Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 11

Adapted from the 1995 edition of the digital version of the Sri Lanka Buddha Jayanti Tripitaka Series.

Mahānāma Suttaɱ

 


 

1. [pts][ati] Ekaɱ samayaɱ Bhagavā Sakkesu viharati Kapilavatthusmiɱ Nigrodhārāme.|| ||

Tena kho pana samayena sambahulā bhikkhu Bhagavato cīvira-kammaɱ karonti||
'Niṭṭhita-cīvaro Bhagavā temāsaccayena cārikaɱ pakkamissatī' ti.|| ||

Assosi kho Mahānāmo Sakko sambahulā kira bhikkhu Bhagavato cīvara-kammaɱ karonti||
'Niṭṭhita-cīvaro Bhagavā temāsaccayena cārikaɱ pakkamissatī' ti.|| ||

Atha kho Mahānāmo Sakko yena Bhagavā ten'upasaɱkami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Mahānāmo Sakko Bhagavantaɱ etad avoca:

Sutaɱ me taɱ bhante||
'Sambahulā kira bhikkhu Bhagavato cīvara-kammaɱ karonti||
'Niṭṭhita-cīvaro Bhagavā temāsaccayena cārikaɱ pakkamissatī' ti.|| ||

Tesaɱ no bhante nānāvihārehi viharataɱ kenassa vihārena vihātabban ti?

[329] 2. Sādhu sādhu Mahānāma,||
etaɱ kho Mahānāma tumhākaɱ paṭirūpaɱ kulaputtānaɱ yaɱ tumhe Tathāgataɱ upasaɱkamitvā puccheyyātha,||
'Tesaɱ no bhante nānāvihārehi viharataɱ ken'assa vihārena vihātabban' ti.|| ||

Saddho kho Mahānāma ārādhako hoti, no assaddho,||
āraddha-viriyo ārādhako hoti, no kusīto:||
upaṭṭhita-satī ārādhako hoti, no muṭṭhas-satī:||
samāhito ārādhako hoti, no asamāhito||
paññavā ārādhako hoti no duppañño.|| ||

Imesu kho tvaɱ Mahānāma pañcasu dhammesu patiṭṭhāya cha dhamme uttariɱ bhāveyyāsi.|| ||

3. Idha tvaɱ Mahānāma Tathāgataɱ anussareyyāsi,||
'Iti pi so Bhagavā arahaɱ Sammā-sambuddho vijjā-caraṇa-sampanno sugato loka-vidū anuttaro purisa-damma-sārathi||
satthā deva-manussānaɱ buddho Bhagavā' ti.|| ||

Yasmiɱ Mahānāma samaye ariyasāvako Tathāgataɱ anussarati||
nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti.|| ||

Ujugatam ev'assa tasmiɱ samaye cittaɱ hoti.|| ||

Tathāgataɱ ārabbha ujugata-citto kho pana Mahānāma ariyasāvako labhati atthavedaɱ labhati dhamma-vedaɱ,||
labhati dhammūpasaɱhitaɱ pāmujjaɱ pamuditassa pīti jāyati,||
pīta-manassa kāyo passambhati,||
passaddhakāyo sukhaɱ vediyati,||
sukhino cittaɱ samādhiyati.|| ||

Ayaɱ vuccati Mahānāma ariyasāvako visamagatāya pajāya sampanno viharati,||
savyāpajjhāya pajāya avyāpajjho viharati,||
dhamma-sota-samāpanno buddhānussatiɱ bhāveti.|| ||

Puna ca paraɱ tvaɱ Mahānāma dhammaɱ anussareyyāsi,||
'svākkhāto Bhagavatā dhammo sandiṭṭhiko akāliko ehipassiko opanayiko paccattaɱ veditabbo viññūhī' ti yasmiɱ Mahānāma samaye ariyasāvako dhammaɱ anussarati nev'assa tasmiɱ samaye rāgapariyuṭṭhitaɱ [330] cittaɱ hoti,||
na dosapariyuṭṭhitaɱ cittaɱ hoti,||
na mohapariyuṭṭhitaɱ cittaɱ hoti.|| ||

Ujugatamev'assa tasmiɱ samaye cittaɱ hoti.|| ||

Dhammaɱ ārabbha ujugatacitto kho pana Mahānāma ariyasāvako labhati atthavedaɱ labhati dhammavedaɱ,||
labhati dhammūpasaɱhitaɱ pāmujjaɱ pamuditassa pīti jāyati,||
pītamanassa kāyo passambhati,||
passaddhakāyo sukhaɱ vediyati,||
sukhino cittaɱ samādhiyati.|| ||

Ayaɱ vuccati Mahānāma ariyasāvako visamagatāya pajāya sampanno viharati,||
savyāpajjhāya pajāya avyāpajjho viharati,||
dhamma-sota-samāpanno dhammānussatiɱ bhāveti.|| ||

Puna ca paraɱ tvaɱ Mahānāma saŋghaɱ anussareyyāsi,||
'supaṭi-panno Bhagavato sāvakasaŋgho,||
ujupaṭi-panno Bhagavato sāvakasaŋgho,||
ñāyapaṭi-panno Bhagavato sāvakasaŋgho,||
sāmīcipaṭi-panno Bhagavato sāvakasaŋgho yad idaɱ cattāri purisa-yugāni aṭṭha-purisa-puggalā.|| ||

Esa Bhagavato sāvakasaŋgho āhuneyyo pāhuṇeyyo dakkhiṇeyyo añjalikaraṇīyo anuttaraɱ puññakkhettaɱ lokassā' ti.|| ||

Yasmiɱ Mahānāma samaye ariyasāvako saŋghaɱ anussarati nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti.|| ||

