Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
5. Brāhmaṇa Vagga

Sutta 94

Ghoṭamukha Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ|| ||

Ekaɱ samayaɱ āyasmā udeno Bārāṇasiyaɱ viharati khemiyAmbavane.|| ||

Tena kho pana samayena ghoṭamukho brāhmaṇo bārāṇasiɱ anuppatto hoti kenacid-eva karaṇīyena.|| ||

Atha kho ghoṭamukho brāhmaṇo [158] chaŋghāvihāraɱ anucaŋkamamāno anuvicaramāno yena khemiyambavanaɱ ten'upasaŋkami.|| ||

Tena kho pana samayena āyasmā udeno abbhokāse caŋkamati.|| ||

Atha kho so ghoṭamukho brāhmaṇo yen'āyasmā udeno ten'upasaŋkami,||
upasaŋkamitvā āyasmatā udenena saddhiɱ sammodi,||
sammodanīyaɱ kathaɱ sārāṇīyaɱ vītisāretvā āyasmantaɱ udenaɱ caŋkamantaɱ anucaŋkamamāno evam āha: ambho samaṇa,||
n'atthi dhammiko paribbājo,||
evaɱ me ettha hoti,||
tañ ca kho bhavantarūpānaɱ vā adassanā,||
yo vā pan'ettha dhammo' ti.|| ||

Evaɱ vutte āyasmā udeno caŋkamā orohitvā vihāraɱ pavisitvā paññatte āsane nisīdi.|| ||

Ghoṭamukhopi kho brāhmaṇo caŋkamā orohitvā vihāraɱ pavisitvā eka-m-antaɱ aṭṭhāsi.|| ||

Eka-m-antaɱ ṭhitaɱ kho ghoṭamukhaɱ brāhmaṇaɱ āyasmā udeno etad avoca: saɱvijjante kho brāhmaṇa,||
āsanāni sace ākaŋkhasi nisidā' ti.

Etad eva ca kho pana mayaɱ bhoto udenassa āgamayamānā na nisīdāma.|| ||

Kathaɱ hi nāma mādiso pubbe animantito āsane nisiditabbaɱ maññeyyā' ti.|| ||

Atha kho ghoṭamukho brāhmaṇo aññataraɱ nīcaɱ āsanaɱ gahetvā eka-m-antaɱ nisīdi.|| ||

Eka-m-antaɱ nisinno kho ghoṭamukho brāhmaṇo āyasmantaɱ udenaɱ etad avoca: ambho samaṇa,||
n'atthi dhammiko paribbājo,||
evaɱ me ettha hoti,||
tañ ca kho bhavantarūpānaɱ vā adassanā,||
yo vā pan'ettha dhammo' ti.|| ||

Sace kho pana me tvaɱ brāhmaṇa,||
anuññeyyaɱ anujāneyyāsi,||
paṭikkositabbañ ca paṭikkoseyyāsi,||
yassa ca pana me bhāsitassa attha na jāneyyāsi,||
mamaɱyeva tattha uttariɱ paṭipuccheyyāsi: idaɱ bho udena kathaɱ,||
imassa kvatthoti? Evaɱ katvā sayā no ettha kathāsallāpoti.|| ||

Anuññeyyaɱ khvāhaɱ bhoto udenassa anujānissāmi,||
paṭikkositabbañca paṭikkosissāmi.|| ||

Yassa ca panāhaɱ [159] bhoto udenassa bhāsitassa atthaɱ na jānissāmi,||
bhavantaɱyeva tattha udenaɱ uttariɱ paṭipucchissāmi: idaɱ bho udena kathaɱ,||
imassa kvattho' ti?|| ||

Evaɱ katvā hotu no ettha kathāsallāpoti.|| ||

Cattāro'me brāhmaṇa,||
puggalā santo saɱvijjamānā lokasmiɱ,||
katame cattāro: idha brāhmaṇa,||
ekacco puggalo attantapo hoti attaparitāpanānuyogamanuyutto.|| ||

Idha pana brāhmaṇa,||
ekacco puggalo parantapo hoti paraparitāpanānuyogamanuyutto.|| ||

Idha brāmhaṇa,||
ekacco puggalo attantapo ca hoti attaparitāpanānuyogamanuyutto,||
parantapo ca paraparitāpanānuyogamanuyutto.|| ||

Idha pana brāhmaṇa,||
ekacco puggalo n'evattantapo hoti nāttaparitāpanānuyogamanuyutto,||
na parantapo na paraparitāpanānuyogamanuyutto,||
so anattantapo aparantapo diṭṭhe va dhamme nicchāto nibbuto sītibhūto sukhapaṭisaŋvedi brahmabhūtena attanā viharati.|| ||

Imesaɱ brāhmaṇa,||
catunnaɱ puggalānaɱ katamo te puggalo cittaɱ ārādhetī' ti?|| ||

