Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
II. Majjhima-Paṇṇāsa
5. Brāhmaṇa Vagga

Sutta 100

Saŋgārava Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ|| ||

Ekaɱ samayaɱ Bhagavā Kosalesu cārikaɱ carati mahatā bhikkhu-saŋghena saddhiɱ.

Tena kho pana samayena dhanañjānī nāma brāhmaṇī maṇḍalakappe paṭivasati abhippasannā Buddhe ca dhamme ca saŋghe ca.

Atha kho dhanañjānī brāhmaṇī upakkhalitvā tikkhattuɱ udānaɱ udānesi: 'namo tassa Bhagavato arahato Sammā-sambuddhassa,||
namo tassa Bhagavato arahato Sammā-sambuddhassa,||
namo tassa Bhagavato arahato Sammā-sambuddhassā' ti.|| ||

[210]Tena kho pana samayena saŋgāravo nāma māṇavo maṇḍalakappe paṭivasati tiṇṇaɱ vedānaɱ pāragū sanighaṇḍukeṭubhānaɱ sākkharappabhedānaɱ itihāsapañcamānaɱ padako veyyākaraṇo lokāyatamahāpurisalakkhaṇesu anavayo.

Assosi kho saŋgāravo māṇavo dhanañjāniyā brāhmaṇiyā evaɱ vācaɱ bhāsamānāya,||
sutvā dhanañjāniɱ brāhmaṇiɱ etad avoca: avabhūtāva ayaɱ dhanañjānī brāhmaṇī paribhūtāva ayaɱ dhanañjānī brāhmaṇī vijjamānānaɱ brāhmaṇānaɱ.

Atha ca pana tassa muṇḍakassa samaṇakassa vaṇṇaɱ bhāsatī ti.|| ||

Na hi pana tvaɱ tāta bhadramukha,||
tassa Bhagavato sīlapaññāṇaɱ jānāsi.

Sace tvaɱ tāta bhadramukha,||
tassa Bhagavato sīlapaññāṇaɱ jāneyyāsi,||
na tvaɱ tāta bhadramukha,||
taɱ Bhagavantaɱ akkositabbaɱ paribhāsitabbaɱ maññeyyāsīti.|| ||

Tena hi bhoti,||
yadā Samaṇo Gotamo maṇḍalakappaɱ anuppatto hoti.

Atha me āroceyyāsīti.

Evaɱ bhadramukhāti kho dhanañjānī brāhmaṇī saŋgāravassa māṇavassa paccassosi.|| ||

Atha kho Bhagavā Kosalesu anupubbena cārikaɱ caramāno yena maṇḍalakappaɱ tadavasari.

Tatra sudaɱ Bhagavā maṇḍalakappe viharati todeyyānaɱ brāhmaṇānaɱ Ambavane.

Assosi kho dhanañjānī brāhmaṇī.

'Bhagavā kira maṇḍalakappaɱ anuppatto maṇḍalakappe viharati todeyyānaɱ brāhmaṇānaɱ Ambavane' ti.|| ||

Atha kho dhanañjānī brāhmaṇī yena saŋgāravo māṇavo,||
ten'upasaŋkami,||
upasaŋkamitvā saŋgāravaɱ māṇavaɱ etad avoca: 'ayaɱ tāta mudramukha,||
so Bhagavā maṇḍalakappaɱ anuppatto,||
maṇḍalakappe viharati todeyyānaɱ brāhmaṇānaɱ Ambavane.

Yassadāni tvaɱ tāta bhadramukha,||
kālaɱ maññasīti.|| ||

'Evaɱ bhotī'ti kho saŋgāravo māṇavo dhanañjāniyā brāhmaniyā paṭissutvā yena Bhagavā ten'upasaŋkami,||
upasaŋkamitvā Bhagavatā saddhiɱ sammodi,||
sammodanīyaɱ [211] kathaɱ sārāṇīyaɱ vītisāretvā eka-m-antaɱ nisīdi.

Eka-m-antaɱ nisinno kho saŋgāravo māṇavo Bhagavantaɱ etad avoca:|| ||

'Santi kho bho Gotama,||
eke samaṇa-brāhmaṇā diṭṭhadhammābhiññāvosānapāramippattā ādibrahmacariyaɱ paṭijānanti.

Tatra bho Gotama,||
ye te samaṇa-brāhmaṇā diṭṭhadhammābhiññāvosānapāramippattā ādibrahmacariyaɱ paṭijānanti,||
tesaɱ bhavaɱ Gotamo katamo' ti?|| ||

Diṭṭhadhammābhiññāvosānapāramippattānaɱ ādibrahmacariyaɱ paṭijānantānampi kho ahaɱ bhāradvāja,||
vemattataɱ vadāmi.

Santi bhāradvāja,||
eke samaṇa-brāhmaṇā anussavikā,||
te anussavena diṭṭhadhammābhiññāvosānapāramippattā ādibrahmacariyaɱ paṭijānanti seyyathā pi brāhmaṇā tevijjā.

Santi pana bhāradvāja,||
eke samaṇa-brāhmaṇā kevalaɱ saddhāmattakena diṭṭhadhammābhiññāvosānapāramippattā ādibrahmacariyaɱ paṭijānanti seyyathā pi takkī vīmaɱsī.

Santi bhāradvāja,||
eke samaṇa-brāhmaṇā pubbe ananussutesu dhammesu sāmaɱ yeva dhammaɱ abhiññāya diṭṭhadhammābhiññāvosānapāramippattā ādibrahmacariyaɱ paṭijānanti.|| ||

Tatra bhāradvāja,||
ye te samaṇa-brāhmaṇā pubbe ananussutesu dhammesu sāmaɱ yeva dhammaɱ abhiññāya diṭṭhadhammābhiññāvosānapāramippattā ādibrahmacariyaɱ paṭijānanti.

Tesāhamasmi.

