Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
5. Brāhmaṇa Vagga

Sutta 98

Vāseṭṭha Suttaɱ

Based on the 'Sri Lanka Buddha Jayanti Tripitaka Series.'

Note: There is no Pali text for this sutta in the PTS edition. It is indicated by the note: "[The text of this Sutta is identical with that of Sutta No. 35 of the Suttanipāta.]

 


[196]

[1][chlm][pts][upal] Evaɱ me sutaɱ|| ||

Ekaɱ samayaɱ Bhagavā Icchānaŋgale viharati Icchānaŋgalavanasaṇḍe.|| ||

Tena kho pana samayena sambahulā abhiññātā abhiññātā brāhmaṇamahāsā'ā Icchānaŋgale paṭivasanti.|| ||

Seyyathīdaɱ:||
Caŋkī brāhmaṇo,||
Tārukkho brāhmaṇo,||
Pokkharasāti brāhmaṇo,||
Jānussoṇi brāhmaṇo,||
Todeyyo brāhmaṇo,||
añño ca abhiññātā abhiññātā brāhmaṇamahāsā'ā.|| ||

Atha kho vāseṭṭhabhāradvājānaɱ māṇavānaɱ jaŋghāvihāraɱ anucaŋkamamānānaɱ anuvicaramānānaɱ ayamantarā kathā udapādi:|| ||

'Kathambho brāhmaṇo hotī' ti.|| ||

Bhāradvājo māṇavo evam āha:|| ||

"Yato kho bho ubhato sujāto hoti mātito ca pitito ca,||
saɱsuddhagahaṇiko yāva sattamā pitāmahayugā akkhitto anupakkuṭṭho jātivādena.|| ||

Ettāvatā kho bho,||
brāhmaṇo hoti" ti.|| ||

Vāseṭṭho māṇavo evam āha:|| ||

"Yato kho bho,||
sīlavā ca hoti vatasampanno ca.|| ||

Ettāvatā kho bho,||
brāhmaṇo hotī" ti.|| ||

N'eva kho asakkhī bhāradvājo māṇavo vāseṭṭhaɱ māṇavaɱ saññāpetuɱ.|| ||

Na pana asakkhi vāseṭṭho māṇavo bhāradvājaɱ māṇavaɱ saññāpetuɱ.|| ||

Atha kho vāseṭṭho māṇavo bhāradvājaɱ māṇavaɱ āmantesi:|| ||

"Ayaɱ kho bho bhāradvāja,||
Samaṇo Gotamo Sakyaputto Sakyakulā pabbajito Icchānaŋgale viharati Icchānaŋgalavanasaṇḍe.|| ||

Taɱ kho pana Bhagavantaɱ Gotamaɱ evaɱ kalyāṇo kittisaddo abbhuggato:|| ||

"Iti pi so Bhagavā arahaɱ Sammā-sambuddho vijjā-caraṇa-sampanno sugato loka-vidū anuttaro purisa-damma-sārathī satthā deva-manussānaɱ buddho Bhagavā" ti.|| ||

Āyāma bho bhāradvāja,||
yena Samaṇo Gotamo ten'upasaŋkamissāma.|| ||

Upasaŋkamitvā samaṇaɱ Gotamaɱ etam atthaɱ pucchissāma.|| ||

Yathā no Samaṇo Gotamo vyākarissati.|| ||

Tathā naɱ dhāressāmā" ti.|| ||

"Evam bho" ti kho bhāradvājo māṇavo vāseṭṭhassa māṇavassa paccassosi.|| ||

Atha kho vāseṭṭha,||
bhāradvājā māṇavā yena Bhagavā ten'upasaŋkamiɱsu.|| ||

Upasaŋkamitvā Bhagavatā saddhiɱ sammodiɱsu,||
sammodanīyaɱ kathaɱ sārāṇiyaɱ vītisāretvā eka-m-antaɱ nisīdiɱsu.|| ||

Eka-m-antaɱ nisinno kho vāseṭṭho māṇavo Bhagavantaɱ gāthāhī ajjhabhāsi:|| ||

"Anuññātapaṭiññātā tevijjā mayamassu bho||
Ahaɱ pokkharasātissa tārukkhassāyaɱ māṇavo|| ||

