Khuddaka Nikaya


[Home]  [Sutta Indexes]  [Glossology]  [Site Sub-Sections]


 

Therī-Gāthā

Adapted from the 1995 edition of the digital version of the Sri Lanka Buddha Jayanti Tripitaka Series.

Namo tassa Bhagavato arahato Sammā Sambuddhassa

 


[123]

Ekaka Nipāto

1

[pts][than]

Itthaṃ sudaṃ aññatarā therī apaññātā bhikkhunī gāthaṃ abhāsitthāti

[1] Sukhaṃ supāhi therike katvā coḷena pārutā,||
Upasanto hi te rāgo sukkhaḍākaṃ va kumbhiyaṃ.|| ||

 

2
Muttā-Therī Gāthā

[pts]

Itthaṃ sudaṃ Bhagavā muttaṃ sikkhamānaṃ imāya gāthāya abhiṇhaṃ ovada

[2] Mutte muccassu yogehi cando Rāhuggaho iva,||
Vippamuttena cittena anaṇā bhuñjāhi piṇḍakaṃ.|| ||

 

3
Puṇṇā-Therī Gāthā

[pts][than]

Itthaṃ sudaṃ puṇṇā therī gāthaṃ abhāsitthāti

[3] Puṇṇe pūrassu dhammehi cando paṇṇarase-r-iva,
Paripuṇṇāya paññāya tamok-khandhaṃ padālaya.|| ||

 

4
Tisisā-Therī Gāthā

[pts]

Itthaṃ sudaṃ tissā therī gāthaṃ abhāsitthāti

[4] Tisse sikkhassu sikkhāya mā taṃ yogā upaccaguṃ,||
Sabba-yoga-visaṃyuttā cara loke anāsavā' ti.|| ||

 

5
Aññatarā Tissā-Therī Gāthā

[pts]

Itthaṃ sudaṃ tissā therī gāthaṃ abhāsitthāti

[5] Tisse yuñjassu dhammehi khaṇo taṃ mā upaccagā,||
Khaṇātītā hi socanti nirayamhi samappitā' ti.|| ||

 

6
Dhīrā-Therī Gāthā

[pts]

Itthaṃ sudaṃ dhīrā therī gāthaṃ abhāsitthāti

[6] [124] Dhīre nirodhaṃ phussehi saññā-vūpasamaṃ sukhaṃ,||
ārādhayāhi Nibbānaṃ yoga-k-khemaṃ anuttaraṃ.|| ||

 

7
Aññatarā Dhīrā or Vīrā-Therī Gāthā

[pts]

Itthaṃ sudaṃ vīrā therī gāthaṃ abhāsitthāti

[7] Dhīrā dhīrehi dhammehi bhikkhunī bhāvit'indriyā,||
Dhārehi antimaṃ dehaṃ chchetvā Māraṃ savāhanaṃ.|| ||

 

8
Mittā-Therī Gāthā

[pts]

Itthaṃ sudaṃ mittātherī gāthaṃ abhāsitthāti

[8] Saddhāya pabbajitvāna Mitte mittaratā bhava,||
Bhāvehi kusale dhamme yoga-k-khemassa pattiyā.|| ||

 

9
Bhadrā-Therī Gāthā

[pts]

Itthaṃ sudaṃ bhadrā therī gāthaṃ abhāsitthāti

[9] Saddhāya pabbajitvāna Bhadre bhadraratā bhava,||
Bhāvehi kusale dhamme yoga-k-khemaṃ anuttaraṃ|| ||

 

10
Upasamā-Therī Gāthā

[pts]

Itthaṃ sudaṃ upasamā therī gāthaṃ abhāsitthāti

[10] Upasame tare oghaṃ maccudheyyaṃ suduttaraṃ,||
Dhārehi antimaṃ dehaṃ chchetvā Māraṃ savāhanaṃ.|| ||

 

11
Muttā-Therī Gāthā

[pts][than]

Itthaṃ sudaṃ muttā therī gāthaṃ abhāsitthāti

[11] Sumuttā sādhu muttā'mhi tīhi khujjehi muttiyā,||
Udukkhalena musalena patinā khujjakena ca,||
Muttā'mhi jāti-maraṇā bhavanetti samūhatā.|| ||

 

12
Dhammadinnā-Therī Gāthā

[pts]

Itthaṃ sudaṃ dhammadinnā therī gāthaṃ abhāsitthāti

[12] Chanda-jātā avasāye manasā ca phuṭā siyā,||
Kāmesu appaṭi-baddha-cittā uddhaṃ sotā ti vuccatī.|| ||

 

13
Visākhā-Therī Gāthā

[pts]

Itthaṃ sudaṃ visākhā therī gāthaṃ abhāsitthāti

[13] Karotha Buddha-sāsanaṃ yaṃ katvā nānutappati,||
Khippaṃ pādāni dhovitvā ekam-ante nisīdathā.|| ||

 

14
Sumanā-Therī Gāthā

[pts]

Itthaṃ sudaṃ sumanā therī gāthaṃ abhāsitthāti

[14] Dhātuyo dukkhato disvā mā jāti punar āgami,||
Bhave chandaṃ virāchchetvā upasantā carissasī.|| ||

 

15
Uttarā-Therī Gāthā

[pts]

Itthaṃ sudaṃ uttarā therī gāthaṃ abhāsitthāti

[15] [125] Kāyena saṃvutā āsiṃ vācāya uda cetasā,||
Samūlaṃ taṇhaṃ abbuyha sītibhūta'mhi nibbutā.|| ||

 

16
Sumanā Vuḍḍha-Pabbajitā-Therī Gāthā

[pts]

Itthaṃ sudaṃ sumanā vuḍḍha-pabbajātā therī gāthaṃ abhāsitthāti

[16] Sukhaṃ tvaṃ vuḍḍhake sehi katvā coḷena pārutā,||
Upasanto hi te rāgo sītibhūtā si nibbutā.|| ||

 

17
Dhammā-Therī Gāthā

[pts][than]

Itthaṃ sudaṃ dhammā therī gāthaṃ abhāsitthāti

[17] Piṇḍapātaṃ caritvāna daṇḍam olubbha dubbalā,||
Vedhamānehi gattehi tatth'eva nipatiṃ chamā,||
Disvā ādīnavaṃ kāye atha cittaṃ vimucci meti.|| ||

 

18
Saṅghā-Therī Gāthā

[pts]

Itthaṃ sudaṃ saṅghā therī gāthaṃ abhāsitthāti

[18] Hitvā ghare pabba-jitvā hitvā puttaṃ pasuṃ piyaṃ,||
Hitvā rāgañ ca dosañ ca avijjañ ca virājiya,||
Samūlaṃ taṇhaṃ abbuyha upasanta'mhi nibbutā.|| ||

Ekaka-Nipāto Niṭṭhito

.

 

§

 

Duka Nipāto

 

19
Abhirūpa-Nandā-Therī Gāthā

[pts]

Itthaṃ sudaṃ Bhagavā abharūpa-Nandaṃ sikkhamānaṃ imāha gāthāhi abhiṇhaṃ ovadatī

[19] Āturaṃ asuciṃ pūtiṃ passa Nande samussayaṃ,||
Asubhāya cittaṃ bhavehi ek'aggaṃ susamāhitaṃ.|| ||

[20] Animittañ ca bhāvehi mān-ā-nusayam ujjaha,||
Tato mānābhisamayā upasantā carissasī.|| ||

 

20
Jentā-Therī Gāthā

[pts]

Itthaṃ sudaṃ jentā therī gāthāyo abhāsitthāti

[21] Ye ime satta bojjh'aṅgā maggā Nibbāna-pattiyā,||
Bhāvitā te mayā sabbe yathā Buddhena desitā.|| ||

[22] Diṭṭho hi me so Bhagavā antimo'yaṃ samussayo,||
Vikkhīṇo jāti-saṃsāro n'atthi dāni puna-b-bhavo.|| ||

 

21
Sumaṃgala-mātā-Therī Gāthā

[pts][than]

Itthaṃ sudaṃ Sumaṃgala-mātā therī gāthāyo abhāsitthāti

[23] [126] Sumuttike sumuttikā sādhu muttikā'mhi musalassa,||
Ahiriko me chattakaṃ vā pi ukkhalikā me deḷiddabhāvā ti.|| ||

[24] Rāgañ ca ahaṃ dosañ ca viccindantī viharāmi,||
Sā rukkha-mūlaṃ upagamma aho sukhan ti sukhato jhāyāmī.|| ||

 

22
Aḍḍhakāsī-Therī Gāthā

[pts]

Itthaṃ sudaṃ aḍḍhakāsītherī gāthāyo abhāsitthāti

[25] Yāva Kāsi-jana-pado suṅko me tattako ahu,||
Taṃ katvā negamo agghaṃ agghaṃ agghe'nagghaṃ ṭhapesi maṃ.|| ||

[26] Atha nibbind'ahaṃ rūpe nibbindañ ca virajj'ahaṃ,||
Mā puna jāti-saṃsāraṃ sandhāveyyaṃ puna-p-punaṃ,||
Tisso vijjā sacchi-katā kataṃ Buddhassa sāsanaṃ.|| ||

 

23
Cittā-Therī Gāthā

[pts]

Itthaṃ sudaṃ cittā therī gāthāyo abhāsitthāti

[27] Kiñ cāpi kho'mhi kisikā gilānā bāḷhadubbalā,||
Daṇaḍam olubbha gacchāmi pabbataṃ abhirūhiya.|| ||

[28] Saṅghāṭiṃ nikkhipitvāna pattakaṃ ca nikujjiya,||
Sele khambhesiṃ attāṇaṃ tamok-khandhaṃ padāliyā.|| ||

 

24
Mettikā-Therī Gāthā

[pts]

Itthaṃ sudaṃ mettikā therī gāthāyo abhāsitthāti

[29] Kiñ cāpi kho'mhi dukkhitā dubbalā gatayobbanā,||
Daṇaḍam olubbha gacchāmi pabbataṃ abhirūhiya.|| ||

[30] Nikkhipitvāna saṃghāṭiṃ pattakaṃ ca nikujjiya||
Nisinnā c'amhi selamhi atha cittaṃ vimucci me,||
Tisso vijjā anuppattā kataṃ Buddhassa sāsanaṃ.|| ||

 

25
Mettā-Therī Gāthā

[pts]

Itthaṃ sudaṃ mettā therī gāthāyo abhāsitthāti

[31] Cātuddasī pañca-dasī yā ca pakkhassa aṭṭhamī
Pārihārikapakkhañ ca aṭṭh'aṅgasu-samāgataṃ,||
[127] Uposathaṃ upāgañchiṃ deva-kāyābhinandinī.|| ||

[32] Sājja ekena bhattena muṇḍā saṃghāṭipārutā||
Devakāyaṃ na patthe'haṃ vineyya hadaye daraṃ.|| ||

 

26
Abhaya-mātā-Therī Gāthā

[pts]

Itthaṃ sudaṃ abhayamātā therī gāthāyo abhāsitthāti

[33] Uddhaṃ pādatalā amma adho ce kesa-matthakā,||
Paccavekkhassu'maṃ kāyaṃ asuciṃ pūtigandhikaṃ.|| ||

[34] Evaṃ vihāramānāya sabbo rāgo samūhato,||
Pariḷāho samucchinno sītibhūtā'mhi nibbutā.|| ||

 

27
Abhayā-Therī Gāthā

[pts]

Itthaṃ sudaṃ abhayātherī gāthāyo abhāsitthāti

[35] Abhaye bhiduro kāyo yattha sattā puthujjanā,||
Nikkhipissām'imaṃ dehaṃ sampajānā satīmatī.|| ||

[36] Bahūhi dikkha-dhammehi appamādaratāya me,||
Taṇha-k-khayo anuppatto kataṃ Buddhassa sāsanaṃ ti.|| ||

 

28
Sāmā-Therī Gāthā

[pts]

Itthaṃ sudaṃ sāmā therī gāthāyo abhāsitthāti

[37] Catukkhattuṃ pañcakkhattuṃ vihārā upani-k-khamiṃ,||
Aladdhā cetaso santiṃ citte aVasa-vattinī.|| ||

[38] Tassā me aṭṭhamī ratti taṇhā mayhaṃ samūhatā,||
Bahūhi dukkha-dhammehi appamādaratāya me,||
Taṇha-k-khayo anuppatto kataṃ Buddhassa sāsanaṃ.|| ||

Duka-Nipāto Niṭṭhito

 

§

 

Tika Nipāto

 

29
Aññatarā Sāmā-Therī Gāthā

[pts]

Itthaṃ sudaṃ sāmā therī gāthāyo abhāsitthāti

[39] Paṇṇa-vīsati vassāni yato pabbajitāya me
Nābhijānāmi cittassa samaṃ laddhaṃ kudācanaṃ.|| ||

[40] Aladdhā cetaso santiṃ citte aVasa-vattinī
Tato saṃvegam āpādiṃ saritvā jinasāsanaṃ.|| ||

[41] Bahūhi dukkha-dhammehi appamādaratāya me
Taṇha-k-khayo anuppatto kataṃ Buddhassa sāsanaṃ
[128] Ajja me sattamī ratti yato taṇhā visositā.|| ||

 

30
Uttamā-Therī Gāthā

[pts][than]

Itthaṃ sudaṃ uttamā therī gāthāyo abhāsitthāti

[42] Catukkhattuṃ pañcakkhattuṃ vihārā upani-k-khamiṃ
Aladdhā cetaso santiṃ citte aVasa-vattinī.|| ||

[43] Sā bhikkhunīṃ upagacchiṃ yā me saddhāyikā ahu
Sā me dhammam adesesi khandhāyatanadhatuyo.|| ||

[44] Tassā dhammaṃ suṇitvāna yathā maṃ anusāsi sā
Sattāhaṃ ekapallaṅke nisīdiṃ pīti-sukha-samappitā
Aṭṭhamiyā pāde pasāresiṃ tamok-khandhaṃ padāliyā.|| ||

 

31
Aññatarā Uttamā-Therī Gāthā

[pts]

