Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 17

Adapted from the 1995 edition of the digital version of the Sri Lanka Buddha Jayanti Tripitaka Series.

Gopālaka Suttaɱ

 


 

1. [pts][ati] Ekādasahi bhikkhave aŋgehi samannāgato gopālako abhabbo gogaṇaɱ pariharituɱ phātikatuɱ.|| ||

Katamehi ekādasahi?|| ||

Idha, bhikkhave, gopālako na rūpaññū hoti,||
na lakkhaṇakusalo hoti,||
na āsāṭikaɱ sāṭetā hoti,||
na vaṇaɱ paṭicchādetā hoti,||
na dhūmaɱ kattā hoti.|| ||

Na titthaɱ jānāti,||
na pītaɱ jānāti,||
na vīthiɱ jānāti,||
na gocarakusalo hoti,||
anavasesadohī ca hoti.|| ||

Ye te usabhā gopitaro goparināyakā te na atireka pūjāya pūjetā hoti.|| ||

Imehi kho bhikkhave ekādasahi aŋgehi samannāgato gopālako abhabbo gogaṇaɱ pariharituɱ,||
phātikatuɱ.|| ||

Evam eva kho bhikkhave ekādasahi dhammehi samannāgato bhikkhu abhabbo imasmiɱ dhamma-vinaye vuḍḍhiɱ virū'hiɱ vepullaɱ āpajjituɱ.|| ||

Katamehi ekādasahi?

[348] Idha, bhikkhave, bhikkhu na rūpaññū hoti.|| ||

Na lakkhaṇakusalo hoti,||
na āsāṭikaɱ sāṭetā hoti,||
na vaṇaɱ paṭicchādetā hoti,||
na dhūmaɱ kattā hoti,||
na titthaɱ jānāti,||
na pītaɱ jānāti,||
na gocarakusalo hoti.|| ||

Anavasesadohī ca hoti.|| ||

Ye te bhikkhu therārattaññū cirapabbajitā saŋghapitaro saŋghaparināyakā te na atireka pūjāya pūjetā hoti.|| ||

1. Kathañ ca bhikkhave bhikkhu na rūpaññū hoti?|| ||

Idha, bhikkhave, bhikkhu yaɱ kiñci rūpaɱ sabbaɱ taɱ rūpaɱ cattāri mahābhūtāni catunnañca mahābhūtānaɱ upādāya rūpanti yathābhūtaɱ nappajānāti.|| ||

Evaɱ kho bhikkhave bhikkhū na rūpaññū hoti.|| ||

2. Kathañ ca bhikkhave bhikkhu na lakkhaṇakusalo hoti:|| ||

Idha, bhikkhave, bhikkhu,||
kamma lakkhaṇo bālo,||
kammalakkhaṇo paṇḍito'ti yathābhūtaɱ nappajānāti.|| ||

Evaɱ kho bhikkhave bhikkhu na lakkhaṇakusalo hoti.|| ||

3. Kathañ ca bhikkhave bhikkhu na āsāṭikaɱ sāṭetā hoti:|| ||

Idha, bhikkhave, bhikkhu uppannaɱ kāmavitakkaɱ adhivāseti nappajahati na vinodeti na byantīkaroti na anabhāvaɱ gameti.|| ||

Uppannaɱ vyāpādavitakkaɱ adhivāseti nappajahati na vinodeti na byantīkaroti na anabhāvaɱ gameti.|| ||

Uppannaɱ vihiɱsā vitakkaɱ adhivāseti nappajahati na vinodeti na byantīkaroti,||
na anabhāvaɱ gameti.|| ||

Uppannūppanne pāpake akusale dhamme adhivāseti nappajahati na vinodeti byantīkaroti na anabhāvaɱ gameti.|| ||

