Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
I. Mūlapaṇṇāsa
5. Cūḷa Yamaka Vagga

Sutta 44

Cūḷa Vedalla Suttaɱ

Based on the 'Sri Lanka Buddha Jayanti Tripitaka Series.'

 


 

[1][wrrn][chlm][pts][than][upal] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Atha kho Visākho upāsako yena Dhammadinnā bhikkhunī ten'upasaŋkami.|| ||

Upasaŋkamitvā Dhammadinnaɱ bhikkhuniɱ abhivādetvā eka-m-antaɱ nisīdi.|| ||

Eka-m-antaɱ nisinno kho Visākho upāsako Dhammadinnaɱ bhikkhuniɱ etad avoca:|| ||

[2][than]. "Sakkāyo sakkāyo ti ayye vuccati.|| ||

Katamo nu kho ayye sakkāyo vutto Bhagavatā" ti?|| ||

"Pañca kho ime āvuso Visākha upādānakkhandhā sakkāyo vutto Bhagavatā.|| ||

Seyyathīdaɱ:||
rūp'ūpādānakkhandho||
vedan'ūpādānakkhandho||
saññ'ūpādānakkhandho||
sankhār'ūpādānakkhandho||
viññāṇ'ūpādānakkhandho.|| ||

Ime kho āvuso Visākha pañcupādānakkhandhā sakkāyo vutto Bhagavatā" ti.|| ||

"Sādhu ayye" ti kho Visākho upāsako Dhammadinnāya bhikkhuniyā bhāsitaɱ abhinanditvā anumoditvā Dhammadinnaɱ bhikkhuniɱ uttariɱ pañhaɱ āpucchi:|| ||

[3][than]. "'Sakkāyasamudayo sakkāyasamudayo' ti ayye vuccati.|| ||

Katamo nu kho ayye sakkāyasamudayo vutto Bhagavatā" ti?|| ||

"Yā'yaɱ āvuso Visākha taṇhā ponobhavikā nandirāgasahagatā tatra tatrābhinandinī.|| ||

Seyyathīdaɱ:||
kāma-taṇhā||
bhava-taṇhā||
vibhava-taṇhā.|| ||

Ayaɱ kho āvuso Visākha sakkāyasamudayo vutto Bhagavatā" ti.|| ||

[4][than]. "'Sakkāyanirodho sakkāyanirodho' ti ayye vuccati.|| ||

Katamo nu kho ayye sakkāyanirodho vutto Bhagavatā" ti?|| ||

"Yo kho āvuso Visākha tassā yeva taṇhāya asesavirāganirodho cāgo paṭinissaggo mutti anālayo.|| ||

Ayaɱ kho āvuso Visākha sakkāyanirodho vutto Bhagavatā" ti.|| ||

[5][than]. "'Sakkāyanirodhagāminī paṭipadā sakkāyanirodhagāminīpaṭipadā' ti ayye vuccati.|| ||

Katamā nu kho ayye sakkāyanirodhagāminīpaṭipadā vuttā Bhagavatā" ti?|| ||

"Ayam eva kho āvuso Visākha ariyo aṭṭhaŋgiko maggo sakkāya-nirodha-gāminī-paṭipadā vuttā Bhagavatā.|| ||

Seyyathīdaɱ:||
sammā diṭṭhi||
sammā saŋkappo||
sammā vācā||
sammā kammanto||
sammā ājīvo||
sammā vāyāmo||
sammā sati||
sammā samādhi" ti.|| ||

[6][than] "Tañ'ñeva nu kho ayye upādānaɱ te pañc'upādānakkhandhā,||
udāhu aññatra pañcah'upādānakkhandhehi upādānan" ti?|| ||

"Na kho āvuso Visākha tañ'ñeva upādānaɱ te pañc'upādānakkhandhā,||
[300] na pi aññatra pañcah'upādānakkhandhehi upādānaɱ.|| ||

Yo kho āvuso Visākha pañcas'upādānakkhandhesu chandarāgo,||
taɱ tattha upādānan" ti.|| ||

