Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
4. Rāja Vagga

Sutta 83

Makhādeva Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ|| ||

Ekaɱ samayaɱ Bhagavā mithilāyaɱ viharati makhādevambvane.|| ||

2. Atha kho Bhagavā aññatarasmiɱ padese sitaɱ pātvākāsi. Atha kho āyasmato Ānandassa etad ahosi: ko nu kho hetu, ko paccayo Bhagavato sitassa pātukammāya, na akāraṇe Tathāgatā sitaɱ pātukarontī' ti. Atha kho āyasmā Ānando ekaɱsaɱ cīvaraɱ katvā yena Bhagavā tenañjalimpaṇāmetvā Bhagavantaɱ etad avoca: ko nu kho bhante, hetu ko paccayo Bhagavato sitassa pātukammāya? Na akāraṇe Tathāgatā sitaɱ pātukarontī' ti.|| ||

3. Bhūtapubbaɱ Ānanda, imissāyeva mithilāya rājā ahosi makhādevo nāma dhammiko dhammarājā dhamme ṭhito Mahārājā dhammaɱ carati brāhmaṇagahapatikesu negamesu ce pi jānapadesu ca. Uposathañca upavasati cātuddasiɱ pañcadasiɱ aṭṭhamiñca pakkhassa.|| ||

4. Atha kho Ānanda, rājā makhādevo bahunnaɱ vassānaɱ bahunnaɱ vassasatānaɱ bahunnaɱ vassasahassānaɱ accayena kappakaɱ āmantesi: yadā me samma kappaka, passeyyāsi sirasmiɱ palitāni jātāni, atha me āroceyyāsī' ti. Evaɱ devā ti kho Ānanda, kappako rañño makhādev'assa paccassosi. Addasā kho Ānanda, kappako bahunnaɱ vassānaɱ bahunnaɱ vassasatānaɱ bahunnaɱ vassasahassānaɱ accayena rañño makhādev'assa sirasmiɱ palitāni jātāni. Disvāna rājānaɱ makhādevaɱ etad avoca: pātubhūtā kho dev'assa devadūtā, dissanti sirasmiɱ palitāni jātānī' ti. Tena hi samma kappaka, tāni palitāni sādhukaɱ saṇḍāsena uddharitvā mama añjalismiɱ patiṭṭhāpehīti. Evaɱ devā ti kho Ānanda, kappako rañño makhādev'assa paṭissutvā tāni palitāni sādhukaɱ saṇḍāsena uddharitvā rañño makhādev'assa añjalismiɱ patiṭṭhāpesi.||
Atha kho Ānanda, rājā makhādevo kappakassa gāmavaraɱ datvā jeṭṭhaputtaɱ kuMāraɱ āmantāpetvā etad avoca: pātubhūtā kho me tāta kumāra devadūtā, dissanti sirasmiɱ palitāni jātāni, bhuttā kho pana me mānusakā kāmā, samayo dibbe kāme pariyesituɱ. Ehi tvaɱ tāta kumāra, imaɱ rajjaɱ paṭipajja, ahaɱ pana kesamassuɱ ohāretvā kāsāyāni vatthāni acchādetvā agārasmā anagāriyaɱp abbajissāmi. Tena hi tāta kumāra, yadā tvampi passeyyāsi sirasmiɱ palitāni jātāni, atha kappakassa gāmavaraɱ datvā jeṭṭhaputtaɱ kuMāraɱ sādhukaɱ rajje samanusāsitvā kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyāsi.||
Yena me idaɱ kalyāṇaɱ vaṭṭaɱ nihitaɱ anuppavatteyyāsi. Mā kho me tvaɱ antimapuriso ahosi. Yasmiɱ kho tāta kumāra, purisayuge vattamāne evarūpassa kālyāṇassa vaṭṭassa samucchedo hoti, so tesaɱ antimapuriso hoti. Taɱ tāhaɱ tāta kumāra, evaɱ vadāmi: 'yena me idaɱ kalyāṇaɱ vaṭṭaɱ nihitaɱ anuppavatteyyāsi, mā kho me tvaɱ antimapuriso ahosī' ti.|| ||