Itthaṃ sudaṃ aparā uttamā therī gāthāyo abhāsitthāti

[45] Ye ime satta bejjhaṅgā maggā Nibbānapattiyā
Bhāvitā te mahā sabbe yathā Buddhena desitā.|| ||

[46] Suññatassānimittassa lābhinī'haṃ yad icchitaṃ
Orasā dhītā Buddassa Nibbān-ā-bhiratā sadā.|| ||

[47] Sabbe kāmā samucchinnā ye dibbā ye ca mānusā
Vikkhīṇo jāti-saṃsāro n'atthi dāni puna-b-bhavo.|| ||

 

32
Dantikā-Therī Gāthā

[pts][than]

Itthaṃ sudaṃ antikā therī gāthāyo abhāsitthāti

[48] Divāvihārā ni-k-khamma Gijjhakūṭamhi pabbate
Nāgaṃ ogāha-m-uttiṇṇaṃ nadītīramhi addasaṃ.|| ||

[49] Puriso aṅkusam ādāya dehi pādanti yā cati
Nāgo pasārayī pādaṃ puriso nāgam āruhi.|| ||

[50] Disvā adantaṃ damitaṃ manussānaṃ vasaṃ gataṃ,||
Tato cittaṃ samādhemi khalu tāya vanaṃ gatā.|| ||

 

33
Ubbirī-Therī Gāthā

[pts][than]

Itthaṃ sudaṃ ubbarī therī gāthāyo abhāsitthāti

[51] Amma Jīvā tī vanamhi kandasi attāṇaṃ adhigaccha Ubbirī||
Cūḷāsīti-sahassāni sabbā Jīva-sanāmikā
Etamh'āḷāhane daḍḍhā tāsaṃ kam anusocasi.|| ||

[52] [129] Abbuhī vata me sallaṃ duddasaṃ hadayanissitaṃ
Yaṃ me sokaparetāya dhītu sokaṃ vyapānudī.|| ||

[53] Sājja abbūḷhasallāhaṃ nicchātā parinibbutā
Buddhaṃ Dhammañ ca Saṅghañ ca upemi saraṇaṃ muniṃ.|| ||

 

34
Sukkā-Therī Gāthā

[pts]

Itthaṃ sudaṃ sukkā therī gāthāyo abhāsitthāti

[54] Kiṃ me katā Rājagahe manussā madhuṃ pītā va acchare
Ye Sukkaṃ na upāsanti desentiṃ Buddha-sāsanaṃ.|| ||

[55] Tañ ca appaṭivānīyaṃ asecanakam ojavaṃ
Pivanti maññe sappaññā valāhakam iv'addhagū.|| ||

[56] Sukkā sukkehi dhammehi vīta-rāgā samāhitā
Dhārehi antimaṃ dehaṃ chchetvā Māraṃ savāhanaṃ.|| ||

 

35
Selā-Therī Gāthā

[pts]

Itthaṃ sudaṃ selā therī gāthāyo abhāsitthāti

[57] N'atthi nissaraṇaṃ loke kiṃ vivekena kāhasi
Bhuñjāhi kāma-ratiyo māhu pacch-ā-nutāpinī.|| ||

[58] Sattisūlūpamā kāmā khandhanaṃ adhikuṭṭanā
Yaṃ tvaṃ kāma-ratiṃ brūsi aratī dāni sā mamaṃ.|| ||

[59] Sabbattha vihatā nandī tamokkhandho padālito
Evaṃ jānāhi pāpima nihato tvam asi antaka.|| ||

 

36
Somā-Therī Gāthā

[pts]

Itthaṃ sudaṃ somā therī gāthāyo abhāsitthāti

[60] Yaṃ taṃ isīhi pattabbaṃ ṭhānaṃ du-r-abhisaṃbhavaṃ
Na taṃ dvaṅgulipaññāya sakkā pappotum itthiyā.|| ||

[61] Itthibhāvo no kiṃ kayirā cittamhi susamāhite
ñāṇamhi vattamānamhi sammā dhammaṃ vipassato.|| ||

[62] [130] Sabbattha vihatā nandi tamokkhandho padālito
Evaṃ jānāhi pāpima nihato tvam asi antakā.|| ||

Tika-Nipāto Niṭṭhito

 

§

 

Catukka Nipāto

 

37
Bhaddā-Kāpilānī-Therī Gāthā

[pts]

Itthaṃ sudaṃ bhaddākāpilānī therī gāthāyo abhāsitthāti

[63] Putto Buddhassa dāyādo Kassapo susamāhito,||
Pubbe-nivāsaṃ yo vedī saggāpāyañ ca passati.|| ||

[64] Atho jātikkhayaṃ patto abhiññāvosito muni,||
Etāhi tīhi vijjāhi tevijjo hoti brāhmaṇo.|| ||

[65] Tath'eva Bhaddā Kāpilāni tevijjā maccuhāyinī,||
Dhāreti antimaṃ dehaṃ chchetvā Māraṃ savāhanaṃ.|| ||

[66] Disvā ādīnavaṃ loke ubho pabbajitā mayaṃ,||
Ty amhā khīṇ'āsavā dantā sītibhūtā'mha nibbutā ti.|| ||

Catukka-Nipāto Niṭṭhito

 

§

 

Pañcaka Nipāto

 

38
Aññatarā Bhikkhuni Therī Gāthā

[pts]

Itthaṃ sudaṃ aññatarā therī gāthāyo abhāsitthāti

[67] Paṇṇavīsati vassāni yato pabbajitā ahaṃ
accharāsaṃghātamattaṃ pi cittass'ūpasam'ajjhagaṃ.|| ||

[68] Aladdhā cetaso santiṃ kāmarāgen'avassutā,||
Bāhā paggayha kandantī vihāraṃ pāvisiṃ ahaṃ.|| ||

[69] Sā bhikkhunīm upāgacchiṃ yā me saddhāyikā ahu,||
Sā me dhammaṃ adesesi khandhāyatana-dhātuyo.|| ||

[70] Tassā dhammaṃ suṇitvāna ekamante upāvisiṃ,||
Pubbe-nivāsaṃ jānāmi dibba-cakkhuṃ visodhitaṃ.|| ||

[71] [131] Ceto paricca ñāṇañ ca sota-dhatu visodhitā,||
Ididhi pi me sacchi-katā patto me āsava-k-khayo,||
Cha me'bhiññā sacchi-katā kataṃ Buddhassa sāsanaṃ.|| ||

 

39
Vimalā-Therī Gāthā

[pts][than]

Itthaṃ sudaṃ Vimalā-therī gāthāyo abhāsitthāti

[72] Mattā vaṇṇena rūpena sobhaggena yasena ca,||
Yobbanena c'ūpatthaddhā aññā samatimaññi'haṃ.|| ||

[73] Vibhūsetvā imaṃ kāyaṃ sucittaṃ bālalāpanaṃ,||
Aṭṭhāsiṃ vesidvāramhi luddo pāsam iv'oḍḍiya.|| ||

[74] Pilandhanaṃ vidaṃsentī guyhaṃ pakāsikaṃ bahuṃ,||
Akāsiṃ vividhaṃ māyaṃ ujjhagghantī bahuṃ janaṃ.|| ||

[75] Sājja piṇḍaṃ caritvāna muṇḍā saṃghāṭipārutā,||
Nisinnā rukkha-mūlamhi avitakkassa lābhinī.|| ||

[76] Sabbe yogā samucchinnā ye dibbā ye ca mānusā,||
Khepetvā āsave sabbe sīti-bhūtā mhi nibbutā.|| ||

 

40
Sīhā-Therī Gāthā

[pts]

Itthaṃ sudaṃ sīhā therī gāthāyo abhāsitthāti

[77] A-yoniso-mana-sikārā kāma-rāgena additā, 1
Ahosaṃ uddhatā pubbe citte aVasa-vattinī.|| ||

[78] Pariyuṭṭitā kilesehi sukha-saññānuvattinī,
Samaṃ cittassa nālabhiṃ rāga-citta-vasānugā.|| ||

[79] Kisā paṇaḍu vivaṇṇā ca satta-vassāni cāri'haṃ,||
Nāhaṃ divā vā rattiṃ vā sukhaṃ vindiṃ sudukkhitā.|| ||

[80] Tato rajjuṃ gahetvāna pāvisaṃ vana-m-antaraṃ,||
Varaṃ me idha ubbandhaṃ yañ ca hīnaṃ pun'ācare.|| ||

[81] Daḷha-pāsaṃ karitvāna rukkha-sākhāya bandhiya,||
[132] Pakkhipiṃ pāsaṃ gīvāyaṃ atha cittaṃ vimucci me.|| ||

 

41
Sundarī Nandā-Therī Gāthā

[pts][than]

Itthaṃ sudaṃ Sundarī-Nandā-therī gāthāyo abhāsitthāti

[82] Āturaṃ asuciṃ pūtiṃ passa Nande samussayaṃ
Asubhāya cittaṃ bhāvehi ek'aggaṃ susamāhitaṃ.|| ||

[83] Yathā idaṃ tathā etaṃ yathā etaṃ tathā idaṃ
Duggandhaṃ pūtikaṃ vāti bālānaṃ abhinanditaṃ.|| ||

[84] Evam etaṃ avekkhantī rattin-divam atanditā
Tato sakāya paññāya abhinibbhijja dakkhisaṃ.|| ||

[85] Tassā me appamattāya vicinantiyā yoniso
Yathābhūtaṃ ayaṃ kāyo diṭṭho santarabāhiro.|| ||

[86] Atha nibbind'ahaṃ kāye ajjhattañ ca virajj'ahaṃ
Appamattā visaṃyuttā upasantā mhi nibbutā.|| ||

 

42
Nanduttarā-Therī Gāthā

[pts]

Itthaṃ sudaṃ nanduttarā therī gāthāyo abhāsitthāti

[87] Aggiṃ candañ ca sūriyañ ca devatā ca namassi'haṃ
Nadītitthāni gantvāna udakaṃ oruhāmi'haṃ.|| ||

[88] Bahuvatasamādānā aḍḍhaṃ sīsassa olikhiṃ,||
Chamāya seyyaṃ kappemi ratti-bhattaṃ na bhuñji'haṃ|| ||

[89] Vibhūsāmaṇḍanaratā n'hāpanucchādanehi ca
Upākāsiṃ imaṃ kāyaṃ kāma-rāgena additā.|| ||

[90] Tato saddhaṃ labhitvāna pabbajiṃ anagāriyaṃ,||
Disvā kāyaṃ tathā-bhūtaṃ kāmarāgo samūhato.|| ||

[91] Sabbe bhavā samucchinnā icchā ca patthanā pi ca,||
Sabba-yoga-visaṃyuttā santiṃ pāpuṇiṃ cetaso.|| ||

 

43
Mittākāḷi-Therī Gāthā

[pts][than]

Itthaṃ sudaṃ mittā kāḷi therī gāthāyo abhāsitthāti

[92] Saddhāya pabbajitvāna agārasmā anagāriyaṃ
Vicari'haṃ tena tena lābha-sakkāra ussukā.|| ||

[93] [133] Riñcitvā paramaṃ atthaṃ hīnaṃ attham asevi'haṃ
Kilesānaṃ vasaṃ gantvā sāmaññ'atthaṃ nirajji'haṃ.|| ||

[94] Tassā me ahu saṃvego nisinnāya vihārake
Ummagga-paṭipanna mhi taṇhāya vasam āgatā.|| ||

[95] Appakaṃ jīvitaṃ mayhaṃ jarā vyādhi ca maddati,||
Purāyaṃ bhijjati kāyo na me kālo pamajjituṃ.|| ||

[96] Yathābhūtaṃ apekkhantī khandhānaṃ udayabbayaṃ,||
Vimutta-cittā uṭṭhāsiṃ kataṃ Buddhassa sāsanaṃ.|| ||

 

44
Sakulā-Therī Gāthā

[pts]

Itthaṃ sudaṃ sakulātherī gāthāyo abhāsitthāti

[97] Agārasmiṃ vasantī'haṃ dhammaṃ sutvāna bhikkhuno,||
Addasaṃ virajaṃ dhammaṃ Nibbānaṃ padam accutaṃ.|| ||

[98] Sāhaṃ putta-dhītarañ ca dhana-dhaññañ ca chaḍḍiya
Kese chedāpayitvāna pabbajiṃ anagāriyaṃ.|| ||

[99] Sikkhamānā ahaṃ santīṃ bhāventī maggam añjasaṃ,||
Pahāsiṃ rāga-dosañ ca tadekaṭṭhe ca āsave.|| ||

[100] Bhikkhunī upasampajja pubba jātim anussariṃ
Dibba-cakkhuṃ visodhitaṃ vimalaṃ sādhu bhāvitaṃ.|| ||

[101] saṅkhāre parato disvā hetujāte palokine
Pahāsiṃ āsave sabbe sīti-bhūtā mhi nibbutā.|| ||


 

45
Soṇa-Therī Gāthā

[pts][than]

Itthaṃ sudaṃ soṇā therī gāthāyo abhāsitthāti

[102] Dasa putte vijāyitvā asmiṃ rūpa-samussaye
Tato'haṃ dubbalā jiṇṇā bhikkhunīṃ upasaṅkamiṃ.|| ||

[103] Sā me dhammam adesesi khandhayatanadhātuyo
Tassā dhammaṃ suṇitvāna kese chetvāna pabbajiṃ.|| ||

[104] Tassā me sikkhamānāya dibba-cakkhu visodhitaṃ,||
Pubbe-nivāsaṃ jānāmi yattha me vusitaṃ pure.|| ||

[105] [134] Animittañ ca bhāvemi ekaggā susamāhitā,||
Anantarā-vimokkhāsiṃ anupādāya nibbutā.|| ||

[106] Pañca kkhandhā pariññātā tiṭṭhanti chinna-mūlakā,||
ṭhītivatthuj'aneja mhi n'atthi dāni puna-b-bhavo.|| ||

 

46
Bhaddā (Purāṇṇa-Nigaṇṭhī) Kuṇḍalakesā Therī Gāthā

[pts]

Itthaṃ sudaṃ bhaddā kuṇḍalakesā therī gāthāyo abhāsitthāti

[107] Lūnakesī paṅkadharī ekasāṭī pure cariṃ,||
Avajje vajjamatinī vajje cāvajjadassinī.|| ||

