Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
XXI. Karajakāya Vagga

Sutta 206

Paṭhama Sañcetanika Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts][bodh] Evaɱ me sutaɱ:|| ||

Nāhaɱ bhikkhave sañcetanikānaɱ kammānaɱ katānaɱ upacitānaɱ appaṭisaɱviditvā vyantībhāvaɱ vadāmi,||
tañ ca kho diṭṭhe va dhamme upapajjaɱ vā apare vā pariyāye.|| ||

Na tve vāhaɱ bhikkhave sañcetanikānaɱ kammānaɱ katānaɱ upacitānaɱ appaṭisaɱviditvā dukkhass'antakiriyaɱ vadāmi.|| ||

Tatra, bhikkhave, tividhā kāya-kammanta sandosavyāpatti akusala-sañcetanikā dukkhudrayā dukkhavipākā hoti.|| ||

Catubbidhā vacī-kammanta sandosavyāpatti akusala-sañcetanikā dukkhudrayā dukkhavipākā hoti.|| ||

Tividhā mano-kammanta sandosavyāpatti akusala-sañcetanikā dukkhudrayā dukkha vipākā hoti.|| ||

2. Kathañ ca bhikkhave tividhā kāya-kammanta sandosavyāpatti akusala-sañcetanikā dukkhudrayā dukkhavipākā hoti?|| ||

Idha, bhikkhave, ekacco pāṇātipātī hoti luddo lohitapāṇī hatapahate niviṭṭho adayāpanno sabbapāṇabhūtesu.|| ||

Adinnādāyī hoti.|| ||

Yaɱ taɱ parassa paravittūpakaraṇaɱ gāmagataɱ vā araññagataɱ vā adinnaɱ theyya saŋkhātaɱ ādātā hoti.|| ||

Kāmesu micchācārī hoti,||
yā tā māturakkhitā||
piturakkhitā||
bhāturakkhitā bhaginīrakkhitā||
ñātirakkhitā||
gottarakkhitā||
dhammarakkhitā||
sassāmikā saparidaṇḍā antamaso mālā guṇaparikkhittā pi,||
tathā rūpāsu cārittaɱ āpajjitā hoti.|| ||

Evaɱ kho bhikkhave tividhā kāya kammanta sandosavyāpatti akusala-sañcetanikā dukkhudrayā dukkakhavipākā hoti.|| ||

3. Kathañ ca bhikkhave catubbidhā vacī-kammanta sandosavyāpatti akusala-sañcetanikā dukkhudrayā dukkha vipākā hoti?|| ||

Idha, bhikkhave, ekacco musāvādī hoti,||
sabhāgato vā parisagato vā ñātimajjhagato vā pūgamajjhagato vā rājakula majjhagato vā abhinīto sakkhipuṭṭho|| ||

"Eh'ambho purisa, yaɱ jānāsi, taɱ vadehī" ti.|| ||

So ajānaɱ vā 'āhaɱ jānāmī' ti.|| ||

Jānaɱ vā 'āhaɱ na jānāmi' ti.|| ||

Apassaɱ vā 'āhaɱ passāmī' ti.|| ||

Passaɱ vā 'āhaɱ na passāmī' ti.|| ||

Iti attahetu vā parahetu vā āmisa kiñcikkhahetu vā sampajāna musābhāsitā hoti.|| ||

Pisunavāco hoti ito sutvā amutra akkhātā imesaɱ bhedāya,||
amutra vā sutvā imesaɱ akkhātā amūsaɱ bhedāya.|| ||

Iti samaggānaɱ vā bhettā,||
bhinnānaɱ vā anuppadātā vaggārāmo vaggarato vagganandi vaggakaraṇiɱ vācaɱ bhāsitā hoti.|| ||

Pharusavāco hoti,||
yā sā vācā aṇḍakā kakkasā parakaṭukā parābhisajjanī kodhasāmantā asamādhisaɱvattanikā,||
tathā-rūpiɱ vācaɱ bhāsitā hoti.|| ||

