Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XVII: Jāṇussoṇi-Vagga

Sutta 177

Jāṇussoṇī Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[269]

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho Jāṇussoṇī brāhmaṇo yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi,||
eka-m-antaɱ nisinno kho Jāṇussoṇī brāhmaṇo Bhagavantaɱ etad avoca:|| ||

Mayam assu bho Gotama brāhmaṇā nāma dānāni dema saddhāni karoma:||
'idaɱ dānaɱ petānaɱ ñātisālohitānaɱ upakappatu,||
idaɱ dānaɱ petā ñātisālohitā paribhuñjantu' ti.|| ||

Kacci taɱ bho Gotama dānaɱ petānaɱ ñātisālohitānaɱ upakappati?|| ||

Kacci te petā ñātisālohitā taɱ dānaɱ paribhuñjanti ti?|| ||

Ṭhāne kho brāhmaṇa upakappati,||
no aṭṭhāneti.|| ||

Katamañ ca bho Gotama ṭhānaɱ?|| ||

Katamaɱ aṭṭhānanti?|| ||

Idha brāhmaṇa ekacco pāṇātipātī hoti,||
adinnādāyī hoti||
kāmesu micchācārī hoti,||
musāvādī hoti,||
pisunavāco hoti,||
pharusavāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhiko hoti,||
so kāyassabhedā paraɱ maraṇā Nirayaɱ upapajjati.|| ||

Yo nerayikānaɱ sattānaɱ āhāro tena so tattha yāpeti,||
tena so tattha tiṭṭhati.|| ||

Idam pi kho brāhmaṇa aṭṭhānaɱ yattha ṭhitassa taɱ dānaɱ na upakappati.|| ||

Idha pana brāhmaṇa ekacco pāṇātipātī hoti,||
adinnādāyī hoti,||
kāmesu micchācārī hoti,||
musāvādī hoti,||
pisunavāco hoti,||
pharusāvāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhiko hoti.|| ||

So kāyassa bhedā param maraṇā tiracchānayoniɱ upapajjati.|| ||

Yo tiracchānayonikānaɱ sattānaɱ āhāro tena so tattha yāpeti,||
tena so tattha tiṭṭhati.|| ||

Idam pi kho brāhmaṇa aṭṭhānaɱ,||
yattha ṭhitassa taɱ dānaɱ na upakappati.|| ||

Idha pana brāhmaṇa ekacco pāṇātipātā paṭivirato hoti,||
adinnādānā paṭivirato hoti,||
kāmesu micchācārā paṭivirato hoti,||
musā-vādā paṭivirato hoti,||
pisunāya [270] vācāya paṭivirato hoti,||
pharusāya vācāya paṭivirato hoti,||
samphappalāpā paṭivirato hoti,||
anabhijjhālū hoti,||
avyāpannacitto hoti,||
sammādiṭṭhiko hoti.|| ||

So kāyassa bhedā param maraṇā manussānaɱ sahavyataɱ upapajjati.|| ||

Yo manussānaɱ āhāro tena so tattha yāpeti,||
tena so tattha tiṭṭhati.|| ||

Idam pi kho brāhmaṇa aṭṭhānaɱ,||
yattha ṭhitassa taɱ dānaɱ na upakappati.|| ||

Idha pana brāhmaṇa ekacco pāṇātipātā paṭivirato hoti,||
adinnādānā paṭivirato hoti,||
kāmesu micchācārā paṭivirato hoti,||
musā-vādā paṭivirato hoti,||
pisunāya vācāya paṭivirato hoti,||
pharusāya vācāya paṭivirato hoti,||
samphappalāpā paṭivirato hoti,||
anabhijjhālū hoti,||
avyāpannacitto hoti,||
sammādiṭṭhiko hoti.|| ||

So kāyassa bhedā param maraṇā devānaɱ sahavyataɱ upapajjati.|| ||

Yo devānaɱ āhāro tena so tattha yāpeti,||
tena so tattha tiṭṭhati.|| ||

Idam pi kho brāhmaṇa aṭṭhānaɱ,||
yattha ṭhitassa taɱ dānaɱ na upakappati.|| ||

Idha pana brāhmaṇa ekacco pāṇātipātī hoti,||
adinnādāyī hoti,||
kāmesu mcchācārī hoti,||
musāvādī hoti,||
pisunavāco hoti,||
parusāvāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhiko hoti.|| ||

So kāyassa bhedā paraɱ maraṇā petti visayaɱ upapajjati.|| ||

Yo pettivesayikānaɱ sattānaɱ āhāro,||
tena so tattha yāpeti.|| ||

Tena so tattha tiṭṭhati.|| ||

Yaɱ vā panassa anuppavecchanti2 mittā vā amaccā vā ñāti vā sālohitā vā,||
tena so tattha yāpeti.|| ||

