Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
1. Devadaha Vagga

Sutta 102

Pañcattaya Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi|| ||

"Bhikkhavo" ti.|| ||

"Bhadante" ti te bhikkhu Bhagavato paccassosuɱ Bhagavā etad avoca:|| ||

"Santi, bhikkhave, eke samaṇa-brāhmaṇā||
aparanta-kappikā||
aparantānudiṭṭhino||
aparantaɱ ārabbha||
aneka-vihitāni adhivutti-padāni abhivadanti.|| ||

'Saññī attā hoti arogo param maraṇā' ti||
itth'eke abhivadanti.|| ||

'Asaññī attā hoti arogo param maraṇā' ti itth'eke abhivadanti.|| ||

'N'evasaññī nāsaññī attā hoti arogo param maraṇā' ti itth'eke abhivadanti.|| ||

Sato vā pana sattassa ucchedaɱ vināsaɱ vibhavaɱ paññāpenti.|| ||

Diṭṭha-dhamma-nibbānaɱ vā pan'eke abhivadanti.|| ||

Iti santaɱ vā attānaɱ paññāpenti arogaɱ param maraṇā.|| ||

Sato vā pana sattassa ucchedaɱ vināsaɱ vibhavaɱ paññāpenti.|| ||

Diṭṭha-dhamma-nibbānaɱ vā pan'eke abhivadanti.|| ||

Iti santaɱ vā attānaɱ paññāpenti arogaɱ param marana.|| ||

Sato vā pana sattassa ucchedaɱ vināsaɱ vibhavaɱ paññāpenti.|| ||

Diṭṭha-dhamma-nibbānaɱ va pan'eka abhivadanti.|| ||

Iti imāni pañca hutvā tīṇī honti||
tīṇī hutvā pañca honti.|| ||

Ayam uddeso pañcattayassa.|| ||

 


 

Tatra, bhikkhave, ye te samaṇa-brāhmaṇā saññiɱ attānaɱ [229] paññāpenti arogaɱ param maraṇā.|| ||

Rūpiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Arūpiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Rūpiñ ca arūpiñ ca vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

N'evarūpiɱ nārūpiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Ekatta-saññiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Nānatta-saññiɱ vā te bhonto samaṇabrahmaṇā saññiɱ attānaɱ paññāpenti arogaɱ param maraṇā.|| ||

Paritta-saññiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Appamāṇa-saññiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Etaɱ vā pan'ekesaɱ upātivattataɱ viññāṇa-kasiṇaɱ eke abhivadanti appamāṇaɱ āneñjaɱ.|| ||

Ta-y-idaɱ, bhikkhave, Tathāgato pajānāti:|| ||

Ye kho te bhonto samaṇa-brāhmaṇā saññiɱ attānaɱ paññāpenti arogaɱ param maraṇā —|| ||

Rūpiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Arūpiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Rūpiñ ca arūpiñ ca vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

N'evarūpiɱ nārūpiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Ekatta-saññiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Nānatta-saññiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Paritta-saññiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Appamāṇa-saññiɱ vā te bhonto samaṇa-brāhmaṇā saññiɱ attānaɱ paññāpenti arogaɱ param maraṇā.|| ||

Yā vā pan'esaɱ saññānaɱ parisuddhā paramā aggā anuttariyā [230] akkhāyati||
yadi rūpa-saññānaɱ||
yadi arūpa-saññānaɱ||
yadi ekatta-saññānaɱ||
yadi nānatta-saññānaɱ||
'N'atthi kiñci' ti||
ākiñcaññāyatanaɱ eke abhivadanti appamāṇaɱ āneñjaɱ.|| ||

Ta-y-idaɱ saŋkhataɱ oḷārikaɱ:||
'Atthi kho pana Sankhārānaɱ nirodho,||
atth'etan' ti||
iti viditvā tassa nissaraṇa-dassāvī Tathāgato tad upātivatto.|| ||

 


 

Tatra, bhikkhave, ye te samaṇa-brāhmaṇā asaññiɱ attānaɱ paññāpenti arogaɱ param maraṇā —|| ||

