Digha Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Dīgha Nikāya

Sutta 33

Saŋgīti Suttantaɱ

Adapted from the digital version of the Sri Lanka Buddha Jayanti Tripitaka Series

 


 

[221] Atthi kho āvuso tena Bhagavatā jānatā passatā arahatā SammāSambuddhena cattāro dhammo sammad-akkhāto. Tattha sabbeh'eva saŋgāyitabbaɱ na vivaditabbaɱ, yatha-yidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.

[4.01][pts][wp][bd] Cattāro satipaṭṭhānā:
Idh'āvuso bhikkhu kāye kāyānupassī viharati ātāpī sampajāno satimā vineyya loke abhijjhā-domanassaɱ,
vedanāsu vedānānupassī viharati ātāpi sampajāno satimā vineyya loke abhijjhā-domanassaɱ,
citte cittānupassī viharati ātāpī sampajāno satimā vineyya loke abhijjhā-domanassaɱ,
dhammesu dhammānupassī viharati ātāpi sampajāno satimā vineyya loke abhijjhādomanassaɱ.

[4.02][pts][wp][bd] Cattāro sammappadhānā:
Idh'āvuso bhikkhu anuppannānaɱ pāpakānaɱ akusalānaɱ dhammānaɱ anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.
Uppannānaɱ pāpakānaɱ akusalānaɱ dhammānaɱ pahānāya chandaɱ janeti vāyamati viriyaɱ ārabhati cittaɱ paggaṇhāti padahati.
Anuppannānaɱ kusalānaɱ dhammānaɱ uppādāya chandaɱ janeti vāyamati viriyaɱ ārabhati cittaɱ paggaṇhāti padahati.
Uppannānaɱ kusalānaɱ dhammānaɱ ṭhitiyā asammosāya bhīyyo-bhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.

[4.03][pts][wp][bd] Cattāro iddhipādā:
Idh'āvuso bhikkhu chanda-samādhi-padhāna-sankhāra-samannāgataɱ iddhipādaɱ bhāveti. Citta-samādhi-padhāna-saɱkhāra-samannāgataɱ iddhipādaɱ bhāveti. Viriya-samādhi-padhāna- [222] sankhāra-samannāgataɱ iddhipādaɱ bhāveti. Vīmaɱsā-samādhi-padhāna-sankhāra-samannāgataɱ iddhipadāɱ bhāveti.

[4.04][pts][wp][bd] Cattāri jhānāni:
Idh'āvuso bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ1 upasampajja viharati.
Vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.
Pītiyā ca virāgā upekkhako ca viharati sato ca sampajāno sukhaɱ ca kāyena paṭisaŋvedeti, yan taɱ ariyā ācikkhanti: 'Upekkhako satimā sukha-vihārī' ti tatiya-jjhānaɱ upasampajja viharati.
Sukhassa ca pahāṇā dukkhassa ca pahāṇā pubbe va somanassa-domanassānaɱ atthaŋgamā adukkham asukhaɱ upekkhā-sati-pārisuddhiɱ catutthaɱ-jhānaɱ upasampajja viharati.

[4.05][pts][wp][bd] Catasso samādhi-bhāvana:
Atth'āvusā samādhi-bhāvanā bhāvitā bahulīkatā diṭṭhadhamma-sukha-vihārāya saɱvattati.
Atth'āvuso samādhi-bhāvanā bhāvitā bahulī-katā ñāṇa-dassana-paṭilābhāya saɱvattati.
Atth'āvuso samādhi-bhāvanā bhāvitā bahulī-katā sati-sampajaññāya saɱvattati.
Atth'āvuso samādhi-bhāvanā bhāvitā bahul-īkatā āsavānaɱ khayāya saɱvattati.
 
