Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
1. Devadaha Vagga

Sutta 106

Āneñjasappāya Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][upal] Evaɱ me sutaɱ|| ||

Ekaɱ samayaɱ Bhagavā Kurūsu viharati kammāsadammaɱ nāma Kurūnaɱ nigamo. Tatra kho Bhagavā bhikkhu āmantesi Bhikkhavo ti, bhadanteti te bhikkhu Bhagavato paccassosuɱ. Bhagavā etad avoca:|| ||

Aniccā bhikkhave, kāmā tucchā mosadhammā. Māyākatame taɱ bhikkhave, bālalāpanaɱ. Ye ca diṭṭhadhammikā kāmā, ye ca samparāyikā kāmā, yā ca diṭṭhadhammikā [262] kāmasaññā, yā ca samparāyikā kāmasaññā, ubhayam etaɱ māradheyyaɱ, mārassesavisayo, marassesanivāpo, mārassesagocaro. Etth'ete pāpakā akusalā mānasā abhijjhāpi vyāpādāpi sārambhāpi saɱvattanti. Teva ariyasāvakassa idhamanusikkhato antarāyāya sambhavanti.|| ||

Tatra, bhikkhave, ariyasāvako iti paṭisañcikkhati: ye ca diṭṭhadhammikā kāmā ye ca samparāyikā kāmā, yā ca diṭṭhadhammikā kāmasaññā yā ca samparāyikā kāmasaññā, ubhayam etaɱ māradheyyaɱ. Mārassesavisayo, mārassesanivāpo, mārassesagocaro. Etth'ete pāpakā akusalā mānasā abhijjhāpi vyāpādāpi sārambhāpi saɱvattanti. Teva ariyasāvakassa idhamanusikkhato antarāyāya sambhavanti. Yan'nūnāhaɱ vipulena mahaggatena cetasā vihareyyaɱ abhibhuyya lokaɱ adhiṭṭhāya manasā. Vipulena hi me mahaggatena cetasā viharato abhibhuyya lokaɱ adhiṭṭhāya manasā. Ye pāpakā akusalā manasā abhijjhāpi sārambhāpi, te na bhavissanti. Tesaɱ pahānā aparittañ ca me cittaɱ bhavissati, appamāṇaɱ subhāvita'nti. Tassa evaɱ paṭipannassa tabbahulavihārino āyatane cittaɱ pasīdati.Sampasāde sati etarahi vā āneñjaɱ1 samāpajjati, paññāya vā adhimuccati. Kāyassa bhedā param maraṇā ṭhāname taɱ vijjati: yaɱ taɱ saɱvattanikaɱ viññāṇaɱ assa āneñjupagaɱ. Ayaɱ bhikkhave, paṭhamā āneñjasappāyā paṭipadā akkhāyati.|| ||

Puna ca paraɱ bhikkhave, ariyasāvako iti paṭisañcikkhati, ye ca diṭṭhadhammikā kāmā ye ca samparāyikā kāmā, yā ca diṭṭhadhammikā kāmasaññā yā ca samparāyikā kāmasaññā, yaɱ kiñci rūpaɱ1 cattāri ca mahābhūtāni catunnañca mahābhūtānaɱ rūpa'nti. Tassa evaɱ paṭipannassa tabbahulavihārino āyatane cittaɱ pasīdati. Sampasāde sati etarahi vā āneñjaɱ samāpajjati, paññāya vā adhimuccati. Kāyassa bhedā param maraṇā ṭhāname taɱ vijjati: yaɱ taɱ saɱvattanikaɱ viññāṇaɱ assa āneñjupagaɱ. Ayaɱ bhikkhave, dutiyā āneñjasappāyā paṭipadā akkhāyati.|| ||

[263] Puna ca paraɱ bhikkhave, ariyasāvako iti paṭisañcikkhati, ye ca diṭṭhadhammikā kāmā ye ca samparāyikā kāmā, yā ca diṭṭhadhammikā kāmasaññā yā ca samparāyikā kāmasaññā, yeca diṭṭhadhammikā rūpā, ye ca samparāyikā rūpā, yā ca diṭṭhadhammikā rūpasaññā yā ca samparāyikā rūpasaññā ubhayam etaɱ aniccaɱ yad aniccaɱ taɱ nālaɱ abhinandituɱ, nālaɱ abhivadituɱ, nālaɱ ajjhositu'nti. Tassa evaɱ paṭipannassa tabbahulavihārino āyatane cittaɱ pasīdati. Sampasāde sati etarahi vā āneñjaɱ samāpajjati, paññāya vā adhimuccati. Kāyassa bhedā param maraṇā ṭhāname taɱ vijjati: yaɱ taɱ saɱvattanikaɱ viññāṇaɱ assa āneñjupagaɱ. Ayaɱ bhikkhave, tatiyā āneñjasappāyā paṭipadā akkhāyati.|| ||

