Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
4. Rāja Vagga

Sutta 84

Madhura Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][chlm-2][pts][upal] Evaɱ me sutaɱ:|| ||

Ekaɱ samayaɱ āyasmā Mahā Kaccāno Madhurāyaɱ viharati Gundāvane.|| ||

Assosi kho rājā Mādhuro Avantiputto:||
samaṇo khalu,||
bho, Kaccāno Madhurāyaɱ viharati Gundāvane.|| ||

Taɱ kho pana bhavantaɱ Kaccānaɱ evaɱ kalyāṇo kittisaddo abbhuggato:|| ||

'Paṇḍito vyatto medhāvī bahussuto cittakathi kalyāṇapaṭibhāno vuddho c'eva arahā ca;||
sādhu kho pana tathārūpānaɱ arahataɱ dassanaɱ hotī' ti.|| ||

Atha kho rājā Mādhuro Avantiputto bhadrāni bhadrāni yānāni yojāpetvā bhadraɱ yānaɱ abhiruhitvā bhadrehi bhadrehi yānehi Madhurāya niyyāsi mahaccarājānubhāvena āyasmantaɱ Mahā Kaccānaɱ dassanāya;||
yāvatikā yānassa bhūmi yānena gantvā yānā paccorohitvā pattiko va yen'āyasmā Mahā Kaccāno ten'upasaŋkami.|| ||

Upasaŋkamitvā [84] āyasmatā Mahā Kaccānena saddhiɱ sammodi,||
sammodanīyaɱ kathaɱ sārāṇiyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho rājā Mādhuro Avantiputto āyasmantaɱ Mahā Kaccānaɱ etad avoca:|| ||

"Brāhmaṇā bho Kaccāna, evam āhaɱsu:|| ||

Brāhmaṇā va seṭṭho vaṇṇo, hīno añño vaṇṇo.|| ||

Brāhmaṇā va sukko vaṇṇo, kaṇho añño vaṇṇo.|| ||

Brāhmaṇā va sujjhanti, no abrāhmaṇā.|| ||

Brāhmaṇā va Brahmuno puttā orasā mukhato jātā Brahmajā Brahmanimmitā Brahmadāyādā" ti.|| ||

Idha bhavaɱ Kaccāno kim āhā ti?|| ||

Ghoso yeva kho eso, mahārāja, lokasmiɱ:|| ||

Brāhmaṇā va seṭṭho vaṇṇo, hīno añño vaṇṇo.|| ||

Brāhmaṇā va sukko vaṇṇo, kaṇho añño vaṇṇo.|| ||

Brāhmaṇā va sujjhanti, no abrāhmaṇā.|| ||

Brāhmaṇā va Brahmuno puttā orasā mukhato jātā Brahmajā Brahmanimmitā Brahmadāyādā" ti.|| ||

Tad aminā p'etaɱ mahārāja,||
pariyāyena veditabbaɱ,||
yathā ghoso yev'eso lokasmiɱ:|| ||

Brāhmaṇā va seṭṭho vaṇṇo, hīno añño vaṇṇo.|| ||

Brāhmaṇā va sukko vaṇṇo, kaṇho añño vaṇṇo.|| ||

Brāhmaṇā va sujjhanti, no abrāhmaṇā.|| ||

Brāhmaṇā va Brahmuno puttā orasā mukhato jātā Brahmajā Brahmanimmitā Brahmadāyādā" ti.|| ||

Taɱ kiɱ maññasi mahārāja?|| ||

Khattiyassa ce pi ijjheyya dhanena vā dhaññena vā rajatena vā jātarūpena vā,||
khattiyo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
brāhmaṇo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
vesso pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
suddo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī ti|| ||

Khattiyassa ce pi bho Kaccāna,||
ijjheyya dhanena vā dhaññena vā rajatena vā jātarūpena vā,||
khattiyo pi'ssāssa pubbuṭṭhāyī pacchānipāti kiŋkārapaṭissāvī manāpacārī piyavādī,||
brāhmaṇo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
vesso pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
suddo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī ti|| ||

