Aŋguttara Nikāya
Ekādasako Nipāto
Sutta 16
Adapted from the 1995 edition of the digital version of the Sri Lanka Buddha Jayanti Tripitaka Series.
Aṭṭhakanāgara Suttaɱ
1. [pts][ati] Evaɱ me sutaɱ:|| ||
Ekaɱ samayaɱ āyasmā Ānando Vesāliyaɱ viharati Beluvagāmake.|| ||
Tena kho pana samayena Dasamo gahapati Aṭṭhakanāgaro Pāṭaliputtaɱ anuppatto hoti kenacid-eva karaṇīyena.|| ||
Atha kho Dasamo gahapati Aṭṭhakanāgaro yena Kukkuṭārāmo yena aññataro bhikkhu ten'upasaŋkami.|| ||
Upasaŋkamitvā taɱ bhikkhuɱ abhivādetvā eka-m-antaɱ nisīdi.|| ||
Eka-m-antaɱ nisinno kho Dasamo gahapati Aṭṭhakanāgaro taɱ bhikkhuɱ etad avoca:|| ||
"Kahan nu kho bhante āyasmā Ānando etarahi viharati?|| ||
Dassana-kāmā hi mayaɱ taɱ āyasmantaɱ Ānandan" ti.|| ||
"Eso gahapati āyasmā Ānando Vesāliyaɱ viharati Beluvagāmake" ti.|| ||
Atha kho Dasamo gahapati Aṭṭhakanāgaro Pāṭaliputte taɱ karaṇīyaɱ tīretvā yena Vesālī Beluvagāmako yen'āyasmā Ānando ten'upasaŋkami.|| ||
Upasaŋkamitvā āyasmantaɱ Ānandaɱ abhivādetvā eka-m-antaɱ nisīdi.|| ||
Eka-m-antaɱ nisinno kho Dasamo gahapati Aṭṭhakanāgaro [343] āyasmantaɱ Ānandaɱ etad avoca:
"Atthi nu kho bhante Ānanda tena Bhagavatā jānatā passatā arahatā sammā-sambuddhena||
eka-dhammo akkhāto||
yattha bhikkhuno appamattassa ātāpino pahitattassa viharato avimuttaɱ vā cittaɱ vimuccati,||
aparikkhīṇā vā āsavā parikkhayaɱ gacchanti||
ananuppattaɱ vā anuttaraɱ yogakkhemaɱ anupāpuṇātī" ti?|| ||
"Atthi kho gahapati tena Bhagavatā jānatā passatā arahatā sammā-sambuddhena||
eka-dhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇātī" ti.|| ||
"Katamo pana bhante Ānanda tena Bhagavatā jānatā passatā arahatā sammā-sambuddhena||
eka-dhammo akkhāto||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇātī" ti?|| ||
"Idha gahapati bhikkhu||
vivicc'eva kāmehi||
vivicca akusalehi dhammehi||
savitakkaɱ||
savicāraɱ||
vivekajaɱ pīti-sukhaɱ||
paṭhamaɱ-jhānaɱ upasampajja viharati.|| ||
So iti paṭisañcikkhati:|| ||
'Idam pi kho paṭhamaɱ-jhānaɱ abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
[344] Puna ca paraɱ gahapati bhikkhu||
vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ||
avicāraɱ||
samādhijaɱ pīti-sukhaɱ||
dutiyaɱ-jhānaɱ upasampajja viharati.|| ||
So iti paṭisañcikkhati:|| ||
Idam pi kho dutiyaɱ-jhānaɱ abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu||
pītiyā ca virāgā||
upekkhako ca viharati||
sato ca sampajāno sukhañ ca kāyena paṭisaŋvedeti||
yantaɱ ariyā ācikkhanti:||
'Upekkhako satimā sukha-vihārī' ti||
taɱ tatiyaɱ-jhānaɱ upasampajja viharati.|| ||
So iti paṭisañcikkhati:|| ||
Idam pi kho tatiyaɱ-jhānaɱ abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu||
sukhassa ca pahānā||
dukkhassa ca pahānā,||
pubbe va somanassa-domanassānaɱ atthaŋgamā||
adukkhaɱ-asukhaɱ||
upekkhāsati pārisuddhiɱ||
catutthaɱ-jhānaɱ upasampajja viharati.|| ||
So iti paṭisañcikkhati:|| ||
Idam pi kho catutthaɱ-jhānaɱ abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu||
mettā-sahagatena cetasā ekaɱ disaɱ pharitvā viharati||
tathā dutiyaɱ,||
tathā tatiyaɱ,||
tathā catutthiɱ||
iti uddham-adho tiriyaɱ sabbadhi||
sabbattatāya||
sabbāvantaɱ lokaɱ||
mettā-sahagatena cetasā vipulena||
mahaggatena||
appamāṇena||
averena avyāpajjhena pharitvā viharati.|| ||
So iti paṭisañcikkhati:|| ||
Ayam pi kho mettā-ceto-vimutti abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā [345] passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu||
karuṇā-sahagatena cetasā ekaɱ disaɱ pharitvā viharati||
tathā dutiyaɱ,||
tathā tatiyaɱ,||
tathā catutthiɱ,||
iti uddham-adho tiriyaɱ sabbadhi||
sabbattatāya||