5. Atha kho Ānanda, rājā makhādevo kappakassa gāmavaraɱ datvā jeṭṭhaputtaɱ kuMāraɱ sādhukaɱ rajje samanusāsitvā imasmiɱyeva makhādevAmbavane kesamassuɱ ohāretvā kāsāyāni vatthāni acchādetvā agārasmā anagāriyaɱ pabbaji. So mettā-sahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjhena pharitvā vihāsi. 3Karuṇāsahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjhena pharitvā vihāsi. 4Muditāsahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjhena pharitvā vihāsi. 5Upekkhāsahagatena cetasā ekaɱ disaɱ pharitvā vihāsi. Tathā dutiyaɱ,tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjhena pharitvā vihāsi.|| ||

6. Rājā kho panĀnanda, makhādevo caturāsītivassasahassāni kumārakīḷitaɱ kī'i, caturāsītivassasahassāni oparajjaɱ kāresi, caturāsīti vassasahassāni rajjaɱ kāresi, caturāsītivassasahassāni imasmiɱ yeva makhādevAmbavane agārasmā anagāriyaɱ pabbajito brahmacariyaɱ cari. So cattāro brahmavihāre bhāvetvā kāyassa bhedā param maraṇā brahmalokūpago ahosi.|| ||

7. Atha kho Ānanda, rañño makhādev'assa putto bahunnaɱ vassānaɱ bahunnaɱ vassasatānaɱ bahunnaɱ vassasahassānaɱ accayena kappakaɱ āmantesi: 'yadā me samma kappaka, passeyyāsi sirasmiɱ palitāni jātāni. Atha me āroceyyāsī' ti. Evaɱ devā ti kho Ānanda, kappako rañño makhādev'assa puttassa paccassosi. Addasā kho Ānanda, kappako bahunnaɱ vassānaɱ bahunnaɱ vassasatānaɱ bahunnaɱ vassasahassānaɱ accayena rañño makhādev'assa puttassa sirasmiɱ palitāni jātāni, disvāna rañño makhādev'assa puttaɱ etad avoca: 'pātubhūtā kho dev'assa devadūtā, dissanti sirasmiɱ [77] palitāni jātānī' ti. Tena hi samma kappaka, tāni palitāni sādhukaɱ saṇḍāsena uddharitvā mama añjalismiɱ patiṭṭhāpehī' ti. Evaɱ devā ti kho ananda, kappako rañño makhādev'assa puttassa paṭissutvā tāni palitāni sādhukaɱ saṇḍāsena uddharitvā rañño makhādev'assa añjalismiɱ patiṭṭhāpesi.||
Atha kho Ānanda, rañño makhādev'assa putto kappakassa gāmavaraɱ datvā jeṭṭhaputtaɱ kuMāraɱ āmantāpetvā etad avoca: 'pātubhūtā kho me tāta kumāra, devadūtā disnti, sirasmiɱ palitāni jātāni, bhuttā kho pana me mānusakā kāmā, samayo dibbe kāme pariyesituɱ, ehi tvaɱ tāta kumāra, imaɱ rajjaɱ paṭipajja, ahaɱ pana kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajissāmi. Tena hi tāta kumāra, yadā tvampi passeyyasi sirasmiɱ palitāni jātāni, atha kappakassa gāmavaraɱ datvā, jeṭṭhaputtaɱ kuMāraɱ sādhukaɱ rajje samanusāsitvā kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyāsi. Yena me idaɱ kalyāṇaɱ vaṭṭaɱ nihitaɱ anuppavatteyyāsi, mā kho me tvaɱ antimapuriso ahosi. Yasmiɱ kho tāta kumāra, purisayuge vattamāne evarūpassa kalyāṇassa vaṭṭassa samucchedo hoti, so tesaɱ antimapuriso hoti. Taɱ tāhaɱ tāta kumāra, evaɱ vadāmi: yena me idaɱ kalyāṇaɱ vaṭṭaɱ nihitaɱ anuppavatteyyāsi, mā kho me tvaɱ antimapuriso ahosī' ti.|| ||

8. Atha kho Ānanda,rañño makhādevo putto kappakassa gāmavaraɱ datvā jeṭṭhaputtaɱ kuMāraɱ sādhukaɱ rajje samanusāsitvā imasmiɱyeva makhādevAmbavane kesamassuɱ ohāretvā kāsāyāni vatthāni acchādetvā agārasmā anagāriyaɱ pabbaji. So mettā-sahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ2, iti uddham-adho tiriyaɱ sabbadhi sabbattatāya1 sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjhena pharitvā vihāsi, karuṇā-sahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjhena pharitvā vihāsi, muditā-sahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ2, iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjhena pharitvā vihāsi, upekkhā-sahagatena cetasā ekaɱ disaɱ pharitvā vihāsi. Tathā dutiyaɱ,tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjhena [78] pharitvā vihāsi.|| ||