Katamā c'āvuso samādhi-bhāvanā bhāvitā bahulī-katā diṭṭhadhamma-sukha-vihārāya saɱvattati?
Idh'āvuso bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja viharati.
Vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.
Pītiyā ca virāgā upekkhako ca viharati sato ca sampajāno sukhaɱ ca kāyena paṭisaŋvedeti, yan taɱ ariyā ācikkhanti 'upekkhako satimā sukhavihārī'ti taɱ tatiyaɱ-jhānaɱ upasampajja viharati.
Sukhassa ca pahāṇā dukkhassa ca pahāṇā pubb'eva somanassa-domanassānaɱ atthaŋgamā adukkha-m-asukhaɱ upekkhā-sati-pārisuddhiɱ catutthaɱ-jhānaɱ4 upasampajja viharati. Ayaɱ [223] āvuso samādhi-bhāvanā bhāvitā bahulī-katā diṭṭha-dhamma-sukhavihārāya saɱvattati.
 
Katamā c'āvuso samādi-bhāvanā bhāvitā bahulī-katā ñāṇa-dassana-paṭilābhāya saɱvattati?
Idh'āvuso bhikkhu ālokasaññaɱ manasi-karoti, divā-saññaɱ adhiṭṭhāti yathā divā tathā rattiɱ yathā rattiɱ tathā divā. Iti vivaṭena cetasā apariyonaddhena sappabhāsaɱ cittaɱ bhāveti. Ayaɱ āvuso samādhi-bhāvanā bhāvitā bahulī-katā ñāṇa-dassana-paṭilābhāya saɱvattati.
 
Katamā c'āvuso samādhi-bhāvanā bhāvitā bahulī-katā sati-sampajaññāya saɱvattati?
Idh'āvuso bhikkhuno viditā'vedanā uppajjanti. Viditā upaṭṭhahanti, viditā
abbhatthaɱ gacchanti, viditā saññā uppajjanti, viditā upaṭṭhahanti, viditā
abbhatthaɱ gacchanti. Viditā vitakkā uppajjanti, viditā upaṭṭhahanti, viditā
abbhatthaɱ gacchanti. Ayaɱ āvuso samādhi-bhāvanā bhāvitā bahulī-katā sati-sampajaññāya saɱvattati.
 
Katamā c'āvuso samādhi-bhāvanā bhāvitā bahulī-katā āsavānaɱ khayāya saɱvattati?
Idh'āvuso bhikkhu pañcasu upādāna-kkhandhesu udayabbayānupassī viharati. 'Iti rūpaɱ, iti rūpassa samudayo, iti rūpassa atthaɱgamo. Iti vedanā, iti vedanāsu samudayo, iti vedanāssu atthaɱgamo. Iti saññā, iti saññā samudayo, iti saññā atthaɱgamo, iti saɱkhārā, iti saɱkhāro samudayo, iti saɱkhāro atthaɱgamo, iti viññāṇaɱ, iti viññāṇassa samudayo, iti viññāṇassa atthagamo. Ayaɱ āvuso samādhi-bhāvanā bhāvitā bahulī-katā āsavānaɱ khayāya saɱvattati.

[4.6][pts][wp][bd] Catasso appamaññā:
Idh'āvuso bhikkhu mettā-sahagatena cetasā ekaɱ disaɱ pharitvā viharati, tathā dutiyaɱ, tathā tatiyaɱ, tathā catutthaɱ. Iti uddham [224] adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjena pharitvā viharati.
Idh'āvuso bhikkhu karuṇā-sahagatena cetasā ekaɱ disaɱ pharitvā viharati, tathā dutiyaɱ, tathā tatiyaɱ, tathā catutthaɱ. Iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena abyāpajjena pharitvā viharati.
Idh'āvuso bhikkhu muditā-sahagatena cetasā ekaɱ disaɱ pharitvā viharati, tathā dutiyaɱ, tathā tatiyaɱ, tathā catutthaɱ. Iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena abyāpajjena pharitvā viharati.
Idh'āvuso bhikkhu upekkhā-sahagatena cetasā ekaɱ disaɱ pharitvā viharati, tathā dutiyaɱ, tathā tatiyaɱ, tathā catutthaɱ. Iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena abyāpajjena pharitvā viharati

[4.07][pts][wp][bd] Cattāro āruppa:
Idh'āvuso bhikkhu sabbaso rūpa-saññānaɱ samatikkamā paṭigha-saññānaɱ attha-gamā nānatta-saññānaɱ amanasi-kārā 'Ananto ākāso' ti ākāsānañcāyatanaɱ upasampajja viharati,
sabbaso ākāsānañcāyatanaɱ samatikkamma 'anantaɱ viññāṇan' ti.viññāṇañcāyatanaɱ upasampajja viharati,
abbaso viññāṇañcāyatanaɱ samatikkamma 'n'atthi kiñcī'ti ākiñcaññāyatanaɱ upasampajja viharati,
abbaso ākiñcaññāyatanaɱ samatikkamma n'eva-saññā-nāsaññāyatanaɱ upasampajja viharati.

