Digha Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Dīgha Nikāya

Sutta 24

Pātika Suttantaɱ

Adapted from the digital version of the Sri Lanka Buddha Jayanti Tripitaka Series

 


 

[1][pts]Evaɱ me sutaɱ.|| ||

Ekaɱ samayaɱ Bhagavā Mallesu viharati.|| ||

Anupiyā nāma Mallānaɱ nigamo.|| ||

Atha kho Bhagavā pubbaṇha-samayaɱ nivāsetvā patta-cīvaram ādāya Anupiyaɱ piṇḍāya pāvisi.|| ||

Atha kho Bhagavato etad ahosi:|| ||

"Atippago kho tāva Anupiyāyaɱ piṇḍāya carituɱ,||
yan nūnāhaɱ yena Bhaggava-gottassa paribbājakassa ārāmo,||
yena Bhaggava-gotto paribbājako ten'upasaŋkameyyan" ti.|| ||

2. Atha kho Bhagavā yena Bhaggava-gottassa paribbājakassa ārāmo yena Bhaggava-gotto paribbājako ten'upasaŋkami.|| ||

[2] Atha kho Bhaggava-gotto paribbājako Bhagavantaɱ etad avoca:|| ||

"Etu kho bhante Bhagavā,||
svāgataɱ bhante Bhagavato,||
cirassaɱ kho bhante Bhagavā imaɱ pariyāyam akāsi yad idaɱ idh'āgamanāya.|| ||

Nisīdatu bhante Bhagavā,||
idam āsanaɱ paññattan" ti.|| ||

Nisīdi Bhagavā paññatte āsane.|| ||

Bhaggava-gotto pi kho paribbājako aññataraɱ nīcaɱ āsanaɱ gahetvā eka-m-antaɱ nisīdi.|| ||

3. Eka-m-antaɱ nisinno kho Bhaggava-gotto paribbājako Bhagavantaɱ etad avoca:|| ||

"Purimāni bhante, divasāni purimatarāni Sunakkhatto Licchavi-putto yenāhaɱ ten'upasaŋkami,||
upasaŋkamitvā maɱ etad avoca:|| ||

'Paccakkhāto dāni mayā Bhaggava Bhagavā,||
na dānāhaɱ Bhaggava Bhagavantaɱ uddissa viharāmī' ti.|| ||

Kacc'etaɱ bhante tath'eva,||
yathā Sunakkhatto Licchavi-putto avacā" ti?|| ||

"Tath'eva kho etaɱ Bhaggava,||
yathā Sunakkhatto Licchavi-putto avaca.|| ||

4. Purimānī Bhaggava divasāni puramatarāni Sunakkhatto Licchavi-putto yenāhaɱ ten'upasaŋkami.|| ||

Upasaŋkamitvā maɱ abhivādetvā eka-m-antaɱ nisīdi.|| ||

Eka-m-antaɱ nisinno kho Bhaggava,||
Sunakkhatto Licchavi-putto maɱ etad avoca:|| ||

'Paccakkhāmi dānāhaɱ bhante Bhagavantaɱ,||
nā dānāhaɱ bhante, Bhagavantaɱ uddissa viharissāmī' ti.|| ||

Evaɱ vutte ahaɱ Bhaggava,||
Sunakkhattaɱ Licchavi-puttaɱ etad avocaɱ:|| ||

'Api nūnāhaɱ Sunakkhatta, evaɱ avacaɱ:|| ||

"Ehi tvaɱ Sunakkhatta, mamaɱ uddissa viharāhī" ti?|| ||

'No h'etaɱ bhante.'|| ||

[3] Tvaɱ vā pana maɱ evaɱ avaca:|| ||

"Ahaɱ bhante, Bhagavantaɱ uddissa viharissāmī" ti?.|| ||

'No h'etaɱ bhante.'|| ||

Iti kira Sunakkhatta, n'evāhan taɱ vadāmi:

"Ehi tvaɱ Sukkhatta,||
mamaɱ uddissa viharāhī" ti,|| ||

Na pi kira maɱ tvaɱ vadesi:|| ||

"Ahaɱ bhante, Bhagavantaɱ uddissa viharissāmī" ti,|| ||

Evaɱ sante mogha-purisa,||
ko santo kaɱ paccācikkhasi?|| ||

Passa mogha-purisa,||
yāvañ ca te idaɱ aparaddhan' ti.|| ||

5. 'Na hi pana me hante,||
Bhagavā uttari-manussa-dhammā iddhi-pāṭihāriyaɱ karotī' ti.|| ||

'Api nu tāhaɱ Sunakkhatta, evaɱ avacaɱ:|| ||

"Ehi tvaɱ Sunakkhatta,||
mamaɱ uddissa viharāhi,||
ahan te uttari-manussa-dhammā iddhi-pāṭihāriyaɱ karissāmī' ti?"

'No h'etaɱ bhante.'|| ||

Tvaɱ ca pana maɱ evaɱ acaca:

"Ahaɱ bhante, Bhagavantaɱ uddissa viharissāmi,||
Bhagavā me uttari manussadhammā iddhi-pāṭihāriyaɱ karissatī' ti?"

'No h'etaɱ bhante.'|| ||

'Iti kira Sunakkhatta,||
n'evāhan taɱ vadāmi:|| ||

"Ehi tvaɱ Sunakkhatta,||
mamaɱ uddissa viharāhi,||
ahan te uttari-manussa-dhammā iddhi-pāṭihāriyaɱ karissāmī" ti,|| ||

Na pi kira maɱ tvaɱ vadesi:|| ||

"Ahaɱ bhante, Bhagavantaɱ uddissa viharissāmi,||
Bhagavā me uttari-manussa-dhammā iddhi-pāṭihāriyaɱ karissatī" ti,|| ||

Evaɱ sante mogha-purisa,||
ko santo kaɱ paccācikkhasi?|| ||

Taɱ kim maññasi Sunakkhatta?|| ||

Kate vā uttari-manussa-dhammā||
iddhi-pāṭihāriye akate vā||
uttari-manussa-dhammā iddhi-pāṭihāriye,||
yass'atthāya mayā dhammo desito so niyyāti takkarassa sammā-dukkha-kkhayāyā ti?|| ||

[4] 'Kate vā bhante,||
uttari-manussa-dhammā iddhi-pāṭihāriye akate vā||
uttari-manussa-dhammā iddhi-pāṭihāriye,||
yass'atthāya Bhagavatā dhammo desito so niyyāti takkarassa sammā-dukkha-kkhayāyā' ti.|| ||

Iti kira Sunakkhatta,||
kate vā uttari-manussa-dhammā iddhi-pāṭihāriye akate vā uttari-manussa-dhammā iddhi-pāṭihāriye,||
yass'atthāya mayā dhammo desito so niyyāti takkarassa sammā-dukkha-kkhayāyā.|| ||

Tatra Sunakkhatta,||
kiɱ uttari-manussa-dhammā iddhi-pāṭihāriyaɱ kataɱ karissati?|| ||

Passa mogha-purisa,||
yāvañ ca te idaɱ aparaddhan ti.'|| ||

6. 'Na hi pana me bhante,||
Bhagavā aggaññaɱ paññapetī' ti.|| ||

Api nu tāhaɱ Sunakkhatta,||
evaɱ avacaɱ:|| ||

"Ehi tvaɱ Sunakkhatta,||
mamaɱ uddissa viharāhi,||
ahan te aggaññaɱ paññapessāmī" ti?|| ||

'No h'etaɱ bhante.'|| ||

Tvaɱ vā pana maɱ evaɱ avaca:|| ||

"Ahaɱ bhante, Bhagavantaɱ uddissa viharissāmi,||
Bhagavā me aggaññaɱ paññapessatī" ti?

'No h'etaɱ bhante.'|| ||

Iti kira Sunakkhatta,||
n'evāhan taɱ vadāmi:

"Ehi tvaɱ Sunakkhatta,||
mamaɱ uddissa viharāhi,||
ahan te aggaññaɱ paññapessāmī" ti,|| ||

Na pi kira maɱ tvaɱ vadesi:|| ||

"Ahaɱ bhante, Bhagavantaɱ uddissa viharissāmi,||
Bhagavā me aggaññaɱ paññapessatī" ti,|| ||

Evaɱ sante mogha-purisa,||
ko santo kaɱ paccācikkhasi?|| ||

Taɱ kim maññasi Sunakkhatta?|| ||

Paññatte vā aggaññe appaññatte vā aggaññe||
yass'atthāya mayā dhammo desito,||
so niyyāti takkarassa sammā-dukkha-kkhayāyā ti?|| ||

'Paññatte vā bhante,||
aggaññe appaññatte vā aggaññe,||
yass'atthāya Bhagavatā dhammo desito so niyyāti takkarassa sammā-dukkha-kkhayāyā' ti.|| ||

[5] Iti kira Sunakkhatta,||
paññatte vā aggaññe appaññatte vā aggaññe,||
yass'atthāya māyā dhammo desito,||
so niyyāti takkarassa sammā-dukkha-kkhayāya.|| ||

Tatra Sunakkhatta,||
kiɱ aggaññaɱ paññattaɱ karissati?|| ||

Passa mogha-purisa,||
yāvañ ca te idaɱ aparaddhaɱ.|| ||

Aneka-pariyāyena kho te Sunakkhatta,||
mama vaṇṇo bhāsito Vajji-gāme:|| ||

"Iti pi so Bhagavā arahaɱ Sammā-Sambuddho vijjā-caraṇa-sampanno sugato loka-vidū anuttaro purisadammasārathi satthā deva-manussānaɱ buddho Bhagavā" ti.|| ||

Iti kho te Sunakkhatta,||
aneka-pariyāyena mama vaṇṇo bhāsito Vajji-gāme.'|| ||

Aneka-pariyāyena kho te Sunakkhatta,||
Dhammassa vaṇṇo bhāsito Vajji-gāme:|| ||

"Svākkhāto Bhagavatā Dhammo sandiṭṭhiko akāliko ehi-passiko opanayiko paccattaɱ veditabbo viññūhī" ti.|| ||

Iti kho te Sunakkhatta,||
aneka-pariyāyena Dhammassa vaṇṇo bhāsito Vajji-gāme.|| ||

Aneka-pariyāyena kho te Sunakkhatta,||
Saŋghassa vaṇṇo bhāsito Vajji-gāme:|| ||

"Supaṭipanno Bhagavato sāvaka-saŋgho,||
uju-paṭipanno Bhagavato sāvaka-saŋgho,||
ñāya-paṭipanno Bhagavato sāvaka-saŋgho,||
sāmici-paṭipanno Bhagavato sāvaka-saŋgho,||
yad idaɱ cattāri purisayugāni aṭṭha-purisa-puggalā,||
esa Bhagavato sāvaka-saŋgho āhuṇeyyo pāhuṇeyyo dakkhiṇeyyo añjali-karaṇīyo anuttaraɱ puñña-kkhettaɱ lokassā" ti.|| ||

Iti kho te Sunakkhatta,||
aneka-pariyāyena Saŋghassa vaṇeṇā bhāsito Vajji-gāme.|| ||

