Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
1. Gahapati Vagga

Sutta 57

Kukkura-Vatika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[387]

[1][chlm][pts][nymo][ntbb][upal] Evaɱ me sutaɱ:|| ||

Ekaɱ samayaɱ Bhagavā Koḷiyesu viharati Haliddavasanaɱ nāma Koḷiyānaɱ nigamo.|| ||

Atha kho Puṇṇo ca Koḷiyaputto govatiko,||
acelo ca Seniyo kukkuravatiko yena Bhagavā ten'upasankamiɱsu.|| ||

Upasaŋkamitvā Puṇṇo Koḷiyaputto govatiko Bhagavantaɱ abhivādetvā eka-m-antaɱ nisīdi.|| ||

Acelo pana Seniyo kukkuravatiko Bhagavatā saddhiɱ sammodi,||
sammodanīyaɱ kathaɱ sārāṇīyaɱ vīti-sāretvā kukkuro va palikujjitvā eka-m-antaɱ nisīdi.|| ||

Eka-m-antaɱ nisinno kho Puṇṇo Koḷiyaputto govatiko Bhagavantaɱ etad avoca:|| ||

Ayaɱ bhante acelo Seniyo kukkuravatiko dukkarakārako,||
chamānikkhittaɱ bhuñjati.|| ||

Tassa taɱ kukkuravataɱ dīgha-rattaɱ samattaɱ samādinnaɱ,||
tassa kā gati,||
ko abhisamparāyo ti.|| ||

Alaɱ Puṇṇa, tiṭṭhat'etaɱ,||
mā maɱ etaɱ pucchīti.|| ||

Dutiyam pi kho Puṇṇo Koḷiyaputto govatiko Bhagavantaɱ etad avoca:|| ||

Ayaɱ bhante acelo Seniyo kukkuravatiko dukkarakārako,||
chamānikkhittaɱ bhuñjati.|| ||

Tassa taɱ kukkuravataɱ dīgha-rattaɱ samattaɱ samādinnaɱ,||
tassa kā gati,||
ko abhisamparāyo ti.|| ||

Alaɱ Puṇṇa, tiṭṭhat'etaɱ,||
mā maɱ etaɱ pucchīti.|| ||

Tatiyam pi kho Puṇṇo Koḷiyaputto govatiko Bhagavantaɱ etad avoca:|| ||

Ayaɱ bhante acelo Seniyo kukkuravatiko dukkarakārako,||
chamānikkhittaɱ bhuñjati.|| ||

Tassa taɱ kukkuravataɱ dīgha-rattaɱ samattaɱ samādinnaɱ,||
tassa kā gati,||
ko abhisamparāyo ti.|| ||

Addhā kho te ahaɱ Puṇṇa na labhāmi:||
alaɱ Puṇṇa, tiṭṭhat'etaɱ,||
mā maɱ etaɱ pucchīti.|| ||

Api ca te āhaɱ vyākarissāmi.|| ||

Idha Puṇṇa, ekacco kukkuravataɱ bhāveti paripuṇṇaɱ abbokiṇṇaɱ,||
kukkurasīlaɱ bhāveti paripuṇṇaɱ abbokiṇṇaɱ,||
kukkuracittaɱ bhāveti paripuṇṇaɱ [388] abbokiṇṇaɱ,||
kukkurākappaɱ bhāveti paripuṇṇaɱ abbokiṇṇaɱ.|| ||

So kukkuravataɱ bhāvetvā paripuṇṇaɱ abbokiṇṇaɱ,||
kukkurasīlaɱ bhāvetvā paripuṇṇaɱ abbokiṇṇaɱ,||
kukkuracittaɱ bhāvetvā paripuṇṇaɱ abbokiṇṇaɱ,||
kukkurākappaɱ bhāvetvā paripuṇṇaɱ abbokiṇṇaɱ,||
kāyassa bhedā param maraṇā kukkurānaɱ saha-vyataɱ uppajjati.|| ||

