Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
2. Bhikkhu Vagga

Sutta 66

Laṭukikopama Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][upal] Evaɱ me sutaɱ:|| ||

Ekaɱ samayaɱ Bhagavā aŋguttarāpesu viharati āpaṇaɱ nāma aŋguttarāpānaɱ nigamo.|| ||

Atha kho Bhagavā pubbaṇha-samayaɱ nivāsetvā pattacīvaraɱ ādāya āpaṇaɱ piṇḍāya pāvisi.|| ||

Āpaṇe piṇḍāya caritvā pacchābhattaɱ piṇḍapātapaṭikkanto yenaññataro vanasaṇḍo ten'upasaŋkami divāvihārāya.|| ||

Taɱ vanasaṇḍaɱ ajjhogahetvā1 aññatarasmiɱ rukkhamūle divāvihāraɱ nisīdi.|| ||

Āyasmāpi kho udāyi pubbaṇha-samayaɱ nivāsetvā pattacīvaraɱ ādāya āpaṇaɱ piṇḍāya pāvisi.|| ||

Āpaṇe piṇḍāya caritvā pacchābhattaɱ piṇḍapātapaṭikkanto yena so vanasaṇḍo ten'upasaŋkami divāvihārāya,||
taɱ vanasaṇḍaɱ ajjhogahetvā1 aññatarasmiɱ rukkhamūle divāvihāraɱ nisīdi.|| ||

Atha kho āyasmato udāyissa rahogatassa patisallīnassa evaɱ cetaso parivitakko udapādi: 'bahunnaɱ vata no Bhagavā dukkhadhammānaɱ apahattā bahunnaɱ vata no Bhagavā sukhadhammānaɱ upahattā,||
bahunnaɱ2 vata no Bhagavā akusalānaɱ dhammānaɱ apahattā bahunnaɱ2 vata no Bhagavā kusalānaɱ dhammānaɱ upahattā' ti.|| ||

Atha kho āyasmā udāyi sāyaṇhasamayaɱ patisallānā vuṭṭhito yena Bhagavā ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ [448] nisīdi.|| ||

Eka-m-antaɱ nisinno kho āyasmā udāyi Bhagavantaɱ etad avoca.|| ||

" Idha mayhaɱ bhante rahogatassa patisallīnassa evaɱ cetaso parivitakko udapādi: ' bahunnaɱ vata no Bhagavā dukkhadhammānaɱ apahattā bahunnaɱ vata no Bhagavā sukhadhammānaɱ upahattā,||
bahunnaɱ vata no Bhagavā akusalānaɱ dhammānaɱ apahattā bahunnaɱ2 vata no Bhagavā kusalānaɱ dhammānaɱ upahattā' ti.|| ||

Mayaɱ hi bhante pubbe sāyañc'eva bhuñjāma pāto ca divā ca vikāle.|| ||

Ahuɱ kho so bhante samayo yaɱ Bhagavā bhikkhū āmantesi: 'iŋgha tumhe bhikkhave etaɱ divāvikālabhojanaɱ pajahathā' ti.|| ||

Tassa mayhaɱ bhante ahudve aññathattaɱ ahu3 domanassaɱ.|| ||

Yampi no saddhā gahapatikā4 divā vikāle paṇītaɱ khādanīyaɱ bhojanīyaɱ denti.|| ||

Tassapi no Bhagavā pahānamāha.|| ||

Tassapi no sugato paṭinissaggamāhāti.

