Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
4. Rāja Vagga

Sutta 86

Aŋgulimāla Suttaɱ

Based on the 'Sri Lanka Buddha Jayanti Tripitaka Series.'

 


 

[1][edmn][chlm][pts][than][ntbb][upal] Evaɱ me sutaɱ|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

2. Tena kho pana samayena rañño Pasenadissa Kosalassa vijite coro Aŋgulimālo nāma hoti luddo lohitapāṇī hatapahate niviṭṭho adayāpanno pāṇabhutesu.|| ||

Tena gāmā pi agāmā katā,||
nigamā pi [98] anigamā katā,||
janapadā pi ajanapadā katā.|| ||

So manusse vadhitvā vadhitvā aŋgulīnaɱ mālaɱ dhāreti.|| ||

3. Atha kho Bhagavā pubbaṇha-samayaɱ nivāsetvā pattacīvaraɱ ādāya Sāvatthīɱ piṇḍāya pāvisi.|| ||

Sāvatthiyaɱ piṇḍāya caritvā pacchābhattaɱ piṇḍapātapaṭikkanto senāsanaɱ saɱsāmetvā pattacīvaraɱ ādāya yena coro Aŋgulimālo ten'addhānamaggaɱ paṭipajji.|| ||

Addasaɱsu kho gopālakā pasupālakā kassakā padāvino Bhagavantaɱ yena coro Aŋgulimālo ten'addhānamaggaɱ paṭipannaɱ disvā Bhagavantaɱ etad avocuɱ:|| ||

Mā samaṇa,||
etaɱ maggaɱ paṭipajji,||
etasmiɱ samaṇa,||
magge coro Aŋgulimālo nāma luddo lohitapāṇī hatapahate niviṭṭho adayāpanno pāṇabhūtesu.|| ||

Tena gāmā pi agāmā katā,||
nigamā pi anigamā katā,||
janapadā pi ajanapadā katā.|| ||

So manusse vadhitvā vadhitvā aŋgulīnaɱ mālaɱ dhāreti.|| ||

Etaɱ hi samaṇa,||
maggaɱ dasa pi purisā||
vīsatim pi purisā||
tiɱsam pi purisā||
cattārīsam pi purisā||
paññāsam pi purisā||
saɱharitvā saɱharitvā paṭipajjanti||
te pi corassa Aŋgulimālassa hatthatthaɱ gacchantī' ti.|| ||

Evaɱ vutte Bhagavā tuṇhībhūto agamāsi.|| ||

Dutiyam pi kho gopālakā pasupālakā kassakā pathāvino Bhagavantaɱ etad avocuɱ|| ||

Mā samaṇa,||
etaɱ maggaɱ paṭipajji,||
etasmiɱ samaṇa,||
magge coro Aŋgulimālo nāma luddo lohitapāṇī hatapahate niviṭṭho adayāpanno pāṇabhūtesu.|| ||

Tena gāmā pi agāmā katā,||
nigamā pi anigamā katā,||
janapadā pi ajanapadā katā.|| ||

So manusse vadhitvā vadhitvā aŋgulīnaɱ mālaɱ dhāreti.|| ||

Etaɱ samaṇa,||
maggaɱ dasa pi purisā||
vīsatim pi purisā||
tiɱsam pi purisā||
cattārīsam pi purisā||
paññāsam pi purisā||
saɱharitvā saɱharitvā paṭipajjanti||
te pi corassa Aŋgulimālassa hatthatthaɱ gacchantī' ti.|| ||

Dutiyam pi kho Bhagavā tuṇhībhūto agamāsi.|| ||

Tatiyam pi kho gopālakā pasupālakā kassakā pathāvino Bhagavantaɱ etad avocuɱ|| ||

Mā samaṇa,||
etaɱ maggaɱ paṭipajji,||
etasmiɱ samaṇa,||
magge coro Aŋgulimālo nāma luddo lohitapāṇī hatapahate niviṭṭho adayāpanno pāṇabhūtesu.|| ||

Tena gāmā pi agāmā katā,||
nigamā pi anigamā katā,||
janapadā pi ajanapadā katā.|| ||