Evaɱ kho bhikkhave bhikkhu na āsāṭikaɱ sāṭetā hoti.|| ||

4. Kathañ ca bhikkhave bhikkhu na vaṇaɱ paṭicchādetā hoti:|| ||

Idha, bhikkhave, bhikkhu cakkhunā rūpaɱ disvā nimittaggāhī hoti anubyañjanaggāhī,||
'yatvādhikaraṇamenaɱ cakkhundriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya na paṭipajjati,||
na rakkhati cakkhundriyaɱ,||
cakkhundriye na saɱvaraɱ āpajjati.|| ||

Sotena saddaɱ sutvā nimittaggāhī hoti anubyañjanaggāhī,||
'yatvādhikaraṇamenaɱ1 sotendriyaɱ asaɱvutaɱ viharantaɱ abhijjhā domanassā pāpanā akusalā dhammā anvāssaveyyuɱ,||
tassa saɱvarāya na paṭipajjati,||
na rakkhati sotendriyaɱ,||
sotendriye na saɱvaraɱ āpajjati.|| ||

Ghānena [349] gandhaɱ ghāyitvā nimittaggāhī hoti anubyañjanaggāhī,||
'yatvādhikaraṇamenaɱ1 ghānendriyaɱ asaɱvutaɱ viharantaɱ abhijjhā domanassā pāpanā akusalā dhammā anvāssaveyyuɱ,||
tassa saɱvarāya na paṭipajjati,||
na rakkhati ghānendriyaɱ,||
ghātendriye na saɱvaraɱ āpajjati.|| ||

Jivhāya rasaɱ sāyitvā nimittaggāhī hoti anubyañjanaggāhī,||
'yatvādhikaraṇamenaɱ1 jivhāndriyaɱ asaɱvutaɱ viharantaɱ abhijjhā domanassā pāpanā akusalā dhammā anvāssaveyyuɱ,||
tassa saɱvarāya na paṭipajjati,||
na rakkhati jivhāndriyaɱ,||
jivhāndriye na saɱvaraɱ āpajjati.|| ||

Kāyena phoṭṭhabbaɱ phusitvā nimittaggāhī hoti anubyañjanaggāhī,||
'yatvādhikaraṇamenaɱ kāyendriyaɱ asaɱvutaɱ viharantaɱ abhijjhā domanassā pāpanā akusalā dhammā anvāssaveyyuɱ,||
tassa saɱvarāya na paṭipajjati,||
na rakkhati kāyendriyaɱ,||
kāyendriye na saɱvaraɱ āpajjati.|| ||

Manasādhammaɱ viññāya nimittaggāhī hoti anubyañjanaggāhī,||
yatvādhikaraṇamenaɱ manindriyaɱ asaɱvutaɱ viharantaɱ abhijjhā domanassā pāpakā akusalādhammā anvāssaveyyuɱ,||
tassa saɱvarāya na paṭipajjati,||
na rakkhati,||
manindriyaɱ manindriye saɱvaraɱ nāpajjati.|| ||

Evaɱ bhikkhave bhikkhu na vaṇaɱ paṭicchādetā hoti.|| ||

5. Kathañ ca bhikkhave bhikkhu na dhūmaɱ kattā hoti:|| ||

Idha, bhikkhave, bhikkhu na yathāsutaɱ yathāpariyan taɱ dhammaɱ vitthārena paresaɱ desetā hoti.|| ||

Evaɱ kho bhikkhave bhikkhu na dhūmaɱ kattā hoti.|| ||

6. Kathañ ca bhikkhave bhikkhu na titthaɱ jānāti:|| ||

Idha, bhikkhave, bhikkhu ye te bhikkhu bahussutā āgatāgamā dhammadharā vinayadharā mātikādharā,||
te kālena kālaɱ upasaɱkamitvā na paripucjati,||
na paripañhati,||
'idaɱ bhante kathaɱ,||
imassa ko attho ti?|| ||

Tassa te āyasmanto avivaṭañ c'eva na vivaranti,||
anuttānīkatañ ca na uttānīɱ karontī ti.|| ||

