Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
2. Bhikkhu Vagga

Sutta 63

Cūḷa Māluŋkya Suttaɱ

Based on the 'Sri Lanka Buddha Jayanti Tripitaka Series.'

 


 

[1][wrrn][thom][chlm][pts][than][ntbb][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme. Atha kho āyasmato māluŋkyaputtassa rahogatassa patisallīnassa evaɱ cetaso parivitakko udapādi: yāni'māni diṭṭhi-gatāni Bhagavatā abyākatāni ṭhapitāni paṭikkhittāni. Sassato loko iti pi, asassato loko iti pi, antavā loko iti pi, anantavā loko iti pi, taɱ jīvaɱ taɱ sarīraɱ iti pi, aññaɱ jīvaɱ aññaɱ sarīraɱ iti pi, hoti Tathāgato param maraṇā iti pi, na hoti Tathāgato param maraṇā iti pi, hoti ca na ca hoti Tathāgato param maraṇā iti pi, n'eva hoti na na hoti Tathāgato param maraṇā iti pi, tāni me Bhagavā na vyākaroti. Yāni me Bhagavā na vyākaroti, tamme na ruccati, tamme na khamati, so'haɱ Bhagavantaɱ upasaŋkamitvā etam atthaɱ pucchissāmi. Sace me Bhagavā vyākarissati: sassato lokoti vā, asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vā evā'haɱ Bhagavati brahmacariyaɱ carissāmi. No ce me Bhagavā vyākaroti: sassato lokoti vā, asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, evāhaɱ sikkhaɱ paccakkhāya hīnāyāvattissāmīti. [427]|| ||

Atha kho āyasmā māluŋkyaputto sāyaṇhasamayaɱ patisallānā vuṭṭhito yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ nisīdi. Eka-m-antaɱ nisinno kho āyasmā māluŋkyaputto Bhagavantaɱ etad avoca:|| ||

Idha mayhaɱ bhante rahogatassa patisallīnassa evaɱ cetaso parivitakko udapādi: yānimāni diṭṭhi-gatāni Bhagavatā abyākatāni ṭhapitāni paṭikkhittāni: sassato loko iti pi, asassato loko iti pi antavā loko iti pi, anantavā loko iti pi, taɱ jīvaɱ taɱ sarīraɱ iti pi, aññaɱ jīvaɱ aññaɱ sarīraɱ iti pi,hoti Tathāgato param maraṇā iti pi, na hoti Tathāgato param maraṇā iti pi, hoti ca na ca hoti Tathāgato param maraṇā iti pi, n'eva hoti na na hoti Tathāgato param maraṇā iti pi, tāni me Bhagavā na vyākaroti. Yāni me Bhagavā na vyākaroti, tamme na ruccati, tamme na khamati. Sohaɱ Bhagavantaɱ upasaŋkamitvā etam atthaɱ pucchissāmi. Sace me Bhagavā vyākarissati. Sassato lokoti vā, asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vā, evāhaɱ Bhagavati brahmacariyaɱ carissāmi. No ce me Bhagavā vyākarissati: sassato lokoti vā, asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vā, evāhaɱ sikkhaɱ paccakkhāya hīnāyāvattissāmīti.|| ||

Sace Bhagavā jānāti, 'sassato loko'ti, sassato lokoti me Bhagavā vyākarotu. Sace Bhagavā jānāti, 'asassato loko'ti asassato lokoti me Bhagavā vyākarotu. No ce Bhagavā jānāti, 'sassato lokoti vā asassato lokoti vā, ajānato kho pana apassato etad eva ujukaɱ hoti yad idaɱ, 'na jānāmi na passāmī' ti.|| ||

Sace Bhagavā jānāti, 'antavā loko'ti, antavā lokoti me Bhagavā vyākarotu. Sace Bhagavā jānāti, 'anantavā loko'ti anantavā lokoti me Bhagavā vyākarotu. No ce Bhagavā jānāti, 'antavā lokoti vā anantavā lokoti vā, ajānato kho pana apassato etad eva ujukaɱ hoti yad idaɱ, 'na jānāmi na passāmī' ti.|| ||

