Digha Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Dīgha Nikāya

Sutta 25

Udumbarika Suttantaɱ

Adapted from the digital version of the Sri Lanka Buddha Jayanti Tripitaka Series

 


 

[1][pts]Evaɱ me sutaɱ.|| ||

Ekaɱ samayaɱ Bhagavā Rājagahe viharati Gijjhakūṭe pabbate.|| ||

Tena kho pana samayena Nigrodho paribbājako Udumbarikāya paribbājakārāme paṭivasati mahatiyā paribbājaka-parisāya saddhiɱ tiɱsa-mattehi paribbājaka-satehi.|| ||

Atha kho Sandhāno gahapati divā divass'eva Rājagahā nikkhami Bhagavantaɱ dassanāya.|| ||

Atha kho Sandhānassa gahapatissa etad ahosi:|| ||

Akālo kho tāva Bhagavantaɱ dassanāya,||
paṭisallīno Bhagavā,||
mano-bhāvaniyānam pi bhikkhūnaɱ asamayo dassanāya||
paṭisallīnā mano-bhāvanīyā bhikkhū.|| ||

Yan nūnāhaɱ yena Udumbarikāya paribbajākārāmo yena Nigrodho paribbājako ten'upasaŋkameyyan ti?|| ||

2. Atha kho Sandhāno gahapati yena Udumbarikāya paribbājakārāmo yena Nigrodho paribbājako ten'upasaŋkami.|| ||

Tena kho pana samayena Nigrodho paribbājako mahatiyā paribbājaka-parisāya saddhiɱ nisinno hoti unnādinīyā uccāsadda-mahāsaddāya aneka-vihitaɱ tiracchāna-kathaɱ kathentiyā - seyyathīdaɱ:|| ||

rāja-kathaɱ||
cora-kathaɱ||
[37] mahāmatta-kathaɱ||
senā-kathaɱ||
bhaya-kathaɱ||
yuddha-kathaɱ||
anna-kathaɱ||
pāna-kathaɱ||
vattha-kathaɱ||
sayana-kathaɱ||
mālā-kathaɱ||
gandha-kathaɱ||
ñāti-kathaɱ||
yāna-kathaɱ||
gāma-kathaɱ||
nigama-kathaɱ||
nagara-kathaɱ||
janapada-kathaɱ||
itthi-kathaɱ||
purisa-kathaɱ||
sūra-kathaɱ||
visikhā-kathaɱ||
kumbhaṭṭhāna-kathaɱ||
pubba-peta-kathaɱ||
nānatta-kathaɱ||
lokakkhāyikaɱ-kathaɱ||
samuddakkhāyikaɱ-kathaɱ||
iti-bhavābhava-kathaɱ iti vā.|| ||

3. Addasā kho Nigrodho paribbājako Sandhānaɱ gahapatiɱ dūrato va āgacchantaɱ||
disvā sakaɱ parisaɱ saṇṭhapesi:|| ||

"Appa-saddā bhonto hontu,||
mā bhonto saddam akattha||
ayaɱ Samaṇassa Gotamassa sāvako āgacchati Sandhāno gahapati.|| ||

Yāvatā kho pana Samaṇassa Gotamassa sāvakā gihī odāta-vasanā Rājagahe paṭivasanti,||
ayaɱ tesaɱ aññataro Sandhāno gahapati.|| ||

Appasadda-kāmā kho pan'ete āyasmanto,||
appasadda-vinītā appasaddassa vaṇṇavādino,||
app'eva nāma appasaddaɱ parisaɱ viditvā upasaŋkamitabbaɱ maññeyyā" ti.|| ||

Evaɱ vutte te paribbājakā tuṇhī ahesuɱ.|| ||

4. Atha kho Sandhāno gahapati yena Nigrodho paribbājako ten'upasaŋkami,||
upasaŋkamitvā Nigrodhena paribbājakena saddhiɱ sammodi.|| ||

Sammodanīyaɱ kathaɱ sārānīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Sandhāno gahapati Nigrodhaɱ paribbājakaɱ etad avoca:|| ||

"Aññathā kho ime bhonto añña-titthiyā paribbājakā saŋgamma samāgamma unnādino uccāsadda-mahāsaddā [38] aneka-vihitaɱ tiracchāna-kathaɱ kathentā viharanti - seyyathīdaɱ:|| ||

rāja-kathaɱ||
cora-kathaɱ||
mahāmatta-kathaɱ||
senā-kathaɱ||
bhaya-kathaɱ||
yuddha-kathaɱ||
anna-kathaɱ||
pāna-kathaɱ||
vattha-kathaɱ||
sayana-kathaɱ||
mālā-kathaɱ||
gandha-kathaɱ||
ñāti-kathaɱ||
yāna-kathaɱ||
gāma-kathaɱ||
nigama-kathaɱ||
nagara-kathaɱ||
janapada-kathaɱ||
itthi-kathaɱ||
purisa-kathaɱ||
sūra-kathaɱ||
visikhā-kathaɱ||
kumbhaṭṭhāna-kathaɱ||
pubba-peta-kathaɱ||
nānatta-kathaɱ||
lokakkhāyikaɱ-kathaɱ||
samuddakkhāyikaɱ-kathaɱ||
iti-bhavābhava-kathaɱ kathaɱ iti vā.|| ||

Aññathā ca pana so Bhagavā araññe vanapatthāni pantāni senāsanāni paṭisevanti,||
appasaddāni appa-nigghosāni vijana-vātāni manussa-rāhaseyyakāni paṭisallāna-sāruppānī" ti.|| ||

5. Evaɱ vutte Nigrodho paribbājako Sandhānaɱ gahapatiɱ etad avoca:|| ||

"Yagghe gahapati jāneyyāsi,||
kena Samaṇo Gotamo saddhiɱ sallapati?|| ||

Kena sākacchaɱ samāpajjati?|| ||

Kena paññā-veyyattiyaɱ āpajjati?|| ||

Suññāgāra-hatā Samaṇassa Gotamassa paññā,||
aparisāvacaro Samaṇo Gotamo,||
nālaɱ sallāpāya,||
so antamantān'eva sevati.|| ||

Seyyathā pi nāma gokāṇā pariyanta-cārinī antamantān'eva sevati,||
evam eva suññāgāra-hatā Samaṇassa Gotamassa paññā,||
aparisāvacaro Samaṇo Gotamo,||
nālaɱ sallāpāya,||
so antamantān'eva sevati.|| ||

Iŋgha gahapati,||
Samaṇo Gotamo imaɱ parisaɱ āgaccheyya,||
eka-pañhen'eva naɱ saɱsādeyyāma,||
tuccha-kumbhi va naɱ maññe orodheyyāmā" ti.|| ||

6. Assosi kho Bhagavā dibbāya sota-dhātuyā visuddhāya atikkanta-mānusakāya Sandhānassa gahapatissa Nigrodhena paribbājakena saddhiɱ imaɱ kathā-sallāpaɱ.|| ||

Atha kho Bhagavā Gijjha-kuṭā pabbatā orohitvā yena [39] Sumāgadhāya tīre Mora-nivāpo ten'upasaŋkami.|| ||

Upasaŋkamitvā Sumāgadhāya tīre Mora-nivāpe abhokāse caŋkami.|| ||

Addasā kho Nigrodho paribbājako Bhagavantaɱ Sumāgadhāya tīre Mora-nivāpe abbhokāse caŋkamantaɱ,||
disvā sakaɱ parisaɱ saṇṭhapesi:|| ||

"Appasaddā bhonto bhontu,||
mā bhonto saddam akattha.|| ||

Ayaɱ Samaṇo Gotamo Sumāgadhāya tīre Mora-nivāpe abbhokāse caŋkamati.|| ||

Appasadda-kāmo kho pana so āyasmā,||
appasaddassa vaṇṇa-vādī,||
app'eva nāma appasaddaɱ parisaɱ viditvā upasaŋkamitabbaɱ maññeyya.|| ||

Sace Samaṇo Gotamo imaɱ parisaɱ āgaccheyya,||
imaɱ taɱ pañhaɱ puccheyyāma —||
'ko nāma so bhante,||
Bhagavato dhammo yena Bhagavā sāvake vineti,||
yena Bhagavatā sāvakā vinītā assāsa-ppattā paṭijānanti ajjhāsayaɱ ādibrahmacariyan'" ti?|| ||

