Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
I. Mūlapaṇṇāsa
2. Sīhanāda Vagga

Sutta 20

Vitakka-Saṇṭhāna Suttaɱ

Based on the 'Sri Lanka Buddha Jayanti Tripitaka Series.'

 


[118]

[1][chlm][pts][than][soma][ntbb][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" [119] ti te bhikkhū Bhagavato paccassosuɱ. Bhagavā etad avoca:|| ||

[2][pts][than][soma][ntbb][upal] Adhicittam-anuyuttena bhikkhave bhikkhunā pañca nimittāni kālena kālaɱ manasikātabbāni.

Katamāni pañca?|| ||

[3][pts][than][soma][ntbb][upal] Idha bhikkhave bhikkhuno yaɱ nimittaɱ āgamma yaɱ nimittaɱ manasikaroto uppajjanti pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā tamhā nimittā aññaɱ nimittaɱ manasikātabbaɱ kusalūpasaɱhitaɱ.|| ||

Tassa tamhā nimittā aññaɱ nimittaɱ manasikaroto kusalūpasaɱhitaɱ,||
ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti,||
samādhiyati.|| ||

Seyyathā pi, bhikkhave, dakkho palagaṇḍo vā palagaṇḍantevāsī vā sukhumāya āṇiyā oḷārikaɱ āṇiɱ abhinīhaneyya abhinīhareyya abhinivajjeyya,||
evam eva kho, bhikkhave,||
bhikkhuno yaɱ nimittaɱ āgamma yaɱ nimittaɱ manasikaroto uppajjanti pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā tamhā nimittā aññaɱ nimittaɱ manasikātabbaɱ kusalūpasaɱhitaɱ.|| ||

Ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

[4][pts][than][soma][ntbb][upal] Tassa ce bhikkhave bhikkhuno tamhā nimittā aññaɱ nimittaɱ manasikaroto kusalūpasaɱhitaɱ uppajjant'eva pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,
tena bhikkhave bhikkhunā tesaɱ vitakkānaɱ ādīnavo upaparikkhitabbo:|| ||

Iti p'ime vitakkā akusalā,||
iti p'ime vitakkā sāvajjā,||
iti p'ime vitakkā dukkhavipākā ti.|| ||

Tassa tesaɱ vitakkānaɱ ādīnavaɱ upaparikkhato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

Seyyathā pi, bhikkhave, itthī vā vā puriso vā daharo yuvā maṇḍanakajātiko ahikuṇapena vā kukkurakuṇapena vā manussa- [120] kuṇapena vā kaṇṭhe āsattena aṭṭīyeyya harāyeyya jiguccheyya,||
evam eva kho, bhikkhave, tassa ce bhikkhuno tamhā nimittā aññaɱ nimittaɱ manasikaroto kusalūpasaɱhitaɱ uppajjant'eva pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā tesaɱ vitakkānaɱ ādīnavo upaparikkhitabbo:|| ||

Iti pime vitakkā akusalā,||
iti pime vitakkā sāvajjā,||
iti pime vitakkā dukkhavipākā ti.|| ||

Tassa tesaɱ vitakkānaɱ ādīnavaɱ upaparikkhato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

[5][pts][than][soma][ntbb][upal] Tassa ce bhikkhave bhikkhuno tesaɱ pi vitakkānaɱ ādīnavaɱ upaparikkhato uppajjant'eva pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā tesaɱ vitakkānaɱ asati-amanasikāro āpajjitabbo.|| ||

Tassa tesaɱ vitakkānaɱ asati-amanasikāraɱ āpajjato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam eva cittaɱ santiṭṭhati sannisīdati ekodi hoti samādhiyati.|| ||

Seyyathā pi, bhikkhave, cakkhumā puriso āpāthagatānaɱ rūpānaɱ adassanakāmo assa,||
so nimīleyya vā aññena vā apalokeyya.|| ||

Evam eva kho bhikkhave tassa ce bhikkhuno tesam pi vitakkānaɱ ādīnavaɱ upaparikkhato uppajjant'eva pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā tesaɱ vitakkānaɱ asati amanasikāro āpajjitabbo.|| ||

Tassa tesaɱ vitakkānaɱ asati-amanasikāraɱ āpajjato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattameva cittaɱ santiṭṭhati sannisīdati ekodi hoti samādiyati.|| ||

[6][pts][than][soma][ntbb][upal] Tassa ce bhikkhave bhikkhuno tesam pi vitakkānaɱ asati-amanasikāraɱ āpajjato uppajjant'eva pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā tesaɱ vitakkānaɱ vitakkasankhārasaṇṭhānaɱ manasi kātabbaɱ.|| ||

Tassa tesaɱ vitakkānaɱ vitakkasankhārasaṇṭhānaɱ manasikaroto ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi||
te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

