Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
2. Anupada Vagga

Sutta 118

Ānāpāna-Sati Sutta

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][ntbb][upal][olds][nno] Evaɱ me sutaɱ:|| ||

Ekaɱ samayaɱ Bhagavā
Sāvatthiyaɱ viharati Pubbārāme Migāramātu pāsāde
sambahulehi abhiññātehi...
abhiññātehi therehi
sāvakehi saddhiɱ

[2][bd.] Āyasmatā ca Sāriputtena
Āyasmatā ca Mahā-Moggallānena
Āyasmatā ca Mahā-Kassapena
Āyasmatā ca Mahā-Kaccāyanena
Āyasmatā ca Mahā-Koṭṭhitena
Āyasmatā ca Mahā-Kappinena
Āyasmatā ca Mahā-Cundena
Āyasmatā ca Anuruddhena
Āyasmatā ca Revatena
Āyasmatā ca Ānandena

[3][bd.] aññehi ca abhiññātehi abhiññātehi
therehi sāvakehi saddhiɱ.

[4][bd.] Tena kho pana samayena therā bhikkhū nave bhikkhū ovadanti anusāsanti

[5][bd.] App'ekacce therā bhikkhū dasa pi bhikkhū ovadanti anusāsanti
app'ekacce therā bhikkhū vīsatim pi bhikkhū ovadanti anusāsanti
app'ekacce therā bhikkhū tiɱsam pi bhikkhū ovadanti anusāsanti
app'ekacce therā bhikkhū cattarisampi bhikkhū ovadanti anusāsanti

[6][bd.] Te ca navā bhikkhū
therehi bhikkhūhi ovadiyamānā anusāsiyamānā
uḷāraɱ pubbenāparaɱ visesaɱ jānāti.

 


 

[7][bd.] Tena kho pana samayena
Bhagavā
tadahu'posathe pannarase pavāraṇāya
puṇṇāya puṇṇamāya rattiyā
bhikkhu-saŋghaparivuto abbhokāse nisinno hoti.

[8][bd.] Atha kho Bhagavā tuṇhībhūtaɱ
tuṇhībhūtaɱ bhikkhu-saŋghaɱ anuviloketvā
bhikkhū āmantesi:
'Āraddho'smi bhikkhave, imāya paṭipadāya,
āraddhacitto'smi bhikkhave, imāya paṭipadāya.
Tasmāt iha bhikkhave,
bhīyosomattāya viriyaɱ ārabhatha
appattassa pattiyā
anadhigatassa adhigamāya
asacchikatassa sacchikiriyāya
idh'evāhaɱ
Sāvatthiyaɱ Komudiɱ
cātumāsiniɱ āgamessāmiti.

 


 

[9][bd.] Assosuɱ kho jānapadā bhikkhū: Bhagavā kira tatth'eva
Sāvatthiyaɱ Komudiɱ
cātumāsiniɱ āgamessatī ti.
Te ca jānapadā bhikkhū Sāvatthīɱ
osaranti Bhagavantaɱ dassanāya.

[10][bd.] Te ca kho therā bhikkhū bhīyosomattāya
nave bhikkhū ovadanti anusāsanti.

[11][bd.] App'ekacce therā bhikkhū dasa pi bhikkhū ovadanti anusāsanti
app'ekacce therā bhikkhū vīsatim pi bhikkhū ovadanti anusāsanti
app'ekacce therā bhikkhū tiɱsam pi bhikkhū ovadanti anusāsanti
app'ekacce therā bhikkhū cattarisampi bhikkhū ovadanti anusāsanti

[12][bd.] Te ca navā bhikkhū
therehi bhikkhūhi ovadiyamānā anusāsiyamānā
uḷāraɱ pubbenāparaɱ visesaɱ jānāti.

 


 

[13][bd.] Tena kho pana samayena
Bhagavā
tadahu'posathe pannarase Komudiyā cātumāsiniyā
puṇṇāya puṇṇamāya rattiyā
bhikkhu-saŋghaparivuto abbhokāse nisinno hoti.

