Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
4. Rāja Vagga

Sutta 89

Dhamma-Cetiya Suttaɱ

Based on the 'Sri Lanka Buddha Jayanti Tripitaka Series.'

 


 

[1][pts][chlm][upal] Evaɱ me sutaɱ|| ||

Ekaɱ samayaɱ Bhagavā Sakkesu viharati.|| ||

Medaḷumpaɱ nāma Sakkānaɱ nigamo.|| ||

Tena kho pana samayena rājā Pasenadi Kosalo Naŋgarakaɱ anuppatto hoti kenaci-d-eva karaṇīyena.|| ||

Atha kho rājā Pasenadi Kosalo Dīghaɱ Kārāyanaɱ āmantesi:|| ||

'Yojehi samma Kārāyana, bhadrāni bhadrāni yānāni,||
uyyānabhūmiɱ gacchāma subhumiɱ dassanāyā' ti.|| ||

'Evaɱ devā' ti kho Dīgho Kārāyano rañño Pasenadissa Kosalassa paṭissutvā bhadrāni bhadrāni yānāni yojāpetvā rañño Pasenadissa Kosalassa paṭivedesi:|| ||

'Yuttāni kho te, deva, bhadrāni bhadrāni yānāni,||
yassa dāni kālaɱ maññasī' ti.|| ||

Atha kho rājā Pasenadi Kosalo bhadraɱ yānaɱ abhiruhitvā bhadrehi bhadrehi yānehi Naŋgarakamhāā niyyāsi mahacca rājānubhāvena yena ārāmo tena pāyāsi.|| ||

Yāvatikā yānassa bhūmi yānena gantvā yānā paccorohitvā pattiko va ārāmaɱ pāvisi.|| ||

Addasā kho rājā Pasenadi Kosalo ārāme jaŋghāvihāraɱ anucaŋkamamāno anuvicaramāno rukkhamūlāni pāsādikāni pasādanī yāni appasaddāni appanigghosāni vijanavātāni manussarāhaseyyakāni paṭisallānasāruppāni.|| ||

Disvāna Bhagavantaɱ yeva ārabbha sati udapādi:|| ||

'Imāni kho tāni rukkhamūlāni pāsādikāni pasādanīyāni appasaddāni appanigghosāni vijanavātāni manussarāhaseyyakāni paṭisallāṇasāruppāni,||
yattha sudaɱ mayaɱ taɱ Bhagavantaɱ payirupāsāma arahantaɱ sammāsambuddhan ti.|| ||

Atha kho rājā Pasenadi Kosalo Dīghaɱ Kārāyanaɱ āmantesi:|| ||

'Imāni kho samma Kārāyana, tāni rukkhamūlāni pāsādāni pasādanīyāni appasaddāni appanigghosāni vijanavātāni manussarāhaseyyakāni paṭisallānasāruppāni,||
yattha sudaɱ mayaɱ taɱ Bhagavanataɱ payirupāsāma arahantaɱ sammāsambuddhaɱ.|| ||

Kahaɱ nu kho, samma Kārāyana, etarahi so [119] Bhagavā viharati arahaɱ sammā-sambuddho' ti?|| ||

'Atthi mahārāja, Medaḷumpaɱ nāma Sakkānaɱ nigamo.|| ||

Tattha so Bhagavā etarahi arahaɱ sammā-sambuddho viharatī' ti.|| ||

'Kīva dūro pana samma Kārāyana,||
Naŋgarakamhā Medaḷumpaɱ nāma Sakkānaɱ nigamo hotī' ti?|| ||

'Na dūre mahārāja, tīṇi yojanāni.|| ||

Sakkā divasāvasesena gantun' ti.|| ||

'Tena hi samma Kārāyana,||
yojehi bhadrāni bhadrāni yānāni;||
gamissāma mayaɱ taɱ Bhagavantaɱ dassanāya arahantaɱ sammāsambuddhan' ti.|| ||

'Evaɱ devā' ti kho Dīgho Kārāyano rañño Pasenadissa Kosalassa paṭisutvā bhadrāni bhadrāni yānāni yojāpetvā rañño Pasenadissa Kosalassa paṭivedesi:|| ||