Rūpiɱ vā te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

Arūpiɱ vā te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

Rūpiñ ca arūpiñ ca vā te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

N'evarūpiɱ nārūpiɱ vā te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

Tatra, bhikkhave, ye te samaṇa-brāhmaṇā saññiɱ attānaɱ paññāpenti arogaɱ param maraṇā,||
tesaɱ eke paṭikkosanti.|| ||

Taɱ kissa hetu?|| ||

'Saññā-rogo,||
saññā-gaṇḍo,||
saññā-sallaɱ||
etaɱ sattaɱ||
etaɱ paṇītaɱ||
yad idaɱ asaññan' ti.|| ||

Ta-y-idaɱ, bhikkhave, Tathāgato abhijānāti.|| ||

Ye kho te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

Rūpiɱ vā te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

Arūpiɱ vā te bhonto samaṇa-brāhmaṇā asaññiɱ attānaɱ paññāpanti aerogaɱ param maraṇā.|| ||

Rūpiñ ca arūpiñ ca vā te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

N'evarūpiɱ nārūpiɱ vā te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

Yo hi koci bhikkhave,||
samaṇo vā brāhmaṇo vā evaɱ vadeyya:|| ||

'Aham aññatra rūpā
aññatra vedanāya
aññatra saññāya
aññatra Sankhārehi
viññāṇassa āgatiɱ vā
gatiɱ vā
cutiɱ vā
upapattiɱ vā
vuḍḍhiɱ vā
virūḷhiɱ vā
vepullaɱ vā
paññāpessāmī' ti,||
n'etaɱ ṭhānaɱ vijjati.|| ||

Ta-y-idaɱ saŋkhataɱ oḷārikaɱ.|| ||

Atthi kho pana Sankhārānaɱ

[231] nirodho,||
atth'etan ti iti viditvā tassa nissaraṇa-dassāvī Tathāgato tad upātivatto.|| ||

 


 

Tatra, bhikkhave, ye te samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

Rūpiɱ vā te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

Arūpiɱ vā te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

Rūpiñ ca arūpiñ ca vā te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

N'evarūpiɱ nārūpiɱ vā te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

Tatra, bhikkhave, ye te samaṇa-brāhmaṇā saññiɱ attānaɱ paññāpenti arogaɱ param maraṇā,tesaɱ eke paṭikkosanti,||
yepi te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā.|| ||

Tesaɱ eke paṭikkosanti.|| ||

Taɱ kissa hetu?|| ||

Saññā-rogo,||
saññā-gaṇḍo,||
saññā-sallaɱ,||
asaññā-sammoho||
etaɱ sattaɱ||
etaɱ paṇītaɱ||
yad idaɱ n'eva-saññā-nā-saññanti.|| ||

Tayidaɱ bhikkhave, Tathāgato abhijānāti:|| ||

Ye kho te bhonto,||
samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā:|| ||

Rūpiɱ vā te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

Arūpiɱ vā te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

Rūpiñ ca arūpiñ ca vā te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

N'evarūpiɱ nārūpiɱ vā te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā.|| ||

Ye hi keci, bhikkhave, samaṇā vā brāhmaṇā vā diṭṭha-suta-muta-viññātabbassa Sankhāra-mattena etassa āyatanassa upasampadaɱ paññāpenti.|| ||

Byasanaɱ h'etaɱ bhikkhave,||
akkhāyati etassa āyatanassa upasampadāya.|| ||

[232] Na h'etaɱ bhikkhave,||
āyatanaɱ sasankhāra-samāpatti pattabba-makkhāyati.|| ||

Sankhārāvasesa-samāpatti-pattabbame taɱ bhikkhave āyatanaɱ akkhāyati.|| ||

Ta-y-idaɱ saŋkhataɱ oḷārikaɱ.|| ||

Atthi kho pana Sankhārānaɱ nirodho,||
atth'etan ti iti viditvā tassa nissaraṇa-dassāvī Tathāgato tad upātivatto.|| ||

 


 