Taɱ kiɱ maññasi mahārāja?|| ||

Brāhmaṇassa ce pi ijjheyya dhanena vā dhaññena vā rajatena vā jātarūpena vā,||
brāhmaṇo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
vesso pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
suddo pi [85]'ssāssa pubbuṭṭhāyī pacchānipātī kiŋkārapaṭissāvī manāpacārī piyavādīti||
khattiyo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī ti?|| ||

Brāhmaṇassa ce pi bho Kaccāna, ijjheyya dhanena vā dhaññena vā rajatena vā jātarūpena vā,||
brāhmaṇo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
vesso pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
suddo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādīti||
khattiyo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī ti.|| ||

Taɱ kiɱ maññasi mahārāja?|| ||

Vessassa ce pi ijjheyya dhanena vā dhaññena vā rajatena vā jātarūpena vā,||
vesso pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī,||
suddo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī,||
khattiyo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī,||
brāhmaṇo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī ti?|| ||

Vessassa ce pi bho kacracāna, ijjheyya dhanena vā dhaññena vā rajatena vā jātarūpena vā,||
vessopissā'ssa pubbuṭṭhāyī pacchānipāti kiŋkārapaṭissāvī manāpacārī piyavādī,||
suddo pi'ssāssa pubbuṭṭhāyī pacchānipāti kiŋkārapaṭissāvī manāpacārī piyavādi,||
kattiyopissā'ssa pacchānipāti kiŋkārapaṭissāvī manāpacārī piyavādī,||
brāhmaṇo pi'ssāssa pubbuṭṭhāyī pacchānipāti kiŋkārapaṭissāvī manāpacārī piyavādī ti.|| ||

Taɱ kiɱ maññasi mahārāja?|| ||

Suddassa ce pi ijjheyya dhanena vā dhaññena vā rajatena vā jātarūpena vā,||
suddo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī,||
khattiyo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādi,||
brāhmaṇo pi'ssāssa pubbuṭṭhāyī pacchānipāti kiŋkārapaṭissāvī manāpacārī piyavādī
vesso pi'ssāssa pubbuṭṭhāyī paccānipāti kiŋkārapaṭissāvī manāpacārī piyavādī ti?|| ||

Suddassa ce pi bho kacacāna,||
ijjheyya dhanena vā dhaññena vā rajatena vā jātarūpena vā,||
suddo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī,||
khattiyo pi'ssāssa pubbuṭṭhāyī pacchānipātī kiŋkārapaṭissāvī manāpacārī piyavādī,||
brāhmaṇo pi'ssāssa pubbuṭṭhāyī pacchānipātī kiŋkārapaṭissāvi manāpacārī piyavādī||
vesso pi'ssāssa pubbuṭṭhāyī pacchānipāti kiŋkārapaṭissāvi manāpacārī piyavādī ti.|| ||

Taɱ kiɱ maññasi mahārāja?|| ||

Yadi evaɱ sante, ime cattāro vaṇnā samasamā honti?||
no vā?||
kathaɱ vā te ettha hotī ti?|| ||

[86] Addhā kho bho Kaccāna, evaɱ sante ime cattāro vaṇṇā samasamā honti.|| ||

Na'saɱ ettha kiñci nānākaraṇaɱ samanupassāmī ti.|| ||

Iminā pi kho etaɱ mahārāja,||
pariyāyena veditabbaɱ:||
yathā ghoso yev'eso lokasmiɱ;|| ||

Brāhmaṇā va seṭṭho vaṇṇo, hīno añño vaṇṇo.|| ||

Brāhmaṇā va sukko vaṇṇo, kaṇho añño vaṇṇo.|| ||

Brāhmaṇā va sujjhanti, no abrāhmaṇā.|| ||

Brāhmaṇā va Brahmuno puttā orasā mukhato jātā Brahmajā Brahmanimmitā Brahmadāyādā" ti.|| ||