Tadamināpetaɱ bhāradvāja,||
pariyāyena veditabbaɱ: yathā ye te samaṇa-brāhmaṇā pubbe ananussutesu dhammesu sāmaɱ yeva dhammaɱ abhiññāya diṭṭhadhammābhiññāvosānapāramippattā ādibrahmacariyaɱ paṭijānanti,||
tesāhamasmīti.|| ||

Idha me bhāradvāja,||
pubbe va sambodhā anabhisambuddhassa bodhisattass'eva sato etad ahosi: sambādho gharāvāso rajāpatho,||
abbhokāso pabbajjā,||
na-y-idaɱ sukaraɱ agāraɱ ajjhāvasatā ekanta-paripuṇṇaɱ ekanta-parisuddhaɱ saŋkhalikhitaɱ brahmacariyaɱ carituɱ,||
yan nūnāhaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyan" ti.

So kho ahaɱ bhāradvāja,||
aparena [212] samayena daharova samāno susu kāḷakeso bhadrena yobbanena samannāgato paṭhamena vayasā akāmakānaɱ mātā-pitunnaɱ assumukhānaɱ rudantānaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajiɱ.

So evaɱ pabbajito samāno kiɱkusalagavesī anuttaraɱ santivarapadaɱ pariyesamāno yena ā'āro kālāmo ten'upasaŋkamiɱ,||
upasaŋkamitvā ā'āraɱ kālāmaɱ etad avocaɱ: "icchām'ahaɱ āvuso kālāma,||
imasmiɱ dhamma-vinaye brahmacariyaɱ caritun" ti.

Evaɱ vutte bhāradvāja,||
ā'āro kālāmo maɱ etad avoca: " viharatāyasmā tādiso ayaɱ dhammo,||
yattha viññū puriso na cirass'eva sakaɱ ācariyakaɱ sayaɱ abhiññā sacchikatvā upasampajja vihareyyā" ti.

So kho ahaɱ bhāradvāja,||
nacirass'eva khippam'eva taɱ dhammaɱ pariyāpuṇiɱ.

So kho ahaɱ bhāradvāja,||
tāvataken'eva oṭṭhappahatamattena lapitalāpanamattena ñāṇavādañca vadāmi theravādañca ' jānāmi passāmī" ti ca paṭijānāmi ahañ c'eva aññe ca.

Tassa mayhaɱ bhāradvāja,||
etad ahosi: " na kho ā'āro kālāmo imaɱ dhammaɱ kevalaɱ saddhāmattakena 'sayaɱ abhiññā sacchikatvā upasampajja viharāmi" ti.pavedeti.

Addhā ā'āro kālāmo imaɱ dhammaɱ jānaɱ passaɱ viharatī" ti.|| ||

Atha khvāhaɱ bhāradvāja,||
yena ā'āro kālāmo tanupasaŋkamiɱ.

Upasaŋkamitvā ā'āraɱ kālāmaɱ etad avocaɱ: "kittāvatā no āvuso kālāma,||
imaɱ dhammaɱ sayaɱ abhiññā sacchikatvā upasampajja viharāmī'ti pavedemī" ti.

Evaɱ vutte bhāradvāja,||
ā'ārokālāmo ākiñcaññāyatanaɱ pavedesi.

Tassa mayhaɱ bhāradvāja,||
etad ahosi: " na kho ā'ārasseva kālāmassa atthi saddhā,||
mayham p'atthi saddhā.

Na kho ā'ārasseva kālāmassa atthi viriyaɱ ,mayham p'atthi viriyaɱ.

Na kho ā'ārasseva kālāmassa atthi sati,||
mayham p'atthi sati.

Na kho ā'ārasseva kālāmassa atthi samādhi,||
mayham p'atthi samādhi.

Na kho ā'ārasseva kālāmassa atthi paññā,||
mayham p'atthi paññā,||
yan nūnāhaɱ yaɱ dhammaɱ ā'āro kālāmo sayaɱ abhiññā sacchikatvā upasampajja viharāmī'ti pavedeti,||
tassa Dhammassa sacchikiriyāya padaheyyan" ti.

So kho ahaɱ bhāradvāja,||
na cirass'eva khippam'eva taɱ dhammaɱ sayaɱ abhiññā sacchitvā upasampajja vihāsiɱ.|| ||

Atha khvāhaɱ bhāradvāja,||
yena ā'āro kālāmo ten'upasaŋkamiɱ,||
upasaŋkamitvā ā'āraɱ kālāmaɱ etad avocaɱ: " ettāvatā no āvuso kālāma,||
imaɱ dhammaɱ sayaɱ abhiññā sacchikatvā upasampajja pavedesī" ti.

Ettāvatā kho ahaɱ āvuso,||
imaɱ dhammaɱ sayaɱ abhiññā sacchikatvā upasampajja pavedemī' ti.

Ahampi kho āvuso ettāvatā imaɱ dhammaɱ sayaɱ abhiññā sacchikatvā upasampajja viharāmī' ti.

Lābhā no avuso,||
suladdhaɱ no āvuso ye mayaɱ āyasmantaɱ tādisaɱ sabrahmacāriɱ passāma iti,||
yāhaɱ dhammaɱ sayaɱ abhiññā sacchikatvā upasampajja pavedemi,||
taɱ tvaɱ dhammaɱ sayaɱ abhiññā sacchikatvā upayampajja viharasi.

Yaɱ tvaɱ dhammaɱ sayaɱ abhiññā sacchikatvā upasampajja viharasi,||
tam ahaɱ dhammaɱ sayaɱ abhiññā sacchikatvā upasampajja pavedemi.

Iti yāhaɱ dhammaɱ jānāmi,||
taɱ tvaɱ dhammaɱ jānāsi.

Yaɱ tvaɱ dhammaɱ jānāsi,||
tam ahaɱ dhammaɱ jānāmi.

Iti yādiso ahaɱ,||
tādiso tuvaɱ.

Yādiso tuvaɱ,||
tādiso ahaɱ.

Ehi dāni āvuso,||
ubho'va santā imaɱ gaṇaɱ pariharāmā' ti.

Iti kho bhāradvāja,||
ā'āro kālāmo ācariyo me samāno attano antevāsiɱ maɱ samānaɱ attano samasamaɱ ṭhapesi,||
uḷārāya ca maɱ pūjāya pūjesi.