Anekavivihitetasu ca kaŋkhaṭṭhānīyesu dhammesu kaŋkhaɱ na paṭivinodenti.|| ||

Evaɱ kho bhikkhave bhikkhu na titthaɱ jānāti.|| ||

7. Kathañ ca bhikkhave bhikkhu na pītaɱ jānāti:|| ||

Idha, bhikkhave, bhikkhu Tathāgatappavedite dhamma-vinaye desiyamāne na labhati atthavedaɱ,||
na labhati dhammavedaɱ,||
na labhati dhammūpasaɱhitaɱ pāmujjaɱ.|| ||

Evaɱ kho bhikkhave bhikkhu na pītaɱ jānāti.|| ||

8. Kathañ ca bhikkhave bhikkhu na vīthiɱ jānāti:|| ||

Idha, bhikkhave, bhikkhu ariyaɱ aṭṭhaŋgikaɱ maggaɱ yathābhūtaɱ nappajānāti.|| ||

Evaɱ kho bhikkhave bhikkhu na vīthiɱ jānāti.|| ||

9. Kathañ ca bhikkhave bhikkhu na gocarakusalo hoti:|| ||

[350] Idha, bhikkhave, bhikkhu cattāro satipaṭṭhāne yathābhūtaɱ nappajānāti.|| ||

Evaɱ kho bhikkhave bhikkhu na gocarakusalo hoti.|| ||

10. Kathañ ca bhikkhave bhikkhu anavasesadohī hoti:|| ||

Idha, bhikkhave, bhikkhuɱ saddhā gahapatikā abhihaṭṭhuɱ pavārenti cīvarapiṇḍapātasenāsanagilānapaccayabhesajjaparikkhārena.|| ||

Tatra bhikkhu mattaɱ na jānāti paṭiggahanāya,||
evaɱ kho bhikkhave bhikkhu anavasesadohī hoti.|| ||

11. Kathañ ca bhikkhave bhikkhu ye te bhikkhu therā rattaññūcirapabbajitā saŋgha pitaro saŋghaparināyakā,||
te na atireka pūjāya pūjetā hoti.|| ||

Idha, bhikkhave, bhikkhu ye te bhikkhu therā rattaññū cirapabbajitā saŋghapitaro saŋghaparināyakā,||
tesu na mettaɱ kāyakammaɱ paccupaṭṭhāpeti āvī c'eva raho ca na mettaɱ vacīkammaɱ paccupaṭṭhāpeti āvī c'eva raho ca.|| ||

Evaɱ kho bhikkhave bhikkhu ye te bhikkhu therā rattaññū cirapabbajitā saŋghapitaro saŋghaparināyakā,||
tena atireka pūjāya pūjetā hoti.|| ||

Imehi kho bhikkhave ekādasahi dhammehi samannāgato bhikkhu abhabbo imasmiɱ dhamma-vinaye vuḍḍhiɱ virū'hiɱ vepullaɱ āpajjituɱ.|| ||

Ekādasahi bhikkhave aŋgehi samannāgato gopālako bhabbo gogaṇaɱ pariharituɱ,||
phātikatuɱ,||
katamehi ekādasahi:|| ||

Idha, bhikkhave, gopālako rūpaññū hoti.|| ||

Lakkhaṇakusalo hoti,||
āsāṭikaɱ sāṭetā hoti,||
vaṇaɱ paṭicchādetā hoti,||
dhūmaɱ kattā hoti,||
titthaɱ jānāti,||
pītaɱ jānāti,||
vīthiɱ jānāti,||
gocarakusalo hoti,||
sāvasesadohī hoti,||
ye te usabhā gopitaro goparināyakā,||
te atireka pūjāya pūjetā hoti.|| ||

Imehi kho bhikkhave ekādasahi aŋgehi samannāgato gopālako bhabbo gogaṇaɱ pariharituɱ,||
phātikatuɱ.|| ||

Evam eva kho bhikkhave ekādasahi dhammehi samannāgato bhikkhu bhabbo imasmiɱ dhamma vinaye vuḍḍhiɱ virū'hiɱ vepullaɱ āpajjituɱ katamehi ekādasahi:

