Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
3. Paribbājaka Vagga

Sutta 72

Aggi-Vacchagotta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][wrrn][than][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Atha kho Vacchagotto paribbājako yena Bhagavā ten'upasankami.|| ||

[484] Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Vacchagotto paribbājako Bhagavantaɱ etad avoca:|| ||

"Kin nu kho bho Gotama:||
'sassato loko idam eva sacchaɱ,||
mogham-aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī||
'sassato loko idam eva sacchaɱ,||
mogham-aññan'" ti.|| ||

'Kiɱ pana bho Gotama||
'asassato loko idam eva saccaɱ,||
mogham-aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī||
'asassato loko idam eva saccaɱ,||
mogham-aññan'" ti.|| ||

'Kiɱ pana bho Gotama||
'antavā loko idam eva saccaɱ||
mogham aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī||
'antavā loko idam eva saccaɱ,||
mogham-aññan'" ti.|| ||

"Kiɱ pana bho Gotama||
'anantavā loko idam eva saccaɱ||
'mogham-aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī,||
'aanantavā loko idam eva saccaɱ,||
mogham-aññan'" ti.|| ||

"Kin nu kho bho Gotama||
'taɱ jīvaɱ taɱ sarīraɱ idam eva saccaɱ||
mogham-aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī,||
'taɱ jīvaɱ taɱ sarīraɱ idam eva saccaɱ,||
mogham-aññan'" ti.|| ||

"Kiɱ pana bho Gotama,||
'aññaɱ jīvaɱ aññaɱ sarīraɱ idam eva saccaɱ||
mogham-aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī,||
'aññaɱ jīvaɱ aññaɱ sarīraɱ idam eva saccaɱ,||
mogham-aññan'" ti.|| ||

"Kin nu kho bho Gotama,||
'hoti Tathāgato param maraṇā idam eva saccaɱ||
mogham-aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī,||
'hoti Tathāgato param maraṇā idam eva saccaɱ,||
mogham-aññan'" ti.|| ||

"Kiɱ pana bho Gotama,||
'na hoti Tathāgato param maraṇā idam eva saccaɱ||
mogham-aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī||
'na hoti Tathāgato param maraṇā idam eva saccaɱ,||
mogham-aññan'" ti.|| ||

"Kin nu kho bho Gotama,||
'hoti ca na ca hoti Tathāgato param maraṇā idam eva saccaɱ,||
mogham-aññan' ti||
evaɱ diṭṭhī bhavaɱ Gotamo" ti?|| ||

[485] "Na kho ahaɱ Vaccha evaɱ diṭṭhī||
'hoti ca na ca hoti Tathāgato param maraṇā idam eva saccaɱ,||
mogham-aññan'" ti.|| ||

"Kiɱ pana bho Gotama,||
'n'eva hoti na na hoti Tathāgato param maraṇā idam eva saccaɱ||
mogham-aññan' ti||
evaɱ diṭṭhī bhavaɱ Gotamo" ti?|| ||

"Na kho ahaɱ Vaccha evaɱ diṭṭhī,||
'n'eva hoti na na hoti Tathāgato param maraṇā idam eva saccaɱ,||
mogham-aññan'" ti.|| ||

 


 

"Kin nu kho bho Gotama,||
'"sassato loko, idam eva saccaɱ,||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno:||
'na kho ahaɱ Vaccha evaɱ diṭṭhī,||
"sassato loko, idam eva saccaɱ||
mogham-aññantī"' ti vadesi.|| ||

Kiɱ pana bho Gotama||
'"asassato loko, idam eva saccaɱ,||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno:||
'na kho ahaɱ Vaccha evaɱ diṭṭhī,||
"asassato loko, idam eva saccaɱ,||
mogham-aññantī"' ti vadesi.|| ||

Kin nu kho bho Gotama,||
'"antavā loko, idam eva saccaɱ,||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno||
'na kho ahaɱ Vaccha evaɱ diṭṭhī,||
"antavā loko, idam eva saccaɱ||
mogham-aññantī"' ti vadesi.|| ||

Kiɱ pana bho Gotama||
'"anantavā loko, idam eva saccaɱ,||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno||
'na kho ahaɱ Vaccha evaɱ diṭṭhī,||
"anantavā loko, idam eva saccaɱ,||
mogham-aññantī"' ti vadesi.|| ||

Kin nu kho bho Gotama,||
'"taɱ jīvaɱ taɱ sarīraɱ, idam eva saccaɱ,||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno||
'na kho ahaɱ Vaccha evaɱ diṭṭhī,||
"taɱ jīvaɱ taɱ sarīraɱ, idam eva saccaɱ||
mogham-aññantī"' ti vadesi.|| ||