So manusse vadhitvā vadhitvā aŋgulīnaɱ mālaɱ dhāreti.|| ||

Etaɱ samaṇa,||
maggaɱ dasa pi purisā||
vīsatim pi purisā||
tiɱsam pi purisā||
cattārīsam pi purisā||
paññāsam pi purisā||
saɱharitvā saɱharitvā paṭipajjanti||
te pi corassa Aŋgulimālassa hatthatthaɱ gacchantī' ti.|| ||

Tatiyam pi kho Bhagavā tuṇhībhūto agamāsi.|| ||

4. Addasā kho coro Aŋgulimālo Bhagavantaɱ dūrato va āgacchantaɱ,||
disvān'assa etad ahosi:|| ||

Acchariyaɱ vata, bho,||
abbhūtaɱ vata, bho.|| ||

Imaɱ hi maggaɱ dasa pi purisā,||
vīsatim [99] pi purisā,||
tiɱsam pi purisā,||
cattārisampi purisā,||
paññāsam pi purisā||
saɱharitvā saɱharitvā paṭipajjanti,||
te pi mama hatthatthaŋgacchanti.|| ||

Atha ca panāyaɱ samaṇo eko adutiyo pasayha maññe āgacchati.|| ||

Yan nūnāhaɱ imaɱ samaṇaɱ jīvitā voropeyyan' ti?|| ||

Atha kho coro Aŋgulimālo asicammaɱ gahetvā dhanukalāpaɱ sannayahitvā Bhagavantaɱ piṭṭhito piṭṭhito anubandhi.|| ||

5. Atha kho Bhagavā tathārūpaɱ iddhābhisankhāraɱ abhiŋkhāsi.|| ||

Yathā coro Aŋgulimālo Bhagavantaɱ pakatiyā gacchantaɱ sabbatthāmena gacchanto na sakkoti sampāpuṇituɱ.|| ||

Atha kho corassa Aŋgulimālassa etad ahosi:|| ||

Acchariyaɱ vata bho||
abbhūtaɱ vata bho.|| ||

Ahaɱ hi pubbe hatthim pi dhāvantaɱ anupatitvā gaṇhāmi,||
assam pi dhāvantaɱ anupatitvā gaṇhāmi,||
ratham pi dhāvantaɱ anupatitvā gaṇhāmi,||
migam pi dhāvantaɱ anupatitvā gaṇhāmi.|| ||

Atha ca panāhaɱ imaɱ samaṇaɱ pakatiyā gacchantaɱ sabbatthāmena gacchanto na sakkomi sampāpuṇitun' ti.|| ||

ṭhito Bhagavantaɱ etad avoca:|| ||

Tiṭṭha samaṇa,||
tiṭṭha samaṇā ti.|| ||

Ṭhito ahaɱ Aŋgulimāla,||
tvañ ca tiṭṭhā ti.|| ||

Atha kho corassa Aŋgulimālassa etad ahosi:|| ||

Ime kho samaṇā Sakyaputtiyā saccavādino saccapaṭiññā.|| ||

Atha ca panāyaɱ samaṇo gacchaɱ yev'aha:||
ṭhito ahaɱ, Aŋgulimāla,||
tvañ ca tiṭṭhā' ti.|| ||

