Digha Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Dīgha Nikāya

Sutta 33

Saŋgīti Suttantaɱ

Adapted from the digital version of the Sri Lanka Buddha Jayanti Tripitaka Series

 


 

Atthi kho āvuso tena Bhagavatā jānatā passatā arahatā SammāSambuddhena cha dhammā sammad-akkhāto. Tattha sabbeh'eva saŋgāyitabbaɱ na vivaditabbaɱ, yatha-yidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.

[6.01][pts][wp][bd] Cha ajjhattikāni āyatanāni:
Cakkhāyatanaɱ, sotāyatanaɱ, ghānāyatanaɱ, jivhāyatanaɱ, kāyātanaɱ, manāyatanaɱ.

[6.02][pts][wp][bd] Cha bāhirāni āyatanāni:
Rūpāyatanaɱ, saddāyatanaɱ, gandhāyatanaɱ, rasāyatanaɱ, phoṭṭhabbāyatanaɱ, dhammāyatanaɱ.

[6.03][pts][wp][bd] Cha viññāṇa-kāyā:
Cakkhu-viññaṇaɱ, sota-viññāṇaɱ, ghāna-viññāṇaɱ, jivhā-viññāṇaɱ, kāya-viññāṇaɱ, mano-viññāṇaɱ.

[6.04][pts][wp][bd] Cha phassa-kāyā:
Cakkhu-samphasso, sota-samphasso, ghāna-samphasso, jivhā-samphasso, kāya-samphasso, mano-samphasso.

[6.05][pts][wp][bd] Cha vedanā-kāyā:
Cakkhu-samphassajā vedanā, [244] sota-samphassajā vedanā, ghāna-samphassajā vedanā, jivhā-samphassajā vedanā, kāya-samphassajā vedanā, mano-samphassajā vedanā.

[6.06][pts][wp][bd] Cha saññā-kāyā:
Rūpa-saññā, sadda-saññā, gandha-saññā, rasa-saññā, phoṭṭhabba-saññā, dhamma-saññā.

[6.07][pts][wp][bd] Cha sañcetanā-kāyā:
Rūpa-sañcetanā, sadda-sañcetanā, gandha-sañcetanā, rasa-sañcetanā, phoṭṭhabba-sañcetanā, dhamma-sañcetanā.

[6.08][pts][wp][bd] Cha taṇhā-kāyā:
Rūpa-taṇhā, sadda-tanhā, gandha-taṇhā, rasa-taṇhā, phoṭṭhabba-taṇhā, dhamma-taṇhā.

[6.09][pts][wp][bd] Cha agāravā:
Idh'āvuso bhikkhu Satthari agāravo viharati appatisso, Dhamme agāravo viharati appatisso, Saŋghe agāravo viharati appatisso, sikkhāya agāravo viharati appatisso, appamāde agāravo viharati appatisso, paṭisanthāre agāravo viharati appatisso.

[6.10][pts][wp][bd] Cha gāravā:
Idh'āvuso bhikkhu Satthari sagāravo viharati sappatisso, Dhamme sagāravo viharati sappatisso, Saŋghe sagāravo viharati sappatisso, sikkhāya sagāravo viharati sappatisso, appamāde sagāravo viharati sappatisso, paṭisathāre sagāravo viharati sappatisso.

[6.11][pts][wp][bd] Cha somanassūpavicārā:
Cakkhunā rūpaɱ disvā somanassa-ṭṭhāniyaɱ rūpaɱ upavicarati. Sotena saddaɱ sutvā somanassa-ṭṭhāniyaɱ saddaɱ upavicarati. Ghānena gadhaɱ ghāyitvā somanassa-ṭṭhāniyaɱ gandhaɱ upavicarati. Jivhāya rasaɱ sāyitvā somanassa-ṭṭhāniyaɱ rasaɱ upavicarati. Kāyena phoṭṭhabbaɱ phūsitvā somanassa-ṭṭhāniyaɱ phoṭṭhabbaɱ upavicarati. Manasā dhammaɱ viññāya somanassa-ṭṭhāniyaɱ dhammaɱ upavicarati.