Tevijjānaɱ yadakkhātaɱ tattha kevalino'smase||
Padakasmā veyyākaraṇā jappe ācariyasādisā.|| ||

Tesaɱ no jātivādasmiɱ vivādo atthi Gotama,||
Jātiyā brāhmaṇo hoti bhāradvajo iti bhāsati||
Ahañ ca kammanā brūmi evaɱ jānāhi cakkhuma.|| ||

Te na Sakkoma ñāpetuɱ aññamaññaɱ mayaɱ ubho||
Bhagavantaɱ puṭṭumāgamma samBuddhaɱ iti vissutaɱ.|| ||

Candaɱ yathā khayātītaɱ pecca pañjalikā janā||
Candamānā namassanti evaɱ lokasmiɱ Gotamaɱ||
Cakkhuɱ loke samuppannaɱ mayaɱ pucchāma Gotamaɱ.|| ||

Jātiyā brāhmaṇo hoti udāhu bhavati kammanā||
Ajānataɱ no pabrūhi yathā jānemu brāhmaṇanti.|| ||

Tesaɱ vohaɱ vyācikkhi'ssaɱ (vāseṭṭhāti Bhagavā) anupubbaɱ yathātathaɱ||
Jātivibhaŋgaɱ pāṇānaɱ aññamaññā hi jātiyo.|| ||

Tiṇarukkhe pi jānātha na cāpi paṭijānare||
Liŋgaɱ jātimayaɱ tesaɱ aññamaññā hi jātiyo.|| ||

Catuppade pi jānātha khuddake ca mahallake||
Liŋgaɱ jātimayaɱ tesaɱ aññamaññā hi jātiyo|| ||

Pādūdare pi jānātha urage dīghapiṭṭhike||
Liŋgaɱ jātimayaɱ tesaɱ aññamaññā hi jātiyo.|| ||

Tato macche pi jānātha udake vārigocare||
Liŋgaɱ jātimayaɱ tesaɱ aññamaññā hī jātiyo.|| ||

Tato pakkhī pi jānātha pattayāne vihaŋgame||
Liŋgaɱ jātimayaɱ tesaɱ aññamaññā hi jātiyo.|| ||

Yathā etāsu jātīsu liŋgaɱ jātimayaɱ puthu||
Evaɱ n'atthi manussesu liŋgaɱ jātamayaɱ puthu.|| ||

Na kesehi na sīsehi na kaṇṇehi na akkhihi,||
Na mukhena na nāsāya na oṭṭhehi bhamuhi vā.|| ||

Na gīvāya na aɱsehi na udarena na piṭṭiyā||
Na soṇiyā na urasā na sambādhena methune.|| ||

Na hatthehi na pādehi nāŋgulīhi nakhehi vā||
Na jaŋghāhi na ūruhi na vaṇṇena sarena vā||
Liŋgaɱ jātimayaɱ n'eva yathā aññāsu jātisu.|| ||

Paccattaɱ ca sarīresu manussesvetaɱ na vijjati||
Vokārañca manussesu samaññāya pavuccati.|| ||

Yo hi koci manussesu gorakkhaɱ upajīvati||
Evaɱ vāseṭṭha jānāhi kassako so na brāhmaṇo.|| ||

Yo hi koci manussesu puthusippena jīvati||
Evaɱ vāseṭṭha jānāhi sippiko so na brāhmaṇo.|| ||

Yo hi koci manussesu vohāraɱ upajīvati||
Evaɱ vāseṭṭha jānāhi vāṇijo so na brāhmaṇo.|| ||

Yo hi koci manussesu parapessena jīvati||
Evaɱ vāseṭṭha jānāhi pessiko so na brāhmaṇo.|| ||

Yo hi koci munussesu adinnaɱ upajīvati||
Evaɱ vāseṭṭha jānāhi coro eso na brāhmaṇo|| ||

Yo hi koci manussesu issatthaɱ upajīvati||
Evaɱ vāseṭṭha jānāhi yodhājivo na brāhmaṇo.|| ||