[108] Divāvihārā ni-k-khamma Gijjhakūṭamhi pabbate
Addasaṃ virajaṃ Buddhaṃ bhikku-Saṅgha-purakkhataṃ.|| ||

[109] Nihacca jāṇuṃ vanditvā sammukhā pañjaliṃ ahaṃ,||
Ehi Bhadde ti avaca sā me ās'ūpasampadā.|| ||

[110] Ciṇṇā Aṅgā ca Magadhā Vajjī Kāsī ca Kosalā,||
Anaṇā paṇṇāsavassāni raṭṭhapiṇḍaṃ abhuñji'haṃ.|| ||

[111] Puññaṃ ca pasaviṃ bahuṃ sappañño vat'āyaṃ upāsako,||
Yo Bhaddāya cīvaraṃ adāsi muttāya sabbagandhehi.|| ||

 

47
Paṭācārā-Therī Gāthā

[pts][than]

Itthaṃ sudaṃ pamācārā theri gāthāyo abhāsitthāti

[112] Naṅgalehi kasaṃ khettaṃ bījāni pavapaṃ chamā,||
Puttadārāni posentā dhanaṃ vindanti mānavā.|| ||

[113] Kim ahaṃ sīla-sampannā satthu sāsanakārikā,||
Nibbānaṃ nādhigacchāmi akusitā anuddhati.|| ||

[114] Pade pakkhālayitvāna udake su karom'ahaṃ,||
Padodakañ ca disvāna thalato ninnam āgataṃ.|| ||

[115] Tato cittaṃ samādhemi assaṃ bhadraṃ va jāniyaṃ,||
[135] Tato dīpaṃ gahetvāna vihāraṃ pāvisiṃ ahaṃ.|| ||

[116] Seyyaṃ olokayitvāna mañcakamhi upāvisiṃ,||
Tato sūciṃ gahetvāna vaṭṭiṃ okassayām'ahaṃ
Padipasseva Nibbānaṃ vimokkho ahu cetaso.|| ||

 

48
Tiṃsa-mattā-Therī Bhikkhūnī-Gāthā

[pts][than]

Itthaṃ sudaṃ tiṃsamattā therī bhikkhunīyo gāthāyo abhāsitthāti

[117] Mūsalāni gahetvāna dhaññaṃ koṭṭenti mānavā
Puttadārāni posentā dhanaṃ vindanti mānavā:|| ||

[118] Karotha Buddha-sāsānaṃ yaṃ katvā nānutappati,||
Khippaṃ pādāni dhovitvā ekamante nisīdatha,||
Ceto-samatham anuyuttā karotha Buddha-sāsanaṃ.|| ||

[119] Tassā tā vacanaṃ sutvā Paṭācārāya sāsanaṃ,||
Pāde pakkhālayitvāna ekam-antaṃ upāvisuṃ,||
Ceto-samatham anuyuttā akaṃsu Buddha-sāsanaṃ.|| ||

[120] Rattiyā purime yāme pubba-jātiṃ anussaruṃ,||
Rattiyā majjhime yāme dibba-cakkhuṃ visodhayuṃ,||
Rattiyā pacchime yāme tamok-khandhaṃ padālayuṃ.|| ||

[121] Uṭṭhāya pāde vandiṃsu katā te anusāsanī,||
Indaṃ va devā tidasā saṅgāme aparājitaṃ,||
Purakkhitvā vihisssāma tevijja'mha anāsavā.|| ||

 

49
Canda-Therī Gāthā

[pts][than]

Itthaṃ sudaṃ candā therī gāthāyo abhāsitthāti

[122] Duggatāhaṃ pure āsiṃ vidhavā ca aputtikā,||
Vinā mittehi ñātīhi bhatta-coḷassa nādhigaṃ.|| ||

[123] Pattaṃ daṇḍañ ca gaṇhitvā bhikkhamānā kulā kulaṃ,||
Sītuṇhena ca ḍayhantī satta-vassāni cāri'haṃ.|| ||

[124] Bhikkuniṃ puna disvāna annapānassa lābhiniṃ,||
Upasaṃkammā avocaṃ pabbajiṃ anagāriyaṃ.|| ||

[125] [136] Sā ca maṃ anukampāya pabbajesi Paṭicarā,||
Tato maṃ ovaditvāna paramatthe niyojayī.|| ||

[126] Tassāhaṃ vacanaṃ sutvā akāsiṃ anusāsaniṃ,||
Amogho ayyāya ovādo tevijja'mhi anāsavā.|| ||

Pañcaka-Nipāto Niṭṭhito

Chakka Nipāto

 

50
Pañca-sata-Paṭācārā Therīnaṃ Gāthā

[pts][than]

Itthaṃ sudaṃ pañcasatamattā therī bhikkhunīyo gāthāyo abhāsitthāti

[127] Yassa maggaṃ na jānāsi āgatassa gatassa vā
Taṃ kuto āgataṃ puttaṃ mama putto ti rodasi.|| ||

[128] Maggañ ca kho'ssa jānāsi āgatassa gatassa vā
Na naṃ samanu-socesi evaṃ dhammā hi pāṇīno.|| ||

[129] Ayā-cito tato'gacchi ananuññāto ito gato
Kuto pi nūna āgantvā vasitvā katipāhakaṃ
Ito pi aññena-gato tato aññena gacchati.|| ||

[130] Peto manussarūpena saṃsaranto gamissati,||
Yathāgato tathā gato kā tattha paridevanā.|| ||

[131] Abbuhī vata me sallaṃ duddasaṃ hadayanissitaṃ
Yā me sokaparetāya puttasokaṃ vyapānudi.|| ||

[132] Sājja abbūḷhasallāhaṃ nicchātā parinibbutā
Buddhaṃ Dhammañ ca Saṅghañ ca upemi saraṇaṃ muniṃ.|| ||

 

51
Vāseṭṭhi-Therī Gāthā

[pts][than]

Itthaṃ sudaṃ vāseṭṭhi therī gāthāyo ahāsiti

[133] Puttasoken'ahaṃ aṭṭā khitta-cittā visaññinī,||
Naggā pakiṇṇakesi ca tena tena vicāri'haṃ.|| ||

[134] Vīthi-saṅkāra-kūṭesu susāne rathiyāsu ca
Acariṃ tīṇi vassāni khuppipāsā-samappitā.|| ||

[135] [137]Ath'addasāsi Sugataṃ nagaraṃ Mithilaṃ gataṃ,||
Adantānaṃ dametāraṃ sambuddham akutobhayaṃ.|| ||

[136] Saṃ-cittaṃ paṭiladdhāna vanditvāna upāvisiṃ
So me dhammam adesesi anukampāya Gotamo.|| ||

[137] Tassa dhammaṃ suṇitvāna pabbajiṃ anagāriyaṃ
Yuñjantī satthu vacane sacchākāsiṃ padaṃ sivaṃ.|| ||

[138] Sabbe sokā samucchinnā pahīnā etadantīkā
Pariññātā hi me vatthu yato sokāna-sambhavo.|| ||

 

52
Khemā-Therī Gāthā

[pts]

Itthaṃ sudaṃ Khemā theri gāthāyo abhāsīti

[139] Daharā tuvaṃ rūpavatī aham pi daharo yuvā,||
Pañcaṅgikena turiyena ehi Kheme ramāmase.|| ||

[140] Iminā pūtikāyena āturena pabhaṅgunā
Ammiyāmi harāyāmi kāma-taṇhā samūhatā.|| ||

[141] Sattisūḷūpamā-kāmā khandhānaṃ adhikuṭṭanā
Yaṃ tvaṃ kāmaratiṃ brūsi arati dāni sā mamaṃ.|| ||

[142] Sabbaṭtha vihatā nandi tamokkhandho padālito
Evaṃ jānāhi pāpima nihato tvam'asi antaka.|| ||

[143] Nakkhattāni namassantā aggiṃ paricaraṃ vane
Yathābhuccaṃ ajānantā bālā suddhiṃ amaññatha.|| ||

[144] Ahañ ca kho namassantī sambuddhaṃ purusuttamaṃ
Parimuttā sabba-dukkhehi satthu-sāsanakārikā.|| ||

 

53
Sujātā-Therī Gāthā

[pts]

Itthaṃ sudaṃ sujātā theri gāthāyo abhāsīti

[145] Alaṃ-katā suvasanā mālinī candanukkhitā
Sabbābharaṇasañchannā dāsīgaṇapurakkhatā.|| ||

[146] Annaṃ pānañ ca ādāya khajjaṃ bhojjaṃ anappakaṃ
Gehato ni-k-khamitvāna uyyānam abhihārayiṃ.|| ||

[147] [138] Tattha ramitvā kīḷitvā āga-c-chanti sakaṃ gharaṃ
Vihāraṃ dakkhiṃ pavisiṃ Sākete Añjanaṃ vanaṃ.|| ||

[148] Disvāna loka-pajjotaṃ vanditvāna upāvisiṃ||
So me dhammam-adesesi anukampāya cakkhumā.|| ||

[149] Sutvā ca kho mahesissa saccaṃ sampaṭivijjh'ahaṃ
Tatth'eva virajaṃ dhammaṃ phussayiṃ amataṃ padaṃ.|| ||

[150] Tato viññāta-Sad'Dhammā pabbajiṃ anagāriyaṃ
Tisso vijjā anuppattā amoghaṃ Buddha-sāsanaṃ.|| ||

 

54
Anopamā-Therī Gāthā

[pts][than]

Itthaṃ sudaṃ anopamā theri gāthāyo abhāsīti

[151] Ucce kule ahaṃ jātā bahuvitte mah-addhane
Vaṇṇarūpena sampannā dhītā Majjhassa atrajā.|| ||

[152] Patthitā rāja-puttehi seṭṭhi-puttehi gijjhitā
Pitu me pesayī dūtaṃ detha mayhaṃ Anopamaṃ.|| ||

[153] Yattakaṃ tulitā esā tuyhaṃ dhītā Anopamā||
Tato aṭṭhaguṇaṃ dassaṃ hiraññaṃ ratanāni ca.|| ||

[154] Sāhaṃ disvāna sambuddhaṃ lokajeṭṭhaṃ anuttaraṃ
Tassa pādāni vanditvā ekam-antaṃ upāvisiṃ.|| ||

[155] So me dhammam-adesesi anukampāya Gotamo
Nisinnā āsane tasmiṃ phussayiṃ tatiyaṃ phalaṃ.|| ||

[156] Tato kesāni chetvāna pabbajiṃ anagāriyaṃ
Sājja me sattami ratti yato taṇhā visositā.|| ||

 

55
Mahā-Pajāpatī-Gotamī-Therī Gāthā

[pts]

Itthaṃ sudaṃ Mahā-Pajāpatigotami therī gāthāyo abhāsīti

[157] Buddha vīra namo ty atthu sabba-sattāṇam uttama
Yo maṃ dukkhā pamocesi aññañ ca bahukaṃ janaṃ|| ||

[158] Sabba-dukkaṃ pariññātaṃ hetu-taṇhā visositā
Ariy'aṭṭhaṅgiko maggo nirodhe pūsito mayā|| ||

[159] [139] Mātā putto pitā bhātā ayyakā ca pure ahuṃ
Yathābhuccaṃ ajānantī saṃsarī'haṃ anibbisaṃ.|| ||

[160] Diṭṭho hi me so Bhagavā antime'yaṃ samussayo
Vikkhiṇo jāti-saṃsāro n'atthi dāni puna-b-bhavo.|| ||

[161] Āraddha-viriye pahit'atte niccaṃ daḷha-parakkame
Samagge sāvake passe esā Buddhāna vandanā.|| ||

[162] Bahunnaṃ vata atthāya Māyā janayi Gotamaṃ
Vyādhi-maraṇa-tunnānaṃ dukkha-k-khandhaṃ vyapānudi.|| ||

 

56
Guttā-Therī Gāthā

[pts]

Itthaṃ sudaṃ guttā therī gāthāyo abhasiti.

[163] Gutte yadatthaṃ pabbajjā hitvā puttaṃ pasuṃ samussayaṃ
Tam eva anubrūhehi mā cittassa vasaṃ gamī.|| ||

[164] Cittena vañcitā sattā Mārassa visaye ratā
Aneka-jāti-saṃsāraṃ sandhāvanti aviddasū.|| ||

[165] Kāma-c-chandañ ca vyāpādaṃ sakkāya-diṭṭhim eva ca
Sīl'abbata-parāmāsaṃ vicikicchañca pañcamaṃ.|| ||

[166] Saṅyojanani etāni pajahitvāna bhikkhuni,||
Orambhāgamanīyāni na-y-idaṃ punar ehisi.|| ||

[167] Rāgaṃ mānaṃ avijjañ ca uddhaccañ ca viVajjīya,||
Saṅyojanani chetvāna dukkhass'antaṃ karissasi.|| ||

[168] Khepetvā jāti-saṃsāraṃ pariññāya puna-b-bhavaṃ
Diṭṭhe'va dhamme nicchātā upasantā carissasi.|| ||

 

57
Vijayā-Therī Gāthā

[pts]

Itthaṃ sudaṃ vijayā theri gāthāyo abhasīti

[169] Catukkhattuṃ pañcakkhattuṃ vihārā upani-k-khamiṃ
Aladdhā cetaso santiṃ citte aVasa-vattinī.|| ||

[170] Bhikkhunīṃ upasaṅkamma sakkaccaṃ paripucch'ahaṃ,||
Sā me dhammam adesesi dhātu āyatanāni ca.|| ||

[171] [140] Cattāri ariya-saccānī indriyāni balāni ca
Bojjhaṅg'aṭṭh'aṅgikaṃ maggaṃ uttamatthassa pattiyā.|| ||

[172] Tassāhaṃ vacanaṃ sutva karontī anusāsanīṃ,||
Rattiyā purime yāme pubba-jātim anussariṃ.|| ||

[173] Rattiyā majjhime yāme dibba-cakkhuṃ visodhayiṃ,||
Rattiyā pacchime yāme tamok-khandhaṃ padālayiṃ.|| ||