Puna ca paraɱ bhikkhave, ariyasāvako iti paṭisañcikkhati. Ye ca diṭṭhadhammikā kāmā ye ca samparāyikā kāmā, yā ca diṭṭhadhammikā kāmasaññā yā ca samparāyikā kāmasaññā, ye ca diṭṭhadhammikā rūpā ye ca samparāyikā rūpā, yā ca diṭṭhadhammikā rūpasaññā yā ca samparāyikā rūpasaññā yā ca āneñjasaññā, sabbā saññā yatthetā aparisesā nirujjhanti. Etaɱ santaɱ etaɱ paṇītaɱ yad idaɱ ākiñcaññāyatana'nti. Tassa evaɱ paṭipannassa tabbahulavihārino āyatane cittaɱ pasīdati. Sampasāde sati etarahi vā ākiñcaññāyatanaɱ samāpajjati. Paññāya vā adhimuccati. Kāyassa bhedā param maraṇā ṭhāname taɱ vijjati: yaɱ taɱ saɱvattanikaɱ viññāṇaɱ assa ākiñcaññāyatanūpagaɱ. Ayaɱ bhikkhave, paṭhamā ākiñcaññāyatanasappāyā paṭipadā akkhāyati.|| ||

Puna ca paraɱ bhikkhave, ariyasāvako araññagato vā rukkhamūlagato vā suññāgāragato vā iti paṭisañcikkhati: suññamidaɱ attena vā attaniyena vā' ti. Tassa evaɱ paṭipannassa tabbahulavihārino āyatane cittaɱ pasīdati. Sampasāde sati etarahi vā ākiñcaññāyatanaɱ samāpajjati. Paññāya vā adhimuccati. Kāyassa bhedā param maraṇā ṭhāname taɱ vijjati: yaɱ taɱ saɱvattanikaɱ viññāṇaɱ assa ākiñcaññāyatanūpagaɱ. Ayaɱ bhikkhave, dutiyā ākiñcaññāyatanasappāyā paṭipadā akkhāyati.|| ||

Puna ca paraɱ bhikkhave, ariyasāvako iti paṭisañcikkhati: nāhaɱ kvacani kassacī kiñcanattasmiɱ, na ca [264] mama kvacani kismici kiñcanatatthi'ti1 tassa evaɱ paṭipannassa tabbahulavihārino āyatane cittaɱ pasīdati. Sampasāde sati etarahi vā ākiñcaññāyatanaɱ samāpajjati. Paññāya vā adhimuccati. Kāyassa bhedā param maraṇā ṭhāname taɱ vijjati: yaɱ taɱ saɱvattanikaɱ viññāṇaɱ assa ākiñcaññāyatanūpagaɱ. Ayaɱ bhikkhave, tatiyā ākiñcaññāyatanasappāyā paṭipadā akkhāyati.|| ||

Puna ca paraɱ bhikkhave, ariyasāvako iti paṭisañcikkhati: ye ca diṭṭhadhammikā kāmā ye ca samparāyikā kāmā, yā ca diṭṭhadhammikā kāmasaññā yā ca samparāyikā kāmasaññā, ye ca diṭṭhadhammikā rūpā ye ca samparāyikā rūpā, yā ca diṭṭhadhammikā rūpasaññā yā ca samparāyikā rūpasaññā, yā ca āneñjasaññā, yā ca ākiñcaññāyatanasaññā, sabbā saññā yatthetā aparisesā nirujjhanti. Etaɱ santaɱ etaɱ paṇītaɱ yad idaɱ n'eva-saññā-nāsaññāyatana'nti. Tassa evaɱ paṭipannassa tabbahulavihārino āyatane cittaɱ pasīdati. Sampasāde sati etarahi vā n'eva-saññā-nāsaññāyatanaɱ samāpajjati, paññāya vā adhimuccati. Kāyassa bhedā param maraṇā ṭhāname taɱ vijjati: yaɱ taɱ saɱvattanikaɱ viññāṇaɱ assa n'eva-saññā-nāsaññāyatanūpagaɱ, ayaɱ bhikkhave, n'eva-saññā-nāsaññāyatanasappāyā paṭipadā akkhāyatī ti.|| ||