Yvāyaɱ bho udena,||
puggalo attantapo attaparitāpanānuyogamanuyutto,||
ayaɱ me puggalo cittaɱ nārādheti.|| ||

Yopāyaɱ bho udena,||
puggalo parantapo paraparitāpanānuyogamanuyutto,||
ayam pi me puggalo cittaɱ nārādheti.|| ||

Yopāyaɱ bho udena,puggalo attantapo ca attaparitāpanānuyogamanuyutto parantapo ca paraparitāpanānuyogamanuyutto,||
ayam pi me puggalo cittaɱ nārādheti.|| ||

Yo ca kho ayaɱ bho udena,||
puggalo n'evattantapo nāttaparitāpanānuyogamanuyutto na parantapo na paraparitāpanānuyogamanuyutto,||
so anattantapo aparantapo diṭṭh'evadhamme nicchāto nibbuto sītībhūto sukhapaṭisaŋvedi brahmabhūtena attanā viharati.|| ||

Ayaɱ me puggalo cittaɱ ārādhetī' ti.|| ||

Kasmā pana te brāhmaṇa,||
ime tayo puggalā cittaɱ nārādhen' ti?|| ||

Yvāyaɱ bho udena,||
puggalo attantapo attaparitāpanānuyogamanuyutto,||
so attānaɱ sukhakāmaɱ dukkhapaṭikkūlaɱ ātāpeti paritāpeti,iminā me ayaɱ puggalo cittaɱ nārādheti.|| ||

[160] Yopāyaɱ bho udena,||
puggalo parantapo paraparitāpanānuyogamanuyutto,||
so paraɱ sukhakāmaɱ dukkhapaṭikkūlaɱ ātāpeti paritāpeti,||
iminā me ayaɱ puggalo cittaɱ nārādheti.|| ||

Yopāyaɱ bho udena,||
puggalo attantapo ca attaparitāpanānuyogamanuyutto,||
parantapo ca paraparitāpanānuyogamanuyutto,||
so attānañ ca parañca sukhakāmaɱ dukkhapaṭikkūlaɱ ātāpeti paritāpeti,||
iminā me ayaɱ puggalo cittaɱ nārādheti.|| ||

Yo ca kho ayaɱ bho udena,||
puggalo n'evattantapo nāttaparitāpanānuyogamanuyutto na parantapo na paraparitāpanānuyogamanuyutto,||
so anattantapo aparantapo diṭṭh'evadhamme nicchāto nibbuto sītībhūto sukhapaṭisaŋvedi brahmabhūtena attanā viharati.|| ||

So attānañ ca parañca sukhakāme dukkhapaṭikkūle n'eva ātāpeti,||
na paritāpeti,||
iminā me ayaɱ puggalo cittaɱ ārādhe' ti.|| ||

Dvemā brāhmaṇa parisā,||
katamā dve: idha brāhmaṇa,||
ekaccā parisā sārattarattā maṇikuṇḍalesu puttabhariyaɱ pariyesati,||
dāsidāsaɱ pariyesati,||
khettavatthuɱ pariyesati,||
jātarūparajataɱ pariyesati.|| ||

Idha pana brāhmaṇa,||
ekaccā parisā asārattarattā maṇikuṇḍalesu puttabhariyaɱ pahāya dāsidāsaɱ pahāya khettavatthuɱ pahāya jātarūparajataɱ pahāya agārasmā anagāriyaɱ pabbajitā.|| ||

Yvāyaɱ brāhmaṇa,puggalo n'evattantapo nāttaparitāpanānuyogamanuyutto na parantapo na paraparitāpanānuyogamanuyutto,||
so anattantapo aparantapo diṭṭh'evadhamme nicchāto nibbuto sītībhūto sukhapaṭisaŋvedi brahmabhūtena attanā viharati.|| ||

Imaɱ tvaɱ brāhmaṇā,puggalaɱ katamassa parisāyaɱ bahulaɱ samanupassasi: yā cāyaɱ parisā sārattarattā maṇikuṇḍalesu puttabhariyaɱ pariyesati,||
dāsidāsaɱ pariyesati,||
khettavatthuɱ pariyesati,||
jātarūparajataɱ pariyesati.|| ||

Yā cāyaɱ parisā asārattarattā maṇikuṇḍalesu puttabhariyaɱ pahāya dāsidāsaɱ pahāya khettavatthuɱ pahāya jātarūparajataɱ pahāya agārasmā anagāriyaɱ pabbajitā' ti.|| ||

[161]Yvāyaɱ bho udena,||
puggalo n'evattantapo nāttaparitāpanānuyogamanuyutto,||
na parantapo na paraparitāpanānuyogamanuyutto,||
so anattantapo aparantapo diṭṭh'evadhamme nicchāto nibbuto sitībhūto sukhapaṭisaŋvedi brahmabhūtena attanā viharati.|| ||

