Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
1. Gahapati Vagga

Sutta 56

Upāli Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Nālandāyaɱ viharati Pāvārikambavane.|| ||

Tena kho pana samayena Nigaṇṭho Nātaputto Nālandāyaɱ paṭivasati mahatiyā Nigaṇṭha-parisāya saddhiɱ.|| ||

Atha kho Dīgha-Tapassiɱ Nigaṇṭho Nālandāyaɱ piṇḍāya caritvā pacchābhattaɱ piṇḍapātapaṭikkanto yena Pāvārikambavanaɱ yena Bhagavā ten'upasaŋkami,||
[372] upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ aṭṭhāsi.|| ||

Eka-m-antaɱ ṭhitaɱ kho Dīgha-Tapassiɱ Nigaṇṭhaɱ Bhagavā etad avoca:|| ||

"Saɱvijjanta saɱvijjaneta kho Tapassi āsanāni,||
sace ākaŋkhasi nisīdā" ti.|| ||

Evaɱ vutte Dīgha-Tapassiɱ Nigaṇṭho aññataraɱ nīcaɱ āsanaɱ gahetvā eka-m-antaɱ nisīdi.|| ||

Eka-m-antaɱ nisinnaɱ kho Dīgha-Tapassiɱ Nigaṇṭhaɱ Bhagavā etad avoca:

"Kati pana Tapassi Nigaṇṭho Nātaputto kammāni paññāpeti pāpassa kammassa kiriyāya pāpassa kammassa pavattiyā" ti?|| ||

"Na kho āvuso Gotama āciṇṇaɱ Nigaṇṭhassa Nātaputtassa 'kammaɱ kamman' ti paññāpetu.|| ||

'Daṇḍaɱ daṇḍan' ti kho āvuso Gotama āciṇṇaɱ Nigaṇṭhassa Nātaputtassa paññāpetun" ti.|| ||

"Kati pana Tapassi Nigaṇṭho Nātaputto daṇḍāni paññāpeti pāpassa kammassa kiriyāya pāpassa kammassa pavattiyā" ti?|| ||

"Tīṇi kho āvuso Gotama Nigaṇṭho Nātaputto daṇḍāni paññāpeti pāpassa kammassa kiriyāya pāpassa kammassa pavattiyā.|| ||

Deyyathīdaɱ:||
kāya-daṇḍaɱ||
vacī-daṇḍaɱ||
mano-daṇḍan" ti.|| ||

"Kiɱ pana Tapassi aññad-eva kāya-daṇḍaɱ aññaɱ vacī-daṇḍaɱ aññaɱ mano-daṇḍan" ti?|| ||

"Aññad-eva āvuso Gotama kāya-daṇḍaɱ||
aññaɱ vacī-daṇḍaɱ||
aññaɱ mano-daṇḍan" ti.|| ||

"Imesaɱ pana Tapassi tiṇṇaɱ daṇḍānaɱ evaɱ paṭivibhattānaɱ||
evaɱ paṭivisiṭṭhānaɱ||
katamaɱ daṇḍaɱ Nigaṇṭho Nātaputto mahā-sāvajjataraɱ paññāpeti pāpassa kammassa kiriyāya||
pāpassa kammassa pavattiyā,||
yadi vā kāya-daṇḍaɱ||
yadi vā vacī-daṇḍaɱ||
yadi vā mano-daṇḍan" ti?|| ||

"Imesaɱ kho āvuso Gotama tiṇṇaɱ daṇḍānaɱ evaɱ paṭivibhattānaɱ||
evaɱ paṭivisiṭṭhānaɱ||
kāya-daṇḍaɱ Nigaṇṭho Nātaputto mahā-sāvajjataraɱ paññāpeti pāpassa kammassa kiriyāya||
pāpassa kammassa pavattiyā.|| ||

No tathā vacī-daṇḍaɱ||
no tathā mano-daṇḍan" ti.|| ||

"'Kāya-daṇḍan' ti Tapassi vadesi?"|| ||

"'Kāya-daṇḍan' ti āvuso Gotama vadāmi."|| ||

"'Kāya-daṇḍan' ti Tapassi vadesi?"|| ||

"'Kāya-daṇḍan' ti āvuso Gotama vadāmi."|| ||

"'Kāya-daṇḍan' ti Tapassi vadesi?"|| ||

"'Kāya-daṇḍan' ti āvuso Gotama vadāmī" ti.|| ||

Iti ha Bhagavā Dīgha-Tapassiɱ Nigaṇṭhaɱ imasmiɱ kathāvatthusmiɱ yāva-tatiyakaɱ patiṭṭhāpesi.

[373] Evaɱ vutte Dīgha-Tapassiɱ Nigaṇṭho Bhagavantaɱ etad avoca:

"Tvaɱ pan'āvuso Gotama kati daṇḍāni paññāpesi pāpassa kammassa kiriyāya||
pāpassa kammassa pavattiyā" ti?|| ||

"Na kho Tapassī āciṇṇaɱ Tathāgatassa 'daṇḍaɱ daṇḍan' ti paññāpetuɱ,||
'kammaɱ kamman' ti kho Tapassi āciṇṇaɱ Tathāgatassa paññāpetun" ti.|| ||

"Tvaɱ pan'āvuso Gotama kati kammāni paññāpesi pāpassa kammassa kiriyāya||
pāpassa kammassa pavattiyā" ti?|| ||

"Tīṇi kho ahaɱ Tapassi kammāni paññāpemi pāpassa kammassa kiriyāya||
pāpassa kammassa pavattiyā.|| ||

Seyyathīdaɱ:||
kāya-kammaɱ||
vacī-kammaɱ||
mano-kamman" ti.|| ||

"Kiɱ pan'āvuso Gotama aññadeva kāya-kammaɱ||
aññaɱ vacī-kammaɱ||
aññaɱ mano-kamman" ti?|| ||

"Aññad-eva Tapassi kāya-kammaɱ||
aññaɱ vacī-kammaɱ||
aññaɱ mano-kammanti.|| ||

Imesaɱ pan'āvuso Gotama tiṇṇaɱ kammānaɱ evaɱ paṭivibhattānaɱ||
evaɱ paṭivisiṭṭhānaɱ||
katamaɱ kammaɱ mahā-sāvajjataraɱ paññāpesi pāpassa kammassa kiriyāya||
pāpassa kammassa pavattiyā,||
yadi vā kāya-kammaɱ||
yadi vā vacī-kammaɱ||
yadi vā mano-kamman" ti?|| ||

"Imesaɱ kho ahaɱ Tapassi tiṇṇaɱ kammānaɱ evaɱ paṭivibhattānaɱ||
evaɱ paṭivisiṭṭhānaɱ||
mano-kammaɱ mahā-sāvajjataraɱ paññāpemi pāpassa kammassa kiriyāya||
pāpassa kammassa pavattiyā||
no tathā kāya-kammaɱ||
no tathā vacī-kamman" ti.|| ||