9. Rañño kho panĀnanda, makhādev'assa putto caturāsītivassasahassāni kumāraki'itaɱ kī'i, caturāsītivassasahassāni oparajjaɱ kāresi, caturāsītivassasahassāni rajjaɱ kāresi, caturāsītivassasahassāni imasmiɱyeva makhādevAmbavane agārasmā anagāriyaɱ pabbajito brahmacariyaɱ cari. So cattāro brahmavihāre bhāvetvā kāyassa bhedā param maraṇā brahmalokūpago ahosi.|| ||

10. Rañño kho panĀnanda, makhādev'assa puttappaputtakā. Tassa paramparā caturāsītikhattiyasahassāni imasmiɱyeva makhādevAmbavane kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajiɱsu. Te mettā-sahagatena cetasā ekaɱ disaɱ pharitvā vihariɱsu. Tathā dutiyaɱ tathā tatiyaɱ, tathā catutthiɱ. Iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjhena eritvā vihariɱsu. Karuṇāsahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjhena pharitvā vihāsi, muditā-sahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ2, iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjhena pharitvā vihāsi, upekkhā-sahagatena cetasā ekaɱ disaɱ pharitvā vihariɱsu.||
Tathā dutiyaɱ, tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjhena pharitvā vihariɱsu.|| ||

10. "The descendants of King Makhādeva's son to the number of eighty-four thousand kings in succession, after shaving off their hair and beard and putting on the yellow robe, went forth from the home life into homelessness in this Makhādeva Mango Grove. They abided pervading one quarter with a mind imbued with loving-kindness ... with compassion ... with altruistic joy ... with equanimity ... without ill will.|| ||

11. Te caturāsītivassasahassāni kumāraki'itaɱ kī'iɱsu, caturāsītivassasahassāni oparajjaɱ1 kāresuɱ, caturāsītivassasahassāni rajjaɱ kāresuɱ, caturāsītivassasahassāni imasmiɱyeva makhādevAmbavane agārasmā anagāriyaɱ pabbajitā brahmacariyaɱ cariɱsu. Te cattāro brahmavihāre bhāvetvā kāyassa bhedā param maraṇā brahmalokūpagā ahesuɱ.|| ||

12. Nimi tesaɱ rājānaɱ pacchimako ahosi dhammiko dhammarājā, dhamme ṭhito Mahārājā dhammaɱ carati brāhmaṇagahapatikesu negamesu c'eva jānapadesu ca, uposathañca upavasati cātuddasiɱ pañcadasiɱ aṭṭhamiñca pakkhassa.|| ||

13. Bhūtapubbaɱ Ānanda, devānaɱ Tāvatiɱsānaɱ [79] sudhammāyaɱ sabhāyaɱ sannisinnānaɱ sannipatitānaɱ ayamantarā kathā udapādi: 'lābhā vata bho videhānaɱ, suladdhaɱ vata3 bho videhānaɱ. Yesaɱ nimirājā dhammiko dhammarājā dhamme ṭhito Mahārājā dhammaɱ carati brāhmaṇagahapatikesu negamesu c'eva jānapadesu ca, uposathañca upavasati cātuddasiɱ pañcadasiɱ aṭṭhamiñca pakkhassāti.|| ||