Imāhaɱ puggalaɱ yā'yaɱ parisā asārattarattā maṇikuṇḍalesu puttabhariyaɱ pahāya dāsidāsaɱ pahāya khettavatthuɱ pahāya jātarūparajataɱ pahāya agārasmā anagāriyaɱ pabbājitā,||
imissaɱ parisāyaɱ bahulaɱ samanupassāmi' ti.|| ||

Idān'eva kho pana te brāhmaṇa,||
bhāsitaɱ: mayaɱ evaɱ ājānāma,||
ambho samaṇa,||
n'atthi dhammiko paribbājo,||
evaɱ me ettha hoti,||
tañ ca kho bhavantarūpānaɱ vā adassanā,||
yo vā pan'ettha dhammo' ti.|| ||

Addhāmesā bho udena,||
sānuggahā vācā bhāsitā atthi dhammiko paribbājo,||
evaɱ me ettha hoti,||
evañca pana maɱ bhavaɱ udeno dhāretu.|| ||

Yecime bhotā udenena cattāro puggalo saŋkhittena vuttā vitthārena avibhattā,||
sādhu me bhavaɱ udeno ime cattāro puggale vitthārena vibhajatu anukampaɱ upādāyāti.|| ||

Tena hi brāhmaṇa,||
suṇāhi,sādhukaɱ manasi karohi,||
bhāsissāmiti.|| ||

Evaɱ bhoti kho ghoṭamukho brāhmaṇo āyasmato udenassa paccassosi.|| ||

Āyasmā udeno etad avoca:|| ||

Katamo ca brāhmaṇa,||
puggalo attantapo attaparitāpanānuyogamanuyutto: idha brāhmaṇa,||
ekacco puggalo acelako hoti muttācāro,||
hatthāvalekhano na ehibhadantiko na tiṭṭhabhadantiko nābhihaṭaɱ na uddissa kaṭaɱ na nimantanaɱ sādiyati,||
so na kumhimukhā patigaṇhāti,||
na khalopimukhā patigaṇhāti,||
na eḷakamantaraɱ na daṇḍamantaraɱ na musalamantaraɱ na dvinnaɱ bhuñjamānānaɱ na gabbhiniyā na pāyamānāya [162] na purisantaragatāya na saŋkittīsu na yattha sā upaṭṭhito hoti,||
na yattha makkhikā saṇḍasaṇḍacārinī,||
na macchaɱ na maɱsaɱ na suraɱ na merayaɱ na thusodakaɱ pivati,||
so ekāgāriko vā hoti ekālopiko vā,||
dvāgāriko vā hoti dvālopiko vā sattāgāriko vā hoti sattālopiko vā,ekissāpi dattiyā yāpeti,||
dvīhipi dattīhi yāpeta sattahipi dattehi yāpeti.|| ||

Ekāhikam pi āhāraɱ āhāreti,||
dvīhikampi āhāraɱ āhāreti,||
sattāhikampi āhāraɱ āhāreti iti evarūpaɱ addhamāsikampi pariyāyabhattabhojanānuyogamanuyutto viharati.|| ||

So sākabhakkho vā heti,||
sāmākabhakkho vā hoti,||
nīvārabhakkho vā hoti daddulabhakkho vā hoti,||
haṭabhakkho vā hoti,||
kaṇabhakkho vā hoti,||
ācāmabhakkho vā hoti,||
piññākabhakkho vā hoti.|| ||

Tiṇabhakkho vā hoti,||
gomayabhakkho vā hoti,||
vanamūlaphalāhāro yāpeti pavattaphalabhoji.|| ||

Se sāṇāni pi dhāreti,||
masāṇāni pi dhāreti,||
cavadussāni pi dhāreti,||
paɱsukulāni pi dhāreti,||
tirīṭāni pi dhāreti,||
ajināni pi dhāreti,||
ajinakkhipam pi dhāreti,||
kusacīram pi dhāreti,||
vākacīram pi dhāreti,||
phalakacīram pi dhāreti.|| ||

Kesakambalam pi dhāreti,||
vā'akambalam pi dhāreti,||
ulūkapakkham pi dhāreti.|| ||

Kesamassulocako pi hoti kesamassulocanānuyogamanuyutto,||
ubbaṭṭako pi hoti āsanapaṭikkhitto,||
ukkuṭiko pi hoti ukkuṭikappadhānamanuyutto,||
kaṇṭakāpassayiko pi hoti kaṇṭakāpassaye seyyaɱ kappeti,||
sāyatatiyakam pi udakorohaṇānuyogamanuyutto viharati.|| ||

Iti evarūpaɱ aneka-vihitaɱ kāyassa ātāpanaparitāpanānuyogamanuyutto viharati.|| ||