Te mayaɱ bhante Bhagavati pemañca gāravañca hiriñca ottappañca sampassamānā evaɱ taɱ divāvikālabhojanaɱ pajahimhā1.|| ||

Te mayā bhante sāyañ cava bhuñjāma pāto ca.|| ||

Ahu kho so bhante samayo yaɱ Bhagavā bhikkhū āmantesi: iŋgha tumhe bhikkhave etaɱ rattiɱ vikālabhojanaɱ pajahathā' ti.|| ||

Tassa mayhaɱ bhante ahudeva aññathattaɱ.|| ||

Ahu domanassaɱ yampi no imesaɱ dvinnaɱ bhattānaɱ paṇītasaŋkhātataraɱ tassapi no Bhagavā pahānamāha.|| ||

Tassapi no sugato paṭinissaggamāhā' ti.|| ||

Bhūtapubbaɱ bhante aññataro puriso divā sūpeyyaɱ labhitvā evam āha: 'handa ca imaɱ nikkhipatha,||
sāyaɱ sabbe va samaggā bhuñjissāmā' ti.|| ||

Yā kāci bhante saŋkhatiyo sabbā tā rattiɱ,||
appā divā.|| ||

Te mayaɱ bhante Bhagavati pemañca gāravañca hiriñca ottappañca sampassamānā evaɱ taɱ rattiɱ vikālabhojanaɱ pajahimhā.|| ||

Bhūtapubbaɱ bhante bhikkhū ratt-andhakāra-timisāyaɱ piṇḍāya carantā candanikampi pavisanti.|| ||

Oligallepi papatanti.|| ||

Kaṇṭakāvaṭṭampi2 ārohanti,||
suttampi gāviɱ ārohantiɱ māṇavehipi samāgacchanti katakammehipi akatakammehipi.|| ||

Mātugāmopi te asaddhammena nimanteti.|| ||

Bhūtapubbāhaɱ bhante ratt-andhakāra-timisāyaɱ piṇḍāya carāmi.|| ||

Addasā kho maɱ bhante aññatarā itthī vijjantarikāya bhājanaɱ dhovantī,||
disvā maɱ bhītā vissaramakāsi: 'abbhuɱ me3,||
pisāco vata man' ti.|| ||

Evaɱ vutte ahaɱ bhante taɱ itthiɱ etad avocaɱ: nāhaɱ bhagini,||
pisāco,||
bhikkhu [449] piṇḍāya ṭhito' ti.|| ||

Bhikkhussa ātumāri,||
bhikkhussa mātumāri,||
varante bhikkhu tiṇhena govikantanena kucchi parikanto natv'eva4 yaɱ5 ratt-andhakāra-timisāyaɱ kucchihetu piṇḍāya carasīti6.|| ||

Tassa mayhaɱ bhante tadanussarato evaɱ hoti: 'bahunnaɱ vata no Bhagavā dukkhadhammānaɱ apahattā,||
bahunnaɱ vata no Bhagavā sukhadhammānaɱ upahattā,||
bahunnaɱ vata no Bhagavā akusalānaɱ dhammānaɱ apahattā.|| ||

Bahunnaɱ vata no Bhagavā kusalānaɱ dhammānaɱ upahattā' ti.|| ||

Evam eva panudāyi idh'ekacce moghapurisā: 'idaɱ pajahathā'ti mayā vuccamānā te evam āhaɱsu: 'kimpanimassa appamattakassa oramattakassa adhisallikhatevāyaɱ samaṇo' ti.|| ||

Te tañ'c'eva nappajahanti.|| ||

Mayi ca appaccayaɱ upaṭṭhāpenti.|| ||

Ye ca bhikkhū sikkhākāmā,||
tesaɱ taɱ udāyi hoti balavaɱ bandhanaɱ daḷhaɱ bandhanaɱ thiraɱ bandhanaɱ apūtikaɱ bandhanaɱ thullo7 kaliŋgaro,|| ||

Seyyathā pi udāyi laṭukikā sakuṇikā pūtilatāya bandhanena baddhā tatth'eva vadhaɱ vā bandhaɱ vā maraṇaɱ vā āgameti.|| ||

Yo nu kho udāyi evaɱ vadeyya: 'yena sā laṭukikā sakuṇikā pūtilatāya bandhanena baddhā tatth'eva vadhaɱ vā bandhaɱ vā maraṇaɱ vā āgameti,||
taɱ hi tassā abalaɱ bandhanaɱ dubbalaɱ bandhanaɱ pūtikaɱ bandhanaɱ asārakaɱ bandhanan' ti.|| ||

