Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 2

Adapted from the 1995 edition of the digital version of the Sri Lanka Buddha Jayanti Tripitaka Series.

Na Cetanākaraṇīya Suttaɱ

 


 

[1][pts][ati] Sīlavato bhikkhave sīlasamapannassa na cetanāya karaṇīyaɱ,||
'Avippaṭisāro me uppajjatū' ti.|| ||

Dhammatā esā bhikkhave, yaɱ sīlavato sīlasampannassa avippaṭisāro uppajjati.|| ||

Avippaṭisārissa bhikkhave na cetanāya karaṇīyaɱ,||
'Pāmujjaɱ me uppajjatū' ti.|| ||

Dhammatā esā bhikkhave yaɱ avippaṭisārissa pāmujjaɱ uppajjati.|| ||

Pamuditassa bhikkhave na cetanāya karaṇīyaɱ,||
'Pīti me uppajjatū' ti.|| ||

Dhammatā esā bhikkhave yaɱ pamuditassa pīti uppajjati.|| ||

Pītamanassa bhikkhave na cetanāya karaṇīyaɱ,||
'Kāyo me passambhatū' ti.|| ||

Dhammatā esā bhikkhave pītamanassa kāyo passambhati.|| ||

Passaddhakāyassa bhikkhave na cetanāya karaṇīyaɱ,||
'Sukhaɱ vediyāmī' ti.|| ||

Dhammatā esā bhikkhave yaɱ passaddhakāyo sukhaɱ vediyati.|| ||

Sukhino bhikkhave na cetanāya karaṇīyaɱ,||
'Cittaɱ me samādhīyatū' ti.|| ||

Dhammatā esā bhikkhave yaɱ sukhino cittaɱ samādhiyati.|| ||

Samāhitassa bhikkhave na cetanāya karaṇīyaɱ,||
'Yathābhūtaɱ pajānāmi passāmī' ti.|| ||

Dhammatā [313] esā bhikkhave yaɱ samāhito yathābhūtaɱ pajānāti passati.|| ||

Yathābhūtaɱ bhikkhave jānato passato na cetanāya kāraṇīyaɱ,||
'Nibbindāmī' ti.|| ||

Dhammatā esā bhikkhave yaɱ yathābhūtaɱ jānaɱ passaɱ nibbindati.|| ||

Nibbinnassa bhikkhave na cetanāya karaṇīyaɱ,||
'Virajjāmī' ti.|| ||

Dhammatā esā bhikkhave yaɱ nibbinno virajjati.|| ||

Virattassa bhikkhave na cetanāya karaṇīyaɱ,||
'Vimuttiñāṇadassanaɱ sacchikaromī' ti.|| ||

Dhammatā esā bhikkhave yaɱ viratto vimuttiñāṇadassanaɱ sacchikaro ti.|| ||

2. Iti kho bhikkhave virāgo vimuttiñāṇadassanattho vimuttiñāṇadassanānisaɱso,||
nibbidā virāgatthā virāgānisaɱsā,||
yathābhūtañāṇadassanaɱ nibbidatthaɱ nibbidānisaɱsaɱ,||
samādhi yathābhūtañāṇadassanattho yathābhūtañāṇadassanānisaɱso,||
sukhaɱ samādhatthaɱ samādhānisaɱsaɱ,||
passaddhi sukhatthā sukhānisaɱsā,||
pīti passaddhatthā passaddhānisaɱsā,||
pāmujjaɱ pītatthaɱ pītānisaɱsaɱ,||
avippaṭisāro pāmujjattho pāmujjānisaɱso,||
kusalāni sīlāni avippaṭisāratthāni avippaṭisārānisaɱsāni.|| ||

Iti kho bhikkhave dhammā ca dhamme abhisandenti.|| ||

Dhammā ca dhamme paripūrenti apārā pāraŋgamanāyā ti.|| ||

 


Contact:
E-mail
Copyright Statement   Webmaster's Page