Taɱ kiɱ maññasi mahārāja?|| ||

Idhāssa khattiyo pāṇātipātī adinnādāyī kāmesu micchācārī musāvādī pisuṇāvāco pharusāvāco samphappalāpī abhijjhālū byāpannacitto micchādiṭṭhi,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjeyya?||
no vā?||
kathaɱ vā te ettha hoti' ti?|| ||

Khattiyo pi hi bho Kaccāna,||
pāṇātipātī adinnādāyī kāmesu micchācārī musāvādī pisuṇāvāco pharusāvāco samphappalāpī abhijjhālū byāpannacitto micchādiṭṭhi,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjeyya.|| ||

Evaɱ me ettha hoti,||
evañ ca pana me etaɱ arahataɱ sutan ti.|| ||

Sādhu sādhu mahārāja,||
sādhu kho te etaɱ mahārāja,||
evaɱ hoti:||
sādhu ca pana te etaɱ arahataɱ sutaɱ.|| ||

Taɱ kiɱ maññasi mahārāja?|| ||

Idhāssa brāhmaṇo pāṇātipātī adinnādāyī kāmesu micchācārī musāvādi pisuṇāvāco pharusāvāco samphappalāpī abhijjhālū byāpannacitto micchādiṭṭhi,||
kāyassa bhedā param maraṇā apāyaɱ duggatiɱ vinīpātaɱ Nirayaɱ upapajjeyya?||
no vā?||
kathaɱ vā te ettha hoti' ti?|| ||

Brāhmaṇo pi hi bho Kaccāna,||
pāṇātipātī adinnādāyī kāmesu micchācārī musāvādī pisuṇāvāco pharusāvāco samphappalāpī abhijjhālū byāpannacitto micchādiṭṭhi,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjeyya.|| ||

Evaɱ me ettha hoti,||
evañ ca pana me etaɱ arahataɱ sutan ti.|| ||

Sādhu sādhu mahārāja,||
sādhu kho te etaɱ mahārāja,||
evaɱ hoti:||
sādhu ca pana te etaɱ arahataɱ sutaɱ.|| ||

Taɱ kiɱ maññasi mahārāja?|| ||

Idhāssa vesso pāṇātipātī adinnādāyī kāmesu micchācārī musāvādi pisuṇāvāco pharusāvāco samphappalāpī abhijjhālū byāpannacitto micchādiṭṭhi,kāyassa bhedā param maraṇā apāyaɱ duggatiɱ vinipātaɱ Nirayaɱ upapajjeyya?||
no vā?||
kathaɱ vā te ettha hoti' ti?|| ||

Vesso pi hi bho Kaccāna,||
pāṇātipātī adinnādāyī kāmesu micchācārī musāvādī pisuṇāvāco pharusāvāco samphappalāpī abhijjhālū byāpannacitto micchādiṭṭhi,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjeyya.|| ||

Evaɱ me ettha hoti,||
evañ ca pana me etaɱ arahataɱ sutan ti.|| ||

Sādhu sādhu mahārāja,||
sādhu kho te etaɱ mahārāja,||
evaɱ hoti:||
sādhu ca pana te etaɱ arahataɱ sutaɱ.|| ||

Taɱ kiɱ maññasi mahārāja?|| ||

Idhāssa suddo pāṇātipātī adinnādāyī kāmesumicrachācārī musāvādī pisuṇāvāco pharusāvāco samphappalāpi abhijjhālu byāpannacitto micchādiṭṭhi,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjeyya?||
no vā?||
kathaɱ vā te ettha hotī ti?|| ||

Suddo pi hi bho Kaccāna,||
pāṇātipātī adinnādāyī kāmesu micchācārī musāvādī pisuṇāvāco pharusāvāco samphappalāpī abhijjhālū byāpannacitto micchādiṭṭhi,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjeyya.|| ||

