Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 19

Adapted from the 1995 edition of the digital version of the Sri Lanka Buddha Jayanti Tripitaka Series.

Dutiya samādhi Suttaɱ

 


 

1. [pts] Sāvatthi|| ||

Tatra kho Bhagavā bhikkhu āmantesi bhikkhavoti.|| ||

Bhadanteti te bhikkhu Bhagavato paccassosuɱ.|| ||

Bhagavā etad avoca:

Siyā nu kho bhikkhave bhikkhuno tathārūpo samādhipaṭilābho yathā n'eva paṭhaviyaɱ [355] paṭhavisaññī assa,||
na āpasmiɱ āposaññī assa,||
na tejasmiɱ tejosaññī assa,||
na vāyasmiɱ vāyosaññī assa,||
na ākāsānañcāyatane ākāsānañcāyatanasaññī assa,||
na viññāṇañcāyatane viññāṇañcāyatanasaññī assa,||
na ākiñcaññāyatane ākiñcaññāyatanasaññī assa,||
na n'eva-saññā-nāsaññāyatane n'eva-saññā-nāsaññāyatanasaññī assa,||
na idha loke idhalokasaññī assa,||
na paraloke paralokasaññī assa,||
yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā,||
tatrāpi na saññī assa,||
saññī ca pana assāti?

Bhagavamamūlakā no bhante dhammā,||
Bhagavannettikā,||
Bhagavampaṭisaraṇā,||
sādhu vata bhante Bhagavantaññe va paṭibhātu etassa bhāsitassa attho Bhagavato sutvā bhikkhu dhāressantī ti.|| ||

Tena hi bhikkhave suṇātha sādhukaɱ manasi karotha bhāsissāmīti.|| ||

Evaɱ bhante' ti kho te bhikkhu Bhagavato paccassosuɱ Bhagavā etad avoca:

Siyā bhikkhave bhikkhuno tathārūpo samādhipaṭilābho yathā n'eva paṭhaviyaɱ paṭhavisaññī assa,||
na āpasmiɱ āposaññī assa,||
na tejasmiɱ tejosaññī assa,||
na vāyasmiɱ vāyosaññī assa,||
na ākāsānañcāyatane ākāsānañcāyatanasaññī assa,||
na viññāṇañcāyatane viññāṇañcāyatanasaññī assa,||
na ākiñcaññāyatane ākiñcaññāyatanasaññī assa,||
na n'eva-saññā-nāsaññāyatane n'eva-saññā-nāsaññāyatanasaññī assa,||
na idha loke idhalokasaññī assa,||
na paraloke paralokasaññī assa,||
yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā,||
tatrāpi na saññī assa,||
saññī ca pana assāti.|| ||

Yathā kathaɱ pana bhante siyā bhikkhuno tathārūpo samādhipaṭilābho yathā n'eva paṭhaviyaɱ paṭhavisaññī assa,||
na āpasmiɱ āposaññī assa,||
na tejasmiɱ tejosaññī assa,||
na vāyasmiɱ vāyosaññī assa,||
na ākāsānañcāyatane ākāsānañcāyatanasaññī assa,||
na viññāṇañcāyatane viññāṇañcāyatanasaññī assa,||
na ākiñcaññāyatane ākiñcaññāyatanasaññī assa,||
na n'eva-saññā-nāsaññāyatane n'eva-saññā-nāsaññāyatanasaññī assa,||
na idha loke idhalokasaññī assa,||
na paraloke paralokasaññī assa,||
yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā,||
tatrāpi na saññī assa,||
saññī ca pana assāti?

Idha,||
bhikkhave,||
bhikkhu evaɱsaññī hoti: ''etaɱ sattaɱ etaɱ paṇītaɱ yad idaɱ sabbasankhāra samatho sabbupadhipaṭinissaggo taṇhakkhayo virāgo nirodho nibbānan' ti..|| ||

Evaɱ kho bhikkhave siyā bhikkhuno tathārūpo samādhipaṭilābho yathā n'eva paṭhaviyaɱ paṭhavisaññī assa,||
na āpasmiɱ āposaññī assa,||
na tejasmiɱ tejosaññī assa,||
na vāyasmiɱ vāyosaññī assa,||
na ākāsānañcāyatane ākāsānañcāyatanasaññī assa,||
na viññāṇañcāyatane viññāṇañcāyatanasaññī [356] assa,||
na ākiñcaññāyatane ākiñcaññāyatanasaññī assa,||
na n'eva-saññā-nāsaññāyatane n'eva-saññā-nāsaññāyatanasaññī assa,||
na idha loke idhalokasaññī assa,||
na paraloke paralokasaññī assa,||
yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā,||
tatrāpi na saññī assa,||
saññī ca pana assāti.|| ||

 


Contact:
E-mail
Copyright Statement   Webmaster's Page