Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 14

Adapted from the 1995 edition of the digital version of the Sri Lanka Buddha Jayanti Tripitaka Series.

Subhūti Suttaɱ

 


 

1. [pts] Atha kho āyasmā subhūti saddhena bhikkhunā saddhiɱ yena Bhagavā ten'upasaɱkami. Upasaɱkamitvā Bhagavantaɱ abhivādetvā eka-m-antaɱ nisīdi. Eka-m-antaɱ nisinno kho āyasmantaɱ subhūti Bhagavā etad avoca:

Konāmo ayaɱ subhūti bhikkhūti?

"Saddho nāmo ayaɱ bhante bhikkhu saddhassa upāsakassa putto saddhā agārasmā anagāriyaɱ pabbajito" ti.|| ||

"Kacci panāyaɱ subhūti saddho bhikkhu saddhassa upāsakassa putto saddhā agārasmā anagāriyaɱ pabbajito sandissati saddhāpadānesū" ti?

Etassa Bhagavā kālo, etassa sugata kālo, yaɱ Bhagavā saddhassa saddhāpadānāni bhāseyya. Idān āhaɱ jānissāmi yadi vāyaɱ bhikkhu sandissati saddhāpadānesu yadi vā no' ti.|| ||

Tena hi subhūti suṇāhi, sādhukaɱ manasikarohi bhāsissāmīti.|| ||

Evaɱ bhante ti kho āyasmā subhūti Bhagavato paccassosi. Bhagavā etad avoca:

[338] "Idha subhūti bhikkhu sīlavā hoti, pātimokkha-saɱvara-saɱvuto viharati ācāra-gocara-sampanno anumattesu vajjesu bhaya-dassāvī samādāya sikkhati sikkhāpadesu.

Yampi subhūti bhikkhu sīlavā hoti, pātimokkha-saɱvara-saɱvuto viharati ācāra-gocara-sampanno anumattesu vajjesu bhaya-dassāvī samādāya sikkhati sikkhāpadesu, idampi subhūti saddhassa saddhāpadānaɱ hoti.|| ||

2. Puna ca paraɱ subhūti bhikkhu bahussuto hoti sutadharo sutasannicayo.

Ye te dhammā ādikalyāṇā majjhekalyāṇā pariyosānakalyāṇā sātthā sabyañjanā kevalaparipuṇṇaɱ parisuddhaɱ brahmacariyaɱ abhivadanti, tathā rūpāssa dhammā bahussutā honti dhatā, vacasā paricitā, manasānupekkhitā, diṭṭhiyā suppaṭividdhā, yampi subhūti bhikkhu bahussuto hoti sutadharo sutasannicayo.

Ye te dhammā ādikalyāṇā majjhekalyāṇā pariyosānakalyāṇā sātthā sabyañjanā kevalaparipuṇṇaɱ parisuddhaɱ brahmacariyaɱ abhivadanti, tathā rūpāssa dhammā bahussutā honti dhatā, vacasā, paricitā, manasānupenkhitā, diṭṭhiyā suppaṭividdhā, idampi saddhassa saddhāpadānaɱ hoti.|| ||

3. Puna ca paraɱ subhūti, bhikkhu kalyāṇamitto hoti kalyāṇa sahāyo kalyāṇa sampavaŋko.

Yampi subhūti bhikkhu kalyāṇamitto hoti kalyāṇasahāyo kalyāṇasampavaŋko, idampi subhūti saddhassa saddhāpadānaɱ hoti.|| ||

4. Puna ca paraɱ subhūti, bhikkhu suvaco hoti sovacassa karaṇehi dhammehi samannāgato, khamo padakkhiṇaggāhī anusāsaniɱ, yampi subhūti bhikkhu suvaco hoti sovacassakaraṇehi dhammehi samannāgato khamo padakkhiṇaggāhī anusāsaniɱ.

Idam pi subhūti saddhassa saddhāpadānaɱ hoti.|| ||

5. Puna ca paraɱ subhūti, bhikkhu yāni tāni sabrahmacārīnaɱ uccāvacāni, kiŋkaraṇīyāni tattha dakkho hoti analaso tatrūpāyāya vīmaɱsāya samannāgato alaɱ kātuɱ alaɱ saɱvidhātuɱ.

Yampi subhūti bhikkhu yāni tāni sabrahmacārīnaɱ uccāvacāni kiŋkaraṇīyāni, tatthadakkho hoti analaso tatrūpāyāya samannāgato alaɱ kātuɱ alaɱ saɱvidhātuɱ.

Idam pi subhūti saddhassa saddhāpadānaɱ hoti.|| ||

[339] 6. Puna ca paraɱ subhūti, bhikkhu dhammakāmo hoti piyasamudāhāro abhidhamme abhivinaye u'ārapāmojjo.

Yampi subhūti bhikkhu dhammakāmo hoti piyasamudāhāro abhidhamme abhivinaye u'ārapāmojjo.

Idam pi subhūti saddhassa saddhāpadānaɱ hoti.|| ||

7. Puna ca paraɱ subhūti bhikkhu āraddhaviriyo viharati akusalānaɱ dhammānaɱ pahānāya kusalānaɱ dhammānaɱ upasampadāya thāmavā daḷhaparakkamo anikkhittadhūro kusalesu dhammesu.