[174] Pīti-sukhena ca kāyaṃ pharitvā vihariṃ tadā,||
Sattamiyā pāde pasāremi tamok-khandhaṃ padāliyā.|| ||

Chakka-Nipāto Niṭṭhito

 

§

 

Sattaka Nipāto

 

58
Uttarā-Therī Gāthā

[pts]

Itthaṃ sudaṃ uttarā therī gāthāyo abhāsīti

[175] Musalāni gahetvāna dhaññaṃ koṭṭenti mānavā,||
Puttadārāni posentā dhanaṃ vindanti mānavā.|| ||

[176] Ghaṭetha Buddha-sāsane yaṃ katva nānutappati,||
Khippaṃ pādāni dhovitva ekam-antaṃ nisīdatha.|| ||

[177] Cittaṃ upaṭṭha-petvāna ek'aggaṃ susamāhitaṃ,||
Paccavekkhatha saṅkhāre parato no ca attato.|| ||

[178] Tassāhaṃ vacānaṃ sutvā Paṭācārānusāsaniṃ,||
pāde pakkhālayitvāna ekam-ante upāvisiṃ.|| ||

[179] Rattiyā purime yāme pubba-jātim anussariṃ||
Rattiyā majjhime yāme dibba-cakkhuṃ visodhayiṃ.|| ||

[180] Rattiyā pacchime yāme tamok-khandhaṃ padālayiṃ,||
Tevijjā atha vuṭṭhāmi katā te anusāsanī|| ||

[181] Sakkaṃ va devā tidasā saṅgāme aparājitaṃ,||
Purakkhitvā vihissāmi tevijja'mhi anāsavā.|| ||

 

59
Cālā-Therī Gāthā

[pts]

Itthaṃ sudaṃ cālā therī gāthāyo abhāsiti

[182] [141] Satiṃ upaṭṭha-petvāna bhikkhunī bhāvit'indriyā,||
Paṭivijjhiṃ padaṃ santaṃ saṅkhārūpasamaṃ sukhaṃ,|| ||

[183] Kin nū uddissa muṇḍā samaṇī viya dissasi,||
Na ca rocesi pāsaṇḍe kim idaṃ carasi momuhā.|| ||

[184] Ito bahiddhā pāsaṇḍā diṭṭhiyo upanissitā,||
Na te dhammaṃ vijananti na te dhammassa kovidā.|| ||

[185] Atthi Sakyakule jāto Buddho appaṭi-puggalo,||
So me dhammam adesesi diṭṭhinaṃ samati-k-kamaṃ.|| ||

[186] Dukkhaṃ dukkha-samuppādaṃ dukkhassa ca ati-k-kamaṃ,||
Ariy'aṭṭhaṅgikaṃ maggaṃ dukkhūpasama-gāminaṃ.|| ||

[187] Tassāhaṃ vacanaṃ sutvā vihariṃ sāsane ratā,||
Tisso vijjā anuppattā kataṃ Buddhassa sāsanaṃ|| ||

[188] Sabbattha vihatā nandi tamokkhandho padālito||
Evaṃ jānāhi pāpima nihato tvam asi antakā.|| ||

 

60
Upacālā-Therī Gāthā

[pts]

Itthaṃ sudaṃ upacālātheri gāthāyo abhāsīti

[189] Satimatī cakkhu-mati bhikkhunī bhāvit'indriyā,||
Paṭivijjhiṃ padaṃ santaṃ akā-purisa-sevitaṃ.|| ||

[190] Kiṃ nu jātiṃ na rocesi jāto kāmāni bhuñjati,||
Bhuñjāhi kāma-ratiyo māhu pacch-ā-nutāpinī.|| ||

[191] Jātassa maraṇaṃ hoti hattha-pādāna chedanaṃ||
Vadha-bandha-pariklesaṃ jāto dukkhaṃ nigacchati.|| ||

[192] Attha Sakyakule jāto sambuddho aparājito,||
So me dhammam adesesi jātiyā samati-k-kamaṃ.|| ||

[193] Dukkhaṃ dukkha-samuppādaṃ dukkhassa ca ati-k-kamaṃ,||
Ariy'aṭṭh'aṅgikaṃ maggaṃ dukkh'ūpasama-gāminaṃ.|| ||

[194] Tassāhaṃ vacanaṃ sutvā vihāraṃ sāsane ratā||
Tisso vijjā anuppattā kataṃ Buddhassa sāsanaṃ.|| ||

[195] [142] Sabbattha vihatā nandi tamokkhandho padālito,||
Evaṃ jānāhi pāpima nihato tvam asi antakāti.|| ||

Sattaka-Nipāto Niṭṭhito

 

§

 

Aṭṭhaka Nipāto

 

61
Sīs-Ūpacālā-Therī Gāthā

[pts]

Itthaṃ sudaṃ sīsūpacālā theri gāthāyo abhāsīti

[196] Bhikkhunī sīla-sampannā indriyesu susaṃvutā,||
Adhigacche padaṃ santaṃ asecanakam ojavaṃ.|| ||

[197] Tāvatiṃsā ca Yāmā ca Tusitā cāpi devatā||
Nimmāṇaratino devā ye devā Vasa-vattino,||
Tattha cittaṃ paṇidhehi yattha te vusitaṃ pure.|| ||

[198] Tāvatiṃsā ca Yāmā ca Tusitā cāpi devatā,||
Nimmāṇaratino devā ye devā Vasa-vattino.|| ||

[199] Kālaṃ kālaṃ bhavā bhavaṃ Sakkāyasmiṃ purakkhatā,||
avīti-vattā Sakkāyaṃ jāti-maraṇa-sārino.|| ||

[200] Sabbo ādipito loko sabbo loko padipito,||
Sabbo pajjalito loko sabbo loko pakampito.|| ||

[201] Akampitaṃ atuliyaṃ aputhu-j-janasevitaṃ,||
Buddho dhammaṃ me desesi tattha me nirato mano.|| ||

[202] Tassa'haṃ vacanaṃ sutvā vihiṃ sāsane ratā,||
Tisso vijjā anuppattā kataṃ Buddhassa sāsanaṃ.|| ||

[203] Sabbattha vihatā nandi tamokkhandho padālito,||
Evaṃ jānāhi pāpima nihato tvam asi antakā.|| ||

Aṭṭhaka-Nipāto Niṭṭhito

 

§

 

Navaka Nipatā

 

62
Vaḍḍha-mātā-Therī Gāthā

[pts]

Itthaṃ sudaṃ vaḍḍhamātā therī gāthāyo abhāsiti

[204] Mā su te Vaḍḍha lokamhi vanatho ahu kudācanaṃ,||
Mā puttaka puna-p-punaṃ ahu dukkhassa bhāgimā,|| ||

[205] [143] Sukhaṃ hi Vaḍḍha munayo anejā chinnasaṃsayā,||
Sīti-bhūtā damappattā vihāranti anāsavā.|| ||

[206] Teh'ānuciṇṇaṃ isibhi maggaṃ dassanapattiyā||
Dukkhass'antakiriyāya tvaṃ Vaḍḍha anubrūhaya.|| ||

[207] Visāradā va bhaṇasi etam atthaṃ janetti me,||
Maññāmi nūna māmike vanatho te na vijjati.|| ||

[208] Ye keci Vaḍḍha saṅkhārā hīnā-ukkaṭṭha-majjhimā'
Aṇū pi aṇumatto pi vanatho me na vijjati.|| ||

[209] Sabbe me āsavā khīṇā appamattasasa jhāyato,||
Tisso vijjā anuppattā kataṃ Buddhassa sāsanaṃ.|| ||

[210] Uḷāraṃ vata me mātā patodaṃ samavassari||
Paramattha-saṃhitā gāthā yathā pi anukampikā.|| ||

[211] Tassāhaṃ vacanaṃ sutvā anusiṭṭhiṃ janettiyā,||
Dhamma-saṃvegam āpādiṃ yoga-k-khemassa pattiyā.|| ||

[212] So'haṃ padhāna-pahit'atto rattin-divam atandito,||
Mātarā codito santo aphusiṃ santimuttamaṃ.|| ||

Navaka-Nipato Niṭṭhito

 

§

 

Eka-Dasa Nipāto

 

63
Kisā-Gotamī-Therī Gāthā

[pts][than][heck]

Itthaṃ sudaṃ kisa Gotamī therī gāthāyo abhāsīti

[213] Kalyāṇa-mittatā muninā lokaṃ ādissa vaṇṇitā,||
Kalyāṇa-mitte bhajamāno api bālo paṇḍito assa.|| ||

[214] Bhajitabbā sappurisā paññā tathā pavaḍḍhati bhajantānaṃ,||
Bhajamāno sappurise sabbehi pi dukkhehi mucceyya.|| ||

[215] Dukkhañ ca vijāneyya dukkhassa ca samudayaṃ||
Nirodhañ ca Aṭṭhaṅgikaṃ Maggaṃ Cattāri Ariya-saccāni.|| ||

[216] [144] Dukkho itthi-bhāvo akkhāto purisa-damma-sārathinā,||
Sapattikam pi dukkhaṃ appekaccā sakiṃ vijātāyo.|| ||

[217] Gale apakantanti sukhumāliniyo visāni khādanti,||
Janamārakamajjhagatā ubho pi vyasanāni anubhonti.|| ||

[218] Upavijaññā gacchanti addasāhaṃ patiṃ mataṃ panthe
Vijāyitvāna appattāhaṃ sakaṃ gehaṃ.|| ||

[219] Dve puttā kālaṅkatā patī ca panthe mato kapaṇikāya,||
Mātā pitā ca bhātā ḍayhanti ca eka-cita-kāyaṃ.|| ||

[220] Khīṇakuline kapaṇe anubhūtaṃ te dukkhaṃ aparimāṇaṃ
Assu ca te pavattaṃ bahūni jāti-sahassāni,|| ||

[221] Passiṃ taṃ susānamajjhe atho pi khāditāni puttamaṃsāni
Hatakulikā sabbagarahitā mata-patikā amataṃ adhigacchiṃ.|| ||

[222] Bhāvito me maggo ariyo aṭṭhaṅgiko amata-gāmi||
Nibbānaṃ sacchikataṃ dhammādāsaṃ apekkhi'haṃ.|| ||

[223] Aham amhi kantasallā ohita-bhārā kataṃ hi karaṇiyaṃ,||
Kisāgotami therī su-vimutta-cittā imaṃ bhaṇi ti.|| ||

Ekā-dasa-Nipāto Niṭṭhito

 

§

 

Dvā-Dasa Nipāto

 

64
Uppalavaṇṇā-Therī Gāthā

[pts]

Itthaṃ sudaṃ uppalavaṇṇā therī gāthāyo abhāsīti

[224] Ubho mātā ca dhītā ca mayaṃ āsuṃ sapattiyo||
Tassā me ahu saṃvego abbhuto lomahaṃsano.|| ||

[225] Dhi-r-atthu kāmā asucī duggandhā bahu-kaṇṭakā,||
Yattha mātā ca dhītā ca sabhariyā mayaṃ ahuṃ.|| ||

[226] [145] Kāmesv'ādīnavaṃ disvā nekkhammaṃ daḷha-khemato,||
Sā pabbajiṃ Rājagahe agārasmā anagāriyaṃ.|| ||

[227] Pubbe-nivāsaṃ jānāmi dibba-cakkhuṃ visodhitaṃ,||
Ceto-paricca ñāṇañ ca sota-dhātu visodhitā.|| ||

[228] Iddhī pi me sacchi-katā patto me āsavakkheyo,||
Cha me abhiññā sacchi-katā kataṃ Buddhassa sāsanaṃ.|| ||

[229] Iddhiyā abhinimmitvā caturassaṃ rathaṃ ahaṃ,||
Buddhassa pāde vanditvā lokanāthassa sirīmato.|| ||

[230] Supupphitaggaṃ upagamma pādapaṃ
Ekā tuvaṃ tiṭṭhasi rukkha-mūle,||
Na cāpi te dutiyo atthi koci
Na tvaṃ bāle bhāyasi dhuttakānaṃ.|| ||

[231] Sataṃ sahassāna pi dhuttakānaṃ
Samāgatā edisakā bhaveyyuṃ
Lomaṃ na iñje na pi sampavedhe
Kiṃ me tuvaṃ Māra karissas'eko.|| ||

[232] Esā antara-dhāyāmi kucchiṃ vā pavisāmi te
Bhamukantare tiṭṭhāmi tiṭṭhantiṃ maṃ na dakkhasi.|| ||

[233] Citta'mhi vasī-bhūtāhaṃ iddhi-pādā subhāvitā,||
Cha me abhiññā sacchi-katā kataṃ Buddhassa sāsanaṃ.|| ||

[234] Sattisūlūpamā kāmā khandhānaṃ adhikuṭṭanā,||
Yaṃ tvaṃ kāmaratiṃ brūsi aratī dāni sā mama.|| ||

[235] Sabbattha vihatā nandi tamokkhandho padālito,||
Evaṃ jānāhi pāpima nihato tvam asi antakā ti.|| ||

Dvā-dasa-Nipāto Niṭṭhito

 

§

 

Soḷasa Nipāto

 

65
Puṇṇikā-Therī Gāthā

[pts][than]

Itthaṃ sudaṃ puṇṇā therī gāthāyo abhāsīti

[236] Udaka-āhari ahaṃ sīte sadā udakam otariṃ,||
Ayyānaṃ daṇḍa-bhayabhītā vācā-dosa-bhayadditā.|| ||

[237] Kassa brāhmaṇa tvaṃ bhīto sadā udakam otari,||
Vedhamānehi gattehi sītaṃ vedayase bhūsaṃ.|| ||

[238] Jānantī ca tuvaṃ bhoti Puṇṇike paripucchasi,||
Karontaṃ kusalaṃ kammaṃ rudhantaṃ kamma pāpakaṃ.|| ||

[239] Yo ca vuḍḍho daharo vā pāpa-kammaṃ pakubbati,||
Udakābhisecanā so pi pāpa-kammā pamuccati.|| ||

[240] Ko nu te idam akkhāsi ajānantassa ajānato,||
Udakābhisecanā nāma pāpa-kammā pamuccati.|| ||

