Digha Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Dīgha Nikāya

Sutta 33

Saŋgīti Suttantaɱ

Adapted from the digital version of the Sri Lanka Buddha Jayanti Tripitaka Series

 


 

Atthi kho āvuso tena Bhagavatā jānatā passatā arahatā SammāSambuddhena tayo dhammo sammad-akkhāto. Tattha sabbeh'eva saŋgāyitabbaɱ na vivaditabbaɱ, yatha-yidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.

Katame tayo?

[3.01][pts][wp][bd] Tīni akusala-mūlāni:
Lobho akusala-mūlaɱ, doso akusala-mūlaɱ, moho akusala-mūlaɱ.

[3.02][pts][wp][bd] Tīṇi kusala-mūlāni:
Alobho kusala-mūlaɱ, adoso kusala-mūlaɱ, amoho kusala-mūlaɱ.

[3.03][pts][wp][bd] Taṇi duccaritāni:
Kāya-duccaritaɱ, vacī-duccaritaɱ, mano-duccaritaɱ.

[3.04][pts][wp][bd] [215] Tīṇi sucaritāni:
Kāya-sucaritaɱ, vacī-sucaritaɱ , mano-sucaritaɱ.

[3.05][pts][wp][bd] Tayo akusala-vitakkā:
Kāma-vitakko, vyāpāda-vitakko, vihiɱsā-vitakko.

[3.06][pts][wp][bd] Tayo kusalavitakkā:
Nekkhamma-vitakko, avyāpāda-vitakko, avihiɱsā-vitakko.

[3.07][pts][wp][bd] Tayo akusala-saɱkappā:
Kāma-saɱkappo, vyāpāda-saɱkappo, vihiɱsā-saɱkappo.

[3.08][pts][wp][bd] Tayo kusala-saɱkappā:
Nekkhamma-saɱkappo, avyāpāda-saɱkappo, avihiɱsā-saɱkapo.

[3.09][pts][wp][bd] Tisso akusala-saññā:
Kāma-saññā, vyāpāda-saññā, vihiɱsā-saññā.

[3.10][pts][wp][bd] Tisso kusala-saññā:
Nekkhamma-saññā, avyāpāda-saññā, avihiɱsā-saññā.

[3.11][pts][wp][bd] Tisso akusala-dhātuyo:
Kāma-dhātu, vyāpāda-dhātu, vihiɱsā-dhātu.

[3.12][pts][wp][bd] Tisso kusala-dhātuyo:
Nekkhamma-dhātu, avyāpāda-dhātu, avihiɱsā-dhātu.

[3.13][pts][wp][bd] Aparā pi tisso dhātuyo:
Kāma-dhātu, rūpa-dhātu, arūpa-dhātu.

[3.14][pts][wp][bd] Aparā pi tisso dhātuyo:
Rūpa-dhātu, arūpa-dhātu, nirodha-dhātu.

[3.15][pts][wp][bd] Aparā pi tisso dhātuyo:
Hīna dhātu, majjhima dhātu, paṇīta dhātu.

[3.16][pts][wp][bd] [216] Tisso taṇhā:
Kāma-taṇhā, bhava-taṇhā, vibhava-taṇhā.

[3.17][pts][wp][bd] Aparā pi tisso taṇhā:
Kāma-taṇhā, rūpa-taṇhā, arūpa-taṇhā.

[3.18][pts][wp][bd] Aparā pi tisso taṇhā:
Rūpa-taṇhā, arūpa-taṇhā, nirodha-taṇhā.

[3.19][pts][wp][bd] Tīṇi saɱyojanāni:
Sakkāya-diṭṭhi, vicikicchā, sīlabbata-parāmāso.

[3.20][pts][wp][bd] Tayo āsavā:
Kāmāsavo, bhavāsavo, avijjāsavo.

[3.21][pts][wp][bd] Tayo bhavā:
Kāma-bhavo, rūpa-bhavo, arūpa-bhavo.

[3.22][pts][wp][bd] Tisso esanā:
Kāmesanā, bhavesanā, brahmacariyesanā.

[3.23][pts][wp][bd] Tisso vidhā:
'Seyyo'ham asmī' ti vidhā. 'Sadiso'ham asmī' ti vidhā. 'Hīno'ham asmī' ti vīdhā.

[3.24][pts][wp][bd] Tayo addhā:
Atīto addhā, anāgato addhā, paccuppanno addhā.

[3.25][pts][wp][bd] Tayo antā:
Sakkāyo anto, sakkāya-samudayo anto, sakkāya-nirodho anto.