[14][bd.] Atha kho Bhagavā tuṇhībhūtaɱ
tuṇhibhūtaɱ bhikkhu-saŋghaɱ anuviloketvā
bhikkhū āmantesi:|| ||

'Apalāpā'yaɱ
bhakkhave, parisā nippalāpā'yaɱ
bhikkhave, parisā suddhā sāre patiṭṭhitā.
Tathārūpo ayaɱ, bhikkhave, bhikkhu-saŋgho,
tathārūpā'yaɱ bhikkhave, parisā,
 
yathārūpā parisā
āhuneyyo
pāhuneyyo
dakkhiṇeyyo
añjalikaraṇīyo
Anuttaraɱ puññakkhettaɱ lokassāti.
Tathārūpo ayaɱ, bhikkhave, bhikkhu-saŋgho
tathārūpā'yaɱ, bhikkhave, parisā
 
yathārūpāya parisāya
appaɱ dinnaɱ bahuɱ hoti
bahuɱ dinnaɱ bahutaraɱ.
Tathārūpo ayaɱ bhikkhave, bhikkhu-saŋgho
tathārūpā'yaɱ, bhikkhave, parisā
 
yathārūpā parisā dullabhā dassanāya lokassa.
Tathārūpo ayaɱ, bhikkhave, bhikkhu-saŋgho
tathārūpā'yaɱ, bhikkhave, parisā,
 
yathārūpaɱ parisaɱ alaɱ yojanagaṇanāni dassanāya gantuɱ puṭosenāpi.
Tathārūpo ayaɱ, bhikkhave, bhikkhu-saŋgho
tathārūpā'yaɱ, bhikkhave, parisā.

 


 

[15][bd.] Santi, bhikkhave,,
bhikkhū imasmiɱ bhikkhu-saŋghe
arahanto
khīṇāsavā
vusitavanto
katakaraṇīyā
ohitabhārā
anuppatta-sadatthā
parikkhīṇabhavasaɱyojanā
samma-d-aññā vimuttā;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,,
bhikkhū imasmiɱ bhikkhu-saŋghe
pañcannaɱ orambhāgiyānaɱ saɱyojanānaɱ parikkhayā
opapātikā tattha
parinibbāyino
anāvattidhammā
tasmā lokā;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,
bhikkhū imasmiɱ bhikkhu-saŋghe
tiṇṇaɱ saɱyojanānaɱ
parikkhayā
rāgadosamohānaɱ
tanuttā
sakadāgāmino
sakid eva imaɱ lokaɱ āganatvā
dukkhass'antaɱ karissanti;
evarūpā pi bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,
bhikkhū imasmiɱ bhikkhu-saŋghe
tiṇṇaɱ saɱyojanānaɱ
parikkhayā
sotāpannā
avinipātadhammā
niyatā sambodhiparāyaṇā;
evarūpā pi, bhikkhave,
santi bhikkhū imasmiɱ bhikkhu-saŋghe.

 


 

[16][bd.] Santi, bhikkhave,,
bhikkhū imasmiɱ bhikkhu-saŋghe
catunnaɱ satipaṭṭhānānaɱ bhāvanānuyogam anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,
bhikkhū imasmiɱ bhikkhu-saŋghe
catunnaɱ sammappadhānānaɱ
bhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,,
bhikkhū imasmiɱ bhikkhu-saŋghe
catunnaɱ iddhipādānaɱ
bhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,,
bhikkhū imasmiɱ bhikkhu-saŋghe
pañcannaɱ indriyānaɱ
bhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,
bhikkhū imasmiɱ bhikkhu-saŋghe
pañcannaɱ balānaɱ
bhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,
bhikkhū imasmiɱ bhikkhu-saŋghe
sattannaɱ bojjhaŋgānaɱ
bhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,,
bhikkhū imasmiɱ bhikkhu-saŋghe
ariyassa aṭṭhaŋgikassa maggassa
bhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.

 


 

[17][bd.] Santi, bhikkhave,,
bhikkhū imasmiɱ bhikkhu-saŋghe
mettābhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,,
bhikkhū imasmiɱ bhikkhu-saŋghe
karuṇābhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,
bhikkhū imasmiɱ bhikkhu-saŋghe
muditābhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,,
bhikkhū imasmiɱ bhikkhu-saŋghe
upekkhābhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,,
bhikkhū imasmiɱ bhikkhu-saŋghe
asubhabhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.
 
Santi, bhikkhave,,
bhikkhū imasmiɱ bhikkhu-saŋghe
aniccasaññābhāvanānuyogam
anuyuttā viharanti;
evarūpā pi, bhikkhave,
santi bhikkhū imasmiɱ bhikkhu-saŋghe.

 


 

[18][bd.] Santi, bhikkhave,,
bhikkhū imasmiɱ bhikkhu-saŋghe
ānāpānasati-bhāvanānuyogam
anuyuttā viharanti.
 