Ārocayāmi kho te Sunakkhatta,||
paṭivedayāmi kho te Sunakkhatta,||
bhavissanati kho te Sunakkhatta vattāro:|| ||

"No visahi Sunakkhatto Licchavi-putto Samaṇe Gotame brahmacariyaɱ carituɱ.|| ||

So avisahanto sikkhaɱ paccakkhāya hināy'āvatto" ti.|| ||

Iti kho te Sunakkhatta,||
bhavissanti vattāro' ti.|| ||

[6] Evaɱ kho Bhaggava, Sunakkhatto Licchavi-putto mayā vuccamāno apakkam'eva imasmā Dhamma-Vinayā yathā taɱ Āpāyiko Nerayiko."|| ||

Korakkhatkiyavatthu

7. Ekam idāhaɱ Bhaggava, samayaɱ Bumūsu viharāmi,||
Uttarakā nāma Bumūnaɱ nigamo.|| ||

Atha kho'haɱ Bhaggava,||
pubbaṇha-samayaɱ nivāsetvā patta-cīvaram ādāya Sunakkhattena Licchavi-puttena pacchā-samaṇena Uttarakaɱ piṇḍāya pāvisiɱ.|| ||

Tena kho pana samayena acelo Korakkhattiyo kukkuravatiko cātukuṇḍiko chamā-nikkiṇṇaɱ bhakkhasaɱ mukhen'eva khādati mukhen'eva bhuñjati.|| ||

Addasā kho Bhaggava, Sunakkhatto Licchavi-putto acelaɱ Korakkhattiyaɱ kukkuravatikaɱ cātukuṇḍikaɱ chamā-nikkiṇṇaɱ bhakkhasaɱ mukhen'eva khādannaɱ mukhen'eva bhuñjantaɱ.|| ||

Disvān'assa etad ahosi:|| ||

"Sādhu-rūpo vata bho arahaɱ samaṇo cātukuṇḍiko chamā-nikkiṇṇaɱ bhakkhasaɱ mukhen'eva khādati mukhen'eva bhuñjatī" ti.|| ||

8. Atha kho ahaɱ Bhaggava,||
Sunakkhattassa Licchavi-puttassa cetasā ceto-parivitakkam aññāya Sunakkhattaɱ Licchavi-puttaɱ etad avocaɱ:|| ||

'Tvam pi nāma mogha-purisa,||
samaṇo Sakya-puttiyo paṭijānissasī' ti?|| ||

'Kiɱ pana maɱ bhante,||
Bhagavā evam āha:'|| ||

[7] 'Tvam pi nāma mogha-purisa,||
samaṇo Sakya-puttiyo paṭijānissī ti?'|| ||

'Nanu te Sunakkhatta,||
imaɱ acelaɱ Korakkhattiyaɱ kukkuravatikaɱ cātukuṇḍikaɱ chamā-nikkiṇṇaɱ bhakkhasaɱ mukhen'eva khādantaɱ mukhen'eva bhuñjantaɱ.|| ||

Disvāna etad ahosi:|| ||

"Sādhu-rūpo vata bho arahā samaṇo cātukuṇḍiko chamā-nikkiṇṇaɱ bhakkhasaɱ mukhen'eva khādati mukhen'eva bhuñjatī" ti?'|| ||

'Evaɱ bhante.|| ||

Kiɱ pana bhante,||
Bhagavā arahattassa maccharāyatī' ti?|| ||

'Na kho ahaɱ mogha-purisa,||
arahattassa maccharāyāmi|| ||

Api ca tuyh'ev'etaɱ pāpakaɱ diṭṭhi-gataɱ uppannaɱ,||
taɱ pajaha,||
mā te ahosi dīgha-rattaɱ ahitāya dukkhāya.|| ||

Yaɱ kho pan'etaɱ Sunakkhatta,||
maññasi acelaɱ Korakkhattiyaɱ:|| ||

"Sādhu-rūpo arahaɱ samaṇo" ti,||
so sattamaɱ-divasaɱ alasakena kālaɱ karissati,||
kāla-kato ca - Kālakañjā nāma Asurā,||
sabba-nihīno Asura-kāyo - tatra upapajjissati.|| ||

Kālakatañ ca naɱ bīraṇa-tthambhake susāne chaḍḍessanti.|| ||

Ākaŋkhamāno ca tvaɱ Sunakkhatta,||
acelaɱ Korakkhattiyaɱ upasaŋkamitvā puccheyyāsi:|| ||

"Jānāsi āvuso acela Korakkhattiya,||
attano gatin" ti?|| ||

Ṭhānaɱ kho pan'etaɱ Sunakkhatta,||
vijjati,||
yan te acelo Korakkhattiyo vyākarissati:|| ||

"Jānāmi āvuso Sunakkhatta attano gatiɱ - Kālakañjā nāma Asurā,||
sabba-nihīno Asura-kāyo tatr'amhi upapanno" ti.'|| ||

9. Atha kho Bhaggava, Sunakkhatto Licchavi-putto yena acelo Korakkhattiyo ten'upasaŋkami.|| ||

Upasaŋkamitvā acelaɱ Korakkhattiyaɱ etad avoca:|| ||

'Vyākato kho'si āvuso Korakkhattiya,||
samaṇena Gotamena:|| ||

"Acelo Korakkhattiyo sattamaɱ-divasaɱ alasakena kālaɱ karissati,||
kāla-kato.|| ||

[8] Ca Kālakañjā nāma Asurā,||
sabba-nihīno Asura-kāyo tatra upapajjissati||
Kālakatañ ca naɱ bīraṇa-tthambhake susāne chaḍḍessantī" ti.|| ||

Yena tvaɱ āvuso Korakkhattiya,||
mattam ca bhattaɱ bhuñjeyyāsi,||
mattam ca pānīyaɱ piveyyāsi,||
yathā Samaṇassa Gotamassa micchā assa vacanan' ti.|| ||

Atha kho Bhaggava, Sunakkhatto Licchavi-putto eka-dvīhikāya sattarattindivāni gaṇesi,||
yathā taɱ Tathāgatassa asaddahamāno.'|| ||

Atha kho Bhaggava,||
acelo Korakkhattiyo sattamaɱ-divasaɱ alasakena kālam akāsi||
Kālakato Kālakañjā nāma Asurā,||
sabba-nihīno Asura-kāyo tatra upapajji||
Kālakatañ ca taɱ bīraṇa-tthambhake susāne chaḍḍhesuɱ.|| ||

Assosi kho Bhaggava, Sunakkhatto Licchavi-putto acelo Korakkhattiyo alasakena kāla-kato bīraṇa-tthambhake susāne chaḍḍhito' ti.|| ||

Atha kho Bhaggava, Sunakkhatto Licchavi-putto yena bīraṇa-tthambhakaɱ susānaɱ yena acelo Korakkhattiyo ten'upasaŋkami.|| ||

Upasaŋkamitvā acelaɱ Korakkhattiyaɱ tikkhattuɱ pāṇinā ākoṭesi:|| ||

'Jānāsi āvuso,||
Korakkhattiya attano gatin' ti?|| ||

Atha kho Bhaggava, acelo Korakkhattiyo pāṇīnā piṭṭhiɱ paripuñjanto vuṭṭhāsi|| ||

'Jānāmi āvuso Sunakkhatta, attano gatiɱ||
Kālakañjā nāma Asurā||
sabba nihīno Asura-kāyo,||
tatr'amhi upapanno' ti|| ||

vatvā tatth'eva uttāno paripati.|| ||

10. Atha kho Bhaggava, Sunakkhatto Licchavi-putto yenāhaɱ ten'upasaŋkami.|| ||

Upasaŋkamitvā maɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho ahaɱ Bhaggava,||
Sunakkhattaɱ Licchavi-puttaɱ etad avocaɱ:|| ||

'Taɱ kim maññasi Sunakkhatta?|| ||

Yath'eva te ahaɱ acelaɱ Korakkhattiyaɱ ārabbha vyākāsiɱ,||
tath'eva taɱ vipakkaɱ aññathā vā' ti?|| ||

'Yath'eva me bhante,||
Bhagavā acelaɱ Korakkhattiyaɱ ārabbha vyākāsi,||
tath'eva taɱ vipakkaɱ no aññathā' ti?|| ||

[9] 'Taɱ kim maññasi Sunakkhatta?|| ||

Yadi evaɱ sante kataɱ vā hoti uttari-manussa-dhammā iddhi-pāṭihāriyaɱ akataɱ vā' ti?|| ||

'Addhā kho bhante,||
evaɱ sante kataɱ hoti uttari-manussa-dhammā iddhi-pāṭihāriyaɱ no akatan' ti.|| ||

'Evam pi kho maɱ tvaɱ mogha-purisa,||
uttari-manussa-dhammā iddhi-pāṭihāriyaɱ karontaɱ evaɱ vadesi:|| ||

"Na hi pana me bhante,||
Bhagavā uttari-manussa-dhammā iddhi-pāṭihāriyaɱ karotī" ti.|| ||

Passa mogha-purisa,||
yāvañ ca te idaɱ aparaddhan' ti.|| ||

Evam pi kho Bhaggava,||
Sunakkhatto Licchavi-putto mayā vuccamāno apakkam'eva imasmā Dhamma-Vinayā,||
yathā taɱ Āpāyiko Nerayiko."|| ||

Kandaramasukavatthu

11. "Ekam idāhaɱ Bhaggava,||
samayaɱ Vesāliyaɱ viharāmi Mahā-vane Kūṭāgāra-sālāyaɱ.|| ||

Tena kho pana samayena acelo Kandaramasuko Vesāliyaɱ paṭivasati lābhagga-ppatto c'eva yasagga-ppatto ca Vajji-gāme.|| ||

Tassa satta vata-padāni samattāni samādinnāni honti:

'Yāva-jīvaɱ acelako assaɱ,||
na vatthaɱ paridaheyyaɱ.|| ||

Yāva-jīvaɱ brahmacārī assaɱ,||
na methunaɱ dhammaɱ paṭiseveyyaɱ.|| ||

Yāva-jīvaɱ surā-maɱsen'eva yāpeyyaɱ,||
na odana-kummāsaɱ bhuñjeyyaɱ.|| ||

Puratthimena Vesāliɱ Udenaɱ nāma cetiyaɱ taɱ nātikkameyyaɱ

Dakkhiṇena Vesāliɱ Gotamakaɱ nāma cetiyaɱ taɱ nātikkameyyaɱ

Pacchimena Vesāliɱ Sattambaɱ nāma cetiyaɱ [10] Taɱ nātikkameyyaɱ

Uttarena Vesāliɱ Bahuputtaɱ nāma cetiyaɱ taɱ nātikkameyyana' ti.|| ||

So imesaɱ sattannaɱ vata-padānaɱ samādāna-hetu lābhagga-ppatto c'eva yasagga-ppatto ca Vajji-gāme.|| ||

Atha kho Bhaggava, Sunakkhatto Licchavi-putto yena acelo Kandaramasuko ten'upasaŋkami,||
upasaŋkamitvā acelaɱ Kandaramasukaɱ pañhaɱ pucchi.|| ||

