Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Ekādasako Nipāto

Sutta 21

Adapted from the 1995 edition of the digital version of the Sri Lanka Buddha Jayanti Tripitaka Series.

Catuttha samādhi Suttaɱ

 


 

1. [pts] Sāvatthi|| ||

Tatra kho āyasmā Sāriputto bhikkhu āmantesi bhikkhavoti. Bhadanteti te bhikkhu Bhagavato paccassosuɱ. Bhagavā etad avoca:

Siyānu kho āvuso bhikkhuno tathārūpo samādhipaṭilābho yathā n'eva paṭhaviyaɱ paṭhavisaññī assa, na āpasmiɱ āposaññī assa, na tejasmiɱ tejosaññī assa, na vāyasmiɱ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na n'eva-saññā-nāsaññāyatane n'eva-saññā-nāsaññāyatanasaññī assa, na idha loke idhalokasaññī assa, na paraloke paralokasaññī assa, yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā, tatrāpi na saññī assa, saññī ca pana assāti.|| ||

[BJT Page 674]

Dūratopi kho mayaɱ āvuso āgaccheyyāma āyasmato Sāriputtassa santike etassa bhāsitassa atthamaññātuɱ. Sādhu vatāyasmantaɱ yeva Sāriputtaɱ paṭibhātu etassa bhāsitassa attho. Āyasmato Sāriputtassa sutvā bhikkhu dhāressantī ti.|| ||

Tena hāvuso suṇātha sādhukaɱ [358] manasikarotha bhāsissāmīti. Evam āvuso ti kho te bhikkhu āyasmato Sāriputtassa paccassosuɱ. Āyasmā Sāriputto etad avoca:

Siyā āvuso bhikkhuno tathārūpo samādhipaṭilābho yathā n'eva paṭhaviyaɱ paṭhavisaññī assa, na āpasmiɱ āposaññī assa, na tejasmiɱ tejosaññī assa, na vāyasmiɱ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na n'eva-saññā-nāsaññāyatane n'eva-saññā-nāsaññāyatanasaññī assa, na idha loke idhalokasaññī assa, na paraloke paralokasaññī assa, yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā, tatrāpi na saññī assa, saññī ca pana assāti.|| ||

Yathā kathampana āvuso Sāriputta siyā bhikkhuno tathārūpo samādhipaṭilābho yathā n'eva paṭhaviyaɱ paṭhaviyaɱ paṭavisaññī assa, na āpasmiɱ āposaññī assa, na tejasmiɱ tejosaññī assa, na vāyasmiɱ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na n'eva-saññā-nāsaññāyatane n'eva-saññā-nāsaññāyatanasaññī assa, na idha loke idhalokasaññī assa, na paraloke paralokasaññī assa, yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā, tatrāpi na saññī assa, saññī ca pana assāti?

Idh'āvuso bhikkhu evaɱsaññī hoti: ''etaɱ sattaɱ etaɱ paṇītaɱ yad idaɱ sabbasankhāra samatho sabbupadhipaṭinissaggo taṇhakkhayo virāgo nirodho nibbānan' ti.. Evaɱ kho āvuso siyā bhikkhuno tathārūpo samādhipaṭilābho yathā n'eva paṭhaviyaɱ paṭhavisaññī assa, na āpasmiɱ āposaññī assa, na tejasmiɱ tejosaññī assa, na vāyasmiɱ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na n'eva-saññā-nāsaññāyatane n'eva-saññā-nāsaññāyatanasaññī assa, na idha loke idhalokasaññī assa, na paraloke paralokasaññī assa, yam p'idaɱ diṭṭhaɱ sutaɱ mutaɱ viññātaɱ pattaɱ pariyesitaɱ anuvicaritaɱ manasā, tatrāpi na saññī assa, saññī ca pana assāti.|| ||

Anussativaggo dutiyo.|| ||

Tatraddānaɱ:

Dve mahānāmā ca nandiyena subhūtinā ca mettā,

Dasamo dve ca gopālo cattāro ca samādhināti.|| ||

[359]|| ||

 


Contact:
E-mail
Copyright Statement   Webmaster's Page