Sammā nu kho so udāyi vadamāno vadeyyā' ti.|| ||

No h'etaɱ bhante.|| ||

Yena sā bhante laṭukikā sakuṇikā pūtilatāya bandhanena baddhā tatth'eva vadhaɱ vā bandha vā maraṇaɱ vā āgameti.|| ||

Taɱ hi tassā balavaɱ bandhanaɱ daḷhaɱ bandhanaɱ thiraɱ bandhanaɱ apūtikaɱ bandhanaɱ thullo1 kaliŋgaro' ti.|| ||

Evam eva panudāyi idh'ekacce moghapurisā: 'idaɱ pajahathā'ti mayā vuccamānā te evam āhaɱsu: kiɱ panimassa appamattakassa oramattakassa adhisallikhatevāyaɱ samaṇo' ti.|| ||

Te tañ'c'eva nappajahanti.|| ||

Mayi ca appaccayaɱ upaṭṭhāpenti.|| ||

Ye ca bhikkhū sikkhākāmā,||
tesaɱ taɱ udāyi hoti balavaɱ bandhanaɱ daḷhaɱ bandhanaɱ thiraɱ bandhanaɱ apūtikaɱ bandhanaɱ thullo kaliŋgaro.|| ||

Idha panudāyi ekacce kulaputtā: 'idaɱ pajahathā'ti [450] mayā vuccamānā te evam āhaɱsu: 'kimpanimassa appamattakassa oramattakassa pahātabbassa yassa no Bhagavā pahānamāha.|| ||

Yassa no sugato paṭinissaggamāhā' ti.|| ||

Te tañ'c'eva pajahanti.|| ||

Mayi ca na appaccayaɱ upaṭṭhāpenti.|| ||

Ye ca bhikkhū sikkhākāmā.|| ||

Te taɱ pahāya appossukkā pannalomā paradavuttā2 migabhūtena cetasā viharanti.|| ||

Tesantaɱ udāyi hoti abalaɱ bandhanaɱ dubbalaɱ bandhanaɱ pūtikaɱ bandhanaɱ asārakaɱ bandhanaɱ.|| ||

Seyyathā pi udāyi rañño nāgo īsādanto ubbu'havābhijāto3 saŋgāmāvacaro daḷhehi varattehi4 bandhanehi baddho īsakaɱ yeva kāyaɱ sannāmetvā tāni bandhanāni sañchinditvā sampadā'etvā yena kāmaɱ pakkamati.|| ||

Yo nu kho udāyi evaɱ vadeyya: yehi so rañño nāgo īsādanto ubbu'havābhijāto3 saŋgāmāvacaro daḷhehi varattehi bandhanehi baddho īsakaɱ yeva kāyaɱ sannāmetvā tāni bandhanāni sañchinditvā sampadā'etvā yena kāmaɱ pakkamati.|| ||

Taɱ hi tassa balavaɱ bandhanaɱ daḷhaɱ bandhanaɱ thiraɱ bandhanaɱ apūtikaɱ bandhanaɱ thullo1 kaliŋgaroti,||
sammā nu kho so udāyi vadamāno vadeyyāti no h'etaɱ bhante.|| ||

Ye hi so bhante rañño nāgo īsādanto ubbu'havābhijāto3 saŋgāmāvacaro daḷhehi varattehi bandhanehi baddho īsakaɱ yeva kāyaɱ sannāmetvā tāni bandhanāni sañchinditvā sampadā'etvā yena kāmaɱ pakkamati.|| ||

Taɱ hi tassa abalaɱ bandhanaɱ dubbalaɱ bandhanaɱ pūtikaɱ bandhanaɱ asārakaɱ bandhananti.|| ||

Evam eva kho udāyi idh'ekacce kulaputtā idaɱ pajahathā'ti mayā vuccamānā te evam āhaɱsu: kiɱ panimassa appamattakassa oramattakassa pahātabbassa yassa no Bhagavā pahānamāha.|| ||