Sace Bhagavā jānāti 'taɱ jīvaɱ taɱ sarīra'nti. Taɱ jīvaɱ taɱ sarīranti me Bhagavā vyākarotu. Sace Bhagavā jānāti 'aññaɱ jīvaɱ aññaɱ sarīra'nti. Aññaɱ jīvaɱ aññaɱ sarīranti me Bhagavā vyākarotu. No ce Bhagavā jānāti 'taɱ jīvaɱ taɱ sarīranti vā aññaɱ jīvaɱ aññaɱ sarīra'nti vā, ajānato kho pana apassato etad eva ujukaɱ hoti yad idaɱ 'na jānāmi na passāmī' ti.|| ||

Sace Bhagavā jānāti 'hoti Tathāgato param maraṇā' ti. Hoti Tathāgato param maraṇāti [428] me Bhagavā vyākarotu. Sace Bhagavā jānāti 'na hoti Tathāgato param maraṇā' ti. Na hoti Tathāgato param maraṇāti me Bhagavā vyākarotu. No ce Bhagavā jānāti hoti Tathāgato param maraṇāti vā na hoti Tathāgato param maraṇāti vā ajānato kho pana apassato etad eva ujukaɱ hoti yad idaɱ 'na jānāmi na passāmī' ti.|| ||

Sace Bhagavā jānāti 'hoti ca na ca hoti Tathāgato param maraṇā' ti. Hoti ca na ca hoti Tathāgato param maraṇāti me Bhagavā vyākarotu. Sace Bhagavā jānāti 'n'eva hoti na na hoti Tathāgato param maraṇā' ti. N'eva hoti na na hoti Tathāgato param maraṇāti me Bhagavā bākarotu. No ce Bhagavā jānāti hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vā, ajānato kho pana apassato etad eva ujukaɱ hoti, yad idaɱ na jānāmi na passāmī' ti.|| ||

Kin nu1 tāhaɱ māluŋkyaputta evaɱ avacaɱ: ehi tvaɱ māluŋkyaputta mayi brāhmacariyaɱ cara, ahante vyākarissāmi: sassato lokoti vā asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vāti. - No h'etaɱ bhante. Tvaɱ vā pana maɱ evaɱ avaca: ahaɱ bhante Bhagavati brahmacariyaɱ carissāmi, Bhagavā me vyākarissati: sassato lokoti vā asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vāti no h'etaɱ bhante.|| ||

Iti kira māluŋkyaputta nevāhantaɱ vadāmi: ehi tvaɱ māluŋkyaputta mayi brahmacariyaɱ cara, ahaɱ te vyākarissāmi: sassato lokoti vā asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vāti. Napi kira maɱ tvaɱ vadesi: ahaɱ bhante Bhagavati brahmacariyaɱ carissāmi Bhagavā me vyākarissati: sassato lokoti vā asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vāti. Evaɱ sante mogha-purisa ko santo kaɱ paccācikkhasi.|| ||

Yo kho māluŋkyaputta evaɱ vadeyya: na tāvāhaɱ Bhagavati brahmacariyaɱ carissāmi, yāva me Bhagavā na vyākarissati: sassato lokoti vā asassato lokoti vā antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti [429] vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vāti. Abyākatameva taɱ māluŋkyaputta Tathāgatena assa. Atha so puggalo kālaɱ kareyya, seyyathā pi māluŋkyaputta puriso sallena viddho assa savisena gāḷhapalepanena. Tassa mittāmaccā ñātisālohitā bhisakkaɱ sallakattaɱ upaṭṭhapeyyuɱ, so evaɱ vadeyya: na tāvāhaɱ imaɱ sallaɱ āharissāmi. Yāva na taɱ purisaɱ jānāmi, yenamhi viddho: khattiyo vā brāhmaṇo vā vesso vā suddovāti.|| ||

So evaɱ vadeyya: na tāvāhaɱ imaɱ sallaɱ āharissāmi. Yāva na taɱ purisaɱ jānāmi, yenamhi viddho: evaɱnāmo evaɱgotto itivāti.|| ||

So evaɱ vadeyya: na tāvāhaɱ imaɱ sallaɱ āharissāmi. Yāva na taɱ purisaɱ jānāmi, yenamhi viddho dīgho vā rasso vā majjhimo vāti.|| ||

So evaɱ vadeyya: na tāvāhaɱ imaɱ sallaɱ āharissāmi yāva na taɱ purisaɱ jānāmi yenamhi viddho: kālo vā sāmo vā maŋguracchavi vāti.|| ||

So evaɱ vadeyya: na tāvāhaɱ imaɱ sallaɱ āharissāmi, yāva na taɱ purisaɱ jānāmi, yenamhi viddho: asukasmiɱ gāme vā nigame vā nagare vāti.|| ||