Ānāpānasati bhikkhave,
bhāvitā bahulīkatā
mahapphalā hoti mahānisaɱsā;
ānāpānasati bhikkhave
bhāvitā bahulīkatā
cattāro satipaṭṭhāne paripūreti
cattāro satipaṭṭhānā
bhāvitā bahulīkatā
satta bojjhaŋge paripūrenti;
satta bojjhaŋgā
bhāvitā bahulīkatā
vijjāvimuttiɱ paripūrenti.

[19][bd.] Kathaɱ bhāvitā ca bhikkhave,
ānāpānasati?
Kathaɱ bahulīkatā?
Kathaɱ mahapphalā
hoti mahānisaɱsā?
 
Idha, bhikkhave,, bhikkhū
araññagato vā
rukkhamūlagato vā
suññāgāragato vā
nisīdati pallaŋkaɱ
ābhujitvā ujuɱ kāyaɱ
paṇidhāya
parimukhaɱ
satiɱ upaṭṭhapetvā.
 
So sato va assasati,
sato passasati;
dīghaɱ vā assasanto:
Dīghaɱ assasāmīti pajānāti;
dīghaɱ vā passasanto;
Dīghaɱ passasāmīti pajānāti;
rassaɱ vā assasanto:
Rassaɱ assasāmīti pajānāti;
rassaɱ vā passasanto:
Rassaɱ passasāmīti pajānāti;
Sabbakāyapaṭisaŋvedī assasissāmīti sikkhati;
Sabbakāyapaṭisaŋvedī passasissāmīti sikkhati;
Passambhayaɱ kāyasankhāraɱ assasissāmīti sikkhati;
Passambhayaɱ kāyasankhāraɱ passasissāmīti sikkhati;
Pītipaṭisaŋvedī assasissāmīti sikkhati;
Pītipaṭisaŋvedī passasissāmīti sikkhati;
Sukhapaṭisaŋvedī assasissāmīti sikkhati.
Sukhapaṭisaŋvedī passasissāmīti sikkhati;
Cittasankhārapaṭisaŋvedī assasissāmīti sikkhati.
Cittasankhārapaṭisaŋvedī passasissāmīti sikkhati;
Passambhayaɱ cittasankhāraɱ assasissāmīti sikkhati;
Passambhayaɱ cittasankhāraɱ passasissāmīti sikkhati;
Cittapaṭisaŋvedi assasissāmīti sikkhati;
Cittapaṭisaŋvedī passasissāmīti sikkhati;
Abhippamodayaɱ cittaɱ assasissāmīti sikkhati;
Abhippamodayaɱ cittaɱ passasissāmīti sikkhati;
Samādahaɱ cittaɱ assasissāmīti sikkhati;
Samādahaɱ cittaɱ passasissāmīti sikkhati;
Vimocayaɱ cittaɱ assasissāmīti sikkhati;
Vimocayaɱ cittaɱ passasissāmīti sikkhati;
Aniccānupassī assasissāmīti sikkhati;
Aniccānupassī passasissāmīti sikkhati;
Virāgānupassī assasissāmīti sikkhati;
Virāgānupassī passasissāmīti sikkhati;
Nirodhānupassī assasissāmīti sikkhati;
Nirodhānupassī passasissāmīti sikkhati;
Paṭinissaggānupassī assasissāmīti sikkhati;
Paṭinissaggānupassī passasissāmīti sikkhati;
evaɱ bhāvitā kho bhikkhave,
ānāpānasati evaɱ bahulīkatā
mahapphalā hoti mahānisaɱsā.

 


 

[20][bd.] Kathaɱ bhāvitā ca bhikkhave,
ānāpānasati?
Kathaɱ bahulikatā
cattāro satipaṭṭhāne paripūreti?
 
Yasmiɱ samaye bhikkhave, bhikkhū
dīghaɱ vā assasanto:
Dīghaɱ assasāmīti pajānāti;
dīghaɱ vā passasanto:
dīghaɱ passasāmīti pajānāti;
rassaɱ vā assasanto:
Rassaɱ assasāmīti pajānāti;
rassaɱ vā passasanto:
Rassaɱ passasāmīti pajānāti;
Sabbakāyapaṭisaŋvedī assasissāmīti sikkhati;
Sabbakāyapaṭisaŋvedī passasissāmīti sikkhati;
Passambhayaɱ kāyasankhāraɱ assasissāmīti sikkhati;
Passambhayaɱ kāyasankhāraɱ passasissāmīti sikkhati;
 
kāye kāyānupassī bhikkhave,
tasmiɱ samaye bhikkhu viharati
ātāpī
sampajāno
satimā
vineyya loke
abhijjhā-domanassaɱ.