'Yuttāni kho te, deva, bhadrāni bhadrāni yānāni.|| ||

Yassa dāni kālaɱ maññasi' ti.|| ||

Atha kho rājā Pasenadi Kosalo bhadraɱ yānaɱ abhiruhitvā bhadrehi bhadrehi yānehi Naŋgarakamhā niyyāsi yena Medaḷumpaɱ nāma Sakkānaɱ nigamo tena pāyāsi ten'eva divasāvasesena Medaḷumpaɱ nāma Sakkānaɱ nigamaɱ sampāpuṇi,||
yena ārāmo tena pāyāsi.|| ||

Yāvatikā yānassa bhūmi yānena gantvā,||
yānā paccorohitvā pattiko va ārāmaɱ pāvisi.|| ||

Tena kho pana samayena sambahulā bhikkhū abhokāse caŋkamanti.|| ||

Atha kho rājā Pasenadi Kosalo yena te bhikkhu ten'upasaŋkami.|| ||

Upasaŋkamitvā te bhikkhu etad avoca:|| ||

'Kahaɱ nu kho bhante, etarahi so Bhagavā viharati arahaɱ sammā-sambuddho?|| ||

Dassanakāmā hi mayaɱ taɱ Bhagavantaɱ arahantaɱ sammāsambuddhan' ti.|| ||

'Eso mahārāja vihāro saɱvutadvāro;||
tena appasaddo upasaŋkamitvā ataramāno āḷindaɱ pavisitvā ukkāsitvā aggaḷaɱ ākoṭehi,||
vivarissati te Bhagavā dvāran' ti.|| ||

Atha kho rājā Pasenadi Kosalo tatth'eva khaggañ ca uṇhīsañ ca Dīghassa Kārāyanassa pādāsi.|| ||

Atha kho Dīghassa Kārāyanassa etad ahosi:|| ||

'Rahāyati kho dāni mahārājā;||
ten idh'eva dāni mayā ṭhātabban' ti?|| ||

Atha kho rājā Pasenadi Kosalo yena so vihāro saɱvutadvāro tena appasaddo upasaɱkamitvā ataramāno āḷindaɱ pavisitvā ukkāsitvā aggaḷaɱ ākoṭesi.|| ||

Vivari Bhagavā dvāraɱ.|| ||

Atha kho rājā Pasenadi Kosalo [120] vihāraɱ pavisitvā Bhagavato pāde sirasā patitvā Bhagavato pādāni mukhena ca paricumbati pāṇīhi ca parisambāhati,||
nāmañ ca sāveti:|| ||

'Rājāhaɱ bhante, Pasenadi Kosalo,||
rājāhaɱ bhante, Pasenadi Kosalo' ti.

Kiɱ pana tvaɱ mahārāja,||
atthavasaɱ sampassamāno imasmiɱ sarīre evarūpaɱ paramanipaccākāraɱ karosi,||
mittūpahāraɱ upadaɱsesī ti?|| ||

'Atthi kho me bhante, Bhagavati dhammanvayo, hoti:|| ||

'Sammāsambuddho Bhagavā,||
svākkhāto Bhagavatā dhammo,||
supaṭipanno Bhagavato sāvakasaŋgho' ti.|| ||

Idhāhaɱ bhante, passāmi eke samaṇabrāhmaṇe pariyantakataɱ brahmacariyaɱ carante dasa pi vassāni,||
vīsatim pi vassāni,||
tiɱsam pi vassāni,||
cattārisam pi vassāni.|| ||

Te aparena samayena sunahātā suvilittā kappitakesamassu pañcahi kāmaguṇehi samappitā samaŋgibhūtā parivārenti.|| ||

Idha panāhaɱ bhante, bhikkhu passāmi yāvajīvaɱ apāṇakoṭikaɱ paripuṇṇaɱ parisuddhaɱ brahmacariyaɱ carante.|| ||

Na kho panāhaɱ bhante, ito bahiddhā aññaɱ evaɱ paripuṇṇaɱ parisuddhaɱ brahmacariyaɱ samanupassāmi.|| ||

Ayam pi kho me bhante,||
Bhagavati dhammanvayo hoti:|| ||

'Sammā-sambuddho Bhagavā,||
svākkhāto Bhagavatā dhammo,||
supaṭipanno saŋgho' ti.|| ||