[4.08][pts][wp][bd] Cattāri apassenāni:
Idh'āvuso bhikkhu saŋkhāyekaɱ paṭisevati, saŋkhāy'ekaɱ adhivāseti, saŋkhāy'ekaɱ parivajjeti, saŋkhāy'ekaɱ vinodeti.

[4.09][pts][wp][bd] Cattāro ariya-vaɱsā:
Idh'āvuso bhikkhu santuṭṭho hoti itarītarena cīvarena, itarītara-cīvara-santuṭṭhiyā ca vaṇṇa-vādī, na ca, cīvara-hetu anesanaɱ appaṭirūpaɱ āpajjati, aladdhā ca cīvaraɱ na paritassati, laddhā ca cīvaraɱ agathito amucchito anajjhāpanno ādīnava-dassāvī nissaraṇa-pañño paribhuñjati, tāya ca pana itarītara-cīvara-santuṭṭhiyā n'ev'attān-ukkaɱseti na paraɱ vambheti. Yo hi tattha dakkho analaso sampajāno patissato, yaɱ [225] vuccat'āvuso bhikkhu porāṇe aggaññe ariya-vaɱse ṭhito.
Puna ca paraɱ āvuso bhikkhu santuṭṭho hoti itarītarena piṇḍapātena, itarītara-piṇḍapāta-santuṭhiyā ca vaṇṇa-vādī, na ca piṇḍapāta-hetu anesanaɱ appaṭirūpaɱ āpajjati, aladdhā ca piṇḍapātaɱ na paritassati, laddhā ca piṇḍapātaɱ agathito amucchito anajjhāpanno ādinava-dassāvī nissaraṇa-pañño paribhuñajati, tāya ca pana itarītara-piṇḍapāta-santuṭṭhiyā n'ev'attānukkaɱseti na paraɱ vamheti. Yo hi tattha dakkho hoti analaso sampajāno patissato, ayaɱ vuccat'āvuso bhikkhu porāṇe aggaññe ariya-vaɱse ṭhito.
Puna ca paraɱ āvuso bhikkhu santuṭṭho hoti itarītarena senāsanena, itarītara-senāsana-santuṭhiyā ca vaṇṇa-vādī, na ca senāsana-hetu anesanaɱ appaṭirūpaɱ āpajjati, aladdhā ca senāsanaɱ na paritassati, laddhā ca senāsanaɱ agathito amucchito anajjhāpanno ādinava-dassāvī nissaraṇa-pañño paribhuñajati, tāya ca pana itarītara-senāsana-santuṭṭhiyā n'ev'attānukkaɱseti na paraɱ vamheti. Yo hi tattha dakkho hoti analaso sampajāno patissato, ayaɱ vuccat'āvuso bhikkhu porāṇe aggaññe ariya-vaɱse ṭhito.
Puna ca paraɱ āvuso bhikkhu pahānārāmo hoti pahāna-rato bhāvanārāmo hoti bhāvanā-rato, tāya ca pana pahānārāmatāya pahāna-ratiyā bhāvanārāmatāya bhāvanā-ratiyā n'eva attān-ukkaɱseti na paraɱ vamehati. Yo hi tattha dakkho analaso sampajāno patissato, ayaɱ vuccat'āvuso bhikkhu porāṇe aggaññe ariya-vaɱse ṭhito.

[4.10][pts][wp][bd] Cattāri padhānāni:
Saɱvara-ppadhānaɱ, pahāna-padhānaɱ, bhāvana-padhānaɱ, anurakkhana-padhānaɱ.
 
