Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XVII: Jāṇussoṇi-Vagga

Sutta 176

Cunda Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[263]

[1][pts][than] Evaɱ me sutaɱ:|| ||

Ekaɱ samayaɱ Bhagavā Pāvāyaɱ viharati Cundassa kammāraputtassa Ambavane.|| ||

Atha kho Cundo kammāraputto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Cundaɱ kammāraputtaɱ Bhagavā etad avoca:|| ||

2. Kassa no tvaɱ Cunda soceyyāni rocesī' ti?|| ||

'Brāhmaṇā bhante pacchābhūmakā kamaṇḍalukā sevālamālikā aggiparicārakā udakorohakā soceyyāni paññāpenti||
tesāhaɱ soceyyāni rocemī' ti.|| ||

'Yathā kathaɱ pana Cunda,||
brāhmaṇā pacchābhūmakā kamaṇḍalukā sevālamālikā aggiparicārikā udakorohakā soceyyāni paññāpentī' ti?|| ||

'Idha bhante brāhmaṇā pacchābhūmakā kamaṇḍalukā sevālamālakā aggiparicārikā udakorohakā,||
te sāvake evaɱ samādapenti:|| ||

"Ehi tvaɱ ambho purisa,||
kālass'eva vṭṭhahanto'va sayanamhā paṭhaviɱ āmaseyyāsi;||
no ce paṭhaviɱ āmaseyyāsi,||
allāni gomayāni āmaseyyāsi;||
no ce allāni gomayāni āmaseyyāsi,||
haritāni tiṇāni āmaseyyāsi;||
no ce haritāni tiṇāni āmaseyyāsi,||
aggiɱ paricareyyāsi;||
no ce aggiɱ paricareyyāsi,||
pañjaliko ādiccaɱ namasseyyāsi;||
no ce pañjaliko ādiccaɱ namasseyyāsi,
sāyatatiyakaɱ udakaɱ oroheyyāsī" ti.|| ||

'Evaɱ kho bhante brāhmaṇā pacchābhūmakā kamaṇḍalukā sevālamālikā aggiparicārakā udakorohakā soceyyāni paññāpenti,||
tesāhaɱ soceyyāni rocemī' ti.|| ||

'Aññathā kho Cunda brāhmaṇā pacchābhūmakā kamaṇḍalukā sevālamālikā aggiparicārakā udakorohakā soceyyāni paññāpenti,||
aññathā ca [264] pana ariyassa vinaye soceyyaɱ hotī' ti.|| ||

'Yathā kathaɱ pana bhante ariyassa vinaye soceyyaɱ hoti?|| ||

Sādhu me bhante Bhagavā tathā dhammaɱ desetu,||
yathā ariyassa vinaye soceyyaɱ hotī' ti.|| ||

'Tena hi Cunda suṇāhi,||
sādhukaɱ manasikarohi,||
bhāsissāmī' ti.|| ||

'Evaɱ bhante' ti kho Cundo kammāraputto Bhagavato paccassosī.|| ||

Bhagavā etad avoca:|| ||

3. 'Tividhaɱ kho Cunda kāyena asoceyyaɱ hoti,||
catubbidhaɱ vācāya asoceyyaɱ hoti,||
tividhaɱ manasā asoceyyaɱ hoti.|| ||

Kathañ ca Cunda tividhaɱ kāyena asoceyyaɱ hoti?|| ||

4. Idha Cunda ekacco pāṇātipātī hoti luddo lohitapāṇī hatapahaṭe niviṭṭho adayāpanno sabbapāṇa-bhūtesu.|| ||

Adinnādāyī hoti yaɱ taɱ parassa paracittūpakaraṇaɱ gāmagataɱ vā araññagataɱ va,||
taɱ adinnaɱ theyyasaŋkhātaɱ ādātā hoti,|| ||

Kāmesu micchācārī hoti,||
yā tā māturakkhitā piturakkhitā bhāturakkhitā bhagiṇirakkhitā ñātirakkhitā dhammarakkhitā sassāmikā saparidaṇḍā antamaso mālāgulaparikkhittā pi,||
tathārūpāsu cārittaɱ āpajjitā hoti.|| ||