Evaɱ me ettha hoti,||
evañ ca pana me etaɱ arahataɱ sutan ti.|| ||

Sādhu sādhu mahārāja,||
sādhu kho te etaɱ mahārāja,||
evaɱ hoti:||
sādhu ca pana te etaɱ arahataɱ sutaɱ.|| ||

Taɱ kiɱ maññasi mahārāja?|| ||

Yadi evaɱ sante, ime cattāro vaṇnā samasamā honti?||
no vā?||
kathaɱ vā te ettha hotī ti?|| ||

[87] Addhā kho bho Kaccāna,||
evaɱ sante ime cattāro vaṇṇā samasamā honti,||
n'esaɱ ettha kiñci nānākaraṇaɱ samanupassāmī ti.|| ||

Iminā pi kho etaɱ mahārāja,||
pariyāyena veditabbaɱ: yathā ghoso yev'eso lokasmiɱ:|| ||

Brāhmaṇā va seṭṭho vaṇṇo, hīno añño vaṇṇo.|| ||

Brāhmaṇā va sukko vaṇṇo, kaṇho añño vaṇṇo.|| ||

Brāhmaṇā va sujjhanti, no abrāhmaṇā.|| ||

Brāhmaṇā va Brahmuno puttā orasā mukhato jātā Brahmajā Brahmanimmitā Brahmadāyādā" ti.|| ||

Taɱ kiɱ maññasi mahārāja?|| ||

Idhāssa khattiyo pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālū abyāpannacitto sammādiṭṭhi||
kāyassa bhedā param maraṇā sugatiɱ saggaɱ lokaɱ upapajjeyya?||
no vā?||
kathaɱ vā te ettha hotī ti?|| ||

Khattiyo pi hi bho Kaccāna,||
pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālū abyāpannacitto sammādiṭṭhi,||
kāyassa bhedā param maraṇā sugatiɱ saggaɱ lokaɱ upapajjeyya|| ||

Evaɱ me ettha hoti,||
evañ ca pana me etaɱ arahataɱ sutan ti.|| ||

Sādhu sādhu mahārāja,||
sādhu kho te etaɱ mahārāja,||
evaɱ hoti;||
sādhu ca pana te etaɱ arahataɱ sutaɱ.|| ||

Taɱ kiɱmaññasi mahārāja?|| ||

Idhāssa brāmaṇo pāṇātipātā paṭivirato adinnādāna paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālū abyāpannacitto sammādiṭṭhi kāyassa bhedā param maraṇā sugatiɱ saggaɱ lokaɱ upapajjeyya?||
no vā?||
kathaɱ vā te ettha hotī ti?|| ||

Brāmaṇo pi hi bho Kaccāna,||
pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālū abyāpannacitto sammādiṭṭhi,||
kāyassa bhedā param maraṇā sugatiɱ saggaɱ lokaɱ upapajjeyya|| ||

Evaɱ me ettha hoti,||
evañ ca pana me etaɱ arahataɱ sutan ti.|| ||

Sādhu sādhu mahārāja,||
sādhu kho te etaɱ mahārāja,||
evaɱ hoti;||
sādhu ca pana te etaɱ arahataɱ sutaɱ.|| ||

Taɱ kiɱ maññasi mahārāja?|| ||

Idhāssa vesso pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālū abyāpannacitto sammādiṭṭhi kāyassa bhedā param maraṇā sugatiɱ saggaɱ lokaɱ upapajjeyya?||
no vā?||
kathaɱ vā te ettha hotī ti?|| ||

Vesso pi hi bho Kaccāna,||
pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālū abyāpannacitto sammādiṭṭhi,||
kāyassa bhedā param maraṇā sugatiɱ saggaɱ lokaɱ upapajjeyya|| ||

Evaɱ me ettha hoti,||
evañ ca pana me etaɱ arahataɱ sutan ti.|| ||

Sādhu sādhu mahārāja,||
sādhu kho te etaɱ mahārāja,||
evaɱ hoti;||
sādhu ca pana te etaɱ arahataɱ sutaɱ.|| ||

