Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
3. Paribbājaka Vagga

Sutta 80

Vekhanassa Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati||
Jetavane Anāthapiṇḍikassa ārāme.|| ||

Atha kho Vekhanasso paribbājako yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ aṭṭhāsi.|| ||

Eka-m-antaɱ ṭhito kho Vekhanasso paribbājako Bhagavato santike udānaɱ udānesi:|| ||

'Ayaɱ paramo vaṇṇo,||
ayaɱ paramo vaṇṇo' ti.|| ||

'Kiɱ pana tvaɱ Kaccāna, evaɱ vadesi:|| ||

"Ayaɱ paramo vaṇṇo,||
ayaɱ paramo vaṇṇo" ti.|| ||

Katamo Kaccāna, so paramo vaṇṇo' ti?|| ||

"Yasmā, bho Gotama, vaṇṇā añño vaṇṇo uttaritaro vā paṇītataro vā n'atthi,||
so paramo vaṇṇo" ti.|| ||

"Katamo pana so, Kaccāna,||
vaṇṇo yasmā vaṇṇā añño vaṇṇo uttarītaro vā paṇītataro vā n'atthi" ti?|| ||

"Yasmā, bho Gotama, vaṇṇā añño vaṇṇo uttarītaro vā paṇītataro vā n'atthi,||
so paramo vaṇṇo" ti.|| ||

"Dīghā pi kho te esā, Kaccāna, phareyya.|| ||

'Yasmā, bho Gotama, vaṇṇā añño vaṇṇo uttarītaro vā paṇitataro vā n'atthi||
so paramo vaṇṇo' ti vadesi;||
tañ ca vaṇṇaɱ na paññāpesi.|| ||

Seyyathā pi Kaccāna,||
puriso evaɱ vadeyya:|| ||

'Ahaɱ yā imasmiɱ janapade janapadakalyāṇī,||
taɱ icchāmi taɱ kāmemī' ti.|| ||

Tam enaɱ evaɱ vadeyyuɱ:|| ||

'Ambho purisa,||
yaɱ tvaɱ janapadakalyāṇiɱ icchasi kāmesi,||
jānāsi taɱ janapadakalyāṇī:||
khattiyi vā||
brāhmaṇī vā||
vessī vā||
suddi vā' ti?|| ||

Iti puṭṭho 'no' ti vadeyya.|| ||

Tam enaɱ vadeyyuɱ:|| ||

'Ambho purisa,||
yaɱ tvaɱ janapadakalyāṇiɱ icchasi kāmesi,||
janāsi taɱ janapadakalyāṇiɱ:||
evannāmā evaɱgottā iti vā' ti?|| ||

Iti puṭṭho 'no' ti vadeyya.|| ||

Tam enaɱ vadeyyuɱ:|| ||

'Ambho purisa,||
yaɱ tvaɱ janapadakalyāṇiɱ icchasi kāmesi,||
janāsi taɱ janapadakalyāṇiɱ:||
dīghā vā||
rassā vā||
majjhamā vā||
kāḷi vā||
sāmā vā||
maŋguracchavī vā' ti?|| ||

Iti puṭṭho 'no' ti vadeyya.|| ||

Tam enaɱ vadeyyuɱ:|| ||

'Ambho purisa,||
yaɱ tvaɱ janapadakalyāṇiɱ icchasi kāmesi,||
janāsi taɱ janapadakalyāṇiɱ:||
amukasmiɱ gāme vā||
nigame vā||
nagare vā' ti?|| ||

Iti pūṭṭho 'no' ti vadeyya.|| ||

Tam enaɱ evaɱ vadeyyuɱ:|| ||

'Ambho purisa,||
yaɱ tvaɱ na jānāsi na passasi,||
taɱ tvaɱ icchasi kāmesī ti?|| ||

Iti puṭṭho 'Āmā' ti vadeyya.|| ||

Taɱ [41] kiɱ maññasi Kaccāna?|| ||

Nanu evaɱ sante tassa purisassa appāṭihīrakataɱ bhāsitaɱ sampajjatī" ti?|| ||

"Addhā kho, bho Gotama,||
evaɱ sante tassa purisassa appāṭihīrakataɱ bhāsitaɱ sampajjatī" ti.|| ||