Yassa no sugato paṭinissaggamāhāti.|| ||

Te tañ'c'eva pajahanti.|| ||

Mayi ca na appaccayaɱ upaṭṭhāpenti.|| ||

Ye ca bhikkhū sikkhākāmā te tampahāya appossukkā pannalomā paradavuttā1 migabhūtena cetasā viharanti.|| ||

Tesaɱ taɱ udāyi hoti abalaɱ bandhanaɱ dubbalaɱ bandhanaɱ pūtikaɱ bandhanaɱ asārakaɱ bandhanaɱ.|| ||

Seyyathā pi udāyi puriso daḷiddo assako anā'hiyo2 tassassa ekaɱ agārakaɱ oluggaviluggaɱ kākātidāyiɱ na paramarūpaɱ.|| ||

Ekā khaṭopikā oluggaviluggā na paramarūpā,||
ekissā [451] kumbhiyā dhaññasamavāpakaɱ na paramarūpaɱ,||
ekā jāyikā na paramarūpā.|| ||

So ārāmagataɱ bhikkhuɱ passeyya sudhotahatthapādaɱ manuññaɱ bhojanaɱ bhuttāviɱ sitāya chāyāya nisinnaɱ adhicitte yuttaɱ.|| ||

Tassa evam assa: sukhaɱ vata bho sāmaññaɱ,||
ārogyaɱ vata bho sāmaññaɱ,||
so vatassaɱ3 yohaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyanti.|| ||

So na sakkuṇeyya ekaɱ agārakaɱ oluggaviluggaɱ kākātidāyiɱ na paramarūpaɱ pahāya,||
ekaɱ khaṭopikaɱ oluggaviluggaɱ na paramarūpaɱ pahāya,||
ekissā kumbhiyā dhaññasamavāpakaɱ na paramarūpaɱ pahāya,||
ekaɱ jāyikaɱ na paramarūpaɱ pahāya,||
kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajituɱ.|| ||

Yo nu kho udāyi evaɱ vadeyya: yehi so puriso bandhanehi baddhona Sakkoti,||
ekaɱ agārakaɱ olugga-viluggaɱ kākātidāyiɱ na paramarūpaɱ.|| ||

Ekaɱ khaṭopikaɱ oluggaviluggaɱ na paramarūpā,||
ekissā kumbhiyā dhaññasamavāpakaɱ na paramarūpaɱ,||
ekaɱ jāyikaɱ na paramarūpaɱ pahāya kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajituɱ.|| ||

Taɱ hi tassa abalaɱ bandhanaɱ dubbalaɱ bandhanaɱ pūtikaɱ bandhanaɱ asārakaɱ bandhananti.|| ||

Sammā nu 4 kho so udāyi vadamāno vadeyyāti.|| ||

No h'etaɱ bhante .|| ||

Ye hi so bhante puriso bandhanehi baddho na Sakkoti ekaɱ agārakaɱ oluggaviluggaɱ kākātidāyiɱ na paramarūpaɱ pahāya,||
ekaɱ khaṭopikaɱ oluggaviluggaɱ na paramarūpaɱ pahāya,||
ekissā kumbhiyā dhaññasamavāpakaɱ na paramarūpaɱ pahāya,||
ekaɱ jāyikaɱ na paramarūpaɱ pahāya kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajituɱ.|| ||

Taɱ hi tassa balavaɱ bandhanaɱ daḷhaɱ bandhanaɱ thiraɱ bandhanaɱ apūtikaɱ bandhanaɱ thullo kaliŋgaroti.|| ||

Ohāretvā kāsāyāni vatthāni acchādetvā agārasmā|| ||

Evam eva kho udāyi idh'ekacce moghapurisā idaɱ pajahathā'ti mayā vuccamānā te evam āhaɱsu: kiɱ panimassa appamattakassa oramattakassa.|| ||

Adhisallikhatevāyaɱ samaṇo' ti.|| ||

Te tañ'c'eva nappajahanti.|| ||

Mayi ca appaccayaɱ upaṭṭhāpenti ye ca bhikkhū sikkhākāmā tesantaɱ udāyi hoti balavaɱ bandhanaɱ daḷhaɱ bandhanaɱ thiraɱ bandhanaɱ apūtikaɱ bandhanaɱ thullo kaliŋgaro.|| ||

