Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
4. Rāja Vagga

Sutta 90

Kaṇṇakatthala Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][upal] Evaɱ me sutaɱ|| ||

Ekaɱ samayaɱ Bhagavā ujukāyaɱ1 viharati kaṇṇakatthale Migadāye.|| ||

Tena kho pana samayena rājā Pasenadi kosalo ujukaɱ anuppatto hoti kenacid-eva karaṇīyena.|| ||

Atha kho rājā Pasenadi kosalo aññataraɱ purisaɱ āmantesi: 'ehi tvaɱ ambho purisā yena Bhagavā ten'upasaŋkama,||
upasaŋkamitvā mama vacanena Bhagavato pāde sirisā vandāhi.|| ||

Appābādhaɱ appātaŋkaɱ lahuṭṭhānaɱ balaɱ phāsuvihāraɱ puccha,||
'rājā bhante,||
Pasenadi kosalo Bhagavato pāde sirasā vandati,||
appābādhaɱ appātaŋkaɱ lahuṭṭhānaɱ balaɱ phāsuvihāraɱ pucchatī' ti.|| ||

Evañ ca vadehi: 'ajja kira bhante,||
rājā Pasenadi kosalo pacchābhattaɱ bhūttapātarāso Bhagavantaɱ dassanāya upasaŋkamissatī' ti.|| ||

Evaɱ devā ti kho so puriso rañño Pasenadissa Kosalassa paṭissutvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so puriso Bhagavantaɱ etad avoca: 'rājā bhante,||
Pasenadi kosalo Bhagavato pāde sirasā vandati.|| ||

Appābādhaɱ appātaŋkaɱ lahuṭṭhānaɱ balaɱ phāsuvihāraɱ pucchati.|| ||

Evañ ca vadeti: ajja kira bhante,||
rājā Pasenadi kosalo pacchābhattaɱ bhuttapātarāso Bhagavantaɱ dassanāya upasaŋkamissatī' ti.|| ||

Assosuɱ kho somā ca bhaginī sakulā ca bhaginī 'ajja [126] kira rājā Pasenadi kosalo pacchābhattaɱ bhuttapātarāso Bhagavantaɱ dassanāya upasaŋkamissatī' ti.|| ||

Atha kho somā ca bhaginī sakulā ca bhaginī rājānaɱ Pasenadiɱ Kosalaɱ bhattābhihāre upasaŋkamitvā etad avocuɱ: 'tena hi mahārāja,||
amhākampi vacanena Bhagavato pāde sirasā vandāhi.|| ||

Appābādhaɱ appātaŋkaɱ lahuṭṭhānaɱ balaɱ phāsuvihāraɱ puccha: 'somā ca bhante,||
bhaginī sakulā ca bhaginī Bhagavato pāde sirasā vandanti,||
appābādhaɱ appataŋkaɱ lahuṭṭhānaɱ balaɱ phāsuvihāraɱ pucchan' ti.ti.|| ||

Atha kho rājā Pasenadi kosalo pacchābhattaɱ bhuttapātarāso yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho rājā Pasenadi kosalo Bhagavantaɱ etad avoca: 'somā ca bhante,||
bhaginī sakulā ca bhaginī Bhagavato pāde sirasā vandanti.|| ||

Appābādhaɱ appātaŋkaɱ lahuṭṭhānaɱ balaɱ phāsuvihāraɱ pucchantī' ti.|| ||

Kim pana mahārāja,||
somā ca bhaginī sakulā ca bhaginī aññaɱ dūtaɱ nālatthun' ti.|| ||

Assosuɱ kho bhante,||
somā ca bhaginī sakulā ca bhaginī,||
' ajja kira rājā Pasenadi kosalo pacchābhattaɱ bhuttapātarāso Bhagavantaɱ dassanāya upasaŋkamissatī' ti.|| ||

