Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 1

Adapted from the 1995 edition of the digital version of the Sri Lanka Buddha Jayanti Tripitaka Series.

Kim Atthiya? Suttaɱ

 


 

[1][pts][ati] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

'Kim-atthiyāni bhante kusalāni sīlāni kim-ānisaɱsānī' ti?|| ||

'Avippaṭisāratthāni kho Ānanda kusalāni sīlāni avippaṭisārānisaɱsānī' ti.|| ||

'Avippaṭisāro pana bhante kim-atthiyo kim-ānisaɱso' ti?|| ||

'Avippaṭisāro kho Ānanda pāmujjāttho pāmujjānisaɱso.'|| ||

'Pāmujjaɱ pana bhante kim-atthiyaɱ kim-ānisaɱsan' ti?|| ||

'Pāmujjaɱ kho Ānanda pītatthaɱ pītānisaɱsaɱ.|| ||

'Pīti pana bhante kim-atthiyā kim-ānisaɱsā' ti.|| ||

'Pīti kho Ānanda passaddhatthā passaddhānisaɱsā.'|| ||

'Passaddhi pana bhante kim-atthiyā kim-ānisaɱsā' ti?|| ||

Passaddhi kho Ānanda sukhatthā sukhānisaɱsā.|| ||

'Sukhaɱ pana bhante kim-atthiyaɱ kim-ānisaɱsan' ti?|| ||

'Sukhaɱ kho Ānanda samādhatthaɱ samādhānisaɱsaɱ.'|| ||

'Samādhi pana bhante kim-attho kim-ānisaɱso' ti?|| ||

'Samādhi kho Ānanda yathābhūtañāṇadassanattho yathābhūtañāṇadassanānisaɱso.'|| ||

'Yathābhūtañāṇadassanaɱ pana bhante kim-atthiyaɱ kim-ānisaɱsan' ti?|| ||

Yathābhūtañāṇadassanaɱ kho Ānanda nibbindanatthaɱ nibbidānisaɱsaɱ.'|| ||

'Nibbidā pana bhante kim-attho kim-ānisaɱso' ti?|| ||

Nibbidā kho Ānanda virāgathā [312] virāgānisaɱsā.|| ||

'Virāgo pana bhante kim-atthiyo kim-ānisaɱso.' ti?|| ||

'Virāgo kho Ānanda vimuttiñāṇadassanattho vimuttiñāṇadassanānisaɱso' ti.|| ||

3. Iti kho Ānanda kusalāni sīlāni avippaṭisāratthāni avippaṭisārānisaɱsāni,||
Avippaṭisāro pāmujjattho pāmujjānisaɱso,||
Pāmujjaɱ pītatthaɱ pītānisaɱsaɱ,||
Pīti passaddhatthā passaddhānisaɱsā,||
Passaddhi sukhatthā sukhānisaɱsā,||
Sukhaɱ samādhatthaɱ samādhānisaɱsaɱ,||
Samādhi yathābhūtañāṇadassanattho yathābhūtañāṇadassanānisaɱso,||
Yathābhūtañāṇadassanā nibbindatthaɱ nibbidānisaɱsaɱ,||
nibbidā virāgatthā virāgānisaɱsā,||
virāgo vimuttiñāṇadassanattho vimuttiñāṇadassanānisaɱso.||
Iti kho Ānanda kusalāni sīlāni anupubbena aggāya parentī ti.|| ||

 


Contact:
E-mail
Copyright Statement   Webmaster's Page