Evaɱ kho Cunda tividhaɱ kāyena asoceyyaɱ hoti.|| ||

Kathañ ca Cunda catubbidhaɱ vācāya asoceyyaɱ hoti?|| ||

5. Idha Cunda ekacco musāvādī hoti,||
sabhāgato vā parisagato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho|| ||

"Eh'ambho purisa yaɱ jānāsi,||
taɱ vadehī" ti.|| ||

So ajānaɱ vā "āhaɱ jānāmī" ti,||
jānaɱ vā āha "na jānāmī" ti,||
apassaɱ vā āha "passāmī" ti,||
passaɱ vā āha "na passāmī" ti.|| ||

Iti [265] attahetu vā parahetu vā āmisa-kiñcikkha-hetu vā sampajānamusā bhāsitā hoti.|| ||

Pisunāvāco hoti,||
ito sutvā amutra akkhātā imesaɱ bhedāya,||
amutra vā sutvā imesaɱ akkhātā amūsaɱ bhedāya.|| ||

Iti samaggānaɱ vā bhettā bhinnānaɱ vā anuppadātā vaggārāmo vaggarato vagganandī vaggakaraṇiɱ vācaɱ bhāsitā hoti.|| ||

Pharusavāco hoti,||
yā sā vācā aṇḍakā kakkasā parakaṭukā parābhisajjanī kodhasāmantā asamādhisaɱvattanikā,||
tathā-rūpiɱ vācaɱ bhāsitā hoti.|| ||

Samphappalāpī hoti,||
akāla-vādī abhūta-vādī anattha-vādī adhamma-vādī avinaya-vādī anidhānavatiɱ vācaɱ bhāsitā hoti||
akālena anapadesaɱ aparayantavatiɱ anatthasaɱhitaɱ.|| ||

Evaɱ kho Cunda catubbidhaɱ vācāya asoceyyaɱ hoti.|| ||

Kathañ ca Cunda tividhaɱ manasā asoceyyaɱ hoti?|| ||

5. Idha Cunda ekacco abhijjhālū hoti,||
yaɱ taɱ parassa paracittūpakaraṇa taɱ abhijjhitā hoti|| ||

"Aho vata yaɱ parassa,||
taɱ mama assā" ti.|| ||

Vyāpannacitto hoti,||
paduṭṭhamanasaŋkappo|| ||

"Ime sattā haññantu vā bajjhantu vā ucchijjantu vā vinassantu vā mā vā ahesuɱ iti vā" ti.|| ||

Micchādiṭṭhiko hoti,||
viparītadassano:|| ||

"N'atthi dinnaɱ,||
n'atthi yiṭṭhaɱ,||
n'atthi hutaɱ,||
n'atthi sukaṭa-dukkaṭānaɱ kammānaɱ phalaɱ vipāko,||
n'atthi ayaɱ loko,||
n'atthi paroloko,||
n'atthi mātā,||
n'atthi pitā,||
n'atthi sattā opapātikā,||
n'atthi loke samaṇa-brāhmaṇā sammaggatā sammāpaṭipannā,||
ye imañ ca lokaɱ parañ ca lokaɱ sayaɱ abhiññā sacchikatvā pavedentī' ti.|| ||

Evaɱ kho Cunda tividhaɱ manasā asoceyyaɱ hotī.|| ||

[266] 6. Ime kho Cunda dasa akusalakammapathā.|| ||

Imehi kho Cunda dasahi akusalehi kammapathehi samannāgato kālass'eva vuṭṭhahanto'va sayanambhā paṭhaviñ ce pi āmasati,||
asuci yeva hoti.|| ||