Kiɱ pana bho Gotama||
'"aññaɱ jīvaɱ aññaɱ sarīraɱ, idam eva saccaɱ,||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno||
'na kho ahaɱ Vaccha evaɱ diṭṭhī||
"aññaɱ jīvaɱ aññaɱ sarīraɱ, idam eva saccaɱ,||
mogham-aññantī"' ti vadesi.|| ||

Kin nu kho bho Gotama||
'"hoti Tathāgato param maraṇā, idam eva saccaɱ||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno||
'na kho ahaɱ Vaccha evaɱ diṭṭhī||
"hoti Tathāgato param maraṇā idam eva saccaɱ||
mogham-aññantī"' ti vadesi.|| ||

Kiɱ pana bho Gotama||
'"na hoti Tathāgato param maraṇā, idam eva saccaɱ||
mogham-añña" ti||
evaɱ diṭṭhī bhavaɱ Gotamo ti?'||
iti puṭṭho samāno||
'na kho ahaɱ Vaccha evaɱ diṭṭhī,||
"na hoti Tathāgato param maraṇā, idam eva saccaɱ,||
mogham-aññantī"' ti vadesi.|| ||

Kin nu kho bho Gotama||
'"hoti ca na ca hoti Tathāgato param maraṇā, idam eva saccaɱ||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno||
'na kho ahaɱ Vaccha evaɱ diṭṭhī,||
"hoti ca na ca hoti Tathāgato param maraṇā, idam eva saccaɱ||
mogham-aññantī"' ti vadesi.|| ||

Kiɱ pana bho Gotama||
'"n'eva hoti na na hoti Tathāgato param maraṇā, idam eva saccaɱ||
mogham-aññan" ti||
evaɱ diṭṭhī bhavaɱ Gotamo ti?'||
iti puṭṭho samāno||
'na kho ahaɱ Vaccha evaɱ diṭṭhī,||
"n'eva hoti na na hoti Tathāgato param maraṇā, idam eva saccaɱ||
mogham-aññantī"' ti vadesi.|| ||

Kim pana bhavaɱ Gotamo ādīnavaɱ sampassamāno evaɱ imāni sabbaso diṭṭhi-gatāni anupagato" ti?|| ||

 


 

"'Sassato loko' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'Asassato loko' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'Antavā loko' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'Anantavā loko' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'Taɱ jīvaɱ taɱ sarīran' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'Aññaɱ jīvaɱ aññaɱ sarīran' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'Hoti Tathāgato param maraṇā' ti kho [486] Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'Na hoti Tathāgato param maraṇā' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'Hoti ca na ca hoti Tathāgato param maraṇā' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

'N'eva hoti na na hoti Tathāgato param maraṇā' ti kho Vaccha||
diṭṭhi-gatam etaɱ||
diṭṭhi-gahanaɱ||
diṭṭhi-kantāraɱ||
diṭṭhi-visūkaɱ||
diṭṭhi-vipphanditaɱ||
diṭṭhi-sañañojanaɱ,||
sadukkhaɱ||
sa-vighātaɱ||
sa-upāyāsaɱ||
sa-pariḷāhaɱ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na nibbānāya saŋvattati.|| ||

Imaɱ kho ahaɱ Vaccha ādīnavaɱ sampassamāno evaɱ imāni sabbaso diṭṭhi-gatāni anupagato" ti.|| ||

 


 

"Atthi pana bhoto Gotamassa kiñci diṭṭhi-gatan" ti.|| ||

"'Diṭṭhi-gatan' ti kho Vaccha apanītame taɱ Tathāgatassa.|| ||

Diṭṭhaɱ h'etaɱ Vaccha Tathāgatena:|| ||

'Iti rūpaɱ,||
iti rūpassa samudayo,||
iti rūpassa atthaŋ-gamo;|| ||

iti vedanā,||
iti vedanāya samudayo,||
iti vedanāya atthaŋ-gamo;|| ||

iti saññā,||
iti saññāya samudayo,||
iti saññāya atthaŋ-gamo;|| ||

iti sankhārā,||
iti sankhārānaɱ samudayo,||
iti sankhārānaɱ atthaŋ-gamo;|| ||

iti viññāṇaɱ,||
iti viññāṇassa samudayo,||
iti viññāṇassa atthaŋ-gamo' ti.|| ||

Tasmā Tathāgato||
'sabba-maññitānaɱ||
sabba-mathitānaɱ||
sabba - "ahaŋkāra" - "mamaŋkāra" - mān-ā-nusayānaɱ||
khayā||
virāgā||
nirodhā||
cāgā||
paṭinissaggā||
anupādā vimutto' ti vadāmī" ti.|| ||