"'Mano-kamman' ti āvuso Gotama vadesi?"|| ||

"'Manokamman' ti Tapassi vadāmi."|| ||

"'Manokamman' ti āvuso Gotama vadesi?"|| ||

"'Manokamman' ti Tapassi vadāmi."|| ||

"'Manokamman' ti āvuso Gotama vadesi?"|| ||

"'Manokamman' ti Tapassi vadāmī" ti.|| ||

Iti ha Dīgha-Tapassiɱ Nigaṇṭho Bhagavantaɱ imasmiɱ kathāvatthusmiɱ yāvatatiyakaɱ patiṭṭhapetvā uṭṭhāy'āsanā yena Nigaṇṭho Nātaputto ten'upasaŋkami.|| ||

Tena kho pana samayena Nigaṇṭho Nātaputto mahatiyā mahatiyā gihīparisāya saddhiɱ nisinno hoti Bālakiniyā Upāli-pamukhāya.|| ||

Addasā kho Nigaṇṭho Nātaputto Dīgha-Tapassiɱ Nigaṇṭhaɱ dūrato va āgacchantaɱ,||
disvāna Dīgha-Tapassiɱ Nigaṇṭhaɱ etad avoca:|| ||

"Handa kuto nu tvaɱ Tapassi āgacchasi divā divassā" ti?|| ||

"Ito hi kho ahambhante āgacchāmi samaṇassa Gotamassa santikā" ti.|| ||

"Ahu pana te Tapassi samaṇena Gotamena saddhiɱ kocid-eva kathāsallāpo" ti?|| ||

[374] "Ahu kho me bhante samaṇena Gotamena saddhiɱ kocid-eva kathāsallāpo" ti.|| ||

"Yathā kathaɱ pana te Tapassi ahu samaṇena Gotamena saddhiɱ kocid-eva kathāsallāpo" ti?|| ||

Atha kho Dīgha-Tapassiɱ Nigaṇṭho yāvatako ahosi Bhagavatā saddhiɱ kathāsallāpo,||
taɱ sabbaɱ Nigaṇṭhassa Nātaputtassa ārocesi.|| ||

Evaɱ vutte Nigaṇṭho Nātaputto Dīgha-Tapassiɱ Nigaṇṭhaɱ etad avoca:|| ||

"Sādhu sādhu Tapassi,||
yathā taɱ sutavatā sāvakena samma-d-eva satthu sāsanaɱ ājānantena.|| ||

Evam evaɱ DīghaTapassinā nigaṇṭhena samaṇassa Gotamassa byākataɱ;||
kiɱ hi sobhati chavo manodaṇḍo imassa evaɱ oḷārikassa kāya-daṇḍassa upanidhāya.|| ||

Atha kho kāya-daṇḍo va mahā-sāvajjataro pāpassa kammassa kiriyāya||
pāpassa kammassa pavattiyā||
no tathā vacī-daṇḍo||
no tathā mano-daṇḍo" ti.|| ||

Evaɱ vutte Upāli gahapati Nigaṇṭhaɱ Nātaputtaɱ etad avoca:

"Sādhu sādhu bhante Tapassī,||
yathā taɱ sutavatā sāvakena samma-d-eva satthu sāsanaɱ ājānantena,||
evam evaɱ bhadantena Tapassinā samaṇassa Gotamassa byākataɱ,||
kiɱ hi sobhati chavo mano-daṇḍā imassa evaɱ oḷārikassa kāya-daṇḍassa upanidhāya?|| ||

Atha kho kāya-daṇḍo va mahā sāvajjataro pāpassa kammassa kiriyāya||
pāpassa kammassa pavattiyā||
no tathā vacī-daṇḍo||
no tathā mano-daṇḍo.|| ||

Handa cāhaɱ bhante gacchāmi samaṇassa Gotamassa imasmiɱ kathāvatthusmiɱ vādaɱ āropessāmi.|| ||

Sace me Samaṇo Gotamo tathā patiṭṭhi'ssati yathā bhadantena Tapassinā patiṭṭhāpitaɱ.|| ||

Seyyathā pi nāma balavā puriso dīgha-lomikaɱ eḷakaɱ lomesu gahetvā ākaḍḍheyya,||
parikaḍḍheyya,||
samparikaḍḍheyya,||
evam-evāhaɱ samaṇaɱ Gotamaɱ vādena vādaɱ ākaḍḍhassāmi||
parikaḍḍhissāmi||
samparikaḍḍhissāmi.|| ||

Seyyathā pi nāma balavā soṇḍikākammakaro mahantaɱ soṇḍikākilañjaɱ gambhīre udakarahade pakkhipitvā kaṇṇe gahetvā ākaḍḍheyya,||
parikaḍḍheyya,||
samparikaḍḍheyya,||
evam-evāhaɱ samaṇaɱ Gotamaɱ vādena vādaɱ ākaḍḍhissāmi,||
parikaḍḍhissāmi,||
samparikaḍḍhissāmi.|| ||

Seyyathā pi nāma balavā soṇḍikādhutto vālaɱ kaṇṇe gahetvā odhuneyya,||
niddhuneyya,||
nicchodeyya||
evam-evāhaɱ samaṇaɱ Gotamaɱ vādena vādaɱ odhu- [375] nissāmi,||
niddhunissāmi,||
nicchodessāmi.|| ||

Seyyathā pi nāma kuñjaro saṭṭhihāyano gambhīraɱ pokkharaṇīɱ ogāhetvā saṇadhovikaɱ nāma kīḷitajātaɱ kīḷati||
evam evāhaɱ samaṇaɱ Gotamaɱ saṇadhovikaɱ maññe kīḷitajātaɱ kīḷissāmi.|| ||

Handa cāhaɱ bhante gacchāmi samaṇassa Gotamassa imasmiɱ kathāvatthusmiɱ vādaɱ āropessāmī" ti.|| ||

"Gaccha tvaɱ gahapati samaṇassa Gotamassa imasmiɱ kathāvatthusmiɱ vādaɱ āropehi.|| ||

Ahaɱ vā hi gahapati samaṇassa Gotamassa vādaɱ āropeyyaɱ Dīgha-Tapassiɱ vā Nigaṇṭho tvaɱ vā" ti.|| ||

Evaɱ vutte Dīgha-Tapassiɱ Nigaṇṭho Nigaṇṭhaɱ Nātaputtaɱ etad avoca:|| ||

"Na kho me taɱ bhante ruccati,||
yaɱ Upāli gahapati samaṇassa Gotamassa vādaɱ āropeyya.|| ||

Samaṇo hi bhante Gotamo māyāvī,||
āvaṭṭaniɱ māyaɱ jānāti||
yāya aññatitthiyānaɱ sāvake āvaṭṭetī" ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya||
Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyya.|| ||

Gaccha tvaɱ gahapati samaṇassa Gotamassa imasmiɱ kathāvatthusmiɱ vādaɱ āropehi.|| ||

Ahaɱ vā hi gahapati samaṇassa Gotamassa vādaɱ āropeyyaɱ Dīgha-Tapassiɱ vā Nigaṇṭho tvaɱ vā" ti.|| ||

Dutiyam pi kho Dīgha-Tapassiɱ Nigaṇṭho Nigaṇṭhaɱ Nātaputtaɱ etad avoca:|| ||

"Na kho me taɱ bhante ruccati,||
yaɱ Upāli gahapati samaṇassa Gotamassa vādaɱ āropeyya.|| ||