Seyyathā pi udāyi gahapati vā gahapatiputto vā aḍḍho [452] mahaddhano mahābhogo,||
nekānaɱ nikkhagaṇānaɱ cayo nekānaɱ dhaññagaṇānaɱ cayo nekānaɱ khettagaṇānaɱ cayo nekānaɱ vatthugaṇānaɱ cayo nekānaɱ bhariyāgaṇānaɱ cayo nekānaɱ dāsagaṇānaɱ cayo nekānaɱ dāsigaṇānaɱ cayo,||
so ārāmagataɱ bhikkhuɱ passeyya sudhotahatthapādaɱ manuññaɱ bhojanaɱ bhuttāviɱ sītāya chāyāya nisinnaɱ adhicitte yuttaɱ,||
tassa evam assa: sukhaɱ vata bho sāmaññaɱ,||
ārogyaɱ vata bho sāmaññaɱ,||
so vatassaɱ yohaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyan' ti.|| ||

So sakkuṇeyya nekāni nikkhagaṇāni pahāya,||
nekāni dhaññagaṇāni pahāya,||
nekāni khettagaṇāni pahāya,||
nekāni vatthugaṇāni pahāya,||
nekāni bhariyāgaṇāni pahāya,||
nekāni dāsagaṇāni pahāya,||
nekāni dāsi gaṇāni pahāya kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajituɱ.|| ||

Yo nu kho udāyi evaɱ vadeyya: yehi so gahapati vā gahapati putto vā bandhanehi baddho Sakkoti nekāni nikkhagaṇāni pahāya,||
nekāni dhaññagaṇāni pahāya,||
nekāni khettagaṇāni pahāya,||
nekāni vatthugaṇāni pahāya,||
nekāni bhariyāgaṇāni pahāya,||
nekāni dāsagaṇāni pahāya,||
nekāni dāsigaṇāni pahāya kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajituɱ taɱ hi tassa balavaɱ bandhanaɱ daḷhaɱ bandhanaɱ thiraɱ bandhanaɱ apūtikaɱ bandhanaɱ thullo kaliŋgaroti.|| ||

Sammā nu1 kho so udāyi vadamāno vadeyyā' ti.|| ||

No h'etaɱ bhante.|| ||

Ye hi so bhante gahapati vā gahapatiputto vā bandhanehi baddho Sakkoti nekāni nikkhagaṇāni pahāya,||
nekāni dhaññagaṇāni pahāya,||
nekāni khettagaṇāni pahāya,||
nekāni vatthugaṇāni pahāya,||
nekāni bhariyāgaṇāni pahāya,||
nekāni dāsagaṇāni pahāya,||
nekāni dāsigaṇāni pahāya kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajituɱ.|| ||

Taɱ hi tassa abalaɱ bandhanaɱ dubbalaɱ bandhanaɱ pūtikaɱ bandhanaɱ asārakaɱ bandhananti.|| ||

Evam eva kho udāyi idh'ekacce kulaputtā,||
idaɱ pajahathāti mayā vuccamānā te evam āhaɱsu: ' kiɱ panimassa appamattakassa oramattakassa pahātabbassa yassa no Bhagavā pahānamāha.|| ||

Yassa no sugato paṭinissaggamāhā'ti te tañ'c'eva pajahanti.|| ||

Mayi ca na appaccayaɱ upaṭṭhāpenti.|| ||

Ye ca bhikkhū sikkhākāmā [453] te taɱ pahāya appossukkā pannalomā paradavuttā migabhūtena cetasā viharanti.|| ||

Tesaɱ taɱ udāyi hoti abalaɱ bandhanaɱ dubbalaɱ bandhanaɱ pūtikaɱ bandhanaɱ asārakaɱ bandhanaɱ.|| ||