Atha kho Ānanda, Sakko devānaɱ indo deve Tāvatiɱse āmantesi: 'iccheyyātha no tumhe mārisā, nimiɱ rājānaɱ daṭṭhu'nti. Icchāma mayaɱ mārisa, nimiɱ rājānaɱ daṭṭhunti. Tena kho pana samayena nimi rājā tadahuposathe pannarase sasīsaɱ nahāto4 uposathiko upari pāsādavaragato nisinno hoti. Atha kho Ānanda, Sakko devānaɱ indo seyyathā pi nāma balavā puriso sammiñjitaɱ vā bāhaɱ pasāreyya pasāritaɱ vā bāhaɱ sammiñjeyya, evam evaɱ devesu Tāvatiɱsesu antarahito nimissa rañño pamukhe5 pātu-r-ahosi. Atha kho Ānanda, Sakko devānaɱ indo nimiɱ rājānaɱ etad avoca: 'lābhā te mahārāja,suladdhaɱ te mahārāja, devā te mahārāja Tāvatiɱsāsudhammāya sabhāyaɱ kittayamānarūpā sannisinnā: 'lābhā vata bho videhānaɱ, suladdhaɱ vata bho videhānaɱ yesaɱ nimi rājā dhammiko dhammarājā dhamme ṭhito Mahārājā dhammaɱ carati brāhmaṇagahapatikesu negamesu c'eva jānapadesu ca, uposathañca upavasati cātuddasiɱ pañcadasiɱ aṭṭhamiñca pakkhassā' ti. Devā te mahārāja, Tāvatiɱsā dassanakāmā, tassa te ahaɱ mahārāja, sahassayuttaɱ ājaññarathaɱ pahiṇissāmi, abhiruheyyāsi mahārāja, dibbaɱ yānaɱ avikampamāno' ti.||
Adhivāsesi kho Ānanda,nimirājā tuṇhī-bhāvena. Atha kho Ānanda, Sakko devānaɱ indo nimissa rañño adhivāsanaɱ viditvā seyyathā pi nāma balavā puriso sammiñjitaɱ vā bāhaɱ pasāreyya, pasāritaɱ vā bāhaɱ sammiñjeyya. Evam evaɱ nimissa rañño pamukhe antarahito devesu Tāvatiɱsesu pātu-r-ahosi.|| ||

14. Atha kho Ānanda, Sakko devānaɱ indo mātalisaŋgāhakaɱ āmantesi: ehi tvaɱ samma mātali, sahassayuttaɱ ājaññarathaɱ yojetvā nimiɱ rājānaɱ upasaŋkamitvā evaɱ vadesi: 'ayaɱ te mahārāja, sahassayutto ājaññaratho Sakkena devānam indena pesito. Abhirubheyyāsi mahārāja, dibbaɱ [80] yānaɱ avikampamāno' ti. Evaɱ bhaddantavāti kho Ānanda, mātali saŋgāhako sakkassa devānamindassa paṭissutvā sahassayuttaɱ ājañññarathaɱ yojetvā nimiɱ rājānaɱ upasaŋkamitvā etad avoca: 'ayaɱ te mahārāja sahassayutto ājañññaratho Sakkena devānam indena pesito, abhiruha mahārāja, dibbaɱ yānaɱ avikampamāno. Api ca mahārāja, katamena taɱ nemi, yena vā pāpakammā pāpakānaɱ kammānaɱ vipākaɱ paṭisaŋvedenti, yena vā kalyāṇakammā kalyāṇānaɱ kammānaɱ vipākaɱ paṭisaŋvedentī'ti? Ubhayen'eva maɱ mātali nehīti.|| ||

15. Sampāpesi kho Ānanda, mātalisaŋgāhako nimiɱ rājānaɱ sudhammaɱ sabhaɱ. Addasā kho Ānanda, Sakko devānaɱ indo nimiɱ rājānaɱ dūrato va āgacchantaɱ, disvāna nimiɱ rājānaɱ etad avoca: Ehi kho mahārāja, svāgataɱ mahārāja, devā te mahārāja, Tāvatiɱsā sudhammāyaɱ sabhāyaɱ kittayamānarūpā sannisinnā, 'lābhā vata bho videhānaɱ, suladdhaɱ vata bho videhānaɱ, yesaɱ nimi rājā dhammiko dhammarājā dhamme ṭhito Mahārājā dhammaɱ carati brāhmaṇagahapatikesu negamesu c'eva jānapadesu ca. Uposathañca upavasati cātuddasiɱ pañcadasiɱ aṭṭhamiñca pakkhassā' ti. Devā te mahārāja, Tāvatiɱsā dassanakāmā, abhirama mahārāja, devesu devānubhāvenāti.||
Alaɱ mārisa, tatth'eva maɱ mithilaɱ paṭinetu. Tatthāhaɱ dhammaɱ carissāmi brāhmaṇagahapatikesu negamesu c'eva jānapadesu ca, uposathañca upavasissāmi cātuddasiɱ pañcadasiɱ aṭṭhamiñca pakkhassāti.

