Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
3. Paribbājaka Vagga

Sutta 71

Tevijja-Vacchagotta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgāra-sālāyaɱ.|| ||

Tena kho pana samayena Vacchagotto paribbājako Ekapuṇḍarīke paribbājakārāme paṭivasati.|| ||

Atha kho Bhagavā pubbaṇha-samayaɱ nivāsetvā patta-cīvaraɱ ādāya Vesāliyaɱ piṇḍāya pāvisi.|| ||

Atha kho Bhagavato etad ahosi.|| ||

Atippago kho tāva Vesāliyaɱ piṇḍāya carituɱ.|| ||

Yan'nūnāhaɱ yena Ekapuṇḍarīko paribbājakārāmo,||
yena Vacchagotto paribbājako,||
ten'upasankameyyanti.|| ||

Atha kho Bhagavā yena Ekapuṇḍarīko paribbājakārāmo yena Vacchagotto paribbājako ten'upasankami.|| ||

Addasā kho Vacchagotto paribbājako Bhagavantaɱ dūrato va āga-c-chantaɱ,||
disvāna Bhagavantaɱ etad avoca:|| ||

"Etu kho bhante Bhagavā,||
svāgataɱ bhante Bhagavato,||
cirassaɱ kho bhante Bhagavā imaɱ pariyāyam akāsi yad idaɱ idh'āgamanāya.|| ||

Nisīdatu bhante Bhagavā idam-āsanaɱ paññattan" ti.|| ||

Nisīdi Bhagavā paññatte āsane||
Vacchagotto pi kho paribbājako añña- [482] taraɱ nīcaɱ āsanaɱ gahetvā eka-m-antaɱ nisīdi.|| ||

Eka-m-antaɱ nisinno kho Vacchagotto paribbājako Bhagavantaɱ etad avoca:|| ||

"Sutaɱ me taɱ bhante:|| ||

'Samaṇo Gotamo sabbaññū sabba-dassāvī,||
aparisesaɱ ñāṇa-dassanaɱ paṭijānāti:||
carato ca me tiṭṭhato ca suttassa ca jāgarassa ca satataɱ samitaɱ ñāṇa-dassanaɱ pacc'upaṭṭhitan' ti.|| ||

Ye te bhante evam āhaɱsu:|| ||

'Samaṇo Gotamo sabbaññū sabba-dassāvī,||
aparisesaɱ ñāṇa-dassanaɱ paṭijānāti:||
carato ca me tiṭṭhato ca suttassa ca jāgarassa ca satataɱ samitaɱ ñāṇa-dassanaɱ pacc'upaṭṭhitan' ti,|| ||

kacci te bhante Bhagavato vutta-vādino na ca Bhagavantaɱ abhūtena abbh'ācikkhanti||
dhammassa c'ānudhammaɱ vyākaronti||
na ca koci saha-dhammiko vād'ānuvādo gārayhaɱ ṭhānaɱ āga-c-chatī" ti?|| ||

Ye te Vaccha evam āhaɱsu:|| ||

'Samaṇo Gotamo sabbaññū sabba-dassāvī,||
aparisesaɱ ñāṇa-dassanaɱ paṭijānāti:||
carato ca me tiṭṭhato ca suttassa ca jāgarassa ca satataɱ samitaɱ ñāṇa-dassanaɱ pacc'upaṭṭhitan' ti,|| ||

na me te vutta-vādino,||
abbh'ācikkhanti ca pana maɱ te asatā abhūtenā" ti.|| ||

"Kathaɱ vyākaramānā pana mayaɱ bhante vutta-vādino c'eva Bhagavato assāma,||
na ca Bhagavantaɱ abhūtena abbh'ācikkheyyāma||
dhammassa c'ānudhammaɱ vyākareyyāma||
na ca koci saha-dhammiko vād'ānuvādo gārayhaɱ ṭhānaɱ āgaccheyyā" ti?|| ||

"Tevijjo Samaṇo Gotamo" ti||
kho Vaccha vyākaramāno vuttavādī c'eva me assa,||
na ca maɱ abhūtena abbh'ācikkheyya,||
dhammassa c'ānudhammaɱ vyākareyya,||
na ca koci saha-dhammiko vād'ānuvādo gārayhaɱ ṭhānaɱ āgaccheyya.|| ||

Ahaɱ hi Vaccha yāva-d-eva ākaŋkhāmi aneka-vihitaɱ pubbe-nivāsaɱ anussarāmi.|| ||

Ekam pi jātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsam pi jātiyo,||
tiɱsam pi jātiyo,||
cattārīsam pi jātiyo,||
paññāsam pi jātiyo,||
jāti-satam pi jāti-sahassam pi,||
jāti-sata-sahassam pi,||
aneke pi saɱvaṭṭa-kappe,||
aneke pi vivaṭṭa-kappe,||
aneke pi saɱvaṭṭa-vivaṭṭa-kappe,||
'amutr'āsiɱ evaɱ-nāmo||
evaɱ gotto||
evaɱ vaṇṇo||
evam-āhāro||
evaɱ sukha-dukkha-paṭisaɱvedī||
evam-āyu-pariyanto,||
so tato cuto||
amutra udapādiɱ.