"Evaɱ vimutta-citto pana bho Gotama bhikkhu kuhiɱ upapajjatī" ti?|| ||

"'Upapajjatī' ti||
kho Vaccha na upetī" ti.|| ||

"Tena hi bho Gotama na upapajjatī" ti?|| ||

"'Na upapajjatī' ti||
kho Vaccha na upetī" ti.|| ||

"Tena hi bho Gotama uppajjati ca na ca upapajjatī" ti?|| ||

"'Upapajjati ca na ca upapajjatī' ti||
kho Vaccha na upetī" ti.|| ||

"Tena hi bho Gotama n'eva uppajjati na nūpapajjatī" ti?|| ||

"'N'eva uppajjati na nūpapajjatī'ti||
kho Vaccha na upetī" ti.|| ||

 


 

"Evaɱ vimutta-citto pana bho Gotama bhikkhu kuhiɱ 'upapajjatī' ti?||
iti puṭṭho samāno||
'"upapajjatī" ti||
kho Vaccha na upetī' ti vadesi.|| ||

Tena hi bho Gotama||
'na upapajjatī' ti?||
iti puṭṭho samāno||
'"na upapajjatī" ti||
kho Vaccha na upetī' ti vadesi.|| ||

Tena hi bho Gotama||
'uppajjati ca na ca upapajjatī' ti?||
iti puṭṭho samāno||
'"uppajjati ca na ca upapajjatī" ti||
kho Vaccha na upetī' ti vadesi.|| ||

Tena hi bho Gotama||
'n'eva uppajjati na nūpapajjatī' ti?||
iti puṭṭho samāno||
'"n'eva uppajjati, [487] na nūpapajjatī" ti||
kho Vaccha na upetī' ti vadesi.|| ||

Etthāhaɱ bho Gotama aññāṇam-āpādiɱ,||
ettha sammoham-āpādiɱ.|| ||

Yā pi me esā bhoto Gotamassa purimena kathā-sallāpena ahu pasādamattā,||
sā pi me etarahi antara-hitā" ti.|| ||

"Alaɱ hi te Vaccha aññāṇāya,||
alaɱ sammohāya.|| ||

Gambhīro h'āyaɱ Vaccha dhammo||
duddaso||
duranubodho||
santo paṇīto||
atakkāvacaro nipuṇo paṇḍitavedanīyo,||
so tayā dujjāno añña-diṭṭhi-kena||
añña-khanti-kena||
añña-ruci-kena||
añña-trayogena||
añña-thācariya-kena.|| ||

Tena hi Vaccha taɱ yev'ettha paṭipucchissāmi,||
yathā te khameyya tathā naɱ vyākareyyāsi.|| ||

Taɱ kiɱ maññasi Vaccha?|| ||

Sace te purato aggi jaleyya,||
jāneyyāsi tvaɱ:|| ||

'Ayaɱ me purato aggi jalatī'" ti?|| ||

"Sace me bho Gotama purato aggi jaleyya,||
jāneyyāhaɱ:|| ||

'Ayaɱ me purato aggi jalatī'" ti.|| ||

"Sace pana taɱ Vaccha evaɱ puccheyya:|| ||

'Yo te ayaɱ purato aggi jalati,||
ayaɱ aggi kiɱ paṭicca jalatī' ti?|| ||

Evaɱ puṭṭho tvaɱ Vaccha||
kinti vyākareyyāsī" ti?|| ||

"Sace maɱ bho Gotama evaɱ puccheyya:|| ||

'Yo te ayaɱ purato aggi jalati,||
ayaɱ aggi kiɱ paṭicca jalatī' ti.|| ||

Evaɱ puṭṭho ahaɱ bho Gotama evaɱ vyākareyyaɱ:|| ||

'Yo me ayaɱ purato aggi jalati,||
ayaɱ aggi tiṇakaṭṭh'ūpādānaɱ paṭicca jalatī'" ti.|| ||

"Sace te Vaccha purato so aggi nibbāyeyya,||
jāneyyāsi tvaɱ:|| ||

'Ayaɱ me purato aggi nibbuto'" ti?|| ||

"Sace me bho Gotama purato so aggi nibbāyeyya,||
jāneyyāhaɱ|| ||

'Ayaɱ me purato aggi nibbuto'" ti.|| ||

"Sace pana taɱ Vaccha evaɱ puccheyya:|| ||

'Yo te ayaɱ purato aggi nibbuto||
so aggi ito katamaɱ disaɱ gato,||
puratthimaɱ vā||
pacchimaɱ vā||
uttaraɱ vā||
dakkhiṇaɱ vā' ti?|| ||

Evaɱ puṭṭho tvaɱ Vaccha kinti vyākareyyāsī" ti?|| ||

"Na upeti bho Gotama.|| ||

Yaɱ hi so Gotama aggi tiṇakaṭṭhūpādānaɱ paṭicca ajali,||
tassa ca pariyādānā aññassa ca anupahārā an-āhāro nibbuto t'eva saŋkhaɱ gacchatī" ti.|| ||