Tatra, bhikkhave, ye te samaṇa-brāhmaṇā sato sattassa ucchedaɱ vināsaɱ vibhavaɱ paññāpenti.|| ||

Tatra, bhikkhave, ye te samaṇa-brāhmaṇā saññiɱ attānaɱ paññāpenti arogaɱ param maraṇā,||
tesam eke paṭikkosanti.|| ||

Ye pi te bhonto samaṇa-brāhmaṇā asaññiɱ attānaɱ paññāpenti arogaɱ param maraṇā tesam eke paṭikkosanti;|| ||

Ye pi te bhonto samaṇa-brāhmaṇā n'eva saññiɱ nāsaññiɱ attānaɱ paññāpenti arogaɱ param maraṇā,||
tesam eke paṭikkosanti.|| ||

Taɱ kissa hetu?|| ||

'Sabbe p'ime bhonto samaṇa-brāhmaṇā uddhaɱ-sarā āsattiɱ yeva abhivadanti.|| ||

"Iti pecca bhavissāma||
iti pecca bhavissāmā" ti.|| ||

Seyyathā pi nāma vāṇijassa gacchato evaɱ hoti:|| ||

"Ito me idaɱ bhavissati,||
iminā idaɱ lacchāmī" ti.|| ||

Evam eva ime bhonto samaṇa-brāhmaṇā||
vāṇijūpamā maññe paṭibhanti:|| ||

"Iti pecca bhavissāma,||
iti pecca bhavissāmī"' ti.|| ||

Ta-y-idaɱ, bhikkhave, Tathāgato abhijānāti.|| ||

Ye kho te bhonto samaṇa-brāhmaṇā sato sattassa ucchedaɱ vināsaɱ vibhavaɱ paññāpenti,||
te sakkāya-bhayā||
sakkāya-parijegucchā||
sakkāyaɱ yeva anuparidhāvanti||
anuparivattanti.|| ||

Seyyathā pi nāma sā||
gaddula-baddho daḷeha thambhe vā||
khīle vā upani-baddho||
[233] tam eva thambhaɱ vā||
khīlraɱ vā||
anuparidhāvati anuparivattati.|| ||

Evam ev'ime bhonto samaṇa-brāhmaṇā sakkāya-bhayā sakkāya-parijegucchā sakkāyaɱ yeva anuparidhāvanti,||
anuparivattanti.|| ||

Ta-y-idaɱ saŋkhataɱ oḷārikaɱ,||
atthi kho pana Sankhārānaɱ nirodho atth'etan ti.|| ||

Iti viditvā tassa nissaraṇa-dassāvī Tathāgato tad upātivatto.|| ||

Ye hi keci, bhikkhave, samaṇā vā brāhmaṇā vā aparanta-kappikā aparantānudiṭṭhino aparantaɱ ārabbha aneka-vihitāni adhivutti-padāni abhivadanti.|| ||

Sabbe te imān'eva pañcāyatanāni abhivadanti etesaɱ vā aññataraɱ.|| ||

Santi, bhikkhave, eke samaṇa-brāhmaṇā pubbanta-kappikā pubbantānudiṭṭhino pubbantaɱ ārabbha aneka-vihitāni adhivutti-padāni abhivadanti.|| ||

Sassato attā ca loko ca,||
idam eva saccaɱ mogham aññan ti itth'eke abhivadanti.|| ||

Asassato attā ca loko ca,||
idam eva saccaɱ mogham aññan ti itth'eke abhivadanti.|| ||

Sassato ca asassato ca attā ca loko ca,||
idam eva saccaɱ mogham aññan ti itth'eke abhivadanti.|| ||

N'eva sassato nāsassato attā ca loko ca,||
idam eva saccaɱ mogham aññan ti itth'eke abhivadanti antavā attā ca loko ca,||
idam eva saccaɱ mogham aññan ti itth'eke abhivadanti.|| ||

Anantavā attā ca loko ca,||
idam eva saccaɱ mogham aññan ti itth'eke abhivadanti.|| ||