[7][than]. "Kathaɱ pan'ayye sakkāyadiṭṭhi hotī" ti?|| ||

"Idh'āvuso Visākha assutavā puthujjano ariyānaɱ adassāvī ariya-Dhammassa akovido ariya-Dhamme avinīto,||
sappurisānaɱ adassāvī sappurisa-Dhammassa akovido sappurisa-Dhamme avinīto||
rūpaɱ attato samanupassati,||
rūpavantaɱ vā attānaɱ,||
attani vā rūpaɱ,||
rūpasmiɱ vā attānaɱ;||
vedanaɱ attato samanupassati,||
vedanāvantaɱ vā attānaɱ,||
attani vā vedanaɱ,||
vedanāya vā attānaɱ;||
saññaɱ attato samanupassati,||
saññā vantaɱ vā attānaɱ,||
attani vā saññaɱ,||
saññāya vā attānaɱ;||
sankhāre attato samanupassati,||
sankhāravantaɱ vā attānaɱ,||
attani vā sankhāre,||
sankhāresu vā attānaɱ;||
viññāṇaɱ attato samanupassati,||
viññāṇavantaɱ vā attānaɱ,||
attani vā viññāṇaɱ,||
viññāṇasmiɱ vā attānaɱ.|| ||

Evaɱ kho āvuso Visākha sakkāyadiṭṭhi hotī" ti.|| ||

[8][than] "Kathaɱ pan'ayye sakkāyadiṭṭhi na hotī" ti?|| ||

"Idh'āvuso Visākha Sutavā ariyasāvako ariyānaɱ dassāvī ariya-Dhammassa kovido ariya-Dhamme suvinīto,||
sappurisānaɱ dassāvī sappurisa-Dhammassa kovido sappurisa-Dhamme suvinīto||
na rūpaɱ attato samanupassati,||
na rūpavantaɱ vā attānaɱ,||
na attani vā rūpaɱ,||
na rūpasmiɱ vā attānaɱ;||
na vedanaɱ attato samanupassati,||
na vedanāvantaɱ vā attānaɱ,||
na attani vā vedanaɱ,||
vedanāya vā attānaɱ;||
na saññaɱ attato samanupassati,||
na saññā vantaɱ vā attānaɱ,||
na attani vā saññaɱ,||
na saññāya vā attānaɱ;||
na sankhāre attato samanupassati,||
na sankhāravantaɱ vā attānaɱ,||
na attani vā sankhāre,||
na sankhāresu vā attānaɱ;||
na viññāṇaɱ attato samanupassati,||
na viññāṇavantaɱ vā attānaɱ,||
na attani vā viññāṇaɱ,||
na viññāṇasmiɱ vā attānaɱ.|| ||

Evaɱ kho āvuso Visākha sakkāyadiṭṭhi na hotī" ti.|| ||

[9][than] "Katamo pan'ayye ariyo aṭṭhaŋgiko maggo" ti?|| ||

"Ayam'eva kho āvuso Visākha ariyo aṭṭhaŋgiko maggo.|| ||

Seyyathīdaɱ:||
sammā diṭṭhi||
sammā saŋkappo||
sammā vācā||
sammā kammanto||
sammā ājīvo||
sammā vāyāmo||
sammā sati||
sammā samādhī" ti.|| ||

[10][than]. "Ariyo pan'ayye aṭṭhaŋgiko maggo saŋkhato udāhu asaŋkhato" ti?|| ||

"Ariyo kho āvuso Visākha aṭṭhaŋgiko maggo [301] saŋkhato" ti.|| ||

[11][than]. "Ariyena nu kho ayye aṭṭhaŋgikena maggena tayo khandhā saŋgahītā,||
udāhu tīhi khandhehi ariyo aṭṭhaŋgiko maggo saŋgahīto" ti?|| ||

"Na kho āvuso Visākha ariyena aṭṭhaŋgikena maggena tayo khandhā saŋgahītā.|| ||

Tīhi ca kho āvuso Visākha khandhehi ariyo aṭṭhaŋgiko maggo saŋgahīto:||
yā c'āvuso Visākha sammāvācā,||
yo ca sammākammanto,||
yo ca sammāājīvo,||
ime dhammā sīlakkhandhe saŋgahītā.|| ||

Yo ca sammāvāyāmo,||
yā ca sammāsati,||
yo ca sammāsamādhi,||
ime dhammā samādhikkhandhe saŋgahītā.|| ||

Yā ca sammādiṭṭhi,||
yo ca sammāsaŋkappo,||
ime dhammā paññākkhandhe saŋgahītā" ti.|| ||

[12][than]. "Katamo pan'ayye samādhi?|| ||

Katame samādhinimittā,
katame samādhiparikkhārā,
katamā samādhibhāvanā" ti?|| ||

"Yā kho āvuso Visākha cittassa ekaggatā ayaɱ samādhi.|| ||

Cattāro satipaṭṭhānā samādhinimittā.|| ||

Cattāro sammappadhānā samādhiparikkhārā.|| ||

Yā tesaɱ yeva dhammānaɱ āsevanā bhāvanā bahulīkammaɱ,||
ayaɱ tattha samādhi bhāvanā" ti.|| ||

