Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XXII: Sāmañña-Vaggo

Sutta 211

Dutiya Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Visatiyā bhikkhave dhammehi samannāgato yathābhataɱ nikkhitto evaɱ niraye.|| ||

Katamehi visatiyā?|| ||

Attanā ca pāṇātipātī hoti,||
parañca pāṇātipāte samādapeti.|| ||

Attanā ca adinnādāyī hoti, parañca adinnādāne samādapeti.|| ||

Attanā ca kāmesu micchācārī hoti, parañca kāmesu micchācāre samādapeti|| ||

Attanā ca musāvādī hoti, parañca musāvāde samādapeti.|| ||

Attanā ca pisunavāco hoti, parañca pisunāya vācāya samādapeti.|| ||

Attanā ca pharusāvāco hoti, parañca pharusāya vācāya samādapeti.|| ||

Attanā ca samphappalāpī hoti, parañca samphappalāpe samādapeti.|| ||

Attanā ca abhijjhālū hoti, parañca abhijjhāya samādapeti.|| ||

Attanā ca vyāpannacitto hoti, parañca vyāpāde samādapeti.|| ||

Attanā ca micchādiṭṭhiko hoti, parañca micchādiṭṭhiyā samādapeti.|| ||

Imehi kho bhikkhave vīsatiyā dhammehi samannāgato yathābhataɱ nikkhitto evaɱ niraye.|| ||

Vīsatiyā bhikkhave dhammehi samannāgato yathābhataɱ nikkhitto evaɱ sagge.|| ||

Katamehi vīsatiyā?|| ||

Attanā ca pāṇātipātā paṭivirato hoti,||
parañ ca pāṇātipātā veramaṇiyā samādapeti.|| ||

Attanā ca adinnādānā paṭivirato hoti,||
parañ ca adinnādānā veramaṇiyā samādapeti.|| ||

Attanā ca kāmesu micchācārā paṭivirato hoti,||
parañ ca kāmesu mcchācārā veramaṇiyā samādapeti.|| ||

Attanā ca musāvādā paṭivirato hoti,||
parañ ca musāvādā veramaṇiyā samādapeti.|| ||

Attanā ca pisunāya vācāya paṭivirato hoti,||
parañ ca pisunāya vācāya veramaṇiyā samādapeti.|| ||

Attanā [305] ca pharusāya vācāya paṭivirato hoti,||
parañ ca pharusāyā vācāya veramaṇiyā samādapeti.|| ||

Attanā ca samphappalāpā paṭivirato hoti,||
parañ ca samphappalāpā veramaṇiyā samādapeti.|| ||

Attanā ca anabhijjhālū hoti,||
parañ ca anabhijjhāya samādapeti.|| ||

Attanā ca Avyāpannacitto hoti,||
parañ ca avyāpāde samādapeti.|| ||

Attanā ca sammādiṭṭhiko hoti,||
parañ ca sammādiṭṭhiyā samādapeti.|| ||

Imehi kho bhikkhave vīsatiyā dhammehi samannāgato yathābhataɱ nikkhitto evaɱ saggeti.|| ||

 


Contact:
E-mail
Copyright Statement   Webmaster's Page