Antavā ca anantavā ca attā ca loko ca,||
idam eva saccaɱ mogham aññan ti itth'eke abhivadanti.|| ||

N'ev'antavā nānantavā attā ca loko ca,||
idam eva saccaɱ mogham aññan ti itth'eke abhivadanti.|| ||

Ekatta-saññī attā ca loko ca,||
idam eva saccaɱ mogham aññan ti itth'eke abhivadanti.|| ||

Nānatta-saññī attā ca loko ca,||
idam eva saccaɱ mogham aññan ti itth'eke abhivadanti.|| ||

Paritta-saññi attā ca loko ca,||
idam eva saccaɱ mogham aññan ti itth'eke abhivadanti.|| ||

Appamāṇa-saññī attā ca loko ca,||
idam eva saccaɱ mogham aññan ti itth'eke abhivadanti.|| ||

Ekanta-sukhī attā ca loko ca,||
idam eva saccaɱ mogham aññan ti itth'eke abhivadanti.|| ||

Ekanta-dukkhī attā ca loko ca,||
idam eva [234] saccaɱ mogham aññan ti itth'eke abhivadanti.|| ||

Sukha-dukkhī attā ca loko ca,||
idam eva saccaɱ mogham aññan ti itth'eke abhivadanti.|| ||

Adukkha-m-asukhī attā ca loko ca,||
idam eva saccaɱ mogham aññan ti itth'eke abhivadanti.|| ||

Tatra, bhikkhave, ye te samaṇa-brāhmaṇā evaɱvādino evaɱ-diṭṭhino:||
sassato attā ca loko ca,||
idam eva saccaɱ mogham aññan ti.|| ||

Tesaɱ vata aññatr'eva saddhāya aññatra ruciyā aññatra anussavā aññatra ākāraparivitakkā aññatra diṭṭhinijjhānakkhantiyā paccattaɱ yeva ñāṇaɱ bhavissati parisuddhaɱ pariyodātanti.|| ||

Netaɱ ṭhānaɱ vijjati.|| ||

Paccattaɱ kho pana bhikkhave,||
ñāṇe asati parisuddhe pariyodāte,||
yada pi te bhonto samaṇa-brāhmaṇā tattha ñāṇabhāgamattameva pariyodapenti,||
tad api tesaɱ bhavataɱ samaṇa-brāhmaṇānaɱ upādānamakkhāyati.|| ||

Ta-y-idaɱ saŋkhataɱ oḷārikaɱ,||
atthi kho pana Sankhārānaɱ nirodho,||
atth'etan ti iti viditvā tassa nissaraṇa-dassāvī Tathāgato tad upātivatto.|| ||

Tatra, bhikkhave, ye te samaṇa-brāhmaṇā evaɱvādino evaɱ-diṭṭhino:||
asassato attā ca loko ca,||
idam eva saccaɱ mogham aññan ti itth'eke abhivadanti.|| ||

Sassato ca asassato attā ca loko ca,||
idam eva saccaɱ mogham aññan ti itteke abhivadanti.|| ||

N'eva sassato nāsassato attā ca loko ca idam eva saccaɱ mogham aññan ti itth'eke abhivadanti antavā attā ca loko ca,||
idam eva saccaɱ mogham aññan ti itth'eke abhivadanti.|| ||

Anantavā attā ca loko ca,||
idam eva saccaɱ mogham aññan ti itth'eke abhivadanti.|| ||

Antavā ca anantavā ca attā ca loko ca idam eva saccaɱ mogham aññan ti itth'eke abhivadanti.|| ||

N'ev'antavā nānantavā attā ca loko ca idam eva saccaɱ mogham aññan ti itth'eke abhivadanti.|| ||

Ekatta-saññī attā ca loko ca idam eva saccaɱ mogham aññan ti itth'eke abhivadanti.|| ||

Nānatta-saññi attā ca loko ca idam eva saccaɱ mogham aññan ti itth'eke abhivadanti.|| ||

Paritta-saññī attā ca loko ca idam eva saccaɱ mogham aññan ti itth'eke abhivadanti.|| ||