So evaɱ vadeyya: na tāvāhaɱ imaɱ sallaɱ āharissāmi yāva na taɱ dhanuɱ jānāmi, yenamhi viddho: yadi vā cāpo yadivā kodaṇḍoti.|| ||

So evaɱ vadeyya: na tāvāhaɱ imaɱ sallaɱ āharissāmi, yāva na taɱ jiyaɱ jānāmi yāyamhi viddho: yadi vā akkassa yadi vā saṇṭhassa1 yadi vā nahārussa yadi vā maruvāya yadi vā khīrapaṇṇinoti.|| ||

So evaɱ vadeyya: na tāvāhaɱ imaɱ sallaɱ āharissāmi. Yāva na taɱ kaṇḍaɱ jānāmi. Yenamhi viddho: yadi vā kacchaɱ yadi vā ropimanti.|| ||

So evaɱ vadeyya: na tāvāhaɱ imaɱ sallaɱ āharissāmi. Yāva na taɱ kaṇḍaɱ jānāmi yenamhi viddho: yassa pattehi vājitaɱ, yadi vā gijjhassa yadi vā kaŋkassa yadi vā kulalassa yadi vā morassa yadi vā sithilahaṇunoti.|| ||

So evaɱ vadeyya: na tāvāhaɱ imaɱ sallaɱ āharissāmi. Yāva na taɱ kaṇḍaɱ jānāmi. Yenamhi viddho: yassa nahārunā2 parikkhittaɱ, yadi vā gavassa yadi vā mahisassa2 yadi vā roruvassa. Yadi vā semhārassāti.|| ||

So evaɱ vadeyya: na tāvāhaɱ imaɱ sallaɱ āharissāmi. Yāva na taɱ sallaɱ jānāmi. Yenamhi viddho: yadi vā sallaɱ yadi vā khurappaɱ yadi vā vekaṇḍaɱ yadi vā nārācaɱ yadi vā vacchadantaɱ yadi vā karavīrapattanti. [430] aññātameva taɱ māluŋkyaputta tena purisena assa. Atha so puriso kālaɱ kareyya.|| ||

Evam eva kho māluŋkyaputta yo evaɱ vadeyya: na tāvāhaɱ Bhagavati brahmacariyaɱ carissāmi, yāva me Bhagavā na vyākarissati: sassato lokoti vā asassato lokoti vā, antavā lokoti vā, anantavā lokoti vā, taɱ jīvaɱ taɱ sarīranti vā, aññaɱ jīvaɱ aññaɱ sarīranti vā, hoti Tathāgato param maraṇāti vā, na hoti Tathāgato param maraṇāti vā, hoti ca na ca hoti Tathāgato param maraṇāti vā, n'eva hoti na na hoti Tathāgato param maraṇāti vāti. Abyākatameva taɱ māluŋkyaputta Tathāgatena assa. Atha so puggalo kālaɱ kareyya.|| ||

Sassato lokoti vā māluŋkyaputta diṭṭhiyā sati brahmacariyavāso abhavissāti. Evaɱ no. Asassato lokoti māluŋkyaputta diṭṭhiyā sati brahmacariyavāso abhavissāti. Evam pi no. Sassato lokoti māluŋkyaputta diṭṭhiyā sati asassato lokoti vā diṭṭhiyā sati attheva jāti, atthi jarā, atthi maraṇaɱ, santi soka-parideva-dukkha-domanass'-upāyāsā yesāhaɱ diṭṭhe va dhamme nighātaɱ paññāpemi.|| ||

Antavā lokoti māluŋkyaputta diṭṭhiyā sati brahmacariyavāso abhavissāti. Evaɱ no. Anantavā lokoti māluŋkyaputta diṭṭhiyā sati brahmacariyavāso abhavissāti. Evam pi no. Antavā lokoti māluŋkyaputta diṭṭhiyā sati anantavā lokoti vā diṭṭhiyā sati attheva jāti, atthi jarā, atthi maraṇaɱ, santi soka-parideva-dukkha-domanass'-upāyāsā yesā'haɱ diṭṭhe va dhamme nighātaɱ paññāpemi.