Tassa acelo Kandaramasuko pañhaɱ puṭṭho na sampāyāsi.|| ||

Asampāyanto kopañ ca dosañ ca appaccayañ ca pātvākāsi.|| ||

Atha kho Bhaggava, Sunakkhattassa Licchavi-puttassa etad ahosi:|| ||

'Sādhu-rūpaɱ vata bho arahantaɱ samaṇaɱ āsādimhase,||
mā vata no ahosi dīgha-rattaɱ ahitāya dukkhāyā' ti.'|| ||

12. Atha kho Bhaggava, Sunakkhatto Licchavi-putto yenāhaɱ ten'upasaŋkami.|| ||

Upasaŋkamitvā maɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho ahaɱ Bhaggava,||
Sunakkhattaɱ Licchavi-puttaɱ etad avocaɱ:|| ||

'Tvam pi nāma mogha-purisa,||
samaṇo Sakya-puttiyo paṭijānissasī' ti?|| ||

'Kiɱ pana maɱ bhante,||
Bhagavā evam āha:|| ||

"Tvam pi nāma mogha-purisa,||
samaṇo Sakya-puttiyo paṭijānissasī" ti?|| ||

'Nanu tvaɱ Sunakkhatta,||
acelaɱ Kandaramasukaɱ upasaŋkamitvā pañhaɱ pucchi?|| ||

Tassa te acelo Kandaramasuko pañhaɱ puṭṭho na sampāyāsi.|| ||

Asampāyanto kopañ ca dosañ ca appaccayañ ca pātvākāsi.|| ||

Tassa te etad ahosi:|| ||

"Sādhurūpaɱ vata bho arahantaɱ samaṇaɱ āsādimhase.|| ||

Mā vata no ahosi dīgha-rattaɱ ahitāya dukkhāyā" ti.'|| ||

'Evaɱ bhante.|| ||

Kiɱ pana bhante,||
Bhagavā arahantassa maccharāyatī' ti?|| ||

[11] 'Na kho ahaɱ mogha-purisa,||
arahattassa maccharāyāmi.|| ||

Api ca tuyh'ev'etaɱ pāpakaɱ diṭṭhi-gataɱ uppannaɱ,||
taɱ pajaha,||
mā te ahosi dīgha-rattaɱ ahitāya dukkhāya.|| ||

Yaɱ kho pan'etaɱ Sunakkhatta maññasi acelaɱ Kandaramasukaɱ "sādhurūpo arahaɱ samaṇo" ti||
so na cirass'eva parihito sānucariyo vicaranto odana-kummāsaɱ bhuñjamāno sabbān'eva Vesāliyāni cetiyāni samatikkamitvā yasā nikkiṇṇo kālaɱ karissatī ti.'|| ||

13. Atha kho Bhaggava, acelo Kaḷāramaṭiṭhuko na cirass'eva parihito sānucariyo vicaranto odana-kummāsaɱ bhuñjamāno sabbān'eva Vesāliyāni cetiyāni samatikkamitvā yasā nikkiṇṇo kālam akāsi.|| ||

Assosi kho Bhaggava, Sunakkhatto Licchavi-putto:|| ||

Acelo kira Kandaramasuko parihito sānucariyo vicaranto odana-kummāsaɱ bhuñjamāno sabbān'eva Vesāliyāni cetiyāni samatikkamitvā yasā nikkiṇṇo kālaɱ katoti.|| ||

Atha kho Bhaggava, Sunakkhatto Licchavi-putto yenāhaɱ ten'upasaŋkami.|| ||

Upasaŋkamitvā maɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho ahaɱ Bhaggava Sunakkhattaɱ Licchavi-puttaɱ etad avocaɱ:

'Taɱ kim maññasi Sunakkhatta?|| ||

Yath'eva te ahaɱ acelaɱ Kandaramasukaɱ ārabbha vyākāsiɱ,||
tath'eva taɱ vipakkaɱ aññathā vā' ti?|| ||

'Yath'eva me bhante,||
Bhagavā acelaɱ Kandaramasukaɱ ārabbha vyākāsi,||
tath'eva taɱ vipakkaɱ no aññathā' ti.|| ||

'Taɱ kim maññasi Sunakkhatta?|| ||

Yadi evaɱ sante [12] kataɱ vā hoti uttari-manussa-dhammā iddhi-paṭihāriyaɱ,||
akataɱ vā' ti?

'Addhā kho bhante,||
evaɱ sante kataɱ hoti uttari-manussa-dhammā iddhi-pāṭihāriyaɱ,||
no akatanti.'|| ||

'Evam pi kho maɱ tvaɱ mogha-purisa,||
uttari-manussa-dhammā iddhi-pāṭihāriyaɱ karontaɱ evaɱ vadesi:|| ||

"Na hi pana me bhante,||
Bhagavā uttari-manussa-dhammā iddhi-pāṭihāriyaɱ karotī" ti.|| ||

Passa mogha-purisa,||
yāvañ ca te idaɱ aparaddhan' ti.|| ||

Evam pi kho Bhaggava, Sunakkhatto Licchavi-putto mayā vuccamāno apakkam'eva imasmā Dhamma-Vinayā,||
yathā taɱ Āpāyiko Nerayiko."|| ||

Pāṭikaputtavatthu

14. "Ekam idāhaɱ Bhaggava, samayaɱ tatth'eva Vesāliyaɱ viharāmi Mahā-vane Kūṭāgāra-sālāyaɱ.|| ||

Tena kho pana samayena acelo Pāṭika-putto Vesāliyaɱ paṭivasati lābhagga-ppatto c'eva yasagga-ppatto ca Vajji-gāme.|| ||

So ca Vesāliyaɱ parisatiɱ evaɱ vācaɱ bhāsati:|| ||

'Samaṇo pi Gotamo ñāṇa-vādo||
aham pi ñāṇa-vādo.|| ||

Ñāṇa-vādo kho pana ñāṇa-vādena arahati uttari-manussa-dhammā iddhi-pāṭihāriyaɱ dassetuɱ.|| ||

Samaṇo ce Gotamo upaḍḍha-pathaɱ āgaccheyya,||
aham pi upaḍḍha-pathaɱ gaccheyyaɱ.|| ||

Te tattha ubho uttari-manussa-dhammā iddhi-pāṭihāriyaɱ kareyyāma.|| ||

Ekaɱ ce Samaṇo Gotamo uttari-manussa-dhammā iddhi-pāṭihāriyaɱ karissati,||
dvāhaɱ karissāmi.|| ||

Dve ce Samaṇo Gotamo uttari-manussa-dhammā iddhipāṭihāriyāni karissati,||
cattārāhaɱ [13] karissāmi.|| ||

Cattāri ce Samaṇo Gotamo uttari-manussa-dhammā iddhipāṭihāriyāni karissati,||
aṭṭhāhaɱ karissāmi.|| ||

Iti yāvatakaɱ yāvatakaɱ Samaṇo Gotamo uttari-manussa-dhammā iddhi-pāṭihāriyaɱ karissati,||
tad diguṇaɱ tad diguṇāhaɱ karissāmī' ti.|| ||

15. "Atha kho Bhaggava, Sunakkhatto Licchavi-putto yenāhaɱ ten'upasaŋkhami,||
upasaŋkamitvā maɱ abhivādetvā eka-m-antaɱ nisīdi.|| ||

Eka-m-antaɱ nisinno kho Bhaggava,||
Sunakkhatto Licchavi-putto maɱ etad avoca:|| ||

'Acelo bhante, Pāṭika-putto Vesāliyaɱ paṭivasati lābhagga-ppatto c'eva yasagga-ppatto ca Vajji-gāme.|| ||

So Vesāliyaɱ parisatiɱ evaɱ vācaɱ bhāsati:|| ||

"Samaṇo pi Gotamo ñāṇa-vādo||
aham pi ñāṇa-vādo.|| ||

Ñāṇa-vādo kho pana ñāṇa-vādena arahati uttari-manussa-dhammā iddhi-pāṭihāriyaɱ dassetuɱ.|| ||

Samaṇo ce Gotamo upaḍḍha-pathaɱ āgaccheyya,||
aham pi upaḍḍha-pathaɱ gaccheyyaɱ.|| ||

Te tattha ubho uttari-manussa-dhammā iddhi-pāṭihāriyaɱ kareyyāma.|| ||

Ekaɱ ce Samaṇo Gotamo uttari-manussa-dhammā iddhi-pāṭihāriyaɱ karissati,||
dvāhaɱ karissāmi.|| ||

Dve ce Samaṇo Gotamo uttari-manussa-dhammā iddhipāṭihāriyāni karissati,||
cattārāhaɱ karissāmi.|| ||

Cattāri ce Samaṇo Gotamo uttari-manussa-dhammā iddhipāṭihāriyāni karissati,||
aṭṭhāhaɱ karissāmi.|| ||

Iti yāvatakaɱ yāvatakaɱ Samaṇo Gotamo uttari-manussa-dhammā iddhi-pāṭihāriyaɱ karissati,||
tad diguṇaɱ tad diguṇāhaɱ karissāmī" ti.|| ||

16. Evaɱ vutto ahaɱ Bhaggava, Sunakkhattaɱ Licchavi-puttaɱ etad avocaɱ:|| ||

'Abhabbo kho Sunakkhatta,||
acelo Pāṭika-putto taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa|| ||

"Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa samamukhībhāvaɱ gaccheyyan" ti|| ||

muddhā pi tassa vipateyyā' ti.|| ||

'Rakkhate taɱ bhante, Bhagavā vācaɱ,||
rakkhat'etaɱ Sugato vācan ti.'|| ||

[14] 'Kim pana maɱ tvaɱ Sunakkhattaɱ evaɱ vadesi:|| ||

"Rakkhate taɱ bhante,||
Bhagavā vācaɱ,||
rakkhate taɱ sugato vācan" ti?'|| ||

'Bhagavatā c'assa bhante, esā vācā ekaɱsena odhāritā:|| ||

"Abhabbo acelo Pāṭika-putto taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā mama sammukhī-bhāvaɱ āgantuɱ."|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti.|| ||

Acelo ca bhante,||
Pāṭika-putto virūpa-rūpena Bhagavato sammukhī-bhāvaɱ āgaccheyya,||
tadassa Bhagavato musā' ti.'|| ||

'Api nu Sunakkhatta,||
Tathāgato taɱ vācaɱ bhāseyya yā sā vācā dvaya-gāminī' ti?|| ||

'Kiɱ pana bhante, Bhagavatā acelo Pāṭika-putto cetasā ceto paricca vidito:|| ||

"Abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti?|| ||

Udāhu devatā Tathāgatassa etam atthaɱ ārocesuɱ:|| ||

"Abhabbo acelo Pāṭika-putto taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Bhagavato sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti?|| ||

17. 'Cetasā ceto paricca vidito c'eva me Sunakkhatta:|| ||

"Acelo Pāṭika-putto abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti.|| ||

Devatā pi me etam atthaɱ ārocesuɱ:|| ||

[15] Abhabbo bhante, acelo Pāṭika-putto abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti?|| ||