Samphappalāpī hoti,||
akāla-vādī abhūta-vādī anattha-vādī adhamma-vādī avinaya-vādi,||
anidhānavatiɱ vācaɱ bhāsitā hoti akālena anapadesaɱ apariyantavatiɱ anatthasaɱhitaɱ.|| ||

Evaɱ kho bhikkhave catubbidhā vacī-kammanta sandosa vyāpatti akusala-sañcetanikā dukkhudrayā dukkhavipākā hoti.|| ||

4. Kathañ ca bhikkhave tividhā mano-kammanta sandosavyāpatti akusala-sañcetanikā dukkhudrayā dukkhavipākā hoti?|| ||

Idha, bhikkhave, ekacco abhijjhālū hoti,||
yaɱ taɱ parassa paravittūpakaraṇaɱ taɱ abhijjhitā hoti:|| ||

"Aho vata yaɱ parassa,||
taɱ mama assā" ti.|| ||

Vyāpannacitto hoti paduṭṭhamanasaɱkappo|| ||

"Ime sattā haññantu vā bajjhantu vā ucchijjantu vā vinassantu vā mā vā ahesuɱ iti vā" ti.|| ||

Micchādiṭṭhiko hoti viparītadassano:|| ||

"N'atthi dinnaɱ,||
n'atthi yiṭṭhaɱ,||
n'atthi hutaɱ,||
n'atthi sukaṭa-dukkaṭānaɱ kammānaɱ phalaɱ vipāko,||
n'atthi ayaɱ loko,||
n'atthi paro loko,||
n'atthi mātā,||
n'atthi pitā,||
n'atthi sattā opapātikā,||
n'atthi loke samaṇa-brāhmaṇā samaggatā,||
sammā paṭipannā,||
ye imañ ca lokaɱ parañ ca lokaɱ sayaɱ abhiññā sacchikatvā pavedentī" ti.|| ||

Evaɱ kho bhikkhave tividhā mano-kammanta sandosavyāpatti akusala-sañcetanikā dukkhudrayā dukkhavipākā hoti.|| ||

5. Tividha kāya-kammanta sandosavyāpatti akusala-sañcetanikā-hetu vā bhikkhave,||
sattā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

Catubbidha vacī-kammanta sandosavyāpatti akusala-sañcetanikā-hetu vā bhikkhave,||
sattā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

Tividha mano-kammanta sandosavyāpatti akusala-sañcetanikā-hetu vā bhikkhave,||
sattā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

6. Seyyathā pi, bhikkhave, apaṇṇako maṇi uddhaɱ khitto yena yen'eva patiṭṭhāti,||
suppatiṭṭhitaɱ yeva patiṭṭhāti.|| ||

Evam eva kho, bhikkhave, tividha kāya-kammanta sandosavyāpatti akusala-sañcetanikā-hetu vā sattā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

Catubbidha vacī-kammanta sando savyāpatti akusala-sañcetanikā-hetu vā sattā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

Tividha mano-kammanta sandosavyāpatti akusala-sañcetanikā-hetu vā sattā kāyassa bhedā param maraṇā apāyaɱ duggatiɱ Nirayaɱ upapajjanti.|| ||

7. Nāhaɱ bhikkhave sañcetanikānaɱ kammānaɱ katānaɱ upacitānaɱ appaṭisaɱviditvā vyantībhāvaɱ vadāmi,||
tañ ca kho diṭṭhe va dhamme upapajje vā apare vā pariyāye.|| ||

Na tvevāhaɱ bhikkhave sañcetanikānaɱ kammānaɱ katānaɱ upacitānaɱ appaṭisaɱviditvā dukkhass'antakiriyaɱ vadāmi.|| ||