Tassa mayhaɱ bhāradvāja,||
etad ahosi: " nāyaɱ dhammo nibbidāya na virāgāya na nirodhāya na upasamāya na abhiññāya na sambodhāya na nibbānāya saɱvattati,||
yāvad eva ākiñcaññāyanūpapattiyā" ti.

So kho ahaɱ bhāradvāja,||
taɱ dhammaɱ analaŋkaritvā tasmā dhammā nibbijja apakkamiɱ.|| ||

So kho ahaɱ bhāradvāja,||
kiɱkusalagavesī anuttaraɱ santivarapadaɱ pariyesamāno yena uddako rāmaputto ten'upasaŋkamiɱ.

Upasaŋkamitvā uddakaɱ rāmaputtaɱ etad avocaɱ: " icchām'ahaɱ āvuso rāma imasmiɱ dhamma-vinaye brahmacariyaɱ caritun" ti.

Evaɱ vutte bhāradvāja,||
uddako rāmaputto maɱ etad avoca: 'viharatāyasmā,||
tādiso ayaɱ dhammo,||
yattha viññū puriso na cirass'eva sakaɱ ācariyakaɱ sayaɱ abhiññā sacchikatvā upasampajja vihareyyā" ti.

So kho ahaɱ bhāradvāja,||
na cirass'eva khippam'eva taɱ dhammaɱ pariyāpuṇiɱ.

So kho ahaɱ bhāradvāja,||
tāvataken'eva oṭṭhappahatamattena lapita lāpanamattena ñāṇavādañca vadāmi theravādañca 'jānāmi passāmī'ti ca paṭijānāmi ahañ c'eva aññe ca.

Tassa mayhaɱ bhāradvāja,||
etad ahosi: " na kho rāmo imaɱ dhammaɱ kevalaɱ saddhāmattakena sayaɱ abhiññā sacchikatvā upasampajja viharāmī" ti.

Pavedesi,||
addhā rāmo imaɱ dhammaɱ jānaɱ passaɱ vihāsī' ti.|| ||

Atha khvāhaɱ bhāradvāja,||
yena uddako rāmaputto ten'upasaŋkamiɱ.

Upasaŋkamitvā uddakaɱ rāmaputtaɱ etad avocaɱ: " kittāvatā no āvuso,||
rāmo imaɱ dhammaɱ sayaɱ abhiññā sacchikatvā upasampajja viharāmī'ti pavedesī" ti.

Evaɱ vutte bhāradvāja,||
uddako rāmaputto n'eva-saññā-nāsaññāyatanaɱ pavedesi.

Tassa mayhaɱ bhāradvāja,||
etad ahosi: " na kho rāmasseva ahosi saddhā,||
mayham p'atthi saddhā.

Na kho rāmasseva ahosi viriyaɱ,||
mayham p'atthi virayaɱ.

Na kho rāmasseva ahosi sati mayham p'atthi sati.

Na kho rāmasseva ahosi samādhi ,mayham p'atthi samādhi.

Na kho rāmasseva ahosi paññā,||
mayham p'atthi paññā.

Yan'nūnāhaɱ yaɱ dhammaɱ rāmo sayaɱ abhiññā sacchikatvā upasampajja viharāmī'ti pavedesi.

Tassa Dhammassa sacchikiriyāya padaheyyan" ti.

So kho ahaɱ bhāradvāja,||
na cirass'eva khippam'eva taɱ dhammaɱ sayaɱ abhiññā sacchikatvā upasampajja vihāsiɱ.|| ||

Atha khvāhaɱ bhāradvāja,||
yena uddako rāmaputto ten'upasaŋkamiɱ,||
upasaŋkamitvā uddakaɱ rāmaputtaɱ etad avocaɱ: " ettāvatā no avuso rāma imaɱ dhammaɱ sayaɱ abhiññā sacchikatvā upasampajja pavedesī" ti.

Ettāvatā kho ahaɱ āvuso imaɱ dhammaɱ sayaɱ abhiññā sacchikatvā upasampajja pavedemī'ti.

'Ahampi kho āvuso,||
ettāvatā imaɱ dhammaɱ sayaɱ abhiññā sacchikatvā upasampajja viharāmī' ti.

Lābhā no āvuso,||
suladdhaɱ no āvuso,||
ye mayaɱ āyasmantaɱ tādisaɱ brahmacāriɱ passāma.

Iti yaɱ dhammaɱ rāmo sayaɱ abhiññā sacchikatvā upasampajja pavedesi,||
taɱ tvaɱ dhammaɱ sayaɱ abhiññā sacchikatvā upasampajja viharasi.

Yaɱ tvaɱ dhammaɱ sayaɱ abhiññā sacchikatvā upasampajja viharasi,||
taɱ dhammaɱ rāmo sayaɱ abhiññā sacchikatvā upasampajja pavedesi.

Iti yaɱ dhammaɱ rāmo abhiññāsi,||
taɱ tvaɱ dhammaɱ jānāsi.

Yaɱ tvaɱ dhammaɱ jānāsi,||
taɱ dhammaɱ rāmo abhiññāsi.

Iti yādiso rāmo ahosi,||
tādiso tuvaɱ,||
yādiso tuvaɱ,||
tādiso rāmo ahosi.

Ehi dāni āvuso,||
tuvaɱ imaɱ gaṇaɱ pariharā' ti.

Iti kho bhāradvāja,||
uddako rāmaputto sabrahmacārī me samāno ācariyaṭṭhāne maɱ ṭhapesi,||
uḷārāya ca maɱ pūjāya pūjesi.

Tassa mayhaɱ bhāradvāja,||
etad ahosi: " nāyaɱ dhammo nibbidāya na virāgāya na nirodhaya na upasamāya na abhiññāya na sambodhāya na nibbānāya saɱvattati,||
yāvad eva n'eva-saññā-nāsaññāyatanūpapattiyā" ti.