Samaṇo hi bhante Gotamo māyāvī,||
āvaṭṭaniɱ māyaɱ jānāti||
yāya aññatitthiyānaɱ sāvake āvaṭṭetī" ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya||
Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyya.|| ||

Gaccha tvaɱ gahapati samaṇassa Gotamassa imasmiɱ kathāvatthusmiɱ vādaɱ āropehi.|| ||

Ahaɱ vā hi gahapati samaṇassa Gotamassa vādaɱ āropeyyaɱ Dīgha-Tapassiɱ vā Nigaṇṭho tvaɱ vā" ti.|| ||

Tatiyam pi kho Dīgha-Tapassiɱ Nigaṇṭho Nigaṇṭhaɱ Nātaputtaɱ etad avoca:|| ||

"Na kho me taɱ bhante ruccati,||
yaɱ Upāli gahapati samaṇassa Gotamassa vādaɱ āropeyya.|| ||

Samaṇo hi bhante Gotamo māyāvī,||
āvaṭṭaniɱ māyaɱ jānāti||
yāya aññatitthiyānaɱ sāvake āvaṭṭetī" ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya||
Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyya.|| ||

Gaccha tvaɱ gahapati samaṇassa Gotamassa imasmiɱ kathāvatthusmiɱ vādaɱ āropehi.|| ||

Ahaɱ vā hi gahapati samaṇassa Gotamassa vādaɱ āropeyyaɱ Dīgha-Tapassiɱ vā Nigaṇṭho tvaɱ vā" ti.|| ||

Evaɱ bhante' ti kho Upāli gahapati Nigaṇṭhassa Nātaputtassa paṭissutvā uṭṭhāy'āsanā Nigaṇṭhaɱ Nātaputtaɱ abhivādetvā padakkhiṇaɱ katvā yena Pāvārikambavanaɱ,||
[376] yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Upāli gahapati Bhagavantaɱ etad avoca:|| ||

"Āgamā nu khvidha bhante Dīgha-Tapassiɱ Nigaṇṭho" ti?|| ||

"Āgamā khvidha gahapati Dīgha-Tapassiɱ Nigaṇṭho" ti.|| ||

"Ahu pana te bhante DīghaTapassinā nigaṇṭhena saddhiɱ kocid-eva kathāsallāpo" ti?|| ||

"Ahu kho me gahapati DīghaTapassinā nigaṇṭhena saddhiɱ kocid-eva kathāsallāpo" ti.|| ||

"Yathā kathaɱ pana te bhante ahu DīghaTapassinā nigaṇṭhena saddhiɱ kocid-eva kathāsallāpo" ti.|| ||

Atha kho Bhagavā yāvatako ahosi DīghaTapassinā nigaṇṭhena saddhiɱ kathāsallāpo taɱ sabbaɱ Upālissa gahapatissa ārocesi.|| ||

Evaɱ vutte Upāli gahapati Bhagavantaɱ etad avoca:|| ||

"Sādhu sādhu bhante Tapassī,||
yathā taɱ sutavatā sāvakena samma-d-eva satthu sāsanaɱ ājānantena,||
evam evaɱ DīghaTapassinā nigaṇṭhena Bhagavato byākataɱ,||
kiɱ hi sobhati chavo manodaṇḍo imassa evaɱ oḷārikassa kāya-daṇḍassa upanidhāya.|| ||

Atha kho kāya-daṇḍova mahā-sāvajjataro pāpassa kammassa kiriyāya||
pāpassa kammassa pavattiyā||
no tathā vacī-daṇḍo,||
no tathā mano-daṇḍo" ti.|| ||

"Sace kho tvaɱ gahapati sacce patiṭṭhāya manteyyāsi,||
siyā no ettha kathāsallāpo" ti.|| ||

"Sacce ahaɱ bhante patiṭṭhāya mantessāmi||
hotu no ettha kathāsallāpo" ti.|| ||

"Taɱ kim maññasi gahapati?

Idh'assa Nigaṇṭho ābādhiko dukkhito bāḷhagilāno sītodakapaṭikkhitto uṇahodakapaṭisevi||
so sītodakaɱ alabhamāno kālaɱ kareyya.|| ||

Imassa pana gahapati Nigaṇṭho Nātaputto katthūpapattiɱ paññāpetī" ti?|| ||

"Atthi bhante mano-sattā nāma devā,||
tattha so upapajjati.|| ||

Taɱ kissa hetu?|| ||

Asu hi bhante mano-paṭibaddho kālaɱ karotī" ti.|| ||

"Gahapati gahapati,||
manasi-karitvā kho gahapati vyākarovi.|| ||

Na kho te sandhiyati||
purimena vā pacchimaɱ||
pacchimena vā purimaɱ.|| ||

Bhāsitā kho pana te gahapati esā vācā:||
'sacce ahaɱ bhante patiṭṭhāya mantessāmi||
hotu no ettha kathāsallāpo' ti."|| ||

"Kiñcā pi bhante Bhagavā evam āha,||
atha kho kāya-daṇḍo va mahā-sāvajjataro pāpassa kammassa kiriyāya||
pāpassa kammassa pavattiyā||
no tathā vacī-daṇḍo||
no tathā mano-daṇḍo" ti.|| ||

Taɱ kim maññasi [377] gahapati?|| ||

Idh'assa Nigaṇṭho cātuyāma-saɱvara-saɱvuto||
sabba-vārivārito||
sabba-vāriyuto||
sabba-vāridhuto||
sabba-vāriphuṭo,||
so abhikkamanto paṭikkamanto bahū khuddake pāṇe saŋghātaɱ āpādeti.|| ||

Imassa pana gahapati Nigaṇṭho Nātaputto kaɱ vipākaɱ paññāpetī" ti?|| ||

"Asañcetanikaɱ bhante Nigaṇṭho Nātaputto no mahā-sāvajjaɱ paññāpetī" ti.|| ||

"Sace pana gahapati,||
cetetī" ti?|| ||

"Mahā sāvajjaɱ bhante hotī" ti.|| ||

"Cetanaɱ pana gahapati Nigaṇṭho Nātaputto;||
kismiɱ paññāpetī" ti?|| ||

"Mano-daṇḍasmiɱ bhante" ti.|| ||

"Gahapati gahapati,||
manasi-karitvā kho gahapati vyākarovi.|| ||

Na kho te sandhiyati||
purimena vā pacchimaɱ||
pacchimena vā purimaɱ.|| ||

Bhāsitā kho pana te gahapati esā vācā:||
'sacce ahaɱ bhante patiṭṭhāya mantessāmi||
hotu no ettha kathāsallāpo' ti."|| ||

"Kiñcā pi bhante Bhagavā evam āha,||
atha kho kāya-daṇḍo va mahā-sāvajjataro pāpassa kammassa kiriyāya||
pāpassa kammassa pavattiyā||
no tathā vacī-daṇḍo||
no tathā mano-daṇḍo" ti.|| ||

"Taɱ kiɱ maññasi gahapati?|| ||

Ayaɱ Nālandā iddhā c'eva phītā ca,||
bahujanā ākiṇṇa-manussā" ti?|| ||

"Evaɱ bhante, ayaɱ Nālandā iddhā c'eva phītā ca,||
bahujanā ākiṇṇa-manussā" ti.|| ||