[241] Saggaṃ nūna gamissanti sabbe maṇḍukakacchapā,||
Nāgā ca suṃsumārā ca ye c'aññe udake-carā.|| ||

[242] Orabbhikā sūkarikā macchakā miga-bandhakā,||
Corā ca vajjhaghātā ca ye c'aññe pāpa-kammino,||
Udakābhisecanā te pi pāpa-kammā pamuccare.|| ||

[243] Sace imā nadiyo te pāpaṃ pubbe-kataṃ vaheyyuṃ,||
Puññaṃ p'imā vaheyyuṃ tena tvaṃ paribāhiro assa.|| ||

[244] Yassa brāhmaṇa tvaṃ bhīto sadā udakam otari,||
Tam eva brahme mā kāsi mā te sītaṃ chaviṃ hane.|| ||

[245] Kummaggaṃ paṭipannaṃ maṃ ariya-maggaṃ samānayi,||
Udakābhisecanaṃ bhoti imaṃ sāṭaṃ dadāmi te.|| ||

[246] Tuyh'eva sāṭako hotu n-ā-haṃ icchāmi sāṭakaṃ,||
Sace bhāyasi dukkhassa sace te dukkham appiyaṃ.|| ||

[247] [147] Mā kāsi pāpakaṃ kammaṃ āvī vā yadi vā raho,||
Sace ca pāpakaṃ kammaṃ karissasi karosi vā.|| ||

[248] Na te dukkhā pamutty atthi upeccāpi palāyato,||
Sace bhāsasi dukkhassa sace te dukkham appiyaṃ.|| ||

[249] Upehi Buddhaṃ saraṇaṃ Dhammaṃ Saṅghañ ca tādinaṃ,||
Samādiyāhi sīlāni taṃ te atthāya hehiti.|| ||

[250] Upemi Buddhaṃ saraṇaṃ Dhammaṃ Saṅghañca tādinaṃ,||
Samādiyāmi sīlāni tam me atthāya hehiti.|| ||

[251] Brahma-bandhu pure āsiṃ ajj'amhi saccaṃ brāhmaṇo,||
Tevijjo veda-sampanno sotthiyo c'amhi n'hātako.|| ||

Soḷasa-Nipāto Niṭṭhito

 

§

 

Vīsati Nipāto

 

66
Ambapālī-Therī Gāthā

[pts][than]

Itthaṃ sudaṃ ambapālī therī gāthāyo abhāsīti

[252] Kāḷakā bhamara-vaṇṇasādisā vellitaggā mama muddhajā ahuṃ,||
Te jarāya sāṇavākasādisā sacca-vādi-vacanaṃ anaññathā.|| ||

[253] Vāsito va surabhīkaraṇḍako pupphapūraṃ mama uttamaṅgabhu,||
Taṃ jarāya sasalomagandhikaṃ sacca-vādi-vacanaṃ anaññathā.|| ||

[254] Kānanaṃ va sahitaṃ suropitaṃ Kocchasūcivicitaggasobhitaṃ,||
Taṃ jarāya viralaṃ tahiṃ tahiṃ sacca-vādi-vacanaṃ anaññathā.|| ||

[255] Saṇhakhandhana-suvaṇṇa-maṇḍitaṃ sobhate su veṇīhi alaṅkataṃ,||
[148] Taṃ jarāya khalati siraṃ kataṃ sacca-vādi-vacanaṃ anaññathā.|| ||

[256] Citta-kāra-sukatā va lekhitā sobhate su bhamukā pure mama,||
Tā jarāya valīhi palambitā sacca-vādi-vacanaṃ anaññathā.|| ||

[257] Bhassarā surucirā yathā maṇi nettā'hesuṃ abhinīla-m-ayatā,||
Te jarāy'abhihatā na sobhatā sacca-vādi-vacanaṃ anaññathā.|| ||

[258] Saṇhatuṅgasadisī ca nāsikā sobhate su abhiyobbanaṃ pati
Sā jarāya uppakūlitā viya sacca-vādi-vacanaṃ anaññathā.|| ||

[259] Kaṅkaṇaṃ va sukataṃ suniṭṭhitaṃ sobhate su mama kaṇṇapāḷiyo
Tā jarāya valīhi palambitā sacca-vādi-vacanaṃ anaññathā.|| ||

[260] Pattalimakula-vaṇṇasādisā sobhate su dantā pure mama
Te jarāya khaṇḍā yava pītakā sacca-vādi-vacanaṃ anaññathā.|| ||

[261] Kānanasmiṃ vana-saṇḍacāriṇī kokilā va madhuraṃ nikūjitaṃ
Taṃ jarāya khalitaṃ tahiṃ tahiṃ sacca-vādi-vacanaṃ anaññathā.|| ||

[262] Saṇhakampurī va suppamajjitā sobhate su gīvā pure mama
Sā jarāyaya bhaggā vināsitā sacca-vādi-vacanaṃ anaññathā.|| ||

[263] [149] Vaṭṭapalighasadisopamā ubho sobhate su bāhā pure mama
Tā jarāya yathā pāṭali dubbalikā sacca-vādi-vacanaṃ anaññathā.|| ||

[264] Saṇha-muddika-suvaṇṇa-maṇḍitā sobhate su hatthā pure mama
Te jarāya yatha mūla-mūlikā sacca-vādi-vacanaṃ anaññathā.|| ||

[265] Pīnavaṭṭa pahituggatā ubho sobhate su thanakā pure mama
Te rindī va lambanti'nodakā sacca-vādi-vacanaṃ anaññathā.|| ||

[266] Kañcanassa phalanaṃ va sumaṭṭaṃ sobhate su kāyo pure mama
So valīhi sukhumāhi otato sacca-vādi-vacanaṃ anaññathā.|| ||

[267] Nāga-bhogasa-disopamā ubho sobhate su ūru pure mama
Te jarāya yatha veḷunāḷiyo sacca-vādi-vacanaṃ anaññathā.|| ||

[268] Saṇhanūpura-suvaṇṇa-maṇḍitā sobhate su jaṅghā pure mama
Tā jarāya tiladaṇḍakā-r-iva sacca-vādi-vacanaṃ anaññathā.|| ||

[269] Tūlapuṇṇasa-disopamā ubho sobhate su pādā pure mama
Te jarāya phuṭikā valīmatā sacca-vādi-vacanaṃ anaññathā.|| ||

[270] Ediso ahu ayaṃ samussayo jajjaro bahu-dukkhānam ālayo
[150] So'palepapatito jarāghāro sacca-vādi-vacanaṃ anaññathā.|| ||

 

67
Rohiṇī-Therī Gāthā

[pts][than]

Itthaṃ sudaṃ rohiṇī therī gāthāyo abhāsīti

[271] Samaṇā ti bhoti maṃ vipassi samaṇā ti paṭibujjhasi
Samaṇānam eva kittesi samaṇī nūna bhavissasi.|| ||

[272] Vipulaṃ annañ ca pānañ ca samaṇānaṃ pavecchasi
Rohiṇī'dāni pucchāmi kena te samaṇā piyā?|| ||

[273] Akamma-kāmā alasā paradattopajīvino
āsaṃsukā sādukāmā kena te samaṇā piyā?|| ||

[274] Cirassaṃ vata man tāta samaṇānaṃ paripucchasi
Tesaṃ te kittayissāmi paññā-sīla-parakkamaṃ.|| ||

[275] Kamma-kāmā analasā kamma-seṭṭhassa kārakā
Rāgaṃ dosaṃ pajahanti tena me samaṇā piyā.|| ||

[276] Tīṇi pāpassa mūlāni dhunanti suci kārino
Sabba-pāpaṃ pahīn'esaṃ tena me samaṇā piyā.|| ||

[277] Kāya-kamma suci nesaṃ vacī-kammaṃ ca tādisaṃ
Mano-kamma suci nesaṃ tena me samaṇā piyā.|| ||

[278] Vimalā saṅkhamuttā'va suddhā santarabāhirā
Puṇṇā sukkāna dhammānaṃ tena me samaṇā piyā.|| ||

[279] Bahu-s-sutā dhammaddharā ariyā dhamma-jīvino
Atthaṃ Dhammañ ca desenti tena me samaṇā piyā.|| ||

[280] Bahu-s-sutā dhammaddharā ariyā dhamma-jīvino
Ekagga-cittā satimanto tena me samaṇā piyā.|| ||

[281] Dūraṅgamā satimanto mantabhāṇī anuddhatā
Dukkhass'antaṃ pajānanti tena me samaṇā piyā.|| ||

[282] Yamhā gāmā pakkamanti ne vilokenti niñcanaṃ
Anapekkhā va gacchanti tena me samaṇā piyā.|| ||

[283] [151] Na te saṃ koṭṭhe osenti na kumbhiṃ na khalopiyaṃ
Pariniṭṭhitam esānā tena me samaṇā piyā.|| ||

[284] Na te hiraññaṃ gaṇhanti na suvaṇṇaṃ na rūpiyaṃ
Paccuppannena yāpenti tena me samaṇā piyā.|| ||

[285] Nānākulā pabbajitā nānājana-padehi ca
Aññamaññaṃ piyāyanti tena me samaṇā piyā.|| ||

[286] Atthāya vata no bhoti kule jātā si Rohiṇī
Saddhā Buddhe ca Dhamme ca Saṅghe ca tibba-gāravā.|| ||

[287] Tuvaṃ h'etaṃ pajānāsi puñña-k-khettaṃ anuttaraṃ
Amham pi ca ete samaṇā patigaṇhanti dakkhiṇaṃ
Patiṭṭhito h'ettha yañño vipulo no bhavissati.|| ||

[288] Sace bhāyasi dukkhassa sace te dukkham appiyaṃ
Upehi saraṇaṃ Buddhaṃ Dhammaṃ Saṅghañ ca tādinaṃ,||
Samādiyāhi sīlāni taṃ te atthāya hehiti.|| ||

[289] Upemi saraṇaṃ Buddhaṃ Dhammaṃ Saṅghañ ca tādinaṃ,||
Samādiyāhi sīlāni taṃ me atthāya hehiti.|| ||

[290] Brahmabandhu pure āsiṃ so idāni'mhi brāhmaṇo
Tevijjo sotthiyo c'amhi vedagū c'amhi nhātako.|| ||

 

68
Cāpā-Therī Gāthā

[pts]

Itthaṃ sudaṃ cāpā therī gāthāyo abhāsīti

[291] Laṭṭhi-hattho pure āsī so dāni migaluddako,||
āsāya palipā ghorā nāsakkhiṃ pāram etase.|| ||

[292] Sumuttaṃ maṃ mañña-mānā Cāpā puttam atosayī,||
Cāpāya bandhanaṃ chchetvā pabbajissaṃ puno-m-ahaṃ.|| ||

[293] Mā me kujjha mahā-vīra mā me kujjha mahā-munī,||
Na hi ko'dhaparetassa suddhi atthi kuto tapo.|| ||

[294] [152] Pakkamissaṃ ca Nālāto ko'dha Nālāya vacchati,||
Bandhantī itthi-rūpena samaṇe dhamma-jīvino.|| ||

[295] Ehi Kāḷa nivattassu bhuñja kāme yathā pure
Ahañ ca te vasī katā ye ca me santi ñātakā.|| ||

[296] Etto c'eva catubbhāgaṃ yathā bhāsasi tvaṃ Cāpe
Tayi rattassa posassa uḷāraṃ vata taṃ siyā.|| ||

[297] Kāḷa'ṅginiṃ va takkāriṃ pupphitaṃ girimuddhanī
Phullaṃ dāḷikalaṭṭhiṃ va anto dīpe va pāṭaḷiṃ.|| ||

[298] Haricandanalittaṅgiṃ kāsikuttamadhāriṇiṃ
Taṃ maṃ rūpavatiṃ santiṃ kassa ohāya gacchasi.|| ||

[299] Sākuntiko va sakuṇiṃ yathā bandhitum icchati,||
āharimena rūpena na maṃ tvaṃ bādhayissasi.|| ||

[300] Imaṃ ca me puttaphalaṃ Kāḷa uppāditaṃ tayā,||
Taṃ maṃ puttavatiṃ santiṃ kassa ohāya gacchasi.|| ||

[301] Jahanti putte sappaññā tato ñātī tato dhanaṃ,||
Pabbajanti mahāvīrā nāgo chetvā va bandhanaṃ.|| ||

[302] Idāni te imaṃ puttaṃ daṇḍena churikāya vā,||
Bhūmiyaṃ vā nisumbheyyaṃ puttasokā na gacchasi.|| ||

[303] Sace putaṃ sigālānaṃ kukkurānaṃ padāhisi,||
Na maṃ puttakate jammī, punar āvattayissasi.|| ||

[304] Handa kho dāni bhaddan te kuhiṃ Kāḷa gamissasi,||
[153] Katamaṃ gāmaṃ nigamaṃ nagaraṃ rāja-dhāniyo.|| ||

[305] Ahumha pubbe gaṇino assamaṇā samaṇamānino,||
Gāmena gāmaṃ vicarimha nagare rāja-dhāniyo.|| ||

[306] Eso hi Bhagavā Buddho nadiṃ Nerañjaraṃ pati,||
Sabba-dukkhappahānāya dhammaṃ deseti pāṇinaṃ
Tassāhaṃ santike gacchaṃ so me satthā bhavissati.|| ||

[307] Vandanaṃ dāni vajjāsi lokanāthaṃ anuttaraṃ
Padakkhiṇañ ca katvāna ādiseyyāsi dakkhiṇaṃ.|| ||

[308] Etaṃ kho labbham amhehi yathā bhasasi tvaṃ Cāpe
Vandanaṃ dāni te vajjaṃ lokanāthaṃ anuttaraṃ,||
Padakkhiṇañ ca katvāna ādisissāmi dakkhiṇaṃ.|| ||

[309] Tato ca Kālo pakkāmi nadiṃ Nerañjaraṃ pati,||
So addasāsi sambuddhaṃ desentaṃ amataṃ padaṃ.|| ||

[310] Dukkhaṃ dukkha-samuppādaṃ dukkhassa ca ati-k-kamaṃ,||
Ariy'aṭṭh'aṅgikaṃ maggaṃ dukkh'ūpasama-gāminaṃ.|| ||