Evaɱ vutte āyasmā Ānando bhavantaɱ etad avoca: 'idha bhante. Bhikkhu evaɱ paṭipanno hoti, no c'assa, no ca me siyā na bhavissati, na me bhavissati. Yadatthi yaɱ bhūtaɱ taɱ pajāhāmī'ti evaɱ upekkhaɱ paṭilabhati. Parinibbāyeyya nu kho so bhante. Bhikkhu na vā parinibbāyeyyā' ti.|| ||

Apetthekacco Ānanda, bhikkhu parinibbāyeyya, apetthekacco bhikkhu na parinibbāyeyyā' ti.|| ||

Ko nu kho bhante, hetu, ko paccayo, yenapetthekacco bhikkhu parinibbāyeyya, apetthekacco bhikkhu na parinibbāyeyyāti. || ||

Idh'Ānanda bhikkhu evaɱ paṭipanno hoti: 'no c'assa, no ca me siyā. Na bhavissati. Yadatthi [265] yaɱ bhūtaɱ taɱ pajāhāmī'ti evaɱ upekkhaɱ paṭilabhati. So taɱ upekkhaɱ abhinandati, abhivadati, ajjhosāya tiṭṭhati. Tassa taɱ upekkhaɱ abhinandato abhivadato ajjhosāya tiṭṭhato taɱ nissitaɱ hoti viññāṇaɱ, tadupādānaɱ saupādāno Ānanda, bhikkhu na parinibbāyatī' ti.|| ||

'Kahampana so bhante, bhikkhu upādiyamāno upādiyatī' ti.|| ||

N'evasaññānāsaññāyatanaɱ ānandāti.|| ||

Upādānaseṭṭhaɱ kira so bhante, bhikkhu upādiyamāno upādiyatī ti.|| ||

Upādānaseṭṭhaɱ hi so Ānanda, bhikkhu upādiyamāno upādiyati. Upādānaseṭṭhaɱ h'etaɱ Ānanda, yad idaɱ n'eva-saññā-nāsaññāyatanaɱ.|| ||

Idh'Ānanda bhikkhu evaɱ paṭipanno hoti: no c'assa, no ca me siyā. Na bhavissati. Na me bhavissati. Yadatthi yaɱ bhūtaɱ taɱ pajahāmī' ti. Evaɱ upekkhaɱ paṭilabhati. So taɱ upekkhaɱ nābhinandati, nābhivadati, nājjhosāya tiṭṭhati. Tassa taɱ upekkhaɱ anabhinandato anabhivadato anajjhosāya tiṭṭhato na taɱ nissitaɱ hoti viññāṇaɱ, na tadupādānaɱ anupādāno Ānanda, bhikkhu parinibbāyatī ti.|| ||

Acchariyaɱ bhante! Abbhutaɱ bhante! Nissāya nissāya kira no bhante, Bhagavatā oghassa nittharaṇā akkhātā. Katamo pana bhante, ariyo vimokkhoti|| ||

Idh'Ānanda, ariyasāvako bhikkhu itipaṭisañcikkhati: ye ca diṭṭhadhammikā kāmā, ye ca samparāyikā kāmā, yā ca diṭṭhadhammikā kāmasaññā, yā ca samparāyikā kāmasaññā ye ca diṭṭhadhammikā rūpā ye ca samparāyikā rūpā yā ca diṭṭhadhammikā rūpasaññā, yā ca samparāyikā rūpasaññā, yā ca āneñjasaññā, yā ca ākiñcaññāyatanasaññā, yā ca n'eva-saññā-nāsaññāyatanasaññā, esa sakkāyo, yāvatā sakkāyo, etaɱ amataɱ yad idaɱ anupādā cittassa vimokkho.|| ||

Iti kho Ānanda, desitā mayā aneñjasappayā paṭipadā, desitā ākiñcaññāyatanasappāyā paṭipadā, desitā n'eva-saññā-nāsaññāyatanasappāyā paṭipadā, desitā nissāya nissāya oghassa nittharaṇā, desito ariyo vimokkho. Yaɱ kho Ānanda, satthārā karaṇīyaɱ sāvakānaɱ hitesinā anukampakena anukampaɱ upādāya. [266] kataɱ vo taɱ mayā. Etāni Ānanda, rukkhamūlāni, etāni suññāgārāni, jhāyatha Ānanda, mā pamādattha, mā pacchā vippaṭisārino ahuvattha. Ayaɱ vo amhākaɱ anusāsanīti.|| ||

Idam avoca Bhagavā, attamano āyasmā Ānando Bhagavato bhāsitaɱ abhinandīti.|| ||

Āneñjasappāya suttaɱ jaṭaṭhaɱ


 

Contact:
E-mail
Copyright Statement   Webmaster's Page