Taɱ kiɱ maññasi mahārāja?|| ||

Idhāssa suddo pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālu abyāpannacitto sammādiṭṭhi,||
kāyassa bhedā param maraṇā sugatiɱ saggaɱ lokaɱ upapajjeyya?||
no vā?||
kathaɱ vā te ettha hotī ti?.|| ||

Suddo pi hi bho Kaccāna,||
pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā1 paṭivirato pharusāvācā paṭivirato samphappalāpā paṭivirato anabhijjhālū abyāpannacitto sammādiṭṭhi,||
kāyassa bhedā param maraṇā sugatiɱ saggaɱ lokaɱ upapajjeyya.|| ||

Evaɱ me ettha hoti,||
evañ ca pana me etaɱ arahataɱ sutan ti.|| ||

Sādhu sādhu mahārāja,||
sādhu kho te etaɱ mahārāja,||
evaɱ hoti;||
sādhu ca pana te etaɱ arahataɱ sutaɱ.|| ||

Taɱ kiɱ maññasi mahārāja?|| ||

Yadi evaɱ sante, ime cattāro vaṇnā samasamā honti?||
no vā?||
kathaɱ vā te ettha hotī ti?|| ||

[88] Addhā kho bho Kaccāna,||
evaɱ sante ime cattāro vaṇṇā samasamā honti.|| ||

Na'saɱ ettha kiñci nānākaraṇaɱ samanupassāmī ti.|| ||

Iminā pi kho etaɱ mahārāja,||
pariyāyena veditabbaɱ:||
yathā ghoso yev'eso lokasmiɱ|| ||

Brāhmaṇā va seṭṭho vaṇṇo, hīno añño vaṇṇo.|| ||

Brāhmaṇā va sukko vaṇṇo, kaṇho añño vaṇṇo.|| ||

Brāhmaṇā va sujjhanti, no abrāhmaṇā.|| ||

Brāhmaṇā va Brahmuno puttā orasā mukhato jātā Brahmajā Brahmanimmitā Brahmadāyādā" ti.|| ||

Taɱ kiɱ maññasi mahārāja?|| ||

Idha khattiyo sandhiɱ vā chindeyya,||
nillopaɱ vā hareyya,||
ekāgārikaɱ vā kareyya,||
paripanthe vā tiṭṭheyya,||
paradāraɱ vā gaccheyya.|| ||

Taɱ ce te purisā gahetvā dasseyyuɱ,||
'ayaɱ te, deva, coro āgucārī.|| ||

Imassa yaɱ icchasi taɱ daṇḍaɱ paṇehī' ti.|| ||

Kinti naɱ kareyyāsī ti?|| ||

Ghāteyyāma vā, bho Kaccāna,||
jāpeyyāma vā,||
pabbājeyyāma vā,||
yathāpaccayaɱ vā kareyyāma.|| ||

Taɱ kissa hetu?|| ||

Yā hi'ssa bho Kaccāna,||
pubbe khattiyo ti samaññā,||
sā'ssa antarahitā,||
coro t'eva saŋkhaɱ gacchatī' ti.|| ||

Taɱ kiɱ maññasi mahārāja?|| ||

Idha brāhmaṇo sandhiɱ vā chindeyya,||
nillopaɱ vā hareyya,||
ekāgārikaɱ vā kareyya,||
paripanthe vā tiṭṭheyya,||
paradāraɱ vā gaccheyya.|| ||

Taɱ ce te purisā gahetvā dasseyyuɱ,||
'ayaɱ te, deva, coro āgucārī|| ||

Imassa yaɱ icchasi taɱ daṇḍaɱ paṇehī' ti.|| ||

Kinti naɱ kareyyāsī ti?|| ||

Ghāteyyāma vā, bho Kaccāna,||
jāpeyyāma vā,||
pabbājeyyāma vā,||
yathāpaccayaɱ vā kareyyāma.|| ||