"Evam eva kho tvaɱ Kaccāna:|| ||

'Yasmā bhante, vaṇṇā añño vaṇṇo uttarītaro vā paṇītataro vā n'atthi,||
so paramo vaṇṇo' ti vadesi,||
tañ ca vaṇṇaɱ na paññāpesī" ti.|| ||

 


 

"Seyyathā pi bho Gotama,||
maṇi veḷuriyo subho jātimā aṭṭhaɱso suparikammakato paṇḍukambale nikkhitto bhāsati ca tapati ca virocati ca;||
evaɱ vaṇṇo attā hoti arogo param maraṇā" ti.|| ||

 


 

'Taɱ kiɱ maññasi Kaccāna?|| ||

Yo vā maṇi veḷuriyo subho jātimā aṭṭhaɱso suparikammakato paṇḍukambale nikkhitto bhāsati ca tapati ca virocati ca,||
yo vā ratt'andhakāra'timisāyaɱ kimi khajjopaṇako, —||
imesaɱ ubhinnaɱ vaṇṇānaɱ katamo vaṇṇo abhikkantataro ca paṇītataro cā' ti?|| ||

'Yvāyaɱ, bho Gotama, ratt'andhakāra'timisāyaɱ kimi khajjopaṇako,||
ayaɱ imesaɱ ubhinnaɱ vaṇṇānaɱ abhikkantataro ca paṇītataro cā' ti.|| ||

'Taɱ kiɱ maññasi Kaccāna?|| ||

Yo vā ratt'andhakāra'timisāyaɱ kimi khajjopaṇako,||
yo vā ratt'andhakāra'timisāyaɱ telappadipo,||
imesaɱ ubhinnaɱ vaṇṇānaɱ katamo vaṇṇo abhikkantataro ca paṇītataro cā' ti?|| ||

'Yvāyaɱ, bho Gotama,||
ratt'andhakāra'timisāyaɱ telappadīpo,||
ayaɱ imesaɱ ubhinnaɱ vaṇṇānaɱ abhikkantataro ca paṇītataro cā' ti.|| ||

'Taɱ kiɱ maññasi Kaccāna?|| ||

Yo vā ratt'andhakāra'timisāyaɱ telappadipo,||
yo vā ratt'andhakāra'timisāyaɱ mahā aggikkhandho,||
imesaɱ ubhinnaɱ vaṇṇānaɱ katamo vaṇṇo abhikkantataro ca paṇītataro cā' ti?|| ||

'Yvāyaɱ, bho Gotama,||
ratt'andhakāra'timisāyaɱ mahā aggikkhandho,||
ayaɱ imesaɱ ubhinnaɱ vaṇṇānaɱ abhikkantataro ca paṇītataro cā' ti.|| ||

'Taɱ kiɱ maññasi Kaccāna?|| ||

Yo vā ratt'andhakāra'timisāyaɱ mahā aggikkhandho,||
yā vā rattiyā paccūsasamayaɱ [42] viddhe vigata-valāhake deve osadhitārakā,||
imesaɱ ubhinnaɱ vaṇṇānaɱ katamo vaṇṇo abhikkantataro ca paṇītataro cā' ti?|| ||

'Yvāyaɱ bho Gotama,||
rattiyā paccūsasamayaɱ viddhe vigata-valāhake deve osadhītārakā,||
ayaɱ imesaɱ ubhinnaɱ vaṇṇānaɱ abhikkantataro ca paṇītataro cā' ti.|| ||

'Taɱ kiɱ maññasi Kaccāna?|| ||

Yo vā rattiyā paccūsasamayaɱ viddhe vigata-valāhake deve osaditārakā,||
yo vā tadahu'posathe paṇṇarase viddhe vigata-valāhake deve abhido aḍḍharattisamayaɱ cando,||
imesaɱ ubhinnaɱ vaṇṇānaɱ katamo vaṇṇo abhikkantataro ca paṇītataro cā' ti?|| ||