[3.26][pts][wp][bd] Tisso vedanā:
Sukhā vedanā, dukkhā vedanā, adukkha-m-asukhā vedanā.

[3.27][pts][wp][bd] Tisso dukkhatā:
Dukkha-dukkhatā, sankhāra-dukkhatā, vipariṇāma-dukkhātā.

[3.28][pts][wp][bd] [217] Tayo rāsī:
Micchatta-niyato rāsi, sammatta-niyato rāsi, aniyato rāsi.

[3.29][pts][wp][bd] Tisso kaŋkhā:
Atītaɱ vā addhānaɱ ārabbha kaŋkhati vicikicchati nādhimuccati na sampasīdati. Anāgataɱ vā addhānaɱ ārabbha kaŋkhati vicikicchati nādhimuccati na sampasīdati. Etarahi vā paccuppannaɱ addhānaɱ ārabbha kaŋkhati vicikicchati nādhimuccati na sampasīdati.

[3.30][pts][wp][bd] Tīni Tathāgatassa arakkheyyāni:
Parisuddha-kāya-samācāro āvuso Tathāgato, n'atthi Tathāgatassa kāya-duccaritaɱ yaɱ Tathāgato rakkheyya 'Mā me idaɱ paro aññāsī' ti.
Parisuddha-vacī-samācāro āvuso Tathāgato, n'atthi Tathāgatassa vacī-duccaritaɱ yaɱ Tathāgato rakkheyya 'Mā me idaɱ paro aññāsī' ti.
Parisuddha-mano-samācāro āvuso, Tathāgato, n'atthi Tathāgatassa mano-duccaritaɱ yaɱ Tathāgato rakkheyya 'Mā me idaɱ paro aññāsī' ti.

[3.31][pts][wp][bd] Tayo kiñcanā:
Rāgo kiñcanaɱ, doso kiñcanaɱ, moho kiñcanaɱ.

[3.32][pts][wp][bd] Tayo aggī:
Rāgaggī, dosaggi, mohaggi.

[3.33][pts][wp][bd] Apare'pi tayo aggī:
Āhuneyyaggi, gahapataggi, dakkiṇeyyaggi.

[3.34][pts][wp][bd] Tividhena rūpa-saŋgaho:
Sanidassana-sappaṭighaɱ rūpaɱ, anidassana-sappaṭighaɱ rūpaɱ, anidassana-appaṭighaɱ rūpaɱ.

[3.35][pts][wp][bd] Tayo sankhārā:
Puññābhisankhāro, apuññābhisankhāro, āneñjābhisankhāro.

[3.36][pts][wp][bd] [218] Tayo puggalā:
Sekkho puggalo, asekkho puggalo, n'eva sekkho nāsekkho puggalo.

[3.37][pts][wp][bd] Tayo therā:
Jāti-thero, dhamma-thero, sammati-thero.

[3.38][pts][wp][bd] Tīṇi puñña-kiriya-vatthūni:
Dāna-mayaɱ puñña-kiriya-vatthu, sīla-mayaɱ puñña-kiriya-vatthu, bhāvanā-mayaɱ puñña-kiriya-vatthu.

[3.39][pts][wp][bd] Tīṇi codanā-vatthūni:
Diṭṭhena, sutena, parisaɱkāya.

[3.40][pts][wp][bd] Tisso kāmūpapattiyo:
Sant'āvuso sattā paccupaṭṭhita-kāmā, te paccupaṭṭhitesu kāmesu vasaɱ vattenti seyyathā pi manussā ekacco ca devā ekacce ca vinipātikā. Ayaɱ paṭhamā kāmūpapatti.
Sant'āvuso sattā nimmita-kāmā, te nimminitvā nimminitvā kāmesu vasaɱ vattenti seyyathā pi devā Nimmāṇa-ratī. Ayaɱ dutiyā kāmūpapatti.
Sant'āvuso sattā para-nimmita-kāmā. te para-nimmitesu kāmesu vasaɱ vattenti, seyyathā pi devā Paranimmita-vasavattī. Ayaɱ tatiyā kāmūpapatti.