Yan nūnāhaɱ imaɱ samaṇaɱ puccheyyanti.|| ||

6. Atha kho coro Aŋgulimālo Bhagavantaɱ gāthāya ajjhabhāsi:|| ||

Gacchaɱ vadesi samaṇa ṭhito'mhi||
Mamañ ca brūsi ṭhitaɱ aṭṭhito ti,||
Pucchāmi taɱ samaṇa etam atthaɱ||
Kathaɱ ṭhito tvaɱ aham aṭṭhito'mhī' ti?||
Ṭhito ahaɱ, 'Aŋgulimāla sabbadā||
Sabbesu bhūtesu nidhāya daṇḍaɱ,||
Tuvañ ca pāṇesu asaññato'si||
Tasmā ṭhito'haɱ tuvam aṭṭhito'sī' ti.||
[100] Cirassaɱ vata me mahito mahesī||
Mahāvanaɱ samaṇo'yaɱ paccavādi,||
So'haɱ cirassā pahassaɱ pāpaɱ||
Sutvāna gāthaɱ tava dhammayuttaɱ.||
Itv'eva coro asiɱ āvudhañ ca||
Sobbhe papāte narake anvakāri,||
Avandi coro Sugatassa pāde||
Tatth'eva naɱ pabbajjaɱ ayāci.||
Buddho ca kho kāruṇiko mahesi||
Yo satthā lokassa sadevakassa,||
Tam 'ehi bhikkhū' ti tadā avoca||
Es'eva tassa ahu bhikkhubhāvo' ti.|| ||

7. Atha kho Bhagavā āyasmatā Aŋgulimālena pacchāsamaṇena yena Sāvatthī tena cārikaɱ pakkāmi.|| ||

Anupubbena cārikaɱ caramāno yena Sāvatthī tad avasari.|| ||

Tatra sudaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

8. Tena kho pana samayena rañño Pasenadissa Kosalassa antepuradvāre mahājanakāyo sannipatitvā uccāsaddo mahāsaddo hoti.|| ||

Coro te deva,||
vijite Aŋgulimālo nāma luddo lohitapāṇī hatapahate niviṭṭho adayāpanno pāṇabhūtesu.|| ||

Tena gāmā pi agāmā katā,||
nigamā pi anigamā katā,||
janapadā pi ajanapadā katā.|| ||

So manusse vadhitvā vadhitvā aŋgulīnaɱ mālaɱ dhāreti.|| ||

Taɱ devo paṭisedhetu' ti.|| ||

9. Atha kho rājā Pasenadi Kosalo pañca-mattehi assasatehi Sāvatthīyā nikkhami.|| ||

Divādivassa yen'ārāmo tena pāyāsi.|| ||

Yāvatikā yānassa bhūmi,||
yānena gantvā yānā paccorohitvā pattiko va yena Bhagavā ten'upasaŋkami,||
upasaŋkamitvā [101] Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho rājānaɱ Pasenadiɱ Kosalaɱ Bhagavā etad avoca:|| ||

Kin nu te maharāja,||
rājā Māgadho Seniyo Bimbisāro kupito,||
Vesālikā vā Licchavī,||
aññe vā paṭirājāno' ti?|| ||

10. Na kho me bhante,||
rājā Māgadho Seniyo Bimbisāro kupito,||
na pi Vesālikā Licchavī,||
na pi aññe paṭirājāno.|| ||

Coro me bhante,||
vijite Aŋgulimālo nāma luddo lohitapāṇi hatapahate niviṭṭho adayāpanno pāṇabhūtesu.|| ||

Tena gāmā pi agāmā katā,||
nigamā pi anigamā katā,||
janapadā pi ajanapadā katā.|| ||

So manusse vadhitvā vadhitvā aŋgulīnaɱ mālaɱ dhāreti.|| ||

Nāhaɱ bhante paṭisedhissāmī ti.|| ||

11. Sace pana tvaɱ mahārāja,||
Aŋgulimālaɱ passeyyāsi kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajitaɱ,||
virataɱ pāṇātipātā virataɱ adinnādānā virataɱ||
musā-vādā ekabhattikaɱ||
brahmacāriɱ||
sīlavantaɱ||
kalyāṇa-dhammaɱ,||
kinti naɱ kareyyāsī ti?||| ||

Abhivādeyyāma vā bhante,||
paccuṭṭheyyāma vā,||
āsanena vā nimanteyyāma,||
abhinimanteyyāma pi naɱ cīvara-piṇḍapāta-senāsana-gilāna-paccaya-bhesajja-parikkhārehi,||
dhammikaɱ vā assa rakkhāvaraṇaguttiɱ saɱvidaheyyāma.|| ||

Kuto pan'assa bhante,||
dussīlassa pāpa-dhammassa evarūpo sīlasaɱyamo bhavissatī ti?|| ||