Atha kho bhante,||
somā ca bhaginī sakulā ca bhaginī maɱ bhattābhihāre upasaŋkamitvā etad avocuɱ: tena hi mahārāja,||
amhākampi vacanena Bhagavato pāde sirasā vandāhi,||
appābādhaɱ appātaŋkaɱ lahuṭṭhānaɱ balaɱ phāsuvihāraɱ puccha,||
somā ca bhante,||
bhaginī sakulā ca bhaginī Bhagavato pāde sirasā vandanti,||
appābādhaɱ appātaŋkaɱ lahuṭṭhānaɱ balaɱ phāsuvihāraɱ pucchantī' ti.|| ||

Sukhiniyo hontu mahārāja,||
somā ca bhaginī sakulā ca bhaginīti.|| ||

Atha kho rājā Pasenadi kosalo Bhagavantaɱ etad avoca: " sutaɱ me taɱ bhante Samaṇo Gotamo evam āha: 'n'atthi so samaṇo vā brāhmaṇo vā yo sabbaññā sabbadassāvī aparisesaɱ ñāṇa-dassanaɱ paṭijānissati,||
n'etaɱ ṭhānaɱ vijjatī' ti.|| ||

Ye te bhante evam āhaɱsu: 'Samaṇo Gotamo evam āha: [127] n'atthi so samaṇo vā brāhmaṇo vā yo sabbaññā sabbadassāvī aparisesaɱ ñāṇa-dassanaɱ paṭijānissati.|| ||

Netaɱ ṭhānaɱ vijjatī ti.|| ||

Kacci te bhante,||
Bhagavato vuttavādino,||
na ca Bhagavantaɱ abhūtena abbhācikkhanti.|| ||

Dhammassa cānudhammaɱ vyākaronti,||
na ca koci sahadhammiko vādānuvādo gārayhaɱ ṭhānaɱ āgacchatī' ti.|| ||

Ye te mahārāja,||
evam āhaɱsu: 'Samaṇo Gotamo evam āha: n'atthi so samaṇo vā brāhmaṇo vā yo sabbaññu sabbadassāvī aparisesaɱ ñāṇa-dassanaɱ paṭijānissati.|| ||

Netaɱ ṭhānaɱ vijjati.|| ||

Na me tena vuttavādino abbhācikkhanti ca pana maɱ te asatā abhutenā' ti.|| ||

Atha kho rājā Pasenadi kosalo viḍūḍabhaɱ1 senāpatiɱ āmantesi: 'ko nu khojja2 senāpati,||
imaɱ kathāvatthuɱ rājantepure abbhudāhāsīti?|| ||

'Sañjayo mahārāja,||
brāhmaṇo ākāsagotto' ti.|| ||

Atha kho rājā Pasenadi kosalo aññataraɱ purisaɱ āmantesi,'ehi tvaɱ amho purisa,||
mama vacanena sañjayaɱ brāhmaṇaɱ ākāsagottaɱ āmantesi.|| ||

Rājā taɱ4 bhante,||
Pasenadi kosalo āmantetī' ti.|| ||

Evaɱ devā ti kho so puriso rañño Pasenadissa Kosalassa paṭissutvā yena sañjayo brāhmaṇo ākāsagotto ten'upasaŋkami,||
upasaŋkamitvā sañjayaɱ brāhmaṇaɱ ākāsagottaɱ etad avoca: 'rājā taɱ bhante,||
Pasenadi kosalo āmantetī' ti.|| ||

Atha kho rājā Pasenadi kosalo Bhagavantaɱ etad avoca: siyā nu kho bhante,||
Bhagavatā aññadeva kiñci sandhāya vācā bhāsitā5,||
tañ ca jano aññathā vipaccāgaccheyyāti?6.|| ||

Abhijānāmi mahārāja vācaɱ bhāsitāti.|| ||

Yathā kathampana bhante,||
Bhagavā abhijānāti vācaɱ bhāsitāti?1.|| ||

Evaɱ kho ahaɱ mahārāja,||
abhijānāmi vācaɱ bhāsitā 'n'atthi so samaṇo vā brāhmaṇo vā,||
[128] yo sakideva sabbaɱ ñassati,||
sabbaɱ dakkhiti,||
n'etaɱ ṭhānaɱ vijjatī' ti.|| ||