Evaɱ vutte te paribbājakā tuṇhī ahesuɱ.|| ||

7. Atha kho Bhagavā yena Nigrodho paribbājako ten'upasaŋkami.|| ||

Atha kho Nigrodho paribbājako Bhagavantaɱ etad avoca:|| ||

"Etu kho bhante Bhagavā,||
sāgataɱ bhante Bhagavato,||
cirassaɱ kho bhante,||
Bhagavā imaɱ pariyāyam akāsi yad idaɱ idh'āgamanāya.|| ||

Nisīdatu bhante Bhagavā,||
idam āsanaɱ paññattan" ti.|| ||

Nisīdi Bhagavā paññatte āsane.|| ||

Nigrodho pi kho paribbājako aññataraɱ nicaɱ āsanaɱ gahetvā eka-m-antaɱ nisīdi.|| ||

Eka-m-antaɱ nisinnaɱ kho Nigrodhaɱ paribbājakaɱ Bhagavā etad avoca:|| ||

"Kāya nu'ttha Nigrodha etarahi kathāya sannisinnā?|| ||

Kā ca pana vo antarā-kathā vippakatā" ti?|| ||

Evaɱ vutte Nigrodho paribbājako Bhagavantaɱ etad avoca:|| ||

"Idha mayaɱ bhante,||
addasāma Bhagavantaɱ Sumāgadhāya tīre Mora-nivāpe abbhokāse caŋkamantaɱ,||
disvā [40] na evaɱ avocumhā:|| ||

Sace Samaṇo Gotamo imaɱ parisaɱ āgaccheyya,||
imaɱ taɱ pañhaɱ puccheyyāma:|| ||

'Ko nāma so bhante,||
Bhagavato dhammo yena Bhagavā sāvake vineti,||
yena Bhagavatā sāvakā vinītā assāsa-ppattā paṭijānanti ajjhāsayaɱ ādi-brahmacariyan' ti?|| ||

Ayaɱ kho no bhante,||
antarā kathā vippakatā,||
atha Bhagavā anuppatto" ti.|| ||

"Dujjānaɱ kho etaɱ Nigrodha,||
tayā añña-diṭṭhikena añña-khantikena añña-rucikena añña-tr'āyogena añña-tr'ācariyakena yenāhaɱ sāvake vinemi,||
yena mayā sāvakā vinītā assāsa-ppattā paṭijānanti ajjhāsayaɱ ādi-brahmacariyaɱ.|| ||

Iŋgha, tvaɱ maɱ Nigrodha sake ācāriyake adhijegucche pañhaɱ puccha 'kathaɱ santā nu kho bhante,||
tapo-jigucchā paripuṇṇā hoti,||
kathaɱ aparipuṇṇā" ti?|| ||

 

§

 

6. Evaɱ vutte te paribbājakā unnādino uccāsaddā mahāsaddā ahesuɱ:|| ||

"Acchariyaɱ vata bho abbhūtaɱ vata bho Samaṇassa Gotamassa mahiddhikatā mahānubhāvatā,||
yatra hi nāma sakavādaɱ ṭhapessati,||
paravādena pavāressatī " ti.|| ||

Atha kho Nigrodho paribbājako te paribbājake appasadde katvā,||
Bhagavantaɱ etad avoca:|| ||

"Mayaɱ kho bhante tapo-jigucchā-vādā tapo-jigucchāsārā tapo-jigucchaɱ allīnā viharāma.|| ||

Kathaɱ santā nu kho bhante,||
tapo-jigucchā paripuṇṇā hoti,||
kathaɱ aparipuṇṇā" ti?

 

§

 

"Idha Nigrodha tapassī acelako hoti,||
muttācāro hatthāpalekhano,||
na-ehi-bhadantiko,||
na-tiṭṭha-bhadantiko,||
nābhihaṭaɱ [41]||
na uddissa-kaṭaɱ||
na nimantanaɱ sādiyati.|| ||

Na kumbhi-mukhā paṭigaṇhā ti,||
na kalopi-mukhā paṭigaṇhāti,||
na eḷakam-antaraɱ,||
na udukkhalam-antaraɱ,||
na daṇḍam-antaraɱ,||
na musalam-antaraɱ,||
na dvinnaɱ bhuñjamānānaɱ,||
na gabbhiniyā,||
na pāyamānāya,||
na purisantara-gatāya,||
na saɱkittīsu,||
na yattha sā uṭṭhito hoti,||
na yattha makkhikā saṇḍa-saṇḍa-cārinī,||
na macchaɱ,||
na maɱsaɱ,||
na suraɱ,||
na merayaɱ,||
na thusodakaɱ pivati.|| ||

So ekāgāriko vā hoti ekālopiko,||
dvāgāriko vā hoti dvālopiko,||
tīhigāriko vā hoti dvālopiko,||
catūhigāriko vā hoti dvālopiko,||
pañcahigāriko vā hoti dvālopiko,||
chahigāriko vā hoti dvālopiko,||
sattāgāriko vā hoti sattālopiko.|| ||

Ekissā pi dattiyā yāpeti,||
dvihi pi dattīhi yāpeti,||
tīhi pi dattīhi yāpeti,||
catūhi pi dattīhi yāpeti,||
pañcahi pi dattīhi yāpeti,||
chahi pi dattīhi yāpeti,||
sattahi pi dattīhi yāpeti.|| ||

Ekāhikam pi āhāraɱ āhāreti,||
dvāhikam pi āhāraɱ āhāreti,||
tīhikam pi āhāraɱ āhāreti,||
catūhikam pi āhāraɱ āhāreti,||
pañcāhikam pi āhāraɱ āhāreti,||
chāhikam pi āhāraɱ āhāreti,||
sattāhikam pi āhāraɱ āhāreti —|| ||

iti evarūpaɱ addhamāsikam pi pariyāya-bhatta-bhojanānuyogamanuyutto viharati.|| ||

So sāka-bhakkho vā hoti,||
sāmāka-bhakkho vā hoti,||
nivāra-bhakkho vā hoti,||
daddula-bhakkho vā hoti,||
haṭa-bhakkho vā hoti,||
kaṇa-bhakkho vā hoti,||
ācāma-bhakkho vā hoti,||
piññāka-bhakkho vā hoti,||
tiṇa-bhakkho vā hoti,||
gomaya-bhakkho vā hoti,||
vana-mūla-phalāhāro yāpeti,||
pavatta-phala-bhojī.|| ||

So sāṇāni pi dhāreti,||
masāṇāni pi dhāreti,||
chava-dussāni pi dhāreti,||
paɱsu-kulāni pi dhāreti,||
tirīṭāni pi dhāreti,||
ajinā-ni pi dhāreti,||
ajina-kkhipam pi dhāreti,||
kusa-cīram pi dhāreti,||
vāka-cīram pi dhāreti,||
phalaka-cīram pi dhāreti,||
kesa-kambalam pi dhāreti,||
vāla-kambalam pi dhāreti,||
uluka-pakkhikam pi dhāreti.|| ||

Kesa-massu-locako pi hoti kesa-massu-locanānuyogam [42] anuyutto,||
ubbhaṭṭhako pi hoti āsana-paṭikkhitto,||
ukkuṭiko pi hoti ukkuṭika-ppadhānam anuyutto,||
kaṇṭakā-passayiko pi hoti,||
kaṇṭakā-passe seyyaɱ kappeti,||
phalaka-seyyam pi kappeti,||
thaṇḍila-seyyam pi kappeti,||
eka-passayiko pi hoti rajojalla-dharo,||
abbhokāsiko pi hoti yathā-satthatiko,||
vekaṭiko pi hoti vikaṭa-bhojanānuyogam anuyutto,||
āpānako pi hoti āpānakattam anuyutto,||
sāya-tatiyakam pi udakorohanānuyogam anuyutto viharati.|| ||

Taɱ kim maññasi Nigrodha?|| ||

Yadi evaɱ sate tapo-jigucchā paripuṇṇā vā hoti aparipuṇṇā vā" ti?|| ||

"Addhā kho bhante,||
evaɱ sante tapo-jigucchā paripuṇṇā hoti no aparipuṇaṇā" ti.|| ||