Seyyathā pi, bhikkhave, puriso sīghaɱ gaccheyya,||
tassa evam assa:|| ||

Kin nu kho ahaɱ sīghaɱ gacchāmi, yan nūnāhaɱ saṇikaɱ gaccheyyanti.|| ||

So saṇikaɱ gaccheyya.|| ||

Tassa evam assa:|| ||

Kin nu kho ahaɱ saṇikaɱ gacchāmi,||
yan nūnāhaɱ tiṭṭheyyanti.|| ||

So tiṭṭheyya.|| ||

Tassa evam assa:|| ||

Kin nu kho ahaɱ ṭhito yan nūnāhaɱ nisīdeyyanti.|| ||

So nisīdeyya.|| ||

Tassa evam assa:|| ||

Kin nu kho ahaɱ nisinno,||
yan nūnāhaɱ nipajjeyyanti.|| ||

So nipajjeyya.|| ||

Evaɱ hi so bhikkhave puriso oḷārikaɱ oḷārikaɱ iriyāpathaɱ abhinivajjetvā sukhumaɱ sukhumaɱ iriyāpathaɱ kappeyya.|| ||

Evam eva kho bhikkhave tassa ce bhikkhuno tesam pi vitakkānaɱ asati-amanasikāraɱ āpajjato uppajjant'eva pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā tesaɱ vitakkānaɱ vitakkasankhārasaṇṭhānaɱ manasikātabbaɱ.|| ||

Tassa tesaɱ vitakkānaɱ vitakkasankhārasaṇṭhānaɱ manasikaroto ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

[7][pts][than][soma][ntbb][upal] Tassa ce bhikkhave bhikkhuno tesam pi vitakkānaɱ vitakkasankhārasaṇṭhānaɱ manasikaroto uppajjant'eva pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā dantehi danta-m-ādhāya jivhāya tāluɱ āhacca cetasā cittaɱ abhiniggaṇhitabbaɱ abhinippīḷetabbaɱ abhi- [121] santāpetabbaɱ.|| ||

Tassa dantehi danta-m-ādhāya jivhāya tāluɱ āhacca cetasā cittaɱ abhiniggaṇhato abhinippīḷayato abhisantāpayato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi||
te pahīyanti.|| ||

Te abbhatthaɱ gacchantī.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

Seyyathā pi, bhikkhave, balavā puriso dubbalataraɱ purisaɱ sīse vā gahetvā khandhe vā gahetvā abhiniggaṇheyya abhinippīḷeyya abhisantāpeyya,||
evam eva kho, bhikkhave, tassa ce bhikkhuno tesam pi vitakkānaɱ vitakkasankhārasaṇṭhānaɱ manasikaroto uppajjant'eva pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi,||
tena bhikkhave bhikkhunā dantehi danta-m-ādhāya jivhāya tāluɱ āhacca cetasā cittaɱ abhiniggaṇhitabbaɱ abhinippīḷetabbaɱ abhisantāpetabbaɱ.|| ||

Tassa dantehi danta-m-ādhāya jivhāya tāluɱ āhacca cetasā cittaɱ abhiniggaṇhato abhinippīḷayato abhisantāpayato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi||
te pahīyanti|| ||

Te abbhatthaɱ gacchantī.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

[8][pts][than][soma][ntbb][upal] Yato kho bhikkhave bhikkhuno yaɱ nimittaɱ āgamma yaɱ nimittaɱ manasikaroto uppajjanti pāpakā akusalā dhammā chandūpasaɱhitā pi dosūpasaɱhitā pi mohūpasaɱhitā pi,||
tassa tamhā nimittā aññaɱ nimittaɱ manasikaroto kusalūpasaɱhitaɱ ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

Tesam pi vitakkānaɱ ādīnavaɱ upaparikkhato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

Tesam pi vitakkānaɱ asati-amanasikāraɱ āpajjato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

Tesam pi vitakkānaɱ vitakkasankhārasanthānaɱ manasikaroto ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi hoti samādhiyati.|| ||

Dantehi danta-m-ādhāya jivahāya tāluɱ āhacca cetasā cittaɱ abhiniggaṇhato abhinippīḷayato abhisantāpayato ye pāpakā akusalā vitakkā chandūpasaɱhitā pi dosūpasaɱhitā pi mohūpasaɱhitā pi te pahīyanti.|| ||

Te abbhatthaɱ gacchanti.|| ||

Tesaɱ pahānā ajjhattam'eva cittaɱ santiṭṭhati sannisīdati ekodi [122] hoti samādhiyati.|| ||

Ayaɱ vuccati bhikkhave bhikkhu vasī vitakkapariyāyapathesu:|| ||

Yaɱ vitakkaɱ ākaŋkhissati taɱ vitakkaɱ vitakkessati,||
yaɱ vitakkaɱ n'ākaŋkhissati na taɱ vitakkaɱ vitakkessati,||
acchecchi taṇhaɱ,||
vāvattayi saɱyojanaɱ,||
sammā mānābhisamayā antam akāsi dukkhassāti.|| ||

Idam avoca Bhagavā.|| ||

Attamanā te bhikkhū Bhagavato bhāsitaɱ abhinandunti.|| ||

Vitakkasaṇṭhānasuttaɱ dasamaɱ


Contact:
E-mail
Copyright Statement   Webmaster's Page