Tatra, bhikkhave, tividhā kāya-kammanta-sampatti kusala-sañcetanikā sukhudrayā sukhavipākā hoti,||
catubbidhā vacī-kammanta-sampatti kusala-sañcetanikā sukhudrayā sukhavipākā hoti,||
tividhā mano-kammanta-sampatti kusala-sañcetanikā sukhudrayā sukhavipākā hoti.|| ||

8. Kathañ ca bhikkhave tividhā kāya-kammanta-sampatti kusala-sañcetanikā sukhudrayā sukhavipākā hoti?|| ||

Idha, bhikkhave, ekacco pāṇātipātaɱ pahāya pāṇātipātā paṭivirato hoti,||
nihita-daṇḍo nihita-sattho,||
lajjī dayāpanno sabbapāṇa-bhūtahitānukampī viharati.|| ||

Adinnādānaɱ pahāya adinnādānā paṭivirato hoti,||
yaɱ taɱ parassa paravittūpakaraṇaɱ gāmagataɱ vā araññagataɱ vā,||
na taɱ adinnaɱ theyyasaŋkhātaɱ ādātā hoti.|| ||

Kāmesu micchācāraɱ pahāya kāmesu micchācārā paṭivirato hoti,||
yā tā māturakkhitā,||
piturakkhitā,||
mātā-piturakkhitā,||
bhāturakkhitā bhaginirakkhitā,||
ñātirakkhitā,||
gottarakkhitā,||
dhammarakkhitā,||
sassāmikā saparidaṇḍā antamaso mālāgula parikkhittā pi,||
tathārūpāsu na cārittaɱ āpajjitā hoti.|| ||

Evaɱ kho bhikkhave tividhā kāya-kammanta-sampatti kusala-sañcetanikā sukhudrayā sukhavipākā hoti.|| ||

9. Kathañ ca bhikkhave catubbidhā vacī-kammanta-sampatti kusala-sañcetanikā sukhudrayā sukha vipākā hoti?|| ||

Idha, bhikkhave, ekacco musāvādaɱ pahāya musāvādā paṭivirato hoti sabhāgato vā||
parisagato vā||
ñātimajjhagato vā||
pūgamajjhagato vā||
rājakula majjhagato vā||
abhinīto sakkhipuṭṭho:|| ||

"Eh'ambho purisa,||
yaɱ jānāhi,||
taɱ vadehī" ti.|| ||

So ajānaɱ vā: 'Āhaɱ na jānāmī' ti.|| ||

Jānaɱ vā, 'Āhaɱ jānāmī' ti.|| ||

Apassaɱ vā, 'Āhaɱ na passāmī' ti.|| ||

Passaɱ vā, 'Āhaɱ passāmī' ti.|| ||

Iti attahetu vā parahetu vā āmisa-kiñcikkha-hetu vā na sampajāna musā bhāsitā hoti.|| ||

Pisunaɱ vācaɱ pahāya pisunāya vācāya paṭivirato hoti.|| ||

Na ito sutvā amutra akkhātā imesaɱ bhedāya,||
amutra vā sutvā na imesaɱ akkhātā amūsaɱ bhedāya,||
iti bhinnānaɱ vā sandhātā sahitānaɱ vā anuppadātā samaggārāmo samagga-rato samagga-nandī samagga-karaṇiɱ vācaɱ bhāsitā hoti.|| ||

Pharusaɱ vācaɱ pahāya pharusāya vācāya paṭivirato hoti.|| ||

Yā sā vācā neḷā kaṇṇa sukhā pemaṇīyā hadayaŋgamā porī bahujana-kantā bahujana manāpā,||
tathā-rūpiɱ vācaɱ bhāsitā hoti.|| ||

Samphappalāpaɱ pahāya samphappalāpā paṭivirato hoti.|| ||

Kālavādī bhūta-vādī attha-vādī dhamma-vādī vinaya-vādī nidhānavatiɱ vācaɱ bhāsitā hoti,||
kālena sāpadesaɱ pariyantavatiɱ atthasaɱhitaɱ.|| ||