Ayaɱ vuccati brāhmaṇa,puggalo attantapo attaparitāpanānuyogamanuyutto.|| ||

Katamo ca brāhmaṇa,||
puggalo parantapo paraparitāpanānuyogamanuyutto: idha brāhmaṇa,||
ekacco puggalo orabhiko hoti,||
sūkariko sākuntiko māgaviko eddo macchaghātako coro coraghātako bandhanāgāriko,||
ye vā pan'aññe pi keci Kurūrakammantā,ayaɱ vuccati brāhmaṇa,||
puggalo parantapo paraparitāpanānuyogamanuyutto.|| ||

Katamo ca brāhmaṇa,||
puggalo attantapo ca attaparitāpanānuyogamanuyutto parantapo ca paraparitāpanānuyogamanuyutto: idha brāhmaṇa,||
ekacco puggalo rājā vā hoti khattiyo muddhābhisitto,||
brāhmaṇā vā mahāsāḷo,||
so puratthimena nagarassa navaɱ santhāgāraɱ kārāpetvā kesamassuɱ ohāretvā kharājinaɱ nivāsetvā sappitelena kāyaɱ abbhañjitvā migavisāṇena piṭṭhiɱ kaṇaḍūvamāno santhāgāraɱ pavisati saddhiɱ mahesiyā brāhmaṇena ca purohitena.|| ||

So tattha anantarahitāya bhūmiyā haritupattāya seyyaɱ kappeti,||
ekissā gāviyā sarūpavacchāya yaɱ ekasmiɱ thane khiraɱ hoti,||
tena rājā yāpeti.|| ||

Yaɱ dutiyasmiɱ thane khīraɱ hoti,||
tena mahesi yāpeti.|| ||

Yaɱ tatiyasmiɱ thane khiraɱ hoti,||
tena brāhmaṇo purohito yāpeti.|| ||

Yaɱ catutthasmiɱ thane khīraɱ hoti,||
tena aggiɱ juhanti.|| ||

Avasesena vacchako yāpeti.|| ||

So evam āha: 'ettakā usabhā haññantu yaññatthāya,||
ettakā vacchatarā haññantu yaññatthāya,||
ettikā vacchatariyo haññantu yaññatthāya,||
ettakā ajā haññantu yaññatthāya,||
ettakā urabbhā haññantu yaññatthāya,||
ettakā rukkhā chijjantu yūpatthāya,||
ettakā dabbā lūyantu barihisatthāyā' ti.|| ||

Ye pissa te honti dāsāti vā pessāti vā kammakarāti vā,||
tepi daṇḍatajjitā bhayatajjitā assumukhā rudamānā parikammāni karonti.|| ||

Ayaɱ vuccati brāhmaṇa,||
puggalo attantapo ca attaparitāpanānuyogamanuyutto parantapo ca paraparitāpanānuyogamanuyutto.|| ||

Katamo ca brāhmaṇa,||
puggalo n'evattantapo nāttaparitāpanānuyogamanuyutto,||
na parantapo na paraparitāpanānuyogamanuyutto,||
so anattantapo aparantapo diṭṭh'evadhamme nicchāto nibbuto sitībhūto sukhapaṭisaŋvedi brahmabhūtena attanā viharati: 'idha brāhmaṇa,||
Tathāgato loke uppajjati arahaɱ Sammā-sambuddho vijjā-caraṇa-sampanno sugato loka-vidū anuttaro purisadammasārathi satthā deva-manussānaɱ buddho Bhagavā.|| ||

So imaɱ lokaɱ sadevakaɱ samārakaɱ sabrahmakaɱ sassamaṇa-brāhmaṇiɱ pajaɱ sadeva-manussaɱ sayaɱ abhiññā sacchikatvā pavedeti.|| ||

So dhammaɱ deseti ādi kalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Taɱ dhammaɱ suṇāti gahapati vā gahapatiputto vā aññatarasmiɱ kule paccājāto,||
so taɱ dhammaɱ sutvā Tathāgate saddhaɱ paṭilabhati.|| ||

So tena saddhā paṭilābhena samannāgato iti paṭisañcikkhati: 'sambādho gharāvāso rajāpatho,||
abbhokāso pabbajjā,||
na-y-idaɱ sukaraɱ agāraɱ ajjhāvasatā ekanta-paripuṇṇaɱ ekanta-parisuddhaɱ saŋkhalikhitaɱ brahmacariyaɱ carituɱ,||
yan nūnāhaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyya'nti.|| ||

So aparena samayena appaɱ vā bhogakkhandhaɱ pahāya mahantaɱ vā bhogakkhandhaɱ pahāya appaɱ vā ñāti parivaṭṭaɱ pahāya mahantaɱ vā ñātiparivaṭṭaɱ pahāya kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajati.|| ||