Puna ca paraɱ bhante, rājāno pi rājūhi vivadanti.|| ||

Khattiyā pi khattiyehi vivadanti.|| ||

Brāhmaṇā pi brāhmaṇehi vivadanti.|| ||

Gahapatī pi gahapatīhi vivadanti.|| ||

Mātā pi puttena vivadati.|| ||

Putto pi mātarā vivadati.|| ||

Pitā pi puttena vivadati.|| ||

Putto pi pitarā vivadati.|| ||

Bhātā pi bhātarā vivadati.|| ||

Bhātā pi bhaginiyā vivadati.|| ||

Bhagini pi bhātarā vivadati.|| ||

Sahāyo pi sahāyena vivadati.|| ||

Idha panāhaɱ bhante, bhikkhu passāmi samaggā sammodamānā avivadamānā khīrodakībhūtā añña- [121] maññaɱ piya-cakkhūhi sampassantā viharanti.|| ||

Na kho panāhaɱ bhante,||
ito bahiddhā aññaɱ evaɱ samaggaɱ parisaɱ samanupassāmi.|| ||

Ayam pi kho me bhante,||
Bhagavati dhammanvayo hoti:|| ||

'Sammā-sambuddho Bhagavā,||
svākkhāto Bhagavatā dhammo,||
supaṭipanno saŋgho' ti.|| ||

Puna ca parāhaɱ bhante,||
ārāmena ārāmaɱ uyyānena uyyānaɱ anucaŋkamāmi anuvicarāmi.|| ||

So'haɱ tattha passāmi eke samaṇabrāhmaṇe kise lūkhe dubbaṇṇe uppaṇḍuppaṇḍukajāte dhamanisanthatagatte na viya maññe cakkhuɱ bandhante janassa dassanāya.|| ||

Tassa mayhaɱ bhante evaɱ hoti:||
addhā ime āyasmanto anabhiratā vā brahmacariyaɱ caranti.|| ||

Atthi vā tesaɱ kiñci pāpaɱ kammaɱ kataɱ paṭicchannaɱ tathā ime āyasmanto kisā lūkhā dubbaṇṇā uppaṇḍuppaṇḍukajātā dhamanisanthatagattā,||
na viya maññe cakkhuɱ bandhanti janassa dassanāyā ti.|| ||

Tyāhaɱ upasaŋkamitvā evaɱ vadāmi:|| ||

Kin nu kho tumhe āyasmanto kisā lūkhā dubbaṇṇā uppaṇḍuppaṇḍukajātā dhamanisanthatagattā,||
na viya maññe cakkhuɱ bandhatha janassa dassanāyā ti?|| ||

Te evam āhaɱsu:|| ||

'Bandhukarogo no maharājā' ti.|| ||

Idha panāhaɱ bhante, bhikkhū passāmi haṭṭhapahaṭṭhā udaggudaggā abhiratarūpā pīṇitindriyā appossukkā pannalomā paradavuttā migabhūtena cetasā viharanti.|| ||

Tassa mayhaɱ bhante evaɱ hoti:|| ||

'Addhā ime āyasmanto tassa Bhagavato sāsane uḷāraɱ pubbenāparaɱ visesaɱ sañjānanti,||
tathā ime āyasmanto haṭṭhapahaṭṭhā udaggudaggā abhiratarūpā pīṇitindriyā appossukkā pannalomā paradavuttā migabhūtena cetasā viharantī' ti.|| ||

Ayam pi kho me bhante,||
Bhagavati dhammanvayo hoti:|| ||

'Sammā-sambuddho Bhagavā,||
svākkhāto Bhagavatā dhammo,||
supaṭipanno saŋgho' ti.|| ||

Puna ca parāhaɱ bhante, rājā khattiyo muddhāvasitto [122] pahomi ghātetāyaɱ vā ghātetuɱ jāpetāyaɱ vā jāpetuɱ,||
pabbājetāyaɱ vā pabbājetuɱ.|| ||

Tassa mayhaɱ bhante, aṭṭakaraṇe nisinnassa antarantarā kathaɱ opātenti.|| ||

So'haɱ na labhāmi:|| ||

Mā me bhonto, aṭṭakaraṇe nisinnassa antarantarā kathaɱ opātetha,||
kathāpariyosānaɱ me bhavanto āgamentū ti.|| ||

Tassa mayhaɱ bhante, antarantarā kathaɱ opātenti.|| ||

Idha panāhaɱ bhante, bhikkhu pasasāmi yasmiɱ samaye Bhagavā anekasatāya parisāya dhammaɱ deseti||
n'eva tasmiɱ samaye Bhagavato sāvakānaɱ khipitasaddo vā hoti ukkāsitasaddo vā.|| ||