'Yvāyaɱ bho Gotamo,||
tadahu'posathe paṇṇarase viddhe vigata-valāhake deve abhido aḍḍharattisamayaɱ cando,||
ayaɱ imesaɱ ubhinnaɱ vaṇṇānaɱ abhikkantataro ca paṇītataro cā' ti.|| ||

'Taɱ kiɱ maññasi Kaccāna?|| ||

Yo vā tadahu'posathe paṇṇarase viddhe vigata-valāhake deve abhido aḍḍharattisamayaɱ cando,||
yo vā vassānaɱ pacchime māse saradasamaye viddhe vigata-valāhake deve abhido majjhantikasamayaɱ suriyo,||
imesaɱ ubhinnaɱ vaṇṇānaɱ katamo vaṇṇo abhikkantataro ca paṇītataro cā' ti?|| ||

'Yvāyaɱ, bho Gotama,||
vassānaɱ pacchime māse saradasamaye viddhe vigata-valāhake deve abhido majjhantikasamayaɱ suriyo,||
ayaɱ imesaɱ ubhinnaɱ vaṇṇānaɱ abhikkantataro ca paṇītataro cā' ti.|| ||

'Ato kho te, Kaccāna,||
bahūhi bahutarā devā,||
ye imesaɱ candima-suriyānaɱ ābhā nānubhonti,||
tyāhaɱ pajānāmi.|| ||

Atha ca panāhaɱ na vadāmi:|| ||

"Yasmā vaṇṇā añño vaṇṇo uttaritaro vā paṇītataro cā n'atthi" ti.|| ||

Atha ca pana tvaɱ, Kaccāna:||
"Yvāyaɱ vaṇṇo kiminā khajjopaṇakena hīnataro ca patikiṭṭhataro ca,||
so paramo vaṇṇo ti vadesi;||
tañ ca vaṇṇaɱ na paññāpesī ti.|| ||

Pañca kho ime Kaccāna, kāmaguṇā.|| ||

Katame pañca?|| ||

Cakkhuviññeyyā rūpā iṭṭhā kantā manāpā piyarūpā kāmūpasaɱhitā rajanīyā.|| ||

Sotaviññeyyā saddā iṭṭhā kantā manāpā piyarūpā kāmūpasaɱhitā rajanīyā.|| ||

Ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā.|| ||

Jivhāviññeyyā rasā iṭṭhā kantā manāpā piyarūpā kāmūpasaɱhitā rajanīyā.|| ||

Kāyaviññeyyā phoṭṭhabbā [43] iṭṭhā kantā manāpā piyarūpā kāmūpasaɱhitā rajanīyā.|| ||

Ime kho kacchāna, pañca kāmaguṇā.|| ||

Yaɱ kho, Kaccāna,||
ime pañca kāmaguṇe paṭicca uppajjati sukhaɱ somanassaɱ,||
idaɱ vuccati kāmasukhaɱ.|| ||

Iti kāmehi kāmasukhaɱ,||
kāmasukhā kāmaggasukhaɱ tattha aggam akkhāyatī' ti.|| ||

Evaɱ vutte Vekhanasso paribbājako Bhagavantaɱ etad avoca:|| ||

'Acchariyaɱ bho Gotama,||
abbhutaɱ bho Gotama,||
yāva subhāsitaɱ c'idaɱ bhotā Gotamena: —|| ||

"Kāmehi kāmasukhaɱ,||
kāmasukhā kāmaggasukhaɱ tattha aggam akkhāyatī" ti.|| ||

'Dujjānaɱ kho etaɱ, Kaccāna,||
tayā aññadiṭṭhikena aññakhantikena aññarucikena aññatrayogena aññathācariyakena kāmaɱ vā kāmasukhaɱ vā kāmaggasukhaɱ vā.|| ||