Yampi subhūti bhikkhu āraddhaviriyo viharati akusalānaɱ dhammānaɱ pahānāya kusalānaɱ dhammānaɱ upasampadāya thāmavā daḷhaparakkamo anikkhittadhuro kusalesu dhammesu.

Idam pi subhūti saddhassa saddhāpadānaɱ hoti.|| ||

8. Puna ca paraɱ subhūti bhikkhu catunnaɱ jhānānaɱ ābhicetasikānaɱ diṭṭhadhammasukha vihārānaɱ nikāmalābhī hoti akicchalābhī akasiralābhī yampi subhūti bhikkhu catunnaɱ jhānānaɱ ābhicetasikānaɱ diṭṭhadhamma sukha vihārānaɱ nikāmalābhī hoti akicchalābhī akasiralābhī.

Idam pi subhūti saddhassa saddhāpadānaɱ hoti.|| ||

9. Puna ca paraɱ subhūti, bhikkhu aneka-vihitaɱ pubbenivāsaɱ anussarati.

Seyyathīdaɱ: ekam pi jātiɱ dve pi jātiyo Tisso pi jātiyo catasso pi jātiyo pañca pi jātiyo dasa pi jātiyo vīsampi jātiyo tiɱsam pi jātiyo cattārisampi jātiyo paññāsam pi jātiyo jāti-satam pi jāti sahassampi jāti satasahassampi anekepi saɱvaṭṭakappe anekepi vivaṭṭakappe anekepi saɱvaṭṭa-vivaṭṭakappe amutrāsiɱ

Evaɱ nāmo evaɱ gotto evaɱ vaṇṇo evam-āhāro evaɱ-sukha-dukkha-paṭisaŋvedī evamāyu pariyanto, so tato cuto amutra udapādiɱ, tatrāpāsiɱ evaɱnāmo evaɱ gotto evaɱ-vaṇṇo evam-āhāro evaɱ sukhadukkhapaṭisaŋvedī evam-āyu-pariyanto so tato cuto idhupapannoti.

Iti sākāraɱ sa uddesaɱ aneka vihitaɱ pubbenivāsaɱ anussarati.

Yampi subhūti [340] bhikkhu aneka-vihitaɱ pubbenivāsaɱ anussarati, seyyathīdaɱ ekam pi jātiɱ dve pi jātiyo Tisso pi jātiyo catasso pi jātiyo pañca pi jātiyo dasa pi jātiyo vīsampi jātiyo tīsampi jātiyo cattārisampi jātiyo paññāsam pi jātiyo jāti-satam pi jāti sahassampi jāti satasahassampi anekepi saɱvaṭṭakappe anekepi vivaṭṭakappe anekepi saɱvaṭṭa-vivaṭṭakappe amutāsiɱ.

Evaɱnāmo evaɱgotto evaɱ-vaṇṇo evam-āhāro evaɱsukhadukhapaṭisaŋvedī evam-āyu-pariyanto, so tato cuto amutra udapādi, tatrāpāsiɱ evaɱnāmo evaɱ gotto evaɱ-vaṇṇo evam-āhāro evaɱ sukhadukkhapaṭisaŋvedī evam-āyu-pariyanto so tato cuto idhūpapannoti.

Iti sākāraɱ sa uddesaɱ aneka vihitaɱ pubbenivāsaɱ anussarati.

Idam pi subhūti saddhassa saddhāpadānaɱ hoti.|| ||

10. Puna ca paraɱ subhūti, bhikkhu dibbena cakkhunā visuddhena atikkantamānusakena satte passati cavamāne uppajjamāne hīne paṇīte suvaṇṇe dubbaṇṇe sugate duggate, yathākammūpage satte pajānāti.

"Ime vata bhonto sattā kāya duccaritena samannāgatā vacī duccaritena samannāgatā mano duccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.

Ime vā na bhonto sattā kāyasucaritena samannāgatā vacī sucaritena samannāgatā mano sucaritena samannāgatā ariyānaɱ anupavādakā sammā diṭṭhikā sammādiṭṭhikammasamādānā, ke kāyassabhedā param maraṇā sugatiɱ saggaɱ lokaɱ upapannā" ti.

Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathā kammūpage satte pajānāti.

Yampi subhūti, bhikkhu dibbena cakkhunā visuddhena atikantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathā kammūpage satte pajānāti.

Idam pi subhūti saddhassa saddhāpadānaɱ hoti.|| ||

11. Puna ca paraɱ subhūti, bhikkhu āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe va dhamme sayaɱ abhiññā sacchikatvā upasampajja viharati.

Yampi subhūti, bhikkhu āsavānaɱ khayā anāsavaɱ ceto-vimuttiɱ paññā-vimuttiɱ diṭṭh'evadhamme sayaɱ abhiññā sacchikatvā upasampajja viharati.