8. Evaɱ paripuṇṇāya pi kho ahaɱ Nigrodha,||
tapo-jigucchāya aneka-vihite upakkilese vadāmī" ti.|| ||

"Yathā-kathaɱ pana bhante,||
Bhagavā evaɱ paripuṇṇāya tapo-jigucchāya aneka-vihite upakkilese vadatī" ti?|| ||

"Idha Nigrodha, tapassī tapaɱ samādiyati.|| ||

So tena tapasā attamano hoti paripuṇṇa-saɱkappo.|| ||

Yam pi kho Nigrodha,||
tapassī tapaɱ samādiyati,||
so tena tapasā attamano hoti paripuṇṇa-saɱkappo,||
ayam pi kho Nigrodha,||
tapassino upakkileso' hoti.|| ||

Puna ca paraɱ Nigrodha,||
tapassi tapaɱ samādiyati.|| ||

So tena tapasā attān'ukkaɱseti paraɱ vambheti.|| ||

Yam pi Nigrodha,||
tapassī tapaɱ samādiyati,||
so tena tapasā attān'ukkaɱseti paraɱ vambheti,||
ayam pi Nigrodha,||
tapassino upakkileso hoti.|| ||

Puna ca paraɱ Nigrodha,||
tapassī tapaɱ samādiyati.|| ||

So tena tapasā majjati mucchati pamādam āpajjati.|| ||

Yam pi Nigrodha,||
tapassī tapaɱ samādiyati,||
so tena tapasā [43] majjati mucchati pamādam āpajjati,||
ayam pi ko Nigrodha,||
tapassino upakkileso hoti.|| ||

10. Puna ca paraɱ Nigrodha,||
tapassī tapaɱ samādiyati.|| ||

So tena tapasā lābha-sakkāra-silokaɱ abhinibbatteti.|| ||

So tena lābha-sakkāra-silokena attamano hoti paripuṇṇa-saɱkappo.|| ||

Yam pi Nigrodha,||
tapassī tapaɱ samādiyati,||
so tena tapasā lābha-sakkāra-silokaɱ abhinibbatteti,||
so tena lābha-sakkāra-silokena attamano hoti paripuṇṇa-saɱkappo,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
tapassī tapaɱ samādiyati.|| ||

So tena tapasā lābha-sakkāra-silokaɱ abhinibbatteti.|| ||

So tena lābha-sakkāra-silokena attān'ukkaɱseti paraɱ vambheti.|| ||

Yam pi Nigrodha,||
tapassī tapaɱ samādiyati,||
so tena tapasā lābha-sakkāra-silokaɱ abhinibbatteti,||
so tena lābha-sakkāra-silokena attān'ukkaɱseti,||
paraɱ vambheti,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
tapassī tapaɱ samādiyati.|| ||

So tena tapasā lābha-sakkāra-silokaɱ abhinibbatteti.|| ||

So tena lābha-sakkāra-silokena majjati mucchati pamādam āpajjati.|| ||

Yam pi kho Nigrodha,||
tapassī tapaɱ samādiyati,||
so tena tapasā lābha-sakkāra-silokaɱ abhinibbatteti,||
so tena lābha-sakkāra-silokena majjati mucchati pamāda māpajjati,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
tapassī tapaɱ samādiyati,||
bhojanesu vodāsaɱ āpajjati:|| ||

'Idaɱ me khamati,||
idaɱ me nakkhamatī' ti.|| ||

So yañ hi kho'ssa na kkhamati taɱ sāpekkho pajahati,||
yaɱ pan'assa khamati taɱ gathito mucchito ajjhopanno anādīnava-dassāvi anissaraṇa-pañño paribhuñjati.|| ||

Yam pi kho Nigrodha,||
tapassī tapaɱ samādiyati,||
bhojanesu vodāsaɱ āpajjati:||
'idaɱ me khamati,||
idaɱ me nakkhamatī' ti||
so yañ hi kho'ssa na kkhamati taɱ sāpekkho pajahati,||
yaɱ pan'assa khamati taɱ gathito mucchito ajjhopanno anādīnava-dassāvi anissaraṇa-pañño paribhuñjati,||
ayam pi kho Nigrodha,||
tapassino upakkileso hoti.|| ||

[44] Puna ca paraɱ Nigrodha,||
tapassī tapaɱ samādiyati lābha-sakkāra-siloka-nikanti-hetu:|| ||

'Sakkarissanti maɱ rājāno rāja-mahāmatta khattiyā brāhmaṇā gahapatikā titthiyā' ti.|| ||

Yam pi Nigrodha,||
tapassī tapaɱ samādiyati lābha-sakkāra-siloka-nikanti-hetu:||
'Sakkarissanti maɱ rājāno rāja-mahāmattiyā khattiyā brāhmaṇā gahapatikā titthiyā' ti,||
ayam pi kho Nigrodha,||
tapassino upakkileso hoti.|| ||

11. Puna ca paraɱ Nigrodha,||
tapassī aññataraɱ samaṇaɱ vā brāhmaṇaɱ vā apasādetā hoti:|| ||

'Kim panāyaɱ bahulājivo sabbaɱ sambhakkhe' ti?|| ||

'Seyyathīdaɱ mūla-bījaɱ khandha-bījaɱ phalu-bījaɱ agga-bījaɱ bīja-bījam eva pañcamaɱ,||
asani-vicakkaɱ dantā-kuṭaɱ samaṇa-ppavādenā' ti.|| ||

Yam pi Nigrodha,||
tapassī aññataraɱ Samaṇaɱ vā brāhmaṇaɱ vā apasādetā hoti:||
'Kim panāyaɱ bahulājivo sabbaɱ sambhakkhe' ti.||
'Seyyathīdaɱ mūla-bījaɱ khandha-bījaɱ phalu-bījaɱ agga-bījaɱ bīja-bījam eva pañcamaɱ,||
asani-vicakkaɱ dantā-kūṭaɱ samaṇappavādenā' ti,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
tapassī passati aññataraɱ samaṇaɱ vā brāhmaṇaɱ vā kulesu sakkarīyamānaɱ garukarīyamānaɱ mānīyamānaɱ pūjīyamānaɱ.|| ||

Disvā tassa evaɱ hoti:|| ||

'Imañ hi nāma bahulājīvaɱ kulesu sakkaronti garukaronti mānenti pūjenti,||
maɱ pana tapassiɱ lūkhājīviɱ kulesu na sakkaronti na garukaronti na mānenti na pūjentī' ti.|| ||

Iti so issā-macchariyaɱ kulesu uppādetā hoti.|| ||

Yam pi kho Nigrodha,||
tapassī passati aññataraɱ samaṇaɱ vā brāhmaṇaɱ vā kulesu sakkarīyamānaɱ garukarīyamānaɱ mānīyamānaɱ pūjīyamānaɱ||
disvā tassa evaɱ hoti||
'imañ hi nāma bahulājīvaɱ kulesu sakkaronti garukaronti mānenti pūjenti,||
maɱ pana tapassiɱ lūkhājīviɱ kulesu na sakkaronti na garukaronti na mānenti na pūjentī' ti.|| ||

Iti so issā-macchariyaɱ kulesu uppādenā hoti.|| ||

Ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha tapassī āpātaka-nisādī hoti.|| ||

Yam pi kho Nigrodha,||
tapassī āpātaka-nisādī hoti,||
ayam pī kho Nigrodha,||
tapassino no upakkileso hoti.|| ||

Puna ca paraɱ Nigrodha,||
tapassī attānaɱ ādassayamāno kulesu carati:|| ||

'Idam pi me tapasmiɱ,||
idam pi me tapasmin' ti.|| ||

Yam pi kho Nigrodha,||
tapassī attānaɱ ādassayamāno kulesu carati:||
'idam pi me tapasmiɱ,||
idam pi me tapasmin' ti,||
ayam pi kho Nigrodha,||
tapassino upakkileso hoti.|| ||

[45] Puna ca paraɱ Nigrodha,||
tapassī kiñci'd'eva paṭicchannaɱ sevati.|| ||

So 'khamati te idan' ti?'||
puṭṭho samano,||
akkhamamānaɱ āha||
'khamatī' ti,||
khamamānaɱ āha||
'na kkhamatī'ti.|| ||