[245][6.12][pts][wp][bd] Cha domanassūpavicārā:
Cakkhunā rūpaɱ disvā domanassa-ṭṭhāniyaɱ rūpaɱ upavicarati. Sotena saddaɱ sutvā domanassa-ṭṭhāniyaɱ saddaɱ upavicarati. Ghānena gandhaɱ ghāyitvā domanassa-ṭṭhāniyaɱ gandhaɱ upavicarati. Jivhāya rasaɱ sāyitvā demanassa-ṭṭhāniyaɱ rasaɱ upavicarati. Kāyena phoṭṭhabbaɱ phusitvā demanassa-ṭṭhāniyaɱ phoṭṭhabbaɱ upavicarati. Manasā dhammaɱ viññāya domanassa-ṭṭhāniyaɱ dhammaɱ upavicarati.

[6.13][pts][wp][bd] Cha upekkhūpavicārā:
Cakkhunā rūpaɱ disvā upekkhā-ṭṭhāniyaɱ rūpaɱ upavicarati. Sotena saddaɱ sutvā upekkhā-ṭṭhāniyaɱ saddaɱ upavicarati. Ghānena gandhaɱ ghāyitvā upekkhā-ṭṭhāniyaɱ gandhaɱ upavicarati. Jivhāya rasaɱ sāyitvā upekkhā-ṭṭhāniyaɱ rasaɱ upavicarati. Kāyena phoṭṭhabbaɱ phusitvā upekkhā-ṭṭhāniyaɱ phoṭṭhabbaɱ upavicarati. Manasā dhammaɱ viññāya upekkhā-ṭṭhāniyaɱ1 dhammaɱ upavicarati.

[6.14][pts][wp][bd] Cha sārānīyā dhammā:
Idh'āvuso bhikkhuno mettaɱ kāya-kammaɱ paccupaṭṭhitaɱ hoti sabrahmacārīsu āvī c'eva raho ca, ayam pi dhammo sārānīyo piyakaraṇo garu-karaṇo, saɱgahāya avivādāya avihesāya sāmaggiyā ekī-bhāvāya saɱvattati.
Puna ca paraɱ āvuso bhikkuno mettaɱ vacī-kammaɱ paccupaṭṭhitaɱ hoti sabrahmacārīsu āvī c'eva raho ca, ayam pi dhammo sārānīyo piya-karaṇo garu-karaṇo, saɱgahāya avivādāya avihesāya sāmaggiyā ekī-bhāvāya saɱvatti.
Puna ca paraɱ āvuso bhikkhuno mettaɱ mano-kammaɱ paccupaṭṭhitaɱ hoti sabrahmacārīsu āvī c'eva raho ca, ayam pi dhammo sārānīyo piya-karaṇo garu-karaṇo, saɱgahāya avivādāya avihesāya sāmaggiyā ekī-bhāvāya saɱvattati.
Puna ca paraɱ āvuso bhikkhuno ye te lābhā dhammikā dhammaladdhā antamaso patta-pariyāpanna-mattam pi, tathārūpehi lābhehi appaṭivibhatta-bhogī hoti sīlavantehi sabrahmacārīhi sādhāraṇa-bhogī, ayam pi dhammo sārānīyo piya-karaṇo garu-karaṇo, saŋgahāya avivādāya avihesāya sāmaggiyā ekī-bhāvāya saɱvattati.
Puna ca paraɱ āvuso bhikkhu yāni tāni sīlāni akhaṇaḍāni acchiddāni asabalāni akammāsāni bhujissāni viññūppasatthāni aparāmaṭṭhāni samādhisaɱvattanikāni, tathā-rūpesu sīlesu sīla-sāmañña-gato [246] viharati sabrahmacārīhi āvī c'eva raho ca, ayam pi dhammo sārānīyo piya-karaṇo garu-karaṇo, saɱgahāya avivādāya avihesāya sāmaggiyā ekī-bhāvāya saɱvattati.
Puna ca paraɱ āvuso bhikkhu yā'yaɱ diṭṭhi ariyā niyyāṇikā niyyāti takkarassa sammā-dukkhakkhayāya tathā-rūpāya diṭṭhiyā diāṭṭhi-smañña-gato viharati sabrahmacārīhi āvī c'eva raho ca, ayam pi dhammo sārāṇīyo piya-karano garu-karano saŋgahāya avivādāya avihesāya sāmaggiyā ekī-bhāvāya saɱvattati.