Sace kho pan'assa evaɱ diṭṭhi hoti:|| ||

Iminā'haɱ sīlena vā vatena vā tapena vā brahma-cariyena vā devo vā bhavissāmi deva-ñ-ñataro vā ti.|| ||

Sā'ssa hoti micchā-diṭṭhi.|| ||

Micchā-diṭṭhissa kho ahaɱ Puṇṇa dvinnaɱ gatīnaɱ aññataraɱ gatiɱ vadāmi:||
Nirayaɱ vā tiracchāna-yoniɱ vā.|| ||

Iti kho Puṇṇa sampajjamānaɱ kukkuravataɱ kukkurānaɱ saha-vyataɱ upaneti,||
vipajjamānaɱ Nirayan ti.

Evaɱ vutte acelo Seniyo kukkuravatiko parodi,||
assūni pavattesi.|| ||

Atha kho Bhagavā Puṇṇaɱ Koḷiyaputtaɱ govatikaɱ etad avoca:|| ||

Etaɱ kho te ahaɱ Puṇṇa nālatthaɱ:||
alaɱ Puṇṇa, tiṭṭhat'etaɱ,
mā maɱ etaɱ pucchīti.|| ||

Nāhaɱ bhante etaɱ rodāmi,||
yaɱ maɱ Bhagavā evam āha.|| ||

Api ca me idaɱ bhante kukkuravataɱ dīgha-rattaɱ samattaɱ samādinnaɱ.|| ||

Ayañ bhante Puṇṇo Koḷiyaputto govatiko,||
tassa taɱ govataɱ dīgha-rattaɱ samattaɱ samādinnaɱ||
tassa kā gati,||
ko abhisamparāyo ti.|| ||

Alaɱ Seniya, tiṭṭhat'etaɱ,||
mā maɱ etaɱ pucchīti.|| ||

Dutiyam pi kho acelo Seniyo kukkuravatiko Bhagavantaɱ etad avoca:|| ||

Ayaɱ bhante Puṇṇo Koḷiyaputto govatiko,||
tassa taɱ govataɱ dīgha-rattaɱ samattaɱ samādinnaɱ,||
tassa kā gati,||
ko abhisamparāyo ti.|| ||

Alaɱ Seniya, tiṭṭhat'etaɱ,
mā maɱ etaɱ pucchīti.|| ||

Tatiyam pi kho acelo Seniyo kukkuravatiko Bhagavantaɱ etad avoca:|| ||

Ayaɱ bhante Puṇṇo Koḷiyaputto govatiko,||
tassa taɱ govataɱ dīgha-rattaɱ samattaɱ samādinnaɱ,||
tassa kā gati,||
ko abhisamparāyo ti.|| ||

Addhā kho te ahaɱ Seniya na labhāmi:||
alaɱ Seniya, tiṭṭhat'etaɱ||
mā maɱ etaɱ pucchīti,||
api ca kho tyāhaɱ vyākarissāmi.|| ||

Idha Seniya, ekacco govataɱ bhāveti paripuṇṇaɱ abbokiṇṇaɱ,||
gosīlaɱ bhāveti paripuṇṇaɱ abbokiṇṇaɱ,||
gocittaɱ bhāveti paripuṇṇaɱ abbokiṇṇaɱ,||
gavākappaɱ bhāveti paripuṇṇaɱ abbokiṇṇaɱ.|| ||

So govataɱ bhāvetvā paripuṇṇaɱ abbokiṇṇaɱ,||
gosīlaɱ bhāvetvā paripuṇṇaɱ abbokiṇṇaɱ,||
gocittaɱ bhāvetvā paripuṇṇaɱ abbokiṇṇaɱ,||
gavākappaɱ bhāvetvā paripuṇṇaɱ abbokiṇṇaɱ,||
kāyassa bhedā param maraṇā gunnaɱ saha-vyataɱ uppajjati.|| ||

Sace [389] kho pan'assa evaɱ diṭṭhi hoti:|| ||

Iminā'haɱ sīlena vā vatena vā tapena vā brahma-cariyena vā devo vā bhavissāmi deva-ñ-ñataro vā ti.|| ||

