Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XVII: Jāṇussoṇi-Vagga

Sutta 175

Saparikkamana Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Saparikkamano ayaɱ bhikkhave dhammo,||
nāyaɱ dhammo aparikkamano.|| ||

Kathañ ca bhikkhave saparikkamano ayaɱ dhammo,||
nāyaɱ dhammo aparikkamano?|| ||

Pāṇātipātissa bhikkhave,||
pāṇātipātā veramaṇī parikkamanaɱ hoti.|| ||

Adinnādānassa bhikkhave,||
adinnādānā veramaṇī parikkamanaɱ hoti.|| ||

Kāmesu micchācārassa,||
bhikkhave kāmesu micchācārā veramaṇī parikkamanaɱ hoti.|| ||

Musāvādassa bhikkhave,||
musāvādā veramaṇī parikkamanaɱ hoti.|| ||

Pisunāvācassa bhikkhave,||
pisunāvācā veramaṇī parikkamanaɱ hoti.|| ||

Pharusāvācassa bhikakhave,||
pharusāya vācāya veramaṇī parikkamanaɱ hoti.|| ||

Samphappalāpissa bhikkhave,||
samphappalāpā veramaṇī parikkamanaɱ hoti.|| ||

Abhijjhālussa bhikkhave,||
anabhijjhā parikkamanaɱ hoti.|| ||

Vyāpannassa bhikkhave,||
avyāpādo parikkamanaɱ hoti.|| ||

Micchādiṭṭhikassa bhikkhave,||
sammā diṭṭhi parikmanaɱ hoti.|| ||

Evaɱ kho bhikkhave, saparikkamano ayaɱ dhammo,||
nāyaɱ dhammo aparikkamano ti.|| ||

 


Contact:
E-mail
Copyright Statement   Webmaster's Page