[21][bd.] Kāyesu
kāyaññatarāhaɱ bhikkhave,
etaɱ vadāmī.
Yadidaɱ assāsapassāsā
tasmāt iha bhikkhave,
kāye kāyānupassī
tasmiɱ samaye bhikkhu viharati
ātāpī
sampajāno
satimā
vineyya loke
abhijjhā-domanassaɱ.

[22][bd.] Yasmiɱ samaye bhikkhave, bhikkhu:
Pītipaṭisaŋvedī assasissāmīti sikkhati,
Pītipaṭisaŋvedī passasissāmīti sikkhati,
Sukhapaṭisaŋvedī assasissāmīti sikkhati,
Sukhapaṭisaŋvedi passasissāmiti sikkhati,
Cittasankhāra- paṭisaŋvedī assasissāmīti sikkhati,
Cittasankhāra-paṭisaŋvedī passasissāmīti sikkhati,
Passambhayaɱ cittasankhāraɱ assasissāmīti sikkhati,
Passambhayaɱ cittasankhāraɱ passasissāmīti sikkhati;
 
vedanāsu
vedanānupassī bhikkhave,
tasmiɱ samaye bhikkhu viharati
ātāpī
sampajāno
satimā,
vineyya loke
abhijjhā-domanassaɱ.

[23][bd.] Vedanāsu
vedanaññatarāhaɱ, bhikkhave,
etaɱ vadāmi
yad idaɱ assāsapassāsānaɱ
sādhukaɱ manasikāraɱ.
Tasmāt iha bhikkhave,
vedanāsu vedanānupassī
tasmiɱ samaye bhikkhu viharati
ātāpī
sampajāno
satimā
vineyya loke
abhijjhā-domanassaɱ.

[24][bd.] Yasmiɱ samaye bhikkhave, bhikkhu
Cittapaṭisaŋvedī assasissāmīti sikkhati,
Cittapaṭisaŋvedī passasissāmīti sikkhati,
Abhippamodayaɱ cittaɱ assasissāmīti sikkhati,
Abhippamodayaɱ cittaɱ passasissāmīti sikkhati,
Samādahaɱ cittaɱ assasissāmīti sikkhati,
Samādahaɱ cittaɱ passasissāmīti sikkhati,
Vimocayaɱ cittaɱ assasissāmīti sikkhati,
Vimocayaɱ cittaɱ passasissāmīti sikkhati;
 
citte cittānupassī bhikkhave,
tasmiɱ samaye bhikkhu viharati
ātāpī
sampajāno
satimā
vineyya loke abhijjhā-domanassaɱ.

[25][bd.] Nāhaɱ bhikkhave,
muṭṭhassatissa asampajānassa
ānāpānasatibhāvanaɱ vadāmi.
Tasmāt iha bhikkhave,
citte cittānupassī
tasmiɱ samaye bhikkhu viharati
ātāpi
sampajāno
satimā
vineyya loke abhijjhā-domanassaɱ.

[26][bd.] Yasmiɱ samaye bhikkhave, bhikkhu;
Aniccānupassī assasissāmīti sikkhati,
Aniccānupassī passasissāmīti sikkhati,
Virāgānupassī assasissāmīti sikkhati,
Virāgānupassī passasissāmīti sikkhati,
Nirodhānupassī assasissāmīti sikkhati,
Nirodhānupassī passasissāmīti sikkhati,
Paṭinissaggānupassi assasissāmīti sikkhati,
Paṭinissaggānupassī passasissāmīti sikkhati;
dhammesu dhammānupassī bhikkhave,
tasmiɱ samaye bhikkhu viharati
ātāpī
sampajāno
satimā
vineyya loke abhijjhā-domanassaɱ.

[27][bd.] So yaɱ taɱ abhijjhā-domanassānaɱ pahānaɱ taɱ
paññāya disvā sādhukaɱ ajjhupekkhitā hoti.
Tasmāt iha bhikkhave,
dhammesu dhammānupassī
tasmiɱ samaye bhikkhu viharati
ātāpī
sampajāno
satimā
vineyya loke abhijjhā-domanassaɱ.