Taɱ kissa hetu?|| ||

Yā hi'ssa bho Kaccāna,||
pubbe brāhmaṇo ti samaññā,||
sā'ssa antarahitā,||
coro t'eva saŋkhaɱ gacchatī' ti.|| ||

Taɱ kiɱ maññasi mahārāja?|| ||

Idha vesso sandhiɱ vā chindeyya,||
nillopaɱ vā hareyya,||
ekāgārikaɱ vā kareyya,||
paripanthe vā tiṭṭheyya,||
paradāraɱ vā gaccheyya.|| ||

Taɱ ce te purisā gahetvā dasseyyuɱ,||
'ayaɱ te, deva, coro āgucārī.|| ||

Imassa yaɱ icchasi taɱ daṇḍaɱ paṇehī' ti.|| ||

Kinti naɱ kareyyāsī ti?|| ||

Ghāteyyāma vā, bho Kaccāna,||
jāpeyyāma vā,||
pabbājeyyāma vā,||
yathāpaccayaɱ vā kareyyāma.|| ||

Taɱ kissa hetu?|| ||

Yā hi'ssa bho Kaccāna,||
pubbe vesso ti samaññā,||
sā'ssa antarahitā,||
coro t'eva saŋkhaɱ gacchatī' ti.|| ||

Taɱ kiɱ maññasi mahārāja?|| ||

Idha suddo sandhiɱ vā chindeyya,||
nillopaɱ vā hareyya,||
ekāgārikaɱ vā kareyya,||
paripanthe vā tiṭṭheyya,||
paradāraɱ vā gaccheyya.|| ||

Taɱ ce te purisā gahetvā dasseyyuɱ,||
'ayaɱ te, deva, coro āgucārī.|| ||

Imassa yaɱ icchasi, taɱ daṇḍaɱ paṇehī' ti.|| ||

Kinti naɱ kareyyāsī ti?|| ||

Ghāteyyāma vā, bho Kaccāna,||
jāpeyyāma vā,||
pabbājeyyāma vā,||
yathāpaccayaɱ vā kareyyāma.|| ||

Taɱ kissa hetu?|| ||

Yā hi'ssa bho Kaccāna,||
pubbe suddo ti samaññā,||
sā'ssa antarahitā,||
coro t'eva saŋkhaɱ gacchatī' ti.|| ||

Taɱ kiɱ maññasi mahārāja?|| ||

Yadi evaɱ sante, ime cattāro vaṇnā samasamā honti?||
no vā?||
kathaɱ vā te ettha hotī ti?|| ||

Addhā kho bho Kaccāna,||
evaɱ sante ime cattāro vaṇṇā samasamā honti n'esaɱ ettha kiñci nānākaraṇaɱ samanupassāmī ti.|| ||

Iminā pi kho etaɱ mahārāja,||
pariyāyena veditabbaɱ:||
yathā ghoso yev'eso lokasmiɱ:|| ||

Brāhmaṇā va seṭṭho vaṇṇo, [89] hīno añño vaṇṇo.|| ||

Brāhmaṇā va sukko vaṇṇo, kaṇho añño vaṇṇo.|| ||

Brāhmaṇā va sujjhanti, no abrāhmaṇā.|| ||

Brāhmaṇā va Brahmuno puttā orasā mukhato jātā Brahmajā Brahmanimmitā Brahmadāyādā" ti.|| ||

Taɱ kiɱ maññasi mahārāja?|| ||

Idha khattiyo kesamasuɱ ohāretvā kāsāyāni vatthāni acchādetvā agārasmā anagāriyaɱ pabbajito assa,||
virato pāṇātipātā virato adinnādānā virato musā-vādā eka-bhattiko brahmacārī sīlavā kalyāṇa-dhammo.|| ||