So evaɱ pabbajito samāno bhikkhūnaɱ sikkhāsājivasamāpanno pāṇātipātaɱ pahāya pāṇātipātā paṭivirato hoti,||
nihita-daṇḍo nihita-sattho lajji dayāpanno sabba-pāṇa-bhūta-hitānukampī viharati.|| ||

Adinnādānaɱ pahāya adinnādānā paṭivirato hoti,||
dinnādāyī dinna-pāṭikaŋkhī athenena suci-bhūtena attanā viharati.|| ||

Abrahmacariyaɱ pahāya brahmacārī hoti,||
ārā-cārī virato methunā gāma-dhammā.|| ||

Musā-vādaɱ pahāya musā-vādā paṭivirato hoti,||
sacca-vādī sacca-sandho theto paccayiko avisaɱvādako lokassa.|| ||

Pisunaɱ vācaɱ pahāya pisunāya vācāya paṭivirato hoti,||
ito sutvā na amutra akkhātā imesaɱ bhedāya,amutra vā sutvā na imesaɱ akkhātā amūsaɱ bhedāya,||
iti bhinnānaɱ vā sandhātā sahitānaɱ vā anuppadātā,||
samaggārāmo samagga-rato samagganandi samagga-karaṇiɱ vācaɱ bhāsitā hoti.|| ||

Pharusaɱ vācaɱ pahāya pharusāya vācāya paṭivirato hoti,||
yā sā vācā ne'ā kaṇṇa-sukhā pemanīyā hadayaŋ-gamā porī bahujana-kantā bahujana-manāpā,||
tathārūpaɱ vācaɱ bhāsitā hoti.|| ||

Samphappalāpaɱ pahāya samphappalāpā paṭivirato hoti,||
kāla-vādī bhūta-vādī attha-vādī dhamma-vādī vinaya-vādī nidhānavatiɱ vācaɱ bhāsitā kālena sāpadesaɱ pariyantavatiɱ atthasaɱhitaɱ.|| ||

So bījagāma-bhūtagāma-samārambhā paṭivirato hoti.|| ||

Eka-bhattiko hoti rattuparato virato vikāla-bhojanā.|| ||

Nacca-gīta-vādita-visūka-dassanā paṭivirato hoti.|| ||

Mālā-gandha-vilepana-dhāraṇa-maṇḍana-vibhūsana-ṭṭhānā paṭivirato hoti.|| ||

Uccāsayana-mahāsayanā paṭivirato hoti.|| ||

Jātarūparajatapaṭiggahanā paṭivirato hoti āmakadhaññapaṭiggahanā paṭivirato hoti.|| ||

Āmakamaɱsapaṭiggahanā paṭivirato hoti.|| ||

Itthikumārikapaṭiggahanā paṭivirato hoti.|| ||

Dāsidāsapaṭiggahanā paṭivirato hoti.|| ||

Ajeḷakapaṭiggahanā paṭivirato hoti.|| ||

Kukkuṭasūkarapaṭiggahanā paṭivirato hoti.|| ||

Hatthigavāssava'avāpaṭiggahanā paṭivirato hoti.|| ||

Khettavatthupaṭiggahanā paṭivirato hoti.|| ||

Dūteyyapahīnagamanānuyogā paṭivirato hoti.|| ||

Kaya-vikkayā paṭivirato hoti.|| ||

Tulākūṭakaɱsakuṭamānakūṭā paṭivirato hoti.|| ||

Ukkoṭana-vañcana-nikati-sāci-yogā paṭivirato hoti.|| ||

Chedana-vadhabandhana-viparāmosa-ālopa-sahasākārā paṭivirato hoti.|| ||

So santuṭṭho hoti kāyaparihārikena cīvarena,||
kucchiparihārikena piṇḍapātena,||
so yena yen'eva pakkamati,||
samādāyeva pakkamati.|| ||

Seyyathā pi nāma pakkhī sakuṇo yena yen'eva ḍeti,||
sapattabhārova ḍeti.|| ||

Evam evaɱ bhikkhu santuṭṭho hoti kāyaparihāri kena cīvarena,||
kucchiparihārikena piṇḍapātena.|| ||

Yena yen'eva pakkamati samādāyeva pakkamati.|| ||

So iminā ariyena sīlakkhandhena samannāgato ajjhattaɱ anavajjasukhaɱ paṭisaŋvedeti.|| ||

So cakkhunā rūpaɱ disvā na nimittaggāhī hoti nānuvyañjanaggāhī,||
yatvādhikaraṇamenaɱ cakkhu'ndriyaɱ asaɱvutaɱ viharantaɱ abhijjhā domanassā pāpakā akusalādhammā anvāssaveyyuɱ,tassa saɱvarāya paṭipajjati,rakkhati cakkhu'ndriyaɱ,cakkhu'ndriyesaɱvaraɱ āpajjati.|| ||