Ye kho te Kaccāna,||
bhikkhū arahanto khīṇāsavā vusitavanto katakaraṇiyā ohitabhārā anuppatta-sadatthā parikkhīṇabhavasaɱyojanā samma-d-aññā-vimuttā,||
te kho etaɱ jāneyyuɱ:

Kāmā vā kāmasukhaɱ vā kāmaggasukhaɱ vā' ti.|| ||

Evaɱ vutte Vekhanasso paribbājako kupito anattamano Bhagavantaɱ yeva khuɱsento Bhagavantaɱ yeva vamhento Bhagavantaɱ yeva vadamāno:|| ||

'Samaṇo ca Gotamo pāpito bhavissa' ti pi Bhagavantaɱ etad avoca:|| ||

'Evam eva pan'idh eke samaṇa-brāhmaṇā ajānantā pubbantaɱ,||
apassantā aparantaɱ,||
atha ca pana:|| ||

"Khiṇā jāti,||
vusitaɱ brahmacariyaɱ,||
kataɱ karaṇiyaɱ||
nāparaɱ itthattāyā ti paṭijānan ti;
tesam idaɱ bhāsitaɱ hassakaɱ yeva sampajjati,||
nāmakaɱ yeva sampajjati,||
rittakaɱ yeva sampajjati,||
tucchakaɱ yeva sampajjatī' ti.|| ||

Yo kho te Kaccāna,||
samaṇa-brāhmaṇā ajānantā pubban- [44] taɱ apassantā aparantaɱ:|| ||

Khīṇā jāti,||
vusitaɱ brahmacariyaɱ,||
kataɱ karaṇīyaɱ||
nāparaɱ itthattāyāni pajānāmā ti paṭijānanti,||
tesaɱ so yeva sahadhammiko niggaho hoti.|| ||

Api ca Kaccāna,||
tiṭṭhatu pubbanto,||
tiṭṭhatu aparanto.|| ||

Etu viññū puriso asaṭho amāyāvī ujujātiko:||
aham anusāsāmi,||
ahaɱ dhammaɱ desemi;||
yathānusiṭṭhaɱ tathā paṭipajjamāno na cirass'eva sāmaɱ ñeva ñassati sāmaɱ dakkhiti.|| ||

Evaɱ kira sammā bandhanā vippamokkho hoti yad idaɱ avijjābandhanā.|| ||

Seyyathā pi Kaccāna, daharo kumāro mando uttānaseyyako kaṇṭhapañcamehi bandhanehi baddho assa sutta-bandhanehi;||
tassa vuddhim anvāya indriyānaɱ paripākam anvāya tāni bandhanāni mucceyyuɱ;||
so mokkho'mhī ti kho jāneyya no ca bandhanaɱ; —|| ||

Evam eva kho Kaccāna,||
etu viññū puriso asaṭho amāyāvi ujujātiko:|| ||

Aham anusāsāmi,||
ahaɱ dhammaɱ desemi.|| ||

Yathānusiṭṭhaɱ tathā paṭipajjamāno na cirass'eva sāmaɱ ñeva ñassati sāmaɱ dakkhiti.|| ||

Evaɱ kira sammā bandhanā vippamokkho hotī yad idaɱ avijjābandhanā' ti.|| ||

Evaɱ vutte Vekhanasso paribbājako Bhagavantaɱ etad avoca:|| ||

'Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya,||
paṭicchannaɱ vā vīvareyya,||
mūḷhassa vā maggaɱ ācikkheyya||
'andhakāre vā telapajjotaɱ dhāreyya,'||
cakkhumanto rūpāni dakkhintī' ti,||
evam evaɱ bhotā Gotamena aneka-pariyāyena dhammo pakāsito.|| ||

Esāhaɱ bhavantaɱ Gotamaɱ saraṇaɱ gacchāmi dhammañca bhikkhu-saŋghañ ca.|| ||

Upāsakaɱ maɱ bhavaɱ Gotamo dhāretu ajjatagge pāṇupetaɱ saraṇaŋgatanti.

Vekhanasssuttaɱ dasamaɱ


 

Contact:
E-mail
Copyright Statement   Webmaster's Page