No ce pi paṭhaviɱ āmasati,||
asuciyeva hoti.|| ||

Allāni ce pi gomayāni āmasati,||
asuciyeva hoti.|| ||

No ce pi allāni gomayāni āmasati,||
asuciyeva hoti.|| ||

Haritāni ce pi tiṇāni āmasati,||
asuciyeva hoti.|| ||

No ce pi no ce pi haritāni tiṇāni,||
āmasati asuciyeva hoti.|| ||

Aggiñ ce pi paricarati,||
asuciyeva hoti.|| ||

No ce pi aggiɱ paricarati,||
asuciyeva hoti.|| ||

Pañjaliko ce pi ādiccaɱ namassati,||
asuciyeva hoti.|| ||

No ce pi pañjaliko ādiccaɱ namassati,||
asuciyeva hoti.|| ||

Sāyatatiyakañ ce pi udakaɱ orohati,||
asuciyeva hoti.|| ||

No ce pi sāyatatiyakaɱ udakaɱ orohati,||
asuciyeva hoti.|| ||

Taɱ kissa hetu?|| ||

Ime Cunda dasa akusalakammapathā asuci yeva honti,||
asucikaraṇā ca.|| ||

Imesaɱ pana Cunda dasannaɱ akusalānaɱ kammapathānaɱ samannāgamanahetu nirayo paññāyati,||
tiracchānayoni paññāyati,||
pettivisayo paññāyati,||
yā vā pan'aññā pi kāci duggatiyo.|| ||

7. Tividhaɱ kho Cunda kāyena soceyyaɱ hoti,||
catubbidhaɱ vācāya soceyyaɱ hoti,||
tividhaɱ manasā soceyyaɱ hoti.|| ||

Kathaɱ Cunda tividhaɱ kāyena soceyyaɱ hoti?|| ||

8. Idha Cunda ekacco pāṇātipātaɱ pahāya pāṇātipātā paṭivirato hoti,||
nihita-daṇḍo nihita-sattho lajjī dayāpanno sabbapāṇabhūtahitānukampī viharati.|| ||

Adinnādānaɱ pahāya adinnādānā paṭivirato hoti,||
yaɱ taɱ parassa paravittūpakaraṇaɱ gāmagataɱ vā araññagataɱ vā,||
na taɱ adinnaɱ theyyasaŋkhātaɱ ādātā hoti.|| ||

Kāmesu micchācāraɱ pahāya kāmesu micchācārā paṭivirato hoti.|| ||

Yā tā māturakkhitā piturakkhitā bhāturakkhitā bhaginirakkhitā ñātirakkhitā dhammarakkhitā sassāmikā saparidaṇḍā [267] antamaso mālāgulaparikkhittā pi,||
tathārūpāsu na cārittaɱ āpajjitā hoti.|| ||

Evaɱ kho Cunda tividhaɱ kāyena soceyyaɱ hoti.|| ||

Kathañ ca Cunda catubbidhaɱ vācāya soceyyaɱ hoti?|| ||

9. Idha Cunda ekacco musā-vādaɱ pahāya musā-vādā paṭivirato hoti,||
sabhāgato vā||
parisagato vā||
ñātimajjhagato vā||
pūgamajjhagato vā||
rājakulamajjhagato vā||
abhinīto sakkhipuṭṭho:|| ||

"Ehambho purisa yaɱ jānāsi,||
taɱ vadehī" ti.|| ||

So ajānaɱ vā "āhaɱ na jānāmī" ti,||
jānaɱ vā "āhaɱ jānāmī" ti,||
apassaɱ vā "āhaɱ na passāmī" ti,||
passaɱ vā "āhaɱ passāmī" ti.|| ||

Iti attahetu vā parahetu vā āmisa-kiñcikkha-hetu vā na sampajānamusā bhāsitā hoti.|| ||

Pisunā vācaɱ pahāya pisunāya vācāya paṭivirato hoti.|| ||

Na ito sutvā amutra akkhātā imesaɱ bhedāya.|| ||

Amutra vā sutvā na imesaɱ akkhātā amūsaɱ bhedāya.|| ||

Iti bhinnānaɱ vā sandhātā sahitānaɱ vā anuppadātā samaggārāmo samaggarato samagganandī samaggakaraṇaɱ vācaɱ bhāsitā hoti.|| ||

Pharusaɱ vācaɱ pahāya pharusāya vācāya paṭivirato hoti,||
yā sā vācā neḷā kaṇṇa-sukhā pemanīyā hadayaŋgamā porī bahujanakantā bahujanamanāpā,||
tathā-rūpiɱ vācaɱ bhāsitā hoti.|| ||