16. Atha kho ananda, Sakko devānaɱ indo mātali saŋgāhakaɱ āmantesi: ehi tvaɱ samma mātali, sahassayuttaɱ ājaññarathaɱ yojetvā nimiɱ rājānaɱ tatth'eva mitilaɱ paṭinehīti. Evaɱ bhaddantavāti kho Ānanda, mātalisaŋgāhako sakkassa devānamindassa paṭissutvā sahassayuttaɱ ājaññarathaɱ yojetvā nimiɱ rājānaɱ tatth'eva mithilaɱ paṭinesi.||
Tatra sudaɱ Ānanda, nimirājā dhammaɱ carati brāhmaṇagahapatikesu negamesu c'eva jānapadesu ca, uposathañca [81] upavasati cātuddasiɱ pañcadasiɱ aṭṭhamiñca pakkhassa.|| ||

17. Atha kho Ānanda, nimirājā bahunnaɱ vassasahassānaɱ accayena kappakaɱ āmantesi, 'yadā me samma kappaka, passeyyāsi sirasmiɱ palitāni jātāni, atha me āroceyyāsī' ti. Evaɱ devā ti kho Ānanda, kappako nimissa rañño paccassosi. Addasā kho Ānanda, kappako bahunnaɱ vassānaɱ bahunnaɱ vassasatānaɱ bahunnaɱ vassasahassānaɱ accayena nimissa rañño sirasmiɱ palitāni jātāni, disvāna nimiɱ rājānaɱ etad avoca: pātubhūtā kho dev'assa devadūtā, dissanti sirasmiɱ palitāni jātānī' ti. Tena hi samma kappaka,tāni palitāni sādhukaɱ saṇḍāsena uddharitvā mama añjalismiɱ patiṭṭhāpehī' ti. Evaɱ devā ti kho Ānanda, kappako nimissa rañño paṭisutvā tāni palitāni sādhukaɱ saṇḍāsena uddharitvā nimissa rañño añjalismiɱ patiṭṭhāpesi. Atha kho Ānanda, nimi rājā kappakassa gāmavaraɱ datvā jeṭṭhaputtaɱ kuMāraɱ āmantāpetvā etad avoca: 'pātubhūtā kho me tāta kumāra, devadūtā, dissanti sirasmiɱ palitāni jātāni, bhuttā kho pana me mānusakā kāmā, samayo dibbe kāme pariyesituɱ. Ehi tvaɱ tāta kumāra, imaɱ rajjaɱ paṭipajja, ahaɱ pana kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajissāmi. Tena hi tāta kumāra, yadā tvampi passeyyāsi sirasmiɱ palitāni jātāni, atha kappakassa gāmavaraɱ datvā jeṭṭhaputtaɱ kuMāraɱ sādhukaɱ rajje samanusāsitvā kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyāsi, yena me idaɱ kalyāṇaɱ vaṭṭaɱ nihitaɱ anuppavatteyyāsi, mā kho me tvaɱ antimapuriso ahosi. Yasmiɱ kho tāta kumāra, purisayuge vattamāne evarūpassa kalyāṇassa vaṭṭassa samucchedo hoti, so tesaɱ antimapuriso hoti. Taɱ tāhaɱ tāta kumāra, evaɱ vadāmi: 'yena me idaɱ kalyāṇaɱ vaṭṭaɱ nihita anuppavatteyyāsi, mā kho me tvaɱ antimapuriso ahosī' ti.|| ||

18. Atha kho Ānanda, rājā makhādevo kappakassa gāmavaraɱ datvā jeṭṭhaputtaɱ kuMāraɱ sādhukaɱ rajje samanusāsitvā imasmiɱyeva makhādevAmbavane kesamassuɱ ohāretvā kāsāyāni vatthāni acchādetvā agārasmā anagāriyaɱ pabbaji. So mettā-sahagatena cetasā ekaɱ disaɱ pharitvā vihāsi. Tathā dutiyaɱ, tathā [82] tatiyaɱ, tathā catutthiɱ2, iti uddham-adho tiriyaɱ sabbadhi sabbattatāya sabbāvantaɱ lokaɱ mettā-sahagatena cetasā vipulena mahaggatena appamāṇena averena avyāpajjhena pharitvā vihāsi, karuṇā-sahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ karuṇā-sahagatena cetasā vipulena mahaggatena appamāṇena averena avyāpajjhena pharitvā vihāsi, muditā-sahagatena cetasā ekaɱ disaɱ pharitvā vihāsi. Tathā dutiyaɱ, tathā tatiyaɱ, tathā catutthiɱ2, iti uddham-adho tiriyaɱ sabbadhi sabbattatāya sabbāvantaɱ lokaɱ muditā-sahagatena cetasā vipulena mahaggatena appamāṇena averena avyāpajjhena pharitvā vihāsi, upekkhā-sahagatena cetasā ekaɱ disaɱ pharitvā vihāsi. Tathā dutiyaɱ,tathā tatiyaɱ, tathā catutthiɱ, iti uddham-adho tiriyaɱ sabbadhi sabbattatāya sabbāvantaɱ lokaɱ upekkhā-sahagatena cetasā vipulena mahaggatena appamāṇena averena avyāpajjhena pharitvā vihāsi.|| ||