Cattāro me udāyi puggalā santo saɱvijjamānā lokasmiɱ,||
katame cattāro: idhūdāyi ekacco puggalo upadhipahānāya paṭipanno hoti upadhipaṭinissaggāya.|| ||

Tam enaɱ upadhipahānāya paṭipannaɱ upadhipaṭinissaggāya upadhipaṭisaññuttā sarasaŋkappā samudācaranti.|| ||

So te adhivāseti,||
nappajahati,||
na vinodeti.|| ||

Na byantīkaroti.|| ||

Na anabhāvaɱ gameti.|| ||

Imaɱ kho ahaɱ udāyi puggalaɱ saññutto'ti vadāmi no visaññutto.|| ||

Taɱ kissa hetu? indriyavemattatā hi me udāyi imasmiɱ puggale viditā.|| ||

Idha panudāyi ekacco puggalo upadhipahānāya paṭipanno hoti upadhipaṭinissaggāya.|| ||

Tam enaɱ upadhipahānāya paṭipannaɱ upadhipaṭinissaggāya,||
upadhipaṭisaññuttā sarasaŋkappā samudācaranti.|| ||

So te nādhivāseti,||
pajahati,||
vinodeti,||
byantīkaroti,||
anabhāvaɱ gameti.|| ||

Imampi kho ahaɱ udāyi puggalaɱ saññuttoti vadāmi no visaññutto.|| ||

Taɱ kissa hetu? indriyavemattatā hi me udāyi imasmiɱ puggale viditā.|| ||

Idha panudāyi ekacco puggalo upadhipahānāya paṭipanno hoti upadhipaṭinissaggāya.|| ||

Tam enaɱ upadhipahānāya paṭipannaɱ upadhipaṭinissaggāya kadāci karahaci satisammosā upadhipaṭisaññuttā sarasaŋkappā samudācaranti.|| ||

Dandho udāyi satuppādo.|| ||

Atha kho naɱ khippam'eva pajahati,||
vinodeti,||
byantīkaroti,||
anabhāvaɱ gameti.|| ||

Seyyathā pi udāyi puriso divasasantatte ayokaṭāhe dve vā tīṇi vā udakaphusitāni nipāteyya.|| ||

Dandho udāyi udakaphusitānaɱ nipāto.|| ||

Atha kho naɱ khippam'eva parikkhayaɱ pariyādānaɱ gaccheyya.|| ||

Evam eva kho udāyi idh'ekacco puggalo upadhipahānāya paṭipanno hoti upadhipaṭinissaggāya.|| ||

Tam enaɱ upadhipahānāya paṭipannaɱ upadhipaṭinissaggāya,||
kadāci karahaci satisammosā upadhipaṭisaññuttā sarasaŋkappā samudācaranti.|| ||

Dandho udāyi satuppādo.|| ||

Atha kho naɱ khippam'eva pajahati,||
vinodeti,||
byantīkaroti,||
anabhāvaɱ gameti.|| ||

Imampi kho ahaɱ udāyi puggalaɱ saññutto'ti vadāmi no visaññutto,||
[454] taɱ kissa hetu: indriyavemattatā hi me udāyi imasmiɱ puggale viditā.|| ||

Idha panudāyi ekacco puggalo 'upadhi dukkhassa mūla'nti iti viditvā nirupadhi hoti upadhisaŋkhaye vimutto,||
imaɱ kho ahaɱ udāyi puggalaɱ visaññutto'ti vadāmi no saññutto.|| ||

Taɱ kissa hetu? indriyavemattatā hi me udāyi imasmiɱ puggale viditā.|| ||

Pañca kho ime udāyi kāmaguṇā.|| ||

Katame pañca? cakkhuviññeyyā rūpā iṭṭhā kantā manāpā piyarūpā kāmūpasaɱhitā rajanīyā1.|| ||

Sotaviññeyyā saddā iṭṭhā kantā manāpā piyarūpā kāmūpasaɱhitā rajanīyā1.|| ||

Ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā1.|| ||

Jivhāviññeyyā rasā iṭṭhā kantā manāpā piyarūpā kāmūpasaɱhitā rajanīyā1.|| ||

Kāyaviññeyyā phoṭṭhabbā iṭṭhā kantā manāpā piyarūpā kāmūpasaɱhitā rajanīyā1.|| ||