Tena so tattha tiṭṭhati.|| ||

Idaɱ kho brāhmaṇa ṭhānaɱ,||
yattha ṭhitassa taɱ dānaɱ upakappatī ti.|| ||

Sace pana bho Gotama so peto ñātisālohito taɱ ṭhānaɱ anuppanno hoti,||
ko taɱ dānaɱ paribhuñjatīti? Aññepissa brāhmaṇa petā ñāti sālohitā taɱ ṭhānaɱ anupapattā honti.|| ||

Te taɱ dānaɱ paribhuñjantī ti.|| ||

Sace pana bho Gotama so c'eva peto ñātisālohito taɱ ṭhānaɱ anupapanno hoti,||
aññe pissa petā ñātisālohitā taɱ ṭhānaɱ anupapannā hontī.|| ||

Ko taɱ dānaɱ paribhuñjatī ti? Aṭṭhānaɱ kho etaɱ brāhmaṇa,||
anavakāso yaɱ taɱ ṭhānaɱ vicittaɱ assa iminā dīghena addhunā yad idaɱ [271] petehi ñāti sālohitehi.|| ||

Api ca brāhmaṇa dāyakopi anipphalo hoti.|| ||

Aṭṭhānepi bhavaɱ Gotamo parikappaɱ vadatīti? Aṭṭhānepi kho ahaɱ brāhmaṇa parikappaɱ vadāmi Idha brāhmaṇa ekacco pāṇātipātī hoti.|| ||

Adinnādāyī hoti,||
kāmesu micchācārī hoti,||
musāvādī hoti,||
pisunāvāco hoti,||
pharusavāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhiko hoti,||
so dātā hoti,||
samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ,||
seyyāvasathapadīpeyyaɱ.|| ||

So kāyassa bhedā paraɱ maraṇā hatthinaɱ sahavyataɱ upapajjati.|| ||

So tattha lābhī hoti annassa pānassa mālā nānālaŋkārassa.|| ||

Yaɱ kho brahmaṇa idha pāṇātipātī,||
adinnādāyī,||
kāmesu micchācārī,||
musāvādī,||
pisunavāco,||
pharusavāco,||
samphappalāpī,||
abhijjhālū,||
vyāpannacitto,||
micchādiṭṭhiko,||
tena so kāyassabhedā param maraṇā hatthīnaɱ sahavyataɱ upapajjati.|| ||

Yaɱ ca kho so dātā hoti samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ,||
seyyāvasathapadīpeyyaɱ,||
tena so tattha lābhī hoti annassa pānassa mālā nānālaɱkārassa.|| ||

Idha brāhmaṇa ekacco pāṇātipātī hoti.|| ||

Adinnādāyī hoti,||
kāmesu micchācārī hoti,||
musāvādī hoti,||
pisunāvāco hoti,||
pharusavāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhiko hoti,||
so dātā hoti,||
samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ,||
seyyāvasathapadīpeyyaɱ.|| ||

So kāyassa bhedā paraɱ maraṇā assānaɱ sahavyataɱ upapajjati.|| ||

So tattha lābhī hoti annassa pānassa mālā nānālaŋkārassa.|| ||

Idha brāhmaṇa ekacco pāṇātipātī hoti.|| ||

Adinnādāyī hoti,||
kāmesu micchācārī hoti,||
musāvādī hoti,||
pisunāvāco hoti,||
pharusavāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhiko hoti,||
so dātā hoti,||
samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ,||
seyyāvasathapadīpeyyaɱ.|| ||

So kāyassa bhedā paraɱ maraṇā gunnaɱ sahavyataɱ upapajjati.|| ||

So tattha lābhī hoti annassa pānassa mālā nānālaŋkārassa.|| ||

Idha brāhmaṇa ekacco pāṇātipātī hoti.|| ||

Adinnādāyī hoti,||
kāmesu micchācārī hoti,||
musāvādī hoti,||
pisunāvāco hoti,||
pharusavāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhiko hoti,||
so dātā hoti,||
samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ,||
seyyāvasathapadīpeyyaɱ.|| ||

So kāyassa bhedā paraɱ maraṇā kukkurānaɱ sahavyataɱ upapajjati.|| ||

So tattha lābhī hoti annassa pānassa mālā nānālaŋkārassa.|| ||

Yaɱ kho brahmaṇa idha pāṇātipātī,||
adinnādāyī,||
kāmesu micchācārī,||
musāvādī,||
pisunavāco,||
pharusavāco,||
samphappalāpī,||
abhijjhālū,||
[272] vyāpannacitto,||
micchādiṭṭhiko,||
so tena kāyassabhedā param maraṇā kukkurānaɱ sahavyataɱ upapajjati.|| ||

Yaɱ ca kho so dātā hoti samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ,||
seyyāvasathapadīpeyyaɱ,||
tena so tattha lābhī hoti annassa pānassa mālā nānālaŋkārassa.|| ||