Sā'ssa hoti micchā-diṭṭhi.|| ||

Micchā-diṭṭhikassa kho ahaɱ Seniya dvinnaɱ gatīnaɱ aññataraɱ gatiɱ vadāmi:|| ||

Nirayaɱ vā tiracchāna-yoniɱ vā.|| ||

Iti kho Seniya sampajjamānaɱ govataɱ gunnaɱ saha-vyataɱ upaneti,||
vipajjamānaɱ Nirayan ti.|| ||

Evaɱ vutte Puṇṇo Koḷiyaputto govatiko parodi,||
assūni pavattesi.|| ||

Atha kho Bhagavā acelaɱ Seniyaɱ kukkaravatikaɱ etad avoca:|| ||

Etaɱ kho te ahaɱ Seniya, nālatthaɱ:||
alaɱ Seniya, tiṭṭhat'etaɱ,||
mā maɱ etaɱ pucchīti.|| ||

Nāhaɱ bhante etaɱ rodāmi,||
yaɱ maɱ Bhagavā evam āha.|| ||

Api ca me idaɱ bhante govataɱ dīgha-rattaɱ samattaɱ samādinnaɱ.|| ||

Evaɱ pasanno ahaɱ bhante Bhagavati:|| ||

Pahoti Bhagavā tathā dhammaɱ desetuɱ yathā ahañ-c'ev'imaɱ govataɱ pajaheyyaɱ.|| ||

Ayañ-ca acelo Seniyo kukkuravatiko taɱ kukkuravataɱ pajaheyyāti.|| ||

Tena hi Puṇṇa suṇāhi,||
sādhukaɱ mana-sikarohi,||
bhāsissāmīti.|| ||

"Evaɱ bhante" ti kho Puṇṇo Koḷiyaputto govatiko Bhagavato paccassosi.|| ||

Bhagavā etad avoca:|| ||

Cattār'imāni Puṇṇa kammāni mayā sayaɱ abhiññā sacchi-katvā paveditāni.|| ||

Katamāni cattāri?|| ||

Atthi Puṇṇa kammaɱ kaṇhaɱ kaṇha-vipākaɱ,||
atthi Puṇṇa kammaɱ sukkaɱ sukka-vipākaɱ,||
atthi Puṇṇa kammaɱ kaṇha-sukkaɱ kaṇha-sukka-vipākaɱ,||
atthi Puṇṇa kammaɱ akaṇhaɱ asukkaɱ akaṇhāsukka-vipākaɱ kammaɱ kamma-k-khayāya saŋvattati.|| ||

Katamañ ca Puṇṇa kammaɱ kaṇhaɱ kaṇha-vipākaɱ?|| ||

Idha Puṇṇa ekacco savyāpajjhaɱ kāya-sankhāraɱ abhisankharoti.|| ||

Savyāpajjhaɱ vacī-sankhāraɱ abhisankharoti.|| ||

Savyāpajjhaɱ mano-sankhāraɱ abhisankharoti.|| ||

So savyāpajjhaɱ kāya-sankhāraɱ abhisankharitvā||
savyāpajjhaɱ vacī-sankhāraɱ abhisankharitvā||
savyāpajjhaɱ mano sankhāraɱ abhisankharitvā||
savyāpajjhaɱ lokaɱ uppajjati.|| ||

Tam enaɱ savyāpajjhaɱ lokaɱ upapannaɱ samānaɱ savyāpajjhā phassā phusanti.|| ||

So savyāpajjhehi phassehi phuṭṭho samāno savyāpajjhaɱ vedanaɱ vedeti ekanta-dukkhaɱ.|| ||

Seyyathā pi sattā [390] nerayikā.|| ||

Iti kho Puṇṇa bhūtā bhūtassa upapatti hoti,||
yaɱ karoti tena uppajjati,||
upapannam-enaɱ phassā phusanti.|| ||