Appamāṇa-saññī attā ca loko ca idam eva saccaɱ mogham aññan ti itth'eke abhivadanti.|| ||

Ekanta-sukhī attā ca loko ca idam eva saccaɱ mogham aññan ti itth'eke abhivadanti.|| ||

Ekanta-dukkhī attā ca loko ca idam eva saccaɱ mogham aññan ti itth'eke abhivadanti.|| ||

Sukha-dukkhī attā ca loko ca idam eva saccaɱ mogham aññan ti itth'eke abhivadanti.|| ||

Adukkha-m-asukhī attā ca loko ca idam eva saccaɱ moghamasaññanti.|| ||

Tesaɱ vata aññatr'eva saddhāya aññatra ruciyā aññatra anussavā aññatra ākāraparivitakkā aññatra diṭṭhinijjhānakkhantiyā paccattaɱ yeva ñāṇaɱ bhavissati parisuddhaɱ pariyodātanti n'etaɱ [235] ṭhānaɱ vijjati.|| ||

Paccattaɱ kho pana bhikkhave,||
ñāṇe asati parisuddhe pariyodāte,||
yadi pi te bhonto samaṇa-brāhmaṇā tattha ñāṇabhāgamattameva pariyodapenti.|| ||

Tadi pi tesaɱ bhavataɱ samaṇa-brāhmaṇānaɱ upādānamakkhāyati.|| ||

Ta-y-idaɱ saŋkhataɱ oḷārikaɱ.|| ||

Atthi kho pana Sankhārānaɱ nirodho,||
atth'etan ti iti viditvā tassa nissaraṇa-dassāvī Tathāgato tad upātivatto.|| ||

Idha, bhikkhave, ekacco samaṇo vā brāhmaṇo vā pubbantānudiṭṭhinañ ca paṭinissaggā aparantānudiṭṭhinañ ca paṭinissaggā sabbaso kāmasaɱyojanānaɱ anadhiṭṭhānā pavivekaɱ pītiɱ upasampajja viharati.|| ||

'Etaɱ santaɱ etaɱ paṇītaɱ,||
yad idaɱ pavivekaɱ pītiɱ upasampajja viharāmī' ti.|| ||

Tassa sā pavivekā pīti nirujjhati,||
pavivekāya pītiyā nirodhā uppajjati domanassaɱ.|| ||

Domanassassa nirodhā [236] uppajjati pavivekā pīti.|| ||

Seyyathā pi, bhikkhave, yaɱ chāyā jahati taɱ ātapo pharati,||
yaɱ ātapo jahati,||
taɱ chāyā pharati.|| ||

Evam eva kho bhikkhave,||
pavivekāya pītiyā nirodhā uppajjati domanassaɱ,||
domanassassa nirodhā uppajjati pavivekā pīti.|| ||

Ta-y-idaɱ, bhikkhave, Tathāgato abhijānāti:|| ||

'Ayaɱ kho bhavaɱ samaṇo vā brāhmaṇo vā pubbantānudiṭṭhinañ ca paṭinissaggā aparantānudiṭṭhinañ ca paṭinissaggā sabbaso-|| ||

Kāmasaɱyojanānaɱ anadhiṭṭhānā,||
pavivekaɱ pītiɱ upasampajja viharati:||
'etaɱ santaɱ etaɱ paṇītaɱ,||
yad idaɱ pavivekaɱ pītiɱ upasampajja viharāmī' ti.|| ||

Tassa sā pavivekā pīti nirujjhati,||
pavivekāya pītiyā nirodhā uppajjati domanassaɱ.|| ||

Domanassassa nirodhā uppajjati pavivekā pīti.|| ||

Ta-y-idaɱ saŋkhataɱ oḷārikaɱ,||
atthi kho pana Sankhārānaɱ nirodho,||
attheta'nti iti viditvā tassa nissaraṇa-dassāvī Tathāgato tad upātivatto.|| ||