Katamañ c'āvuso saŋvara-padhānaɱ?
Idh'āvuso bhikkhu cakkhunā rūpaɱ disvā na nimitta-ggāhī hoti nānuvyañjana-ggāhī, yatvādhikaraṇam etaɱ cakkhundriyaɱ [226] asaŋvutaɱ viharantaɱ abhijjhā-domanassā pāpakā akusalā dhammā anvāya-ssaveyyuɱ, tassa saŋvarāya paṭipajjati, rakkhati cakkhudriyaɱ, cakkhundriye saŋvarāyaɱ āpajjati.
Sotena saddaɱ sutvā na nimitta-ggāhī hoti nānubyañjana-ggāhī, yatvādhikaraṇam etaɱ sotendriyaɱ asaŋvutaɱ viharantaɱ abhijjhā-domanassā pāpakā akusalā dhammā anvāya-ssaveyyuɱ, tassa saŋvarāya paṭipajjati, rakkhati sotandriyaɱ, sotendriye saŋvaraɱ āpajjati.
Ghānena gandhaɱ ghāyitvā na nimitta-ggāhī hoti nānubyañjana-ggāhī, yatvādhikaraṇam etaɱ ghānendriyaɱ asaŋvutaɱ viharantaɱ abhijjhā-domanassā pāpakā akusalā dhammā anvāya-ssaveyyuɱ, tassa saŋvarāya paṭipajjati, rakkhati ghānendriyaɱ, ghānendriye saŋvaraɱ āpajjati.
Jivhāya rasaɱ sāyitvā na nimitta-ggāhī hoti nānubyañjana-ggāhī, yatvādhikaraṇam etaɱ jivhindriyaɱ asaŋvutaɱ viharantaɱ abhijjhā-domanassā pāpakā akusalā dhammā anvāya-ssaveyyuɱ, tassa saŋvarāya paṭipajjati, rakkhati jivhindriyaɱ, jivhindriye saŋvaraɱ āpajjati.
Kāyena phoṭṭhabbaɱ phusitvā na nimitta-ggāhī hoti nānubyañjana-ggāhī, yatvādhikaraṇam etaɱ kāyindriyaɱ asaŋvutaɱ viharantaɱ abhijjhā-domanassā pāpakā akusalā dhammā anvāya-ssaveyyuɱ, tassa saŋvarāya paṭipajjati, rakkhati kāyindriyaɱ, kāyindriye saŋvaraɱ āpajjati.
Manasā dhammaɱ viññāya na nimitta-ggāhī hoti nānubyañjana-ggāhī, yatvādhikaraṇam etaɱ manindriyaɱ asaŋvutaɱ viharantaɱ abhijjhā-domanassā pāpakā akusalā dhammā anvāya-ssaveyyuɱ, tassa saŋvarāya paṭipajjati, rakkhati manindriyaɱ, manindriye saŋvaraɱ āpajjati.
Idaɱ vuccat'āvuso saŋvara-ppadhānaɱ.
 
Katamañ c'āvuso pahāna-padhānaɱ?
Idh'āvuso bhikkhu uppannaɱ kāma-vitakkaɱ nādhivāseti pajahati vinodeti byantīkaroti anabhāvaɱ gameti,
uppannaɱ vyāpāda-vitakkaɱ nādhivāseti pajahati vinodeti byantīkaroti anabhāvaɱ gameti,
uppannaɱ vihiŋsā-vitakkaɱ nādhivāseti pajahati vinodeti byantīkaroti anabhāvaɱ gameti,
uppannuppanne pāpake akusale dhamme nādhivāseti pajahati vinodeti byantīkaroti anabhāvaɱ gameti.
Idaɱ vuccat'āvuso pahānappadhānaɱ.
 