So sotena saddaɱ sutvā na nimittaggāhī hoti nānuvyañjanaggāhī,||
yatvādhikaraṇamenaɱ sotendriyaɱ asaɱvutaɱ viharantaɱ abhijjhā domanassā pāpakā akusalādhammā anvāssaveyyuɱ,tassa saɱvarāya paṭipajjati,rakkhati sotendriyaɱ,||
sotendriyesaɱvaraɱ āpajjati.|| ||

So ghānena gandhaɱ ghāyitvā na nimittaggāhī hoti nānuvyañjanaggāhī,||
yatvādhikaraṇamenaɱ ghānendriyaɱ asaɱvutaɱ viharantaɱ abhijjhā domanassā pāpakā akusalādhammā anvāssaveyyuɱ,tassa saɱvarāya paṭipajjati,rakkhati ghānendriyaɱ,ghānendriye saɱvaraɱ āpajjati.|| ||

So jivhāya rasaɱ sāyitvā na nimittaggāhī hoti nānuvyañjanaggāhī,||
yatvādhikaraṇamenaɱ jivhendriyaɱ asaɱvutaɱ viharantaɱ abhijjhā domanassā pāpakā akusalādhammā anvāssaveyyuɱ,tassa saɱvarāya paṭipajjati,rakkhati jivhendriyaɱ,jivhendriye saɱvaraɱ āpajjati.|| ||

So kāyena phoṭṭhabbaɱ phūsitvā na nimittaggāhī hoti nānuvyañjanaggāhī,||
yatvādhikaraṇamenaɱ kāyendriyaɱ asaɱvutaɱ viharantaɱ abhijjhā domanassā pāpakā akusalādhammā anvāssaveyyuɱ,tassa saɱvarāya paṭipajjati,rakkhati kāyendriyaɱ,kāyendriye saɱvaraɱ āpajjati.|| ||

So manasā dhammaɱ viññāya na nimittaggāhī hoti nānuvyañjanaggāhī,||
yatvādhikaraṇamenaɱ manendriyaɱ asaɱvutaɱ viharantaɱ abhijjhā domanassā pāpakā akusalādhammā anvāssaveyyuɱ,tassa saɱvaraɱ paṭipajjati,rakkhati manendriyaɱ,manendriye saɱvaraɱ āpajjati.|| ||

So iminā ariyena indriyasaɱvarena samannāgato ajjhattaɱ abyāsekasukhaɱ paṭisaŋvedeti|| ||

So abhikkante paṭikkante sampajānakārī hoti,||
ālokite vilokite sampajānakārī hoti,||
sammiñjite pasārite sampajānakārī hoti,||
sanghāṭipattacīvaradhāraṇe sampajānakārī hoti,||
asite pīte khāyite sāyite sampajānakārī hoti,||
uccārapassāvakamme sampajānakārī hoti,||
gate ṭhite nisinne sutte jāgarite bhāsite tuṇhībhāve sampajānakārī hoti.|| ||

So iminā ca ariyena sīlakkhandhena samannāgato iminā ca ariyena indriyasaɱvarena samannāgato iminā ca ariyena satisampajaññena samannāgato vivittaɱ senāsanaɱ bhajati.|| ||

Araññaɱ rukkhamūlaɱ pabbataɱ kandaraɱ giriguhaɱ susānaɱ vanapattaɱ abbhokāsaɱ palālapuñjaɱ.|| ||

So pacchābhattaɱ piṇḍapātapaṭikkanto nisīdati pallaŋkaɱ ābhujitvā ujuɱ kāyaɱ panidhāya,||
parimukhaɱ satiɱ upaṭṭhapetvā.|| ||

So abhijjhaɱ loke pahāya vigatābhijjhena cetasā viharati,||
abhijjhāya cittaɱ parisodheti.|| ||

Vyāpādapadosaɱ pahāya abyāpannacitto viharati sabba-pāṇa-bhūta-hitānukampī.|| ||

Vyāpādapadosā cittaɱ parisodheti,||
thīnamiddhaɱ pahāya vigatatīnamiddho viharati ālokasaññi sato sampajāno.|| ||

Thīnamiddhā cittaɱ parisodheti,||
uddaccakukkuccaɱ pahāya anuddhato viharati ajjhattaɱ vūpasantacitto.|| ||

Uddhaccakukkuccā cittaɱ parisodheti.|| ||

Vicikicchaɱ pahāya tiṇṇavicikiccho viharati akathaŋkathī kusalesu dhammesu.|| ||

Vicikicchāya cittaɱ parisodheti.|| ||

So ime pañcanīvaraṇe pahāya cetaso upakkilese paññāya dubbalīkaraṇe,||
vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja viharati.|| ||

Vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.|| ||

Pītiyā ca virāgā upekkhako ca viharati.|| ||

Sato ca sampajāno sukhañca kāyena paṭisaŋvedeti. Yantaɱ ariyā ācikkhanti:|| ||

'Upekkhako satimā sukha-vihārī' ti taɱ tatiyaɱ-jhānaɱ upasampajja viharati.|| ||

Sukhassa ca pahānā dukkhassa ca pahānā,||
pubbe va somanassa-domanassānaɱ atthaŋgamā adukkhaɱ-asukhaɱ upekkhā-sati-pārisuddhiɱ catutthaɱ-jhānaɱ upasampajja viharati.|| ||

So evaɱ samāhite citte parisuddhe pariyodāte anaŋgaṇe vigatupakkilese mudubhūte kammaniye ṭhite ānejjappatte pubbe nivāsānussatiñāṇāya cittaɱ abhininnāmeti.|| ||

So aneka-vihitaɱ pubbenivāsaɱ anussarati,||
seyyathīdaɱ: ekam pi jātiɱ dve pi jātiyo,||
Tisso pi jātiyo catasso pi jātiyo pañca pi jātiyo dasa pi jātiyo vīsatim pi jātiyo tiɱsam pi jātiyo cattārīsamipi jātiyo paññāsam pi jātiyo jāti-satam pi jāti-sahassam pi jāti-sata-sahassam pi anekepi saɱvaṭṭakappe anekepi vivaṭṭakappe anekepi saɱvaṭṭa-vivaṭṭakappe amutrāsiɱ evaɱ-nāmo evŋgotto evaɱ-vaṇṇo evam-āhāro evaɱ-sukha-dukkha-paṭisaŋvedi evam-āyu-pariyanto.|| ||

So tato cuto amutra udapādiɱ5 tatrāpāsiɱ evaɱ-nāmo evŋgotto evaɱ-vaṇṇo evam-āhāro evaɱ-sukha-dukkha-paṭisaŋvedi evam-āyu-pariyanto.|| ||

So tato cuto idhūpapanno' ti.|| ||

Iti sākāraɱ sa-uddesaɱ aneka-vihitaɱ pubbenivāsaɱ anussarati.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaniye ṭhite ānejjappatte4 sattānaɱ cūtupapātañāṇāya cittaɱ abhininnāmeti.|| ||

So dibbena cakkhunā visuddhena atikkantamānusakena satte passati cavamāne upapajjamāne,||
hine paṇīte suvaṇṇe dubbaṇṇe sugate duggate yathākammūpage satte pajānāti.|| ||

Ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchadiṭṭhikā micchādiṭṭhikammasamādānā,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā,||
ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā,||
te kāyassa bhedā param maraṇā sugatiɱ saggaɱ lokaɱ upapannā' ti.|| ||

Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti,|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaniye ṭhite ānejjappatte āsavānaɱ khayañāṇāya cittaɱ abhininnāmeti,||
so idaɱ dukkhan ti yathābhūtaɱ pajānāti,||
ayaɱ dukkhasamudayo ti yathābhūtaɱ pajānāti,||
ayaɱ dukkhanirodho ti yathābhūtaɱ pajānāti,||
ayaɱ dukkhanirodhagāminīpaṭipadā ti yathābhūtaɱ pajānāti.|| ||

Ime āsavāni yathābhūtaɱ pajānāti,||
ayaɱ āsavasamudayoti yathābhūtaɱ pajānāti,||
ayaɱ āsavanirodhoti yathābhūtaɱ pajānāti,||
ayaɱ āsavanirodhagāminīpaṭipadā ti yathābhūtaɱ pajānāti.|| ||

Tassa evaɱ jānato evaɱ passato kāmāsavā pi cittaɱ vimuccati,||
bhavāsavā pi cittaɱ vimuccati,||
avijjāsavā pi cittaɱ vimuccati.|| ||

Vimuttasmiɱ vimuttamiti ñāṇaɱ hoti: khīṇā jāti vusitaɱ brahmacariyaɱ kataɱ karaṇīyaɱ nāparaɱ itthattāyāti pajānāti.|| ||

Ayaɱ vuccati brāhmaṇa,||
puggalo n'evattantapo nāttaparitāpanānuyogamanuyutto,||
na parantapo na paraparitāpanānuyogamanuyutto,||
so anattantapo aparantapo diṭṭh'evadhamme nicchāto nibbuto sītibhūto sukhapaṭisaŋvedi brahmabhūtena attanā viharatī' ti.|| ||

Evaɱ vutte ghoṭamukho brāhmaṇo āyasmantaɱ udenaɱ etad avoca: abhikkantaɱ bho udena,||
abhikkantaɱ bho udena,||
seyyathā pi bho udena,||
nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya,||
'cakkhumanto rūpāni dakkhintī'ti,||
evam evaɱ bhotā udenena aneka-pariyāyena dhammo pakāsito.|| ||

Esāhaɱ bhavantaɱ udenaɱ saraṇaɱ gacchāmi dhammañca bhikkhu-saŋghañ ca.|| ||

Upāsakaɱ maɱ bhavaɱ udeno dhāretu ajjatagge pāṇupetaɱ saraṇaɱ gatan' ti.|| ||

Mā kho maɱ tvaɱ brāhmaṇa,saraṇaɱ agamāsi,||
tameva tvaɱ Bhagavantaɱ saraṇaɱ gaccha yamahaɱ saraṇaɱ gatoti.|| ||

Kahaɱ pana bho udena,||
etarahi so bhavaɱ Gotamo viharati arahaɱ Sammā-sambuddhoti?