Idha pana brāhmaṇa ekacco pāṇātipātā paṭivirato hoti,||
adinnādānā paṭivirato hoti,||
kāmesu micchācārā paṭivirato hoti,||
musā-vādā paṭivirato hoti,||
pisunāvācā paṭivirato hoti,||
pharusāya vācāya paṭivirato hoti,||
samphappalāpā paṭivirato hoti,||
anabhijjhālū hoti,||
avyāpannacitto hoti,||
sammādiṭṭhiko hoti.|| ||

So dātā hoti samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ seyyāvasathapadīpeyyaɱ.|| ||

So kāyassa bhedā paraɱ maraṇā manussānaɱ sahavyataɱ upapajjati.|| ||

So tattha lābhī hoti mānusakānaɱ pañcannaɱ kāmaguṇānaɱ.|| ||

Yaɱ kho brāhmaṇa idha pāṇātipātāpaṭivirato hoti,||
adinnādānā paṭivirato hoti,||
kāmesu micchācārā paṭivirato hoti,||
musā-vādā paṭivirato hoti,||
pisunāvācā paṭivirato hoti,||
pharusāyavācāya paṭivirato hoti,||
samphappalāpā paṭivirato hoti,||
anabhijjhālū hoti,||
avyāpannacitto hoti,||
sammādiṭṭhiko.|| ||

Tena so kāyassa bhedā param maraṇā manussānaɱ sahavyataɱ upapajjati,||
yañ ca kho so dātā hoti||
samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ seyyāvasathapadīpeyyaɱ.|| ||

Tena so tattha lābhī hoti||
mānusakānaɱ pañcannaɱ kāmaguṇānaɱ.|| ||

Idha pana brāhmaṇa ekacco pāṇātipātā paṭivirato hoti,||
adinnādānā paṭivirato hoti,||
kāmesu micchācārā paṭivirato hoti,||
musā-vādā paṭivirato hoti,||
pisunāvācā paṭivirato hoti,||
pharusāya vācāya paṭivirato hoti,||
samphappalāpā paṭivirato hoti,||
anabhijjhālū hoti,||
avyāpannacitto hoti,||
sammādiṭṭhiko hoti.|| ||

So dātā hoti samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ seyyāvasathapadīpeyyaɱ.|| ||

So kāyassa bhedā paraɱ maraṇā devānaɱ sahavyataɱ upapajjati.|| ||

So tattha [273] lābhī hoti dibbānaɱ pañcannaɱ kāmaguṇānaɱ.|| ||

Yaɱ kho brāhmaṇa idha pāṇātipātā paṭivirato hoti,||
adinnādānā paṭivirato hoti,||
kāmesumicchācārā paṭivirato hoti,||
musā-vādā paṭivirato hoti,||
pisunāvācā paṭivirato hoti,||
pharusāya vācāya paṭivirato hoti,||
samphappalāpā paṭivirato hoti,||
anabhijjhālū hoti,||
avyāpannacitto hoti,||
sammādiṭṭhiko.|| ||

Tena so kāyassa bhedā paraɱ maraṇā devānaɱ sahavyataɱ upapajjati.|| ||

Yañ ca kho so dātā hoti samaṇassa vā brāhmaṇassa vā annaɱ pānaɱ vatthaɱ yānaɱ mālāgandhavilepanaɱ seyyāvasathapadīpeyyaɱ,||
tena so tattha lābhī hoti dibbānaɱ pañcannaɱ kāmaguṇānaɱ.|| ||

Api ca brāhmaṇa,||
dāyako pi anipphalo ti.|| ||

Acchariyaɱ bho Gotama,||
abbhūtaɱ bho Gotama,||
yāvañ c'idaɱ bho Gotama alam eva dānāni dātuɱ,||
alaɱ saddhāni kātuɱ,||
yatrahi nāma dāyako pi anipphalo hoti.|| ||

Eva me taɱ brāhmaṇa,||
evam etaɱ brāhmaṇa,||
dāyakopi hi brāhmaṇa anipphalo hoti.|| ||

Abhikkantaɱ bho Gotama abhikkantaɱ bho Gotama.|| ||

seyyathā pi bho Gotama,||
nikkujjitaɱ vā ukkujjeyya paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya cakkhumanto rūpāni dakkhinti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Ete mayaɱ bhavantaɱ Gotamaɱ saraṇaɱ gacchāma dhammañca bhikkhu-saŋghañ ca.|| ||

Upāsakaɱ maɱ bhavaɱ Gotamo dhāretu ajjatagge pāṇupetaɱ saraṇaɱ gatanti.|| ||

Jāṇussoṇīvaggo dutiyo.

 


Contact:
E-mail
Copyright Statement   Webmaster's Page