Idha pana bhikkhave,||
ekacco samaṇo vā brāhmaṇo vā pubbantānudiṭṭhīnañ ca paṭinissaggā aparantānudiṭṭhīnañ ca paṭinissaggā sabbaso kāmasaɱyojanānaɱ anadhiṭṭhānā pavivekāya pītiyā samatikkamā nirāmisaɱ sukhaɱ upasampajja viharati:||
'etaɱ santaɱ etaɱ paṇītaɱ-yad idaɱ [237] nirāmisaɱ sukhaɱ upasampajja viharāmī' ti tassa taɱ nirāmisaɱ sukhaɱ nirujjhati.|| ||

Nirāmisassa sukhassa nirodhā uppajjati pavivekā pīti.|| ||

Pavivekāya pītiyā nirodhā uppajjati nirāmisaɱ sukhaɱ.|| ||

Seyyathā pi,||
bhikkhave,||
yaɱ chāyā jahati,||
taɱ ātapo pharati.|| ||

Yaɱ ātapo jahati,||
taɱ chāyā pharati.|| ||

Evam eva kho bhikkhave,||
nirāmisassa sukhassa nirodhā uppajjati pavivekā pīti,||
pavivekāya pītiyā nirodhā uppajjati nirāmisaɱ sukhaɱ.|| ||

Ta-y-idaɱ, bhikkhave, Tathāgato abhijānāti: 'ayaɱ kho bhavaɱ samaṇo vā brāhmaṇo vā pubbantānudiṭṭhinañ ca paṭinissaggā aparantānudiṭṭhīnañ ca paṭinissaggā sabbaso kāmasaɱyojanānaɱ anadhiṭṭhānā pavivekāya pītiyā samatikkamā nirāmisaɱ sukhaɱ upasampajja viharati:||
'etaɱ santaɱ etaɱ paṇītaɱ yad idaɱ nirāmisaɱ sukhaɱ upasampajja viharāmī' ti.|| ||

Tassa taɱ nirāmisaɱ sukhaɱ nirujjhati.|| ||

Nirāmisassa sukhassa nirodhā uppajjati pavivekā pīti,||
pavivekāya pītiyā nirodhā uppajjati nirāmisaɱ sukhaɱ.|| ||

Ta-y-idaɱ saŋkhataɱ oḷārikaɱ,||
atthi kho pana Sankhārānaɱ nirodho,||
atth'etan ti iti viditvā tassa nissaraṇa-dassāvī Tathāgato tad upātivatto.|| ||

Idha pana bhikkhave,||
ekacco samaṇo vā brāhmaṇo vā pubbantānudiṭṭhīnañ ca paṭinissaggā aparantānudiṭṭhīnañ ca paṭinissaggā sabbaso kāmasaɱyojanānaɱ anadhiṭṭhānā pavivekāya pītiyā samatikkamā nirāmisassa sukhassa samatikkamā adukkha-m-asukhaɱ vedanaɱ upasampajja viharati.'|| ||

Etaɱ santaɱ eta paṇītaɱ yad idaɱ adukakhamasukhaɱ vedanaɱ upasampajja viharāmī' ti.|| ||

Tassa sā adukkhamasukhā vedanā nirujjhati.|| ||

Adukkha-m-asukhāya vedanāya nirodhā uppajjati nirāmisaɱ sukhaɱ.|| ||

Nirāmisassa sukhassa nirodhā uppajjati adukkhamasukhā vedanā.|| ||

Seyyathā pi, bhikkhave, yaɱ chāyā jahati,||
taɱ ātapo pharati.|| ||

Yaɱ ātapo jahati,||
taɱ chāyā pharati.|| ||

Evam eva kho bhikkhave,||
adukkhamasukhāya vedanāya nirodhā uppajjati nirāmisaɱ sukhaɱ,||
nirāmisassa sukhassa nirodhā uppajjati adkkhamasukhā vedanā.|| ||