[6.15][pts][wp][bd] Cha vivāda-mūlāni:
Idh'āvuso bhikkhu kodhano hoti upanāhī. Yo so āvuso bhikkhu kodhano hoti upanāhī, so Sattharī pi agāravo viharati appatisso. Dhamme pi agāravo viharati appatisso. Saŋghe pi agāravo viharati appatisso, sikkhāya'pi na paripūra-kārī hoti.
Yo so āvuso bhikkhu Satthari agāravo viharati appatisso, Dhamme agāravo viharati appatisso, Saŋghe agāravo viharati appatisso, sikkhāya na paripūrakārī, so Saŋghe vivādaɱ janeti. Yo so hoti vivādo bahujana-ahitāya bahujana-asukhāya bahu-janassa anatthāya ahitāya dukkhāya deva-manussānaɱ. Evarūpañ ce tumhe āvuso vivāda-mūlaɱ ajjhattaɱ vā bahiddhā vā samanupasseyyātha, tatra tumhe āvuso tass'eva pāpakassa vivāda=mūlassa pahānāya vāyameyyātha. Evarūpañ ce tumhe āvuso vivāda-mūlaɱ ajjhattaɱ vā bahiddhā vā na samanupasseyyātha, tatra tumhe āvuso tass'eva pāpakassa vivāda-mūlassa āyatiɱ anavassavāya paṭipajjeyyātha. Evam etassa pāpakassa vivāda-mūlassa pahānaɱ hoti, evam etassa pāpakassa vivāda-mūlassa āyatiɱ anavassavo hoti.

Puna ca paraɱ āvuso bhikkhu makkhī hoti palāsī. Yo so āvuso bhikkhu makkhī hoti palāsī, so Sattharī'pi agāravo viharati appatisso, Dhamme'pi agāravo viharati appatisso. Saŋghe pi agāravo viharati appatisso, sikkhāya'pi na paripūrakārī hoti.
Yo so āvuso bhikkhu Satthari agāravo viharati appatisso, Dhamme agāravo viharati appatisso, Saŋghe agāravo viharati appatisso, sikkhāya na paripūrakārī, so Saŋghe vivādaɱ janeti. Yo so hoti vivādo bahujana-ahitāya bahujana-asukhāya bahu-janassa anatthāya ahitāya dukkhāya deva-manussānaɱ. Evarūpañ ce tumhe āvuso vivāda-mūlaɱ ajjhattaɱ vā bahiddhā vā samanupasseyyātha, tatra tumhe āvuso tass'eva pāpakassa vivāda=mūlassa pahānāya vāyameyyātha. Evarūpañ ce tumhe āvuso vivāda-mūlaɱ ajjhattaɱ vā bahiddhā vā na samanupasseyyātha, tatra tumhe āvuso tass'eva pāpakassa vivāda-mūlassa āyatiɱ anavassavāya paṭipajjeyyātha. Evam etassa pāpakassa vivāda-mūlassa pahānaɱ hoti, evam etassa pāpakassa vivāda-mūlassa āyatiɱ anavassavo hoti.