Katamañ c'āvuso bhāvana-padhānaɱ?
Idh'āvuso bhikkhu sati-sambojjhaŋgaɱ bhāveti viveka-nissitaɱ virāga-nissitaɱ nirodha-nissitaɱ vossagga-parināmiɱ.
Dhamma-vicaya-sambojjhaŋgaɱ bhāveti viveka-nissitaɱ virāga-nissitaɱ nirodha-nissitaɱ vossagga-parināmiɱ.
Viriya-sambojjhaŋgaɱ bhāveti viveka-nissitaɱ virāga-nissitaɱ nirodha-nissitaɱ vossagga-parināmiɱ.
Pīti-sambojjhaŋgaɱ bhāveti viveka-nissitaɱ virāga-nissitaɱ nirodha-nissitaɱ vossagga-parināmiɱ.
Passaddhi-sambojjhaŋgaɱ bhāveti viveka-nissitaɱ virāga-nissitaɱ nirodha-nissitaɱ vossagga-parināmiɱ.
Samādhi-sambojjhaŋgaɱ bhāveti viveka-nissitaɱ virāga-nissitaɱ nirodha-nissitaɱ vossagga-parināmiɱ.
Upekkhā-sambojjhaŋgaɱ bhāveti viveka-nissitaɱ virāga-nissitaɱ nirodha-nissitaɱ vossagga-pariṇāmiɱ.
Idaɱ vuccat'āvuso bhāvana-padhānaɱ.
 
Katamañ c'āvuso anurakkhaṇā-padhānaɱ?
Idh'āvuso bhikkhu uppannaɱ bhaddakaɱ samādhi-nimittaɱ anurakkhati aṭṭhika-saññaɱ pulavaka-saññaɱ vinīlaka-saññaɱ vicchiddaka-saññaɱ uddhumātaka-saññaɱ.
Idaɱ vuccat'āvuso anurakkhana-padhāna

[4.11][pts][wp][bd] Cattāri ñāṇāni:
Dhamme ñāṇaɱ, anvaye ñāṇaɱ, paricchede ñāṇaɱ, sammuti-ñāṇaɱ."

[227][4.12][pts][wp][bd] Aparāni pi cattāri ñāṇāni:
Dukkhe ñāṇaɱ, samudaye ñāṇaɱ, nirodhe ñāṇaɱ, magge ñāṇaɱ.

[4.13][pts][wp][bd] Cattāri sotāpattiyaŋgāni:
Sappurisa-saɱsevo, saddhamma-savaṇaɱ, yoniso-manasikāro, dhammānu-dhamma-paṭipatti.

[4.14][pts][wp][bd] Cattāri sotāpannassa aŋgāni:
Idh'āvuso ariyasāvako Buddhe avecca-ppasādena samannāgato hoti: 'Iti pi so Bhagavā arahaɱ SammāSambuddho vijjā-caraṇa-sampanno sugato loka-vidū anuttaro purisa-damma-sārathī satthā deva-manussānaɱ Buddho Bhagavā' ti.
Dhamme avecca-ppasādena samannāgato hoti: 'Svākkhāto Bhagavatā Dhammo sandiṭṭhiko akāliko ehi-passiko opanayiko paccattaɱ veditabbo viñgñūhī' ti.
Saŋghe aveccappasādena samannāgato hoti: 'Supaṭipanno Bhagavato sāvaka Saŋgho, uju-paṭipanno Bhagavato sāvaka-saŋgho, ñāya-paṭipanno Bhagavato sāvaka-saŋgho, sāmīci-paṭipanno Bhagavato sāvaka-saŋgho, yad idaɱ cattāri purisa-yugāni, aṭṭha purisa-puggalā, eso Bhagavato sāvaka-saŋgho āhuṇeyyo pāhuṇeyayā dakkhiṇeyyo añjali-karaṇīyo anuttaraɱ puñña-kkhettaɱ lokassā' ti.
Ariya-kantehi sīlehi samannāgato hoti akhaṇḍehi acchiddehi asabalehi akammāsehi bhujissehi viññūppasatthehi aparāmaṭṭhehi samādhi-saɱvattanikehi.

[4.15][pts][wp][bd] Cattāri sāmañña-phalāni:
Sotāpatti-phalaɱ, sakadāgāmi-phalaɱ, anāgāmi-phalaɱ, arahatta-phalaɱ.

[228][4.16][pts][wp][bd] Catasso dhātuyo:
Paṭhavi-dhātu, āpo-dhātu, tejo-dhātu, vāyo-dhātu.