[311] Tassa pādāni vanditvā katvāna taṃ padakkhiṇaṃ,||
Cāpāya ādisitvāna pabbaji anagāriyaṃ||
Tisso vijjā anuppattā kataṃ Buddhassa sāsananti.|| ||

 

69
Sundarī-Therī Gāthā

[pts]

Itthaṃ sudaṃ sundarī therī gāthāyo abhāsīti

[312] Petāni bhoti puttāni khādamānā tuvaṃ pure
Tuvaṃ divā ca ratto ca atīva paritappasi.|| ||

[313] Sājja sabbāni khāditvā sata puttāni brāhmaṇī,||
Vāseṭṭhi kena vaṇṇena na bāḷhaṃ paritappasi.|| ||

[314] Bahūni puttasatāni ñātiSaṅghasatāni ca
Khāditāni atītaṃse mama tuyhaṃ ca brāhmaṇa.|| ||

[315] Sāhaṃ nissaraṇaṃ ñatvā jātiyā maraṇassa ca
Na socāmi na rodāmi na c'ahaṃ paritappāmi.|| ||

[316] [154] Abbhutaṃ vata Vāseṭṭhi vācaṃ bhāsasi edisiṃ,||
Kassa tvaṃ dhammam aññāya giraṃ bhāsasi edisaṃ.|| ||

[317] Esa brāhmaṇa sambuddho nagaraṃ Mithilaṃ pati,||
Sabba-dukkhappahānāya dhammaṃ desesi pāṇinaṃ.|| ||

[318] Tassaṃ brāhmaṇa arahato dhammaṃ sutvā nirūpadhiṃ,||
Tattha viññātasad'dhammā puttasokaṃ vyapānudiṃ.|| ||

[319] So aham pi gamissāmi nagaraṃ Mithilaṃ pati,||
App eva maṃ so Bhagavā sabba-dukkhā pamocaye,|| ||

[320] Addasa brāhmaṇo Buddhaṃ vippamuttaṃ nirūpadhiṃ.||
tassa dhammam adesesi muni dukkhassa pāragū.|| ||

[321] Dukkhaṃ dukkha-samuppādaṃ dukkhassa ca ati-k-kamaṃ,||
Ariya aṭṭhaṅgikaṃ maggaṃ dukkh'ūpasama-gāminaṃ.|| ||

[322] Tattha viññāta-Sad'Dhammo pabbajjaṃ samarocayi,||
Sujāto tīhi rattihi tisso vijjā aphassayī.|| ||

[323] Ehi sārathi gacchāhi rathaṃ nīyādiyāhi'maṃ,||
ārogyaṃ brāhmaṇiṃ vajjā pabbajito dāni brāhmaṇo,||
Sujāto tīhi rattihi tisso vijjā aphassayi.|| ||

[324] Tato ca ratham ādāya sahassaṃ cāpi sārathi,||
ārogyaṃ brāhmaṇiṃ avoca pabbajito dāni brāhmaṇo,||
Sujāto tīhi rattihi tisso vijjā aphassayī.|| ||

[325] Etaṃ c'ahaṃ assarathaṃ sahassaṃ cāpi sārathi,||
Tevijjaṃ brāhmaṇaṃ sutvā puṇṇapattaṃ dadāmi te.|| ||

[326] Tumh'eva hotu assaratho sahassaṃ cāpi brāhmaṇī,||
aham pi pabbajissāmi varapaññassa santike.|| ||

[327] [155] Hatthī-gavassaṃ maṇikuṇḍalañ ca
Phītañ c'imaṃ gehavigataṃ pahāya,||
Pitā pabbajito tuyhaṃ
Bhuñja bhogāni Sundarī tuvaṃ dāyādikā kule.|| ||

[328] Hatthī gavassaṃ maṇikuṇḍalañ ca
Rammaṃ c'imaṃ gahavigataṃ pahāya,||
Pitā pabbajito mayhaṃ puttasokena aṭṭito
aham pi pabbajissāmi bhātu sokena additā.|| ||

[329] So te ijjhatu saṅkappo yaṃ tvaṃ patthesi Sundarī,||
Uttiṭṭhapiṇḍo uñchā ca paṃsukūlaṃ ca cīvaraṃ,||
Etāni abhisambhonti para-loke anāsavā.|| ||

[330] Sikkhamānāya me ayye dibba-cakkhuṃ visodhitaṃ,||
Pubbe-nivāsaṃ jānāmi yattha me vusitaṃ pure.|| ||

[331] Tuvaṃ nissāya kalyāṇī therī-Saṅghassa sobhane,||
Tisso vijjā anuppattā kataṃ Buddhassa sāsanaṃ.|| ||

[332] Anujānāhi me ayye icche Sāvatthiṃ gantave,||
Sīhanādaṃ nadissāmi Buddha-seṭṭhassa santike.|| ||

[333] Passa Sundarī satthāraṃ hemavaṇṇaṃ harittacaṃ,||
Adantānaṃ dametāraṃ sambuddham akutobhāyaṃ.|| ||

[334] Passa Sundariṃ āyantiṃ vippamuttaṃ nirūpadhiṃ,||
Vīta-rāgaṃ visaṃyuttaṃ katakiccaṃ anāsavaṃ.|| ||

[335] Bārāṇasito ni-k-khamma tava santikam āgatā,||
Sāvikā te mahāvīra pāde vandati Sundarī.|| ||

[336] Tuvaṃ Buddho tuvaṃ satthā tuyhaṃ dhīta'mhi brāhmaṇa,||
Orasā mukhato jātā katakiccā anāsavā.|| ||

[337] [156] Tassā te svāgataṃ bhadde tato te adurāgataṃ,||
Evaṃ hi dantā āyanti satthu pādāni vanditā,||
Vītarāgā visaṃyuttā katakiccā anāsavā.|| ||

 

70
Subhā Kammā Radhītā-Therī Gāthā

[pts][than]

Itthaṃ sudaṃ subhā kammāradhītā therī gāthāyo abhāsīti

[338] Daharā ahaṃ suddhavasanā yaṃ pure dhammam assuṇiṃ,||
Tassā me appamattāya saccābhisamayo ahu.|| ||

[339] Tato'haṃ sabba-kāmesu bhūsaṃ aratim ajjhagaṃ,||
Sakkāyasmiṃ bhayaṃ disvā nekkhammaṃ yeva pīhaye.|| ||

[340] Hitvān'ahaṃ ñātigaṇaṃ dāsakamma-karāni ca,||
Gāmakhettāni phītāni ramaṇīye pamodite.|| ||

[341] Pahāy'āhaṃ pabbajitā sāpateyyam anappakaṃ,||
Evaṃ saddhāya ni-k-khamma Sad'Dhamme su-p-pavedite
Na me taṃ assa patirūpaṃ ākiñcaññaṃ hi patthaye.|| ||

[342] Yā jātarūpa-rajataṃ ṭhapetvā punar āgame
Rajataṃ jātarūpaṃ vā na bodhāya na santiyā
Na etaṃ samaṇa-sāruppaṃ na etaṃ ariya-dhanaṃ.|| ||

[343] Lobhanaṃ madanaṃ c'etaṃ mohanaṃ rajavaḍḍhanaṃ,||
Sāsaṅkaṃ bahu āyāsaṃ n'atthi c'ettha dhuvaṃ ṭhiti.|| ||

[344] Ettha rattā pamattā ca saṃkiliṭṭhamanā narā,||
Aññamaññena vyāruddhā puthukubbanti medhagaṃ.|| ||

[345] Vadho bandho parikleso jāni sokapariddavo,||
Kāmesu adhipannānaṃ dissate vyasanaṃ bahuṃ.|| ||

[346] Taṃ mañ ñātī amittā va kiṃ vo kāmesu yuñjatha,||
Jānātha maṃ pabbajitaṃ kāmesu bhaya-dassaniṃ.|| ||

[347] [157] Na hiraññasuvaṇṇena parikkhīyanti āsavā
Amittā vadhakā kāmā sapattā sallabandhanā.|| ||

[348] Taṃ maṃ ñātī amittā va kiṃ vo kāmesu yuñjatha,||
Jānātha maṃ pabbajitaṃ muṇḍaṃ saṃghāṭipārutaṃ.|| ||

[349] Uttiṭṭhapiṇḍo uñcho ca paṃsukūlañ ca cīvaraṃ,||
Etaṃ kho mama sāruppaṃ anāgārūpanissayo.|| ||

[350] Vantā mahesīnā kāmā ye dibbā ye ca mānusā
Khemaṭṭhāne vimuttā te pattā te acalaṃ sukhaṃ.|| ||

[351] Māhaṃ kāmehi saṃgacchiṃ yesu tāṇaṃ na vijjati,||
Amittā vadhakā kāmā aggi-k-khandhasamā dukkhā.|| ||

[352] Paripantho eso sabhayo savighāto sakaṇṭako,||
Gedho suvisamo c'eso mahanto mohanāmukho.|| ||

[353] Upasaggo bhīmarūpo ca kāmā sappasirūpamā,||
Ye bālā abhinandanti andhabhūtā puthujjanā.|| ||

[354] Kāmapaṅka sattā hi bahū loke aviddasu,||
Pariyantaṃ nābhijānanti jātiyā maraṇassa ca.|| ||

[355] Duggati-gamanaṃ maggaṃ manussā kāma-hetukaṃ,||
Bahuṃ ve paṭipajjanti attano roga-m-āvahaṃ.|| ||

[356] Evaṃ amittajananā tāpanā saṅkilesikā,||
Lokāmisā bandhanīyā kāmā maraṇa-bandhanā.|| ||

[357] Ummādanā ullapanā kāmā citta-pamāthino
Sattāṇaṃ saṅkilesāya khipaṃ Mārena oḍḍitaṃ.|| ||

[358] Anantādīnavā kāmā bahudukkhā mahāvisā,||
[158]Appassādā raṇakarā sukka-pakkhavisosanā.|| ||

[359] Sāhaṃ etādisaṃ katvā vyasanaṃ kāmahetukaṃ,||
Na taṃ paccāgamissāmi Nibbān-ā-bhiratā sadā.|| ||

[360] Raṇaṃ karitvā kāmānaṃ sītibhāvābhikaṅkhinī,||
Appamattā vihassāmi tesaṃ saṃyojanakkheye.|| ||

[361] Asokaṃ virajaṃ khemaṃ Ariy'aṭṭh'aṅgikaṃ ujuṃ,||
Taṃ maggaṃ anugacchāmi yena tiṇṇā mahesino.|| ||

[362] Imaṃ passatha dhamm'aṭṭhaṃ Subhaṃ kammāradhītaraṃ,||
Anejaṃ upasampajja rukkha-mūlamhi jhāyati.|| ||

[363] Ajj'aṭṭhamī pabbajitā saddhā Sad'Dhammasobhanā,||
Vinītā Uppalavaṇṇāya tevijjā maccuhāyinī.|| ||

[364] Sāyaṃ bhujissā anaṇā bhikkhunī bhāvit'indriyā,||
Sabba-yoga-visaṃyuttā katakiccā anāsavā.|| ||

[365] Taṃ Sakko deva-saṅghena upasaṅkamma iddhiyā,||
Namassati bhūtapati Subhaṃ kammāradhītaran ti.|| ||

Vīsati-Nipāto Niṭṭhito

 

§

 

Tiṃsati Nipāto

 

71
Subhā Jīvakam-bavanika-Therī Gāthā

[pts][than]

Itthaṃ sudaṃ subhā jīvakambavanikā therī gāthāyo abhāsīti

[366] Jīvakam-bavanaṃ rammaṃ gacchantiṃ bhikkhunīṃ Subhaṃ,||
Dhuttako saṃnivāresi tam enaṃ abravī Subhā.|| ||

[367] Kiṃ te aparādhitaṃ mayā yaṃ maṃ ovariyāna tiṭṭhasi,||
Na hi pabbajitāya āvuso puriso samphusanāya kappati.|| ||

[368] Garuke mama satthu sāsane yā sikkhā sugatena desitā,||
[159]Parisuddhapadaṃ an-aṅgaṇaṃ kiṃ maṃ ovariyāna tiṭṭhasi.|| ||

[369] Āvila-citto anāvilaṃ sarajo vītarajaṃ an-aṅgaṇaṃ,||
Sabbattha vimuttamānasaṃ kiṃ maṃ ovariyāna tiṭṭhasi.|| ||

[370] Daharā ca apāpikā c'asi kiṃ te pabbajjā karissati,||
Nikkhipa kāsāya-cīvaraṃ ehi ramāmase pupphite vane.|| ||

[371] Madhurañ ca pavanti sabbaso kusumarajena samuddhatā dumā,||
Paṭhamavasanto sukho utu ehi ramāmase pupphite vane.|| ||

[372] Kusumitasikharā ca pādapā abhigajjanti va māluteritā,||
Kā tuyhaṃ rati bhavissati yadi ekā vanam ogāhissasi.|| ||

[373] Vāḷamiga-Saṅgha-sevitaṃ kuñjaramattakareṇulolitaṃ,||
Asahāyikā gantum icchasi rahitaṃ bhisanakaṃ mahāvanaṃ.|| ||

[374] Tapanīyakatā va dhītikā vicarasi Cittarathe va accharā,||
Kāsikasukhumehi vagguhi sobhasi vasanehi'nūpame.|| ||

[375] Ahaṃ tava vasānugo siyaṃ yadi viharemase kānanantare,||
Na hi m'atthi tayā piyataro pāṇo kinnarimandalocane.|| ||

[376] Yadi me vacanaṃ karissasi sukhitā ehi agāram āvasa,||
Pāsādanivātavāsinī parikammaṃ te karonti nāriyo,|| ||

[377] Kāsikasukhumāsi dhāraya abhiropehi ca mālavaṇṇakaṃ,||
[160] Kañcanamaṇimuttakaṃ bahuṃ vividhaṃ ābharaṇaṃ karomi te.|| ||

[378] Sudhotarajapacchadaṃ subhaṃ goṇakatūlita-santataṃ navaṃ,||
Abhiruha sayanaṃ mahārahaṃ candanamaṇḍitaṃ sāra-gandhikaṃ.|| ||