So kho ahaɱ bhāradvāja,||
taɱ dhammaɱ analaɱkaritvā tasmā dhammā nibbijja apakkamiɱ.|| ||

So kho ahaɱ bhāradvāja,||
kiɱkusalagavesī anuttaraɱ santivarapadaɱ pariyesamāno magadhesu anupubbena cārikaɱ caramāno yena uruvelā senānigamo tadavasariɱ.

Tatthaddasaɱ ramaṇīyaɱ bhūmibhāgaɱ pāsādikañca vaṇsaṇḍa nadīñca sandantiɱ setakaɱ supatitthaɱ ramaṇīyaɱ samantā ca gocaragāmaɱ.

Tassa mayhaɱ bhāradvāja,||
etad ahosi: " ramaṇīyo vata bho bhūmibhāgo,||
pāsādiko ca vanasaṇḍo ,nadī ca sandati setakā supatitthā ramaṇīyā,||
samantā ca gocaragāmo,||
alaɱ vat'idaɱ kulaputtassa padhān'atthikassa padhānāyā" ti.

So kho ahaɱ bhāradvāja,||
tatth'eva nisīdiɱ 'alamimaɱ padhānāyā' ti.|| ||

Api'ssu maɱ bhāradvāja,||
tisso upamāyo paṭibhaɱsu anacchariyā pubbe assutapubbā:|| ||

Seyyathā'pi bhāradvāja,||
allaɱ kaṭṭhaɱ sasnehaɱ udake nikkhittaɱ,||
atha puriso āgaccheyya uttarāraṇiɱ ādāya aggiɱ abhinibbattessāmi,||
tejo pātukirissāmī' ti.

Taɱ kiɱ maññasi bhāradvāja,||
api nu so puriso amuɱ allaɱ kaṭṭhaɱ sasnehaɱ udake nikkhittaɱ uttarāraṇiɱ ādāya abhimanthento aggiɱ abhinibbatteyya tejo pātukareyyā' ti?|| ||

No h'idaɱ bho Gotama,||
taɱ kissa hetu: aduɱ hi bho Gotama,||
allaɱ kaṭṭhaɱ sasnehaɱ.

Tañ ca pana udake nikkhittaɱ.

Yāvad eva ca pana so puriso kilamathassa vighātassa bhāgī assā' ti.|| ||

Evam eva kho bhāradvāja,||
ye hi keci samaṇā vā brāhmaṇā vā kāyena c'eva kāmehi avupakaṭṭhā viharanti,||
yo ca n'esaɱ kāmesu kāmacchando kāmasneho kāmamucchā kāmapipāsā kāmapariḷāho,||
so ca ajjhattaɱ na suppahīno hoti,||
na suppaṭippassaddho.

Opakkamikā ce'pi te bhonto samaṇa-brāhmaṇā dukkhā tippā kaṭukā vedanā vediyanti,||
abhabbāva te ñāṇāya dassanāya anuttarāya sambodhāya.

No ce'pi te bhonto samaṇa-brāhmaṇā oppakkamikā dukkhā tippā kaṭukā vedanā vediyanti,||
abhabbāva te ñāṇāya dassanāya anuttarāya sambodhāya.

Ayaɱ kho maɱ bhāradvāja,||
paṭhamā upamā paṭihāsi anacchariyā pubbe assutapubbā.|| ||

Aparā'pi maɱ bhāradvāja dutiyā upamā paṭibhāsi anacchariyā pubbe assutapubbā: seyyathā'pi bhāradvāja,||
allaɱ kaṭṭhaɱ sasnehaɱ ārakā udakā thale nikkhittaɱ,||
atha puriso āgaccheyya uttarāraṇiɱ ādāya aggiɱ abhinibbattessāmi,||
tejo pātukarissāmī' ti.

Taɱ kiɱ maññasi bhāradvāja,||
apinu so puriso amuɱ allaɱ kaṭṭhaɱ sasnehaɱ ārakā udakā thale nikkhittaɱ uttarāraṇiɱ ādāya abhimanthento aggiɱ abhinibbatteyya tejo pātukareyyā' ti?|| ||

No h'idaɱ bho Gotama,||
taɱ kissa hetu: aduɱ hi bho Gotama,||
allaɱ kaṭṭhaɱ sasnehaɱ.

Kiñcāpi ārakā udakā thale nikkhittaɱ yāvad eva ca pana so puriso kilamathassa vighātassa bhāgī assā' ti.|| ||

Evam eva kho bhāradvāja,||
ye hi keci samaṇā vā brāhmaṇā vā kāyena kho kāmehi vūpakaṭṭhā viharanti.

Yo ca n'esaɱ kāmesu kāmacchando kāmasineho kāmamucchā kāmapipāsā kāmapariḷāho,||
so ca ajjhattaɱ na suppahīno hoti na suppaṭippassaddho.

Opakkamikā ce'pi te bhonto samaṇa-brāhmaṇā dukkhā tippā kaṭukā vedanā vediyanti.

Abhabbā va te ñāṇaya dassanāya anuttarāya sambodhāya no ce'pi te bhonto samaṇa-brāhmaṇā opakkamikā dukkhā tippā kaṭukā vedanā vediyanti,||
ababbāva te ñāṇāya dassanāya anuttarāya sambodhāya.

Ayaɱ kho maɱ bhāradvāja,||
dutiyā upamā paṭibhāsi anacchariyā pubbe assutapubbā.|| ||

Aparā'pi kho maɱ bhāradvāja,||
tatiyā upamā paṭibhāsi,||
anacchariyā pubbe assutapubbā: seyyathā pi bhāradvāja,||
sukkhaɱ kaṭṭhaɱ kolāpaɱ ārakā udakā thale nikkhittaɱ.

Atha puriso āgaccheyya uttarāraṇiɱ ādāya aggiɱ abhinibbattessāmi,||
tejo pātukarissāmī' ti.