[13][than]. "Kati pan'ayye sankhāra" ti?|| |||| ||

"Tayo 'me āvuso Visākha sankhārā:
kāya-sankhāro||
vacī-sankhāro||
citta-sankhāro" ti.|| ||

[14][than]. "Katamo pan'ayye kāya-sankhāro,||
katamo vacī-sankhāro,||
katamo citta-sankhāro" ti?|| ||

"Assāsapassāsā kho āvuso Visākha kāyasankhāro.|| ||

Vitakkavicārā vacīsankhāro.|| ||

Saññā ca vedanā ca cittasankhāro" ti.|| ||

[15][than] "Kasmā pan'ayye assāsapassāsā kāya-sankhāro?|| ||

Kasmā vitakka-vicārā vacīsankhāro?|| ||

Kasmā saññā ca vedanā ca cittasankhāro" ti?|| ||

Assāsapassāsā kho āvuso Visākha kāyikā ete dhammā kāya-paṭibaddhā.|| ||

Tasmā assāsapassāsā kāyasankhāro.|| ||

Pubbe kho āvuso Visākha vitakketvā vicāretvā pacchā vācaɱ bhindati.|| ||

Tasmā vitakkavicārā vacīsankhāro.|| ||

Saññā ca vedanā ca cetasikā ete dhammā cittapaṭibaddhā.|| ||

Tasmā saññā ca vedanā ca cittasankhāro" ti.|| ||

[16][than] "Kathañ ca pan'ayye saññā-vedayita-nirodhasamāpatti hotī" ti?|| ||

"Na kho āvuso Visākha saññā-vedayita-nirodhaɱ samāpajjantassa bhikkhuno evaɱ hoti:
'Ahaɱ saññā-vedayita-nirodhaɱ samāpajjissan' ti vā,||
'Ahaɱ saññā-vedayita-nirodhaɱ samāpajjāmī' ti vā,||
'Ahaɱ saññā-vedayita-nirodham samāpanno' ti vā,||
atha khvāssa pubbe va tathā cittaɱ bhāvitaɱ hoti yan taɱ tathattāya upanetī" ti.|| ||

[17][than] "Saññā-vedayita-nirodhaɱ [302] samāpajjantassa pan'ayye bhikkhuno katame dhammā paṭhamaɱ nirujjhanti:||
yadi vā kāya-sankhāro||
yadi vā vacī-sankhāro||
yadi vā citta-sankhāro" ti?|| ||

"Saññā-vedayita-nirodhaɱ samāpajjantassa kho āvuso Visākha bhikkhuno paṭhamaɱ nirujjhati vacī-sankhāro,||
tato kāya-sankhāro,||
tato citta-sankhāro" ti.|| ||

[18][than] "Kathañ ca pan'ayye saññā-vedayita-nirodha-samāpattiyā vuṭṭhānaɱ hotī" ti?|| ||

"Na kho āvuso Visākha saññā-vedayita-nirodha-samāpattiyā vuṭṭhahantassa bhikkhuno evaɱ hoti:||
'Ahaɱ saññā-vedayita-nirodhasamāpattiyā vuṭṭhahi'ssan' ti vā||
'Ahaɱ saññā-vedayita-nirodhasamāpattiyā vuṭṭhahāmī' ti vā||
'Ahaɱ saññā-vedayita-nirodhasamāpattiyā vuṭṭhito' ti vā||
atha khvāssa pubbe va tathā cittaɱ bhāvitaɱ hoti yan taɱ tathattāya upanetī" ti|| ||

[19][than]. "Saññā-vedayita-nirodha-samāpattiyā vuṭṭhahantassa pan'ayye bhikkhuno katame dhammā paṭhamaɱ uppajjanti,||
yadi vā kāya-sankhāro,||
yadivā vacī-sankhāro,||
yadi vā citta-sankhāro" ti?|| ||

"Saññā-vedayita-nirodha-samāpattiyā vuṭṭhahantassa kho āvuso Visākha bhikkhuno||
paṭhamaɱ uppajjati citta-sankhāro,||
tato kāya-sankhāro,||
tato vacī-sankhāro" ti.|| ||

[20][than] "Saññā-vedayita-nirodha-samāpattiyā vuṭṭhitaɱ pan'ayye bhikkhuɱ kati phassā phusantī" ti?|| ||

"Saññā-vedayita-nirodha-samāpattiyā vuṭṭhitaɱ kho āvuso Visākha bhikkhuɱ tayo phassā phusanti:||
suññato phasso,||
animitto phasso,||
appaṇihito phasso" ti.|| ||