Ime kho udāyi pañca kāmaguṇā.|| ||

Yaɱ kho udāyi ime pañca kāmaguṇe paṭicca uppajjati sukhaɱ somanassaɱ,||
idaɱ vuccati kāmasukhaɱ mī'hasukhaɱ puthujjanasukhaɱ anariyasukhaɱ na sevitabbaɱ2 na bhāvetabbaɱ na bahulīkātabbaɱ.|| ||

Bhāyitabbaɱ etassa sukhassāti vadāmi.|| ||

Idhūdāyi bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja viharati.|| ||

Vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.|| ||

Pītiyā ca virāgā upekkhako ca viharati sato ca sampajāno sukhañca kāyena paṭisaŋvedeti.|| ||

Yantaɱ ariyā ācikkhanti 'Upekkhako satimā sukha-vihārī' ti taɱ tatiyaɱ-jhānaɱ upasampajja viharati.|| ||

Sukhassa ca pahānā dukkhassa ca pahānā pubbe va somanassa domanassānaɱ atthaɱgamā adukkhaɱ-asukhaɱ upekkhā sati pārisuddhiɱ catutthaɱ-jhānaɱ upasampajja viharati.|| ||

Idaɱ vuccati nekkhammasukhaɱ pavivekasukhaɱ upasamasukhaɱ sambodhasukhaɱ āsevitabbaɱ bhāvetabbaɱ bahulīkātabbaɱ.|| ||

Na bhāyitabbaɱ etassa sukhassāti vadāmi.|| ||

Idhūdāyi bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja viharati.|| ||

Idaɱ kho ahaɱ udāyi iñjitasmiɱ vadāmi.|| ||

Kiñca tattha iñjitasmiɱ: yadeva tattha vitakkavicārā aniruddhā honti,||
idaɱ tattha iñjitasmiɱ.

Idhūdāyi bhikkhu vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.|| ||

Idam pi kho ahaɱ udāyi iñjitasmiɱ vadāmi.|| ||

Kiñca tattha iñjitasmiɱ: yadeva tattha pīti-sukhaɱ aniruddhaɱ hoti,||
idaɱ tattha iñjitasmiɱ.|| ||

Idhūdāyi bhikkhu pītiyā ca virāgā upekkhako ca viharati.|| ||

Sato ca sampajāno sukhañca kāyena paṭisaŋvedeti.|| ||

Yantaɱ ariyā ācikkhanti: 'Upekkhako satimā sukha-vihārī' ti taɱ tatiyaɱ-jhānaɱ upasampajja viharati.|| ||

Idam pi kho ahaɱ udāyi iñjitasmiɱ vadāmi kiñca tattha iñjitasmiɱ: yadeva tattha upekkhāsukhaɱ [455] aniruddhaɱ hoti.|| ||

Idaɱ tattha iñjitasmiɱ.|| ||

Idhūdāyi bhikkhu sukhassa ca pahānā dukkhassa ca pahānā pubbe va somanassa-domanassānaɱ atthaŋgamā1 adukkhaɱ-asukhaɱ2 upekkhā-sati-pārisuddhiɱ catutthaɱ-jhānaɱ upasampajja viharati.|| ||

Idaɱ kho ahaɱ udāyi aniñjitasmiɱ vadāmi.|| ||

Idhūdāyi bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja viharati.|| ||

Idaɱ kho ahaɱ udāyi analanti vadāmi.|| ||

Pajahathāti vadāmi.|| ||

Samatikkamathāti vadāmi.|| ||

Ko ca tassa samatikkamo: idhūdāyi bhikkhu vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.|| ||

Ayaɱ tassa samatikkamo.|| ||

Idam pi kho ahaɱ udāyi analanti vadāmi,||
pajahathāti vadāmi,||
samatikkamathāti vadāmi.|| ||