Ajito pi nāma Licchavīnaɱ senāpati adhunā kāla-kato Tāvatiɱsakāyaɱ upapanno.|| ||

So pi maɱ upasaŋkamitvā evam ārocesi:|| ||

"Alajjī bhante, acelo Pāṭika-putto||
musā-vādī bhante, acelo Pāṭika-putto||
mam pi bhante, acelo Pāṭika-putto||
vyākāsi Vajji-gāme:|| ||

'Ajito Licchavī senāpati Mahā-Nirayaɱ upapanno' ti.|| ||

Na kho panāhaɱ bhante,||
Mahā-Nirayaɱ upapanno.|| ||

Tāvatisaɱhi kāyam upapanno.|| ||

"Alajjī bhante, acelo Pāṭika-putto||
musā-vādī bhante, acelo Pāṭika-putto||
mam pi bhante, acelo Pāṭika-putto,||
abhabbo ca bhante,||
acelo Pāṭika-putto taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Bhagavato sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti.|| ||

Iti kho Sunakkhatta, cetasā ceto paricca vidito c'eva me acelo Pāṭika-putto abhabbo acelo Pāṭika-putto taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti.|| ||

Devatā pi me etam atthaɱ ārocesuɱ abhabbo bhante,||
acelo Pāṭika-putto taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Bhagavato sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti.|| ||

So kho panāhaɱ Sunakkhatta,||
Vesāliyaɱ piṇḍāya caritvā pacchā-bhattaɱ piṇḍapāta-paṭikkanto yena acelassa Pāṭika-puttassa ārāmo ten'upasaŋkamissāmi divā-vihārāya.|| ||

Yassa dāni tvaɱ Sunakkhatta, icchasi,||
tassa ārocehī" ti.|| ||

Iddhipāṭihāriyakathā

[16] 18. Atha kho ahaɱ Bhaggava,||
pubbaṇha-samayaɱ nivāsetvā patta-cīvaram ādāya Vesāliyaɱ piṇḍāya pāvisiɱ.|| ||

Vesāliyaɱ piṇḍāya caritvā pacchā-bhattaɱ piṇḍapāta-paṭikkanto yena acelassa Pāṭika-puttassa ārāmo ten'upasaŋkamiɱ divā-vihārāya.|| ||

Atha kho Bhaggava, Sunakkhatto Licchavi-putto taramāna-rūpo Vesāliɱ pavisitvā yena abhiññātā abhiññātā Licchavī ten'upasaŋkami.|| ||

Upasaŋkamitvā abhiññāte Licchavī etad avoca:|| ||

'Es'āvuso, Bhagavā Vesāliyaɱ piṇḍāya caritvā pacchā-bhattaɱ piṇḍapāta-paṭikkanto yena acelassa Pāṭika-puttassa ārāmo ten'upasaŋkami divā-vihārāya.|| ||

Abhikkamath'āyasmanto abhikkamath'āyasmanto.|| ||

Sādhu-rūpānaɱ samaṇānaɱ uttari-manussa-dhammā iddhi-pāṭihāriyaɱ bhavissatī' ti.|| ||

Atha kho Bhaggava, abhiññātānaɱ abhiññātānaɱ Licchavīnaɱ etad ahosi:|| ||

'Sādhu-rūpānaɱ kira bho samaṇānaɱ uttari-manussa-dhammā iddhi-pāṭihāriyaɱ bhavissati.|| ||

Handa vata bho gacchāmā' ti.|| ||

Yena ca abhiññātā abhiññātā brāhmaṇa-mahāsālā gahapati-necayikā nānā-titthiyā samaṇa-brāhmaṇā ten'upasaŋkami,||
upasaŋkamitvā abhiññāte abhiññāte nānātitthiye samaṇa-brāhmaṇe etad avoca:|| ||

'Es'āvuso, Bhagavā Vesāliyaɱ piṇḍāya caritvā pacchā-bhattaɱ piṇḍapāta-paṭikkanto yena acelassa Pāṭika-puttassa ārāmo ten'upasaŋkami divā-vihārāya.|| ||

Abhikkamath'āyasmanto abhikkamath'āyasmanto.|| ||

Sādhu-rūpānaɱ samaṇānaɱ uttari-manussa-dhammā iddhi-pāṭihāriyaɱ bhavissatī' ti.|| ||

Atha kho Bhaggava, abhiññātānaɱ abhiññātānaɱ nānā-titthiyānaɱ samaṇa-brāhmaṇānaɱ etad ahosi:|| ||

'Sādhu-rūpānaɱ kira bho samaṇānaɱ uttari-manussa-dhammā iddhi-pāṭihāriyaɱ bhavissati.|| ||

Handa vata bho gacchāmā' ti.|| ||

[17] 19. Atha kho Bhaggava, abhiññātā abhiññātā Licchavī||
abhiñññātā abhiññātā ca brāhmaṇa-mahāsālā||
gahapati-necayikā nānā-titthiyā samaṇa-brāhmaṇā||
yena acelassa Pāṭika-puttassa ārāmo ten'upasaŋkamiɱsu.|| ||

Sā esā Bhaggava, parisā hoti aneka-satā aneka-sahassā.|| ||

Assosi kho Bhaggava, acelo Pāṭika-putto:|| ||

'Abhikkantā kira abhiññātā abhiññātā Licchavī,||
abhikkantā abhiññātā abhiññātā ca brāhmaṇa-mahāsālā,||
abhiññātā abhiññātā ca brāhmaṇa-mahāsālā gahapati-necayikā nānā-titthiyā samaṇa-brāhmaṇā,||
samaṇo pi Gotamo mayhaɱ ārāme divā-vihāraɱ nisinno' ti.|| ||

Sutvān'assa bhayaɱ chambhitattaɱ lomahaɱso udapādi.|| ||

20. Atha kho Bhaggava, acelo Pāṭika-putto bhīto saɱviggo lomahaṭṭha-jāto yena Tindukakhāṇu-paribbājakārāmo ten'upasaŋkami.|| ||

Assosi kho Bhaggava, sā parisā:|| ||

'Acelo kira Pāṭika-putto bhīto saɱviggo lomahaṭṭha-jāto yena Tindukakhāṇu-paribbājakārāmo ten'upasaŋkamanto' ti.|| ||

Atha kho Bhaggava, sā parisā aññataraɱ purisaɱ āmantesi:|| ||

'Ehi tvaɱ bho purisa, yena Tindukakhāṇu-paribbājakārāmo yena acelo Pāṭika-putto ten'upasaŋkami,||
upasaŋkamitvā acelaɱ Pāṭika-puttaɱ evaɱ vadehi:|| ||

"Abhikkam'āvuso Pāṭika-putta,||
abhikkantā abhiññātā abhiññātā Licchavī,||
abhikkantā abhiññātā abhiññātā ca brāhmaṇa-mahāsālā gahapati-necayikā nānā-titthiyā samaṇa-brāhmaṇā,||
samaṇo pi Gotamo āyasmato ārāme divā-vihāraɱ nisinno.|| ||

Bhāsitā kho pana te as'āvuso Pāṭika-putta,||
Vesāliyaɱ parisatiɱ vācā:|| ||

'Samaṇo pi Gotamo ñāṇa-vādo||
aham pi ñāṇa-vādo.|| ||

Ñāṇa-vādo kho pana ñāṇa-vādena arahati uttari-manussa-dhammā iddhi-pāṭihāriyaɱ dassetuɱ.|| ||

[18] Samaṇo ce Gotamo upaḍḍha-pathaɱ āgaccheyya,||
aham pi upaḍḍha-pathaɱ gaccheyyaɱ.|| ||

Te tattha ubho uttari-manussa-dhammā iddhi-pāṭihāriyaɱ kareyyāma.|| ||

Ekaɱ ce Samaṇo Gotamo uttari-manussa-dhammā iddhi-pāṭihāriyaɱ karissati,||
dvāhaɱ karissāmi.|| ||

Dve ce Samaṇo Gotamo uttari-manussa-dhammā iddhipāṭihāriyāni karissati,||
cattārāhaɱ karissāmi.|| ||

Cattāri ce Samaṇo Gotamo uttari-manussa-dhammā iddhipāṭihāriyāni karissati,||
aṭṭhāhaɱ karissāmi.|| ||

Iti yāvatakaɱ yāvatakaɱ Samaṇo Gotamo uttari-manussa-dhammā iddhi-pāṭihāriyaɱ karissati,||
tad diguṇaɱ tad diguṇāhaɱ karissāmī' ti.|| ||

Abhikkama yeva kho āvuso Pāṭika-putta,||
upaḍḍha-pathaɱ||
sabba-paṭhamaɱ yeva āgantvā Samaṇo Gotamo āyasmato ārāme divā-vihāraɱ nisinno" ti.|| ||

'Evaɱ bho' ti kho Bhaggava,||
so puriso tassā parisāya paṭissutvā yena Tindukakhāṇu-paribbājakārāmo yena acelo Pāṭika-putto ten'upasaŋkami.|| ||

Upasaŋkamitvā acelaɱ Pāṭika-puttaɱ etad avoca:|| ||

'Abhikkam'āvuso Pāṭika-putta,||
abhikkantā abhiññātā abhiññātā Licchavī,||
abhikkantā abhiññātā abhiññātā ca brāhmaṇa-mahāsālā gahapati-necayikā nānā-titthiyā samaṇa-brāhmaṇā,||
samaṇo pi Gotamo āyasmato ārāme divā-vihāraɱ nisinno.|| ||

Bhāsitā kho pana te as'āvuso Pāṭika-putta,||
Vesāliyaɱ parisatiɱ vācā:|| ||

"Samaṇo pi Gotamo ñāṇa-vādo||
aham pi ñāṇa-vādo.|| ||

Ñāṇa-vādo kho pana ñāṇa-vādena arahati uttari-manussa-dhammā iddhi-pāṭihāriyaɱ dassetuɱ.|| ||

Samaṇo ce Gotamo upaḍḍha-pathaɱ āgaccheyya,||
aham pi upaḍḍha-pathaɱ gaccheyyaɱ.|| ||

Te tattha ubho uttari-manussa-dhammā iddhi-pāṭihāriyaɱ kareyyāma.|| ||

Ekaɱ ce Samaṇo Gotamo uttari-manussa-dhammā iddhi-pāṭihāriyaɱ karissati,||
dvāhaɱ karissāmi.|| ||

Dve ce Samaṇo Gotamo uttari-manussa-dhammā iddhipāṭihāriyāni karissati,||
cattārāhaɱ karissāmi.|| ||

Cattāri ce Samaṇo Gotamo uttari-manussa-dhammā iddhipāṭihāriyāni karissati,||
aṭṭhāhaɱ karissāmi.|| ||

Iti yāvatakaɱ yāvatakaɱ Samaṇo Gotamo uttari-manussa-dhammā iddhi-pāṭihāriyaɱ karissati,||
tad diguṇaɱ tad diguṇāhaɱ karissāmī" ti.|| ||

