Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
2. Bhikkhu Vagga

Sutta 67

Cātumā Suttaɱ

Based on the 'Sri Lanka Buddha Jayanti Tripitaka Series.'

 


 

[1][pts][upal] Evaɱ me sutaɱ:|| ||

Ekaɱ samayaɱ Bhagavā cātumāyaɱ viharati āmalakīvane tena kho pana samayena Sāriputta-Moggallāna-pamukhāni pañcamattāni bhikkhusatāni cātumaɱ anuppattāni honti Bhagavantaɱ dassanāya.|| ||

Te ca āgantukā bhikkhū nevāsikehi bhikkhūhi saddhiɱ paṭisammodamānā senāsanāni paññāpayamānā pattacīvarāni paṭisāmayamānā uccāsaddā mahāsaddā ahesuɱ.|| ||

Atha kho Bhagavā āyasmantaɱ Ānandaɱ āmantesi1: 'ke panete Ānanda uccāsaddā mahāsaddā kevaṭṭā maññe maccavilope' ti.|| ||

'Etāni bhante Sāriputta-Moggallāna-pamukhāni pañcamattāni bhikkhusatāni cātumaɱ anuppattāni Bhagavantaɱ dassanāya.|| ||

Te āgantukā bhikkhū nevāsikehi bhikkhūhi saddhiɱ paṭisammodamānā senāsanāni paññāpayamānā pattacīvarāni paṭisāmayamānā uccāsaddā mahāsaddā' ti.|| ||

Tena hĀnanda mama vacanena te bhikkhū āmantehi.|| ||

Satthāyasmante āmantetī' ti.|| ||

Evaɱ bhante' ti kho āyasmā Ānando Bhagavato paṭissutvā yena te bhikkhū ten'upasaŋkami.|| ||

Upasaŋkamitvā te bhikkhū etad avoca: 'satthāyasmante āmantetī' ti.|| ||

Evam āvuso ti kho [457] te bhikkhū āyasmato Ānandassa paṭissutvā yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinne kho te bhikkhū Bhagavā etad avoca: 'kin nu tumhe bhikkhave uccāsaddā mahāsaddā kevaṭṭā maññe macchavilope' ti.|| ||

Imāni bhante Sāriputta-Moggallāna-pamukhāni pañcamattāni bhikkhusatāni cātumaɱ anuppattāni Bhagavantaɱ dassanāya.|| ||

Teme āgantukā bhikkhū nevāsikehi bhikkhūhi saddhiɱ paṭisammodamānā senāsanāni paññāpayamānā pattacīvarāni paṭisāmayamānā uccāsaddā mahāsaddā' ti.|| ||

'Gacchatha bhikkhave paṇāmemi vo, na vo mama santike vatthabban' ti.|| ||

Evaɱ bhante' ti kho te bhikkhū Bhagavato paṭissutvā uṭṭhāy āsanā Bhagavantaɱ abhivādetvā padakkhiṇaɱ katvā senāsanaɱ saɱsāmetvā pattacīvaraɱ ādāya pakkamiɱsu.|| ||

Tena kho pana samayena cātumeyyakā Sakkā santhāgāre sannipatitā honti kenacid-eva karaṇīyena, addasaɱsu1 kho cātumeyyakā Sakkā te bhikkhū dūrato va gacchante, disvāna yena te bhikkhū ten'upasaŋkamiɱsu, upasaŋkamitvā te bhikkhū etad avocuɱ: 'handa kahaɱ pana tumhe āyasmanto gacchathā' ti.|| ||

Bhagavatā kho āvuso bhikkhu-saŋgho paṇāmito' ti.|| ||

'Tena hāyasmanto muhuttaɱ nisīdatha, app'eva nāma mayaɱ sakkuṇeyyāma Bhagavantaɱ pasādetun' ti.|| ||

Evam āvuso ti kho te bhikkhū cātumeyyakānaɱ Sakkānaɱ paccassosuɱ.|| ||

Atha kho cātumeyyakā Sakkā yena Bhagavā ten'upasaŋkamiɱsu, upasaŋkamitvā Bhagavantaɱ abhivādetvā eka-m-antaɱ nisīdiɱsu, eka-m-antaɱ nisinnā kho cātumeyyakā Sakkā Bhagavantaɱ etad avocuɱ: 'abhinandatu bhante Bhagavā bhikkhu-saŋghaɱ, abhivadatu bhante Bhagavā bhikkhu-saŋghaɱ, seyyathā pi bhante Bhagavatā pubbe bhikkhu-saŋgho anuggahito, evam eva1 Bhagavā etarahi anugaṇhātu bhikkhu-saŋghaɱ.|| ||