[379] Uppalañ ca udakato ubbhataṃ yathā yaṃ amanussa-sevitaṃ,||
Evaṃ tuvaṃ brahmacārinī sakesu aṅgesu jaraṃ gamissasi.|| ||

[380] Kin te idha sārasammataṃ kuṇapapūramhi susānavaḍḍhane
Bhedana-dhamme kaḷevare yaṃ disvā vimano udikkhasi.|| ||

[381] Akkhīni ca turiyā-r-iva kinnariyā-r-iva pabbatantare
Tava me nayanāni dakkhiya bhiyyo kāmaratī pavaḍḍhati.|| ||

[382] Uppalasikharopamānite vimale hāṭakasannibhe mukhe
Tava me nayanāni dakkhiya bhiyyo kāma-guṇo pavaḍḍhati.|| ||

[383] Api dūragatā saramhase āyatapamhe visuddhadassane
Na hi m'atthi tayā piyatarā nayanā kinnarimandalocane.|| ||

[384] Apathena payātum icchasi candaṃ kīḷanakaṃ gavessasi
Meruṃ laṅghetum icchasi yo tvaṃ Buddha-sutaṃ maggayase.|| ||

[385] [161] N'atthi hi loke sadevake rāgo yattha pi dāni me siyā
Na pi naṃ jānāmi kīriso atha maggena hato samūlako.|| ||

[386] Iṅgālakuyā va ujjhato visapatto-r-iva aggato kato
Na pi naṃ passāmi kīriso atha maggena hato samūlako,|| ||

[387] Yassā siyā apacc'avekkhitaṃ satthā vā anusāsito siyā,||
Tvaṃ tādisikaṃ palobhaya jānantiṃ so imaṃ vihaññasi.|| ||

[388] Mayhaṃ hi akkuṭṭhavandite sukha-dukkhe ca sati upaṭṭhitā,||
Saṅkhatam asubhan ti jāniya sabbatth'eva mano na limpati.|| ||

[389] Sāhaṃ Sugatassa sāvikā magg'aṭṭh'aṅgika-yānayāyinī,||
Uddhaṭasallā anāsavā suññ-ā-gāra-gatā ramām'ahaṃ.|| ||

[390] Diṭṭhā hi mayā sucittitā sombhā dārukacillakā navā
Tantīhi ca khīlakehi ca vinibaddhā vividhaṃ panaccitā.|| ||

[391] Tamh'uddhaṭe tantikhīlake vissaṭṭhe vikale paripakkhate
Avinde khaṇḍaso kate kimhi tattha manaṃ nivesaye.|| ||

[392] Tath'ūpamā dehakāni maṃ tehi dhammehi vinā na vattanti,||
Dhammehi vinā na vattati kimhi tattha manaṃ nivesaye.|| ||

[393] Yathā haritālena makkhitaṃ addasa cittikaṃ bhittiyā kataṃ,||
[162] Tamhi te viparīta-dassanaṃ paññā mānusikā niratthikā.|| ||

[394] Māyaṃ viya aggato kataṃ supinante va suvaṇṇapādapaṃ,||
Upadhāvasi andha rittakaṃ janamajjhe-r-iva ruppa-rūpakaṃ,|| ||

[395] Vaṭṭani-r-iva koṭar'ohitā majjhe-bubbuḷakā sassukā
Piḷakoḷikā c'ettha jāyati vividhā cakkhuvidhā'va piṇḍitā.|| ||

[396] Uppāṭiya cārudassanā na ca pajjittha asaṅgamānasā,||
Handa te cakkhuṃ harassu taṃ tassa narassa adāsi tāvade.|| ||

[397] Tassa ca viramāsi tāvade rāgo tattha khamāpayī ca naṃ,||
Sotthi siyā brahma-cāriṇī na puno edisakaṃ bhavissati,|| ||

[398] Āhaniya edisaṃ janaṃ aggiṃ pajjalitaṃ va liṅgiya,||
Gaṇhissaṃ āsīvisaṃ viya api nu sotthi siyā khamehi no.|| ||

[399] Muttā ca tato sā bhikkhuṇī agamī Buddha-varassa santikaṃ,||
Passiya varapuññalakkhaṇaṃ cakkhu āsi yathā purāṇakan ti.|| ||

Tiṃsati-Nipāto Niṭṭhito

 

§

 

Cattālīsati Nipāto

 

72
Isidāsi-Therī Gāthā

[pts]

Itthaṃ sudaṃ isidāsī therī gāthāyo abhāsīti

[400] Nagaramhi kusumanāme Pāṭali-puttamhi paṭhaviyā||
Maṇḍe Sakyakulakulīnāyo dve bhikkhunīyo hi guṇavatiyo.|| ||

[401] [163] Isidāsī tattha ekā dutiyā Bodhī ti sīla-sampannā ca,||
Jhānajjhāyanaratāyo bahu-s-sutāyo dhutakilesāyo.|| ||

[402] Tā piṇḍāya caritvā bhattatthaṃ kariya dhotapattāyo,||
Rahitamhi sukhanisinnā imā girā abbhudīresuṃ.|| ||

[403] Pāsādikāsi ayye isidāsī vayo pi te aparihīno,||
Kiṃ disvāna vālikaṃ athāsi nekkhammam anuyuttā.|| ||

[404] Evaṃ anuyuñjamānā sā rahite dhamma-desanā-kusalā,||
Isidāsī vacanam abravī suṇa Bodhi yathamhi pabbajitā.|| ||

[405] Ujjenīyā puravare mayhaṃ pitā sīla-saṃvuto seṭṭhi,||
Tass'amhi eka dhītā piyā manāpā dayitā ca.|| ||

[406] Atha me Sāketato varako āgacchi uttamakulīno
Seṭṭhi bahūtaratano tassa maṃ suṇham adāsi tāto.|| ||

[407] Sassuyā sAsurassa ca sāyaṃ pātaṃ paṇāmam upagamma,||
Sirasā karomi pāde vandāmi yathamhi anusiṭṭhā.|| ||

[408] Yā mayhaṃ sāmikassa bhaginiyo bhātuno parijano,||
Tam eka-varakaṃ pi disvā ubbiggā āsanaṃ demi.|| ||

[409] Annena ca pānena ca kajjena ca yaṃ ca tattha sannihataṃ,||
Chādemi upanayāmi ca demi ca yaṃ yassa patirūpaṃ.|| ||

[410] Kālena upaṭṭhahitvā gharaṃ sampagamāmiṃ||
ummāra-dhota hatthapāde pañjalikā sāmikaṃ upemi.|| ||

[411] Kocchaṃ pasādam añjanañ ca ādāsakañ ca gaṇhitvā
[164] Parikamma-kārikā viya sayam eva patiṃ vibhūsemi.|| ||

[412] Sayam eva odanaṃ sādhayāmi sayam eva bhājanaṃ dhoviṃ,||
Mātā va eka-puttakaṃ tathā bhattāraṃ paricarāmi.|| ||

[413] Evaṃ maṃ bhattikataṃ anuttaraṃ kārikaṃ taṃ nihatamānaṃ
Uṭṭhāyikaṃ analasaṃ sīlavatiṃ dussate bhattā.|| ||

[414] So mātarañ ca pitarañ ca bhaṇati āpucch'āhaṃ gamissāmi,||
Isidāsiyā na saha vacchaṃ ekā-gāre'haṃ sahavatthuṃ.|| ||

[415] Mā evaṃ putta avaca isidāsī paṇḍitā paribyattā,||
Uṭṭhāyikā analasā kiṃ tuyhaṃ na rocate putta.|| ||

[416] Na ca me hiṃsati kiñci na c'ahaṃ Isidāsiyā saha vacchaṃ
Dessā'va me alaṃ me apucch'āhaṃ gamissāmi.|| ||

[417] Tassa vacanaṃ suṇītvā sassu sasuro ca me apucchiṃsu,||
Kissa tayā aparaddhaṃ bhaṇa vissatthā yathā-bhūtaṃ.|| ||

[418] Na pi'haṃ aparajjhaṃ kiñci na pi'hiṃs'eva na gaṇāmi||
Dubbacanaṃ kiṃ sakkā kātuye yaṃ maṃ videssate bhattā.|| ||

[419] Te maṃ pitu gharaṃ pati nayiṃsu vimanā dukkhena||
Avibhūtā puttaṃ anurakkhamānā jināmhase rūpiniṃ Lacchiṃ.|| ||

[420] Atha maṃ adāsi tāto aḍḍhassa gharamhi dutiyakulikassa,||
Tato upaḍḍhasuṅkena yena maṃ vindatha seṭṭhi.|| ||

[421] Tassa pi gharamhi māsaṃ avasī atha so pi maṃ paṭicchati,||
[165] Dāsī va upaṭṭhahantiṃ adūsikaṃ sīla-sampannaṃ.|| ||

[422] Bhikkhāya ca vicarantaṃ damakaṃ dantaṃ me pitā bhaṇati,||
So hi si me jāmātā nikkhipa pontiñ ca ghaṭikañ ca.|| ||

[423] So pi vasitvā pakkham atha tātaṃ bhaṇati dehi me||
Pontiṃ ghaṭikañ ca mallakañ ca puna pi bhikkhaṃ carissāmi.|| ||

[424] Atha naṃ bhaṇati tāto ammā sabbo ca me ñātagaṇavaggo,||
Kiṃ te na kirati idha bhaṇa khippaṃ yan te karihiti.|| ||

[425] Evaṃ bhaṇito bhaṇati yadi me attā Sakkoti alaṃ mayhaṃ,||
Isidāsiyā na vacchaṃ eka-ghare'haṃ saha-vatthuṃ.|| ||

[426] Vissajjito gato so aham pi ekākinī vicintemi,||
Apucchitūna gacchaṃ marituye pabbajissaṃ vā.|| ||

[427] Atha ayyā Jinadattā āgacchi gocarāya caramānā,||
Tātakulaṃ vinayadharī bahu-s-sutā sīla-sampannā.|| ||

[428] Taṃ disvān amhākaṃ uṭṭhāyāsanaṃ tassā paññāpayiṃ,||
Nisinnāya ca pāde vanditvā bhojanaṃ adāsiṃ.|| ||

[429] Annena ca pānena ca khajjena ca yañ ca tattha sannihitaṃ,||
Santappayitvā avocaṃ ayye icchāmi pabbajituṃ.|| ||

[430] Atha maṃ bhaṇati tāto idh'eva puttaka carāhi taṃ dhammaṃ
Annena ca pānena ca tappaya samaṇe dvijātī ca.|| ||

[431] Athā'haṃ bhaṇāmi tātaṃ rodantī añjaliṃ paṇāmetvā,||
Pāpaṃ hi mayā pakataṃ kammaṃ taṃ nijjarissāmi.|| ||

[432] [166] Atha maṃ bhaṇati tāto pāpuṇa bodhiñ ca agga-Dhammañ ca,||
Nibbānaṃ ca labhassu yaṃ sacchi-kari dvipadaseṭṭho.|| ||

[433] Mātā-pitū abhivādayitvā sabbañ ca ñātigaṇavaggaṃ,||
Sattāhaṃ pabbajitā tisso vijjā aphassayiṃ.|| ||

[434] Jānāmi attano satta jātiyo yassā yaṃ phalaṃ vipāko,||
Taṃ tava ācikkhissaṃ taṃ eka-manā nisāmehi.|| ||

[435] Nagaramhi Erakacche suvaṇṇakāro ahaṃ bahūtadhano,||
Yobbana-madena matto so paradāram āsevi'haṃ.|| ||

[436] So'haṃ tato cavitvā nirayamhi apaccisaṃ ciraṃ,||
Pakko tato ca uṭṭhahitivā makkaṭiyā kuccham okkamiṃ.|| ||

[437] Sattāhaṃ jātakammaṃ mahākapi yūthapo nillacchesi,||
Tass'etaṃ kammaphalaṃ yathā pi gantvāna paradāraṃ.|| ||

[438] So'haṃ tato cavitvā kālaṃ karitvā Sindhavāraññe,||
Kāṇāya ca khañjāya ca eḷakiyā kuccham okkamiṃ.|| ||

[439] Dvādāsavassāni ahaṃ nillacchito dārake parivahitvā,||
Kiminā vaṭṭo akallo yathā pi gantvāna paradāraṃ.|| ||

[440] So'haṃ tato cavitvā govāṇijakassa gāviyā jāto,||
Vaccho lākhā-tambo nillacchito dvādase māse.|| ||

[441] Te puna naṅgalam ahaṃ sakaṭañ ca dhārayāmi,||
Andho vaṭṭo akallo yathā pi gantvāna paradāraṃ.|| ||

[442] So'haṃ tato cavitvā vithiyā dāsiyā ghare jāto,||
N'eva mahiḷā na puriso yathā pi gantvāna paradāraṃ.|| ||

[443] [167] Tiṃsati vassamhi mato sākaṭikakulamhi dārikā jātā,||
Kapaṇamhi appabhoge dhanika-purisa-pātabahulamhi.|| ||

[444] Taṃ maṃ tato satthavāho ussannāya vipulāya vaḍḍhiyā,||
Okaḍḍhati vilapantiṃ acchinditvā kulagharassa.|| ||

[445] Atha soḷasame vasse disvāna maṃ patta yobbanaṃ,||
Kaññam orundha tassa putto giridāso nāma nāmena.|| ||

[446] Tassa pi aññā bhariyā sīlavatī guṇavatī yasavatī ca,||
Anurattaṃ bhattāraṃ tassāhaṃ viddesanam akāsiṃ.|| ||

[447] Tass'etaṃ kamma-phalaṃ yaṃ maṃ apakiritūna gacchantī,||
Dāsī va upaṭṭhahantiṃ tassa pi anto kato mayā ti.|| ||

Cattālīsati Nipāto Samatto

.