Taɱ kiɱ maññasi bhāradvāja,||
apinu so puriso amuɱ sukkhaɱ kaṭṭhaɱ kolāpaɱ ārakā udakā thale nikkhittaɱ uttarāraṇiɱ ādāya abhimanthento aggiɱ abhinibbatteyya,||
tejo pātukareyyā' ti?|| ||

Evaɱ bho Gotama,||
taɱ kissa hetu: aduɱ hi bho Gotama,||
sukkhaɱ kaṭṭhaɱ kolāpaɱ,||
tañ ca pana ārakā udakā thale nikkhittan' ti.|| ||

Evam eva kho bhāradvāja,||
ye hi keci samaṇā vā brāhmaṇā vā kāyena c'eva cittena ca kāmehi vūpakaṭṭhā viharanti.

Yo ca n'esaɱ kāmesu kāmacchando kāmasineho kāmamucchā kāmapipāsā kāmapariḷāho,||
so ca ajjhattaɱ suppahīno hoti suppaṭippassaddho.

Opakkamikā ce'pi te bhonto samaṇa-brāhmaṇā dukkhā tippā kaṭukā vedanā vediyanti.

Bhabbā va te ñāṇāya dassanāya anuttarāya sambodhāya.

Ayaɱ kho maɱ bhāradvāja,||
tatiyā upamā paṭibhāsi anacchariyā pubbe assutapubbā.

Imā kho maɱ bhāradvāja,||
tisso upamā paṭibhāsi anacchariyā pubbe assutapubbā.|| ||

Tassa mayhaɱ bhāradvāja,||
etad ahosi: " yan nūnāhaɱ dantebhidantamādhāya jivhāya tāluɱ āhacca cetasā cittaɱ abhiniggaṇheyyaɱ abhinippīḷeyyaɱ abhisantāpeyyan" ti.

So kho ahaɱ bhāradvāja,||
dantebhidantamādhāya jivhāya tāluɱ āhacca cetasā cittaɱ abhiniggaṇhāmi abhinippīḷemi abhisantāpemi.

Tassa mayhaɱ bhāradvāja,||
dantebhidantamādhāya jivhāya tāluɱ āhacca cetasā cittaɱ abhiniggaṇhato abhinippīḷayato abhisantāpayato kacchehi sedā muccanti.

Seyyathā pi bhāradvāja,||
balavā puriso dubbalataraɱ purisaɱ sīse vā gahetvā khandhe vā gahetvā abhiniggaṇheyya abhinippīḷeyya abhisantāpeyya,||
evam eva kho me bhāradvāja,||
dantebhidantamādhāya jivhāya tāluɱ āhacca cetasā cittaɱ abhiniggaṇhato abhinippīḷayato abhisantāpayato kacchehi sedā muccanti.

Āraddhaɱ kho pana me bhāradvāja,||
viriyaɱ hoti asallīnaɱ,||
upaṭṭhitā sati apammuṭṭhā,||
sāraddho ca pana me kāyo hoti appaṭippassaddho ten'eva dukkhappadhānena pādhānābhitunnassa sato.|| ||

Tassa mayhaɱ bhāradvāja,||
etad ahosi: " yan nūnāhaɱ appāṇakaɱ jhānaɱ jhāyeyyan" ti.

So kho ahaɱ bhāradvāja,||
mukhato ca nāsato ca assāsapassāse uparundhiɱ.

Tassa mayhaɱ bhāradvāja,||
mukhato ca nāsato ca assāsapassāsesu uparuddhesu kaṇṇasotehi vātānaɱ nikkhamantānaɱ adhimatto saddo hoti.

Seyyathā pi nāma kammāragaggariyā dhammānāya adhimatto saddo hoti evam eva kho me bhāradvāja,||
mukhato ca nāsato ca assāsapassāsesu uparuddhesu kaṇṇasotehi vātānaɱ nikkhamantānaɱ adhimatto saddo hoti.

Āraddhaɱ kho pana me bhāradvāja,||
viriyaɱ hoti asallīnaɱ,||
upaṭṭhitā sati apammuṭṭhā,||
sāraddho ca pana me kāyo hoti appaṭippassaddho ten'eva dukkhappadhānena padhānābhitunnassa sato|| ||

Tassa mayhaɱ bhāradvāja,||
etad ahosi: " yan nūnāhaɱ appāṇakaɱyeva jhānaɱ jhāyeyyan" ti.

So kho ahaɱ bhāradvāja,||
mukhato ca nāsato ca kaṇṇato ca assāsapassāse uparundhiɱ.

Tassa mayhaɱ bhāradvāja,||
mukhato ca nāsato ca kaṇṇato ca assāsapassāsesu uparuddhesu adhimattā vātā muddhānaɱ ūhananti.

Seyyathā pi bhāradvāja,||
balavā puriso tiṇhena sikharena muddhani abhimantheyya,||
evam eva kho me bhāradvāja,||
mukhato ca nāsato ca kaṇṇato ca assāsapassāsesu uparuddhesu adhimattā vātā muddhani ūhananti.

Āraddhaɱ kho pana me bhāradvāja,||
viriyaɱ hoti asallīnaɱ,||
upaṭṭhitā sati apammuṭṭhā,||
sāraddho ca pana me kāyo hoti appaṭippassaddho ten'eva dukkhappadhānena padhānābhitunnassa sato.|| ||

Tassa mayhaɱ bhāradvāja,||
etad ahosi: " yan nūnāhaɱ appāṇakaɱyeva jhānaɱ jhāyeyyan" ti.

So kho ahaɱ bhāradvāja,||
mukhato ca nāsato ca kaṇṇato ca assāsapassāse uparundhiɱ.

Tassa mayhaɱ bhāradvāja,||
mukhato ca nāsato ca kaṇṇatoca assāsapassāsesu uparuddhesu adhimattā sīse sīsavedanā honti.

Seyyathā pi bhāradvāja,||
balavā puriso daḷhena varattakabandhena sīse sīsaveṭhaɱ dadeyya,||
evam eva kho bhāradvāja mukhato ca nāsato ca kaṇṇato ca assāsapassāsesu uparuddhesu adhimattā sīse sīsavedanā honti.

Āraddhaɱ kho pana me bhāradvāja,||
viriyaɱ hoti asallīnaɱ,||
upaṭṭhitā sati apammuṭṭhā,||
sāraddho ca pana me kāyo hoti appaṭippassaddho ten'eva dukkhappadhānena padhānābhitunnassa sato.|| ||

Tassa mayhaɱ bhāradvāja,||
etad ahosi: " yan nūnāhaɱ appāṇakaɱyeva jhānaɱ jhāyeyyan" ti.