Abhikkama yeva kho āvuso Pāṭika-putta,||
upaḍḍha-pathaɱ||
sabba-paṭhamaɱ yeva āgantvā Samaṇo Gotamo āyasmato ārāme divā-vihāraɱ nisinno' ti.|| ||

21. Evaɱ vutte Bhaggava, acelo Pāṭika-putto 'Āyāmi āvuso||
[19] Āyāmi āvuso' ti||
vatvā tatth'eva saɱsappati||
na sakkoti āsanā pi vuṭṭhātuɱ.|| ||

Atha kho Bhaggava, so puriso acelaɱ Pāṭika-puttaɱ etad avoca:|| ||

'Kiɱ su nāma te āvuso Pāṭika-putta?|| ||

Pāvaḷā su nāma te pīṭhakasmiɱ allīnā,||
pīṭhakaɱ su nāma te pāvaḷāsu allīnaɱ?|| ||

"Āyāmi āvuso,||
āyāmi āvuso" ti||
vatvā tatth'eva saɱsappati,||
na sakkosi āsanā pi vuṭṭhātun' ti.|| ||

Evam pi kho Bhaggava, vuccamāno acelo pāṭhikaputto 'āyāmi āvuso,||
āyāmi āvuso' ti||
vatvā tatth'eva saɱsappati,||
na sakkoti āsanā pi vuṭṭhātuɱ.|| ||

Yadā kho so Bhaggava, puriso aññāsi:|| ||

Parābhūta-rūpo ayaɱ acelo Pāṭika-putto||
'Āyāmi āvuso āyāmi āvuso' ti||
vatvā tatth'eva saɱsappati||
na sakkoti āsanā pi vuṭṭhātun ti,||
atha taɱ parisaɱ āgantvā evam ārocesi:|| ||

'Parābhūta-rūpo bho ayaɱ acelo Pāṭika-putto,||
"āyāmi āvuso,||
āyāmi āvuso" ti vatvā tatth'eva saɱsappati,||
na sakkoti āsanā' pi vuṭṭhātun' ti.|| ||

Evaɱ vutte ahaɱ Bhaggava,||
taɱ parisaɱ etad avocaɱ:|| ||

"Abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti.|| ||

22. Atha kho Bhaggava, aññataro Licchavi mahāmatto uṭṭhāy'āsanā taɱ parisaɱ etad avoca:|| ||

'Tena hi bho muhuttaɱ tāva āgametha yāvāhaɱ gacchāmi.|| ||

[20] App eva nāma aham pi sakkuṇeyyaɱ acelaɱ Pāṭika-puttaɱ imaɱ parisaɱ ānetunt' ti.|| ||

Atha kho so Bhaggava, Licchavi mahāmatto yena Tindukakhāṇu-paribbājakārāmo yena acelo Pāṭika-putto ten'upasaŋkami,||
upasaŋkamitvā acelaɱ Pāṭika-puttaɱ etad avoca:|| ||

'Abhikkam'āvuso Pāṭika-putta,||
abhikkantaɱ te seyyo,||
abhikkantā abhiññātā abhiññātā Licchavī abhikkantā abhiññātā abhiññātā ca brāhmaṇā-mahāsālā gahapati-necayikā nānā-titthiyā samaṇa-brāhmaṇā samaṇo pi Gotamo āyasmato ārāme divā-vihāraɱ nisinno.|| ||

Bhāsitā kho pana te es'āvuso Pāṭika-putta,||
Vesāliyaɱ parisatiɱ vācā:|| ||

"Samaṇo pi Gotamo ñāṇa-vādo||
aham pi ñāṇa-vādo.|| ||

Ñāṇa-vādo kho pana ñāṇa-vādena arahati uttari-manussa-dhammā iddhi-pāṭihāriyaɱ dassetuɱ.|| ||

Samaṇo ce Gotamo upaḍḍha-pathaɱ āgaccheyya,||
aham pi upaḍḍha-pathaɱ gaccheyyaɱ.|| ||

Te tattha ubho uttari-manussa-dhammā iddhi-pāṭihāriyaɱ kareyyāma.|| ||

Ekaɱ ce Samaṇo Gotamo uttari-manussa-dhammā iddhi-pāṭihāriyaɱ karissati,||
dvāhaɱ karissāmi.|| ||

Dve ce Samaṇo Gotamo uttari-manussa-dhammā iddhipāṭihāriyāni karissati,||
cattārāhaɱ karissāmi.|| ||

Cattāri ce Samaṇo Gotamo uttari-manussa-dhammā iddhipāṭihāriyāni karissati,||
aṭṭhāhaɱ karissāmi.|| ||

Iti yāvatakaɱ yāvatakaɱ Samaṇo Gotamo uttari-manussa-dhammā iddhi-pāṭihāriyaɱ karissati,||
tad diguṇaɱ tad diguṇāhaɱ karissāmī" ti.|| ||

Abhikkama yeva kho āvuso Pāṭika-putta,||
upaḍḍha-pathaɱ,||
sabba-paṭhamaɱ yeva āgantvā Samaṇo Gotamo āyasmato ārāme divā-vihāraɱ nisinno.|| ||

Bhāsitā kho pana te esā āvuso Pāṭika-putta,||
samaṇena Gotamena parisatiɱ vācā:|| ||

"Abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā" ti.|| ||

Abhikkam'āvuso Pāṭika-putta,||
abhikkamanen'eva te jayaɱ karissāma,||
Samaṇassa Gotamassa parājayan' ti.|| ||

Evaɱ vutte Bhaggava, acelo Pāṭika-putto 'āyāmi āvuso,||
āyāmi āvuso' ti||
vatvā tatth'eva saɱsappati na [21] sakkoti āsanā' pi vuṭṭhātuɱ.|| ||

Atha kho Bhaggava, Licchavi-mahāmatto acelaɱ Pāṭika-puttaɱ etad avoca:|| ||

'Kiɱ su nāma te āvuso Pāṭika-putta,||
pāvaḷā su nāma te pīṭhakasmiɱ allīnā,||
pīṭhakaɱ su nāma te pāvaḷāsu allīnaɱ ?||
'āyāmi āvuso, āyāmi āvuso' ti vatvā tatth'eva saɱsappasi,||
na sakkosi āsanā pi vuṭṭhātun' ti.|| ||

Evam pi kho Bhaggava, vuccamāno acelo Pāṭika-putto 'āyāmi āvuso, āyāmi āvuso' ti||
vatvā tatth'eva saɱsappati,||
na sakkoti āsanā pi vuṭṭhātuɱ.|| ||

Yadā kho so Bhaggava, Licchavi-mahāmatto aññāsi parābhūta-rūpo ayaɱ acelo Pāṭika-putto,||
'āyāmi āvuso, āyāmi āvuso' ti||
vatvā tatth'eva saɱsappati,||
na sakkoti āsanā pi vuṭṭhātunti,||
atha taɱ parisaɱ āgantvā evam ārocesi:|| ||

'Parābhūta-rūpo so acelo Pāṭika-putto,||
'āyāmi āvuso āyāmi āvuso' ti||
vatvā tatth'eva saɱsappati,||
na sakkoti āsanā pi vuṭṭhātunti.'|| ||

23. Evaɱ vutte ahaɱ Bhaggava, taɱ parisaɱ etad avocaɱ:|| ||

'Abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

"Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan" ti|| ||

muddhā pi tassa vipateyyā.|| ||

Sace pi āyasmantānaɱ Licchavīnaɱ evam assa:|| ||

"Mayaɱ acelaɱ Pāṭika-puttaɱ varattāhi bandhitvā go-yugehi āviñjeyyāmā" ti.|| ||

Tā varattā chijjeraɱ Pāṭika-putto vā.|| ||

Abhabbo acelo Pāṭika-putto taɱ vācaɱ appahāya [22] taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

"Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan" ti|| ||

muddhā pi tassa vipateyyā' ti.|| ||

Atha kho Bhaggava, Jāliyo dārupattik-antevāsī uṭṭhāy'āsanā taɱ parisaɱ etad avoca:|| ||

'Tena hi bho muhuttaɱ tāva āgametha yāvāhaɱ gacchāmi,||
app eva nāma aham pi sakkuṇeyyaɱ acelaɱ Pāṭika-puttaɱ imaɱ parisaɱ ānetun' ti.|| ||

Atha kho Bhaggava, Jāliyo dārupattik-antevāsī yena Tindukakhāṇu-paribbājakārāmo yena acelo Pāṭika-putto ten'upasaŋkami.|| ||

Upasaŋkamitvā acelaɱ Pāṭika-puttaɱ etad avoca:|| ||

'Abhikkam'āvuso Pāṭika-putta,||
abhikkantaɱ te seyyo,||
abhikkantā abhiññātā abhiññātā Licchavī abhikkantā abhiññātā abhiññātā ca brāhmaṇā-mahāsālā gahapati-necayikā nānā-titthiyā samaṇa-brāhmaṇā samaṇo pi Gotamo āyasmato ārāme divā-vihāraɱ nisinno.|| ||

Bhāsitā kho pana te es'āvuso Pāṭika-putta,||
Vesāliyaɱ parisatiɱ vācā:|| ||

"Samaṇo pi Gotamo ñāṇa-vādo||
aham pi ñāṇa-vādo.|| ||

Ñāṇa-vādo kho pana ñāṇa-vādena arahati uttari-manussa-dhammā iddhi-pāṭihāriyaɱ dassetuɱ.|| ||

Samaṇo ce Gotamo upaḍḍha-pathaɱ āgaccheyya,||
aham pi upaḍḍha-pathaɱ gaccheyyaɱ.|| ||

Te tattha ubho uttari-manussa-dhammā iddhi-pāṭihāriyaɱ kareyyāma.|| ||

Ekaɱ ce Samaṇo Gotamo uttari-manussa-dhammā iddhi-pāṭihāriyaɱ karissati,||
dvāhaɱ karissāmi.|| ||

Dve ce Samaṇo Gotamo uttari-manussa-dhammā iddhipāṭihāriyāni karissati,||
cattārāhaɱ karissāmi.|| ||

Cattāri ce Samaṇo Gotamo uttari-manussa-dhammā iddhipāṭihāriyāni karissati,||
aṭṭhāhaɱ karissāmi.|| ||

Iti yāvatakaɱ yāvatakaɱ Samaṇo Gotamo uttari-manussa-dhammā iddhi-pāṭihāriyaɱ karissati,||
tad diguṇaɱ tad diguṇāhaɱ karissāmī" ti.|| ||

Abhikkama yeva kho āvuso Pāṭika-putta,||
upaḍḍha-pathaɱ,||
sabba-paṭhamaɱ yeva āgantvā Samaṇo Gotamo āyasmato ārāme divā-vihāraɱ nisinno.|| ||

Bhāsitā kho pana te esā āvuso Pāṭika-putta,||
samaṇena Gotamena parisatiɱ vācā:|| ||

"Abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

'Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan' ti|| ||

muddhā pi tassa vipateyyā.|| ||

Sace pi āyasmantānaɱ Licchavīnaɱ evam assa:|| ||

'Mayaɱ acelaɱ Pāṭika-puttaɱ varattāhi bandhitvā go-yugehi āviñjeyyāmā' ti.|| ||

Tā varattā chijjeraɱ Pāṭika-putto vā.|| ||

Abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

"Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan" ti|| ||

muddhā pi tassa vipateyyā' ti.|| ||

Abhikkam'āvuso Pāṭika-putta,||
abhikkamanen'eva te jayaɱ karissāma,||
Samaṇassa Gotamassa parājayan' ti.|| ||

[23] Evaɱ vutte Bhaggava, acelo Pāṭika-putto||
'āyāmi āvuso āyāmi āvuso' ti||
vatvā tatth'eva saɱsappati,||
na sakkoti āsanā pi vuṭṭhātuɱ.|| ||

Atha kho Bhaggava, Jāliyo dārupattik-antevāsī acelaɱ Pāṭika-puttaɱ etad avoca:|| ||

'Kiɱ su nāma te āvuso Pāṭika-putta,||
pāvaḷā su nāma te pīṭhakasmiɱ allīnā,||
pīṭhakaɱ su nāma te pāvaḷāsu allīnaɱ.|| ||

"Āyāmi āvuso, āyāmi āvuso" ti||
vatvā tatth'eva saɱsappasi,||
na saskosi āsanā pi vuṭṭhātun" ti?