 

§

 

Mahā-Nipāto

 

73
Sumedhā-Therī Gāthā

[pts]

Itthaṃ sudaṃ sumedhā therī gāthāyo abhāsitthāti

[448] Mantāvatiyā nagare rañño Koñcassa aggamahesiyā,||
Dhītā āsi Sumedhā pasāditā sāsanakarehi.|| ||

[449] Sīlavatī citta-kathikā bahu-s-sutā Buddha-sāsane vinītā,||
Mātā-pitaro upagamma bhaṇati ubhayo nisāmetha.|| ||

[450] Nibbānābhiratā ahaṃ asassataṃ bhavagataṃ yadi pi dibbaṃ,||
Kim aṅga pana tucchā kāmā app'assādā bahuvighātā.|| ||

[451] Kāmā kaṭukā āsīvisūpamā yesu mucchitā bālā,||
Te dīgha-rattaṃ niraye samappitā haññante dukkhitā.|| ||

[452] Socanti pāpa-kammā vinipāte pāpabuddhino,||
Sadā kāyena vācāya manasā ca asaṃvutā.|| ||

[453] Bālā te duppaññā acetanā dukkha-samudayo-ruddhā
Desente ajānantā na bujjhate ariya-saccāni.|| ||

[454] [168] Saccāni amma Buddhavara-desitāni te bahutarā ajānantā,||
Ye abhanandanti bhavagataṃ pihenti devesu upapattiṃ.|| ||

[455] Devesu pi upapatti asassatā bhavagate anicc'amhi,||
Na ca santasanti bālā puna-p-punaṃ jāyitabbassa.|| ||

[456] Cattāro vinipātā dve ca gatiyo kathañci labbhanti
Na ca vinipāta-gatānaṃ pabbajjā atthi nirayesu.|| ||

[457] Anujānātha maṃ ubhayo pabbajituṃ dasa-balassa pāvacane
Appo-s-sukkā ghaṭissaṃ jāti-maraṇappahānāya.|| ||

[458] Kiṃ bhavagatena abhinanditena kāyakalinā asārena,||
Bhava-taṇhāya nirodhā anujānātha pabbajissāmi.|| ||

[459] Buddhānaṃ uppādo viVajjīto akkhaṇo khaṇo laddho,||
Sīlāni Brahma-cariyaṃ yāva-jīvaṃ na dūseyyaṃ.|| ||

[460] Evaṃ bhaṇati Sumedhā mātā-pitaro na tāva āhāraṃ,||
āhariyā gaha-ṭ-ṭhā māraṇavasaṃ gatā'va hessāmi.|| ||

[461] Mātā dukkhitā rodati pitā ca assā sabbaso samabhisāto,||
Ghaṭenti saññāpetuṃ pāsādatale chamā patitaṃ.|| ||

[462] Uṭṭhehi puttaka kiṃ socitena dinnā si Vāraṇavatimhi
Rājā Aṇīkadatto abhirūpo tassa tvaṃ dinnā.|| ||

[463] Aggamahesī bhavissasi Anikarattassa rājino bhariyā||
Sīlāni Brahma-cariyaṃ pabbajjā dukkarā puttaka.|| ||

[464] Rajje āṇā dhanam issariyaṃ bhogā sukhā daharikā pi,||
Bhuñjāhi kāma-bhoge vāreyyaṃ hotu te putta.|| ||

[465] Atha ne bhaṇati Sumedhā mā edisakāi bhavagataṃ asāraṃ,||
Pabbajjā vā hohiti, māraṇaṃ vā tena c'eva vāreyyaṃ.|| ||

[466] [169] Kim iva pūtikāyam asuciṃ savanagandhaṃ bhayānakaṃ kuṇapaṃ
Abhisaṃviseyyaṃ gattaṃ sakipaggharitaṃ asucipuṇṇaṃ.|| ||

[467] Kim iva t'āhaṃ jānantī vikūlakaṃ maṃsa-soṇita-palittaṃ,||
Kimikulālayaṃ sakuṇabhattaṃ kaḷevaraṃ kissa diyyatī ti.|| ||

[468] Nibbuyhati susānaṃ aciraṃ kāyo apeta-viññāṇo
Chuṭṭho kaliṅgaraṃ viya jiguccha-mānehi ñātīhi.|| ||

[469] Chuddhūna naṃ susāne parabhattaṃ n'hāyanti jigucchantā,||
Niyakā mātā-pitaro kiṃ pana sādhāraṇā janatā.|| ||

[470] Ajjhositā asāre kaḷebare aṭṭhinhārusaṃghāte,||
Kheḷassumucchāssava paripuṇṇe pūtikāyamhi.|| ||

[471] Yo naṃ vinibbhujitvā abbhantaram assa bāhiraṃ kayirā,||
Gandhassa asahamānā sakā pi mātā jiguccheyya.|| ||

[472] Khandha-dātu-āyatanaṃ saṅkhataṃ jāti-mūlakaṃ||
dukkhaṃ yoniso aruciṃ bhaṇanti vāreyyaṃ kissa iccheyyaṃ.|| ||

[473] Divase divase ti satti-satāni nava-navā pateyyuṃ kāyamhi,||
Vassasatam pi ca ghāto seyyo dukkhassa c'eva khayo.|| ||

[474] Ajjhupagacche ghātaṃ yo viññū evaṃ satthuno vacanaṃ,||
Dīgho tesaṃ saṃsāro puna-p-punaṃ haññamānānaṃ.|| ||

[475] Devesu manussesu ca tiracchāna-yoniyā Asurakāye,||
[170] Petesu ca nirayesu ca aparimitā dīyante ghātā.|| ||

[476] Nirayesu bahū vinipāta-gatassa kīḷissamānassa||
Devesu pi attāṇaṃ Nibbāna-sukhā paraṃ n'atthi.|| ||

[477] Pattā te Nibbānaṃ ye yuttā dasa-balassa pāvacane,||
Appo-s-sukkā ghaṭenti jāti-maraṇappahānāya.|| ||

[478] Ajj'eva tāta abhini-k-khamissaṃ bhogehi kiṃ asārehi,||
Nibbinnā me kāmā vantasamā tālāvatthu-katā.|| ||

[479] Sā c'evaṃ bhaṇati pitaraṃ aṇīkaratto ca yassa dinnā
Upayāsi pītaruṇāvuto vāreyyaṃ upaṭṭhite kāle.|| ||

[480] Atha asita-nicita-muduke kese khaggena chindiya||
Sumedhā pāsādaṃ pidhetvā paṭhama-j-jhānaṃ samāpajji.|| ||

[481] Sā ca tahiṃ samāpannā aṇīkaratto ca āgato nagaraṃ,||
Pāsāde'va Sumedhā anicca-saññā su bhāveti.|| ||

[482] Sā ca manasi-karoti aṇīkaratto ca āruhi turitaṃ
Maṇikanakabhūsitaṅgo katañjalī yā cati Sumedhaṃ.|| ||

[483] Rajje āṇā dhanam issariyaṃ bhogā sukhā daharikā pi,||
Bhuñjāhi kāma-bhoge kāma-sukhā sudullabhā loke.|| ||

[484] Nissaṭṭhaṃ te rajjaṃ bhoge bhuñjassu dehi dānāni,||
Mā dummanā ahosi mātā-pitaro te dukkhitā.|| ||

[485] Taṃ taṃ bhaṇati Sumedha kāmehi an'atthikā vigatamohā,||
Mā kāme abhinandi kāmesvādīnavaṃ passa.|| ||

[486] Cātuddīpo rājā mandhātā āsi kāma-bhogīnam aggo
[171] Atitto kālaṅ-kato na c'assa paripūritā icchā.|| ||

[487] Satta ratanāni vasseyya vuṭṭhimā dasa-disā samantena
Na c'attha titti kāmānaṃ atittā'va maranti narā.|| ||

[488] Asisūlūpamā kāmā kāmā sappasiropamā,||
Ukkūpamā anudahanti atthikaṅkala-sannibhā.|| ||

[489] Aniccā addhuvā kāmā bahu-dukkhā mahāvisā,||
Ayoguḷo va santatto aghamūlā dukkhapphalā.|| ||

[490] Rukkhapphalūpamā kāmā maṃsapesūpamā dukkhā,||
Supinopamā vañcaniyā kāmā yācitakūpamā.|| ||

[491] Sattisūlūpamā kāmā rogo gaṇḍo aghaṃ nighaṃ,||
Aṅgārakāsusadisā agha-mūlaṃ bhayaṃ vadho.|| ||

[492] Evaṃ bahudukkhā kāmā akkhātā antarāyikā,||
Gacchatha na me bhavagate vissāso atthi attano.|| ||

[493] Kiṃ mama paro karissati attano sīsamhi ḍayha-mānamhi,||
Anubandhe jarā-maraṇe tassa ghātāya ghaṭitabbaṃ.|| ||

[494] Dvāraṃ avāpuṇitvāna'yaṃ mātā-pitaro Anīkarattañ ca
Disvāna chamaṃ nisinne rodante idam avoca.|| ||

[495] Dīgho bālānaṃ saṃsāro puna-p-punañ ca rodataṃ,||
Anamat'agge pitu maraṇe bhātu vadhe attano ca vadhe.|| ||

[496] Assu thaññaṃ rudhiraṃ saṃsāraṃ anamataggato saratha,||
Sattāṇaṃ saṃsarataṃ sarāhi aṭṭhīnañ ca sannicayaṃ.|| ||

[497] Sara caturo'dadhi upanīte assu thañña-rudharamhi
Sara ekakappam aṭṭhīnaṃ sañcayaṃ Vipulena samaṃ.|| ||

[498] [172] Anamat'agge saṃsarato mahiṃ Jambudīpam upanītaṃ,||
Kolaṭṭhi-matta-guḷikā mātā-mātāsv'eva na ppahonti.|| ||

[499] Sara tiṇakaṭṭhaṃ sākhāpalāsaṃ upanītaṃ anamataggato,||
Pitusu catur'aṅgulikā ghaṭikā pitu-pitusv'eva na ppahonti.|| ||

[500] Sara kāṇakacchapaṃ pubbe samudde aparato ca yugacchiddaṃ
Siraṃ tassa ca paṭimukkaṃ manussa-lābhamhi opammaṃ.|| ||

[501] Sara rūpaṃ phenapiṇḍopamassa kāyakaliko asārassa
Khandhe passa anicce sarāhi niraye bahuvighāte.|| ||

[502] Sara kaṭasiṃ vaḍḍhente puna-p-punaṃ tāsu tāsu jātīsu,||
Sara kumbhilabbhayāni ca sarāhi cattāri saccāni.|| ||

[503] Amatamhi vijjamāne kin tava pañcakaṭukena pītena,||
Sabbā hi kāmaratiyo kaṭukatarā pañcakaṭukena.|| ||

[504] Amatamhi vijjamāne kiṃ tava kāmehi ye pariḷāhā||
Sabbā hi kāmaratiyo jalitā kuthitā kupitā santāpitā.|| ||

[505] Asapattamhi samāne kiṃ tava kāmehi ye bahusapattā,||
Rājaggicoraudakappiyehi sādhāraṇā kāmā bahūsapattā.|| ||

[506] Mokkhamhi vijjamāne kiṃ tava kāmehi yesu vadhabandho,||
Kāmesu hi vadhabandho kāma-kāmā dukkhāni anubhonti.|| ||

[507] [173] Ādīpitā tiṇukkā gaṇhantaṃ dahanti n'eva muñcantaṃ,||
Ukkopamā hi kāmā dahanti ye te na muñcanti.|| ||

[508] Mā appakassa hetu kāma-sukhassa vipulaṃ jahī sukhaṃ,||
Mā puthulomo va baḷisaṃ gilitvā pacchā vihaññasi.|| ||

[509] Kāmaṃ kāmesu damassu tāva sunakho va saṅkhalābaddho
Kāhinti khu taṃ kāmā chātā sunakhaṃ va caṇḍālā.|| ||

[510] Aparimitaṃ ca dukkhaṃ bahūni ca citta-domanassāni,||
Anubhohisi kāmesu yutto paṭinissaja addhuve kāme.|| ||

[511] Ajaramhi vijjamāne kin tava kāmehi ye sujarā
maraṇa-vyādhigahitā sabbā sabbattha jātiyo.|| ||

[512] Idam ajaram idam amaraṃ idam ajarā-maraṇa-padam asokaṃ,||
Asapattam asambādhaṃ akhalitam abhayaṃ nirupatāpaṃ.|| ||

[513] Adhagatam idaṃ bahūhi amatam ajjāpi ca labhanīyam idaṃ,||
Yo yoniso payuñjati na ca sakkā aghaṭamānena.|| ||

[514] Evaṃ bhaṇati Sumedha saṅkhāragate ratiṃ alabha-mānā,||
Anunentī Anikarattaṃ kese'va chamaṃ chupi Sumedhā.|| ||

[515] Uṭṭhāya Aṇīkaratto pañjaliko yāci tassā pitaraṃ so,||
Vissajjetha Sumedhaṃ pabbajituṃ vimokkha-sacca-dassā.|| ||

[516] Vissajjitā mātā-pitūhi pabbaji sokabhayabhītā,||
Cha abhiññā sacchi-katā aggaphalaṃ sikkhamānāya.|| ||

[517] [174] Acchariyaṃ abbhutaṃ taṃ Nibbānaṃ āsi rājataññāya,||
Pubbe-nivāsacaritaṃ yathā vyākari pacchime kāle.|| ||

[518] Bhagavati Koṇāgamane saṅghārāmamhi navanivesamhi
Sakhiyo tīṇi janiyo vihāradānaṃ adāsimhā.|| ||

[519] Dasakkhattūṃ satakkhattuṃ dasa-satakkhattuṃ satāni ca satakkhattuṃ,||
Devesu upapajjimha ko pana vādo manussesu.|| ||

[520] Devesu mahiddhikā ahumha mānusakamhi ko pana vādo,||
Sattaratanassa mahesī itthīratanaṃ ahaṃ āsiṃ.|| ||

[521] So hetu so pabhavo taṃ mūlaṃ satthu sāsane khanti,||
Taṃ paṭhamaṃ-samodhānaṃ taṃ dhamma-ratāya Nibbānaṃ.|| ||

[522] Evaṃ kathenti ye saddahanti vacanaṃ anomapaññassa
Nibbindanti bhavagate nibbinditvā virajjantī ti.|| ||

Mahā-Nipāto Niṭṭhito

THER§GĀTHĀ SAMATTĀ

.