Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 7

Saññā-Manasikārā Sutta

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

1. [pts][bd] Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:

'Siyā nu kho bhante bhikkhuno tathārūpo samādhipaṭilābho||
yathā n'eva paṭhaviyaɱ paṭhavisaññī assa,||
na āpasmiɱ āposaññī assa,||
na tejasmiɱ tejosaññī assa,||
na vāyasmiɱ vāyosaññī assa,||
na ākāsānañcāyatane ākāsānañcāyatanasaññī assa,||
na viññāṇañcāyatane viññāṇañcāyatanasaññī assa,||
na ākiñcaññāyatane ākiñcaññāyatanasaññī assa,||
na n'eva-saññā-nāsaññāyatane n'eva-saññā-nāsaññāyatanasaññī assa;||
na idhaloke idhalokasaññī assa,||
na paraloke paralokasaññī assa;||
yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā||
tatrā pi na saññī assa,||
saññī ca pana assā' ti?|| ||

2. [pts][bd] Siyā Ānanda bhikkhuno tathārūpo samādhipaṭilābho||
yathā n'eva paṭhaviyaɱ paṭhavisaññī assa,||
na āpasmiɱ āposaññī assa,||
na tejasmiɱ tejosaññī assa,||
na vāyasmiɱ vāyosaññī assa,||
na ākāsānañcāyatane ākāsānañcāyatanasaññī assa,||
na viññāṇañcāyatane viññāṇañcāyatanasaññī assa,||
na ākiñcaññāyatane ākiñcaññāyatanasaññī assa,||
na n'eva-saññā-nāsaññāyatane n'eva-saññā-nāsaññāyatanasaññī assa;||
na idhaloke idhalokasaññī assa,||
na paraloke [319] paralokasaññī assa;||
yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā||
tatrā pi na saññī assa,||
saññī ca pana assā' ti.|| ||

3. [pts][bd] Yathākathaɱ pana bhante siyā bhikkhuno tathārūpo samādhipaṭilābho||
yathā n'eva paṭhaviyaɱ paṭhavisaññī assa,||
na āpasmiɱ āposaññī assa,||
na tejasmiɱ tejosaññī assa,||
na vāyasmiɱ vāyosaññī assa,||
na ākāsānañcāyatane ākāsānañcāyatanasaññī assa,||
na viññāṇañcāyatane viññāṇañcāyatanasaññī assa,||
na ākiñcaññāyatane ākiñcaññāyatanasaññī assa,||
na n'eva-saññā-nāsaññāyatane n'eva-saññā-nāsaññāyatanasaññī assa;||
na idhaloke idhalokasaññī assa,||
na paraloke paralokasaññī assa;||
yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā||
tatrā pi na saññī assa,||
saññī ca pana assā' ti?|| ||

4. [pts][bd] Idh'Ānanda bhikkhu evaɱ saññī hoti:|| ||

'Etaɱ santaɱ||
etaɱ paṇītaɱ||
yad idaɱ sabbasankhārasamatho sabbupadhipaṭinissaggo taṇhakkhayo virāgo nirodho nibbānan' ti.|| ||

Evaɱ kho Ānanda siyā bhikkhuno tathārūpo samādhipaṭilābho||
yathā n'eva paṭhaviyaɱ paṭhavisaññī assa,||
na āpasmiɱ āposaññī assa,||
na tejasmiɱ tejosaññī assa,||
na vāyasmiɱ vāyosaññī assa,||
na ākāsānañcāyatane ākāsānañcāyatanasaññī assa,||
na viññāṇañcāyatane viññāṇañcāyatanasaññī assa,||
na ākiñcaññāyatane ākiñcaññāyatanasaññī assa,||
na n'eva-saññā-nāsaññāyatane n'eva-saññā-nāsaññāyatanasaññī assa;||
na idhaloke idhalokasaññī assa,||
na paraloke paralokasaññī assa;||
yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā||
tatrā pi na saññī assa,||
saññī ca pana assā' ti.|| ||

 


Contact:
E-mail
Copyright Statement   Webmaster's Page