Evam pi kho Bhaggava, vuccamāno acelo Pāṭika-putto||
'āyāmi āvuso, āyāmi āvuso' ti||
vatvā tatth'eva saɱsappati,||
na sakkoti āsanā pi vuṭṭhātunti.|| ||

Yadā kho Bhaggava, Jāliyo dārupattik-antevāsī aññāsi parābhūta-rūpo ayaɱ acelo Pāṭika-putto,||
'āyāmi āvuso, āyāmi āvuso' ti||
vatvā tatth'eva saɱsappati,||
na sakkoti āsanā pi vuṭṭhātunti.|| ||

Atha naɱ etad avoca:

24. 'Bhūta-pubbaɱ āvuso Pāṭika-putta,||
sīhassa miga-rañño etad ahosi:|| ||

"Yan nūnāhaɱ aññataraɱ vana-saṇḍaɱ nissāya āsayaɱ kappeyyaɱ,||
tatr'āsayaɱ kappetvā sāyaṇha-samayaɱ āsaya nikkhameyyaɱ,||
āsayā nikkhamitvā vijambheyyaɱ,||
vijambhitvā samantā catuddisā anuvilokeyyaɱ,||
samantā catuddisā anuviloketvā tikkhattuɱ sīha-nādaɱ nadeyyaɱ,||
tikkhattuɱ sīha-nādaɱ naditvā go-carāya pakkameyyaɱ,||
so varaɱ varaɱ miga-saŋghe vadhitvā mudu-maɱsāni mudu-maɱsāni bhakkhayitvā tam eva āsayaɱ ajjhupeyyan" ti.|| ||

Atha kho so sīho miga-rājā aññataraɱ vana-saṇḍaɱ nissāya āsayaɱ kappesi||
tatr'āsayaɱ kappetvā sāyaṇha-samayaɱ āsayā nikkhami.|| ||

Āsayā nikkhamitvā vijambhi.|| ||

Vijambhitvā samantā catuddisā anuvilokesi.|| ||

Samantā catuddisā anuviloketvā tikkhattuɱ sīha-nādaɱ-nadi.|| ||

Tikkhattuɱ sīha-nādaɱ naditvā go-carāya pakakami.|| ||

So varaɱ varaɱ miga-saŋghe vadhitvā mudu-maɱsāni mudu-maɱsāni bhakkhayitvā tam eva āsayaɱ ajjhupesi.|| ||

[24] Tass'eva kho āvuso Pāṭika-putta,||
sīhassa miga-rañño vighāse saɱvaddho jara-sigālo ditto c'eva balavā ca.|| ||

Atha kho āvuso tassa jara-sigālassa etad ahosi:|| ||

"Ko cāhaɱ ko sīho miga-rājā?|| ||

Yan nūnāhaɱ aññataraɱ vana-saṇḍaɱ nissāya āsayaɱ kappeyyaɱ,||
tatr'āsayaɱ kappetvā sāyaṇha-samayaɱ āsaya nikkhameyyaɱ,||
āsayā nikkhamitvā vijambheyyaɱ,||
vijambhitvā samantā catuddisā anuvilokeyyaɱ,||
samantā catuddisā anuviloketvā tikkhattuɱ sīha-nādaɱ nadeyyaɱ,||
tikkhattuɱ sīha-nādaɱ naditvā go-carāya pakkameyyaɱ,||
so varaɱ varaɱ miga-saŋghe vadhitvā mudu-maɱsāni mudu-maɱsāni bhakkhayitvā tam eva āsayaɱ ajjhupeyyan" ti."|| ||

Atha kho so āvuso jara-sigālo aññataraɱ vana-saṇḍaɱ nissāya āsayaɱ kappesi.|| ||

Tatr'āsayaɱ kappetvā sāyaṇha-samayaɱ āsayā nikkhami.|| ||

Āsayā nikkhamitvā vijambhi.|| ||

Vijambhitvā samantā catuddisā anuvilokesi.|| ||

Samantā catuddisā anuviloketvā tikkhattuɱ sīha-nādaɱ-nadissāmī ti segālakaɱ yeva anadi,||
bheraṇḍakaɱ yeva anadi.|| ||

Ke ca chave segāle,||
ke pana sīha-nāde ti?

Evam eva kho tvaɱ āvuso Pāṭika-putta,||
Sugatāpadānesu jīvamāno||
Sugatātirittāni bhuñjamāno||
Tathāgate arahante Sammā-sambuddhe āsādetabbaɱ maññasi.|| ||

Ke ca chavo Pāṭika-putto||
kā ca Tathāgatānaɱ arahantānaɱ Sammā-sambuddhānaɱ āsādanā' ti?|| ||

25. Yato kho Bhaggava, Jāliyo dārupattik-antevāsī iminā opammena n'eva asakkhi acelaɱ Pāṭika-puttaɱ tamhā āsanā cāvetuɱ,||
atha naɱ etad avoca:|| ||

[25] 'Sīho ti attānaɱ samekkhiyānaɱ||
maññi kotthu miga-rājā 'ham asmi,||
Tath'eva so segālakaɱ anadi,||
Ke ca chavo segāle,||
ke pana sīha-nāde' ti?'
|| ||

Evam eva kho tvaɱ āvuso Pāṭika-putto,||
Sugatāpadānesu jīvamāno||
Sugatātirittāni bhuñjamāno||
Tathāgate arahante Sammā-sambuddhe āsādetabbaɱ maññasi.|| ||

Ke ca chavo Pāṭika-putto,||
kā ca Tathāgatānaɱ arahantānaɱ Sammā-sambuddhānaɱ āsādanā' ti?

26. Yato kho Bhaggava, Jāliyo dārupatnikantevāsi iminā pi opammena n'eva asakkhi acelaɱ Pāṭika-puttaɱ tamhā āsanā cāvetuɱ,||
atha naɱ etad avoca:|| ||

'Aññaɱ anucaŋkamanaɱ||
Attānaɱ vighāse samekkhiya||
Yāv'attānaɱ na passati||
Kotthu tāva vyaggho ti maññati||
Tath'eva so segālakaɱ anadi||
Ke ca chavo segāle||
ke pana sīha-nāde' ti?
|| ||

Evam eva kho tvaɱ āvuso Pāṭika-putta,||
Sugatāpadānesu jivamāno||
Sugatātirittāni bhuñjamāno||
Tathāgate arahante Sammā-sambuddhe āsādetabbaɱ maññasi.|| ||

Ke ca chavo Pāṭika-putto,||
kā ca Tathāgatānaɱ arahantānaɱ Sammā-sambuddhānaɱ āsādanā' ti?|| ||

27. Yato kho Bhaggava, Jāliyo dārupattik-antevāsī iminā [26] pi opammena n'eva asakkhi acelaɱ Pāṭika-puttaɱ tamhā āsanā cāvetuɱ,||
atha naɱ etad avoca:|| ||

'Bhutvāna bheke khala-mūsikāyo||
Kaṭasīsu khittāni ca koṇapāni,||
Mahā-vane suñña-vane vivaḍḍho||
Amaññi kotthu miga-rājā'ham asmi,||
Tath'eva so segālakaɱ anadi||
Ke ca chavo segālo,||
ke pana sīha-nāde ti?'
|| ||

Evam eva kho tvaɱ āvuso Pāṭika-putta,||
sugatapadānesu jīvamāno||
Sugatātirittāni bhuñjamāno||
Tathāgate arahante Sammā-sambuddhe āsādetabbaɱ maññasi.|| ||

Ke ca chavo Pāṭika-putto,||
kā ca Tathāgatānaɱ arahantānaɱ Sammā-sambuddhānaɱ āsādanā' ti?|| ||

Yato kho Bhaggava, Jāliyo dārupattik-antevāsī iminā pi opammena n'eva asakkhi acelaɱ Pāṭika-puttaɱ tamhā āsanā cāvetuɱ,||
atha taɱ parisaɱ āgantvā evam ārocesi:|| ||

'Parābhūta-rupo bho acelo Pāṭika-putto,||
'āyāmi āvuso, āyāmi āvuso' ti||
vatvā tatth'eva saɱsappati,||
na sakkoti āsanā pi vuṭṭhātun' ti.|| ||

Evaɱ vutte ahaɱ Bhaggava,||
taɱ parisaɱ etad avocaɱ:

'Abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

"Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan" ti|| ||

muddhā pi tassa vipateyyā.|| ||

Sace pi āyasmantānaɱ Licchavīnaɱ evam assa:|| ||

"Mayaɱ acelaɱ Pāṭika-puttaɱ varattāhi bandhitvā go-yugehi [27] āviñjeyyāmā" ti.|| ||

Tā varattā chijjeraɱ Pāṭika-putto vā.|| ||

Abhabbo acelo Pāṭika-putto taɱ vācaɱ appahāya taɱ cittaɱ appahāya ti diṭṭhiɱ appaṭinissajjitvā mama sammukhī-bhāvaɱ āgantuɱ.|| ||

Sace pi'ssa evam assa:|| ||

"Ahaɱ taɱ vācaɱ appahāya taɱ cittaɱ appahāya taɱ diṭṭhiɱ appaṭinissajjitvā Samaṇassa Gotamassa sammukhī-bhāvaɱ gaccheyyan" ti|| ||

muddhā pi tassa vipateyyā' ti.|| ||

28. Atha kho ahaɱ Bhaggava, taɱ parisaɱ dhammiyā kathāya||
sandassesiɱ samādapesiɱ samuttejesiɱ sampahaɱsesiɱ||
taɱ parisaɱ dhammiyā kathāya sandassetvā samādapetvā samuttejetvā sampahaɱsetvā mahā-bhandhanā mokkhaɱ karitvā,||
caturāsīti-pāṇa-sahassāni mahā-viduggā uddharitvā,||
tejo-dhātuɱ samāpajjitvā,||
satta-tālaɱ vehāsaɱ abbhuggantvā,||
aññaɱ satta-tālam pi acciɱ abhinimminitvā jalitvā dhūmāyitvā Mahā-vane kūṭāgāra-sālāya paccuṭṭhāsiɱ.|| ||