Santettha bhante bhikkhū navā acirapabbajitā adhunāgatā imaɱ Dhamma-Vinayaɱ, tesaɱ Bhagavantaɱ dassanāya alabhantānaɱ siyā aññathattaɱ , siyā viparināmo.|| ||

Seyyathā pi bhante bījānaɱ taruṇānaɱ udakaɱ alabhantānaɱ siyā aññathattaɱ, siyā viparināmo, evam eva kho bhante santettha bhikkhū navā acirapabbajitā adhunāgatā imaɱ Dhamma-Vinayaɱ, tesaɱ Bhagavantaɱ dassanāya alabhantānaɱ siyā aññathattaɱ, siyā viparināmo.|| ||

Seyyathā pi bhante bījānaɱ taruṇānaɱ udakaɱ alabhantānaɱ siyā aññathattaɱ, siyā viparināmo.|| ||

Evam eva kho bhante santettha [458] bhikkhū navā acirapabbajitā adhunāgatā imaɱ Dhamma-Vinayaɱ, tesaɱ Bhagavantaɱ dassanāya alabhantānaɱ siyā aññathattaɱ, siyā viparināmo.|| ||

Seyyathā pi bhante vacchassa taruṇassa mātaraɱ apassantassa siyā aññathattaɱ, siyā viparināmo.|| ||

Evam eva kho bhante santettha bhikkhū navā acirapabbajitā adhunāgatā imaɱ Dhamma-Vinayaɱ, tesaɱ Bhagavantaɱ apassantānaɱ siyā aññathattaɱ, siyā viparināmo.|| ||

Abhinandatu bhante Bhagavā bhikkhu-saŋghaɱ, abhivadatu bhante Bhagavā bhikkhu-saŋghaɱ.|| ||

Seyyathā pi bhante Bhagavatā pubbe bhikkhu-saŋgho [459] anuggahito, evam eva Bhagavā etarahi anugaṇhātu bhikkhu saŋghan' ti.|| ||

Asakkhiɱsu kho cātumeyyakā ca Sakkā Brahmā ca Sahampati Bhagavantaɱ pasādetuɱ bījūpamena ca taruṇūpamena ca.|| ||

Atha kho āyasmā Mahā Moggallāno bhikkhū āmantesi: 'uṭṭhahathāvuso, gaṇhātha pattacīvaraɱ, pasādito Bhagavā cātumeyyakehi ca Sakkehi Brahmuṇā ca Sahampatinā bījūpamena ca taruṇūpamena cā' ti.|| ||

Evam āvuso ti kho te bhikkhū āyasmato Mahā Moggallānassa paṭissutvā uṭṭhāy āsanā pattacīvaraɱ ādāya yena Bhagavā ten'upasaŋkamiɱsu, upasaŋkamitvā Bhagavantaɱ abhivādetvā eka-m-antaɱ nisīdiɱsu, eka-m-antaɱ nisinnaɱ kho āyasmantaɱ Sāriputtaɱ Bhagavā etad avoca: kinti te Sāriputta ahosi mayā bhikkhu-saŋghe paṇāmite' ti.|| ||

Evaɱ kho me bhante ahosi Bhagavatā bhikkhu-saŋghe paṇāmite1.|| ||

Appossukkodā'ni Bhagavā diṭṭhadhammasukhavihāraɱ anuyutto viharissati.|| ||

Mayam pidāni appossukkā diṭṭhadhammasukhavihāraɱ anuyuttā viharissāmā' ti.|| ||

Āgamehi tvaɱ Sāriputta, āgamehi tvaɱ Sāriputta, diṭṭhadhammasukhavihāranti na kho te Sāriputta punapi evarūpaɱ cittaɱ uppādetabbanti2.|| ||

Atha kho Bhagavā āyasmantaɱ Mahā Moggallānaɱ āmantesi.|| ||

'Kinti te Moggallāna ahosi mayā bhikkhu-saŋghe paṇāmiteti.|| ||

Evaɱ kho me bhante ahosi Bhagavatā bhikkhu-saŋghe paṇāmite appossukko'dāni Bhagavā diṭṭhadhammasukhavihāraɱ anuyutto viharissati.|| ||

Ahañ cadāni āyasmā ca Sāriputto bhikkhu-saŋghaɱ pariharissāmā' ti.|| ||

Sādhu sādhu Moggallāna, ahaɱ vā hi Moggallāna bhikkhu-saŋghaɱ parihareyyaɱ Sāriputta moggallānā vāti.|| ||