Kinti naɱ kareyyāsī ti?|| ||

Abhivādeyyāma vā bho Kaccāna,||
paccuṭṭheyyāma vā āsanena vā nimanteyyāma,||
abhinimanteyyāma pi naɱ cīvara-piṇḍapāta-senāsana-gilāna-paccayabhesajja-parikkhārehi,||
dhammikaɱ vā assa rakkhāvaraṇaguttiɱ saɱvidaheyyāma.|| ||

Taɱ kissa hetu?|| ||

Yā hi'ssa bho Kaccāna,||
pubbe khattiyo ti samaññā,||
sā'ssa antarahitā.|| ||

Samaṇo t'eva saŋkhaɱ gacchatī ti.|| ||

Taɱ kiɱ maññasi mahārāja?|| ||

Idha brāhmaṇo kesamasuɱ ohāretvā kāsāyāni vatthāni acchādetvā agārasmā anagāriyaɱ pabbajito assa,||
virato pāṇātipātā virato adinnādānā virato musā-vādā eka-bhattiko brahmacārī sīlavā kalyāṇa-dhammo.|| ||

Kinti naɱ kareyyāsī ti?|| ||

Abhivādeyyāma vā bho Kaccāna,||
paccuṭṭheyyāma vā āsanena vā nimanteyyāma,
abhinimanteyyāma vā naɱ cīvara-piṇḍapāta-senāsana-gilāna-paccayabhesajja-parikkhārehi,||
dhammikaɱ vā assa rakkhāvaraṇaguttiɱ saɱvidaheyyāma.|| ||

Taɱ kissa hetu?|| ||

Yā hi'ssa bho Kaccāna,||
pubbe brāhmaṇo ti samaññā,||
sā'ssa antarahitā.|| ||

Samaṇo t'eva saŋkhaɱ gacchatī ti.|| ||

Taɱ kiɱ maññasi mahārāja?|| ||

Idha vesso kesamasuɱ ohāretvā kāsāyāni vatthāni acchādetvā agārasmā anagāriyaɱ pabbajito assa,||
virato pāṇātipātā virato adinnādānā virato musā-vādā eka-bhattiko brahmacārī sīlavā kalyāṇa-dhammo.|| ||

Kinti naɱ kareyyāsī ti?|| ||

Abhivādeyyāma vā bho Kaccāna,||
paccuṭṭheyyāma vā āsanena vā nimanteyyāma,||
abhinimanteyyāma vā naɱ cīvara-piṇḍapāta-senāsana-gilāna-paccayabhesajja-parikkhārehi,||
dhammikaɱ vā assa rakkhāvaraṇaguttiɱ saɱvidaheyyāma.|| ||

Taɱ kissa hetu?|| ||

Yā hi'ssa bho Kaccāna,||
pubbe vesso ti samaññā,||
sā'ssa antarahitā.|| ||

Samaṇo t'eva saŋkhaɱ gacchatī ti.|| ||

Taɱ kiɱ maññasi mahārāja?|| ||

Idha suddo kesamasuɱ ohāretvā kāsāyāni vatthāni acchādetvā agārasmā anagāriyaɱ pabbajito assa,||
virato pāṇātipātā virato adinnādānā virato musā-vādā eka-bhattiko brahmacārī sīlavā kalyāṇa-dhammo.|| ||

Kinti naɱ kareyyāsīti?|| ||

Abhivādeyyāma vā bho Kaccāna,||
paccuṭṭheyyāma vā āsanena vā nimanteyyāma,||
abhinimanteyyāma vā naɱ cīvara-piṇḍapāta-senāsana-gilāna-paccayabhesajja-parikkhārehi,||
dhammikaɱ vā assa rakkhāvaraṇaguttiɱ saɱvidaheyyāma.|| ||

Taɱ kissa hetu?|| ||

Yā hi'ssa bho Kaccāna,||
pubbe suddo ti samaññā,||
sā'ssa antarahitā.|| ||

Samaṇo t'eva saŋkhaɱ gacchatī ti.|| ||

Taɱ kiɱ maññasi mahārāja?|| ||

Yadi evaɱ sante, ime cattāro vaṇnā samasamā honti?||
no vā?||
kathaɱ vā te ettha hotī ti?|| ||