12. Tena kho pana samayena āyasmā Aŋgulimālo Bhagavato avidūre nisinno hoti.|| ||

Atha kho Bhagavā dakkhiṇaɱ bāhaɱ paggahetvā rājānaɱ Pasenadiɱ Kosalaɱ etad avoca:|| ||

'Eso maharāja, Aŋgulimālo' ti.|| ||

Atha kho rañño Pasenadissa Kosalassa ahud eva bhayaɱ ahu chamhitattaɱ ahu lomahaɱso.|| ||

Atha kho Bhagavā rājānaɱ Pasenadiɱ Kosalaɱ bhītaɱ saɱviggaɱ lomahaṭṭhajātaɱ viditvā rājānaɱ Pasenadiɱ Kosalaɱ etad avoca:|| ||

Mā bhāyi maharāja,||
mā bhāyi mahārāja,||
n'atthi te ato bhayanti.|| ||

Atha kho rañño Pasenadissa Kosalassa yaɱ ahosi bhayaɱ [102] vā chamhitattaɱ vā lomahaɱso vā,||
so paṭippassamhī.|| ||

Atha kho rājā Pasenadi Kosalo yen'āyasmā Aŋgulimālo ten'upasaŋkami.|| ||

Upasaŋkamitvā āyasmantaɱ Aŋgulimālaɱ etad avoca:|| ||

'Ayyo no bhante, Aŋgulimālo' ti?|| ||

'Evaɱ Mahārājā' ti.|| ||

'Kathaɱgotto bhante, ayyassa pitā,||
kathaɱgottā mātā' ti?|| ||

'Gaggo kho mahārāja, pitā,||
Mantānī mātā' ti.|| ||

Abhiramatu bhante, ayyo Gaggo Mantāniputto.|| ||

Aham ayyassa Gaggassa Mantāniputtassa ussukkaɱ karissāmi cīvara-piṇḍapāta-senāsana-gilāna-paccaya-bhesajja-parikkhārānan ti.|| ||

13. Tena kho pana samayena āyasmā Aŋgulimālo āraññako hoti piṇḍapātiko paɱsukuliko tecīvariko.|| ||

Atha kho āyasmā Aŋgulimālo rājānaɱ Pasenadiɱ Kosalaɱ etad avoca:|| ||

Alaɱ mahārāja,||
paripuṇṇaɱ me ticīvaran ti.|| ||

Atha kho rājā Pasenadi Kosalo yena Bhagavā,||
ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho rājā Pasenadi Kosalo Bhagavantaɱ etad avoca:|| ||

Acchariyaɱ bhante,||
abbhūtaɱ bhante,||
yāvañ c'idaɱ bhante,||
Bhagavā adantānaɱ dametā asantānaɱ sametā aparinibbutānaɱ parinibbāpetā||
yaɱ hi mayaɱ bhante,||
nāsakkhimhā daṇḍena pi satthena pi dametuɱ.|| ||

So Bhagavatā adaṇḍena asatthen'eva danto.|| ||

Handa dāni mayaɱ bhante,||
gacchāma bahukiccā mayaɱ bahukaraṇiyā ti.|| ||

Yassa dāni tvaɱ mahārāja,||
kālaɱ maññasīti.|| ||

Atha kho rājā Pasenadi Kosalo uṭṭhāy'āsanā Bhagavantaɱ abhivādetvā padakkhiṇaɱ katvā pakkāmi.|| ||

14. Atha kho āyasmā Aŋgulimālo pubbaṇha-samayaɱ nivāsetvā pattacīvaraɱ ādāya Sāvatthīɱ piṇḍāya pāvisi.|| ||

Addasā kho āyasmā Aŋgulimālo Sāvatthīyaɱ sapadānaɱ piṇḍāya caramāno aññataraɱ itthiɱ mūḷhagabbhaɱ vighātagabhaɱ disvān' [103] assa etad ahosi:|| ||