Parinibbuto kho brāhmaṇa,||
etarahi so Bhagavā arahaɱ Sammā-sambuddhoti.|| ||

Sace hi mayaɱ bho udena,||
suṇeyyāma taɱ bhavantaɱ Gotamaɱ dassu yojanesu,||
dasa pi mayaɱ yojanāni gaccheyyāma taɱ bhavantaɱ Gotamaɱ dassanāya arahantaɱ sammāsambuddhaɱ.|| ||

Sace mayaɱ bho udena,||
suṇeyyāma taɱ bhavantaɱ Gotamaɱ vīsatiyā yojanesu,vīsatipi mayaɱ yojanāni gaccheyyāma taɱ bhavantaɱ Gotamaɱ dassanāya arahantaɱ sammāsambuddhaɱ.|| ||

Sace hi mayaɱ bho udena,||
suṇeyyāma taɱ bhavantaɱ Gotamaɱ tiɱsāya yojanesu,||
tiɱsmapi mayaɱ yojanāni gaccheyyāma taɱ bhavantaɱ Gotamaɱ dassanāya arahantaɱ sammāsambuddhaɱ.|| ||

Sace mayaɱ bho udena,||
suṇeyyāma taɱ bhavantaɱ Gotamaɱ cattārisāya yojanesu,||
cattārismapi mayaɱ yojanāni gaccheyyāma taɱ bhavantaɱ Gotamaɱ dassanāya arahantaɱ sammāsambuddhaɱ.|| ||

Sace mayaɱ bho udena,||
suṇeyyāma taɱ bhavantaɱ Gotamaɱ paññāsāya yojanesu,||
paññāsam pi mayaɱ yojanāni gaccheyyāma taɱ bhavantaɱ Gotamaɱ dassanāya arahantaɱ sammāsambuddhaɱ.|| ||

Yojanasatepi [163] mayaɱ bho udena,||
suṇeyyāma taɱ bhavantaɱ Gotamaɱ,||
yojanasatam pi mayaɱ gaccheyyāma taɱ bhavantaɱ Gotamaɱ dassanāya arahantaɱ sammāsambuddhaɱ.|| ||

Yato ca kho bho udena,||
parinibbuto so bhavaɱ Gotamo,||
parinibbutampi mayaɱ taɱ bhavantaɱ Gotamaɱ saraṇaɱ gacchāma dhammañca bhikkhu-saŋghañ ca.|| ||

Upāsakaɱ maɱ bhavaɱ udeno dhāretu ajjatagge pāṇupetaɱ saraṇaɱ gataɱ.|| ||

Atthi ca me bho udena,||
aŋgarājā devasikaɱ niccabhikkhaɱ dadāti.|| ||

Tatohaɱ bhoto udenassa ekaɱ niccabhikkhaɱ dadāmīti.|| ||

Kiɱ pana te brāhmaṇa,||
aŋgarājā devasikaɱ niccabhikkhaɱ dadātīti? Pañca bho udena,||
kahāpaṇasatānīti na kho no brāhmaṇa,||
kappati jātarūparajata paṭiggahetunti.|| ||

Sace taɱ bhoto udenassa na kappati,||
vihāraɱ bhoto udenassa kārāpessāmīti.|| ||

Sace kho me tvaɱ brāhmaṇa,||
vihāraɱ kārāpetukāmo,pāṭalīputte Saŋghassa upaṭṭhānasālaɱ kārāpehīti.|| ||

Imināp'ahaɱ1 bhoto udenassa bhīyosomattāya attamano abhiraddho,||
yaɱ maɱ bhavaɱ udeno saŋghe dāne samādapeti.|| ||

Esāhaɱ bho udena,||
etissā ca niccabhikkhāya aparāya ca niccabhikkhāya pāṭaliputte Saŋghassa upaṭṭhānasālaɱ kārāpessāmiti.|| ||

Atha kho ghoṭamukho brāhmaṇo etissā ca niccabhikkhāya aparāya ca niccabhikkhāya pāṭaliputte Saŋghassa upaṭṭhānasālaɱ kārāpesi.|| ||

Sā etarahi ghoṭamukhiti vuccatī ti.|| ||

Ghoṭamukhasuttaɱ catutthaɱ


 

Contact:
E-mail
Copyright Statement   Webmaster's Page