Iti so sampajānamusā bhāsitā hoti.|| ||

Yam pi kho Nigrodha,||
tapassī kiñci'd'eva paṭicchannaɱ sevati||
so 'khamati te idan' ti?||
puṭṭho samano||
akkhamamānaɱ āha||
'khamatī' ti||
khamamānaɱ āha||
'na kkhamatī'ti.|| ||

Iti so sampajānamusā bhāsitā hoti||
ayam pi kho Nigrodha,||
tapassino upakkileso hoti.|| ||

12. Puna ca paraɱ Nigrodha,||
tapassī Tathāgatassa vā Tathāgata-sāvakassa vā dhammaɱ desentassa santaɱ yeva pariyāyaɱ anuññeyyaɱ nānujānāti.|| ||

Yam pi kho Nigrodha tapassī Tathāgatassa vā Tathāgata-sāvakassa vā dhammaɱ desentassa santaɱ yeva pariyāyaɱ anuññeyyaɱ nānujānāti,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
tapassī kodhano hoti upanāhī.|| ||

Yam pi Nigrodha,||
tapassī kodhano hoti upanāhī,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
tapassī makkhi hoti palāsī.|| ||

Yam pi Nigrodha,||
tapassī makkhi hoti palāsī,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
issukī hoti maccharī.|| ||

Yam pi Nigrodha,||
issukī hoti maccharī,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
saṭho hoti māyāvī.|| ||

Yam pi Nigrodha,||
saṭho hoti māyāvī,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
thaddho hoti atimānī.|| ||

Yam pi Nigrodha,||
thaddho hoti atimānī,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
pāpiccho hoti pāpikānaɱ icchānaɱ vasaɱ gato.|| ||

Yam pi Nigrodha,||
pāpiccho hoti pāpikānaɱ icchānaɱ vasaɱ gato,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
micchā-diṭṭhiko hoti anta-ggāhikāya diṭṭhiyā samannāgato.|| ||

Yam pi Nigrodha,||
pāpiccho hoti pāpikānaɱ icchānaɱ vasaɱ gato,||
ayam pi kho Nigrodha,||
tapassino upakkileso hoti.|| ||

Puna ca paraɱ Nigrodha,||
sandiṭṭhi-parāmāsi hoti ādhāna-gāhī duppaṭinissaggī.|| ||

Yam pi Nigrodha,||
sandiṭṭhi-parāmāsi hoti ādhāna-gāhī duppaṭinissaggī,||
ayam pi kho Nigrodha,||
tapassino upakkileso hoti.|| ||

Taɱ kim maññasi Nigrodha?|| ||

Yadi'me tapo-jigucchā upakkilesā vā anupakkilesā vā" ti?|| ||

"Addhā kho ime bhante,||
tapo-jigucchā upakkilesā||
no anupakkilesā.|| ||

Ṭhānaɱ kho pan'etaɱ bhante vijjati,||
yaɱ idh'ekacco tapassī sabbeh'eva imehi upakkilesehi samannāgato assa,||
ko pana vādo aññatar-aññatarenā" ti?|| ||

 


 

13. Idha Nigrodha,||
tapassī tapaɱ samādiyati.|| ||

So tena tapasā na attamano hoti||
na paripuṇṇa-saɱkappo.|| ||

Yam pi Nigrodha,||
tapassī tapaɱ samādiyati,||
so tena tapasā na attamano [46] hoti||
na paripuṇṇa-saɱkappo,||
evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī tapaɱ samādiyati.|| ||

So tena tapasā na attān'ukkaɱseti,||
na paraɱ vambheti.|| ||

Yam pi Nigrodha,||
tapassī tapaɱ samādiyati,||
so tena tapasā na attān'ukkaɱseti,||
na paraɱ vambheti,||
evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī tapaɱ samādiyati.|| ||

So tena tapasā na majjati na mucchati na pamādam āpajjati.|| ||

Yam pi Nigrodha,||
tapassī tapaɱ samādiyati,||
so tena tapasā na majjati na mucchati na pamādam āpajjati,||
evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī tapaɱ samādiyati.|| ||

So tena tapasā lābha-sakkāra-silokaɱ abhinibbatteti.|| ||

So tena lābha-sakkāra-silokena na attamano hoti na paripuṇṇa-saɱkappo.|| ||

Yam pi Nigrodha,||
tapassī tapaɱ samādiyati||
so tena tapasā lābha-sakkāra-silokaɱ abhinibbatteti,||
so tena lābha-sakkāra-silokena na attamano hoti na paripuṇṇa-saɱkappo,||
evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī tapaɱ samādiyati.|| ||

So tena tapasā lābha-sakkāra-silokaɱ abhinibbatteti.|| ||

So tena lābha-sakkāra-silokena na attān'ukkaɱseti na paraɱ vambheti.|| ||

Yam pi Nigrodha,||
tapassī tapaɱ samādiyati||
so tena tapasā lābha-sakkāra-silokaɱ abhinibbatteti||
so tena lābha-sakkāra-silokena na attān'ukkaɱseti na paraɱ vambheti,||
evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī tapaɱ samādiyati.|| ||

So tena tapasā lābha-sakkāra-silokaɱ abhinibbatteti.|| ||

So tena lābha-sakkāra-silokena na majjati na mucchati na pamādam āpajjati.|| ||

Yam pi Nigrodha,||
tapassī tapaɱ samādiyati||
so tena tapasā lābha-sakkāra-silokaɱ abhinibbatteti||
so tena lābhasakkārasalokena na majjati na mucchati na pamādam āpajjati,||
evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī tapaɱ samādiyati,||
bhojanesu na vodāsaɱ āpajjati|| ||

'Idaɱ me khamati,||
idaɱ me nakkhamatī' ti.|| ||

So yañ hi kho'ssa na kkhamati taɱ anapekkho pajahati,||
yaɱ pan'assa khamati taɱ agathito amucchito anajjhāpanno ādīnava-dassāvī nissaraṇa-pañño paribhuñjati.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī tapaɱ samādiyati.|| ||

Na so lābha-sakkāra-siloka-nikanti-hetu sakkarissanti maɱ rājāno rāja-mahāmattā khattiyā brāhmaṇā gahapatikā titthiyā 'ti.|| ||

Evaɱ so tasmiɱ ṭhāne parisuddho hoti.|| ||

14. Puna ca paraɱ Nigrodha,||
tapassī aññataraɱ samaṇaɱ vā brāhmaṇaɱ vā nā apasādetā hoti:|| ||

'Kim panāyaɱ [47] bahulājivo sabbaɱ sambhakkhe ti?|| ||

Seyyathīdaɱ, mūla-bījaɱ khandha-bījaɱ phalu-bījaɱ agga-bījaɱ bīja-bījam eva pañcamaɱ,||
asani-vicakkaɱ danta-kūṭaɱ samaṇa-ppavādenā' ti.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī passati aññataraɱ samaṇaɱ vā brāhmaṇaɱ vā kulesu sakkarīyamānaɱ garukarīyamānaɱ mānīyamānaɱ pūjīyamānaɱ.|| ||

Tassa na evaɱ hoti:|| ||

'Imañ hi nāma bahulājīviɱ kulesu sakkaronti garukaronti mānenti pūjenti,||
maɱ pana tapassiɱ lukhājiviɱ kulesu na sakkaronti na garukaronti na mānenti na pūjentī ti.|| ||

Iti so issā-macchariyaɱ kulesu anuppādetā hoti.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī na āpāthaka-nisādī hoti.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī na attānaɱ ādassayamāno kulesu carati|| ||

'Idampi me tapasmiɱ,||
idampi me tapasmin' ti.|| ||

Evaɱ so tasmiɱ ṭhāne parisuddho hotī.|| ||

Puna ca paraɱ Nigrodha,||
tapassī na kiñci'd'eva paṭicchannaɱ sevati.|| ||

So 'khamati te idanti?' puṭṭho samāno,||
akkhamamānaɱ||
'āha nakkhamatī' ti,||
khamamānaɱ||
'āha khamatī' ti.|| ||