Puna ca paraɱ āvuso bhikkhu issukī hoti maccharī. Yo so āvuso bhikkhu issukī hoti maccharī, so Satthari'pi agāravo viharati appatisso, Dhamme'pi agāravo viharati appatisso. Saŋghe pi agāravo viharati appatisso, sikkhāya'pi na paripūrakārī hoti.
Yo so āvuso bhikkhu Satthari agāravo viharati appatisso, Dhamme agāravo viharati appatisso, Saŋghe agāravo viharati appatisso, sikkhāya na paripūrakārī, so Saŋghe vivādaɱ janeti. Yo so hoti vivādo bahujana-ahitāya bahujana-asukhāya bahu-janassa anatthāya ahitāya dukkhāya deva-manussānaɱ. Evarūpañ ce tumhe āvuso vivāda-mūlaɱ ajjhattaɱ vā bahiddhā vā samanupasseyyātha, tatra tumhe āvuso tass'eva pāpakassa vivāda=mūlassa pahānāya vāyameyyātha. Evarūpañ ce tumhe āvuso vivāda-mūlaɱ ajjhattaɱ vā bahiddhā vā na samanupasseyyātha, tatra tumhe āvuso tass'eva pāpakassa vivāda-mūlassa āyatiɱ anavassavāya paṭipajjeyyātha. Evam etassa pāpakassa vivāda-mūlassa pahānaɱ hoti, evam etassa pāpakassa vivāda-mūlassa āyatiɱ anavassavo hoti.

Puna ca paraɱ āvuso bhikkhu saṭho hoti māyāvi, yo so āvuso bhikkhu saṭho hoti māyāvī, so Satthari'pi agāravo viharati appatisso, Dhamme'pi agāravo viharati appatisso. Saŋghe pi agāravo viharati appatisso, sikkhāya'pi na paripūrakārī hoti.
Yo so āvuso bhikkhu Satthari agāravo viharati appatisso, Dhamme agāravo viharati appatisso, Saŋghe agāravo viharati appatisso, sikkhāya na paripūrakārī, so Saŋghe vivādaɱ janeti. Yo so hoti vivādo bahujana-ahitāya bahujana-asukhāya bahu-janassa anatthāya ahitāya dukkhāya deva-manussānaɱ. Evarūpañ ce tumhe āvuso vivāda-mūlaɱ ajjhattaɱ vā bahiddhā vā samanupasseyyātha, tatra tumhe āvuso tass'eva pāpakassa vivāda=mūlassa pahānāya vāyameyyātha. Evarūpañ ce tumhe āvuso vivāda-mūlaɱ ajjhattaɱ vā bahiddhā vā na samanupasseyyātha, tatra tumhe āvuso tass'eva pāpakassa vivāda-mūlassa āyatiɱ anavassavāya paṭipajjeyyātha. Evam etassa pāpakassa vivāda-mūlassa pahānaɱ hoti, evam etassa pāpakassa vivāda-mūlassa āyatiɱ anavassavo hoti.

Puna ca paraɱ āvuso bhikkhu pāpiccho hoti micchā-diṭṭhi, yo so āvuso bhikkhu pāpiccho hoti micchā-diṭṭhī, so Satthari'pi agāravo viharati appatisso, Dhamme'pi agāravo viharati appatisso. Saŋghe pi pi agāravo viharati appatisso, sikkhāya'pi na paripūrakārī hoti.
Yo so āvuso bhikkhu Satthari agāravo viharati appatisso, Dhamme agāravo viharati appatisso, Saŋghe agāravo viharati appatisso, sikkhāya na paripūrakārī, so Saŋghe vivādaɱ janeti. Yo so hoti vivādo bahujana-ahitāya bahujana-asukhāya bahu-janassa anatthāya ahitāya dukkhāya deva-manussānaɱ. Evarūpañ ce tumhe āvuso vivāda-mūlaɱ ajjhattaɱ vā bahiddhā vā samanupasseyyātha, tatra tumhe āvuso tass'eva pāpakassa vivāda=mūlassa pahānāya vāyameyyātha. Evarūpañ ce tumhe āvuso vivāda-mūlaɱ ajjhattaɱ vā bahiddhā vā na samanupasseyyātha, tatra tumhe āvuso tass'eva pāpakassa vivāda-mūlassa āyatiɱ anavassavāya paṭipajjeyyātha. Evam etassa pāpakassa vivāda-mūlassa pahānaɱ hoti, evam etassa pāpakassa vivāda-mūlassa āyatiɱ anavassavo hoti.