Ta-y-idaɱ, bhikkhave, Tathāgato pajānāti: 'ayaɱ kho bhavaɱ samaṇo vā brāhmaṇo vā pubbantānudiṭṭhīnañca paṭinissaggā aparantānudiṭṭhīnañ ca paṭinissaggā sabbaso kāmasaɱyojanānaɱ anadhiṭṭhānā pavivekāya pītiyā samatikkamā nirāmisassa sukhassa samatikkamā adukkha-m-asukhaɱ vedanaɱ upasampajja viharati:||
etaɱ santaɱ etaɱ paṇītaɱ yad idaɱ adukkha-m-asukhaɱ vedanaɱ upasampajja viharāmī' ti.|| ||

Tassa sā adukkhamasukhā vedanā nirujjhati.|| ||

Adukkha-m-asukhāya vedanāya nirodhā uppajjati nirāmisaɱ sukhaɱ.|| ||

Nirāmisassa sukhassa nirodhā uppajjati adukkhamasukhā vedanā.|| ||

Ta-y-idaɱ saŋkhataɱ oḷārikaɱ,||
atthi kho pana Sankhārānaɱ nirodho,||
atth'etan ti iti viditvā tassa nissaraṇa-dassāvī Tathāgato tad upātivatto.|| ||

Idha pana bhikkhave,||
ekacco samaṇo vā brāhmaṇo vā pubbantānudiṭṭhīnañca paṭinissaggā aparantānudiṭṭhīnañca paṭinissaggā sabbaso kāmasaɱyojanānaɱ anadhiṭṭhānā pavivekāya pītiyā samatikkamā nirāmisassa sukhassa samatikkamā adukkhamasukhāya vedanāya samatikkamā santohamasmi nibbutohamasmi anupādānohamasmī' ti samanupassati.|| ||

Ta-y-idaɱ, bhikkhave, Tathāgato pajānāti:|| ||

'Ayaɱ kho bhavaɱ samaṇo vā brāhmaṇo vā pubbantānudiṭṭhīnañca paṭinissaggā aparantānudiṭṭhīnañca paṭinissaggā sabbaso kāmasaɱyojanānaɱ anadhiṭṭhānā pavivekāya pītiyā samatikkamā nirāmisassa sukhassa samatikkamā adukkhamasukhāya vedanāya samatikkamā santohamasmi nibbutohamasmi anupādānohamasmī' ti samanupassati.|| ||

Addhā ayamāyasmā nibbānasappāyaɱ yeva paṭipadaɱ abhivadati.|| ||

Atha ca panāyaɱ bhavaɱ samaṇo vā brāhmaṇo vā pubbantānudiṭṭhiɱ vā upādiyamāno upādiyati.|| ||

Aparantānudiṭṭhiɱ vā upādiyamāno upādiyati.|| ||

Kāmasaɱyojanānaɱ vā upādiyamāno upādiyati.|| ||

Pavivekaɱ vā pītiɱ upādiyamāno upādiyati.|| ||

Nirāmisaɱ vā sukhaɱ upādiyamāno upādiyati.|| ||

Adukkhamasukhaɱ vā vedanaɱ upādiyamāno upādiyati.|| ||

Yañ ca kho ayamāyasmā 'santohamasmi,||
nibbutohamasmi anupādinohamasmī' ti samanupassati.|| ||

Tadapi imassa bhoto samaṇassa brāhmaṇassa upādānamakkhāyati.|| ||

Ta-y-idaɱ saŋkhataɱ oḷārikaɱ,||
atthi kho pana Sankhārānaɱ nirodho,||
atth'etan ti iti viditvā tassa nissaraṇa-dassāvī Tathāgato tad upātivatto.|| ||

Idaɱ kho pana bhikkhave, Tathāgatena anuttaraɱ santivarapadaɱ [238] abhisamBuddhaɱ 'yad idaɱ channaɱ phassāyatanānaɱ samudayañ ca atthaŋgamañca assādañ ca ādīnavañ ca nissaraṇañ ca yathābhūtaɱ viditvā anupādā vimokkho' ti.|| ||

Idam avoca Bhagavā.|| ||

Attamanā te bhikkhū Bhagavato bhāsitaɱ abhinandunti.|| ||

Pañcattayasuttaɱ dutiyaɱ


 

Contact:
E-mail
Copyright Statement   Webmaster's Page