Idam pi subhūti saddhassa saddhāpadānaɱ hotī ti.|| ||

Evaɱ vutte āyasmā subhūti Bhagavantaɱ etad avoca: yānimāni bhante Bhagavatā saddhassa saddhāpadānāni bhāsitāni saɱvijjanti tāni imassa bhikkhuno, ayañ ca bhikkhu etesu sandissati.

Ayaɱ bhante bhikkhu sīlavā hoti pātimokkha-saɱvara-saɱvuto viharati. Ācāragocarasampanno aṇumattesu vajjesu bhaya-dassāvī samādāya sikkhati sikkhāpadesu.

[341] Ayaɱ bhante bhikkhu bahussuto hoti sutadharo sutasannīcayo.

Ye te dhammā ādikalyāṇā majjhe kalyāṇā pariyosānakalyāṇā sātthā sabyañjanā kevalaparipuṇṇaɱ parisuddhaɱ brahmacariyaɱ abhivadanti, tathārūpāssa dhammā bahussutā honti dhatā vacasā paricitā manasānupekkhitā diṭṭhiyā suppaṭividdhā.|| ||

Ayaɱ bhante bhikkhu kalyāṇamitto kalyāṇasahāyo kalyāṇasampavaŋko.|| ||

Ayaɱ bhante bhikkhu suvaco hoti, sovacassakaraṇehi dhammehi samannāgato khamo padakkhiṇaggāhī anusāsaniɱ.|| ||

Ayaɱ bhante bhikkhu yāni tāni sabrahmacārīnaɱ uccāvacāni kiɱ karaṇīyāni, tattha dakkho hoti analaso tatrūpāyāya vīmaɱsāya samannāgato alaɱ kātuɱ, alaɱ saɱvidhātuɱ.|| ||

Ayaɱ bhante bhikkhu dhammakāmo hoti, piyasamudāhāro abhidhamme abhivinaye u'ārapāmojjo.|| ||

Ayaɱ bhante bhikkhu āraddhaviriyo viharati thāmavā daḷhaparakkamo anikkhittadhūro kusalesu dhammesu.|| ||

Ayaɱ bhante bhikkhu catunnaɱ jhānānaɱ ābhicetasikānaɱ diṭṭha-dhamma-sukha-vihārānaɱ nikāmalābhī hoti akicchalābhī akasiralābhī.|| ||

Ayaɱ bhante bhikkhu aneka-vihitaɱ pubbenivāsaɱ anussarati seyyathīdaɱ.

Ekam pi jātiɱ dve pi jātiyo Tisso pi jātiyo catasso pi jātiyo pañca pi jātiyo dasa pi jātiyo vīsampi jātiyo tiɱsam pi jātiyo cattārisampi jātiyo paññāsam pi jātiyo jāti-satam pi jāti sahassampi jāti satasahassampi anekepi saɱvaṭṭakappe anekepi vivaṭṭakappe anekepi saɱvaṭṭa-vivaṭṭakappe amutrāsiɱ.

Evaɱ nāmo evaɱ gotto evaɱ-vaṇṇo evam-āhāro evaɱsukhadukkha paṭisaŋvedī evamāyu pariyanto, so tato cuto amutra udapādiɱ, tatrāpāsiɱ.

Evaɱ nāmo evaɱ gotto evaɱ-vaṇṇo evam-āhāro evaɱ-sukha-dukkha-paṭisaŋvedī evam-āyu-pariyanto so tato cuto idhupapannoti.

Iti sākāraɱ sa-uddesaɱ aneka-vihitaɱ pubbenivāsaɱ anussarati.|| ||

Ayaɱ bhante bhikkhu dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate, yathākammūpage satte pajānāti:

"Ime vata bhonto sattā kāya duccaritena samannāgatā vacī duccaritena samannāgatā mano duccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.

Ime vā pana bhonto sattā kāya sucaritena samannāgatā vacī sucaritena samannāgatā mano sucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā, te kāyassabhedā param maraṇā sugatiɱ saggaɱ lokaɱ upapannā" ti.

Iti dibbena cakkhunā visuddhena atikkantamānusakena satte passati cavamāne upapajjamāne hīne paṇite suvaṇṇe dubbaṇne sugate duggate yathā kammūpage satte pajānāti.|| ||

Ayaɱ bhante bhikkhu āsavāna khayā ānāsavaɱ ceto-vimuttiɱ paññā vimuttiɱ diṭṭhe va dhamme sayaɱ abhiññā sacchikatvā upasampajja viharati.|| ||

Yānimāni bhante Bhagavatā saddhassa saddhāpadānāni bhāsitāni saɱvijjanti, tāni imassa bhikkhuno.

Ayañ ca bhikkhu etesu sandissatī ti.|| ||

Sādhu sādhu subhūti, tena hi tvaɱ subhūti iminā saddhena bhikkhunā saddhiɱ vihareyyāsi.

Yadā ca tvaɱ subhūti ākaŋkheyyāsi Tathāgataɱ dassanāya iminā ca saddhena bhikkhunā saddhiɱ upasaŋkameyyāsi Tathāgataɱ dassanāyā" ti.|| ||

 


Contact:
E-mail
Copyright Statement   Webmaster's Page