Puna ca paraɱ āvuso bhikkhu [247] sandiṭṭhi-parāmāsī hoti ādhāna-gāhī duppaṭinissaggī. Yo so āvuso bhikkhu sandiṭṭhi-parāmāsī hoti ādhāna-gāhī duppaṭinissaggī, so Sattharī pi agāravo viharati appatisso. Dhamme pi agāravo viharati appatisso. Saŋghe pi agāravo viharati appatisso, sikkhāya'pi na paripūra-kārī hoti. Yo so āvuso bhikkhu Satthari agāravo viharati appatisso, Dhamme agāravo viharati appatisso, Saŋghe agāravo viharati appatisso, sikkhāya na paripūrakārī, so Saŋghe vivādaɱ janeti. Yo so hoti vivādo bahujana-ahitāya bahujana-asukhāya bahu-janassa anatthāya ahitāya dukkhāya deva-manussānaɱ. Evarūpañ ce tumhe āvuso vivāda-mūlaɱ ajjhattaɱ vā bahiddhā vā samanupasseyyātha, tatra tumhe āvuso tass'eva pāpakassa vivāda=mūlassa pahānāya vāyameyyātha. Evarūpañ ce tumhe āvuso vivāda-mūlaɱ ajjhattaɱ vā bahiddhā vā na samanupasseyyātha, tatra tumhe āvuso tass'eva pāpakassa vivāda-mūlassa āyatiɱ anavassavāya paṭipajjeyyātha. Evam etassa pāpakassa vivāda-mūlassa pahānaɱ hoti, evam etassa pāpakassa vivāda-mūlassa āyatiɱ anavassavo hoti.

[6.16][pts][wp][bd] Cha dhātuyo:
Paṭhavī-dhātu āpo-dhātu, tejo-dhātu, vāyo-dhātu, ākāsa-dhātu, viññāṇa-dhātu.