[351] Idha, bhikkhave, bhikkhu rūpaññū hoti lakkhaṇa kusalo hoti,||
āsāṭikaɱ sāṭetā hoti,||
vaṇaɱ paṭicchādetā hoti,||
dhūmaɱ kattā hoti,||
titthaɱ jānāti,||
pītaɱ jānāti,||
gocarakusalo hoti,||
sāvasesadohī hoti,||
ye te bhikkhu therā rattaññū cirapabbajitā saŋghapitaro saŋghaparināyakā,||
te atirekapūjāya pūjetā hoti.|| ||

1. Kathañ ca bhikkhave bhikkhu rūpaññū hoti:|| ||

Idha, bhikkhave, bhikkhu yaɱ kiñci rūpaɱ sabbaɱ taɱ rūpaɱ cattāri mahābhūtāni,||
catunnañca mahābhūtānaɱ upādāya rūpantī yathābhūtaɱ pajānāti,||
evaɱ kho bhikkhave bhikkhū rūpaññū hoti.|| ||

2. Kathañ ca bhikkhave bhikkhu lakkhaṇakusalo hoti:|| ||

Idha, bhikkhave, bhikkhu 'kammalakkhaṇo bālo,||
kammalakkhaṇo paṇḍito'ti yathābhūtaɱ pajānāti,||
evaɱ kho bhikkhave bhikkhu lakkhaṇakusalo hoti.|| ||

3. Kathañ ca bhikkhave bhikkhu āsāṭikaɱ sāṭetā hoti:|| ||

Idha, bhikkhave, bhikkhu uppannaɱ kāmavitakkaɱ nādhivāseti pajahati vinodeti byāntīkaroti,||
anabhāvaɱ gameti,||
uppannaɱ vyāpāda vitakkaɱ nādhivāseti pajahati vinodeti byantīkaroti anabhāvaɱ gameti.|| ||

Uppannaɱ vihiɱsā vitakkaɱ nādhivāseti pajahati vinodeti byantīkaroti anabhāvaɱ gameti.|| ||

Uppannuppanne pāpake akusale dhamme nādhivāseti pajahati vinodeti byantīkaroti anabhāvaɱ gameti.|| ||

Evaɱ kho bhikkhave bhikkhu āsāṭikaɱ sāṭetā hoti.|| ||

4. Kathañ ca bhikkhave bhikkhu vaṇaɱ paṭicchādetā hoti:|| ||

Idha, bhikkhave, bhikkhu cakkhunā rūpaɱ disvā na nimittaggāhī hoti,||
nānuvyañjanaggāhī yatvādhikaraṇamenaɱ cakkhundriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhundriyaɱ,||
cakkhundriye saɱvaraɱ āpajjati.|| ||

Sotena saddaɱ sutvā na nimittaggāhī hoti,||
nānuvyañjanaggāhī yatvādhikaraṇamenaɱ sotendriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati sotendriyaɱ,||
sotendriye saɱvaraɱ āpajjati.|| ||

Ghānenana ghandhaɱ ghāyitvā na nimittaggāhī hoti,||
nānuvyañjanaggāhī yatvādhikaraṇamenaɱ ghānendriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati ghātendriyaɱ,||
ghānendriye saɱvaraɱ āpajjati.|| ||

Jivhāya rasaɱ sāyitvā na nimittaggāhī hoti,||
nānuvyañjanaggāhī yatvādhikaraṇamenaɱ jivhāndriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati jivhāndriyaɱ,||
jivhāndriye saɱvaraɱ āpajjati.|| ||

Kāyena phoṭṭhabbaɱ phusitvā na nimittaggāhī hoti,||
nānuvyañjanaggāhī yatvādhikaraṇamenaɱ kāyendriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati kāyendriyaɱ,||
kāyendriye saɱvaraɱ āpajjati.|| ||

Manasā dhammaɱ viññāya na nimittaggāhī hoti,||
nānuvyañjanaggāhītha yatvādhikaraṇamenaɱ manindriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa [352] saɱvarāya āpajjati.|| ||