Heturūpaɱ bhante,||
Bhagavā āha saheturūpaɱ bhante Bhagavā āha:'n'atthi so samaṇo vā brāhmaṇo vā,yo sakideva sabbaɱ ñassati,||
sabbaɱ dakkhiti,||
n'etaɱ ṭhānaɱ vijjatī ti.|| ||

Cattāro me bhante,||
vaṇṇā: khattiyā brāhmaṇā vessā suddā.|| ||

Imesaɱ nu kho bhante,||
catunnaɱ vaṇṇānaɱ siyā viseso,||
siyā nānākaraṇa'nti?|| ||

Cattāro 'me mahārāja,||
vaṇṇā.|| ||

Khattiyā brāhmaṇā vessā suddā.|| ||

Imesaɱ kho mahārāja,||
catunnaɱ vaṇṇānaɱ dve vaṇṇā aggamakkhāyanti,||
khattiyā ca brāhmaṇā ca.|| ||

Yad idaɱ abhivādanapaccuṭṭhānaañjalikammasāmicīkammānanti.|| ||

Nāhaɱ bhante,||
Bhagavantaɱ diṭṭhadhammikaɱ pucchāmi,||
samparāyikāhaɱ bhante,||
Bhagavantaɱ pucchāmi.|| ||

Cattāro me bhante,||
vaṇṇā: khattiyā brāhmaṇā vessā suddā.|| ||

Imesaɱ nu kho bhante,||
catunnaɱ vaṇṇānaɱ siyā viseso,||
siyā nānākaraṇanti?|| ||

Pañcimāni mahārāja,||
padhāniyaŋgāni.|| ||

Katamāni pañca?|| ||

Idha mahārāja,||
bhikkhū saddho hoti,||
saddahati Tathāgatassa bodhiɱ: 'Iti pi so Bhagavā arahaɱ Sammā-sambuddho vijjā-caraṇa-sampanno sugato loka-vidū anuttaro purisadammasārathi satthā deva-manussānaɱ buddho Bhagavā' ti.|| ||

Appābādho hoti appātaŋko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya asaṭho hoti amāyāvī yathābhūtaɱ attānaɱ āvīkattā satthari vā viññūsu vā sabrahmacārīsu.|| ||

Āraddhaviriyo viharati akusalānaɱ dhammānaɱ pahānāya kusalānaɱ dhammānaɱ upasampadāya thāmavā daḷhaparakkamo anikkhittadhūro kusalesu dhammesu.|| ||

Paññavā hoti udayatthagāminiyā paññāya samannāgato ariyāya nibbedhikāya sammādukkhakkhayagāminiyā imāni kho mahārāja,||
pañca padhāniyaŋgāni.|| ||

Cattāro'me mahārāja,||
vaṇṇā: khattiyā brāhmaṇā vessā suddā.|| ||

Te cassu imehi pañcahi padhāniyaŋgehi samannāgatā,||
taɱ n'esaɱ c'assa dīgha-rattaɱ hitāya sukhāyāti.|| ||

Cattāro me bhante vaṇṇā: khattiyā brāhmaṇā vessā [129] suddā,te cassu imehi pañcahi padhāniyaŋgehi samannāgatā ettha pana n'esaɱ bhante,||
siyā viseso siyā nānākaraṇanti?.|| ||

Ettha kho pana nesāɱ mahārāja,||
padhānavemattataɱ1 vadāmi.|| ||

Seyyathāpassu2 mahārāja,||
dve hatth'idammā vā assadammā vā godammā vā sudantā suvinītā,||
dve hatth'idammā vā assadammā vā godammā vā adantā avinītā.|| ||

Taɱ kiɱ maññasi mahārāja,||
ye te dve hatth'idammā vā assadammā vā godammā vā sudantā suvinītā,||
api nu te dantāva dantakāraṇaɱ gaccheyyuɱ.|| ||

Dantāva dantabhūmiɱ sampāpuṇeyyunti?|| ||

Evaɱ bhante.