Bhūtapubbaɱ bhante, Bhagavā anekasatāya parisāya dhammaɱ desasi:|| ||

Tatr'aññataro Bhagavato sāvako ukkāsi;|| ||

Tam enaɱ aññataro sabrahmacārī jaṇṇukena ghaṭṭesi:|| ||

'Appasaddo āyasmā hotu,||
mā'yasmā saddam akāsi:|| ||

Satthā no Bhagavā dhammaɱ desetī' ti.|| ||

Tassa mayhaɱ bhante, etad ahosi:|| ||

Acchariyaɱ vata bho,||
abbhūtaɱ vata bho.|| ||

Adaṇḍena vata kira,||
bho asatthena evaɱ suvinītā parisā bhavissatī' ti.|| ||

Na kho panāhaɱ bhante,||
ito bahiddhā aññaɱ evaɱ suvinītaɱ parisaɱ samanupassāmi.|| ||

Ayam pi kho me bhante,||
Bhagavati dhammanvayo hoti:|| ||

'Sammā-sambuddho Bhagavā,||
svākkhāto Bhagavatā dhammo,||
supaṭipanno saŋgho' ti.|| ||

Puna ca parāhaɱ bhante, passāmi idh'ekacce khattiyapaṇḍite nipuṇe kataparappavāde vāḷavedhirūpe.|| ||

Te bhindantā maññe caranti paññāgatena diṭṭhi-gatāni.|| ||

Te suṇanti samaṇo khalu||
bho Gotamo amukaɱ nāma gāmaɱ vā nigamaɱ vā osarissatī ti.|| ||

Te pañhaɱ abhisaŋkharonti:|| ||

Imaɱ mayaɱ pañhaɱ samaṇaɱ Gotamaɱ upasaŋkamitvā pucchisasāma:|| ||

'Evaɱ ce no puṭṭho evaɱ vyākarissati,||
evam assa mayaɱ vādaɱ āropessāma.|| ||

Evaɱ ce pi no puṭṭho evaɱ vyākarissati,||
evam pissa mayaɱ vādaɱ āropessāmā' ti.|| ||

Te suṇanti:|| ||

'Samaṇo khalu bho Gotamo amukaɱ nāma gāmaɱ vā nigamaɱ vā osaṭo' ti.|| ||

Te yena Bhagavā ten'upasaŋkamanti.|| ||

Te Bhagava dhammiyā kathāya sandasseti samādapeti samuttejeti [123] samp'ahaɱseti:|| ||

Te Bhagavatā dhammiyā kathāya sandassitā samādapitā samuttejitā samp'ahaɱsitā na c'eva Bhagavantaɱ pañhaɱ pucchanti,||
kuto vādaɱ āropessanti,||
aññadatthu Bhagavato sāvakā sampajjanti.|| ||

Ayam pi kho me bhante,||
Bhagavati dhammanvayo hoti:|| ||

'Sammā-sambuddho Bhagavā,||
svākkhāto Bhagavatā dhammo,||
supaṭipanno saŋgho' ti.|| ||

Puna caparāhaɱ bhante, passāmi idh'ekacce brāhmaṇapaṇḍite nipuṇe kataparappavāde vāḷavedhirūpe.|| ||

Te bhindantā maññe caranti paññā-gatena diṭṭhi-gatāni.|| ||

Te suṇanti samaṇo khalu||
bho Gotamo amukaɱ nāma gāmaɱ vā nigamaɱ vā osarissatī ti.|| ||

Te pañhaɱ abhisaŋkharonti.|| ||

Imaɱ mayaɱ pañhaɱ samaṇaɱ Gotamaɱ upasaŋkamitvā pucchisasāma:|| ||

'Evaɱ ce no puṭṭho evaɱ vyākarissati,||
evam assa mayaɱ vādaɱ āropessāma.|| ||

Evaɱ ce pi no puṭṭho evaɱ vyākarissati,||
evam pissa mayaɱ vādaɱ āropessāmā' ti.|| ||

Te suṇanti:|| ||

'Samaṇo khalu bho Gotamo amukaɱ nāma gāmaɱ vā nigamaɱ vā osaṭo' ti.|| ||

Te yena Bhagavā ten'upasaŋkamanti.|| ||

Te Bhagavā dhammiyā kathāya sandasseti samādapeti samuttejeti sampahaseti:|| ||

Te Bhagavatā dhammiyā kathāya sandassitā samādapitā samuttejitā samp'ahaɱsitā na c'eva Bhagavantaɱ pañhaɱ pucchanti,||
kuto vādaɱ āropessanti,||
aññadatthu Bhagavato sāvakā sampajjanti.|| ||