[21][than] "Saññā-vedayita-nirodha-samāpattiyā vuṭṭhitassa pan'ayye bhikkhuno kiɱ-ninnaɱ cittaɱ hoti kiɱ-poṇaɱ kiɱ-pabbhāran" ti?|| ||

"Saññā-vedayita-nirodha-samāpattiyā vuṭṭhitassa kho āvuso Visākha bhikkhuno||
viveka-ninnaɱ cittaɱ hoti||
viveka-poṇaɱ||
viveka-pabbhāran" ti.|| ||

[22][bit][than] "Kati pan'ayye vedanā" ti?|| ||

"Tisso kho imā āvuso Visākha vedanā:||
sukhā vedanā||
dukkhā vedanā||
adukkha-m-asukhā vedanā" ti.|| ||

[23][than]. "Katamā pan'ayye sukhā vedana,||
katamā dukkhā vedanā||
katamā adukkha-m-asukhā vedanā" ti?|| ||

"Yaɱ kho āvuso Visākha kāyikaɱ vā||
cetasikaɱ vā||
sukhaɱ||
sātaɱ||
vedayitaɱ||
ayaɱ||
sukhā||
vedanā.|| ||

Yaɱ kho āvuso Visākha kāyikaɱ vā||
cetasikaɱ vā||
dukkhaɱ||
asātaɱ||
vedayitaɱ||
ayaɱ||
dukkhā||
vedanā.|| ||

Yaɱ kho āvuso Visākha kāyikaɱ vā||
cetasikaɱ vā||
n'eva sātaɱ-nāsātaɱ vedayitaɱ||
ayaɱ adukkha- [303] m-asukhā vedanā" ti.|| ||

[24][than] Sukhā pan'ayye vedanā kiɱ-sukhā kiɱ-dukkhā,||
dukkhā vedanā kiɱ-dukkhā kiɱ-sukhā,||
adukkha-m-asukhā vedanā kiɱ-sukhā kiɱ-dukkhā ti?|| ||

Sukhā kho āvuso Visākha vedanā ṭhiti-sukhā vipariṇāma-dukkhā,||
dukkhā vedanā ṭhiti-dukkhā vipariṇāma-sukhā,||
adukkha-m-asukhā vedanā ñāṇa-sukhā aññāṇ-dukkhā" ti.|| ||

[25][than] "Sukhāya pan'ayye vedanāya kiɱ-anusayo anuseti?|| ||

Dukkhāya vedanāya kiɱ anusayo anuseti?|| ||

Adukkha-m-asukhāya vedanāya kiɱ anusayo anusetī" ti?|| ||

Sukhāya kho āvuso Visākha vedanāya rāgānusayo anuseti.|| ||

Dukkhāya vedanāya paṭighānusayo anuseti.|| ||

Adukkha-m-asukhāya vedanāya avijjānusayo anusetī" ti.|| ||

[26][than] "Sabbāya nu kho ayye sukhāya vedanāya rāgānusayo anuseti?|| ||

Sabbāya dukkhāya vedanāya paṭighānusayo anuseti?|| ||

Sabbāya adukkha-m-asukhāya vedanāya avijjānusayo anusetī" ti?|| ||

"Na kho āvuso Visākha sabbāya sukhāya vedanāya rāgānusayo anuseti,||
na sabbāya dukkhāya vedanāya paṭighānusayo anuseti,||
na sabbāya adukkha-m-asukhāya vedanāya avijjānusayo anusetī" ti.|| ||

[27][than] Sukhāya pan'ayye vedanāya kiɱ pahātabbaɱ?|| ||

Dukkhāya vedanāya kiɱ pahātabbaɱ?|| ||

Adukkha-m-asukhāya vedanāya kiɱ pahātabban" ti?|| ||

"Sukhāya kho āvuso Visākha vedanāya rāgānusayo pahātabbo.|| ||

Dukkhāya vedanāya paṭighānusayo pahātabbo.|| ||

Adukkha-m-asukhāya vedanāya avijjānusayo pahātabbo" ti.|| ||

[28][than] "Sabbāya nu kho ayye sukhāya vedanāya rāgānusayo pahātabbo?|| ||

Sabbāya dukkhāya vedanāya paṭighānusayo pahātabbo?|| ||

Sabbāya adukkha-m-asukhāya vedanāya avijjānusayo pahātabbo" ti?|| ||

"Na kho āvuso Visākha sabbāya sukhāya vedanāya rāgānusayo pahātabbo,||
na sabbāya dukkhāya vedanāya paṭighānusayo pahātabbo,||
na sabbāya adukkha-m-asukhāya vedanāya avijjānusayo pahātabbo.|| ||