[6.17][pts][wp][bd] Cha nissaraṇiyā dhātuyo:
Idh'āvuso bhikkhu evaɱ vadeyya: 'Mettā hi kho me āvuso ceto-vimutti bhāvitā [248] bahulī-katā yānī-katā vatthu-katā anuṭṭhitā paricitā susamāraddhā. Atha ca pana me vyāpādo cittaɱ pariyādāya tiṭṭhatī' ti. So 'Mā h'evan ' ti.'ssa vacanīyo, 'Mā'yasmā evaɱ avaca, mā Bhagavantaɱ abbhācikkhi, na hi sādhu Bhagavato abbhakkhānaɱ, na hi Bhagavā evaɱ vadeyya. Aṭṭhānam etaɱ āvuso anavakāso. Yaɱ mettāya ceto-vimuttiyā bhāvitāya bahulī-katāya yānī-katāya vatthu-katāya anuṭṭhitāya paricitāya susamāraddhāya; atha ca pan'assa vyāpādo cittaɱ pariyādāya ṭhassatī'ti, n'etaɱ ṭhānaɱ vijjati. Nissaraṇaɱ h'etaɱ āvuso vyāpādassa yad idaɱ mettā ceto-vimuttī'ti.
Idha pana āvuso bhikkhu evaɱ vadeyya:- 'Karuṇā hi kho me ceto-vimutti bhāvitā bahulī-katā yānī-katā vatthu-katā anuṭṭhitā paricitā susamāraddhā. Atha ca pana me vihesā cittaɱ pariyādāya tiṭṭhatī' ti. So 'Mā h'evan' ti 'ssa vacanīyo: 'Mā 'yasmā evaɱ avaca, mā Bhagavantaɱ abbhācikkhi, na hi sādhu Bhagavato abbhakkhānaɱ, na hi Bhagavā evaɱ vadeyya. Aṭṭhānam etaɱ āvuso anavakāso. Yaɱ karuṇāya ceto-vimuttiyā bhāvitāya bahulī-katāya yānī-katāya vatthu-katāya anuṭṭhitāya paricitāya susamāraddhāya atha ca pan'assa vihesā cittaɱ pariyādāya ṭhassatī'ti n'etaɱ ṭhānaɱ vijjati. Nissaraṇaɱ h'etaɱ āvuso vihesāya yad idaɱ karuṇā ceto-vimutti.
Idha pan'āvuso bhikkhu evaɱ vadeyya: 'Muditā hi kho me ceto-vimutti bhāvitā bahulī-katā yānī-katā vatthu-katā anuṭṭhitā paricitā susamāraddhā. Atha ca pana me arati cittaɱ pariyādāya tiṭṭhatī' ti. So 'Mā h'evan ti 'ssa vacanīyo, 'Mā 'yasmā evaɱ avaca, mā Bhagavantaɱ abbhācikkhi, na hi sādhu Bhagavato abbhakkhānaɱ, na hi Bhagavā evaɱ vadeyya.' Aṭṭhāname taɱ āvuso anavakāso. Yaɱ muditāya ceto-vimuttiyā bhāvitāya bahulī-katāya yānī-katāya vatthu- [249] katāya anuṭṭhitāya paricitāya susamāraddhāya, atha ca pan'assa arati cittaɱ pariyādāya ṭhassatī'ti, n'etaɱ ṭhānaɱ vijjati. Nissaraṇaɱ h'etaɱ āvuso aratiyā, yad idaɱ muditā ceto-vimutti.
Idha pan'āvuso bhikkhu evaɱ vadeyya: 'Upekkhā hi kho me ceto-vimutti bhāvitā bahulī-katā yānī-katā vatthu-katā anuṭṭhitā paricitā susamāraddhā. Atha ca pana me rāgo cittaɱ pariyādāya tiṭṭhatī' ti. So 'Mā h'evan ' ti.'ssa vacanīyo, 'Mā 'yasmā evaɱ avaca, mā Bhagavantaɱ abbhācikkhi, na hi sādhu Bhagavato abbhakkhānaɱ, na hi Bhagavā evaɱ vadeyya.' Aṭṭhānam etaɱ āvuso anavakāso. Yaɱ upekkhāya ceto-vimuttiyā bhāvitāya bahulī-katāya yānī-katāya vatthu-katāya anuṭṭhitāya paricitāya susamāraddhāya, atha ca pan'assa rāgo cittaɱ pariyādāya ṭhassatī'ti, n'etaɱ ṭhānaɱ vijjati. Nissaraṇaɱ h'etaɱ āvuso rāgassa, yad idaɱ upekkhā ceto-vimutti.
Idha pan'āvuso bhikkhu evaɱ vadeyya: 'Animittā hi kho me ceto-vimutti bhāvitā bahulī-katā yānī-katā vatthu-katā anuṭṭhitā paricitā susamāraddhā. Atha ca pana me nimittānusārī viññāṇaɱ hotī' ti. So 'Mā h'evan ' ti.'ssa vacanīyo, 'Mā 'yasmā evaɱ avaca, mā Bhagavantaɱ abbhācikkhi, na hi sādhu Bhagavato abbhakkhānaɱ, na hi Bhagavā evaɱ vadeyya.' Aṭṭhānam etaɱ āvuso anavakāso. Yaɱ animittāya ceto-vimuttiyā bhāvitāya bahulī-katāya yānī-katāya vatthu-katāya anuṭṭhitāya paricitāya susamāraddhāya, atha ca pan'assa nimittānusārī viññāṇaɱ bhavissa' ti.i, n'etaɱ ṭhānaɱ vijjati. Nissaraṇaɱ h'etaɱ āvuso sabba-nimittānaɱ, yad idaɱ animittā ceto-vimutti.
Idha pan'āvuso bhikkhu evaɱ vadeyya: '"Asmī" ti kho me vigataɱ "ayam aham asmī" ti na samanupassāmi. Atha ca pana me vicikicchā-kathaɱkathā-sallaɱ cittaɱ pariyādāya tiṭṭhatī' ti. So 'Mā h'evan' ti 'ssa vacanīyo, 'Mā 'yasmā evaɱ avaca, mā Bhagavantaɱ abbhācikkhi, na hi [250] sādhu Bhagavato abbhakkhānaɱ, na hi Bhagavā evaɱ vadeyya.' Aṭṭhānam etaɱ āvuso anavakāso. Yaɱ "asmī" ti vigate "ayam aham asmī" ti asamanupassato, atha ca pan'assa vicikicchā-kathaɱkathā-sallaɱ cittaɱ pariyādāya ṭhassatī' ti n'etaɱ ṭhānaɱ vijjati. Nissaraṇaɱ h'etaɱ āvuso vicikicchā-kathaɱkathā-sallassa, yad idaɱ "asmī" ti mānassa samugghāto.