Evaɱ kho bhikkhave bhikkhu vaṇaɱ paṭicchādetā hoti.|| ||

5. Kathañ ca bhikkhave bhikkhu dhūmaɱ kattā hoti:|| ||

Idha, bhikkhave, bhikkhu yathāsutaɱ yathāpariyan taɱ dhammaɱ vitthārena paresaɱ desetā hoti.|| ||

Evaɱ kho bhikkhave bhikkhu dhūmaɱ kattā hoti.|| ||

6. Kathañ ca bhikkhave bhikkhu titthaɱ jānāti:|| ||

Idha, bhikkhave, bhikkhu ye te bhikkhu bahussutā āgatāgamā dhammadharā vinayadharā mātikādharā,||
te kālena kālaɱ upasaɱkamitvā paripucjati,||
paripañhati,||
'idaɱ bhante kathaɱ,||
imassa ko attho ti?|| ||

Tassa te āyasmanto avivaṭañ c'eva vivaranti,||
anuttānīkatañ ca uttānīɱ karontī ti.|| ||

Anekavivihitetasu ca kaŋkhaṭṭhānīyesu dhammesu kaŋkhaɱ paṭivinodenti.|| ||

Evaɱ kho bhikkhave bhikkhu titthaɱ jānāti.|| ||

7. Kathañ ca bhikkhave bhikkhu pītaɱ jānāti:|| ||

Idha, bhikkhave, bhikkhu Tathāgatappavedite dhamma-vinaye desiyamāne labhati atthavedaɱ,||
labhati dhammavedaɱ,||
labhati dhammūpasaɱhitaɱ pāmujjaɱ evaɱ kho bhikkhave bhikkhu pītaɱ jānāti.|| ||

8. Kathañ ca bhikkhave bhikkhu vīthiɱ jānāti:|| ||

Idha, bhikkhave, bhikkhu ariyaɱ aṭṭhaŋgikaɱ maggaɱ yathābhūtaɱ pajānāti.|| ||

Evaɱ kho bhikkhave bhikkhu vīthiɱ jānāti.|| ||

9. Kathañ ca bhikkhave bhikkhu gocarakusalo hoti:|| ||

Idha, bhikkhave, bhikkhu cattāro satipaṭṭhāne yathābhūtaɱ pajānāti.|| ||

Evaɱ kho bhikkhave bhikkhu gocarakusalo hoti

10. Kathañ ca bhikkhave bhikkhu sāvasesadohī hoti:|| ||

Idha, bhikkhave, bhikkhu saddhā gahapatikā abhiṭṭhuɱ pavārenti cīvara piṇḍapāta senāsana gilānappaccaya bhesajja parikkhārena.|| ||

Tatra bhikkhu mattaɱ jānāti paṭiggahanāya.|| ||

[353] evaɱ kho bhikkhave bhikkhu sāvasesadohī hoti.|| ||

11. Kathañ ca bhikkhave bhikkhu ye te bhikkhu therā rattaññū cirapabbajitā saŋghapitaro saŋghaparināyakā te atirekapūjāya pūjetā hoti.|| ||

Idha, bhikkhave, bhikkhu ye te bhikkhu therā rattaññū cirapabbajitā saŋghapitaro saŋghaparināyakā tesu mettaɱ kāyakammaɱ paccupaṭṭhāpeti āvī c'eva raho ca.|| ||

Mettaɱ vacīkammaɱ paccupaṭṭhāpeti āvī c'eva raho ca.|| ||

Mettaɱ manokammaɱ paccacupaṭṭhāpeti āvī c'eva raho ca.|| ||

Evaɱ kho bhikkhave bhikkhu ye te bhikkhu therā rattaññū cirapabbajitā saŋghapitaro saŋghaparināyakā te atireka pūjāya pūjetā hoti.|| ||

Imehi kho bhikkhave ekādasahi dhammehi samannāgato bhikkhu bhabbo imasmiɱ dhamma-vinaye vuḍḍhiɱ virū'hiɱ vepullaɱ āpajjitunti.|| ||

 


Contact:
E-mail
Copyright Statement   Webmaster's Page