Iti so sampajānamusā na bhāsitā hoti.|| ||

Evaɱ so tasmiɱ ṭhāne parisuddho hoti.|| ||

15. Puna ca paraɱ Nigrodha,||
tapassī Tathāgatassa vā Tathāgatasāvakassa vā dhammaɱ desentassa santaɱ yeva pariyāyaɱ anuññeyyaɱ anujānāti.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
tapassī akkodhano hoti anupanāhī.|| ||

Yam pi Nigrodha,||
tapassī akkodhano hoti anupanāhī.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
anissukī hoti amaccharī.|| ||

Yam pi Nigrodha,||
anissukī hoti amaccharī.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
asaṭho hoti amāyāvī.|| ||

Yam pi Nigrodha,||
asaṭho hoti amāyāvī.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
atthaddho hoti [48] anatimānī.|| ||

Yam pi Nigrodha,||
atthaddho hoti anatimānī.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
na pāpiccho hoti na pāpikānaɱ icchānaɱ vasaɱ gato.|| ||

Yam pi Nigrodha,||
na pāpiccho hoti na pāpikānaɱ icchānaɱ vasaɱ gato.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
na micchā-diṭṭhiko hoti ananta-ggāhikāya diṭṭhiyā samannāgato.|| ||

Yam pi Nigrodha,||
na micchā-diṭṭhiko hoti ananta-ggāhikāya diṭṭhiyā samannāgato.|| ||

Evaɱ so tasmiɱ ṭhāne parisuddho hoti.|| ||

Puna ca paraɱ Nigrodha,||
asandiṭṭhi-parāmāsi hoti anādhāna-ggāhī suppaṭinissaggī.|| ||

Yam pi Nigrodha,||
asandiṭṭhi-parāmāsi hoti anādhāna-ggāhī suppaṭinissaggī.|| ||

Evaɱ so tasmiɱ ṭhāne parisuddho hoti.|| ||

"Taɱ kim maññasi Nigrodha?|| ||

Yadi evaɱ sante tapo-jigucchā parisuddhā vā hoti apariSuddhāvā" ti?

"Addhā kho bhante,||
evaɱ sante tapo-jigucchā parisuddhā hoti||
no aparisuddhā,||
agga-ppattā ca sāra-ppattā cā " ti.|| ||

"Na kho Nigrodha,||
ettāvatā tapo-jigucchā agga-ppattā ca hoti sāra-ppattā va||
api ca kho papaṭikap-pattā hotī " ti.|| ||

 

§

 

16. "Kittāvatā pana bhante,||
tapo-jigucchā agga-ppattā ca hoti sāra-ppattā ca.|| ||

Sādhu me bhante,||
Bhagavā tapo-jigucchāya aggaɱ yeva pāpetu sāraɱ yeva pāpetū" ti.|| ||

"Idha Nigrodha,||
tapassī cātu-yāma-saɱvara-saɱvuto hoti.|| ||

Kathañ ca Nigrodha,||
tapassī cātu-yāma-saɱvara-saɱvuto hoti?

Idha Nigrodha,||
tapassī na pāṇam-atipāteti,||
na pāṇam-atipātāpayati,||
na pāṇam-atipātayato samanuñño [49] hoti,||
na adinnaɱ ādiyati,||
na adinnaɱ ādiyāpeti,||
na adinnaɱ ādiyato samanuñño hoti,||
na musā bhaṇati,||
na musā bhaṇāpeti,||
na musā bhaṇato samanuñño hoti,||
na bhāvitam-āsiɱsati,||
na bhāvitam-āsiɱsāpeti,||
na bhāvitam-āsiɱsato samanuñño hoti.|| ||

Evaɱ kho Nigrodha,||
tapassī cātu-yāma-saɱvara-saɱvuto hoti.|| ||

Yato kho Nigrodha,||
tapassī cātu-yāma-saɱvara-saɱvuto hoti,||
aduɱ c'assa hoti tapassitāya,||
so abhiharati no hīnāy'āvattati.|| ||

So vivittaɱ senāsanaɱ bhajati,||
araññaɱ rukkha-mūlaɱ pabbataɱ kandaraɱ giri-guhaɱ susānaɱ vanapatthaɱ abbhokāsaɱ palāla-puñjaɱ.|| ||

So pacchā-bhattaɱ piṇḍapāta-paṭikkanto nisīdati pallaŋkaɱ ābhujitvā,||
ujuɱ kāyaɱ paṇidhāya,||
parimukhaɱ satiɱ upaṭṭhapetvā.|| ||

So abhijjhaɱ loke pahāya vigatābhijjhena cetasā viharati,||
abhijjhāya cittaɱ parisodheti;||
vyāpādapa-dosaɱ pahāya avyāpanna-citto viharati,||
sabba-pāṇabhūta-hitānukampī vyāpāda-padosā cittaɱ parisodheti;||
thīna-middhaɱ pahāya vigata-thīna-middho viharati,||
āloka-saññi sato sampajāno thīna-middhā cittaɱ parisodheti;||
uddhacca-kukkuccaɱ pahāya anuddhato viharati,||
ajjhattaɱ vūpasanta-citto uddhacca-kukkuccā cittaɱ parisodheti;||
vicikicchaɱ pahāya tiṇṇa-vicikiccho viharati,||
akathaɱ-kathi kusalesu dhammesu,||
vicikicchāya cittaɱ parisodheti.|| ||

17. So ime pañca nīvaraṇe pahāya cetaso upakkilese paññāya dubbalī-karaṇe,||
mettā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena [50] mahaggatena appamāṇena averena avyāpajjena pharitvā viharati.|| ||

Karuṇā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Muditā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Upekkhā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Taɱ kim maññasi Nigrodha?|| ||

Yadi evaɱ sante tapo-jigucchā parisuddhā vā hoti||
aparisuddhā va" ti?

"Addhā kho bhante,||
evaɱ sante tapo-jigucchā parisuddhā hoti||
no aparisuddhā,||
agga-ppattā ca||
sāra-ppattā cā" ti.|| ||

"Na kho Nigrodha,||
ettāvatā tapo-jigucchā agga-ppattā ca hoti||
sāra-ppattā ca,||
api ca kho tacappattā hotī" ti.|| ||

 


 

18. "Kittāvatā pana bhante,||
tapo-jigucchā agga-ppattā ca hoti||
sāra-ppattā ca?|| ||

Sādhu me bhante,||
Bhagavā tapo-jigucchāya aggaɱ yeva pāpetu||
sāraɱ yeva pāpetū" ti.|| ||

"Idha Nigrodha,||
tapassī cātu-yāma-saɱvara-saɱvuto hoti.|| ||

Kathañ ca Nigrodha,||
tapassī cātu-yāma-saɱvara-saɱvuto hoti?

Idha Nigrodha,||
tapassī na pāṇam-atipāteti,||
na pāṇam-atipātāpayati,||
na pāṇam-atipātayato samanuñño hoti,||
na adinnaɱ ādiyati,||
na adinnaɱ ādiyāpeti,||
na adinnaɱ ādiyato samanuñño hoti,||
na musā bhaṇati,||
na musā bhaṇāpeti,||
na musā bhaṇato samanuñño hoti,||
na bhāvitam-āsiɱsati,||
na bhāvitam-āsiɱsāpeti,||
na bhāvitam-āsiɱsato samanuñño hoti.|| ||

Evaɱ kho Nigrodha,||
tapassī cātu-yāma-saɱvara-saɱvuto hoti.|| ||

Yato kho Nigrodha,||
tapassī cātu-yāma-saɱvara-saɱvuto hoti,||
aduɱ c'assa hoti tapassitāya,||
so abhiharati no hīnāy'āvattati.|| ||

So vivittaɱ senāsanaɱ bhajati,||
araññaɱ rukkha-mūlaɱ pabbataɱ kandaraɱ giri-guhaɱ susānaɱ vanapatthaɱ abbhokāsaɱ palāla-puñjaɱ.|| ||

So pacchā-bhattaɱ piṇḍapāta-paṭikkanto nisīdati pallaŋkaɱ ābhujitvā,||
ujuɱ kāyaɱ paṇidhāya,||
parimukhaɱ satiɱ upaṭṭhapetvā.|| ||