Kilissanti vata bho sattā||
kilissanti vata bho sattā' ti.|| ||

Atha kho āyasmā Aŋgulimālo Sāvatthīyaɱ piṇḍāya caritvā pacchābhattaɱ piṇḍapātapaṭikkanto yena Bhagavā ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ nisīdi,||
eka-m-antaɱ nisinno kho āyasmā Aŋgulimālo Bhagavantaɱ etad avoca:|| ||

Idhāhaɱ bhante,||
pubbaṇha-samayaɱ nivāsetvā pattacīvaraɱ ādāya Sāvatthīɱ piṇḍāya pāvisiɱ addasaɱ kho ahaɱ bhante,||
Sāvatthīyaɱ sapadānaɱ piṇḍāya caramāno aññataraɱ itthiɱ mūḷhagabbhaɱ vighātagabbhaɱ disvāna me etad ahosi:|| ||

Kilissanti vata bho sattā,||
kilissanti vata bho sattā' ti.|| ||

15. Tena hi tvaɱ Aŋgulimāla,||
yena Sāvaitthi ten'upasaŋkama||
upasaŋkamitvā taɱ itthiɱ evaɱ vadehi:|| ||

Yato ahaɱ bhagini jāto nābhijānāmi sañcicca pāṇaɱ jīvitā voropetā.|| ||

Tena saccena sotthi te hotu,||
sotthi gabbhassā' ti.|| ||

So hī nūna me bhante,||
sampajānamusāvādo bhavissati,||
mayā hi bhante,||
bahū sañcicca pāṇā jīvitā voropitā ti.|| ||

Tena hi tvaɱ Aŋgulimāla,||
yena Sāvaitthi ten'upasaŋkama||
upasaŋkamitvā taɱ itthiɱ evaɱ vadehi:|| ||

Yato ahaɱ bhagini,||
ariyāya jātiyā jāto nābhijānāmi sañcicca pāṇaɱ jīvitā voropetā.|| ||

Tena saccena sotthi te hotu sotthi gabbhassā' ti.|| ||

Evaɱ bhante' ti kho āyasmā Aŋgulimālo Bhagavato,||
paṭisutvā yena Sāvaitthi ten'upasaŋkama||
upasaŋkamitvā taɱ itthiɱ etad avoca|| ||

Yato ahaɱ bhagini,||
āriyāya jātiyā jāto,||
nābhijānāmi sañcicca pāṇaɱ jīvitā voropetā,||
tena saccena sotthi te hotu sotthi gabbhassā' ti.|| ||

Atha kho sotth'itthiyā ahosi sotthi gabbhassa.|| ||

16. Atha kho āyasmā Aŋgulimālo eko vūpakaṭṭho appamatto ātāpī pahitatto viharanto na cirass'eva yass'atthāya kulaputtā sammad eva agārasmā anagāriyaɱ pabbajanti.|| ||

Tad anuttaraɱ brahmacariyaɱ pariyosānaɱ diṭṭhe va dhamme sayaɱ abhiññā sacchikatvā upasampajja vihāsi.|| ||

Khīṇā jāti,||
vusita brahmacariyaɱ,||
kataɱ karaṇīyaɱ,||
nāparaɱ [104] itthattāyāti abbhaññāsi.|| ||

Aññataro ca kho panāyasmā Aŋgulimālo arahataɱ ahosi.|| ||

17. Atha kho āyasmā Aŋgulimālo pubbaṇha-samayaɱ nivāsetvā pattacīvaraɱ ādāya Sāvatthīɱ piṇḍāya pāvisi,||
tena kho pana samayena aññena pi leḍḍu khitto āyasmato Aŋgulimālassa kāye nipatati,||
aññena pi daṇḍo khitto āyasmato Aŋgulimālassa kāye nipatati,||
aññena pi sakkharā khittā āyasmato Aŋgulimālassa kāye nipatati.|| ||

Atha kho āyasmā Aŋgulimālo bhinnena sīsena lohitena galantena bhinnena pattena vipphālitāya saɱghāṭiyā yena Bhagavā ten'upasaŋkami.|| ||