"Taɱ kim maññasi gahapati?|| ||

Idha puriso āgaccheyya ukkhittāsiko.|| ||

So evaɱ vadeyya:|| ||

'Ahaɱ yāvatikā imissā Nālandāya pāṇā,||
te ekena khaṇena||
ekena muhuttena||
ekamaɱsakhalaɱ||
ekamaɱsapuñjaɱ karissāmī' ti.|| ||

Taɱ kim maññasi gahapati?|| ||

Pahoti nu kho so puriso yāvatikā imissā Nālandāya pāṇā te ekena khaṇena||
ekena muhuttena||
ekamaɱsakhalaɱ||
ekamaɱsapuñjaɱ kātun" ti?|| ||

"Dasa pi bhante purisā||
vīsam pi purisā||
tiɱsam pi purisā||
cattārisam pi purisā||
paññāsam pi purisā||
nappahonti,||
yāvatikā imissā Nālandāya pāṇā,||
te ekena khaṇena||
ekena muhuttena||
ekamaɱsakhalaɱ||
ekamaɱsapuñjaɱ kātuɱ.|| ||

Kiɱ hi sobhati eko chavo puriso" ti.|| ||

"Taɱ kim maññasi gahapati?|| ||

Idh'āgaccheyya samaṇo vā brāhmaṇo vā iddhimā ceto-vasippatto.|| ||

So evaɱ vadeyya:|| ||

'Ahaɱ imaɱ Nālandaɱ ekena mano-padosena bhasmaɱ [378] kātun' ti.|| ||

Taɱ kim maññasi gahapati?|| ||

Pahoti nu kho so samaṇo vā brāhmaṇo vā iddhimā ceto-vasippatto imaɱ Nālandaɱ ekena manopadosena bhasmaɱ kātun" ti?|| ||

"Dasa pi bhante Nālandā||
vīsatim pi Nālandā||
tiɱsam pi Nālandā||
cattārīsam pi Nālandā||
paññāsam pi Nālandā||
pahoti so samaṇo vā brāhmaṇovā iddhimā ceto-vasippatto ekena manopadosena bhasmaɱ kātuɱ||
kiɱ hi sobhati ekā chavā Nālandā" ti?|| ||

"Gahapati gahapati,||
manasi-karitvā kho gahapati vyākarovi.|| ||

Na kho te sandhiyati||
purimena vā pacchimaɱ||
pacchimena vā purimaɱ.|| ||

Bhāsitā kho pana te gahapati esā vācā:||
'sacce ahaɱ bhante patiṭṭhāya mantessāmi||
hotu no ettha kathāsallāpo' ti."|| ||

"Kiñcā pi bhante Bhagavā evam āha,||
atha kho kāya-daṇḍo va mahā-sāvajjataro pāpassa kammassa kiriyāya||
pāpassa kammassa pavattiyā||
no tathā vacī-daṇḍo||
no tathā mano-daṇḍo" ti.|| ||

"Taɱ kim maññasi gahapati?|| ||

Sutaɱ te daṇḍakāraññaɱ||
kāliŋgāraññaɱ||
mejjhāraññaɱ||
mātaŋgāraññaɱ||
araññaɱ araññabhūtan" ti?|| ||

"Evaɱ bhante.|| ||

Sutaɱ me daṇḍakāraññaɱ||
kāliŋgāraññaɱ||
mejjhāraññaɱ||
mātaŋgāraññaɱ||
araññaɱ araññabhūtan" ti.|| ||

"Taɱ kim maññasi gahapati?|| ||

Kinti te sutaɱ:||
kena taɱ daṇḍakāraññaɱ||
kāliŋgāraññaɱ||
mejjhāraññaɱ||
mātaŋgāraññaɱ||
araññaɱ araññabhūtan" ti?|| ||

Sutaɱ me taɱ bhante isīnaɱ mano-padosena taɱ daṇḍakāraññaɱ||
kāliŋgāraññaɱ||
mejjhāraññaɱ||
mātaŋgāraññaɱ||
araññaɱ araññabhūtan" ti.|| ||

"Gahapati gahapati,||
manasi-karitvā kho gahapati vyākarovi.|| ||

Na kho te sandhiyati||
purimena vā pacchimaɱ||
pacchimena vā purimaɱ.|| ||

Bhāsitā kho pana te gahapati esā vācā:||
'sacce ahaɱ bhante patiṭṭhāya mantessāmi||
hotu no ettha kathāsallāpo' ti."|| ||

Purimen'evāhaɱ bhante opammena Bhagavato attamano abhiraddho,||
api cāhaɱ imāni Bhagavato vicitrāni pañha-paṭibhāṇāni sotukāmo evā'haɱ Bhagavantaɱ paccanīkātabbaɱ amaññissaɱ.|| ||

Abhikkantaɱ bhante,||
abhikkantaɱ bhante!|| ||

Seyyathā pi bhante nikkujjitaɱ vā ukkujjeyya.|| ||

Paṭicchannaɱ vā vicareyya||
mūḷhassa vā maggaɱ ācikkheyya||
andhakāre vā telapajjotaɱ dhāreyya:||
'cakkhumanto rūpāni dakkhintī' ti.|| ||

Evam evaɱ Bhagavatā aneka-pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi [379] dhammañ ca||
bhikkhū-saŋghañ ca.|| ||

Upāsakaɱ maɱ Bhagavā dhāretu ajjatagge pāṇupetaɱ saraṇaɱ gatan" ti.|| ||

"Anuviccakāraɱ kho gahapati karohi.|| ||

Anuviccakāro tumhādisānaɱ ñātamanussānaɱ sādhu hotī" ti.|| ||

"Iminā p'ahaɱ bhante Bhagavato bhīyosomattāya attamano abhiraddho,||
yaɱ maɱ Bhagavā evam āha:||
'anuviccakāraɱ kho gahapati karohi||
anuviccakāro tumhādisānaɱ ñātamanussānaɱ sādhu hotī' ti.|| ||

Maɱ hi bhante aññatitthiyā sāvakaɱ labhitvā kevalakappaɱ Nālandaɱ paṭākaɱ parihareyyuɱ:||
'Upāli amhākaɱ gahapati sāvakattupagato' ti.|| ||

Atha ca pana maɱ Bhagavā evam āha:||
'Anuviccakāraɱ kho gahapati karohi,||
anuviccakāro tumhādisānaɱ ñātamanussānaɱ sādhu hotī' ti.|| ||

Esāham bhante dutiyam pi Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca.|| ||

Upāsakaɱ maɱ Bhagavā dhāretu ajjatagge pāṇupetaɱ saraṇaɱ gatan" ti.|| ||

"Dīgha-rattaɱ kho te gahapati nigaṇṭhānaɱ opānabhūtaɱ kulaɱ,||
yena n'esaɱ upagatānaɱ piṇḍakaɱ dātabbaɱ maññeyyāsī" ti.|| ||