So kho ahaɱ bhāradvāja,||
mukhato ca nāsato ca kaṇṇato ca assāsapassāse uparundhiɱ.

Tassa mayhaɱ bhāradvāja,||
mukhato ca nāsato ca kaṇṇato ca assāsapassāsesu uparuddhesu adhimattā vātā kucchiɱ parikantanti,||
seyyathā pi bhāradvāja,||
dakkho goghātako vā goghātakantevāsī vā tiṇhena govikantanena kucchiɱ parikanteyya,||
evam eva kho me bhāradvāja,||
mukhato ca nāsato ca kaṇṇato ca assāsapassāsesu uparuddhesu adhimattā vātā kucchiɱ parikantanti.

Āraddhaɱ kho pana me bhāradvāja,||
viriyaɱ hoti asallīnaɱ,||
upaṭṭhitā sati apammuṭṭhā,||
sāraddho ca pana me kāyo hoti appaṭippassaddho ten'eva dukkhappadhānena padhānābhitunnassa sato.|| ||

Tassa mayhaɱ bhāradvāja,||
etad ahosi: " yan nūnāhaɱ appaṇakaɱyeva jhānaɱ jhāyeyyan" ti.so kho ahaɱ bhāradvāja,||
mukhato ca nāsato ca kaṇṇato ca assāsapassāse uparundhiɱ.

Tassa mayhaɱ bhāradvāja nāsato ca kaṇṇatoca assāsapassāsesu uparuddhesu adhimattā kāyasmiɱ ḍāho hoti,||
seyyathā pi bhāradvāja,||
dve balavanto purisā dubbalataraɱ purisaɱ nānā bāhāsu gahetvā aŋgārakāsuyā santāpeyya samparitāpeyya evam eva kho me bhāradvāja,||
mukhato ca nāsato ca kaṇṇato ca assāsapassāsesu uparuddhesu adhimatto kāyasmiɱ ḍāho hoti.

Āraddhaɱ kho pana me bhāradvāja,||
viriyaɱ hoti asallīnaɱ,||
upaṭṭhitā sati apammuṭṭhā,||
sāraddho ca pana me kāyo hoti appaṭippassaddho ten'eva dukkhappadhānena padhānābhitunnassa sato.|| ||

Api'ssu maɱ bhāradvāja,||
devatā disvā evam āhaɱsu:" kālakato Samaṇo Gotamo" ti.ekaccā devatā evam āhaɱsu: " na kālakato Samaṇo Gotamo,||
api ca kālaŋkarotī' ti.

Ekaccā devatā evam āhaɱsu: " na kālakato Samaṇo Gotamo,||
na'pi kālaŋkaroti.

Arahaɱ Samaṇo Gotamo,||
vihārotveveso arahato evarūpo hotī" ti.|| ||

Tassa mayhaɱ bhāradvāja,||
etad ahosi: " yan nūnāhaɱ sabbaso āhārūpacchedāya paṭipajjeyyan" ti.

Atha kho maɱ bhāradvāja,||
devatā upasaŋkamitvā etad avocuɱ: "mā kho tvaɱ mārisa,||
sabbaso āhārūpacchedāya paṭipajji.

Sace kho tvaɱ mārisa,||
sabbaso āhārūpacchedāya paṭipajjissasi,||
tassa te mayaɱ dibbaɱ ojaɱ lomakūpehi ajjhohāressāma4 tāyaɱ tvaɱ yāpessatī' ti.

Tassa mayhaɱ bhāradvāja,||
etad ahosi: 'ahañ c'eva kho pana sabbaso ajddhukaɱ5 paṭijāneyyaɱ,||
imā ca me devatā dibbaɱ ojaɱ lomakūpehi ajjhohāreyyuɱ,||
tāya cāhaɱ yāpeyyaɱ,||
taɱ mam'assa musā" ti.

So kho ahaɱ bhāradvāja,||
tā devatā paccācikkhāmi,||
halanti vadāmi.|| ||

Tassa mayhaɱ bhāradvāja,||
etad ahosi: "yan nūnāhaɱ thokaɱ thokaɱ āhāraɱ āhāreyyaɱ pasataɱ pasataɱ yadi vā muggayūsaɱ yadi vā kulatthayūsaɱ yadi vā kalāyayūsaɱ yadi vā hareṇukayūsan" ti.

So kho ahaɱ bhāradvāja,||
thokaɱ thokaɱ āhāraɱ āhāresiɱ pasataɱ pasataɱ yadi vā muggayūsaɱ yadi vā kulatthayūsaɱ yadi vā kalāyayūsaɱ yadi vā hareṇukayūsaɱ.

Tassa mayhaɱ bhāradvāja,||
thokaɱ thokaɱ āhāraɱ āhārayato pasataɱ pasataɱ yadi vā muggayūsaɱ yadi vā kulatthayūsaɱ yadi vā kalāyayūsaɱ yadi vā hareṇukayūsaɱ adhimattakasīmānaɱ patto kāyo hoti seyyathā pi nāma āsītikapabbāni vā kāḷapabbāni vā,||
evam eva'ssu me aŋgapaccaŋgāni bhavanti tāy'ev'appāhāratāya.

Seyyathā pi nāma vaṭṭanāvalī,||
evam eva'ssu me piṭṭhikaṇṭako unnatāvanato hoti tāy'ev'appāhāratāya.

Seyyathā pi nāma jara sālāya gopānasiyo oluggaviluggā bhavanti,||
evamassu me phāsuliyo oluggaviluggā bhavanti tāy'ev'appāhāratāya.

Seyyathā pi nāma gambhīre udapāne udakatārakā gambhīragatā okkhāyikā dissanti,||
evam eva'ssu me akkhikūpesu akkhitārakā gambhīragatā okkhāyikā dissanti tāy'ev'appāhāratāya.