Yo hi koci manussesu porohiccena jīvati||
Evaɱ vāseṭṭha jānāhi yājako so na brāhmaṇo.|| ||

Yo hi koci manussesu gāmaɱ raṭṭhañca bhuñjati||
Evaɱ vāseṭṭha jānāhi rājā eso na brāhmaṇo.|| ||

Na cāhaɱ brāhmaṇaɱ brūmi yonijaɱ mattisambhavaɱ||
Bhovādi nāma so hoti sace hoti sakiñcano||
Akiñcanaɱ anādānaɱ tam ahaɱ brūmi brāhmaṇaɱ.|| ||

Sabbasaɱyojanaɱ chetvā yo ve na paritassati||
Saŋgātigaɱ visaññuttaɱ tam ahaɱ brūmi brāhmaṇaɱ.|| ||

Chetvā nandiɱ varattañ ca sandānaɱ sahanukkamaɱ||
Ukkhittapa'ighaɱ Buddhaɱ tam ahaɱ brūmi brāhmaṇaɱ.|| ||

Akkosaɱ vadhabandhañca aduṭṭho yo titikkhati||
Khantibalaɱ balāṇikaɱ tam ahaɱ brūmi brāhmaṇaɱ.|| ||

Akkodhanaɱ vatavantaɱ sīlavantaɱ anussadaɱ||
Dantaɱ antimasārīraɱ tam ahaɱ brūmi brāhmaṇaɱ.|| ||

Vāri pokkharapatteva āraggeriva sāsapo||
Yo na lippati1 kāmesu tam ahaɱ brūmi brāhmaṇaɱ.|| ||

Yo dukkhassa pajānāti idh'eva khayamattano||
Pannabhāraɱ visaɱyuttaɱ tam ahaɱ brūmi brāhmaṇaɱ.|| ||

Gambhīrapaññaɱ medhāviɱ maggāmaggassa kovidaɱ||
Uttamatthamanuppattaɱ tam ahaɱ brūmi brāhmaṇaɱ.|| ||

Asaɱsaṭṭhaɱ gahaṭṭhehi anāgārehi cubhayaɱ||
Anokasāriɱ app'icchaɱ tam ahaɱ brūmi brāhmaṇaɱ.|| ||

Nidhāya daṇḍanaɱ bhūtesu tasesu thāvaresu ca||
Yo na hanti na ghāteti tam ahaɱ brūmi brāhmaṇaɱ|| ||

Aviruddhaɱ viruddhesu attadaṇḍesu nibbutaɱ||
Sādānesu anādānaɱ tam ahaɱ brūmi brāhmaṇaɱ.|| ||

Yassa rāgo ca doso ca māno makkho ca ohito||
Sāsaporiva āraggā tam ahaɱ brūmi brāhmaṇaɱ|| ||

Akakkasaɱ viññapaniɱ giraɱ saccaɱ udīraye||
Yāya nābhisaje kiñci tam ahaɱ brūmi brāhmaṇaɱ|| ||

Yo ca dīghaɱ ca rassaɱ vā aṇūɱ thūlaɱ subhāsubhaɱ||
Loke adinnaɱ nādiyati tam ahaɱ brūmi brāhmaṇaɱ|| ||

Āsā yassa na vijjanti asmiɱ loke paramhi ca||
Nirāsayaɱ visaɱyuttaɱ tam ahaɱ brūmi brāhmaṇaɱ|| ||

Yassālayā navijjanti aññāya akathaŋkathī||
Amatogadhaɱ anuppattaɱ tam ahaɱ brūmi brāhmaṇaɱ|| ||

Yodha puññañca pāpañca ubhosaŋgaɱ upaccagā||
Asokaɱ virajaɱ suddhaɱ tam ahaɱ brūmi brāhmaṇaɱ|| ||

Candaɱva vimalaɱ suddhaɱ vippasannamanāvilaɱ||
Nandībhavaparikkhīṇaɱ tam ahaɱ brūmi brāhmaṇaɱ|| ||

Yo imaɱ pa'ipathaɱ duggaɱ saɱsāraɱ mohamaccagā||
Tiṇṇo pāragato jhāyī anejo akathaŋkathī||
Anupādāya nibbuto tam ahaɱ brūmi brāhmaṇaɱ.|| ||