Atha kho Bhaggava, Sunakkhatto Licchavi-putto yenāhaɱ ten'upasaŋkami,||
upasaŋkamitvā maɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho ahaɱ Bhaggava,||
Sunakkhattaɱ Licchavi-puttaɱ etad avocaɱ:|| ||

'Taɱ kim maññasi Sunakkhatta?|| ||

Yath'ev'ahaɱ te acelaɱ Pāṭika-puttaɱ ārabbha vyākāsiɱ,||
tath'eva taɱ vipakkaɱ||
no aññathā vā' ti?|| ||

'Yath'eva me bhante,||
Bhagavā acelaɱ Pāṭika-puttaɱ ārabbha vyākāsi,||
tath'eva taɱ vipakkaɱ||
no aññathā' ti.|| ||

'Taɱ kim maññasi Sunakkhatta?|| ||

Yadi evaɱ sante kataɱ vā hoti,||
uttari-manussa-dhammā iddhi-pāṭihāriyaɱ akataɱ vā' ti?|| ||

'Addhā kho pana bhante,||
evaɱ sante kataɱ hoti,||
uttari-manussa-dhammā iddhi-pāṭihāriyaɱ||
no akatan' ti.|| ||

'Evam pi kho maɱ tvaɱ mogha-purisa,||
uttari-manussa-dhammā [28] iddhi-pāṭihāriyaɱ karontaɱ evaɱ vadesi:|| ||

"Na hi pana me bhante,||
Bhagavā uttari-manussa-dhammā iddhi-pāṭihāriyaɱ karotī" ti.|| ||

Passa mogha-purisa,||
yāvañ ca te idaɱ aparaddhan' ti.|| ||

Evam pi kho Bhaggava,||
Sunakkhatto Licchavi-putto mayā vuccamāno apakkam'eva imasmā Dhamma-Vinayā yathā taɱ Āpāyiko Nerayiko."|| ||

 


 

Aggaññapaññattikathā

29. "Aggaññañ cāhaɱ Bhaggava, pajānāmi,||
tañ ca pajānāmi tato ca uttaritaraɱ pajānāmi,||
tañ ca pajānanaɱ na parāmasāmi,||
aparāmasato ca me paccattaɱ yeva nibbuti viditā,||
yad abhijānaɱ Tathāgato no anayaɱ āpajjati.|| ||

Santi Bhaggava, eke samaṇa-brāhmaṇā Issara-kuttaɱ Brahma-kuttaɱ ācariyakaɱ aggaññaɱ paññāpenti.|| ||

Te'haɱ upasaŋkamitvā evaɱ vadāmi:|| ||

'Saccaɱ kira tumhe āyasmanto Issara-kuttaɱ Brahma-kuttaɱ ācariyakaɱ aggaññaɱ paññapethā' ti?|| ||

Te ca me evaɱ puṭṭhā:||
'Āmo' ti paṭijānanti.|| ||

Te'haɱ evaɱ vadāmi:|| ||

'Kathaɱ vihitakaɱ pana tumhe āyasmanto Issara-kuttaɱ Brahma-kuttaɱ ācariyakaɱ aggaññaɱ paññapethā' ti.|| ||

Te mayā puṭṭhā na sampāyanti.|| ||

Asampāyantā mamañ ñeva paṭipucchanti.|| ||

Tesāhaɱ puṭṭho vyākaromi:

30. 'Hoti kho so āvuso samayo yaɱ kadāci karahaci dīghassa addhuno accayena ayaɱ loko saɱvaṭṭati.|| ||

Saɱvaṭṭamāne loke yebhuyyena sattā Ābhassara-saɱvattanikā honti.|| ||

Te tattha honti mano-mayā pīti-bhakkhā sayam-pabhā antalikkha-carā subha-ṭṭhāyino,||
ciraɱ dīgham addhānaɱ tiṭṭhanti.|| ||

Hoti kho so āvuso samayo yaɱ kadāci karahaci dīghassa addhuno accayena ayaɱ loko vivaṭṭati,||
vivaṭṭamāne loke suññaɱ Brahma-vimānaɱ pātu-bhavati.|| ||

Atha [29] aññataro satto āyu-kkhayā vā puñña-kkhayā vā Ābhassara-kāyā cavitvā suññaɱ Brahma-vimānaɱ upapajjati.|| ||

So tattha hoti mano-mayo pīti-bhakkho sayam-pabho antalikkha-caro subha-ṭṭhāyī,||
ciraɱ dīgham addhānaɱ tiṭṭhati.|| ||

Tassa tattha ekakassa dīgha-rattaɱ nibbusitattā anabhirati paritassanā uppajjati:|| ||

"Aho vata aññe pi sattā itthattaɱ āgaccheyyun" ti.|| ||

Atha añña pi sattā āyu-kkhayā vā puñña-kkhayā vā Ābhassara-kāyā cavitvā suññaɱ Brahma-vimānaɱ upapajjanti tassa sattassa sahavyataɱ.|| ||

Te pi tattha honti mano-mayā pīti-bhakkhā samaypahā antalikkhacarā subha-ṭṭhāyino ciraɱ dīgham addhānaɱ tiṭṭhanti.|| ||

Tatr'āvuso yo so satto paṭhamaɱ upapanno,||
tassa evaɱ hoti:|| ||

"Aham asmi Brahmā Mahā-Brahmā abhibhū anabhibhūto aññad-atthu-daso vasavattī issaro kattā nimmātā seṭṭho sañjitā vasī pitā bhūta-bhavyānaɱ.|| ||

Mayā ime sattā nimmitā.|| ||

Taɱ kissa hetu?|| ||

Mamañ hi pubbe etad ahosi:|| ||

'Aho vata aññe pi sattā itthattaɱ āgaccheyyun' ti.|| ||

Iti mamañ ca mano-paṇidhi,||
ime ca sattā itthattaɱ āgatā" ti.|| ||

Ye pi te sattā pacchā upapannā,||
tesam pi evaɱ hoti:|| ||

"Ayaɱ kho bhavaɱ Brahmā Mahā-Brahmā abhibhū anabhibhūto aññad-atthu-daso vasavattī issaro kattā nimmātā saṭṭhā sañjitā vasī pitā bhūta-bhavyānaɱ.|| ||

Iminā mayaɱ bhotā Brahmunā nimmitā.|| ||

Taɱ kissa hetu?|| ||

Imañ hi mayaɱ addasāma idha paṭhamaɱ uppannaɱ,||
mayaɱ pan amhā pacchā uppannā" ti.|| ||

[30] Tatr'āvuso, yo so satto paṭhamaɱ uppanno.|| ||

So dīghāyukataro ca hoti vaṇṇavantataro ca mahesakkhataro ca.|| ||

Ye pana te sattā pacchā uppannā,||
te appāyukatarā ca honti dubbaṇṇatarā ca appesakkhatarā ca.|| ||

Ṭhānaɱ kho pan'etaɱ āvuso,||
vijjati yaɱ aññataro satto tamhā kāyā cavitvā itthattaɱ āgacchati.|| ||

Itthattaɱ āgato samāno agārasmā anagāriyaɱ pabbajati.|| ||

Agārasmā anagāriyaɱ pabbajito samāno ātappam anvāya padhānam anvāya anuyogam anvāya,||
appamādam anvāya sammā-manasi-kāram anvāya tathārūpaɱ ceto-samādhiɱ phusati,||
yathā samāhite citte taɱ pubbenivāsaɱ anussarati,||
tato paraɱ nānussarati.|| ||

So evam āha:|| ||

"Yo kho so bhavaɱ Brahmā Mahā-Brahmā abhibhū anabhibhūto aññad-atthu-daso vasavattī issaro kattā nimmātā saṭṭhā sañjitā vasī pitā bhūta-bhavyānaɱ,||
yena mayaɱ bhotā Brahmunā nimmitā,||
so nicco dhuvo sassato avipariṇāma-dhammo sassata-samaɱ tath'eva ṭhassati.|| ||

Ye pana mayaɱ ahumhā tena bhotā Brahmunā nimmitā,||
te mayaɱ aniccā addhuvā appāyukā cavana-dhammā itthattaɱ āgatā" ti.|| ||

Evaɱ vihitakaɱ bho tumhe āyasmanto Issara-kuttaɱ Brahma-kuttaɱ ācariyakaɱ aggaññaɱ paññāpethā' ti.|| ||

Te evam āhaɱsu:|| ||

"Evaɱ kho no āvuso Gotama sutaɱ yath'ev'āyasmā Gotamo āhā" ti.|| ||

Aggaññña cāhaɱ Bhaggava, pajānāmi tañ ca pajānāmi tato ca uttaritaraɱ pajānāmi,||
tañ ca pajānanaɱ na parāmasāmi,||
aparāmasato ca me paccattaɱ yeva nibbuti viditā,||
yad abhijānaɱ Tathāgato no anayaɱ āpajjati."|| ||

 

§

 

31. "Santi Bhaggava, eke samaṇa-brāhmaṇā khiḍḍā-padosikaɱ ācariyakaɱ aggaññaɱ paññāpenti.|| ||

Te'haɱ upasaŋkamitvā evaɱ vadāmi:|| ||

'Saccaɱ kira tumhe āyasmanto khiḍḍā-padosikaɱ ācariyakaɱ aggaññaɱ paññāpethā' ti?|| ||

Te ca me evaɱ puṭṭhā||
"Āmo" ti paṭijānanti.|| ||

[31] Te'haɱ evaɱ vadāmi:|| ||

'Kathaɱ vihitakaɱ no pana tumhe āyasmanto khiḍḍā-padosikaɱ ācariyakaɱ aggañasañaɱ paññāpethā' ti?|| ||

Te mayā puṭṭhā na sampāyanti.|| ||

Asampāyantā mamañ ñeva paṭipucchanti.|| ||

Tesāhaɱ puṭṭho vyākaromi:|| ||

'Sant'āvuso khiḍḍā-padūsikā nāma devā.|| ||

Te ativelaɱ hassa-khiḍḍā-rati-dhamma-samāpannā viharanti.|| ||

Tesaɱ ativelaɱ hassa-khiḍḍā-rati-dhamma-samāpannānaɱ,||
viharataɱ sati sammussati.|| ||

Satiyā sammosā te devā tamhā kāyā cavanti.|| ||

Ṭhānaɱ kho pan'etaɱ āvuso vijjati,||
yaɱ aññataro satto tamhā kāyā cavitvā itthattaɱ āgacchati.|| ||

Itthattaɱ āgato samāno agārasmā anagāriyaɱ pabbajati.|| ||

Agārasmā anagāriyaɱ pabbajito samāno ātappam anvāya padhānam anvāya anuyogam anvāya,||
appamādam anvāya sammā-manasi-kāram anvāya tathārūpaɱ ceto-samādhiɱ phusati,||
yathā samāhite citte taɱ pubbenivāsaɱ anussarati,||
tato paraɱ nānussarati.|| ||