Ujugatamev'assa tasmiɱ samaye cittaɱ hoti.|| ||

Saŋghaɱ ārabbha ujugatacitto kho pana Mahānāma ariyasāvako labhati atthavedaɱ labhati dhammavedaɱ,||
labhati dhammūpasaɱhitaɱ pāmujjaɱ,||
pamuditassa pīti jāyati,||
pītamanassa kāyo passambhati,||
passaddhakāyo sukhaɱ vediyati,||
sukhino cittaɱ samādhiyati.|| ||

Ayaɱ vuccati Mahānāma ariyasāvako visamagatāya pajāya sampanno viharati,||
savyāpajjhāya pajāya avyāpajjho viharati,||
dhamma-sota-samāpanno saŋghānussatiɱ bhāveti.|| ||

Puna ca paraɱ tvaɱ Mahānāma attano sīlāni anussareyyāsi akhaṇḍāni acchiddāni asabalāni akammāsāni bhujissāni viññūppasatthāni aparāmaṭṭhāni samādhisaɱvattanikāni.|| ||

Yasmiɱ Mahānāma samaye ariyasāvako sīlaɱ anussarati,||
nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na [331] moha-pariyuṭṭhitaɱ cittaɱ hoti.|| ||

Ujugatamev'assa tasmiɱ samaye cittaɱ hoti sīlaɱ ārabbha.|| ||

Ujugatacitto kho pana Mahānāma ariyasāvako labhati atthavedaɱ labhati dhammavedaɱ,||
labhati dhammūpasaɱhitaɱ pāmujjaɱ,||
pamuditassa pīti jāyati,||
pīta-manassa kāyo passambhati,||
passaddha-kāyo sukhaɱ vedivayati,||
sukhino cittaɱ samādhiyati.|| ||

Ayaɱ vuccati Mahānāma ariyasāvako visamagatāya pajāya sampatto viharati,||
savyāpajjhāya pajāya avyāpajjho viharati,||
dhamma-sota-samāpanno sīlānussatiɱ bhāveti.|| ||

Puna ca paraɱ tvaɱ Mahānāma attano cāgaɱ asussareyyāsi,||
'lābhā vata me,||
suladdhaɱ vata me,||
yohaɱ maccheramala-pariyuṭṭhitāya pajāya vigatamala-maccherena cetasā agāraɱ ajjhāvasāmi muttacāgo payatapāṇī vossaggarato yācayogo dānasaɱvibhāgarato' ti.|| ||

Yasmiɱ Mahānāma samaye ariyasāvako cāgaɱ anussarati nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti.|| ||

Ujugatamev'assa tasmiɱ samaye cittaɱ hoti.|| ||

Cāgaɱ ārabbha ujugata-citto kho pana Mahānāma ariyasāvako labhati atthavedaɱ labhati dhammavedaɱ,||
labhati dhammūpasaɱhitaɱ pāmujjaɱ pamuditassa pīti jāyati,||
pīta-manassa kāyo passambhati,||
passaddhakāyo sukhaɱ vediyati,||
sukhino cittaɱ samādhiyati.|| ||

Ayaɱ vuccati Mahānāma ariyasāvako visamagatāya pajāya sampanno viharati,||
savyāpajjhāya pajāya avyāpajjho viharati,||
dhamma-sota-samāpanno cāgānussatiɱ bhāveti.|| ||

Puna ca paraɱ tvaɱ Mahānāma devatā anussareyyāsi,||
'santi devā cātummahārājikā,||
santi devā Tāvatiɱsā,||
santi devā yāmā,||
santi devā tusitā santi devā nimmāṇaratino,||
santi devā paranimmitavasavattino,||
santi devā brahmakāyikā,||
santi devā tatuttariɱ yathā rūpāya saddhāya samannāgatā tā devatā ito cutā tattha [332] uppannā,||
mayham pi tathārūpā saddhā saɱvijjati.|| ||

Yathārūpena sīlena samannāgatā devatā ito cutā tattha uppannā,||
mayham pi tathārūpaɱ sīlaɱ saɱvijjati.|| ||

Yathārūpena sutena samannāgatā tā devatā ito cutā tattha upapannā,||
mayham pi tathārūpaɱ sutaɱ saɱvijjati.

Yathārūpena cāgena samannāgatā,||
tā devatā ito cutā tattha upapannā,||
mayham pi tathārūpo cāgo saɱvijjati. Yathārūpāya paññāya samannāgatā tā devatā ito cutā tattha upapannā,||
mayham pi tathārūpā paññā saɱvijjatī' ti.|| ||

Yasmiɱ Mahānāma samaye ariyasāvako attano ca tāsañca devatānaɱ saddhañ ca||
sīlañ ca||
sutañ ca||
cāgañ ca||
paññ'ca anussarati,||
nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti.|| ||

Ujugatamev'assa tasmiɱ samaye cittaɱ hoti devatā ārabbha.|| ||

Ujugata-citto kho pana Mahānāma ariyasāvako labhati atthavedaɱ,||
labhati dhammavedaɱ,||
labhati dhammūpasaɱhitaɱ pāmujjaɱ.|| ||

Pamuditassa pīti jāyati,||
pīta-manassa kāyo passambhati.|| ||

Passaddha-kāyo sukhaɱ vediyati.|| ||

Sukhino cittaɱ samādhiyati.|| ||

Ayaɱ vuccati Mahānāma ariyasāvako visamagatāya pajāya sampatto viharati.|| ||

Savyāpajjhāya pajāya avyāpajjho viharati dhamma-sota-samāpanno devatānussatiɱ bhāvetī' ti.|| ||

 


Contact:
E-mail
Copyright Statement   Webmaster's Page