Evaɱ p'ahaɱ Puṇṇa kamma-dāyādā sattā ti vadāmi.|| ||

Idaɱ vuccati Puṇṇa kammaɱ kaṇhaɱ kaṇha-vipākaɱ.|| ||

Katamañ ca Puṇṇa kammaɱ sukkaɱ sukka-vipākaɱ?|| ||

Idha Puṇṇa ekacco avyāpajjhaɱ kāya-sankhāraɱ abhisankharoti.|| ||

Avyāpajjhaɱ vacī-sankhāraɱ abhisankharoti.|| ||

Avyāpajjhaɱ mano-sankhāraɱ abhisankharoti.|| ||

So avyāpajjhaɱ kāya-sankhāraɱ abhisankharitvā avyāpajjhaɱ||
vacī-sankhāraɱ abhisankharitvā avyāpajjhaɱ||
mano-sankhāraɱ abhisankharitvā avyāpajjhaɱ||
lokaɱ uppajjati.|| ||

Tam enaɱ avyāpajjhaɱ lokaɱ upapannaɱ samānaɱ avyāpajjhā phassā phusanti.|| ||

So avyāpajjhehi phassehi phuṭṭho samāno avyāpajjhaɱ vedanaɱ vedeti ekanta-sukhaɱ.|| ||

Seyyathā pi devā Subhakiṇṇā.|| ||

Iti kho Puṇṇa bhūtā bhūtassa upapatti hoti.|| ||

Yaɱ karoti tena uppajjati.|| ||

Upapannam-enaɱ phassā phusanti.|| ||

Evaɱ p'ahaɱ Puṇṇa kamma-dāyādā sattā ti vadāmi.|| ||

Idaɱ vuccati Puṇṇa kammaɱ sukkaɱ sukka-vipākaɱ.|| ||

Katamañ ca Puṇṇa kammaɱ kaṇha-sukkaɱ kaṇha-sukka-vipākaɱ?|| ||

Idha Puṇṇa ekacco savyāpajjham pi avyāpajjham pi kāya-sankhāraɱ abhisankharoti||
savyāpajjham pi avyāpajjham pi vacī-sankhāraɱ abhisankharoti||
savyāpajjham pi avyāpajjham pi mano-sankhāraɱ abhisankharoti.|| ||

So savyāpajjham pi avyāpajjham pi kāya-sankhāraɱ abhisankharitvā||
savyāpajjham pi avyāpajjham pi vacī-sankhāraɱ abhisankharitvā||
savyāpajjham pi avyāpajjham pi mano-sankhāraɱ abhisankharitvā||
savyāpajjham pi avyāpajjham pi lokaɱ uppajjati.|| ||

Tam enaɱ savyāpajjham pi avyāpajjham pi lokaɱ upapannaɱ samānaɱ savyāpajjhā pi avyāpajjhā pi phassā phusanti.|| ||

So savyāpajjhehi pi avyāpajjhehi pi phassehi phuṭṭho samāno savyāpajjham pi avyāpajjham pi vedanaɱ vedeti vokiṇṇaɱ sukha-dukkhaɱ.|| ||

Seyyathā pi manussā ekacce ca devā ekacce ca vinipātikā.|| ||

Iti kho Puṇṇa bhūtā bhūtassa upapatti hoti.|| ||

Yaɱ karoti tena uppajjati.|| ||

Upapannam-enaɱ phassā phusanti.|| ||

Evaɱ p'ahaɱ Puṇṇa:||
kamma-dāyādā sattā ti vadāmi.|| ||

Idaɱ vuccati Puṇṇa,||
kammaɱ kaṇha-sukkaɱ kaṇha-sukka-vipākaɱ.|| ||

Kata- [391] mañ ca Puṇṇa kammaɱ akaṇhaɱ asukkaɱ akaṇha-sukka-vipākaɱ||
kamma-k-khayāya saŋvattati?|| ||