Taɱ jīvaɱ taɱ sarīranti māluŋkyaputta diṭṭhiyā sati brahmacariyavāso abhavissāti. Evaɱ no. Aññaɱ jīvaɱ aññaɱ sarīranti maluŋkyaputta diṭṭhiyā sati brahmacariyavāso abhavissāti. Evam pi no. Taɱ jīvaɱ taɱ sarīranti māluŋkyaputta diṭṭhiyā sati aññaɱ jīvaɱ aññaɱ sarīranti vā diṭṭhiyā sati attheva jāti, atthi jarā, atthi maraṇaɱ, santi soka-parideva-dukkha-domanass'-upāyāsā yesāhaɱ diṭṭhe va dhamme nighātaɱ paññāpemi.|| ||

Hoti Tathāgato param maraṇāti māluŋkyaputta diṭṭhiyā sati brahmacariyavāso abhavissāti. Evaɱ no. Na hoti Tathāgato param maraṇāti māluŋkyaputta diṭṭhiyā sati brahmacariyavāso abhavissāti. Evam pi no. Hoti Tathāgato param maraṇāti māluŋkyaputta diṭṭhiyā sati. Na hoti Tathāgato param maraṇāti vā diṭṭhiyā sati attheva jāti, atthi jarā, atthi maraṇaɱ, [431] santi soka-parideva-dukkha-domanass'-upāyāsā. Yesā'haɱ diṭṭhe va dhamme nighātaɱ paññāpemi.|| ||

Hoti ca na ca hoti Tathāgato param maraṇāti māluŋkyaputta diṭṭhiyā sati brahmacariyavāso abhavissāti. Evaɱ no. N'eva hoti na na hoti Tathāgato param maraṇāti māluŋkyaputta diṭṭhiyā sati brahmacariyavāso abhavissāti, evam pi no. Hoti ca na ca hoti Tathāgato param maraṇāti māluŋkyaputta diṭṭhiyā sati n'eva hoti na na hoti Tathāgato param maraṇāti vā diṭṭhiyā sati attheva jāti atthi jarā, atthi maraṇaɱ, santi sokaparidevadukkhadomanassupāsāyā, yesā'haɱ diṭṭhe va dhamme nighātaɱ paññāpemi.|| ||

Tasmāt iha māluŋkyaputta abyākatañ ca me abyākatato dhāretha. Byākatañ ca me byākato dhāretha. Kiñca māluŋkyaputta mayā abyākataɱ: sassato lokoti maluŋkyaputta mayā abyākataɱ, asassato lokoti mayā abyākataɱ, antavā lokoti mayā abyākataɱ, anantavā lokoti mayā abyākataɱ, taɱ jīvaɱ taɱ sarīranti mayā abyākataɱ, aññaɱ jīvaɱ aññaɱ sarīranti mayā abyākataɱ, hoti Tathāgato param maraṇāti mayā abyākataɱ, na hoti Tathāgato param maraṇāti mayā abyākataɱ, hoti ca na ca hoti Tathāgato param maraṇāti mayā abyākataɱ, n'eva hoti na na hoti Tathāgato param maraṇāti mayā abyākataɱ kasmā c'etaɱ māluŋkyaputta mayā abyākataɱ: na h'etaɱ māluŋkyaputta atthasaɱhitaɱ, nādibrahmacariyakaɱ, n'etaɱ1 nibbidāya. Na virāgāya na nirodhāya na upasamāya na abhiññāya na sambodhāya. Na nibbānāya saɱvattati. Tasmā taɱ mayā abyākataɱ,

Kiñca māluŋkyaputta mayā byākataɱ: idaɱ dukkhan ti māluŋkyaputta mayā byākataɱ, ayaɱ dukkhasamudayo ti mayā byākataɱ, ayaɱ dukkhanirodho ti mayā byākataɱ, ayaɱ dukkhanirodhagāminīpaṭipadā ti mayā byākataɱ. Kasmā c'etaɱ māluŋkyaputta mayā byākataɱ: etañhi māluŋkyaputta atthasaɱhitaɱ, etaɱ ādibrahmacariyakaɱ etaɱ nibbidāya virāgāya nirodhāya upasamāya abhiññāya sambodhāya nibbānāya saɱvattati. Tasmā taɱ mayā byākataɱ. Tasmāt iha māluŋkyaputta [432] abyākatañ ca me abyākatato dhāretha. Byākatañ ca me byākatato dhārethāti.|| ||

Idam avoca Bhagavā. Attamano āyasmā māluŋkyaputto Bhagavato bhāsitaɱ abhinandīti.|| ||

Cūḷamāluŋkyasuttaɱ tatiyaɱ


Contact:
E-mail
Copyright Statement   Webmaster's Page