Ayam pi kho me bhante,||
Bhagavati dhammanvayo hoti:|| ||

'Sammā-sambuddho Bhagavā,||
svākkhāto Bhagavatā dhammo,||
supaṭipanno saŋgho' ti.|| ||

Puna ca parāhaɱ bhante, passāmi idh'ekacce gahapatipaṇḍite nipuṇe kataparappavāde vāḷavedhirūpe.|| ||

Te bhindantā maññe caranti paññā-gatena diṭṭhi-gatāni.|| ||

Te suṇanti samaṇo khalu||
bho Gotamo amukaɱ nāma gāmaɱ vā nigamaɱ vā osarissatī ti.|| ||

Te pañhaɱ abhisaŋkharonti.|| ||

Imaɱ mayaɱ pañhaɱ samaṇaɱ Gotamaɱ upasaŋkamitvā pucchisasāma:|| ||

'Evaɱ ce no puṭṭho evaɱ vyākarissati,||
evam assa mayaɱ vādaɱ āropessāma.|| ||

Evaɱ ce pi no puṭṭho evaɱ vyākarissati,||
evam pissa mayaɱ vādaɱ āropessāmā' ti.|| ||

Te suṇanti:|| ||

'Samaṇo khalu bho Gotamo amukaɱ nāma gāmaɱ vā nigamaɱ vā osaṭo' ti.|| ||

Te yena Bhagavā ten'upasaŋkamanti.|| ||

Te Bhagavā dhammiyā kathāya sandasseti samādapeti samuttejeti sampahaseti:|| ||

Te Bhagavatā dhammiyā kathāya sandassitā samādapitā samuttejitā samp'ahaɱsitā na c'eva Bhagavantaɱ pañhaɱ pucchanti,||
kuto vādaɱ āropessanti||
aññadatthu Bhagavato sāvakā sampajjanti.|| ||

Ayam pi kho me bhante,||
Bhagavati dhammanvayo hoti:|| ||

'Sammā-sambuddho Bhagavā,||
svākkhāto Bhagavatā dhammo,||
supaṭipanno saŋgho' ti.|| ||

Puna ca parāhaɱ bhante, passāmi idh'ekacce samaṇapaṇḍite nipuṇe kataparappavāde vāḷavedhirūpe.|| ||

Te bhindantā maññe caranti paññā-gatena diṭṭhi-gatāni.|| ||

Te suṇanti samaṇo khalu||
bho Gotamo amukaɱ nāma gāmaɱ vā nigamaɱ vā osarissatī ti.|| ||

Te pañhaɱ abhisaŋkharonti.|| ||

Imaɱ mayaɱ pañhaɱ samaṇaɱ Gotamaɱ upasaŋkamitvā pucchisasāma:|| ||

'Evaɱ ce no puṭṭho evaɱ vyākarissati,||
evam assa mayaɱ vādaɱ āropessāma.|| ||

Evaɱ ce pi no puṭṭho evaɱ vyākarissati,||
evam pissa mayaɱ vādaɱ āropessāmā' ti.|| ||

Te suṇanti:|| ||

'Samaṇo khalu bho Gotamo amukaɱ nāma gāmaɱ vā nigamaɱ vā osaṭo' ti.|| ||

Te yena Bhagavā ten'upasaŋkamanti.|| ||

Te Bhagavā dhammiyā kathāya sandasseti samādapeti samuttejeti samp'ahaɱseti:|| ||

Te Bhagavatā dhammiyā kathāya sandassitā samādapitā samuttejitā samp'ahaɱsitā na c'eva Bhagavantaɱ pañhaɱ pucchanti,||
kuto vādaɱ āropessanti,||
aññadatthu Bhagavantaɱ yeva okāsaɱ yācanti agārasmā anagāriyaɱ pabbajjāya.|| ||

Te Bhagavā Pabbājeti.|| ||

Te tathā pabbajitā samānā ekā vūpakaṭṭhā appamattā ātāpino pahitattā viharantā na cirass'eva yass'atthāya kulaputtā sammad eva agārasmā anagāriyaɱ pabbajanti.|| ||

Tad anuttaraɱ brahmacariyapariyosānaɱ diṭṭhe va dhamme sayaɱ abhiññā sacchikatvā upasampajja viharanti.|| ||