So evam āha:|| ||

"Ye kho te bhonto devā na khiḍḍā-padūsikā te na ativelaɱ hassa-khiḍḍā-rati-dhamma-samāpannā viharanti.|| ||

Tesaɱ nātivelaɱ hassa-khiḍḍā-rati-dhamma-samāpannānaɱ viharataɱ sati na sammussati.|| ||

Satiyā asammosā te devā tamhā kāyā na cavanti.|| ||

Niccā dhuvā sassatā avipariṇāma-dhammā sassata-samaɱ tath'eva ṭhassanti.|| ||

Ye pana mayaɱ ahumhā khiḍḍā-padūsikā te mayaɱ ativelaɱ hassa-khiḍḍā-rati-dhamma-samāpannā viharataɱ.|| ||

Hassa-khiḍḍā-rati-dhamma-samāpannānā viharimhā.|| ||

Tesaɱ nātivelaɱ hassa-khiḍḍā-rati-dhamma-samāpannānaɱ viharataɱ sati sammussi.|| ||

Satiyā sammosā evaɱ mayaɱ tamhā kāyā cutā aniccā addhuvā appāyukā cavana-dhammā itthattaɱ āgatā" ti.|| ||

Evaɱ vihitakaɱ [32] bho tumhe āyasmanto khiḍḍā-padosikaɱ ācariyakaɱ aggaññaɱ paññapethā' ti?|| ||

Te evam āhaɱsu:|| ||

"Evaɱ kho no āvuso,||
Gotama sutaɱ yath'ev'āyasmā Gotamo āhā" ti.|| ||

Aggaññña cāhaɱ Bhaggava, pajānāmi tañ ca pajānāmi tato ca uttaritaraɱ pajānāmi,||
tañ ca pajānanaɱ na parāmasāmi,||
aparāmasato ca me paccattaɱ yeva nibbuti viditā,||
yad abhijānaɱ Tathāgato no anayaɱ āpajjati."|| ||

 

§

 

31. Santi Bhaggava, eke samaṇa-brāhmaṇā mano-padosikaɱ ācariyakaɱ aggaññaɱ paññapenti.|| ||

Te'haɱ upasaŋkamitvā evaɱ vadāmi:|| ||

'Saccaɱ kira tumhe āyasmanto mano-padosikaɱ ācariyakaɱ aggaññaɱ paññapethā' ti?|| ||

Te ca me evaɱ puṭṭhā||
'Āmo' ti paṭijānanti.|| ||

Te'haɱ evaɱ vadāmi:|| ||

'Kathaɱ vihitakaɱ no pana tumhe āyasmanto mano-padosikaɱ ācariyakaɱ aggaññaɱ paññapethā?' Ti.|| ||

Te mayā puṭṭhā na sampāyanti.|| ||

Asampāyantā mamañ ñeva paṭipucchanti.|| ||

Tesāhaɱ puṭṭho vyākaromi:|| ||

'Sant'āvuso, Mano-padūsikā nāma devā.|| ||

Te ativelaɱ añña-m-aññaɱ upanijjhāyanti.|| ||

Te ativelaɱ añña-m-aññaɱ upanijjhāyantā añña-m-aññamhi cittāni padūsenti.|| ||

Añña-m-aññaɱ paduṭṭha-cittā kilanta-kāyā kilanta-cittā te devā tamhā kāyā cavanti.|| ||

Ṭhānaɱ kho pan'etaɱ āvuso,||
vijjati yaɱ aññataro satto tamhā kāyā cavitvā itthattaɱ āgacchati,||
itthattaɱ āgato samāno agārasmā anagāriyaɱ pabbajati.|| ||

Agārasmā anagāriyaɱ pabbajito samāno ātappam anvāya padhānam anvāya anuyogam anvāya,||
appamādam anvāya sammā-manasi-kāram anvāya tathārūpaɱ ceto-samādhiɱ phusati,||
yathā samāhite citte taɱ pubbenivāsaɱ anussarati,||
tato paraɱ nānussarati.|| ||

So evam āha:|| ||

"Ye kho te bhonto devā na Mano-padūsikā te nātivelaɱ añña-m-aññaɱ upanijjhāyanti.|| ||

Te nātivelaɱ añña-m-aññaɱ upanijjhāyantā añña-m-aññamhi cittāni na ppadūsenti.|| ||

Te añña-m-aññamhi appaduṭṭha-cittā akilanta-kāyā akilanta-cittā te devā [33] tamhā kāyā na cavanti niccā dhuvā sassatā avipariṇāma-dhammā sassati-samaɱ tath'eva ṭhassanti.|| ||

Ye pana mayaɱ ahumhā Mano-padūsikā te mayaɱ ativelaɱ añña-m-aññaɱ upanijjhāyimhā.|| ||

Te mayaɱ ativelaɱ añña-m-aññaɱ upanijjhāyantā añña-m-aññamhi cittāni padūsayimhā.|| ||

Te mayaɱ añña-m-aññaɱ paduṭṭha-cittā kilanta-kāyā kilanta-cittā eva,||
mayaɱ tamhā kāyā cutā aniccā addhuvā appāyukā cavana-dhammā itthattaɱ āgatā" ti.|| ||

Evaɱ vihitakaɱ bho tumhe āyasmanto mano-padosikaɱ ācariyakaɱ aggaññaɱ paññapethā' ti.|| ||

Te evam āhaɱsu:|| ||

"Evaɱ kho no āvuso Gotama,||
sutaɱ yathecāyasmā Gotamo āhā" ti.|| ||

Aggaññña cāhaɱ Bhaggava, pajānāmi||
tañ ca pajānāmi||
tato ca uttaritaraɱ pajānāmi,||
tañ ca pajānanaɱ na parāmasāmi,||
aparāmasato ca me paccattaɱ yeva nibbuti viditā,||
yad abhijānaɱ Tathāgato no anayaɱ āpajjati."|| ||

 

§

 

32. Santi Bhaggava, eke samaṇa-brāhmaṇā adhicca-samuppannaɱ ācariyakaɱ aggaññaɱ paññapenti.|| ||

Te'haɱ upasaŋkamitvā evaɱ vadāmi:|| ||

'Saccaɱ kira tumhe āyasmanto adhicca-samuppannaɱ ācariyakaɱ aggaññaɱ paññapethā' ti?|| ||

Te ca me evaɱ puṭṭhā||
'Āmo' ti paṭijānanti.|| ||

Te'haɱ evaɱ vadāmi:|| ||

'Kathaɱ vihitakaɱ no pana tumhe āyasmanto adhicca-samuppannaɱ ācariyakaɱ aggaññaɱ paññapethā' ti?|| ||

Te ca mayā puṭṭhā na sampāyanti.|| ||

Asampāyantā mamañ ñeva paṭipucchanti.|| ||

Tesāhaɱ puṭṭho vyākaromi:|| ||

'Sant'āvuso, Asañña-sattā nāma devā.|| ||

Saññuppādā ca pana te devā tamhā kāyā cavanti.|| ||

Ṭhānaɱ kho pan'etaɱ āvuso vijjati,||
yaɱ aññataro satto tamhā kāyā cavitvā itthattaɱ āgacchati,||
itthattaɱ āgato samāno agārasmā anagāriyaɱ pabbajati.|| ||

Agārasmā anagāriyaɱ pabbajito samāno ātappam anvāya padhānam anvāya anuyogam anvāya,||
appamādam anvāya sammā-manasi-kāram anvāya tathārūpaɱ ceto-samādhiɱ phusati,||
yathā samāhite citte taɱ pubbenivāsaɱ anussarati,||
tato paraɱ nānussarati.|| ||

So evam āha:|| ||

"Adhicca-samuppanno attā ca loko ca.|| ||

Taɱ kissa hetu?|| ||

[34] Ahaɱ hi pubbe nāhosiɱ,||
so'mhi etarahi ahutvā santatāya pariṇato.|| ||

Evaɱ vihitakaɱ bho pana tumhe āyasmanto adhicca-samuppannaɱ ācariyakaɱ aggaññaɱ paññapethā" ti.|| ||

Te evam āhaɱsu:|| ||

'Evaɱ kho no āvuso,||
Gotama sutaɱ yathecāyasmā Gotamo āhā' ti.|| ||

Aggaññña cāhaɱ Bhaggava, pajānāmi||
tañ ca pajānāmi||
tato ca uttaritaraɱ pajānāmi,||
tañ ca pajānanaɱ na parāmasāmi,||
aparāmasato ca me paccattaɱ yeva nibbuti viditā,||
yad abhijānaɱ Tathāgato no anayaɱ āpajjati."|| ||

 

§

 

33. "Evaɱ vādiɱ kho maɱ Bhaggava,||
evam akkhāyiɱ eke samaṇa-brāhmaṇā asatā tucchā musā abhūtena abbhācikkhanti:|| ||

'Viparīto Samaṇo Gotamo bhikkhavo ca.|| ||

Samaṇo Gotamo evam āha:|| ||

"Yasmiɱ samaye subhaɱ vimokkhaɱ upasampajja viharati,||
sabbaɱ tasmiɱ samaye asubhan t'eva pajānātī" ti.'|| ||

Na kho panāhaɱ Bhaggava evaɱ vadāmi:|| ||

'Yasmiɱ samaye subhaɱ vimokkhaɱ upasampajja viharati||
sabbaɱ tasmiɱ samaye asubhan t'eva pajānātī' ti.|| ||

Evaɱ ca khvāhaɱ Bhaggava, vadāmi:|| ||

'Yasmiɱ samaye subhaɱ vimokkhaɱ upasampajja viharati,||
subhan t'eva tasmiɱ samaye pajānātī' ti."|| ||

"Teca bhante, viparītā ye Bhagavantaɱ viparītato dahanti bhikkhavo ca||
evaɱ pasanno ahaɱ.|| ||

Bhagavati, [35] pahoti ca me Bhagavā tathā dhammaɱ desetuɱ yathā ahaɱ subhaɱ vimokkhaɱ upasampajja vihareyyan" ti.|| ||

"Dukkaraɱ kho evaɱ Bhaggava,||
tayā añña-diṭṭhikena añña-khantikena añña-rucikena aññatr'āyogena aññatr'ācariyakena subhaɱ vimokkhaɱ upasampajja viharituɱ.|| ||

Iŋgha tvaɱ Bhaggava, yo ca te ayaɱ mayi pasādo,||
tam eva tvaɱ sādhukaɱ anurakkhā" ti.|| ||

"Sac'etaɱ bhante, mayā dukkaraɱ añña-diṭṭhikena añña-khantikena añña-rucikena aññatr'āyogena aññatr'ācariyakena subhaɱ vimokkhaɱ upasampajja viharituɱ,||
yo ca me ayaɱ bhante, Bhagavati pasādo,||
tam evāhaɱ sādhukam anurakkhissāmī" ti.|| ||

Idam avoca Bhagavā.|| ||

Attamano Bhaggava-gotto paribbājako Bhagavato bhāsitaɱ abhinandi ti.|| ||

Pāṭikasuttaɱ niṭṭhitaɱ paṭhamaɱs|| ||


Contact:
E-mail
Copyright Statement   Webmaster's Page