"Iminā p'ahaɱ bhante Bhagavato bhīyosomattāya attamano abhiraddho,||
yaɱ maɱ Bhagavā evam āha:||
'Dīgha-rattaɱ kho te gahapati nigaṇṭhānaɱ opānabhūtaɱ kulaɱ,||
yena n'esaɱ upagatānaɱ piṇḍakaɱ dātabbaɱ maññeyyāsī' ti.|| ||

Sutaɱ me taɱ bhante:|| ||

'Samaṇo Gotamo evam āha:||
"Mayham-eva dānaɱ dātabbaɱ,||
nāññesaɱ dānaɱ dātabbaɱ,||
mayham-eva sāvakānaɱ dānaɱ dātabbaɱ,||
nāññesaɱ sāvakānaɱ dānaɱ dātabbaɱ,||
mayham-eva dinnaɱ mahapphalaɱ,||
nāññesaɱ dinnaɱ mahapphalaɱ,||
mayham-eva sāvakānaɱ dinnaɱ mahapphalaɱ,||
nāññesaɱ sāvakānaɱ dinnaɱ mahapphalan" ti.|| ||

Atha ca pana maɱ Bhagavā nigaṇṭhesu pi dāne samādapeti.|| ||

Api ca bhante mayam-ettha kālaɱ jānissāma.|| ||

Esāham bhante tatiyam pi Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca.|| ||

Upāsakaɱ maɱ Bhagavā dhāretu ajjatagge pāṇupetaɱ saraṇaɱ gatan" ti.|| ||

Atha kho Bhagavā Upālissa gahapatissa ānupubbīkathaɱ kathesi.|| ||

Seyyathīdaɱ:||
dāna-kathaɱ,||
sīla-kathaɱ,||
sagga-kathaɱ,||
kāmānaɱ ādīnavaɱ,||
okāraɱ saŋkilesaɱ,||
nekkhamme ānisaɱsaɱ pakāsesi.|| ||

Yadā Bhagavā aññāsi Upāliɱ gahapatiɱ [380] kalla-cittaɱ||
mudu-cittaɱ||
vinīvaraṇa-cittaɱ||
udagga-cittaɱ||
pasanna-cittaɱ,||
atha yā buddhānaɱ sāmukkaɱsikā dhammadesanā,||
taɱ pakāsesi:||
dukkhaɱ||
samudayaɱ||
nirodhaɱ||
maggaɱ.|| ||

Seyyathā pi nāma suddhaɱ vatthaɱ apagatakāḷakaɱ samma-d-eva rajanaɱ patigaṇheyya.|| ||

Evam evaɱ Upālissa gahapatissa tasmiɱyeva āsane virajaɱ vītamalaɱ dhamma-cakkhuɱ udapādi:||
'yaŋkiñci samudaya-dhammaɱ sabbantaɱ nirodha-dhamman' ti.|| ||

Atha kho Upāli gahapati diṭṭha-dhammo patta-dhammo vidita-dhammo pariyogāḷha-dhammo tiṇṇavicikiccho vigatakathaŋkatho vesārajjappatto aparappaccayo satthusāsane Bhagavantaɱ etad avoca:|| ||

"Handa ca dāni mayaɱ bhante gacchāma||
bahukicchā mayaɱ bahukaraṇīyā" ti.|| ||

"Yassa dāni tvaɱ gahapati kālaɱ maññasī" ti.|| ||

Atha kho Upāli gahapati Bhagavato bhāsitaɱ abhinanditvā anumoditvā uṭṭhāy'āsanā Bhagavantaɱ abhivādetvā padakkhiṇaɱ katvā yena sakaɱ nivesanaɱ ten'upasaŋkami.|| ||

Upasaŋkamitvā dovārikaɱ āmantesi:|| ||

"Ajjatagge samma dovārika,||
āvarāmi dvāraɱ nigaṇṭhānaɱ nigaṇṭhīnaɱ,||
anāvaṭaɱ dvāraɱ Bhagavato bhikkhunaɱ bhikkhunīnaɱ||
upāsakānaɱ upāsikānaɱ;||
sace koci Nigaṇṭho āgacchati||
tam enaɱ tvaɱ evaɱ vadeyyāsi:|| ||

'Tiṭṭha bhante, mā pāvisi,||
ajjatagge Upāli gahapati samaṇassa Gotamassa sāvakattaɱ upagato,||
āvaṭaɱ dvāraɱ nigaṇṭhānaɱ, nigaṇṭhīnaɱ,||
anāvaṭaɱ dvāraɱ Bhagavato bhikkhunaɱ bhikkhunīnaɱ||
upāsakānaɱ upāsikānaɱ||
sace te bhante piṇḍakena attho etth'eva tiṭṭha,||
etth,eva te āharissantī'" ti.|| ||

"Evaɱ bhante" ti kho dovāriko Upālissa gahapatissa paccassosi.|| ||

Assosi kho Dīgha-Tapassiɱ Nigaṇṭho:||
'Upāli kira gahapati samaṇassa Gotamassa sāvakattaɱ upagato' ti.|| ||

Atha kho Dīgha-Tapassiɱ Nigaṇṭho yena Nigaṇṭho Nātaputto ten'upasaŋkami.|| ||

Upasaŋkamitvā Nigaṇṭhaɱ Nātaputtaɱ etad avoca:|| ||

"Sutaɱ me taɱ bhante Upāli kira gahapati samaṇassa Gotamassa sāvakattaɱ upagato" ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya.|| ||

Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyyā" ti.|| ||

[381] Dutiyam pi kho Dīgha-Tapassiɱ Nigaṇṭho Nigaṇṭhaɱ Nātaputtaɱ etad avoca:|| ||

"Sutaɱ me taɱ bhante Upāli kira gahapati samaṇassa Gotamassa sāvakattaɱ upagato" ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya.|| ||

Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyyā" ti.|| ||

Tatiyam pi kho Dīgha-Tapassiɱ Nigaṇṭho Nigaṇṭhaɱ Nātaputtaɱ etad avoca:|| ||

"Sutaɱ me taɱ bhante Upāli kira gahapati samaṇassa Gotamassa sāvakattaɱ upagato" ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya.|| ||

Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyyā" ti.|| ||

"Handāhaɱ bhante gacchāmi yāva jānāmi yadi vā Upāli gahapati samaṇassa Gotamassa sāvakattaɱ upagato yadi vā no" ti.|| ||

"Gaccha tvaɱ Tapassi jānāhi yadi vā Upāli gahapati samaṇassa Gotamassa sāvakattaɱ upagato yadi vā no" ti.|| ||

Atha kho Dīgha-Tapassiɱ Nigaṇṭho yena Upālissa gahapatissa nivesanaɱ ten'upasaŋkami.|| ||

Addasā kho dovāriko Dīgha-Tapassiɱ Nigaṇṭhaɱ dūrato va āgacchantaɱ.|| ||

Disvāna Dīgha-Tapassiɱ Nigaṇṭhaɱ etad avoca:|| ||

"Tiṭṭha bhante, mā pāvisi,||
ajjatagge Upāli gahapati samaṇassa Gotamassa sāvakattaɱ upagato,||
āvaṭaɱ dvāraɱ nigaṇṭhānaɱ, nigaṇṭhīnaɱ,||
anāvaṭaɱ dvāraɱ Bhagavato bhikkhunaɱ bhikkhunīnaɱ||
upāsakānaɱ upāsikānaɱ||
sace te bhante piṇḍakena attho etth'eva tiṭṭha,||
etth,eva te āharissantī" ti.|| ||