Idh'āvuso Visākha bhikkhu vivicc'eva kāmehi||
vivicca akusalehi dhammehi — ||
savitakkaɱ savicāraɱ —||
vivekajaɱ pīti-sukhaɱ||
paṭhamaɱ-jhānaɱ upasampajja viharati,||
rāgan-tena pajahati,||
na tattha rāgānusayo anuseti.|| ||

Idh'āvuso Visākha bhikkhu iti paṭisaŋcikkhati:||
'Kuda'ssu nāmāhaɱ tad'āyatanaɱ upasampajja viharissāmi||
yad'ariyā etarahi āyatanaɱ upassampajja viharanti' ti,||
iti anuttaresu vimokhesu pihaɱ||
[304] upaṭṭhāpayato uppajjati pihāpaccayā domanassaɱ||
paṭighantena pajahati,||
na tattha paṭighānusayo anuseti.|| ||

Idh'āvuso Visākha bhikkhu sukhassa ca pahānā||
dukkhassa ca pahānā||
pubbe va somanassa-domanassānaɱ attha-gamā —||
adukkhaɱ-asukhaɱ —||
upekhā-sati-pārisuddhiɱ||
catutthaɱ jhānam upasampajja viharati,||
avijjan'tena pajahati,||
na tattha avijjānusayo anusetī" ti.|| ||

[29][than]. Sukhāya pan'ayye vedanāya kiɱ paṭibhāgo" ti?|| ||

"Sukhāya kho āvuso Visākha vedanāya dukkhā vedanā paṭibhāgo" ti.|| ||

"Dukkhāya pan'ayye vedanāya kiɱ paṭibhāgo" ti?|| ||

"Dukkhāya kho āvuso Visākha vedanāya sukhā vedanā paṭibhāgo" ti?|| ||

"Adukkha-m-asukhāya pan'ayye vedanāya kiɱ paṭibhāgo" ti?|| ||

"Adukkha-m-asukhāya kho āvuso Visākha vedanāya avijjā paṭibhāgo" ti.|| ||

"Avijjāya pan'ayye kiɱ paṭibhāgo" ti?|| ||

"Avijjāya kho āvuso Visākha vijjā paṭibhāgo" ti.|| ||

"Vijjāya pan'ayye kiɱ paṭibhāgo" ti?|| ||

"Vijjāya kho āvuso Visākha vimutti paṭibhāgo" ti.|| ||

"Vimuttiyā pan'ayye kiɱ paṭibhāgo" ti?|| ||

"Vimuttiyā kho āvuso Visākha nibbānaɱ paṭibhāgo" ti.|| ||

"Nibbānassa pan'ayye kiɱ paṭibhāgo" ti?|| ||

"Accasarāvuso Visākha pañhaɱ||
nāsakkhi pañhānaɱ pariyan taɱ gahetuɱ.|| ||

Nibbānogadhaɱ hi āvuso Visākha brahmacariyaɱ nibbānaparāyanaɱ nibbānapariyosānaɱ.|| ||

Ākaṇkha-māno ca tvaɱ āvuso Visākha Bhagavantaɱ upasaŋkamitvā etam'atthaɱ puccheyyāsi,||
yathā ca te Bhagavā vyākaroti tathā naɱ dhāreyyāsī" ti.|| ||

[30][than] Atha kho Visākho upāsako Dhammadinnāya bhikkhuniyā bhāsitaɱ abhinanditvā anumoditvā uṭṭhāy'āsanā Dhammadinnaɱ bhikkhuniɱ abhivādetvā padakkhiṇaɱ katvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Visākho upāsako yāvatako ahosi Dhammadinnāya bhikkhuniyā saddhiɱ kathāsallāpo,||
taɱ sabbaɱ Bhagavato ārocesi.|| ||

Evaɱ vutte Bhagavā Visākhaɱ upāsakaɱ etad avoca:|| ||

"Paṇḍitā Visākha Dhammadinnā bhikkhunī,||
mahā-paññā Visākha Dhammadinnā bhikkhunī.|| ||

Mamañ-ce pi tvaɱ Visākha etam'atthaɱ puccheyyāsi,||
aham-pi taɱ evam'evaɱ vyākareyyaɱ
[305] yathā taɱ Dhammadinnāya bhikkhuniyā byākataɱ,||
eso c'ev'etassa attho,||
evam'etaɱ dhārehī" ti.|| ||

Idam avoca Bhagavā.|| ||

Attamano Visākho upāsako Bhagavato bhāsitaɱ abhinandīti.|| ||

Cūḷavedallasuttaɱ catutthaɱ


Contact:
E-mail
Copyright Statement   Webmaster's Page