Atha kho Bhagavā bhikkhū āmantesi: cattārimāni bhikkhave bhayāni udakorohante pāṭikaŋkhitabbāni, katamāni cattāri: ūmībh ayaɱ kumbhī'abh ayaɱ āvaṭṭabh ayaɱ susukābh ayaɱ.|| ||

Imāni kho bhikkhave cattāri bhayāni udakorohante pāṭikaŋkhitabbāni.|| ||

Evam eva kho bhikkhave cattārimāni bhayāni idh'ekacce puggale imasmiɱ dhamma-vinaye agārasmā anagāriyaɱ pabbajite pāṭikaŋkhitabbāni.|| ||

Katamāni [460] cattāri: ūmībh ayaɱ kumbhīlabh ayaɱ āvaṭṭabh ayaɱ susukābh ayaɱ.|| ||

Katamañ ca bhikkhave ūmībh ayaɱ: idha bhikkhave ekacco kulaputto saddhā agārasmā anagāriyaɱ pabbajito hoti, ''Otiṇṇo'mhi jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto.|| ||

Appeva nāma imassa kevalassa dukkhakkhandhassa antakiriyā paññāyethā' ti.|| ||

Tam enaɱ tathā pabbajitaɱ samānaɱ sabrahmacārī ovadanti anusāsanti: 'evante abhikkamitabbaɱ.|| ||

Evante paṭikkamitabbaɱ.|| ||

Evante ālokitabbaɱ.|| ||

Evante vilokitabbaɱ.|| ||

Evante sammiñjitabbaɱ.|| ||

Evante pasāretabbaɱ.|| ||

Evante sanghāṭipattacīvaraɱ dhāretabban' ti.|| ||

Tassa evaɱ hoti:|| ||

Mayaɱ kho pubbe agāriyabhūtā samānā aññe ovadāmapi1 anusāsāmapi2 ime pan amhākaɱ puttamattā maññe, nattamattā maññe, amhe ovaditabbaɱ anusāsitabbaɱ maññantī ti.|| ||

So sikkhaɱ paccakkhāya hīnāyāvattati.|| ||

Ayaɱ vuccati bhikkhave ūmībhayassa bhīto sikkhaɱ paccakkhāya hīnāyāvatto ūmībhayanti kho bhikkhave kodhūpāyāsassetaɱ adhivacanaɱ.|| ||

Katamañ ca bhikkhave kumbhīlabh ayaɱ: idha bhikkhave ekacco kulaputto saddhā agārasmā anagāriyaɱ pabbajito hoti, 'Otiṇṇo'mhi jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto.|| ||

Appeva nāma imassa kevalassa dukkhakkhandhassa antakiriyā paññāyethā' ti.|| ||

Tam enaɱ tathā pabbajitaɱ samānaɱ sabrahmacārī ovadanti.|| ||

Anusāsanti: 'idaɱ te khāditabbaɱ idaɱ te na khāditabbaɱ, idaɱ te bhuñjitabbaɱ, idaɱ te na bhuñjitabbaɱ, idaɱ te sāyitabbaɱ, idaɱ te na sāyitabbaɱ, idaɱ te pātabbaɱ, idaɱ te na pātabbaɱ, kappiyaɱ te khāditabbaɱ, akappiyaɱ te na khāditabbaɱ, kappiyaɱ te bhuñjitabbaɱ, akappiyaɱ te na bhuñajitabbaɱ, kappiyaɱ te sāyitabbaɱ, akappiyaɱ te na sāyitabbaɱ, kappiyaɱ te pātabbaɱ, akappiyaɱ te na pātabbaɱ, kāle te khāditabbaɱ, vikāle te na khāditabbaɱ, kāle te bhuñjitabbaɱ, vikāle te na bhuñjitabbaɱ, kāle te sāyitabbaɱ, vikāle te na sāyitabbaɱ, kāle te pātabbaɱ, vikāle te na pātabban' ti.|| ||

Tassa [461] evaɱ hoti: mayaɱ kho pubbe agāriyabhūtā samānā yaɱ icchāma taɱ khādāma, yaɱ na icchāma na taɱ khādāma, yaɱ icchāma taɱ bhuñjāma, yaɱ na icchāma na taɱ bhuñjāma, yaɱ icchāma taɱ sāyāma, yaɱ na icchāma na taɱ sāyāma, yaɱ icchāma taɱ pivāma3 yaɱ na icchāma na taɱ pivāma.|| ||