Samphappalāpaɱ pahāya samphappalāpā paṭivirato hoti,||
kālavādī bhūtavādī atthavādī dhammavādī vinayavādī nidhānavatiɱ vācaɱ bhāsitā hoti kālena sāpadesaɱ pariyantavatiɱ atthasaɱhitaɱ.|| ||

Evaɱ kho Cunda catubbidhaɱ vācāya soceyyaɱ hoti.|| ||

Kathañ ca Cunda tividhaɱ manasā soceyyaɱ hoti?|| ||

10. Idha Cunda ekacco anabhijjhālū hoti,||
yaɱ taɱ parassa paravittūpakaraṇaɱ,||
taɱ anābhijjhitā hoti:|| ||

"Aho vata yaɱ parassa taɱ mama assā" ti.|| ||

Avyāpannacitto hoti appaduṭṭhamanasaɱkappo:|| ||

"Ime sattā averā avyāpajjā anīghā sukhī attānaɱ pariharantu" ti.|| ||

Sammādiṭṭhiko [268] hoti aviparītadassano:|| ||

"Atthi dinnaɱ,||
atthi yiṭṭhaɱ,||
atthi hutaɱ,||
atthi sukaṭa-dukkaṭānaɱ kammānaɱ phalaɱ vipāko,||
atthi ayaɱ lokā atthi paro loko,||
atthi mātā,||
atthi pitā,||
atthi satto opapātikā,||
atthi loke samaṇa-brāhmaṇā sammaggatā sammāpaṭipannā,||
ye imaɱ ca lokaɱ parañ ca lokaɱ sayaɱ abhiññā sacchikatvā pavedentī" ti.|| ||

Evaɱ kho Cunda tividhaɱ manasā soceyyaɱ hoti.|| ||

11. Ime kho Cunda dasa kusalakammapathā.|| ||

Imehi kho Cunda dasahi kusalehi dhammapathehi samannāgato kālass'eva vṭṭhahanto'va sayanambhā paṭhaviɱ ce pi āmasati,||
suci yeva hoti.|| ||

No ce pi paṭhaviɱ āmasati,||
suci yeva hoti.|| ||

Allāni ce pi gomayāni āmasati,||
suci yeva hoti.|| ||

No ce pi allāni gomayāni āmasati,||
suci yeva hoti.|| ||

Haritāni ce pi tiṇāni āmasati,||
suci yeva hoti.|| ||

No ce pi haritāni tiṇāni āmasati,||
suci yeva hoti.|| ||

Aggiñ ce pi paricarati,||
suci yeva hoti.|| ||

No ce pi aggiɱ paricarati,||
suci yeva hoti.|| ||

Pañjaliko ce pi ādiccaɱ namassati,||
suci yeva hoti.|| ||

No ce pi pañjaliko ādiccaɱ namassati,||
suci yeva hoti.|| ||

Sāyatatiyakañ ce pi udakaɱ orohati,||
suci yeva hoti.|| ||

No ce pi sāyatatiyakaɱ udakaɱ orohati,||
suci yeva hoti.|| ||

Taɱ kissa hetu?|| ||

Ime Cunda dasa kusalakammapathā suci yeva honti,||
sucikaraṇā ca.|| ||

Imesañ ca pana Cunda dasannaɱ kusalānaɱ kammapathānaɱ samannāgamanahetu devā paññāyanti,||
manussā paññāyanti,||
yā vā pan'aññā pi kāci sugatiyo' ti.|| ||

12. Evaɱ vutte Cundo kammāraputto Bhagavantaɱ etad avoca:|| ||

Abhikkantaɱ bhante abhikkantaɱ bhante,||
seyyathā pi bhante,||
nikkujjitaɱ vā ukkujjeyya paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya cakkhumanto rūpāni dakkhinti.|| ||

Evam eva bhotā Gotamena aneka-pariyāyena dhammo pakāsito.|| ||

Ete mayaɱ bhavantaɱ Gotamaɱ saraṇaɱ gacchāmi dhammañca bhikkhu saŋghañca.|| ||

Upāsakaɱ maɱ bhante Bhagavā dhāretu ajjatagge pāṇupetaɱ saraṇaɱ gatanti.|| ||

 


Contact:
E-mail
Copyright Statement   Webmaster's Page