Tatra Puṇṇa yam-idaɱ kammaɱ kaṇhaɱ kaṇha-vipākaɱ||
tassa pahānāya yā cetanā,||
yam-p'idaɱ kammaɱ sukkaɱ sukka-vipākaɱ||
tassa pahānāya yā cetanā,||
yam-p'idaɱ kammaɱ kaṇha-sukkaɱ.|| ||

Kaṇhasukka-vipākaɱ tassa pahānāya yā cetanā,||
idaɱ vuccati Puṇṇa kammaɱ akaṇhaɱ asukkaɱ akaṇhāsukka-vipākaɱ kamma-k-khayāya saŋvattati.|| ||

Imāni kho Puṇṇa cattāri kammāni mayā sayaɱ abhiññā sacchi-katvā paveditānīti.|| ||

Evaɱ vutte Puṇṇo Koḷiyaputto govatiko Bhagavantaɱ etad avoca:|| ||

Abhikkantaɱ bhante,||
abhikkantaɱ bhante.|| ||

Seyyathā pi bhante nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya,||
cakkhu-manto rūpāni dakkhintīti,||
evam evaɱ Bhagavatā aneka-pariyāyena dhammo pakāsito.|| ||

Es'āhaɱ bhante Bhagavantaɱ saraṇaɱ gacchāmi Dhammañ ca bhikkhu-Saŋghañ ca.|| ||

Upāsakaɱ maɱ Bhagavā dhāretu ajja-t-agge pāṇupetaɱ saraṇaɱ gatanti.|| ||

Acelo pana Seniyo kukkuravatiko Bhagavantaɱ etad avoca:|| ||

Abhikkantaɱ bhante,||
abhikkantaɱ bhante.|| ||

Seyyathā pi bhante nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya,||
cakkhu-manto rūpāni dakkhintīti,||
evam evaɱ Bhagavatā aneka-pariyāyena dhammo pakāsito.|| ||

Es'āhaɱ bhante Bhagavantaɱ saraṇaɱ gacchāmi Dhammañ ca bhikkhu-Saŋghañ ca.|| ||

Labheyyāhaɱ bhante Bhagavato santike pabbajjaɱ.|| ||

Labheyyaɱ upasampadanti.|| ||

Yo kho Seniya añña-titthiyapubbo imasmiɱ Dhamma-Vinaye ākankhati pabbajjaɱ,||
ākankhati upasampadaɱ.|| ||

So cattāro māse parivasati catunnaɱ māsānaɱ accayena āraddha-cittā bhikkhū pabbā-jenti,||
upasampādenti bhikkhu-bhāvāya.|| ||

Api ca mettha puggalavemattatā viditāti.|| ||

Sace bhante añña-titthiya-pubbā imasmiɱ Dhamma-Vinaye ākaŋkhantā pabbajjaɱ,||
ākaŋkhantā upasampadaɱ,||
cattāro māse parivasanti.|| ||

Catunnaɱ māsānaɱ accayena āraddha-cittā bhikkhū pabbā-jenti,||
upasampādenti bhikkhu-bhāvāya.|| ||

Ahaɱ cattāri vassāni parivasissāmi.|| ||

Catunnaɱ maɱ vassānaɱ accayena āraddha-cittā bhikkhū pabbājentu,||
upasampādentu bhikkhu-bhāvāyāti.|| ||

Alattha kho acelo Seniyo kukkuravatiko Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā Seniyo eko vūpakaṭṭho appa- [392] matto ātāpī pahit'atto viharanto na cirass'eva yass'atthāya kula-puttā samma-d-eva agārasmā anāgāriyaɱ pabbajanti.|| ||

Tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

Khīṇā jāti,||
vusitaɱ Brahma-cariyaɱ||
kataɱ karaṇīyaɱ,||
nāparaɱ itthattāyā ti abbhaññāsi.|| ||

Aññataro kho pan'āyasmā Seniyo arahataɱ ahosī ti.|| ||

Kukkuravatiya suttaɱ sattamaɱ


Contact:
E-mail
Copyright Statement