Addasā kho Bhagavā āyasmantaɱ Aŋgulimālaɱ dūrato va āgacchantaɱ,||
disvā āyasmantaɱ Aŋgulimālaɱ etad avoca:|| ||

Adhivāsehi tvaɱ brāhmaṇa,||
adhivāsehi tvaɱ brāhmaṇa,||
yassa kho tvaɱ kammassa vipākena bahūni vassāni bahūni vassasatāni bahūni vassasahassāni niraye pacceyyāsi.|| ||

Tassa tvaɱ brāhmaṇa,||
kammassa vipākaɱ diṭṭhe va dhamme paṭisaŋvedesī' ti.|| ||

18. Atha kho āyasmā Aŋgulimālo rahogato paṭisallīno vimuttisukhaɱ paṭisaŋvedi tāyaɱ velāyaɱ imaɱ udānaɱ udānesi:|| ||

[871.] Yo pubbe pamajjitvāna pacchā so na ppamajjati,||
So'maɱ lokaɱ pabhāseti abbhā mutto va candimā.|| ||

[872.] Yassa pāpaɱ kataɱ kammaɱ kusalena pithīyati,||
So'maɱ lokaɱ pabhāseti abbhā mutto va candimā.|| ||

[873.] Yo have daharo bhikkhu yuñjati buddhasāsane,||
So'maɱ lokaɱ pabhaseti abbhā mutto va candimā.|| ||

[874.] Disā hi me dhammakathaɱ suṇantu||
Disā hi me yuñjantu buddhasāsane,||
Disā hi me te manusse bhajantu||
Ye'dhammam evādapayanti santo.|| ||

[875.] [105] Disā hi me khantivādānaɱ avirodhappasaɱsinaɱ,||
Suṇantu dhammaɱ kālena tañ ca anuvidhīyantu.|| ||

[876.] Na hi jātu so mamaɱ hiɱse aññaɱ vā pana kañcinaɱ,||
Pappuyya paramaɱ santiɱ rakkheyya tasathāvare.|| ||

[82] [877.] Udakaɱ hi nayanti nettikā, usukārā namayanti tejanaɱ,||
Dāruɱ namayanti tacchakā, attānaɱ damayanti paṇḍitā.|| ||

[878.] Daṇḍen'eke damayanti aŋkusehi kasāhi ca:||
Adaṇḍena asatthena ahaɱ antomhi tādinā.|| ||

[879.] 'Ahiɱsako' ti me nāmaɱ hiɱsakassa pure sato,||
Ajjāhaɱ saccanāmo'mhi, na naɱ hiɱsāmi kiñcinaɱ.|| ||

[880.] Coro ahaɱ pure āsiɱ Aŋgulimālo' ti vissuto,||
Vuyhamāno mahoghena buddhaɱ saraṇam āgamaɱ.|| ||

[881.] Lohitapāṇī pure āsiɱ Aŋgulimālo' ti vissuto,||
Saraṇāgamanaɱ passa; bhavanetti samūhatā.|| ||

[882.] Tādisaɱ kammaɱ katvāna bahuɱ duggatigāminaɱ||
Phuṭṭho kammavipākena anaṇo bhuñjāmi bhojanaɱ.|| ||

[883.] Pamādam anuyuñjanti bālā dummedhino janā.||
Appamādaɱ ca medhāvī dhanaɱ seṭṭhaɱ va rakkhati.|| ||

[884.] Mā pamādam anuyuñjetha mā kāmaratisanthavaɱ,||
Appamatto hi jhāyanto pappoti paramaɱ sukhaɱ.|| ||

[885.] Svāgataɱ nāpagataɱ, n'etaɱ dummantitaɱ mama,||
paṭibhattesu dhammesu yaɱ seṭṭhaɱ tad upāgamaɱ.|| ||

[886.] Svāgataɱ nāpagataɱ na-y-idaɱ dummantitaɱ mama,||
Tisso vijjā anuppattā, kataɱ buddhassa sāsanaɱ.|| ||

Aŋgulimālasuttaɱ jaṭṭhaɱ


 

Contact:
E-mail
Copyright Statement   Webmaster's Page