Seyyathā pi nāma|| ||

Tittakā lābu āmakacchinno vātātapena samphuṭito hoti sammilāto,||
evam eva'ssu me sīsacchavī samphuṭitā hoti sammilātā tāy'ev'appāhāratāya.

So kho ahaɱ bhāradvāja,||
udaracchaviɱ parāmasissāmī'ti piṭṭhikaṇṭakaɱyeva parigaṇhāmi.

'Piṭṭhikaṇṭakaɱ parāmasissāmī'ti udaracchaviɱyeva parigaṇhāmi.

Yāva'ssu me bhāradvāja,||
udaracchavi piṭṭhikaṇaṭakaɱ allinā hoti tāy'ev'appahāratāya,||
so kho ahaɱ bhāradvāja,'vaccaɱ vā muttaɱ vā karissāmī'ti tatth'eva avakujjo papatāmi tāy'ev'appāhāratāya.

So kho ahaɱ bhāradvāja,||
imam eva kāyaɱ assāsento pāṇīnā gattāni anumajjāmi.

Tassa mayhaɱ bhāradvāja,||
pāṇinā gattāni anumajjato pūtimūlāni lomāni kāyasmā papatanti tāy'ev'appāhāratāya.

Api'ssu maɱ bhāradvāja,||
manussā disvā evam āhaɱsu: "kāḷo Samaṇo Gotamo" ti.

Ekacce manussā evam āhaɱsu: " na kāḷo Samaṇo Gotamo,||
sāmo Samaṇo Gotamo" ti.ekacce manussā evam āhaɱsu: " na kāḷo Samaṇo Gotamo ,na'pi sāmo,||
maŋguracchavi Samaṇo Gotamo" ti.

Yāva'ssu me bhāradvāja,||
tāva parisuddho chavivaṇṇo pariyodāto upahato hoti tāy'ev'appāhāratāya.|| ||

Tassa mayhaɱ bhārādvāja,||
etad ahosi: " ye kho keci atītam addhānaɱ samaṇā vā brāhmaṇā vā opakkamikā dukkhā tippā kaṭukā vedanā vediyiɱsu, etāva paramaɱ na-y-ito bhiyyo.

Ye pi hi keci anāgatam addhānaɱ samaṇā vā brāhmaṇā vā opakkamikā dukkhā tippā kaṭukā vedanā vediyissanti, etāva paramaɱ na-y-ito bhiyyo.

Ye pi hi keci etarahi samaṇā vā brāhmaṇā vā opakkamikā dukkhā tippā kaṭukā vedanā vediyanti,4 etāva paramaɱ na-y-ito bhiyyo.

Na kho panāhaɱ imāya kaṭukāya dukkarakāriyāya adhigacchāmi uttariɱ manussa-dhammā alamariyañāṇa-dassanavisesaɱ.

Siyā nu kho añño maggo bodhāyā" ti?|| ||

Tassa mayhaɱ bhāradvāja,||
etad ahosi: " abhijānāmi kho panāhaɱ pitusakkassa kammante sītāya jambucchāyāya nisinno vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja viharitā.

Siyā nukho eso maggo bodhāyā" ti.

Tassa mayhaɱ bhāradvāja,||
satānusārī viññāṇaɱ ahosi: " eso'va5 maggo bodhāyā" ti.

Tassa mayhaɱ bhāradvāja,||
etad ahosi: " kiɱ nukho ahaɱ tassa sukhassa bhāyāmi,||
yaɱ taɱ sukhaɱ aññatr'eva kāmehi aññatra akusalehi dhammehī" ti.

Tassa mayhaɱ bhāradvāja,||
etad ahosi: " na kho ahaɱ tassa sukhassa bhāyāmi,||
yaɱ taɱ sukhaɱ aññatr'eva kāmehi aññatra akusalehi dhammehī" ti.|| ||

Tassa mayhaɱ bhāradvāja,||
etad ahosi:" na kho taɱ sukaraɱ sukhaɱ adhigantuɱ evaɱ adhimattakasīmānaɱ pattakāyena,||
yan nūnāhaɱ oḷārikaɱ āhāraɱ āhāreyyaɱ odanakummāsan" ti.

So kho ahaɱ bhāradvāja,||
oḷārikaɱ āhāraɱ āhāresiɱ odanakummāsaɱ.

Tena kho pana maɱ bhāradvāja,||
samayena pañcavaggiyā bhikkhū paccupaṭṭhitā honti,||
" yaɱ kho Samaṇo Gotamo dhammaɱ adhigamissati,||
taɱ no ārocessatī" ti.yato kho ahaɱ bhāradvāja oḷārikaɱ āhāraɱ āhāresiɱ odanakummāsaɱ.

Atha me te pañcavaggiyā bhikkhū nibbijja pakkamiɱsu " bāhuliko Samaṇo Gotamo padhānavibbhanto āvatto bāhullāyā" ti.|| ||

So kho ahaɱ bhāradvāja,||
oḷārikaɱ āhāraɱ āhāretvā balaɱ gahetvā vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ upasampajja vihāsiɱ.

Vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja vihāsiɱ.

Pītiyā ca virāgā upekkhako ca vihāsiɱ.

Sato ca sampajāno sukhañca kāyena paṭisaŋvediɱ.

Yantaɱ ariyā ācikkhanti: 'Upekkhako satimā sukha-vihārī' ti taɱ tatiyaɱ-jhānaɱ upasampajja vihāsiɱ.

Sukhassa ca pahānā dukkhassa ca pahānā,||
pubbe va somanassa-domanassānaɱ atthaŋgamā adukkhaɱ-asukhaɱ upekkhā-sati-pārisuddhiɱ catutthaɱ-jhānaɱ upasampajja vihāsiɱ.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaniye ṭhite ānejjappatte4 pubbenivāsānussatiñāṇāya cittaɱ abhininnāmesiɱ.