sabbāvantaɱ lokaɱ||
karuṇā-sahagatena cetasā vipulena||
mahaggatena||
appamāṇena||
averena avyāpajjhena pharitvā viharati.|| ||
So iti paṭisañcikkhati:|| ||
'Ayam pi kho karuṇā-ceto-vimutti abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu||
muditā-sahagatena cetasā ekaɱ disaɱ pharitvā viharati||
tathā dutiyaɱ,||
tathā tatiyaɱ,||
tathā catutthiɱ iti uddham-adho tiriyaɱ sabbadhi||
sabbattatāya||
sabbāvantaɱ lokaɱ||
muditā-sahagatena cetasā vipulena||
mahaggatena||
appamāṇena||
averena avyāpajjhena pharitvā viharati.|| ||
So iti paṭisañcikkhati:|| ||
'Ayam pi kho muditā-ceto-vimutti abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu upekkhā-sahagatena cetasā ekaɱ disaɱ pharitvā viharati||
tathā dutiyaɱ,||
tathā tatiyaɱ,||
tathā catutthiɱ iti uddham-adho tiriyaɱ sabbadhi||
sabbattatāya||
sabbāvantaɱ lokaɱ||
upekkhā-sahagatena cetasā vipulena||
mahaggatena||
appamāṇena||
averena avyāpajjhena pharitvā viharati.|| ||
So iti paṭisañcikkhati:|| ||
'Ayam pi kho upekkhāceto-vimutti abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu sabbaso rūpa-saññānaɱ samatikkamā||
paṭigha-saññānaɱ atthaŋgamā||
nānatta-saññānaɱ amanasi-kārā||
'Ananto ākāso' ti||
ākāsānañcāyatanaɱ upasampajja viharati.|| ||
So iti paṭisañcikkhati:|| ||
'Ayam pi kho pana ākāsānañcāyatana-samāpatti abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no [346] ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu sabbaso ākāsānañcāyatanaɱ samatikkamma||
'Anantaɱ viññāṇan' ti||
viññāṇañcāyatanaɱ upasampajja viharati.|| ||
So iti paṭisañcikkhati:|| ||
'Ayam pi kho viññāṇañcāyatana samāpatti abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Puna ca paraɱ gahapati bhikkhu||
sabbaso viññāṇañcāyatanaɱ samatikkamma||
'N'atthi kiñcī' ti||
ākiñcaññāyatanaɱ upasampajja viharati.|| ||
So iti paṭisañcikkhati:|| ||
'Ayam pi kho ākiñcaññāyatanasamāpatti abhisaŋkhataɱ||
abhisañcetayitaɱ,||
yaɱ kho pana kiñci abhisaŋkhataɱ abhisañcetayitaɱ||
tad aniccaɱ nirodha-dhamman' ti pajānāti.|| ||
So tattha ṭhito āsavānaɱ khayaɱ pāpuṇāti;||
no ce āsavānaɱ khayaɱ pāpuṇāti;||
ten'eva dhamma-rāgena tāya dhamma-nandiyā||
pañcannaɱ orambhāgiyānaɱ saɱyojanānaɱ parikkhayā||
opapātiko hoti||
tattha-parinibbāyī anāvatti-dhammo tasmā lokā.|| ||
Ayam pi kho gahapati tena Bhagavatā jānatā passatā arahatā sammā-sambuddhena||
ekadhammo akkhāto,||
yattha bhikkhuno appamattassa ātāpino pahitattassa viharato avimuttañ c'eva cittaɱ vimuccati||
aparikkhīṇā ca āsavā parikkhayaɱ gacchanti||
ananuppattañ ca anuttaraɱ yogakkhemaɱ anupāpuṇāti.|| ||
■
Evaɱ vutte Dasamo gahapati Aṭṭhakanāgaro āyasmantaɱ Ānandaɱ etad avoca:|| ||
"Seyyathā pi bhante Ānanda puriso ekaɱ nidhimukhaɱ gavesanto sakideva ekādasa nidhimukhāni adhigaccheyya,||
evam eva kho ahaɱ bhante ekaɱ amatadvāraɱ gavesanto sakideva ekādasa amatadvārāni alatthaɱ savaṇāya.|| ||
Seyyathā pi bhante purisassa agāraɱ ekādasadvāraɱ,||
[347] so tasmiɱ agāre āditte eka-m-ekena pi dvārena sakkuṇeyya attānaɱ sotthiɱ kātuɱ,||
evam eva kho ahaɱ bhante imesaɱ ekādasannaɱ amatadvārānaɱ eka-m-ekena pi amatadvārena sakkuṇissāmi attānaɱ sotthiɱ kātuɱ.|| ||
Ime hi nāma bhante aññatitthiyā ācariyassa ācariyadhanaɱ pariyesissanti.|| ||
Kiɱpanāhaɱ āyasmato Ānandassa pūjaɱ na karissāmī" ti.|| ||
Atha kho Dasamo gahapati Aṭṭhakanāgaro Pāṭaliputtañ ca Vesālikañ ca bhikkhu-saŋghaɱ sannipātāpetvā paṇītena khādanīyena bhojanīyena sahatthā santappesi sampavāresi.|| ||
Ekamekañ ca bhikkhuɱ paccekadussayugena acchādesi,||
āyasmantaɱ Ānandaɱ ticīvarena acchādesi.|| ||
Āyasmato ca Ānandassa pañcasataɱ vihāraɱ kārāpesī' ti.|| ||