Ye pana te dve hatth'idammā vā assadammā vā godammā vā adantā avinītā,||
api nu te adantāva dantakāraṇaɱ gaccheyyuɱ.|| ||

Adantāva dantabhūmiɱ sampāpuṇeyyuɱ seyyathā pi te dve hatth'idammā vā assadammā vā godammā vā sudantā suvinītāti?|| ||

No h'etaɱ bhante.|| ||

Evam eva kho mahārāja,||
yaɱtaɱ saddhena pattabbaɱ appābādhena asaṭhena amāyāvinā āraddhaviriyena paññavatā,||
taɱ vata assaddho bavhābādho saṭho māyāvī kusito duppañño pāpuṇissatī'ti n'etaɱ ṭhānaɱ vijjatī ti.|| ||

Heturūpaɱ bhante,||
Bhagavā āha.|| ||

Saheturūpaɱ bhante Bhagavā āha.|| ||

Cattāro me bhante,||
vaṇṇā: khattiyā brāhmaṇā vessā suddā,||
te cassu imehi pañcahi padhāniyaŋgehi samannāgatā,||
te cassu sammappadhānā.|| ||

Ettha pana n'esaɱ bhante,||
siyā viseso,||
siyā nānākaraṇan ti.|| ||

Ettha kho pana nesāɱ3 mahārāja,||
na kiñci nānākaraṇaɱ vadāmi,||
yad idaɱ vimuttiyā vimuttiɱ.|| ||

Seyyathā pi mahārāja,||
puriso sukkhaɱ sākakaṭṭhaɱ ādāya aggiɱ abhinibbatteyya,||
tejo pātukareyya.|| ||

Atha aparo puriso sukkhaɱ sālakaṭṭhaɱ [130] ādāya,||
aggiɱ abhinibbatteyya,||
tejo pātukareyya.|| ||

Atha aparo puriso sukkhaɱ ambakaṭṭhaɱ ādāya aggiɱ abhinibbatteyya.|| ||

Tejo pātukareyya.|| ||

Atha aparo puriso sukkhaɱ udumbarakaṭṭhaɱ ādāya aggiɱ abhinibbatteyya tejo pātukareyya.|| ||

Taɱ kiɱ maññasi mahārāja,||
siyā nu kho tesaɱ aggīnaɱ nānādāruto abhinibbattānaɱ kiñci nānākaraṇaɱ,||
acciyā vā acciɱ vaṇṇena vā vaṇṇaɱ,||
ābhāya vā ābhanti?|| ||

No h'etaɱ bhante.|| ||

Evam eva kho mahārāja,||
yaɱ taɱ tejaɱ viriyaɱ nippharati,||
taɱ4 padhānābhinibbattaɱ5 nāhaɱ tattha kiñci nānākaraṇaɱ vadāmi yad idaɱ vimuttiyā vimuttinti.|| ||

Heturūpaɱ bhante,||
Bhagavā āha,||
saheturūpaɱ bhante,||
Bhagavā āha kiɱ pana bhante,||
atthi devā ti?|| ||

Kiɱ pana tvaɱ mahārāja?|| ||

Evaɱ vadesi: kiɱ pana bhante,||
atthi devā ti?|| ||

Yadi vā te bhante,||
devā āgantāro itthattaɱ,||
yadi vā anāgantāro itthattanti.|| ||

Ye te mahārāja?|| ||

Devā savyāpajjhā te devā āgantāro itthattaɱ ye te devā avyāpajjhā,||
te devā anāgantāro itthattanti.|| ||

Evaɱ vutte viḍūḍabho1 senāpati Bhagavantaɱ etad avoca: 'ye te bhante devā savyāpajjhā āgantāro itthattaɱ,||
te devā ye te devā avyāpajjhā anāgantāro itthattaɱ te deve tamhā ṭhānā cāvessanti vā pabbājessanti vā' ti.|| ||