Yodha kāme pahatvāna anāgāro paribbaje||
Kāmabhavaparikkhīṇaɱ tam ahaɱ brūmi brāhmaṇaɱ||
Yodha taṇhaɱ pahatvāna anāgāro paribbaje||
Taṇhā bhavaparikkhīṇaɱ tam ahaɱ brūmi brāhmaṇaɱ.|| ||

Hitvā mānusakaɱ yogaɱ dibbaɱ yogaɱ upaccagā||
Sabbayogavisaɱyuttaɱ tam ahaɱ brūmi brāhmaṇaɱ|| ||

Hitvā ratiñca aratiɱ sītībhūtaɱ nirūpadhiɱ||
Sabbālokābhibhūɱ vīraɱ tam ahaɱ brūmi brāhmaṇaɱ.|| ||

Cutiɱ yo vedi sattānaɱ upapattiñca sabbaso||
Asattaɱ sugataɱ Buddhaɱ tam ahaɱ brūmi brāhmaṇaɱ|| ||

Yassa gatiɱ na jānanti devā gandhabbamānusā||
Khīṇāsavaɱ arahantaɱ tam ahaɱ brūmi brāhmaṇaɱ.|| ||

Yassa pure ca pacchā ca majjhe ca n'atthi kiñcanaɱ||
Akiñcanaɱ anādānaɱ tam ahaɱ brūmi brāhmaṇaɱ.|| ||

Usabhaɱ pavaraɱ vīraɱ mahesiɱ vijitāvinaɱ||
Anejaɱ nahātakaɱ Buddhaɱ tam ahaɱ brūmi brāhmaṇaɱ.|| ||

Pubbenivāsaɱ yo vedi saggāpāyañ ca passati||
Atho jātikkhayaɱ patto tam ahaɱ brūmi brāhmaṇaɱ.|| ||

Samaññā'hesā lokasmiɱ nāmagottaɱ pakappitaɱ||
Samucca1 samudāgataɱ tattha tattha pakappitaɱ|| ||

Dīgharattamanusayitaɱ diṭṭhigatamajānataɱ||
Ajānantā no pabruvanti jātiyā hoti brāhmaṇo.|| ||

Na jaccā brāhmaṇo4 hoti na jaccā hoti abrāhmaṇo||
Kammanā brāhmaṇo hoti kammanā hoti abrāhmaṇo||
Kassako kammanā hoti sippiko hoti kammanā||
Vāṇijo kammanā hoti pessiko hoti kammanā.|| ||

Coropi kammanā hoti yodhājīvopi kammanā||
Yājako kammanā hoti rājāpi hoti kammanā.|| ||

Evam etaɱ yathābhūtaɱ kammaɱ passanti paṇḍitā||
Paṭiccasamuppādadasā kammavipākakovidā|| ||

Kammanā vattati loko kammanā vattati pajā||
Kammanibandhanā sattā rathassāṇīva yāyato|| ||

Tapena brahmacariyena saɱyamena damena ca||
Etena brāhmaṇo hoti etaɱ brāhmaṇamuttamaɱ.|| ||

Tīhi vijjāhi sampanno santo khīṇapunabbhavo,||
Evaɱ vāseṭṭha jānāhi Brahmā Sakko vijānatanti.|| ||

Evaɱ vutte vāseṭṭhabhāradvājā māṇavā Bhagavantaɱ etad avocuɱ: abhikkantaɱ bho Gotama,||
abhikkantaɱ bho Gotama,||
seyyathā pi bho Gotama,||
nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya,||
cakkhumanto rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito,||
ete mayaɱ bhavantaɱ Gotamaɱ saraṇaɱ gacchāma,||
dhammañca bhikkhu-saŋghañ ca.|| ||

Upāsake no bhavaɱ Gotamo dhāretu ajjatagge pāṇupetaɱ saraṇaɱ gateti.|| ||

Vāseṭṭhasuttaɱ aṭṭhamaɱ


 

Contact:
E-mail
Copyright Statement   Webmaster's Page