 


 

[28][bd.] Evaɱ bhāvitā kho bhikkhave,
ānāpānasati evaɱ
bahulīkatā
cattāro satipaṭṭhāne paripūreti.

 


 

[29][bd.] Kathaɱ bhāvitā ca bhikkhave,
cattāro satipaṭṭhānā
kathaɱ bahulīkatā
satta bojjhaŋge paripūrenti?

Yasmiɱ samaye bhikkhave,
bhikkhu kāye kāyānupassī viharati
ātāpī
sampajāno
satimā,
vineyya loke abhijjhā-domanassaɱ,
upaṭṭhit'assa tasmiɱ samaye sati hoti asammuṭṭhā.

Yasmiɱ samaye bhikkhave,
bhikkhuno upaṭṭhitā sati hoti asammuṭṭhā,
satisambojjhaŋgo
tasmiɱ samaye bhikkhuno āraddho hoti;
satisambojjhaŋgaɱ
tasmiɱ samaye bhikkhu bhāveti;
satisambojjhaŋgo
tasmiɱ samaye bhikkhuno bhāvanāpāripūriɱ gacchati.

[30][bd.] So tathāsato viharanto
taɱ dhammaɱ paññāya pavicinati,
pavicarati,
parivīmaɱsaɱ
āpajjati.

[31][bd.] Yasmiɱ samaye bhikkhave, bhikkhu
tathāsato viharanto
taɱ dhammaɱ paññāya pavicinati,
pavicarati,
parivīmaɱsaɱ
āpajjati,
dhammavicayasambojjhaŋgo
tasmiɱ samaye bhikkhuno āraddho hoti,
dhammavicayasambojjhaŋgaɱ
tasmiɱ samaye bhikkhu bhāveti,
dhammavicayasambojjhaŋgo
tasmiɱ samaye bhikkhuno bhāvanāpāripūriɱ gacchati

tassa taɱ dhammaɱ paññāya pavicinato
pavicarato
parivīmaɱsaɱ
āpajjato āraddhaɱ hoti viriyaɱ asallīnaɱ.

Yasmiɱ samaye bhikkhave, bhikkhuno
taɱ dhammaɱ paññāya pavicinato
pavicarato
parivīmaɱsaɱ
āpajjato
āraddhaɱ hoti viriyaɱ asallīnaɱ,
viriyasambojjhaŋgo
tasmiɱ samaye bhikkhuno āraddho hoti,
viriyasambojjhaŋgaɱ
tasmiɱ samaye bhikkhu bhāveti,
viriyasambojjhaŋgo
tasmiɱ samaye bhikkhuno bhāvanāpāripūriɱ gacchati.

[32][bd.] Āraddhaviriyassa uppajjati
pīti nirāmisā.

Yasmiɱ samaye bhikkhave, bhikkhuno
āraddhaviriyassa
uppajjati pīti nirāmisā,
pītisambojjhaŋgo
tasmiɱ samaye bhikkhuno āraddho hoti.
Pītisambojjhaŋgaɱ
tasmiɱ samaye bhikkhu bhāveti,
pitisambojjhaŋgo
tasmiɱ samaye bhikkhuno bhāvanāpāripūriɱ gacchati.

[33][bd.] Pītimanassa kāyo
pi passambhati,
cittampi passambhati.
 
Yasmiɱ samaye bhikkhave, bhikkhuno
pītimanassa kāyo pi passambhati,
cittam pi passambhati,
passaddhisambojjhaŋgo
tasmiɱ samaye bhikkhuno āraddho hoti,
passaddhisambojjhaŋgaɱ
tasmiɱ samaye bhikkhu bhāveti,
passaddhisambojjhaŋgo
tasmiɱ samaye bhikkhuno bhāvanāpāripūriɱ gacchati.

 

[34][bd.] Passaddhakāyassa
sukhino cittaɱ
samādhiyati.

 

Yasmiɱ samaye bhikkhave, bhikkhuno
passaddhakāyassa
sukhino cittaɱ
samādhiyati,
samādhisambojjhaŋgo
tasmiɱ samaye bhikkhuno āraddho hoti,
samādhisambojjhaŋgaɱ
tasmiɱ samaye bhikkhu bhāveti,
samādhisambojjhaŋgo
tasmiɱ samaye bhikkhuno bhāvanāpāripūriɱ gacchati.

[35][bd.] So tathāsamāhitaɱ cittaɱ sādhukaɱ ajjhupekkhitā hoti.

