adhammo,||
avyāpādo dhammo,||
ye ca vyāpādapaccayā aneke pāpakā akusalā dhammā sambhavanti,
ayaɱ anattho,||
avyāpādapaccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Micchā-diṭṭhi āvuso adhammo,||
sammā-diṭṭhi dhammo,||
ye ca micchā-diṭṭhipaccayā aneke pāpakā akusalā dhammā sambhavanti,
ayaɱ anattho,||
sammā-diṭṭhipaccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Yaɱ kho no āvuso Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban" ti.|| ||

Imassa kho ahaɱ āvuso Bhagavatā saŋkhittena uddesassa uddiṭṭhassa vitthārena atthaɱ avibhattassa evaɱ vitthārena atthaɱ ājānāmi.|| ||

Ākaŋkamānā ca pana tumhe āvuso Bhagavantaɱyeva upasaɱkamitvā etam atthaɱ puccheyyātha.|| ||

Yathā vo Bhagavā vyākaroti||
tathā naɱ dhāreyyathā ti.|| ||

'Evam āvuso' ti||
kho te bhikkhu āyasmato MahāKaccānassa bhāsitaɱ abhinanditvā anumoditvā uṭṭhāy āsanā yena Bhagavā ten'upasaɱkamiɱsu.|| ||

Upasaɱkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhu Bhagavantaɱ etad avocuɱ:|| ||

9. "Yaɱ kho no bhante Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho|| ||

"Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban" ti.|| ||

Tesaɱ no bhante amhākaɱ acirapakkantassa Bhagavato etad ahosi:|| ||

"Idaɱ kho no āvuso Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho|| ||

'Adhammo ca bhikkhave veditabbo||
dhammo ca,||
anattho ca veditabbo||
attho ca,||
adhammañ ca viditvā dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban' ti.|| ||

Ko nu kho imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā" ti?|| ||

Tesaɱ no bhante amhākaɱ etad ahosi:|| ||

"Ayaɱ kho āyasmā MahāKaccāno satthu c'eva saɱvaṇṇito,||
sambhāvito ca viññūnaɱ sabrahmacārīnaɱ,||
pahoti c'āyasmā MahāKaccāno imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Yan nūna mayaɱ yen'āyasmā MahāKaccāno ten'upasaŋkameyyāma,||
upasaŋkamitvā āyasmā MahāKaccānaɱ etam atthaɱ puccheyyāma.|| ||

Yathā no āyasmā MahāKaccāno vyākarissati,||
tathā naɱ dhāressāmā ti.|| ||

Atha kho mayaɱ bhante yen'āyasmā MahāKaccāno ten'upasaɱkamimha,||
upasaɱkamitvā āyasmantaɱ MahāKaccānaɱ etam atthaɱ apucchimha.|| ||

Tesaɱ no bhante āyasmanta MahāKaccānena||
imehi ākārehi||
imehi padehi||
imehi vyañjanehi attho suvibhatto" ti.|| ||

10. Sādhu sādhu bhikkhave||
paṇḍito bhikkhave MahāKaccāno,||
mahāpañño bhikkhave MahāKaccāno||
Maɱ ce pi tumhe bhikkhave upasaɱkamitvā etam atthaɱ puccheyyātha,||
aham pi c'etaɱ evam eva vyākaryeyaɱ.|| ||

Yathā taɱ MahāKaccānena vyākataɱ||
eso cetassa attho,||
evañ ca naɱ dhāreyyāthā ti.|| ||

 


Contact:
E-mail
Copyright Statement   Webmaster's Page