Te evam āhaɱsu:|| ||

'Manaɱ vata bho anassāma,||
manaɱ vata bho anassāma.|| ||

Mayaɱ hi pubbe assamaṇāva samānā samaṇā'mhā ti paṭijānimhā,||
abrāhmaṇā va samānā brāhmaṇā'mhā ti paṭijānimhā,||
anarahanto va samānā arahanto'mhā ti paṭijānimhā.|| ||

Idāni kho'mhā samaṇā,||
idāni kho'mhā brāhmaṇā,||
idāni kho'mhā arahanto' ti.|| ||

Ayam pi kho me bhante,||
Bhagavati dhammanvayo hoti:|| ||

'Sammā-sambuddho Bhagavā,||
svākkhāto Bhagavatā dhammo,||
supaṭipanno saŋgho' ti.|| ||

Puna ca paraɱ bhante, ime Isidatta Purāṇā thapatayo mama bhattā mama yānā ahaɱ n'esaɱ jīvitaɱ dātā yasassa āhattā.|| ||

Atha ca pana no tathā mayi [124] nipaccākāraɱ karonti yathā Bhagavati.|| ||

Bhūtapubbāhaɱ bhante senaɱ abbhūyyāno samāno ime va Isidatta Purāṇā thapatayo vimaɱsamāno aññatarasmiɱ sambādhe āvasathe vāsaɱ upagañchiɱ.|| ||

Atha kho bhante, ime Isidatta Purāṇā thapatayo bahudeva rattiɱ dhammiyā kathāya vītināmetvā yato ahossuɱ kho Bhagavā tato sīsaɱ katvā maɱ pādato karitvā nipajjiɱsu.|| ||

Tassa mayhaɱ bhante, etad ahosi:|| ||

'Acchariyaɱ vata bho, abbhūtaɱ vata bho.|| ||

Ime Isidatta Purāṇā thapatayo mama bhattā mama yānā,||
ahaɱ tesaɱ jīvitassa dātā,||
yasassa āhattā.|| ||

Atha ca pana no tathā mayi nipaccākāraɱ karonti yathā Bhagavati.|| ||

Addhā ime āyasmanto tassa Bhagavato sāsane uḷāraɱ pubbenāparaɱ visesaɱ sañjānantī' ti.|| ||

Ayam pi kho me bhante, Bhagavati dhammanvayo hoti:|| ||

'Sammā-sambuddho Bhagavā, svākkhāto Bhagavatā dhammo supaṭipanno saŋgho' ti.|| ||

Puna ca paraɱ bhante, Bhagavā pi khattiyo,||
aham pi khattiyo,||
Bhagavā pi Kosalako,||
aham pi Kosalako,||
Bhagavā pi āsītiko,||
aham pi āsitiko||
yam pi bhante,||
Bhagavā pi khattiyo,||
aham pi khattiyo,||
Bhagavā pi Kosalako,||
aham pi Kosalako,||
Bhagavā pi āsītiko,||
ahami pi āsītiko,||
iminā vārahām evāhaɱ bhante,||
Bhagavati paramanipaccākāraɱ kattuɱ||
mittūpavāraɱ upadaɱsetuɱ.|| ||

Handa ca dāni mayaɱ bhante, gacchāma||
bahukiccā mayaɱ bahukaraṇiyā' ti.|| ||

Yassa dāni tvaɱ mahārāja, kālaɱ maññasī ti.|| ||

Atha kho rājā Pasenadi Kosalo uṭṭhāy'āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho Bhagavā acirapakkantassa rañño Pasenadissa Kosalassa bhikkhū āmantesi:|| ||

'Eso bhikkhave, rājā Pasenadi Kosalo dhammacetiyāni bhāsitvā uṭṭhāy'āsanā pakkanto.|| ||

Uggaṇhātha bhikkhave, dhammacetiyāni.|| ||

Pariyāpuṇātha [125] bhikkhave, dhammacetiyāni.|| ||

Dhāretha bhikkhave, dhammacetiyāni.|| ||

Atthasaɱhitāni bhikkhave, dhammacetiyāni ādibrahmacariyakānī' ti.|| ||

Idam avoca Bhagavā attamanā te bhikkhu Bhagavato bhāsitaɱ abhinandunti.|| ||

Dhammacetiyasuttaɱ navamaɱ


 

Contact:
E-mail
Copyright Statement   Webmaster's Page