[4.17][pts][wp][bd] Cattāro āhārā:
Kabalīkāro āhāro, o'āriko vā sukhumo vā, phasso dutiyo, mano-sañcetanā tatiyā, viññāṇaɱ catutthaɱ.

[4.18][pts][wp][bd] Catasso viññāṇa-ṭṭhitiyo:
Rūpūpayaɱ vā āvuso viññāṇaɱ tiṭṭhamānaɱ tiṭṭhati, rūpārammaṇaɱ rūpappatiṭṭhaɱ nandupasecanaɱ vuḍḍhiɱ virū'hiɱ vepullaɱ āpajjati.
Vedanūpayaɱ vā āvuso viññāṇaɱ tiṭṭhamānaɱ tiṭṭhati, vedanārammaṇaɱ vedanappatiṭṭhaɱ nandūpasecanaɱ vuḍḍhiɱ virū'hiɱ vepullaɱ āpajjati.
Saññūpayaɱ vā āvuso viññāṇaɱ tiṭṭhamānaɱ tiṭṭhati, saññārammaṇaɱ saññāppatiṭṭhaɱ nandūpasecanaɱ vuḍḍhiɱ virū'hiɱ vepullaɱ āpajjati.
Sankhārūpayaɱ vā āvuso viññāṇaɱ tiṭṭhamānaɱ tiṭṭhati, sankhārammaṇaɱ sankhārappatiṭṭhaɱ nandūpasecanaɱ vuḍḍhiɱ virū'hiɱ vepullaɱ āpajjati.

[4.19][pts][wp][bd] Cattāri agati-gamanāni:
Chandāgatiɱ gacchati, dosāgatiɱ gacchati, mohāgatiɱ gacchati, bhayāgatiɱ gacchati.

[4.20][pts][wp][bd] Cattāro taṇhuppādā:
Cīvara-hetu vā āvuso bhikkhuno taṇhā uppajjamānā uppajjati.
Piṇḍapāta-hetu vā āvuso bhikkhuno taṇhā uppajjamānā uppajjati.
Senāsana-hetu vā āvuso bhikkhuno taṇhā uppajjamānā uppajjati.
Iti bhavābhava-hetu vā āvuso bhikkhuno taṇhā uppajjamānā uppajjati.

[4.21][pts][wp][bd] Catasso paṭipadā:
Dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā.

[229][4.22][pts][wp][bd] Aparā pi catasso paṭipadā:
Akkhamā paṭipadā, khamā paṭipadā, damā paṭipadā, samā paṭipadā,

[4.23][pts][wp][bd] Cattāri dhamma-padāni:
Anabhijjhā dhammapadaɱ, avyāpādo dhamma-padaɱ, sammā-sati dhamma-padaɱ, sammā-samādhi dhamma-padaɱ.

[4.24][pts][wp][bd] Cattāri dhamma-samādānāni:
Atth'āvuso dhamma-samādānaɱ paccuppanna dukkhañ c'eva āyatiñ ca dukkha-vipākaɱ
Atth'āvuso dhamma-samādānaɱ paccuppanna dukkhaɱ āyatiɱ ca sukha-vipākaɱ.
Atth'āvuso dhamma-samādānaɱ paccuppanna sukhaɱ āyatiɱ ca dukkha-vipākaɱ.
Atth'āvuso dhamma-samādānaɱ paccuppanna sukhañcava āyatiɱ ca sukha-vipākaɱ.

[4.25][pts][wp][bd] Cattāro dhamma-kkhandhā:
Sīla-kkhavdho, samādhi-kkhandho, paññā-kkhandho, vimutti-kkhadho.

[4.26][pts][wp][bd] Cattāri balāni:
Viriya-balaɱ, sati-balaɱ, samādhi-balaɱ, paññā-balaɱ.

[4.27][pts][wp][bd] Cattāri adhiṭṭhānāni:
Paññā-adiṭṭhānaɱ, saccādhiṭṭhānaɱ, cāgādhiṭṭhānaɱ, upasamādhiṭṭhānaɱ.

[4.28][pts][wp][bd] Cattāri pañha-vyākaraṇā:
Ekaɱsa-vyākaraṇīyo pañho, vibhajja-vyākaraṇīyo pañho, paṭipucchā-vyākaraṇīyo pañho, ṭhapaṇīyo pañho.