Evaɱ kho bhikkhave catubbidhā vacī-kammantasampatti kusala-sañcetanikā sukhudrayā sukhavipākā hoti.|| ||

10. Kathañ ca bhikkhave tividhā mano-kammanta-sampatti kusala-sañcetanikā sukhudrayā sukhavipākā hoti?|| ||

Idha, bhikkhave, ekacco anabhijjhālū hoti,||
yaɱ taɱ parassa paracittūpakaraṇaɱ,||
taɱ anabhijjhitā hoti:|| ||

"Aho vata yaɱ parassa,||
taɱ mama assā" ti.|| ||

Avyāpannacitto hoti appaduṭṭhamanasaŋkappo:|| ||

'Ime sattā averā hontu avyāpajjā anīghā sukhī attānaɱ pariharantu" ti.|| ||

Sammā diṭṭhiko hoti aviparītadassano:|| ||

'Atthi dinnaɱ||
atthi yiṭṭhaɱ,||
atthi hutaɱ,||
atthi sukaṭa dukkaṭānaɱ kammānaɱ phalaɱ vipāko,||
atthi ayaɱ loko,||
atthi paro loko,||
atthi mātā,||
atthi pitā,||
atthi sattā opapātikā,||
atthi loke samaṇa-brāhmaṇā sammaggatā,||
sammā paṭipannā,||
yo imañ ca lokaɱ parañca lokaɱ sayaɱ abhiññā sacchikatvā pavedentī' ti.|| ||

Evaɱ kho bhikkhave tividhā mano-kammanta-sampatti kusala-sañcetanikā sukhudrayā sukhavipākā hoti.|| ||

11. Tividha-kāya-kammanta-sampatti kusala-sañcetanikā-hetu vā bhikkhave sattā kāyassa bhedā param maraṇā sugatiɱ saggaɱ lokaɱ upapajjanti.|| ||

Catubbidha vacī-kammanta-sampatti kusala-sañcetanikā-hetu vā bhikkhave sattā kāyassa bhedā param maraṇā sugatiɱ saggaɱ lokaɱ upapajjanti.|| ||

Tividha mano-kammanta-sampatti kusala-sañcetanikā-hetu vā bhikkhave sattā kāyassa bhedā param maraṇā sugatiɱ saggaɱ lokaɱ upapajjanti.|| ||

12. Seyyathā pi, bhikkhave, apaṇṇako maṇi uddhaɱ khitto yena yen'eva patiṭṭhāti suppatiṭṭhitaɱ yeva patiṭṭhāti.|| ||

Evam eva kho bhikkhave tividha kāya-kammanta-sampatti kusala-sañcetanikā-hetu vā sattā kāyassa bhedā param maraṇā sugatiɱ saggaɱ lokaɱ upapajjanti.|| ||

Catubbidha vacī-kammanta-sampatti kusala-sañcetanikā-hetu vā sattā kāyassa bhedā param maraṇā sugatiɱ saggaɱ lokaɱ upapajjanti.|| ||

Tividha mano-kammanta-sampatti kusala-sañcetanikā-hetu vā sattā kāyassa bhedā param maraṇā sugatiɱ saggaɱ lokaɱ upapajjanti.|| ||

13Nāhaɱ bhikkhave sañcetanikānaɱ kammānaɱ katānaɱ upacitānaɱ vyantībhāvaɱ vadāmi||
tañ ca kho diṭṭhe vā dhamme,||
upapajje vā apare vā pariyāye.|| ||

Na tvevāhaɱ bhikkhave sañcetanikānaɱ kammānaɱ katānaɱ upacitānaɱ appaṭisaɱviditvā dukkhassa antakiriyaɱ vadāmī ti.|| ||


Contact:
E-mail
Copyright Statement   Webmaster's Page