"Na me āvuso piṇḍakena attho" ti vatvā tato paṭinivattitvā yena Nigaṇṭho Nātaputto ten'upasaŋkami.|| ||

Upasaŋkamitvā Nigaṇṭhaɱ Nātaputtaɱ etad avoca:

"Saccaɱ yeva kho bhante yaɱ Upāli gahapati samaṇassa Gotamassa sāvakattaɱ upagato.|| ||

Etaɱ kho te ahaɱ bhante nālatthaɱ:|| ||

'Na kho me taɱ bhante ruccati yaɱ Upāli gahapati samaṇassa Gotamassa vādaɱ āropeyya.|| ||

Samaṇo hi bhante Gotamo māyāvī,||
āvaṭṭaniɱ māyaɱ jānāti,||
yāya aññatitthiyānaɱ sāvake āvaṭṭetī' ti.|| ||

Āvaṭṭo kho te bhante Upāli gahapati samaṇena Gotamena āvaṭṭaniyā māyāyā"ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya.|| ||

Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyyā" ti.|| ||

Dutiyam pi kho Dīgha-Tapassiɱ Nigaṇṭho Nigaṇṭhaɱ Nātaputtaɱ etad avoca:|| ||

"Saccaɱ yeva kho bhante yaɱ Upāli gahapati samaṇassa Gotamassa sāvakattaɱ [382] upagato.|| ||

Etaɱ kho te ahaɱ bhante nālatthaɱ:|| ||

'Na kho me taɱ bhante ruccati yaɱ Upāli gahapati samaṇassa Gotamassa vādaɱ āropeyya.|| ||

Samaṇo hi bhante Gotamo māyāvī,||
āvaṭṭaniɱ māyaɱ jānāti,||
yāya aññatitthiyānaɱ sāvake āvaṭṭetī' ti.|| ||

Āvaṭṭo kho te bhante Upāli gahapati samaṇena Gotamena āvaṭṭaniyā māyāyā"ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya.|| ||

Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyyā" ti.|| ||

Tatiyam pi kho dīgha Tapassī Nigaṇṭho Nigaṇṭhaɱ Nātaputtaɱ etad avoca:|| ||

"Saccaɱ yeva kho bhante yaɱ Upāli gahapati samaṇassa Gotamassa sāvakattaɱ upagato.|| ||

Etaɱ kho te ahaɱ bhante nālatthaɱ:|| ||

'Na kho me taɱ bhante ruccati yaɱ Upāli gahapati samaṇassa Gotamassa vādaɱ āropeyya.|| ||

Samaṇo hi bhante Gotamo māyāvī,||
āvaṭṭaniɱ māyaɱ jānāti,||
yāya aññatitthiyānaɱ sāvake āvaṭṭetī' ti.|| ||

Āvaṭṭo kho te bhante Upāli gahapati samaṇena Gotamena āvaṭṭaniyā māyāyā"ti.|| ||

"Aṭṭhānaɱ kho etaɱ Tapassi anavakāso yaɱ Upāli gahapati samaṇassa Gotamassa sāvakattaɱ upagaccheyya.|| ||

Ṭhānañ ca kho etaɱ vijjati yaɱ Samaṇo Gotamo Upālissa gahapatissa sāvakattaɱ upagaccheyyā.|| ||

Handa cāhaɱ Tapassi gacchāmi yāya sāmaɱ yeva jānāmi,||
yadi vā Upāli gahapati samaṇassa Gotamassa sāvakattaɱ upagato yadi vā noti.|| ||

Atha kho Nigaṇṭho Nātaputto mahatiyā Nigaṇṭhaparisāya saddhiɱ yena Upālissa gahapatissa nivesanaɱ ten'upasaŋkami.|| ||

Addasā kho dovāriko Nigaṇṭhaɱ Nātaputtaɱ dūrato va āgacchantaɱ,||
disvāna Nigaṇṭhaɱ Nātaputtaɱ etad avoca:|| ||

"Tiṭṭha bhante, mā pāvisi,||
ajjatagge Upāli gahapati samaṇassa Gotamassa sāvakattaɱ upagato,||
āvaṭaɱ dvāraɱ nigaṇṭhānaɱ, nigaṇṭhīnaɱ,||
anāvaṭaɱ dvāraɱ Bhagavato bhikkhunaɱ bhikkhunīnaɱ||
upāsakānaɱ upāsikānaɱ||
sace te bhante piṇḍakena attho etth'eva tiṭṭha,||
etth,eva te āharissantī" ti.|| ||

Tena hi samma dovārika,||
yena Upāli gahapati ten'upasaŋkama.|| ||

Upasaŋkamitvā Upāliɱ gahapatiɱ evaɱ vadehi:|| ||

'Nigaṇṭho bhante Nātaputto mahatiyā Nigaṇṭhaparisāya saddhiɱ bahidvārakoṭṭhake ṭhito.|| ||

So te dassanakāmo'" ti.|| ||

"Evaɱ bhante" ti kho dovāriko Nigaṇṭhassa Nātaputtassa paṭissutvā yena Upāli gahapati ten'upasaŋkami.|| ||

Upasaŋkamitvā Upāliɱ Gahapatiɱ etad avoca:|| ||

"Nigaṇṭho bhante Nātaputto mahatiyā Nigaṇṭhaparisāya saddhiɱ bahidvārakoṭṭhake ṭhito,||
so te dassanakāmo" ti.|| ||

"Tena hi samma dovārika,||
majjhamāya dvārasālāya āsanāni paññāpehī" ti.|| ||

"Evaɱ bhante" ti kho dovāriko Upālissa gahapatissa paṭissutvā majjhamāya dvārasālāya āsanāni paññāpetvā yena Upāli gahapati ten'upasaŋkami.|| ||

Upasaŋkamitvā Upāliɱ gahapatiɱ etad avoca:|| ||

"Paññattāni kho te bhante majjhamāya dvārasālāya āsanāni||
yassa dāni kālaɱ maññasī" ti.|| ||

Atha kho Upāli gahapati yena [383] majjhamā dvārasālā ten'upasaŋkami.|| ||

Upasaŋkamitvā yaɱ tattha āsanaɱ aggañ ca||
seṭṭhañ ca||
uttamañ ca||
paṇītañ ca||
tattha nisīditvā dovārikaɱ āmantesi:|| ||

"Tena hi samma-dovārika yena Nigaṇṭho Nātaputto ten'upasaŋkama.|| ||

Upasaŋkamitvā Nigaṇṭhaɱ Nātaputtaɱ evaɱ vadehi:|| ||

"Upāli bhante gahapati evam āha:|| ||

'Pavisa kira bhante sace ākaŋkhasī' ti.|| ||

"Evaɱ bhante" ti kho dovāriko Upālissa gahapatissa paṭissutvā yena Nigaṇṭho Nātaputto ten'upasaŋkami.|| ||