19. Nimi kho panĀnanda, rājā caturāsītivassasahassāni kumārakīḷitaɱ kī'i, caturāsītivassasahassāni oparajjaɱ kāresi, caturāsītivassasahassāni rajjaɱ kāresi, caturāsīti vassasahassāni imasmiɱyeva makhādevAmbavane agārasmā anagāriyaɱ pabbajito brahmacariyaɱ cari. So cattāro brahmavihāre bhāvetvā kāyassa bhedā param maraṇā brahmalokūpago ahosi.|| ||

20. Nimissa kho panĀnanda, rañño kalārajanako nāma putto ahosi. So na agārasmā anagāriyaɱ pabbaji. So taɱ kalyāṇaɱ vaṭṭaɱ samucchindi. So tesaɱ antimapuriso ahosi.|| ||

21. Siyā kho pana te Ānanda, evam assa: añño nūna tena samayena rājā makhādevo ahosi yena taɱ kalyāṇaɱ vaṭṭaɱ nihitanti. Na kho pan'etaɱ Ānanda, evaɱ daṭṭhabbaɱ. Ahaɱ tena samayena rājā makhādevo ahosiɱ., Ahaɱ taɱ kalyāṇaɱ vaṭṭaɱ nihiniɱ mayā taɱ kalyāṇaɱ vaṭṭaɱ nihitaɱ pacchimā janatā anuppavattesi. Taɱ kho panĀnanda, kalyāṇaɱ vaṭṭaɱ na nibbidāya na virāgāya na nirodhāya na upasamāya na abhiññāya na sambodhāya na nibbānāya saɱvattati, yāvad eva brahmalokūpapattiyā. Idaɱ kho panĀnanda, etarahi mayā kalyāṇaɱ vaṭṭaɱ nihitaɱ ekantanibbidāya virāgāya nirodhāya upasamāya abhiññāya sambodhāya nibbānāya saɱvattati. Katamā cĀnanda,etarahi mayā kalyāṇaɱ vaṭṭaɱ nihitaɱ ekantanibbidāya virāgāya nirodhāya upasamāya abhiññāya sambodhāya nibbānāya saɱvattati: ayameva ariyo aṭṭhaŋgiko maggo. Seyyathīdaɱ: sammādiṭṭhi sammāsaŋkappo sammāvācā sammākammanto sammāājivo [83] sammāvāyāmo sammāsati sammāsamādhi. Idaɱ kho Ānanda, etarahi mayā kalyāṇaɱ vaṭṭaɱ nihitaɱ ekkanta nibbidāya virāgāya nirodhāya upasamāya abhiññāya sambodhāya nibbānāya saɱvattati. Taɱ kho ahaɱ Ānanda, evaɱ vadāmi: yena me idaɱ kalyāṇaɱ vaṭṭaɱ nihitaɱ anuppavatteyyātha. Mā kho me tumhe antimasurisā ahuvattha. Yasmiɱ kho Ānanda, purisayuge vattamāne evarūpassa kalyāṇassa vaṭṭassa samucchedo hoti, so tesaɱ antimapuriso hoti. Taɱ vo ahaɱ Ānanda, evaɱ vadāmi: yena me idaɱ kalyāṇaɱ vaṭṭaɱ nihitaɱ anuppavatteyyātha. Mā kho me tumhe antimapurisā ahuvatthā' ti.|| ||

Idam avoca Bhagavā attamano āyasmā Ānando Bhagavato bhāsitaɱ abhinanditi.|| ||

Makhādevasuttaɱ tatiyaɱ


 

Contact:
E-mail
Copyright Statement   Webmaster's Page