[230][4.29][pts][wp][bd] Cattārī kammāni:
Atth'āvuso kammaɱ kaṇhaɱ kaṇha-vipākaɱ.
Atth'āvuso kammaɱ sukkaɱ sukka-vipākaɱ.
Atthāvuso kammaɱ kaṇha-sukkaɱ kaṇha-sukka-vipākaɱ.
Atthāvuso kammaɱ akanhaɱ asukkaɱ akanha-asukka-vipākaɱ kammakkhayāya saɱvattati.

[4.30][pts][wp][bd] Cattāro sacchikaraṇīyā dhammā:
Pubbe-nivāso satiyā sacchikaraṇīyo.
Cutūpapāto cakkhunā sacchikaraṇiyo.
Aṭṭha vimokkhā kāyena sacchikaraṇīyā.
Āsavānaɱ khayo paññāya sacchikaraṇīyo.

[4.31][pts][wp][bd] Cattāro oghā:
Kāmogho, bhavogho, diṭṭhogho, avijjogho.

[4.32][pts][wp][bd] Cattāro yogā:
Kāma-yogo, bhava-yogo, diṭṭhi-yogo, avijjā-yogo.

[4.33][pts][wp][bd] Cattāro visaɱyogā:
Kāmayoga-visaɱyogo, bhavayoga-visaɱyogo, diṭṭhiyoga-visaɱyogo, avijjāyoga-visaɱyogo.

[4.34][pts][wp][bd] Cattāro ganthā:
Abhijjhā kāya-gantho, vyāpādo kāya-gantho, sīlabbata-parāmāso kāya-gantho, idaɱ-saccābhiniveso kāya-gatho.

[4.35][pts][wp][bd] Cattāri upādānāni:
Kāmūpadānaɱ, diṭṭhupādānaɱ, sīlabbatūpādānaɱ, attavādūpādānaɱ.

[4.36][pts][wp][bd] Catasso yoniyo:
Aṇḍaja-yoni, jalābuja-yoni, saɱsedaja-yoni, opapātika-yoni.

[231][4.37][pts][wp][bd] Catasso gabbhāvakkanatiyo:
Idh'āvuso ekacco asampajāno c'eva mātu kucchiyam okkamati, asampajāno mātu kucchismiɱ ṭhāti, asampajāno mātu kucchismā nikkhamati. Ayaɱ paṭhamā gabbhāvakkanti.
Puna ca paraɱ āvuso idh'ekacco sampajāno hi kho mātu kucchiɱ okkamati, asampajāno mātu kucchismiɱ ṭhāti, asampajāno mātu kucchismā nikkhamati. Ayaɱ dutiyā gabbhāvakkanti.
Puna ca paraɱ āvuso idh'ekacco sampajāno mātu kucchiɱ okkamati, sampajāno mātu kucchismiɱ ṭhāti, asampajāno mātu kucchismā nikkhamati. Ayaɱ tatiyā gabbhāvakkanti.
Puna ca paraɱ āvuso idh'ekacco sampajāno c'eva mātu kucchiɱ okkamati, sampajāno mātu kucchismiɱ ṭhāti, sampajāno mātu kucchismā nikkhamati. Ayaɱ catutthā gabbhāvakkanti.

[4.38][pts][wp][bd] Cattāro attabhāva-paṭilābhā:
Atth'āvuso attabhāva-paṭilābho yasmiɱ attabhāva-paṭilābhe attasañcetanā yeva kamati no para-sañcetanā.
Atth'āvuso attabhāva-paṭilābho yasmiɱ attabhāva-paṭilābhe para-sañcetanā yeva kamati no atta-sañcetanā.
Atth'āvuso attabhāva-paṭilābho yasmiɱ attabhāva-paṭilābhe atta-sañcetanā c'eva kamati para-sañcetanā ca.
Atth'āvuso attabhāva-paṭilābho yasmiɱ attabhāva-paṭilābhe n'eva atta-sañcetanā kamati no para-sañcetanā.