So abhijjhaɱ loke pahāya vigatābhijjhena cetasā viharati,||
abhijjhāya cittaɱ parisodheti;||
vyāpādapa-dosaɱ pahāya avyāpanna-citto viharati,||
sabba-pāṇabhūta-hitānukampī vyāpāda-padosā cittaɱ parisodheti;||
thīna-middhaɱ pahāya vigata-thīna-middho viharati,||
āloka-saññi sato sampajāno thīna-middhā cittaɱ parisodheti;||
uddhacca-kukkuccaɱ pahāya anuddhato viharati,||
ajjhattaɱ vūpasanta-citto uddhacca-kukkuccā cittaɱ parisodheti;||
vicikicchaɱ pahāya tiṇṇa-vicikiccho viharati,||
akathaɱ-kathi kusalesu dhammesu,||
vicikicchāya cittaɱ parisodheti.|| ||

17. So ime pañca nīvaraṇe pahāya cetaso upakkilese paññāya dubbalī-karaṇe,||
mettā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Karuṇā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Muditā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Upekkhā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

So aneka-vihitaɱ pubbe-nivāsaɱ anussarati,||
seyyathīdaɱ:|| ||

Ekam pi jātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsam pi jātiyo,||
tiɱsam pi jātiyo,||
cattā'īsam pi jātiyo,||
paññāsam pi jātiyo,||
jāti-satam pi,||
jāti-sahassam pi,||
[51] jāti-sata-sahassam pi,||
anekāni pi jāti-satāni,||
anekāni pi jāti-sahassāni,||
anekāni pi jāti-sata-sahassāni,||
aneke pi saɱvaṭṭakappe,||
aneke pi vivaṭṭakappe,||
aneke pi saɱvaṭṭa-vivaṭṭakappe:,||
amutrāsiɱ evaɱ-nāmo,||
evaɱgotto evaɱ-vaṇṇo,||
evam-āhāro,||
evaɱ-sukha-dukkha-paṭisaŋvedī,||
evam-āyu-pariyanto.|| ||

So tato cuto amutra udapādiɱ.|| ||

Tatrā p'āsiɱ||
evaɱ-nāmo,||
evaɱ-gotto,||
evaɱ-vaṇṇo,||
evam-āhāro,||
evaɱ-sukha-dukkha-paṭisaŋvedī,||
evam-āyu-pariyanto.|| ||

So tato cuto idhūpapanno ti.|| ||

Iti sākāraɱ sa-uddesaɱ aneka-vihitaɱ pubbe-nivāsaɱ anussarati.|| ||

Taɱ kim maññasi Nigrodha?|| ||

Yadi evaɱ sante tapo-jigucchā parisuddhā vā hoti||
aparisuddhā vā" ti?|| ||

"Addhā kho bhante,||
evaɱ sante tapo-jigucchā parisuddhā hoti||
no aparisuddhā,||
agga-ppattā ca||
sāra-ppattā cā " ti.|| ||

"Na kho Nigrodha,||
ettāvatā tapo-jigucchā agga-ppattā ca hoti||
sāra-ppattā ca,||
api ca kho pheggu-ppattā hotī" ti.|| ||

 


 

14. "Kittāvatā pana bhante,||
tapo-jigucchā agga-ppattā ca hoti sāra-ppattā ca?|| ||

Sādhu me bhante,||
Bhagavā tapo-jigucchāya aggaɱ yeva pāpetu||
sāraɱ yeva pāpetū " ti.|| ||

"Idha Nigrodha,||
tapassī cātu-yāma-saɱvara-saɱvuto hoti.|| ||

Kathañ ca Nigrodha,||
tapassī cātu-yāma-saɱvara-saɱvuto hoti?

Idha Nigrodha,||
tapassī na pāṇam-atipāteti,||
na pāṇam-atipātāpayati,||
na pāṇam-atipātayato samanuñño hoti,||
na adinnaɱ ādiyati,||
na adinnaɱ ādiyāpeti,||
na adinnaɱ ādiyato samanuñño hoti,||
na musā bhaṇati,||
na musā bhaṇāpeti,||
na musā bhaṇato samanuñño hoti,||
na bhāvitam-āsiɱsati,||
na bhāvitam-āsiɱsāpeti,||
na bhāvitam-āsiɱsato samanuñño hoti.|| ||

Evaɱ kho Nigrodha,||
tapassī cātu-yāma-saɱvara-saɱvuto hoti.|| ||

Yato kho Nigrodha,||
tapassī cātu-yāma-saɱvara-saɱvuto hoti,||
aduɱ c'assa hoti tapassitāya,||
so abhiharati no hīnāy'āvattati.|| ||

So vivittaɱ senāsanaɱ bhajati,||
araññaɱ rukkha-mūlaɱ pabbataɱ kandaraɱ giri-guhaɱ susānaɱ vanapatthaɱ abbhokāsaɱ palāla-puñjaɱ.|| ||

So pacchā-bhattaɱ piṇḍapāta-paṭikkanto nisīdati pallaŋkaɱ ābhujitvā,||
ujuɱ kāyaɱ paṇidhāya,||
parimukhaɱ satiɱ upaṭṭhapetvā.|| ||

So abhijjhaɱ loke pahāya vigatābhijjhena cetasā viharati,||
abhijjhāya cittaɱ parisodheti;||
vyāpādapa-dosaɱ pahāya avyāpanna-citto viharati,||
sabba-pāṇabhūta-hitānukampī vyāpāda-padosā cittaɱ parisodheti;||
thīna-middhaɱ pahāya vigata-thīna-middho viharati,||
āloka-saññi sato sampajāno thīna-middhā cittaɱ parisodheti;||
uddhacca-kukkuccaɱ pahāya anuddhato viharati,||
ajjhattaɱ vūpasanta-citto uddhacca-kukkuccā cittaɱ parisodheti;||
vicikicchaɱ pahāya tiṇṇa-vicikiccho viharati,||
akathaɱ-kathi kusalesu dhammesu,||
vicikicchāya cittaɱ parisodheti.|| ||

17. So ime pañca nīvaraṇe pahāya cetaso upakkilese paññāya dubbalī-karaṇe,||
mettā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Karuṇā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Muditā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

Upekkhā-sahagatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthaɱ.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjena pharitvā viharati.|| ||

So aneka-vihitaɱ pubbe-nivāsaɱ anussarati,||
seyyathīdaɱ:|| ||

Ekam pi jātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsam pi jātiyo,||
tiɱsam pi jātiyo,||
cattārīsam pi jātiyo,||
paññāsam pi jātiyo,||
jāti-satam pi,||
jāti-sahassam pi,||
jāti-sata-sahassam pi,||
anekāni pi jāti-satāni,||
anekāni pi jāti-sahassāni,||
anekāni pi jāti-sata-sahassāni,||
aneke pi saɱvaṭṭakappe,||
aneke pi vivaṭṭakappe,||
aneke pi saɱvaṭṭa-vivaṭṭakappe:,||
amutrāsiɱ evaɱ-nāmo,||
evaɱgotto evaɱ-vaṇṇo,||
evam-āhāro,||
evaɱ-sukha-dukkha-paṭisaŋvedī,||
evam-āyu-pariyanto.|| ||

So tato cuto amutra udapādiɱ.|| ||

Tatrā p'āsiɱ||
evaɱ-nāmo,||
evaɱ-gotto,||
evaɱ-vaṇṇo,||
evam-āhāro,||
evaɱ-sukha-dukkha-paṭisaŋvedī,||
evam-āyu-pariyanto.|| ||

So tato cuto idhūpapanno ti.|| ||

Iti sākāraɱ sa-uddesaɱ [52] aneka-vihitaɱ pubbenivāsaɱ anussarati.|| ||

So dibbena cakkhunā visuddhena atikkanta-mānusakena satte passati cavamāne upapajjamāne,||
hīne paṇīte suvaṇṇe dubbaṇṇe sugate duggate yathā-kammūpage satte pajānāti:|| ||

'Ime vata bhonto sattā||
kāya-duccaritena samannāgatā,||
vacī-duccaritena samannāgatā,||
mano-duccaritena samannāgatā,||
ariyānaɱ upavādakā,||
micchā-diṭṭhikā,||
micchā-diṭṭhi-kamma-samādānā,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.|| ||