Tatrā p'āsiɱ||
evaɱ-nāmo||
evaɱ gotto||
evaɱ vaṇṇo||
evam-āhāro||
evaɱ sukha-dukkha-paṭisaɱvedī||
evam-āyu-pariyanto.

So tato cuto||
idh'ūpapanno' ti.

Iti sākāraɱ sa-uddesaɱ aneka-vihitaɱ pubbe-nivāsaɱ anussarāmi.|| ||

Ahaɱ hi Vaccha yāva-d-eva ākaŋkhāmi dibbena cakkhunā visuddhena atikkanta-mānusakena satte passāmi cavamāne upapajjamāne,||
hīne paṇīte suvaṇṇe dubbaṇṇe sugate duggate||
yathā-kammūpage satte pajānāmi:|| ||

'Ime vata bhonto sattā||
kāya-du-c-caritena samannāgatā,||
vacī-du-c-caritena samannāgatā,||
mano-du-c-caritena samannāgatā,||
ariyānaɱ upavādakā,||
micchā-diṭṭhikā,||
micchā-diṭṭhi-kamma-samādānā,||
te kāyassa bhedā param maraṇā||
apāyaɱ duggatiɱ||
vinipātaɱ||
Nirayaɱ upapannā.

Ime vā pana bhonto sattā||
kāya-sucaritena samannāgatā,||
vacī-sucaritena samannāgatā,||
mano-sucaritena samannāgatā,||
ariyānaɱ anupavādakā,||
sammā-diṭṭhikā sammā-diṭṭhi-kamma-samādānā,||
te kāyassa bhedā param maraṇā||
sugatiɱ||
saggaɱ lokaɱ upapannāti.

Iti dibbena cakkhunā visuddhena atikkanta-mānusakena satte passāmi cavamāne upapajjamāne,||
hīne paṇīte suvaṇṇe dubbaṇṇe sugate duggate.

Yathā-kammūpage satte pajānāmi.|| ||

Ahaɱ hi Vaccha āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharāmi.|| ||

'Tevijjo Samaṇo Gotamo' ti||
[483] kho Vaccha vyākaramāno vuttavādī c'eva me assa na ca maɱ abhūtena abbh'ācikkheyya,||
dhammassa c'ānudhammaɱ vyākareyya,||
na ca koci saha-dhammiko vād'ānuvādo gārayhaɱ ṭhānaɱ āgaccheyyā" ti.|| ||

 


 

Evaɱ vutte Vacchagotto paribbājako Bhagavantaɱ etad avoca:|| ||

"Atthi nu kho bho Gotama koci gihī gihīsaŋyojanaɱ a-p-pahāya kāyassa bhedā dukkhass'antakaro" ti?|| ||

"N'atthi kho Vaccha koci gihī gihīsaŋyojanaɱ a-p-pahāya kāyassa bhedā dukkhass'antakaro" ti.|| ||

"Atthi pana bho Gotama koci gihī gihīsaŋyojanaɱ a-p-pahāya kāyassa bhedā saggūpago" ti?|| ||

"Na kho Vaccha ekaɱ yeva sataɱ||
na dve satāni||
na tīṇi satāni||
na cattāri satāni||
na pañca satāni,||
atha kho bhiyyo va ye gihīsaŋyojanaɱ a-p-pahāya kāyassa bhedā saggūpagā" ti.|| ||

"Atthi nu kho bho Gotama koci ājīvako kāyassa bhedā dukkhass'antakaro" ti?|| ||

"N'atthi kho Vaccha koci ājīvako kāyassa bhedā dukkhass'antakaro" ti.|| ||

"Atthi pana bho Gotama koci ājīvako kāyassa bhedā saggūpago" ti?|| ||

"Ito kho so Vaccha ekanavuto kappo yam-ahaɱ anussarāmi,||
nābhijānāmi kañci ājīvakaɱ saggūpagaɱ aññatra ekena,||
so p'āsi kamma-vādī kiriya-vādī" ti.|| ||

"Evaɱ sante bho Gotama suññaɱ aduɱ titthāyatanaɱ antamaso saggūpagenāpī" ti.|| ||

"Evaɱ sante Vaccha suññaɱ aduɱ titthāyatanaɱ antamaso saggūpagenāpī" ti.|| ||

Idam avoca Bhagavā.|| ||

Attamano Vacchagotto paribbājako Bhagavato bhāsitaɱ abhinandīti.|| ||

Tevijja-Vacchagotta Suttaɱ paṭhamaɱ


Contact:
E-mail
Copyright Statement