Digha Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Dīgha Nikāya

Sutta 33

Saŋgīti Suttantaɱ

Adapted from the digital version of the Sri Lanka Buddha Jayanti Tripitaka Series

 


 

[Nidana][pts][wp][bd] EVAṂ ME SUTAṂ:

Ekaɱ samayaɱ Bhagavā Mallesu cārikaɱ caramāno mahatā bhikkhu-saŋghena saddhiɱ pañca-mattehi bhikkhu-satehi yena Pāvā nāma Mallānaɱ nagaraɱ tad avasarī. Tatra sudaɱ Bhagavā Pāvāyaɱ viharati Cundassa kammāra-puttassa amba-vane.

Tena kho pana samayena Pāveyyakānaɱ Mallānaɱ Ubbhatakaɱ nama navaɱ santhāgāraɱ acira-kāritaɱ hoti anajjhāvutthaɱ Samaṇena vā Brāhmaṇena vā kenaci vā manussa-bhūtena. Assosuɱ kho Pāveyyakā Mallā: Bhagavā kira Mallesu cārikaɱ caramāno mahatā bhikkhu-saŋghena saddhiɱ pañca-mattehi bhikkhu-satehi Pāvaɱ anuppatto Pāvāyaɱ viharati Cundassa kammāra-puttassa amba-vane' ti. Atha kho Pāveyyakā Mallā yena Bhagavā ten'upasaŋkamisu, upasaŋkamitvā Bhagavantaɱ abhivādetvā eka-m-antaɱ nisīdiɱsu. Eka-m-antaɱ nisinnā kho Pāveyyakā Mallā Bhagavantaɱ etada vocuɱ:

'Idha bhante Pāveyyakānaɱ Mallānaɱ Ubbhatakaɱ nama navaɱ santhāgāraɱ acira-kāritaɱ anajjhāvutthaɱ Samaṇena vā Brāhmaṇena vā kenaci vā manussa-bhūtena. [208] Taɱ bhante Bhagavā paṭhamaɱ paribhuñjatu, Bhagavatā paṭhamaɱ paribhuttaɱ paccā Pāveyyakānaɱ Mallānaɱ dīgha-rattaɱ hitāya sukhāyā' ti.

Adhivāsesi Bhagavā tuṇhībhāvena.

Atha kho Pāveyyakā Mallā Bhagavato adivāsanaɱ viditvā, uṭṭhāy'āsanā Bhagavantaɱ abhivādetvā, padakkhiṇaɱ katvā yena santhāgāraɱ ten'upasaŋkamiɱsu, upasaŋkamitvā sabba-santhariɱ santhāgaraɱ santharāpetvā āsanāni paññapetvā, udaka-maṇikaɱ patiṭṭhapetvā, telappadīpaɱ āropetvā, yena Bhagavā ten'upasaŋkamiɱsu. Upasaŋkamitvā Bhagavantaɱ abhivādetvā eka-m-antaɱ aṭṭhaɱsu. Eka-m-antaɱ ṭhitā kho te Pāveyyakā Mallā Bhagavantaɱ etad avocuɱ:

'Sabba-santhariɱ santhataɱ bhante santhāgāraɱ, āsanāni paññattāni, udaka-maṇiko patiṭṭhāpito, telappadīpo āropito, yassa'dāni bhante Bhagavā kālaɱ maññatī' ti.

Atha kho Bhagavā nivāsetvā patta-cīvaram ādāya saddhiɱ bhikkhu-saŋghena yena santhāgāraɱ ten'upasaŋkami. Upasaŋkamitvā pāde pakkhāletvā santhāgāraɱ pavisitvā majjhimaɱ-thamhaɱ nissāya puratthābhimukho nisīdi. Bhikkhu-saŋgho pi pāde pakkhāletvā sathāgāraɱ pavisitvā pacchimaɱ bhittiɱ nissāya puratthā- [209] bhimukho nisīdi Bhagavantaɱ yeva purakkhatvā. Pāveyyakā pi kho Mallā pāde pakkhāletvā santhāgāraɱ pavisitvā puratthimaɱ bhittiɱ nissāya pacchābhimukhā nisīdiɱsu Bhagavantaɱ yeva purakkhatvā. Atha kho Bhagavā Pāveyyake Malle bahud evā rattiɱ dhmmiyā kathāya sandassetvā samādapetvā samuttejetvā sampahaɱsetvā uyyojesi:

'Abhikkantā kho Vāseṭṭhā ratti, yassa dāni tumhe kālaɱ maññathā' ti.

'Evaɱ bhante' ti kho Pāveyyakā Mallā Bhagavato paṭissutvā uṭṭhāy'āsanā Bhagavantaɱ abhivādetvā padakkhiṇaɱ katvā pakkamiɱsu.