[3.41][pts][wp][bd] Tisso sukhūpapattiyo:
Sant'āvuso sattā uppādetvā uppādetvā sukhaɱ viharanti, seyyathā pi devā Brahma-kāyikā. Ayaɱ paṭhamā sukhūpapatti.
Sant'āvuso sattā sukhena abhi'ssannā parissannā paripūrā paripphuṭā, te kadāci karahaci udānaɱ udānenti 'Aho sukhaɱ aho sukhan' ti, seyyathā pi devā Ābhassarā. Ayaɱ dutiyā sukhūpapatti.
Sant'āvuso sattā sukhena abhi'ssannā parissannā paripūrā paripphuṭā, tesan tam yeva tusitā [219] sukhaɱ paṭisaŋvedenti, seyyathā pi devā Subhakiṇhā. Ayaɱ tatiyā sukhūpapatti.

[3.42][pts][wp][bd] Tisso paññā:
Sekkhā paññā, asekkhā paññā, n'eva sekkhā nāsekkhā paññā.

[3.43][pts][wp][bd] Aparā pi tisso paññā:
Cintā-mayā paññā, suta-mayā paññā bhāvanā-mayā paññā.

[3.44][pts][wp][bd] Tīṇ'āvudhāni:
Sutāvudhaɱ, pavivekāvudhaɱ, paññāvudhaɱ.

[3.45][pts][wp][bd] Tīṇ'indriyāni:
Anaññātaɱ-ñassāmītindriyaɱ, aññindriyaɱ, aññātāvindriyaɱ.

[3.46][pts][wp][bd] Tīṇi cakkhuni:
Maɱsa-cakkhu, dibba-cakkhu, paññā-cakkhu.

[3.47][pts][wp][bd] Tisso sikkhā:
Adhisīla-sikkhā, adhicitta-sikkhā, adhipaññā-sikkhā.

[3.48][pts][wp][bd] Tisso bhāvanā:
Kāya-bhāvanā, citta-bhāvanā, paññā-bhāvanā.

[3.49][pts][wp][bd] Tīṇanuttariyāni:
Dassanānuttariyaɱ, paṭipadānuttariyaɱ, vimuttānuttariyaɱ.

[3.50][pts][wp][bd] Tayo samādhi:
Savitakko savicāro samādhi, avitakko vicāra-matto samādhi, avitakko avicāro sāmādhi.

[3.51][pts][wp][bd] Apare pi tayo samādhi:
Suññato samādhi, animitto samādhi, appaṇihito samādhi.

[3.52][pts][wp][bd] Tīṇi soceyyāni:
Kāya-soceyyaɱ vacī-soceyyaɱ mano-soceyyaɱ.

[3.53][pts][wp][bd] [220] Tīṇi moneyyāni:
Kāya-moneyyaɱ, vacī-moneyyaɱ, mano-moneyyaɱ.

[3.54][pts][wp][bd] Tīṇi kosallāni:
Āya-kosallaɱ apāya-kosallaɱ upāya-kosallaɱ.

[3.55][pts][wp][bd] Tayo madā:
Ārogya-mado yebbana-mado jīvita-mado.

[3.56][pts][wp][bd] Tīṇādhipateyyāni:
Attādhipateyyaɱ, lokādhipateyyaɱ, dhammādhipateyyaɱ.

[3.57][pts][wp][bd] Tīṇi kathā-vatthūni:
Atītaɱ vā addhānaɱ ārabbha kathaɱ katheyya: 'Evaɱ ahosi atītaɱ addhānan' ti. Anāgataɱ vā addhānaɱ ārabbha kathaɱ katheyya: 'Evaɱ bhavissati anāgataɱ addhānan' ti. Etarahi vā paccuppannaɱ adhānaɱ ārabbha kathaɱ katheyya: 'Evaɱ hoti etarahi paccuppannaɱ' ti.

[3.58][pts][wp][bd] Tisso vijjā:
Pubbe-nivāsānussati-ñāṇaɱ vijjā, sattānaɱ cutūpapāte ñāṇaɱ vijjā, āsavānaɱ khaye ñāṇaɱ vijjā.

[3.59][pts][wp][bd] Tayo vihārā:
Dibbo vihāro, Brahma-vihāro, ariyo vihāro.

[3.60][pts][wp][bd] Tīṇi pāṭihāriyāni:
Iddhi-pāṭihāriyā, ādesanā-pāṭihāriyaɱ, anusāsanī-pāṭihāriyaɱ.

Ime kho āvuso tena Bhagavatā jānatā passatā arahatā SammāSambuddhena tayo dhammo sammad-akkhāto. Tattha sabbeh'eva saŋgāyitabbaɱ na vivaditabbaɱ, yathayidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.


 [Ones and Twos]  [Threes]  [Fours]  [Fives]  [Sixes]  [Sevens]  [Eights]  [Nines]  [Tens]


Contact:
E-mail
Copyright Statement   Webmaster's Page