[4.39][pts][wp][bd] Catasso dakkhiṇā-visuddhiyo:
Atth'āvuso dakkhiṇā dāyakato visujjhati no paṭiggāhakato.
Atth'āvuso dakkhiṇā paṭiggāhakato visujjhati no dāyakato.
Atth'āvuso dakkhiṇā n'eva dāyakato visujjhati [232] no paṭiggāhakato.
Atth'āvuso dakkhiṇā dāyakato c'eva visujjhati paṭiggāhakato ca.

[4.40][pts][wp][bd] Cattāri saŋgaha-vatthūni:
Dānaɱ, peyyavajjaɱ, attha-cariyaɱ, samānattatā.

[4.41][pts][wp][bd] Cattāro anariya-vohārā:
Musā-vādo, pisuṇā vācā, pharusā vācā, samphappalāpo.

[4.42][pts][wp][bd] Cattāro ariya-vohārā:
Musā-vādā veramaṇī, pisuṇāya vācāya veramaṇī, pharāsāya vācāya veramaṇī, samphappalāpā veramaṇī.

[4.43][pts][wp][bd] Apare pi cattāro anariya-vohārā:
Adiṭṭhe diṭṭha-vāditā, assute suta-vāditā, amute muta-vāditā, aviññāte viññāta-vāditā.

[4.44][pts][wp][bd] Apare pi cattāro ariya-voharā:
Adiṭṭhe Adiṭṭha-vāditā, assute assuta-vāditā, amute amuta-vāditā, aviññāte aviññāta-vāditā.

[4.45][pts][wp][bd] Apare pi cattāro anariya-vohārā:
Diṭṭhe adiṭṭha-vāditā, sute assuta-vāditā, mute amuta-vāditā, viññāte aviññāta-vāditā.

[4.46][pts][wp][bd] Apare pi cattāro ariya-vohārā:
Diṭṭhe diṭṭha-vāditā, sute suta-vāditā, mute muta-vāditā, viññāte viññāta-vāditā.

[4.47][pts][wp][bd] Cattāro puggalā:
Idh'āvuso ekacco puggalo attan-tapo hoti atta-paritāpanānuyogam anuyutto.
Idh'āvuso ekacce puggalo paran-tapo hoti para-paritāpanānuyogam anuyutto.
Idh'āvuso ekacco puggalo attan-tapo ca hoti atta-paritāpanānuyogam anuyutto, paran-tapo ca para-paritāpanānuyogam anuyutto.
Idh'āvuso ekacco puggalo n'eva attan-tapo hoti na atta-paritāpanānuyogam anuyutto na paran-tapo na para-paritāpanuyogam anuyutto. So anattan-tapo aparan- [233] tapo diṭṭhe va dhamme nicchāto nibbuto sītī-bhuto sukhapaṭisaŋvedi brahma-bhutena attanā viharati.

[4.48][pts][wp][bd] Apare'pi cattāro puggalā:
Idh'āvuso ekacco puggalo atta-hitāya paṭipanno hoti no para-hitāya.
Idh'āvuso ekacco puggalo para-hitāya paṭipanno hoti no atta-hitāya.
Idh'āvuso ekacco puggalo n'eva atta-hitāya paṭipanno hoti na para-hitāya.
Idh'āvuso ekacco puggalo atta-hitāya c'eva paṭipanno hoti para-hitāya ca.

[4.49][pts][wp][bd] Apare pi cattāro puggalā:
Tamo tama parāyano, tamo joti-parāyano, joti tama-parāyano, joti joti-parāyano.

[4.50][pts][wp][bd] Apare pi cattāro puggalā:
Samaṇa-m-acalo, samaṇa-padumo, samaṇa-puṇḍariko, samaṇa-sukhumālo.

Ime kho āvuso tena Bhagavatā jānatā passatā arahatā SammāSambuddhena cattāro dhammo sammad-akkhāto. Tattha sabbeh'eva saŋgāyitabbaɱ na vivaditabbaɱ, yathayidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.


 [Ones and Twos]  [Threes]  [Fours]  [Fives]  [Sixes]  [Sevens]  [Eights]  [Nines]  [Tens]


Contact:
E-mail
Copyright Statement   Webmaster's Page