So aneka-vihitaɱ pubbenivāsaɱ anussarāmi,||
seyyathīdaɱ: ekam pi jātiɱ dve pi jātiyo,||
Tisso pi jātiyo catasso pi jātiyo pañca pi jātiyo dasa pi jātiyo vīsatim pi jātiyo tiɱsam pi jātiyo cattārīsam pi jātiyo paññāsam pi jātiyo jāti-satam pi jāti-sahassam pi jāti-sata-sahassam pi anekepi saɱvaṭṭakappe anekepi vivaṭṭakappe anekepi saɱvaṭṭa-vivaṭṭakappe amutrāsiɱ evaɱ-nāmo evaɱ-gotto evaɱ-vaṇṇo evam-āhāro evaɱ-sukha-dukkha-paṭisaŋvedī evam-āyu-pariyanto.

So tato cuto amutra udapādiɱ5 tatrāpāsiɱ evaɱ-nāmo evaɱ-gotto evaɱ-vaṇṇo evam-āhāro evaɱ-sukha-dukkha-paṭisaŋvedī evam-āyu-pariyanto.

So tato cuto idhūpapanno' ti.

Iti sākāraɱ sa-uddesaɱ aneka-vihitaɱ pubbenivāsaɱ anussarāmi.

Ayaɱ kho me bhāradvāja,||
rattiyā paṭhame yāme paṭhamā vijjā adhigatā,||
avijjā vihatā vijjā uppannā tamo vihato aloko uppanno yathā taɱ appamattassa ātāpino pahitattassa viharato.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaniye ṭhite ānejjappatte4 sattānaɱ cutūpapātañāṇāya cittaɱ abhininnāmesiɱ.

So dibbena cakkhunā visuddhena atikkantamānusakena satte passāmi cavamāne upapajjamāne,||
hine paṇīte suvaṇṇe dubbaṇṇe sugate duggate yathākammupage satte pajānāmi.

Ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchadiṭṭhikā micchādiṭṭhikammasamādānā,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā,||
ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā,||
te kāyassa bhedā param maraṇā sugatiɱ saggaɱ lokaɱ upannā' ti.

Iti dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe sugate duggate yatākammūpage satte pajānāmi,||
ayaɱ kho me bhāradvāja,||
rattiyā majjhime yāme dutiyā vijjā adhigatā,||
avijjā vihatā vijjā uppannā,||
tamo vihato āloko uppanno,||
yathā taɱ appamattassa ātāpino pahītattassa viharato.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaniye ṭhite ānejjappatte āsavānaɱ khayañāṇāya cittaɱ abhininnāmesiɱ.

So idaɱ dukkhan ti yathābhūtaɱ abbhaññāsiɱ.

Ayaɱ dukkhasamudayo ti yathābhūtaɱ abbhaññāsiɱ.

Ayaɱ dukkhanirodho ti yathābhūtaɱ abbhāññāsiɱ.

Ayaɱ dukkhanirodhagāmiṇīpaṭipadā ti yathābhūtaɱ abbhāññāsiɱ.

Ime āsavāti yathābhūtaɱ abbhāññāsiɱ.

Ayaɱ āsavasamudayoti yathābhūtaɱ abbhāññāsiɱ.

Ayaɱ āsavanirodhoti yathābhūtaɱ abbhāññāsiɱ ayaɱ āsavanirodhagāminīpaṭipadā ti yathābhūtaɱ abbhāññāsiɱ.

Tassa me evaɱ jānato evaɱ passato kāmāsavā pi cittaɱ vimuccittha.

Bhavāsavāpi cittaɱ vimuccittha.

Avijjāsavā pi cittaɱ vimuccittha.

Vimuttasmiɱ vimuttamiti ñāṇaɱ ahosi.

Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyāti abbhaññāsiɱ.

Ayaɱ kho me bhāradvāja,||
rattiyā pacchime yāme tatiyā vijjā adhigatā,||
avijjā vihatā vijjā uppannā,||
tamo vihato ,āloko uppanno,||
yathā taɱ appamattassa ātāpino pahītattassa viharatoti.|| ||

Evaɱ vutte saŋgāravo māṇavo Bhagavantaɱ etad avoca: aṭṭhitavataɱ bhoto Gotamassa padhānaɱ ahosi.

Sappurisavataɱ bhoto Gotamassa padhānaɱ ahosi,||
yathā taɱ arahato Sammā-sambuddhassa.|| ||

Kin nu kho bho Gotama,||
atthi devā ti.

Ṭhānaso me taɱ bhāradvāja,||
viditaɱ yad idaɱ atthi devā ti.|| ||

Kin nu kho bho Gotama,||
atthi devā ti puṭṭho samāno,||
ṭhānaso me taɱ bhāradvāja,||
viditaɱ yad idaɱ atthi devā ti vadesi? Na nu kho bho Gotama,||
evaɱ sante tucchā musā hotī' ti.|| ||

Atthi devā'ti bhāradvāja,||
puṭṭho samāno,||
atthi devā'ti [213] yo vadeyya.

Ṭhānaso me viditāti yo vadeyya,||
atha khevattha viññūnā purisena ekaɱsena niṭṭhaɱ gantabbaɱ4 yad idaɱ atthi devā ti.|| ||

Kissa pana me bhavaɱ Gotamo,||
ādiken'eva na byākāsīti|| ||

Uccena sammataɱ kho etaɱ bhāradvāja,||
lokasmiɱ yad idaɱ atthi devā' ti.|| ||

Evaɱ vutte saŋgāravo māṇavo Bhagavantaɱ etad avoca: abhikkantaɱ bho Gotama abhikkantaɱ bho Gotama,||
seyyathā pi bho Gotama,||
nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya' andhakāre vā telapajjotaɱ dhāreyya,||
'cakkhumanto rūpāni dakkhintī'ti,||
evam evaɱ Gotamena aneka-pariyāyena dhammo pakāsito.

Esāhaɱ bhavantaɱ Gotamaɱ saraṇaɱ gacchāmi dhammañca bhikkhu-saŋghañ ca.

Upāsakaɱ maɱ bhavaɱ Gotamo dhāretu ajjatagge pāṇupetaɱ saraṇaɱ gatanti.|| ||

Saŋgāravasuttaɱ dasamaɱ


 

Contact:
E-mail
Copyright Statement   Webmaster's Page