Upasaŋkamitvā Nigaṇṭhaɱ Nātaputtaɱ etad avoca:|| ||

"Upāli bhante gahapati evam āha:||
'Pavisa kira bhante sace ākaŋkhasī'" ti.|| ||

Atha kho Nigaṇṭho Nātaputto mahatiyā Nigaṇṭhaparisāya saddhiɱ yena majjhamā dvārasālā ten'upasaŋkami.|| ||

Atha kho Upāli gahapati yaɱ sudaɱ pubbe va yato passati Nigaṇṭhaɱ Nātaputtaɱ dūrato va āgacchantaɱ||
disvāna tato paccugantvā yaɱ tattha āsanaɱ aggañ ca||
seṭṭhañ ca||
uttamañ ca||
paṇītañ ca,||
taɱ uttarāsaŋgena pamajjitvā pariggahetvā nisīdāpeti.|| ||

So dāni yaɱ tattha āsanaɱ aggañ ca||
seṭṭhañ ca||
uttamañ ca||
paṇītañ ca||
tattha sāmaɱ nisīditvā Nigaṇṭhaɱ Nātaputtaɱ etad avoca:|| ||

"Saɱvijjante kho bhante āsanāni,||
sace ākaŋkhasi nisīdā" ti.|| ||

Evaɱ vutte Nigaṇṭho Nātaputto Upāliɱ gahapatiɱ etad avoca:|| ||

"Ummatto si tvaɱ gahapati,||
datto si tvaɱ gahapati.|| ||

Gacchām'ahaɱ bhante samaṇassa Gotamassa vādaɱ āropessāmīti gantvā mahatā si vādasaŋghāṭena paṭimukko āgato.|| ||

Seyyathā pi gahapati puriso aṇḍahārako gantvā ubbhatehi aṇaḍehi āgaccheyya.|| ||

Seyyathā vā pana gahapati puriso akkhikahārako gantvā ubbhatehi akkhīhi āgaccheyya.|| ||

Evam eva kho tvaɱ gahapati||
gacchām'ahaɱ bhante samaṇassa Gotamassa vādaɱ āropessāmīti gantvā mahatā si vādasaŋghāṭena paṭimukko āgato.|| ||

Āvaṭṭo si kho tvaɱ gahapati samaṇena Gotamena āvaṭṭaniyā māyāyā" ti.|| ||

"Bhaddikā bhante āvaṭṭanī māyā,||
kalyāṇī bhante āvaṭṭanī māyā.|| ||

Piyā me bhante ñātisālohitā imāya āvaṭṭaniyā āvaṭṭeyyuɱ,||
piyānam pi me assa ñātisālohitānaɱ dīgha-rattaɱ hitāya sukhāya.|| ||

Sabbe ce pi bhante khattiyā imāya āvaṭṭaniyā āvaṭṭeyyuɱ.|| ||

Sabbe sānam p'issa khattiyānaɱ dīgha-rattaɱ [384] hitāya sukhāya.|| ||

Sabbe ce pi bhante brāhmaṇā imāya āvaṭṭaniyā āvaṭṭeyyuɱ.|| ||

Sabbe sānam p'issa brāhmaṇānaɱ dīgha-rattaɱ hitāya sukhāya.|| ||

Sabbe ce pi bhante vessā imāya āvaṭṭaniyā āvaṭṭeyyuɱ.|| ||

Sabbe sānam p'issa vessānaɱ dīgha-rattaɱ hitāya sukhāya.|| ||

Sabbe ce pi bhante suddā imāya āvaṭṭaniyā āvaṭṭeyyuɱ.|| ||

Sabbe sānam p'issa suddānaɱ dīgha-rattaɱ hitāya sukhāya.|| ||

Sadevako ce pi Bhante loko samārako sabrahmako sassamaṇa-brāhmaṇī pajā sadeva-manussā imāya āvaṭṭaniyā āvaṭṭeyya.|| ||

Sadeva-kassa p'issa lokassa samāra-kassa sabrahma-kassa sassamaṇa-brāhmaṇiyā pajāya sadeva-manussāya dīgha-rattaɱ hitāya sukhāya.|| ||

Tena hi bhante upamante karissāmi.|| ||

Upamāya p'idh'ekacce viññū purisā bhāsitassa atthaɱ ājānanti.|| ||

Bhūtapubbaɱ bhante aññatarassa brāhmaṇassa jiṇṇassa vuddhassa mahallakassa daharā māṇavikā pajāpatī ahosi gabbhinī upavijañññā.|| ||

Atha kho bhante sā māṇavikā taɱ brāhmaṇaɱ etad avoca:|| ||

'Gaccha tvaɱ brāhmaṇa,||
āpaṇā makkaṭacchāpakaɱ kiṇitvā ānehi yo me kumārakassa kīḷāpanako bhavissatī' ti.|| ||

Evaɱ vutte bhante so brāhmaṇo taɱ māṇavikaɱ etad avoca:|| ||

'Āgamehi tāva bhoti yāva vijāyasi.|| ||

Sace tvaɱ bhoti kumārakaɱ vijāyissasi,||
tassa te ahaɱ āpaṇā makkaṭacchāpakaɱ kiṇitvā ānessāmi.|| ||

Yo te kumārakassa kīḷāpanako bhavissati.|| ||

Sace pana tvaɱ bhoti kumārikaɱ vijāyissasi,||
tassā te ahaɱ āpaṇā makkaṭacchāpikaɱ kiṇitvā ānessāmi.|| ||

Yā te kumārikāya kīḷāpanikā bhavissatī' ti.|| ||

Dutiyam pi kho bhante sā māṇavikā taɱ brāhmaṇaɱ etad avoca:|| ||

'Gaccha tvaɱ brāhmaṇa,||
āpaṇā makkaṭacchāpakaɱ kiṇitvā ānehi yo me kumārakassa kī'āpanako bhavissatī' ti.|| ||

Evaɱ vutte bhante so brāhmaṇo taɱ māṇavikaɱ etad avoca:

'Āgamehi tāva hoti yāva vijāyasi.|| ||

Sace tvaɱ hoti kumārakaɱ vijāyissasi,||
tassa te ahaɱ āpaṇā makkaṭacchāpakaɱ kiṇitvā ānessāmi.|| ||

Yo te kumārakassa kīḷāpanako bhavissati.|| ||

Sace pana tvaɱ bhoti kumārikaɱ vijāyissasi,||
tassā te ahaɱ āpaṇā makkaṭacchāpikaɱ kiṇitvā ānessāmi.|| ||

Yā te kumārikāya kīḷāpanikā bhavissatī' ti.|| ||

Tatiyam pi kho bhante sā māṇavikā taɱ brāhmaṇaɱ etad avoca:|| ||

'Gaccha tvaɱ brāhmaṇa āpaṇā makkaṭacchāpakaɱ kiṇitvā ānehi yo me kumārakassa kī'āpanako bhavissatī' ti.|| ||

Atha kho bhante se brāhmaṇo tassā māṇavikāya sāratto paṭibaddhacitto āpaṇā makkaṭacchāpakaɱ kiṇitvā ānetvā taɱ māṇavikaɱ etad avoca:

'Ayaɱ te bhoti āpaṇā makkaṭacchāpako [385] kiṇitvā ānīto yo te kumārakassa kīḷāpanako bhavissatī' ti.|| ||

Evaɱ vutte bhante sā māṇavikā taɱ brāhmaṇaɱ etad avoca:|| ||

'Gaccha tvaɱ brāhmaṇa,imaɱ makkaṭacchāpakaɱ ādāya yena Rattapāṇī rajakaputto ten'upasaŋkami.|| ||

Upasaŋkamitvā Rattapāṇiɱ rajakaputtaɱ evaɱ vadehi:

'Icchām'ahaɱ samma Rattapāṇī,||
imaɱ makkaṭacchāpakaɱ pītāvalepanaɱ nāma raŋgajātaɱ rañjitaɱ ākoṭitapaccākoṭitaɱ ubhatobhāgavimaṭṭhan' ti.|| ||

Atha kho bhante so brāhmaṇo tassā māṇavikāya sāratto paṭibaddhacitto taɱ makkaṭacchāpakaɱ ādāya yena Rattapāṇī rajakaputto ten'upasaŋkami.|| ||

Upasaŋkamitvā Rattapāṇiɱ rajakaputtaɱ etad avoca:|| ||

'Icchām'ahaɱ samma Rattapāṇī,||
imaɱ makkaṭacchāpakaɱ pītāvalepanaɱ nāma raŋgajātaɱ3 rañjitaɱ ākoṭitapaccākoṭitaɱ ubhatobhāgavimaṭṭhan' ti.|| ||

Evaɱ vutte bhante Rattapāṇī rajakaputto taɱ brāhmaṇaɱ etad avoca:|| ||

'Ayaɱ kho te bhante makkaṭacchāpako raŋgakkhamo hi kho,||
no ākoṭanakkhamo no vimajjanakkhamo' ti.|| ||

Evam eva kho bhante bālānaɱ nigaṇṭhānaɱ vādo raŋgakkhamo hi kho bālānaɱ no paṇḍitānaɱ,||
no anuyogakkhamo,||
no vimajjanakkhamo.|| ||

Atha kho bhante so brāhmaṇo aparena samayena navaɱ dussayugaɱ ādāya yena Rattapāṇī rajakaputto ten'upasaŋkami.|| ||

Upasaŋkamitvā Rattapāṇiɱ rajakaputtaɱ etad avoca:|| ||

'Icchām'ahaɱ samma-Rattapāṇi,||
imaɱ navaɱ dussayugaɱ pitāvalepanaɱ nāma raŋgajātaɱ rañjitaɱ3 ākoṭitapaccākoṭitaɱ ubhatobhāgavimaṭṭhan' ti.|| ||

Evaɱ vutte bhante Rattapāṇī rajakaputto taɱ brāhmaṇaɱ etad avoca:|| ||

'Idaɱ kho te bhante navaɱ dussayugaɱ raŋgakkhamañc'eva ākoṭanakmañca vimajjanakkhamañcā' ti.|| ||

Evam eva kho bhante tassa Bhagavato vādo arahato Sammā-sambuddhassa raŋgakkhamo c'eva paṇḍitānaɱ no bālānaɱ,||
anuyogakkhamo ca vimajjanakkhamo cā" ti.|| ||

"Sarājikā kho taɱ gahapati parisā evaɱ jānāti:||
'Upāli gahapati Nigaṇṭhassa Nātaputtassa sāvako' ti.|| ||

Kassa taɱ gahapati sāvakaɱ dhāremā" ti?|| ||

Evaɱ vutte Upāli gahapati uṭṭhāy'āsanā ekaɱsaɱ uttarāsaŋgaɱ karitvā yena Bhagavā [386] ten'añjalim-panāmetvā Nigaṇṭhaɱ Nātaputtaɱ etad avoca:|| ||

"Tena hi bhante suṇāhi yassā'haɱ sāvako:|| ||

 

Dhīrassa vigatamohassa pabhinnakhīlassa vijitavijayassa,||
Anīghassa susamacittassa vuddhasīlassa sādhupaññassa,||
Vessantarassa vimalassa Bhagavato tassa sāvako'ham asmi.|| ||

Akathaŋkathissa tusitassa vantalokāmisassa muditassa,||
Katasamaṇassa manujassa antimasarīrassa narassa,||
Anopamassa virajassa Bhagavato tassa sāvako'ham asmi.|| ||

Asaɱsayassa kulassa venayikassa sārathivarassa,||
Anuttarassa ruciradhammassa nikkaŋkhassa pabhāsakarassa,||
Mānacchidassa vīrassa Bhagavato tassa sāvako'ham asmi.|| ||

Nisabhassa appameyyassa gambhīrassa monapattassa,||
Khemaŋkarassa vedassa dhammaṭṭhassa saɱvutattassa,||
Saŋgātigassa muttassa Bhagavato tassa sāvako'ham asmi.|| ||

Nāgassa pantasenassa khīṇasaɱyojanassa muttassa,||
Paṭimantakassa dhonassa pannaddhajassa vītarāgassa,||
Dantassa nippapañc'assa Bhagavato tassa sāvako'ham asmi.|| ||

Isisattamassa akuhassa tevijjassa brahmapattassa,||
Nahātakassa padakassa passaddhassa viditavedassa,||
Purindadassa sakkassa Bhagavato tassa sāvako'ham asmi.|| ||

Ariyassa bhāvitattassa pattipattassa veyyākaraṇassa,||
Satīmato vipassissa anabhinatassa no apanatassa,||
Anejassa vasippattassa Bhagavato tassa sāvako'ham asmi.|| ||

Sammaggatassa jhāyissa ananugatantarassa suddhassa,||
Asitassa appahīnassa pavivittassa aggapattassa,||
Tiṇṇassa tārayantassa Bhagavato tassa sāvako'ham asmi.|| ||

Santassa bhūripaññassa mahāpaññassa vītalobhassa,||
Tathāgatassa sugatassa appaṭipuggalassa asamassa,||
Visāradassa nipuṇassa Bhagavato tassa sāvako'ham asmi.|| ||

Taṇhacchidassa Buddhassa vītadhūmassa anupalittassa,||
Āhuṇeyyassa yakkhassa uttamapuggalassa atulassa,||
Mahato yasaggapattassa Bhagavato tassa sāvako'hamasmī" ti.|| ||

 

"Kadā saññūḷhā pana te gahapati ime samaṇassa Gotamassa vaṇṇā" ti?|| ||

Seyyathā pi bhante nānāpupphānaɱ mahā- [387] puppharāsī,||
tam enaɱ dakkho mālākāro vā mālākārantevāsī vā vicittaɱ mālaɱ gantheyya,||
evam eva kho bhante so Bhagavā anekavaṇṇo anekasatavaṇṇo.|| ||

Ko hi bhante vaṇṇārahassa vaṇṇaɱ na karissatī" ti|| ||

Atha kho Nigaṇṭhassa Bhagavato sakkāraɱ asahamānassa tatth'eva uṇhaɱ lohitaɱ mukhato uggañjīti.|| ||

Upālisuttaɱ chaṭṭhaɱ


Contact:
E-mail
Copyright Statement   Webmaster's Page