Atha kho āyasmato Ānandassa etad ahosi: 'ayaɱ kho viḍūḍabho senāpati rañño Pasenadissa Kosalassa putto.|| ||

Ahaɱ Bhagavato putto.|| ||

Ayaɱ kho kāloyaɱ putto puttena manteyyā' ti.|| ||

Atha kho āyasmā Ānando viḍūḍabhaɱ senāpatiɱ āmantesi: 'tenahi senāpati,||
taɱ yev'ettha paṭipucchissāmi.|| ||

Yathā te khameyya tathā naɱ vyākareyyāsi.|| ||

Taɱ kiɱ maññasi senāpati,||
yāvatā rañño Pasenadissa Kosalassa vijitaɱ,||
yattha ca rājā Pasenadi kosalo issariyādhipaccaɱ rajjaɱ kāreti.|| ||

Pahoti tattha rājā Pasenadi kosalo samaṇaɱ vā brāhmaṇaɱ vā puññavantaɱ vā apuññavantaɱ vā brahmacariyavantaɱ vā abrahmacariyavantaɱ vā tahmā ṭhānā cāvetuɱ vā pabbājetuɱ vā' ti?|| ||

Yāvatā bho rañño Pasenadissa Kosalassa vijitaɱ,||
yattha ca rājā Pasenadi kosalo issariyādhipaccaɱ [131] rajjaɱ kāreti.|| ||

Pahoti tattha rājā Pasenadi kosalo samaṇaɱ vā brāhmaṇaɱ vā puññavantaɱ vā apuññavantaɱ vā brahmacariyavantaɱ vā abrahmacariyavantaɱ vā tamhā ṭhānā cāvetuɱ vā pabbājetuɱ vā'ti|| ||

Taɱ kiɱ maññasi senāpati,||
yāvatā rañño Pasenadissa Kosalassa avijitaɱ,||
yattha ca rājā Pasenadi kosalo issariyādhipaccaɱ rajjaɱ na kāreti.|| ||

Pahoti tattha rājā Pasenadi kosalo samaṇaɱ vā brāhmaṇaɱ vā puññavantaɱ vā apuññavantaɱ vā brahmacariyavantaɱ vā abrahmacariyavantaɱ vā tahmā ṭhānā cāvetuɱ vā pabbājetuɱ vā'ti|| ||

Yāvatā rañño Pasenadissa Kosalassa avijitaɱ,||
yattha ca rājā Pasenadissa kosalo issariyādhipaccaɱ rajjaɱ na kāreti.Na tattha pahoti rājā Pasenadi kosalo samaṇaɱ vā brāhmaṇaɱ vā puññavantaɱ vā apuññavantaɱ vā brahmacariyavantaɱ vā abrahmacariyavantaɱ vā tahmā ṭhānā cāvetuɱ vā pabbājetuɱ vā'ti

Taɱ kiɱ maññasi senāpati,||
sutā te devā Tāvatiɱsāti?|| ||

Evaɱ bho,||
sutaɱ me devā Tāvatiɱsā.|| ||

Idhāpi bhotā raññā Pasenadinā kosalena sutā devā Tāvatiɱsā' ti.|| ||

Taɱ kiɱ maññasi senāpati,||
pahoti rājā Pasenadi kosalo deve Tāvatiɱse tamhā ṭhānā cāvetuɱ vā pabbājetuɱ vāti?|| ||

Dassanāyapi bho rājā Pasenadi kosalo deve Tāvatiɱse nappahoti.|| ||

Kuto pana tamhā ṭhānā cāvessati vā pabbājessati vā' ti.|| ||

Evam eva kho senāpati.|| ||

Ye te devā savyāpajjhā āgantāro itthattaɱ te devā,||
ye te devā avyāpajjhā anāgantāro itthattaɱ,||
te devā dassanāyapi nappahonti,||
kuto pana tamhā ṭhānā vācessanti vā pabbājessanti vā' ti.|| ||