Addhā kho bho Kaccāna,||
evaɱ sante ime cattāro vaṇṇā samasamā honti,||
n'esaɱ ettha kiñci nānākaraɱ samanupassāmī ti.|| ||

Iminā pi kho etaɱ mahārāja,||
pariyāyena veditabbaɱ:||
yathā ghoso yev'eso lokasmiɱ|| ||

Brāhmaṇā va seṭṭho vaṇṇo, hīno añño vaṇṇo.|| ||

Brāhmaṇā va sukko vaṇṇo, kaṇho añño vaṇṇo.|| ||

Brāhmaṇā va sujjhanti, no abrāhmaṇā.|| ||

Brāhmaṇā va Brahmuno puttā orasā mukhato jātā Brahmajā Brahmanimmitā Brahmadāyādā" ti.|| ||

[90]Evaɱ vutte rājā Mādhuro Avantiputto āyasmantaɱ Mahā Kaccānaɱ etad avoca:|| ||

Abhikkantaɱ bho Kaccāna,||
abhikkantaɱ bho Kaccāna,||
seyyathā pi bho Kaccāna,||
nikkujjitaɱ vā ukkujjeyya paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya:||
cakkhumanto rūpāni dakkhintī ti.|| ||

Evam evaɱ bhotā kaccānena aneka-pariyāyena dhammo pakāsito,||
esāhaɱ bhavantaɱ Kaccānaɱ saraṇaɱ gacchāmi dhammañ ca bhikkhūsaŋghañ ca,||
upāsakaɱ maɱ bhavaɱ Kaccāno dhāretu ajjatagge pāṇupetaɱ saraṇaɱ gatan ti.|| ||

Mā kho maɱ tvaɱ mahārāja,||
saraṇaɱ agamāsi.|| ||

Tam eva tvaɱ Bhagavantaɱ saraṇaɱ gaccha yam ahaɱ saraṇaɱ gato ti.|| ||

Kahaɱ pana bho Kaccāna,||
etarahi so Bhagavā viharati arahaɱ Sammā-sambuddho ti?|| ||

Parinibbuto kho mahārāja,||
etarahi so Bhagavā arahaɱ Sammā-sambuddho ti.|| ||

Sace hi mayaɱ bho Kaccāna,||
suṇeyyāma taɱ Bhagavantaɱ dasasu yojanesu,||
dasa pi mayaɱ yojanāni gaccheyyāma taɱ Bhagavantaɱ dassanāya arahantaɱ sammāsambuddhaɱ.|| ||

Sace hi mayaɱ bho Kaccāna,||
suṇeyyāma taɱ Bhagavantaɱ vīsatiyā yojanesu,||
tiɱsatiyā yojanesu,||
cattālīsāya yojanesu,||
paññāsāya yojanesu,||
paññāsam pi mayaɱ yojanāni gaccheyyāma taɱ Bhagavantaɱ dassanāya arahantaɱ sammāsambuddhaɱ.|| ||

Yojanasate ce pi mayaɱ bho Kaccāna,||
suṇeyyāma taɱ Bhagavantaɱ,||
yojanasatam pi mayaɱ gaccheyyāma taɱ Bhagavantaɱ dassanāya arahantaɱ sammāsambuddhaɱ.|| ||

Yato ca kho bho Kaccāna,||
parinibbuto so Bhagavā,||
parinibbutam pi mayaɱ taɱ Bhagavantaɱ saraṇaɱ gacchāma||
dhammañ ca||
bhikkhu-saŋghañ ca.|| ||

Upāsakaɱ maɱ bhavaɱ Kaccāno dhāretu ajjatagge pāṇupetaɱ saraṇaɱ gatanti.|| ||

Madhurasuttaɱ catutthaɱ


 

Contact:
E-mail
Copyright Statement   Webmaster's Page