Kappiyampi khādāma, akappiyampi khādāma, kappiyampi bhuñjāma, akappiyampi bhuñjāma, kappiyampi sāyāma, akappiyampi sāyāma, kappiyampi pivāma, akappiyampi pivāma.|| ||

Kālepi khādāma, vikālepi khādāma, kālepi bhuñjāma vikālepi bhuñjāma, kālepi sāyāma, vikālepi sāyāma, kālepi pivāma, vikālepi pivāma.|| ||

Yampi no saddhā gahapatikā divā vikāle paṇītaɱ khādanīyaɱ bhojanīyaɱ denti, tatthapi me mukhāvaraṇaɱ maññe karontī' ti.|| ||

So sikkhaɱ paccakkhāya hīnāyāvattati.|| ||

Ayaɱ vuccati bhikkhave kumbhīlabhayassa bhīto sikkhaɱ paccakkhāya hīnāyāvatto.|| ||

Kumbhīlabhayanti kho bhikkhave odarikattass'etaɱ adhivacanaɱ.|| ||

Katamañ ca bhikkhave āvaṭṭabh ayaɱ, idha bhikkhave ekacco kulaputto saddhā agārasmā anagāriyaɱ pabbajito hoti.|| ||

Otiṇṇomhi jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto.|| ||

Appeva nāma imassa kevalassa dukkhakkhandhassa antakiriyā paññāyethā' ti.|| ||

So evaɱ pabbajito samāno pubbaṇha-samayaɱ nivāsetvā pattacīvaraɱ ādāya gāmaɱ vā nigamaɱ vā piṇḍāya pavisati arakkhiten'eva kāyena, arakkhitāya vācāya, anupaṭṭhitāya satiyā asaɱvutehi indriyehi.|| ||

So tattha passati gahapatiɱ vā gahapatiputtaɱ vā pañcahi kāma-guṇehi samappitaɱ samaŋgībhūtaɱ paricārayamānaɱ.|| ||

Tassa evaɱ hoti: mayaɱ kho pubbe agāriyabhūtā samānā pañcahi kāma-guṇehi samappitā samaŋgībhūtā paricārimha.|| ||

Saɱvijjante1 kho kule2 bhogā, sakkā bhoge ca bhuñjituɱ puññāni ca kātun' ti.|| ||

So sikkhaɱ paccakkhāya hīnāyāvattati.|| ||

Ayaɱ vuccati bhikkhave āvaṭṭabhayassa bhīto sikkhaɱ paccakkhāya hīnāyāvatto.|| ||

Āvaṭṭabhayanti kho bhikkhave pañcann'etaɱ kāmaguṇānaɱ adhivacanaɱ.|| ||

Katamañ ca bhikkhave susukābh ayaɱ, idha bhikkhave [462] ekacco kulaputto saddhā agārasmā anagāriyaɱ pabbajito hoti, 'Otiṇṇo'mhi jātiyā jarāya maraṇena sokehi paridevehi dukkhehi domanassehi upāyāsehi, dukkhotiṇṇo dukkhapareto, app'eva nāma imassa kevalassa dukkhakkhandhassa antakiriyā paññāyethā' ti.|| ||

So evaɱ pabbajito samāno pubbaṇha-samayaɱ nivāsetvā pattacīvaraɱ ādāya gāmaɱ vā nigamaɱ vā piṇḍāya pavisati arakkhiten'eva kāyena, arakkhitāya vācāya, anupaṭṭhitāya satiyā, asaɱvutehi indriyehi.|| ||

So tattha passati mātugāmaɱ dunnivatthaɱ vā duppārutaɱ vā.|| ||

Tassa mātugāmaɱ disvā dunnivatthaɱ vā duppārutaɱ vā rāgo cittaɱ anuddhaɱseti, so rāgānuddhastena cittena sikkhaɱ paccakkhāya hīnāyāvattati.|| ||

Ayaɱ vuccati bhikkhave susukābhayassa bhīto sikkhaɱ paccakkhāya hīnāyāvatto.|| ||

Susukābhayanti kho bhikkhave mātugāmassetaɱ adhivacanaɱ.|| ||

Imāni kho bhikkhave cattāri bhayāni idh'ekacce puggale imasmiɱ dhamma-vinaye agārasmā anagāriyaɱ pabbajite pāṭikaŋkhitabbānīti.|| ||

Idam avoca Bhagavā attamanā te bhikkhū Bhagavato bhāsitaɱ abhinandunti.|| ||

Cātuma suttaɱ sattamaɱ


Contact:
E-mail
Copyright Statement   Webmaster's Page