Atha kho rājā Pasenadi kosalo Bhagavantaɱ etad avoca: 'ko nāmo ayaɱ bhante bhikkhūti?|| ||

Ānando nāma Mahārājāti.|| ||

Ānando vata bho Ānandarūpo vata bho.|| ||

Heturūpaɱ [132] bhante āyasmā Ānando āha.|| ||

Saheturūpaɱ bhante,||
āyasmā Ānando āha.|| ||

Kiɱ pana bhante,||
atthi Brahmā ti?|| ||

Kiɱ pana tvaɱ mahārāja evaɱ vadesi: kiɱ pana bhante,||
atthi Brahmā ti?|| ||

Yadi vā so bhante,||
Brahmā āgantā itthattaɱ.|| ||

Yadi vā anāgantā itthattanti.

Yo so Mahārājā Brahmā savyāpajjho,so Brahmā āgantā itthattaɱ,||
yo so Brahmā avyāpajjho so Brahmā anāgantā itthattanti.|| ||

Atha kho aññataro puriso rājānaɱ Pasenadiɱ Kosalaɱ etad avoca: 'sañjayo mahārāja,||
brāhmaṇo ākāsagotto āgato' ti.|| ||

Atha kho rājā Pasenadi kosalo sañjayaɱ brāhmaṇaɱ ākāsagottaɱ etad avoca: 'ko nu kho brāhmaṇa,||
imaɱ kathāvatthuɱ rājantepure abbhudāhāsīti?

'Viḍūḍabho mahārāja,||
senāpatī' ti.|| ||

Viḍūḍabho senāpati evam āha: sañjayo mahārāja,||
brāhmaṇo ākāsagotto' ti.|| ||

Atha kho aññataro puriso rājānaɱ Pasenadiɱ Kosalaɱ etad avoca.|| ||

Yānakālo Mahārājāti.|| ||

Atha kho rājā Pasenadi kosalo Bhagavantaɱ etad avoca: sabbaññūtaɱ mayaɱ bhante Bhagavantaɱ apucchimhā sabbaññūtaɱ Bhagavā vyākāsi.|| ||

Tañ ca pan amhākaɱ ruccati c'eva khamati ca,||
tena c'amhā attamanā cātuvaṇṇiɱ suddhiɱ1 mayaɱ bhante,||
Bhagavantaɱ apucchimhā cātuvaṇṇiɱ suddhiɱ Bhagavā vyākāsi tañ ca pan amhākaɱ ruccati.|| ||

Ceva khamati ca.|| ||

Tena c'amhā attamanā adhideve mayaɱ|| ||

Bhante,||
Bhagavantaɱ apucchimhā,||
adhideve Bhagavā vyākāyi.|| ||

Tañ ca pan amhākaɱ ruccati c'eva khamati ca.|| ||

Tena c'amhā attamanā.|| ||

AdhiBrahmānaɱ mayaɱ bhante,||
Bhagavantaɱ apucchimhā,||
adhiBrahmānaɱ Bhagavā vyākāsi.|| ||

Tañ ca pan amhākaɱ ruccati c'eva khamati ca,||
tena c'amhā attamanā.|| ||

Yaɱ yadeva ca pana maya bhante,||
Bhagavantaɱ apucchimhā taɱ tad-eva Bhagavā vyākāsi.|| ||

Tañ ca pan amhākaɱ ruccati c'eva khamati ca,||
tena c'amhā attamanā handa [133] cadāni mayaɱ bhante,||
gacchāma bahukiccā mayaɱ bahukaraṇīyāti.|| ||

Yassadāni tvaɱ mahārāja,||
kālaɱ maññasiti.|| ||

Atha kho rājā Pasenadi kosalo Bhagavato bhāsitaɱ abhinanditvā anumoditvā uṭṭhāy āsanā Bhagavantaɱ abhivādetvā padakkhiṇaɱ katvā pakkāmīti.|| ||

Kaṇṇakatthala suttaɱ dasamaɱ


 

Contact:
E-mail
Copyright Statement   Webmaster's Page