Atha kho Bhagavā acira-pakkantesu Mallesu tuṇhī-bhūtaɱ tuṇhī-bhūtaɱ bhikkhu-saŋghaɱ anuviloketvā āyasmantaɱ Sāriputtaɱ āmantesi:

'Vigata-thina-middho kho Sāriputta bhikkhu-saŋgho, paṭibhātu taɱ Sāriputta bhikkhūnaɱ dhammi-kathā. Piṭṭhi me āgilāyati, tam ahaɱ āyamissāmī" ti.

'Evaɱ bhante' ti kho āyasmā Sāriputto Bhagavato paccassosi.

Atha kho Bhagavā catugguṇaɱ sanghāṭiɱ paññapetvā dakkiṇena passena sīha-seyyaɱ kappesi, pāde pādaɱ accādhāya sato sampajāno uṭṭhāna-saññaɱ manasi-karitvā.

Tena kho pana samayena Nigaṇṭho Nāta-putto [210] Pāvāyaɱ adhunā kālakato hoti. Tassa kāla-kiriyāya bhinnā Nigaṇṭhā dvedhika-jātā bhaṇḍana-jātā kalaha-jātā vivādāpannā aññamaññaɱ mukha-sattīhi vitudantā viharanti: 'Na tvaɱ imaɱ Dhamma-Vinayaɱ ājānāsi!' 'Ahaɱ imaɱ dhamma-viyanaɱ ājānāmi! Kiɱ tvaɱ imaɱ Dhamma-Vinayaɱ ājānissasi? Micchā-paṭipanno tvam asi, aham asmi sammā-paṭipanno sahitam me asaɱhitan te, pure vacanīyaɱ pacchā avaca, pacchā vacanīyaɱ pure avaca, āvicinnan te viparāvattaɱ, āropito te vādo, niggahito'si, cara vāda-ppamokkhāya, nibbeṭhehi va sace pahosī' ti. Vadho yeva kho maññe Nigaṇṭhesu Nāta-puttiyesu vattati. Ye pi te Nigaṇṭhassa Nātaputtassa sāvakā gihī odāta-vasanā, te pi Nigaṇṭhesu Nāta-puttiyesu nibbinna-rūpā paṭivāna-rūpā yathā taɱ durakkhāte dhamma-vinaye duppavedite aniyyānike anupasama-saɱvattanike asammāsamBuddha-ppavadite bhinna-thūpe appaṭisaraṇe.

Atha kho āyasmā Sāriputto bhikkhū āmantesi:

Nigaṇṭho āvuso Nāta-putto Pāvāyaɱ adhunā kālakato hoti. Tassa kāla-kiriyāya bhinnā Nigaṇṭhā dvedhika-jātā bhaṇḍana-jātā kalaha-jātā vivādāpannā aññamaññaɱ mukha-sattīhi vitudantā viharanti: 'Na tvaɱ imaɱ Dhamma-Vinayaɱ ājānāsi!' 'Ahaɱ imaɱ dhamma-viyanaɱ ājānāmi! Kiɱ tvaɱ imaɱ Dhamma-Vinayaɱ ājānissasi? Micchā-paṭipanno tvam asi, aham asmi sammā-paṭipanno sahitam me asaɱhitan te, pure vacanīyaɱ pacchā avaca, pacchā vacanīyaɱ pure avaca, āvicinnan te viparāvattaɱ, āropito te vādo, niggahito'si, cara vāda-ppamokkhāya, nibbeṭhehi va sace pahosī' ti. Vadho yeva kho maññe Nigaṇṭhesu Nāta-puttiyesu vattati. Ye pi te Nigaṇṭhassa Nātaputtassa sāvakā gihī odāta-vasanā, te pi Nigaṇṭhesu Nāta-puttiyesu nibbinna-rūpā paṭivāna-rūpā yathā taɱ durakkhāte dhamma-vinaye duppavedite aniyyānike anupasama-saɱvattanike asammāsamBuddha-ppavadite bhinna-thūpe appaṭisaraṇe. Evaɱ h'etaɱ āvuso hoti durakkhāte dhamma-vinaye duppavedite aniyyānike anupasama-saɱvattanike asammāsamBuddha-ppavedite. [211] Ayaɱ kho pana āvuso asmhākaɱ Bhagavatā dhammo svākkhāto suppavedito niyyāniko upasama-saɱvattaniko SammāSamBuddha-ppavedito. Tattha sabbeh'eva saŋgāyitabbaɱ na vivaditabbaɱ, yathayidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.

Katamo c'āvuso asmhākaɱ Bhagavatā dhammo svākkhāto suppavedito niyyāniko upasama-saɱvattaniko SammāSamBuddha-ppavedito, yattha sabbeh'eva saŋgāyitabbaɱ na vivaditabbaɱ, yathayidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.