"Evam eva kho Vaccha yena rūpena Tathāgataɱ paññā-payamāno paññā-peyya,||
taɱ rūpaɱ Tathāgatassa pahīnaɱ ucchinna-mūlaɱ||
tāla-vatthu-kataɱ||
anabhāva-kataɱ||
āyatiɱ||
anuppāda-dhammaɱ.|| ||

Rūpa-saŋkhā-vimutto kho Vaccha Tathāgato,||
gambhīro appameyyo duppariyogāho||
seyyathā pi mahā-samuddo,||
'upapajjatī' ti na upeti,||
'na upapajjatī' ti na upeti,||
[488] 'uppajjati ca na ca upapajjatī' ti na upeti,||
'n'eva uppajjati na nūpapajjatī' ti na upeti.|| ||

Yāya vedanāya Tathāgataɱ paññāpayamāno paññāpeyya,||
sā vedanā Tathāgatassa pahīnā ucchinna-mūlā tālā-vatthu-katā anabhāva-katā āyatiɱ anuppāda-dhammā.|| ||

Vedanā-saŋkhā-vimutto kho Vaccha Tathāgato||
gambhīro appameyyo duppariyogāho||
seyyathā pi mahā-samuddo,||
'upapajjatī' ti na upeti,||
'na upapajjatī' ti na upeti,||
'uppajjati ca na ca upapajjatī' ti na upeti,||
'n'eva uppajjati nūpapajjatī' ti na upeti.|| ||

Yāya saññāya Tathāgataɱ paññāpayamāno paññāpeyya,||
sā saññā Tathāgatassa pahīnā ucchinna-mūlā tālā-vatthu-katā anabhāva-katā āyatiɱ anuppāda-dhammā.|| ||

Saññā-saŋkhā-vimutto kho Vaccha Tathāgato||
gambhīro appameyyo duppariyogāho||
seyyathā pi mahā-samuddo,||
'upapajjatī' ti na upeti,||
'na upapajjatī' ti na upeti,||
'uppajjati ca na ca upapajjatī' ti na upeti,||
'n'eva uppajjati nūpapajjatī' ti na upeti.|| ||

Ye hi sankhārehi Tathāgataɱ paññāpayamāno paññāpeyya,||
te sankhārā Tathāgatassa pahīnā ucchinna-mūlā tālā-vatthu-katā anabhāva-katā āyatiɱ anuppāda-dhammā.|| ||

Sankhāra-saŋkhā-vimutto kho Vaccha Tathāgato||
gambhīro appameyyo duppariyogāho||
seyyathā pi mahā-samuddo,||
'upapajjatī' ti na upeti,||
'na upapajjatī' ti na upeti,||
'uppajjati ca na ca upapajjatī' ti na upeti,||
'n'eva uppajjati nūpapajjatī' ti na upeti.|| ||

Yena viññāṇena Tathāgataɱ paññāpayamāno paññāpeyya,||
taɱ viññāṇaɱ Tathāgatassa pahīnaɱ ucchinna-mūlaɱ tāla-vatthu-kataɱ anabhāva-kataɱ āyatiɱ anuppāda-dhammaɱ.|| ||

Viññāṇa-saŋkhā-vimutto kho Vaccha Tathāgato||
gambhīro appameyyo duppariyogāho||
seyyathā pi mahā-samuddo,||
'upapajjatī' ti na upeti,||
'na upapajjatī' ti na upeti,||
'uppajjati ca na ca upapajjatī' ti na upeti,||
'n'eva uppajjati nūpapajjatī' ti na upeti" ti.|| ||

Evaɱ vutte Vacchagotto paribbājako Bhagavantaɱ etad avoca:|| ||

"Seyyathā pi bho Gotama gāmassa vā nigamassa vā avidūre mahā-sāḷarukkho,||
tassa aniccatā sākhāpalāsaɱ palujjeyya,||
tacapapaṭikaɱ palujjeyya,||
pheggu palujjeyya,||
so aparena samayena apagata-sākhā-palāso apagata-taca-papaṭiko apagata-phegguko suddho assa sāre patiṭṭhito,||
evam-ev'idaɱ bhoto Gotamassa pāvacanaɱ apagata-sākhāpalāsaɱ apagata-taca-papaṭikaɱ apagata-pheggukaɱ suddhaɱ sāre patiṭṭhitaɱ.|| ||

Abhikkantaɱ bho Gotama!|| ||

Abhikkantaɱ bho Gotama!|| ||

Seyyathā pi bho Gotama nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
andha-kāre [489] vā tela-pajjotaɱ dhāreyya:||
'cakkhu-manto rūpāni dakkhintī' ti,||
evam eva bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

Aggi-Vacchagotta Suttaɱ dutiyaɱ


Contact:
E-mail
Copyright Statement