Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
XXII: Sāmañña-Vaggo

Sutta 213

Catuttha Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Cattārisāya bhikkhave dhammehi samannāgato yathābhataɱ nikkhitto evaɱ niraye.|| ||

Katamehi cattārisāya?|| ||

Attanā ca pāṇātipātī hoti,||
parañ ca pāṇātipāte samādapeti,||
pāṇātipāte ca samanuñño hoti,||
pāṇātipātassa ca vaṇṇaɱ bhāsati.|| ||

Attanā ca adinnādāyī hoti,||
parañ ca adinnādāne samādapeti,||
adinnādāne ca samanuñño hoti,||
adinnādānassa ca vaṇṇaɱ bhāsati.|| ||

Attanā ca kāmesu micchācārī hoti,||
parañ ca kāmesu micchācāre samādapeti,||
[307] kāmesu micchācāre ca samanuñño hoti,||
kāmesu micchācārassa ca vaṇṇaɱ bhāsati.|| ||

Attanā ca musāvādī hoti,||
parañ ca musāvāde samādapeti,||
musāvāde ca samanuñño hoti,||
musāvādassa ca vaṇṇaɱ bhāsati.|| ||

Attanā ca pisunavāco hoti,||
parañ ca pisunāya vācāya samādapeti,||
pisunāya vācāya samanuñño hoti,||
pisunāya ca vācāya vaṇṇaɱ bhāsati.|| ||

Attanā ca pharusavāco hoti,||
parañ ca pharusāya vācāya samādapeti,||
pharusāya vācāya ca samanuñño hoti,||
pharusāya vācāya ca vaṇṇaɱ bhāsati.|| ||

Attanā ca samphappalāpī hoti,||
parañ ca samphappalāpe samādapeti,||
samphappalāpe ca samanuñño hoti,||
samphappalāpassa ca vaṇṇaɱ bhāsati.|| ||

Attanā ca abhijjhālū hoti,||
parañ ca abhijjhāya samādapeti,||
abhijjhāya ca samanuñño hoti,||
abhijjhāya ca vaṇṇaɱ bhāsati.|| ||

Attanā ca vyāpannacitto hoti,||
parañ ca vyāpāde samādapeti,||
vyāpāde samanuñño hoti,||
vyāpādassa ca vaṇṇaɱ bhāsati.|| ||

Attanā ca micchādiṭṭhiko hoti,||
parañ ca micchādiṭṭhiyā samādapeti,||
micchādiṭṭhiyā ca samanuñño hoti,||
micchādiṭṭhiyā ca vaṇṇaɱ bhāsati.|| ||

Imehi kho bhikkhave cattārīsāya dhammehi samannāgato yathābhataɱ nikkhitto evaɱ niraye.|| ||

Cattārīsāya bhikkhave dhammehi samannāgato yathābhataɱ nikkhitto evaɱ sagge.|| ||

Katamehi cattārīsāya?|| ||

Attanā ca pāṇātipātā paṭivirato hoti,||
parañ ca pāṇātipātā veramaṇiyā samādapeti,||
pāṇātipātā veramaṇiyā ca samanuñño hoti,||
pāṇātipātā veramaṇiyā ca vaṇṇaɱ bhāsati.|| ||

Attanā ca adinnādānā paṭivirato hoti,||
parañ ca adinnādānā veramaṇiyā samādapeti,||
adinnādānā veramaṇiyā ca samanuñño hoti,||
adinnādānā veramaṇiyā ca vaṇṇaɱ bhāsati.|| ||

Attanā ca kāmesu mcchācārā paṭivirato hoti,||
parañ ca kāmesu micchācārā veramaṇiyā samādapeti,||
kāmesu micchācārā veramaṇiyā ca samanuñño hoti,||
kāmesu micchācārā veramaṇiyā ca vaṇṇaɱ bhāsati.|| ||

Attanā ca musāvādā paṭivirato hoti,||
parañ ca musāvādā veramaṇiyā samādapeti,||
musāvādā veramaṇiyā ca samanuñño hoti,||
musāvādā veramaṇiyā ca vaṇṇaɱ bhāsati.|| ||

Attanā ca [308] pisunāya vācāya paṭivirato hoti,||
parañ ca pisunāyā vācāya veramaṇiyā samādapeti,||
pisunāya vācāya veramaṇiyā ca samanuñño hoti,||
pisunāyā vācāya veramaṇiyā ca vaṇṇaɱ bhāsati.|| ||

Attanā ca pharusāya vācāya paṭivirato hoti,||
parañ ca pharusāya vavāya veramaṇiyā samādapeti,||
pharusāya vācāya veramaṇiyā ca samanuñño hoti,||
pharusāya vācāya veramaṇiyā ca vaṇṇaɱ bhāsati.|| ||

Attanā ca samphappalāpā paṭivirato hoti,||
parañ ca samphappalāpā veramaṇiyā samādapeti,||
samphappalāpā veramaṇiyā ca samanuñño hoti,||
samphappalāpā ca veramaṇiyā vaṇṇaɱ bhāsati.|| ||

Attanā ca anabhijjhālū hoti,||
parañ ca anabhijjhāya samādapeti,||
anabhijjhāya ca samanuñño hoti,||
anabhijjhāya ca vaṇṇaɱ bhāsati.|| ||

Attanā ca avyāpannacitto hoti,||
parañ ca avyāpāde samādapeti,||
avyāpāde ca samanuñño hoti,||
avyāpādassa ca vaṇṇaɱ bhāsati.|| ||

Attanā ca sammādiṭṭhiko hoti,||
parañ ca sammādiṭṭhiyā samādapeti,||
sammādiṭṭhiyā ca samanuñño hoti,||
sammādiṭṭhiyā ca vaṇṇaɱ bhāsati.|| ||

Imehi kho bhikkhave cattārīsāya dhammehi samannāgato yathābhataɱ nikkhitto evaɱ saggeti.|| ||

 


Contact:
E-mail
Copyright Statement   Webmaster's Page