Ekakaɱ

Atthi kho āvuso tena Bhagavatā jānatā passatā arahatā SammāSambuddhena eko dhammo sammad-akkhāto. Tattha sabbeh'eva saŋgāyitabbaɱ na vivaditabbaɱ, yatha-yidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.

[1.01][pts][wp][bd] Katamo eko dhammo?|| ||

Sabbe sattā āhāra-ṭṭhitikā|| ||

[1.02][pts][wp][bd] Sabbe sattā sankhāra-ṭṭhitikā.

Ayaɱ kho āvuso tena Bhagavatā jānatā passatā arahatā SammāSambuddhena eko dhammo sammad-akkhāto. Tattha sabbeh'eva saŋgāyitabbaɱ na viva- [212] ditabbaɱ, yathayidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.

Dukaɱ

Atthi kho āvuso tena Bhagavatā jānatā passatā arahatā SammāSambuddhena dve dhammo sammad-akkhāto. Tattha sabbeh'eva saŋgāyitabbaɱ na vivaditabbaɱ, yatha-yidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.

Katame dve?

[2.01][pts][wp][bd] Nāmañ ca rūpañ ca

[2.02][pts][wp][bd] Avijjā ca bhava-taṇhā ca

[2.03][pts][wp][bd] Bhava-diṭṭhi ca vibhava-diṭṭhi ca

[2.04][pts][wp][bd] Ahirikañ ca anottappañ ca

[2.05][pts][wp][bd] Hiri ca ottappañ ca

[2.06][pts][wp][bd] Dovacassatā ca pāpa-mittatā ca,

[2.07][pts][wp][bd] Sovacassatā ca kalyāṇa-mittatā ca

[2.08][pts][wp][bd] Āpatti-kusalatā ca āpatti-vuṭṭhāna-kusalatā ca

[2.09][pts][wp][bd] Samāpatti-kusalatā ca samāpatti-vuṭṭhānau-kusalatā ca

[2.10][pts][wp][bd] Dhātu-kusalatā ca manasikāra-kusalatā ca

[2.11][pts][wp][bd] Āyatana-kusalatā ca paṭiccasamuppāda-kusalatā ca

[2.12][pts][wp][bd] Ṭhāna-kusalatā ca aṭṭhāna-kusalatā ca

[213][2.13][pts][wp][bd] Ajjavañ ca lajjavañ ca

[2.14][pts][wp][bd] Khantī ca soraccañ ca

[2.15][pts][wp][bd] Sākhalyañ ca paṭisathāro ca

[2.16][pts][wp][bd] Avihiɱsā ca soceyyañ ca

[2.17][pts][wp][bd] Muṭṭhasaccañ ca asampajaññañ ca

[2.18][pts][wp][bd] Sati ca sampajañññ ca

[2.19][pts][wp][bd] Indriyesu agutta-dvāratā ca bhojane amattaññutā ca

[2.20][pts][wp][bd] Indriyesu gutta-dvāratā ca bhojane mattaññutā ca

[2.21][pts][wp][bd] Paṭisaŋkhāna-balañ-ca bhāvanā-balañ ca

[2.22][pts][wp][bd] Sati-balañ ca samādhi-balañ ca

[2.23][pts][wp][bd] Samatho ca vipassanā ca

[2.24][pts][wp][bd] Samatha-nimittañ ca paggaha-nimittañ ca

[2.25][pts][wp][bd] Paggāho ca avikkhepo ca

[2.26][pts][wp][bd] Sīla-sampadā ca diṭṭhi-sampadā ca

[2.27][pts][wp][bd] Sīla-vipatti ca diṭṭhi-vipatti ca

[214][2.29][pts][wp][bd] Sīla-visuddhi ca diṭṭhi-visuddhi ca

[2.29][pts][wp][bd] Diṭṭhi-visuddhi kho pana yathā diṭṭhi'ssa ca padhānaɱ

[2.30][pts][wp][bd] Saɱvego ca saɱvejanīyesu ṭhānesu saɱviggassa ca yoniso padhānaɱ.

[2.31][pts][wp][bd] Asantuṭṭhitā ca kusalesu dhammesu appaṭivānitā ca padhānasmiɱ

[2.32][pts][wp][bd] Vijjā ca vimutti ca

[2.33][pts][wp][bd] Khaye ñāṇaɱ anuppāde ñāṇaɱ

Ime kho āvuso tena Bhagavatā jānatā passatā arahatā SammāSambuddhena dve dhammo sammad-akkhāto. Tattha sabbeh'eva saŋgāyitabbaɱ na vivaditabbaɱ, yathayidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.


 [Ones and Twos]  [Threes]  [Fours]  [Fives]  [Sixes]  [Sevens]  [Eights]  [Nines]  [Tens]


Contact:
E-mail
Copyright Statement   Webmaster's Page