Ime vā pana bhonto sattā,||
kāya-sucaritena samannāgatā,||
vacī-sucaritena samannāgatā,||
mano-sucaritena samannāgatā,||
ariyānaɱ anupavādakā,||
sammā-diṭṭhikā,||
sammā-diṭṭhi-kamma-samādānā,||
te kāyassa bhedā param maraṇā sugatiɱ saggaɱ lokaɱ upapannā' ti.|| ||

Iti dibbena cakkhunā visuddhena atikkanta-mānusakena satte passati cavamāne upapajjamāne,||
hīne paṇīte suvaṇṇe dubbaṇṇe sugate duggate yathā-kammūpage satte pajānāti|| ||

Taɱ kim maññasi Nigrodha?|| ||

Yadi evaɱ sante tapo-jigucchā parisuddhā vā hoti,||
aparisuddhā vā" ti?|| ||

"Addhā kho bhante,||
evaɱ sante tapo-jigucchā parisuddhā hoti,||
no aparisuddhā,||
agga-ppattā ca,||
sāra-ppattā cā " ti.|| ||

"Ettavatā kho Nigrodha,||
tapo-jigucchā agga-ppattā ca hoti,||
sāra-ppattā ca.|| ||

Iti kho Nigrodha,||
yaɱ maɱ tvaɱ abacāsi 'ko nāma so bhante,||
Bhagavato dhammo yena Bhagavā sāvake vineti,||
yena Bhagavatā sāvakā vinītā assāsappattā paṭijānanti ajjhāsayaɱ ādibrahmacariyan' ti?|| ||

Iti ko taɱ Nigrodha,||
ṭhānaɱ uttaritarañ ca||
paṇītatarañ ca||
yenāhaɱ sāvake vinemi,||
yena mayā sāvakā vinītā assāsappattā paṭijānanti ajjhāsayaɱ ādibrahmacariyan ti.|| ||

Evaɱ vutte te paribbājakā unnādino uccāsadda-mahāsaddā ahesuɱ 'ettha mayaɱ anassāma sācariyakā,||
na mayaɱ ito bhīyyo uttaritaraɱ pajānāmā' ti.|| ||

 

§

 

[53] 20. Yadā aññāsi Sandhāno gahapati 'aññadatthu kho dān'ime añña-titthiyā paribbājakā Bhagavato bhāsitaɱ sussūsanti,||
sotaɱ odahanti,||
aññā-cittaɱ upaṭṭhapentī' ti.|| ||

Atha Nigrodhaɱ paribbājakaɱ etad avoca:|| ||

"Iti kho bhante Nigrodha,||
yaɱ maɱ tvaɱ avacāsi,||
'yagghe gahapati,||
jāneyyāsi kena Samaṇo Gotamo saddhiɱ sallapati?|| ||

Kena sākacchaɱ samāpajjati?|| ||

Kena paññā-veyyattiyaɱ samāpajjati?|| ||

Suññāgāra-hatā Samaṇassa Gotamassa paññā,||
aparisāvacaro Samaṇo Gotamo,||
nālaɱ sallāpāya,||
so antamantān'eva sevati.|| ||

Seyyathā pi nāma go-kāṇā pariyanta-cārinī antamantān'eva sevati,||
evam eva suññāgāra-hata Samaṇassa Gotamassa paññā,||
aparisāvacaro Samaṇo Gotamo,||
nālaɱ sallāpāya,||
so antamantān'eva sevati.|| ||

Iŋgha ca gahapati,||
Samaṇo Gotamo imaɱ parisaɱ āgaccheyya,||
eka-pañhen'eva naɱ saɱsādeyyāma,||
tucchakumbhī va naɱ maññe orodheyyāmā' ti.|| ||

Ayaɱ kho so bhante,||
Bhagavā arahaɱ Sammā-sambuddho idhānuppatto,||
aparisāvacaraɱ pana naɱ karotha,||
go-kāṇaɱ pariyanta-cāriniɱ karotha,||
eka-pañhen'eva naɱ saɱsādetha,||
tucchakumbhī va naɱ maññe orodhethā " ti.|| ||

Evaɱ vutte Nigrodho paribbājako tunhī-bhūto maŋkubhūto patta-kkhandho adhomuko pajjhāyanto appaṭibhāno nisīdi.|| ||

Atha kho Bhagavā Nigrodhaɱ paribbājakaɱ tunhī-bhūtaɱ maŋkubhūtaɱ patta-kkhavandhaɱ adhomukhaɱ pajjhāyantaɱ appaṭibhānaɱ viditvā Nigrodhaɱ paribbājakaɱ etad avoca:|| ||

"Saccaɱ Nigrodha, bhāsitā te esā vācā" ti?|| ||

[54] "Saccaɱ bhante, bhāsitā me esā vācā||
yathā bālena||
yathā mūḷhena||
yathā akusalenā" ti.|| ||

"Taɱ kim mañññasi Nigrodha?|| ||

Kin ti te sutaɱ paribbājakānaɱ vuḍḍhānaɱ mahallakānaɱ ācariya-pācariyānaɱ bhāsamānānaɱ —|| ||

Ye te ahesuɱ atītam addhānaɱ arahanto Sammā-sambuddhā,||
evaɱ su te Bhagavanto saŋgamma unnādino uccāsadda-mahāsaddā aneka-vihitaɱ tiracchāna-kathaɱ anuyuttā vihariɱsu,||
seyyathīdaɱ:|| ||

rāja-kathaɱ||
cora-kathaɱ||
mahāmatta-kathaɱ||
senā-kathaɱ||
bhaya-kathaɱ||
yuddha-kathaɱ||
anna-kathaɱ||
pāna-kathaɱ||
vattha-kathaɱ||
sayana-kathaɱ||
mālā-kathaɱ||
gandha-kathaɱ||
ñāti-kathaɱ||
yāna-kathaɱ||
gāma-kathaɱ||
nigama-kathaɱ||
nagara-kathaɱ||
janapada-kathaɱ||
itthi-kathaɱ||
purisa-kathaɱ||
sūra-kathaɱ||
visikhā-kathaɱ||
kumbhaṭṭhāna-kathaɱ||
pubba-peta-kathaɱ||
nānatta-kathaɱ||
lokakkhāyikaɱ-kathaɱ||
samuddakkhāyikaɱ-kathaɱ||
iti-bhavābhava-kathaɱ kathaɱ iti vā,||
seyyathā pi tvaɱ etarahi sācariyako?|| ||

Udāhu evaɱ su te Bhagavanto araññe vanapatthāni pantāni senāsanāni paṭisevanti appa-saddāni appa-nigghosāni vijana-vātāni manussa-rāhaseyyakāni paṭisallānasāruppāni seyyathā pāhaɱ etarahī" ti?|| ||

"Sutaɱ me taɱ bhante,||
paribbājakānaɱ vuḍḍhānaɱ mahallakānaɱ ācariya-pācariyānaɱ bhāsamānānaɱ —|| ||

'Ye te ahesuɱ atītam addhānaɱ arahanto Sammā-sambuddhā,||
nāssu te Bhagavanto saŋgamma samāgamma unnādino uccāsadda-mahāsaddā aneka-vihitaɱ tiracchāna-kathaɱ anuyuttā viharanti,||
seyyathīdaɱ:|| ||

rāja-kathaɱ||
cora-kathaɱ||
mahāmatta-kathaɱ||
senā-kathaɱ||
bhaya-kathaɱ||
yuddha-kathaɱ||
anna-kathaɱ||
pāna-kathaɱ||
vattha-kathaɱ||
sayana-kathaɱ||
mālā-kathaɱ||
gandha-kathaɱ||
ñāti-kathaɱ||
yāna-kathaɱ||
gāma-kathaɱ||
nigama-kathaɱ||
nagara-kathaɱ||
janapada-kathaɱ||
itthi-kathaɱ||
purisa-kathaɱ||
sūra-kathaɱ||
visikhā-kathaɱ||
kumbhaṭṭhāna-kathaɱ||
pubba-peta-kathaɱ||
nānatta-kathaɱ||
lokakkhāyikaɱ-kathaɱ||
samuddakkhāyikaɱ-kathaɱ||
iti-bhavābhava-kathaɱ kathaɱ iti vā,||
seyyathā pāhaɱ etarahi sācariyako,||
evaɱ su te Bhagavanto araññe vanapatthāni pantāni senāsanāni paṭisevanti appa-saddāni appa-nigghosāni senāsanāni manussa-rāhaseyyakāni paṭisallānasāruppāni seyyathā pi Bhagavā etarahī" ti.|| ||