[6.18][pts][wp][bd] Cha anuttariyāni:
Dassanānuttariyaɱ, savanānuttariyaɱ, lābhānuttariyaɱ, sikkhānuttariyaɱ, pāricariyānuttariyaɱ, anussatānuttariyaɱ.

[6.19][pts][wp][bd] Cha anussati-ṭhānāni:
Buddhānussati, dhammānussati, saŋghānussati, sīlānussati, cāgānussati, devatānussati.

[6.20][pts][wp][bd] Cha satata-vihārā:
Idh'āvuso bhikkhu cakkhunā rūpaɱ disvā n'eva sumano hoti na dummano, upekkhako viharati sato sampajāno.
Sotena saddaɱ sutvā n'eva sumano hoti na dummano, upekkhako viharati sato sampajāno.
Ghāṇena gadhaɱ ghāyitvā n'eva sumano hoti na dummano, upekkhako viharati sato sampajāno.
Jivhāya rasaɱ sāyitvā n'eva sumano hoti na dummano, upekkhako viharati sato sampajāno.
Kāyena phoṭṭhabbaɱ phūsitvā n'eva sumano hoti na dummano, upekkhako viharati sato sampajāno.
Manasā dhammaɱ viññāya n'eva sumano hoti na dummano, upekkhako viharati sato sampajāno.

[6.21][pts][wp][bd] chaḷ ābhijātiyo:
Idh'āvuso ekacco kaṇhābhi- [251] jātiko samāno kaṇhaɱ dhammaɱ abhijāyati. Idh'āvuso ekacco kaṇhābhijātiko samāno sukkaɱ dhammaɱ abhijāyati. Idh'āvuso ekacco kaṇhābhijātiko samāno akaṇhaɱ asukkaɱ nibbānaɱ abhijāyati. Idh'pan'āvuso ekacco sukkābhijātiko samāno sukkaɱ dhammaɱ abhijāyati. Idh'pan'āvuso ekacco sukkābhijātiko samāno kaṇhaɱ dhammaɱ abhijāyati. Idh'pan'āvuso ekacco sukkābhijātiko samāno akaṇhaɱ asukkaɱ nibbānaɱ abhijāyati.

[6.22][pts][wp][bd] Cha nibbedha-bhāgiyā-saññā:
Anicca-saññā, anicce dukkha-saññā, dukkhe anatta-saññā, pahāna-saññā, virāga-saññā, nirodha-saññā.

Ime kho āvuso tena Bhagavatā jānatā passatā arahatā sammā-sambuddhena cha dhammā sammād-akkhātā. Tattha sabbeh'eva saŋgāyitabbaɱ na vivaditabbaɱ, yathayidaɱ brahmacariyaɱ addhaniyaɱ assa ciraṭṭhitikaɱ, tadassa bahujanahitāya bahujanasukhāya lokānukampāya atthāya hitāya sukhāya deva-manussānaɱ.

Ime kho āvuso tena Bhagavatā jānatā passatā arahatā SammāSambuddhena cha dhammā sammad-akkhātā. Tattha sabbeh'eva saŋgāyitabbaɱ na vivaditabbaɱ, yathayidaɱ brahmacariyaɱ addhaniyaɱ assa cira-ṭṭhitikaɱ, tad assa bahujana-hitāya bahujana-sukhāya lokānukampāya atthāya hitāya sukhāya deva-manussānaɱ.


 [Ones and Twos]  [Threes]  [Fours]  [Fives]  [Sixes]  [Sevens]  [Eights]  [Nines]  [Tens]


Contact:
E-mail
Copyright Statement   Webmaster's Page