Ko ca tassa samatikkamo: idhūdāyi bhikkhu pītiyā ca virāgā upekkhako ca viharati.|| ||

Sato ca sampajāno sukhañca kāyena paṭisaŋvedeti.|| ||

Yantaɱ ariyā ācikkhanti: 'Upekkhako satimā sukha-vihārī' ti taɱ tatiyaɱ-jhānaɱ upasampajja viharati.|| ||

Ayaɱ tassa samatikkamo.|| ||

Idam pi kho ahaɱ udāyi analanti vadāmi.|| ||

Pajahathāti vadāmi.|| ||

Samatikkamathāti vadāmi.|| ||

Ko ca tassa samatikkamo: idhūdāyi bhikkhu sukhassa ca pahānā dukkhassa ca pahānā,||
pubbe va somanassa-domanassānaɱ atthaŋgamā1 adukkhaɱ-asukhaɱ2 upekkhā-sati-pārisuddhiɱ catutthaɱ-jhānaɱ3 upasampajja viharati.|| ||

Ayaɱ tassa samatikkamo.|| ||

Idam pi kho ahaɱ udāyi analanti vadāmi.|| ||

Pajahathāti vadāmi.|| ||

Samatikkamathāti vadāmi.|| ||

Ko ca tassa samatikkamo: idhūdāyi bhikkhu sabbaso rūpa-saññānaɱ samatikkamā paṭigha-saññānaɱ atthaŋgamā nānatta-saññānaɱ amanasi-kārā ananto ākāsoti ākāsānañcāyatanaɱ upasampajja viharati.|| ||

Ayaɱ tassa samatikkamo.|| ||

Idam pi kho ahaɱ udāyi analanti vadāmi,||
pajahathāti vadāmi,||
samatikkamathāti vadāmi.|| ||

Ko ca tassa samatikkamo: idhūdāyi bhikkhu sabbaso ākāsānañcāyatanaɱ samatikkamma 'Anantaɱ viññāṇan' ti viññāṇañcāyatanaɱ upasampajja viharati,||
ayaɱ tassa samatikkamo,||
idampi kho ahaɱ udāyi analanti vadāmi,||
pajahathāti vadāmi,||
samatikkamathāti vadāmi.|| ||

Ko ca tassa samatikkamo: idhūdāyi bhikkhu sabbaso viññāṇañcāyatanaɱ samatikkamma 'N'atthi kiñcī' ti ākiñcaññāyatanaɱ upasampajja viharati.|| ||

Ayaɱ tassa samatikkamo.|| ||

Idam pi kho ahaɱ udāyi analanti vadāmi,||
pajahathāti vadāmi,||
samatikkamathāti vadāmi.|| ||

Ko ca tassa samatikkamo: idhūdāyi bhikkhu sabbaso ākiñcaññāyatanaɱ samatikkamma n'eva-saññā-nāsaññāyatanaɱ [456] upasampajja viharati.|| ||

Ayaɱ tassa samatikkamo,||
idampi kho ahaɱ udāyi|| ||

Analanti vadāmi,||
pajahathāti vadāmi,||
samatikkamathāti vadāmi.|| ||

Ko ca tassa samatikkamo: idhūdāyi bhikkhu sabbaso n'eva-saññā-nāsaññāyatanaɱ samatikkamma saññā-vedayita-nirodhaɱ upasampajja viharati.|| ||

Ayaɱ tassa samatikkamo.|| ||

Iti kho ahaɱ udāyi n'eva-saññā-nāsaññāyatanassapi pahānaɱ vadāmi.|| ||

Passasi no tvaɱ udāyi taɱ saɱyojanaɱ anuɱ vā thūlaɱ vā,||
yassāhaɱ no pahānaɱ vadāmīti.|| ||

No h'etaɱ bhante' ti.|| ||

Idam avoca Bhagavā attamano āyasmā udāyi Bhagavato bhāsitaɱ abhinandīti.|| ||

Laṭukikopama suttaɱ chaṭṭhaɱ


Contact:
E-mail
Copyright Statement   Webmaster's Page