"Tassa te Nigrodha,||
viññussa sato mahallakassa na etad ahosi:|| ||

'Buddho so Bhagavā bodhāya dhammaɱ deseti,||
danto so Bhagavā damathāya dhammaɱ deseti,||
santo so Bhagavā samathāya dhammaɱ deseti,||
tiṇṇo so Bhagavā [55] taraṇāya dhammaɱ deseti,||
parinibbuto so Bhagavā parinibbānāya dhammaɱ deseti" ti?|| ||

 

§

 

22. Evaɱ vutte Nigrodho paribbājako Bhagavantaɱ etad avoca:|| ||

"Accayo me bhante,||
accagamā,||
yathā bālaɱ,||
yathā mūḷhaɱ,||
yathā akusalaɱ,||
so'haɱ Bhagavantaɱ avacāsiɱ.|| ||

Tassa me bhante,||
Bhagavā accayaɱ accayato paṭigaṇhātu āyatiɱ saɱvarāyā" ti.|| ||

"Taggha tvaɱ Nigrodha,||
accayo accagamā,||
yathā bālaɱ,||
yathā mūḷhaɱ,||
yathā akusalaɱ,||
yo maɱ tvaɱ evaɱ avacāsi,||
yato ca kho tvaɱ Nigrodha,||
accayaɱ accayato disvā yathā-kammaɱ paṭikarosi,||
tan te mayaɱ paṭigaṇhāma,||
vuddhi h'esā Nigrodha,||
Ariyassa vinaye,||
yo accayaɱ accayato disvā yathā-dhammaɱ paṭikaroti,||
āyatiɱ saɱvaraɱ āpajjati.|| ||

Ahaɱ kho pana Nigrodha,||
evaɱ vadāmi:|| ||

'Etu viññū puriso asaṭho amāyāvī uju-jātiko,||
aham anusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati satta vassāni.|| ||

Tiṭṭhantu Nigrodha, satta vassāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati cha vassāni.|| ||

Tiṭṭhantu Nigrodha cha vassāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati pañca vassāni.|| ||

Tiṭṭhantu Nigrodha pañca vassāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati cattāri vassāni.|| ||

Tiṭṭhantu Nigrodha cattāri vassāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati tīṇi vassāni.|| ||

Tiṭṭhantu Nigrodha, tīṇi vassāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati dve vassāni.|| ||

Tiṭṭhantu Nigrodha, dve vassāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati ekaɱ vassaɱ.|| ||

Tiṭṭhatu Nigrodha, ekaɱ vassaɱ.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati satta māsāni.|| ||

Tiṭṭhantu Nigrodha, satta māsāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati cha māsāni.|| ||

Tiṭṭhantu Nigrodha, cha māsāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati pañca māsāni.|| ||

Tiṭṭhantu Nigrodha, pañca māsāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati [56] cattāri māsāni.|| ||

Tiṭṭhantu Nigrodha, cattāri māsāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati tīṇi māsāni.|| ||

Tiṭṭhantu Nigrodha, tīṇi māsāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati dve māsāni.|| ||

Tiṭṭhantu Nigrodha, dve māsāni.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati ekamāsaɱ.|| ||

Tiṭṭhatu Nigrodha, ekamāsaɱ.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati aḍḍhamāsaɱ.|| ||

Tiṭṭhatu Nigrodha, aḍḍhamāso.|| ||

Etu viññū puriso asaṭho amāyāvī ujujātiko,||
ahamanusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno yass'atthāya kula-puttā samma-d eva agārasmā anagāriyaɱ pabbajanti,||
tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja viharissati sattāhaɱ.|| ||

 

§

 

23. Siyā kho pana te Nigrodha,||
evam assa:|| ||

'Antevāsikamyatā no Samaṇo Gotamo evam āhā' ti.|| ||

Na kho pan'etaɱ Nigrodha,||
evaɱ daṭṭhabbaɱ,||
yo eva vo ācariyo||
so eva vo ācariyo hotu.|| ||

Siyā kho pana te Nigrodha,||
evam assa:|| ||

'Uddesā no cāvetu-kāmo Samaṇo Gotamo evam āhā' ti.|| ||

Na kho pan'etaɱ Nigrodha,||
evaɱ daṭṭhabbaɱ,||
yo eva vo uddeso,||
so eva vo uddeso hotu.|| ||

Siyā kho pana te Nigrodha,||
evam assa:|| ||

'Ājīvā no cāvetu-kāmo Samaṇo Gotamo evam āhā' ti.|| ||

Na kho pan'etaɱ Nigrodha,||
evaɱ daṭṭhabbaɱ||
yo eva vo ājīvo||
so eva vo ājīvo hotu.|| ||

Siyā kho pana te Nigrodha,||
evam assa:|| ||

'Ye no dhammā akusalā akusala-saŋkhātā sācariyakānaɱ,||
tesu patiṭṭhāpetu-kāmo Samaṇo Gotamo evam āhā' ti.|| ||

Na kho pan'etaɱ Nigrodha,||
evaɱ daṭṭhabbaɱ,||
akusalā c'eva vo dhammā hontu||
akusala-saŋkhātā sācariyakānaɱ.|| ||

Siyā kho pana te Nigrodha,||
evam assa:|| ||

'Ye no dhammā kusalā kusala-saŋkhātā sācariyakānaɱ,||
tehi vivecetu-kāmo Samaṇo Gotamo evam āhā' ti.|| ||

Na kho pan'etaɱ Nigrodha,||
evaɱ daṭṭhabbaɱ,||
kusalā c'eva vo dhammā hontu||
kusala-saŋkhātā sācariyakānaɱ.|| ||

Iti kho'haɱ Nigrodha,||
n'eva antevāsi-kamyatā evaɱ vadāmi,||
na pi uddesā cāvetu-kāmo [57] evaɱ vadāmi.|| ||

Na pi ājīvā cāvetu-kāmo evaɱ vadāmi,||
na pi ye vo dhammā akusalā akusala-saŋkhātā sācariyakānaɱ tesu patiṭṭhāpetu-kāmo evaɱ vadāmi,||
na pi ye vo dhammā kusalā kusala-saŋkhātā sācariyakānaɱ tehi vivecetu-kāmo evaɱ vadāmi.|| ||

Santi ca kho Nigrodha,||
akusalā dhammā appahīṇā saɱkilesikā ponobhavikā sadarā dukkha-vipākā āyatiɱ jāti-jarā-maraṇiyā,||
yesāhaɱ pahānāya dhammaɱ desemi,||
yathā paṭipannānaɱ vo saɱkilesikā dhammā pahiyissanti,||
vodāniyā dhammā abhivaḍḍhassanti,||
paññāpāripūriɱ vepullattañ ca diṭṭhe va dhamme sayaɱ abhiññā sacchikatvā upasampajja viharissathā" ti.|| ||

24. Evaɱ vutte te paribbājakā tuṇhī-bhūtā maŋkubhūtā patta-kkhandhā adho-mukhā pajjhāyantā appaṭibhāṇā nisidiɱsu,||
yathā taɱ Mārena pariyuṭṭhita-cittā.|| ||

Atha kho Bhagavato etad ahosi:|| ||

'Sabbe p'ime moghapurisā phuṭṭhā Pāpimatā,||
yatra hi nāma ekassa pi na evaɱ bhavissati —||
"Handa mayaɱ aññāṇattham pi Samaṇe Gotame brahmacariyaɱ carāma,||
kiɱ karissati sattāho" ti?|| ||

Atha kho Bhagavā Udumbarikāya paribbājakārāme sīhanādaɱ naditvā,||
vehāsaɱ ababhuggantvā,||
Gijjha-kūṭe pabbate paccuṭṭhāsi.|| ||

Sandhāno gahapati tāvad eva Rājagahaɱ pāvisī ti.|| ||

Udumbarikasuttaɱ niṭṭhitaɱ dutiyaɱ.|| ||


Contact:
E-mail
Copyright Statement   Webmaster's Page