[36][bd.] Yasmiɱ samaye bhikkhave bhikkhuno
tathāsamāhitaɱ cittaɱ sādhukaɱ ajjhupekkhitā hoti,
upekkhāsambojjhaŋgo
tasmiɱ samaye bhikkhuno āraddho hoti,
upekkhāsambojjhaŋgaɱ
tasmiɱ samaye bhikkhu bhāveti,
upekkhāsambojjhaŋgo
tasmiɱ samaye bhikkhuno bhāvanāpāripūriɱ gacchati.

 


 

[37][bd.] Yasmiɱ samaye bhikkhave bhikkhu
vedanāsu vedanānupassī viharati[1]
ātāpī
sampajāno
satimā,
vineyya loke abhijjhā-domanassaɱ upaṭṭhitassa
tasmiɱ samaye sati hoti asammuṭṭhā.
 
Yasmiɱ samaye bhikkhave, bhikkhuno
upaṭṭhitā sati hoti asammuṭṭhā,
satisambojjhaŋgo
tasmiɱ samaye bhikkhuno āraddho hoti,
satisambojjhaŋgaɱ
tasmiɱ samaye bhikkhu bhāveti,
satisambojjhaŋgo
tasmiɱ samaye bhikkhuno bhāvanāpāripūriɱ gacchati.

 


 

[38][bd.] Citte cittānupassī viharati
ātāpī
sampajāno
satimā,
vineyya loke abhijjhā-domanassaɱ upaṭṭhitassa
tasmiɱ samaye sati hoti asammuṭṭhā.
 
Yasmiɱ samaye bhikkhave, bhikkhuno
upaṭṭhitā sati hoti asammuṭṭhā,
satisambojjhaŋgo
tasmiɱ samaye bhikkhuno āraddho hoti,
satisambojjhaŋgaɱ
tasmiɱ samaye bhikkhu bhāveti,
satisambojjhaŋgo
tasmiɱ samaye bhikkhuno bhāvanāpāripūriɱ gacchati.

 


 

[39][bd.] Dhammesu dhammānupassī viharati
ātāpī
sampajāno
satimā,
vineyya loke abhijjhā-domanassaɱ upaṭṭhitassa
tasmiɱ samaye sati hoti asammuṭṭhā.

Yasmiɱ samaye bhikkhave, bhikkhuno
upaṭṭhitā sati hoti asammuṭṭhā,
satisambojjhaŋgo
tasmiɱ samaye bhikkhuno āraddho hoti,
satisambojjhaŋgaɱ
tasmiɱ samaye bhikkhu bhāveti,
satisambojjhaŋgo
tasmiɱ samaye bhikkhuno bhāvanāpāripūriɱ gacchati.

So tathāsato viharanto taɱ dhammaɱ paññāya pavicinati, pavicayati, parivīmaɱsaɱ āpajjati.

Yasmiɱ samaye bhikkhave, bhikkhu
tathā sato viharanto taɱ dhammaɱ paññāya pavicinati, pavicarati,
parivīmaɱsaɱ āpajjati,
dhammavicayasambojjhaŋgo
tasmiɱ samaye bhikkhuno āraddho hoti,
dhammavicayasambojjhaŋgaɱ
tasmiɱ samaye bhikkhu bhāveti, dhammavicaya sambojjhaŋgo
tasmiɱ samaye bhikkhuno bhāvanāpāripūriɱ gacchati.

Tassa taɱ dhammaɱ paññāya pavicinato pavicarato parivimaɱsaɱ āpajjato āraddhaɱ hoti viriyaɱ asallīnaɱ.
Yasmiɱ samaye bhikkhave, bhikkhuno taɱ dhammaɱ paññāya pavicinato pavicarato parivimaɱsaɱ āpajjato āraddhaɱ hoti viriyaɱ asallīnaɱ, viriyasambojjhaŋgo
tasmiɱ samaye bhikkhuno āraddho hoti,
viriyasambojjhaŋgaɱ
tasmiɱ samaye bhikkhu bhāveti,
viriyasambojjhaŋgo
tasmiɱ samaye bhikkhuno bhāvanāpāripūriɱ gacchati.

Āraddhaviriyassa uppajjati piti nirāmisā.
Yasmiɱ samaye bhikkhave bhikkhuno āraddhaviriyassa uppajjati pīti nirāmisā,
pītisambojjhaŋgo
tasmiɱ samaye bhikkhuno āraddho hoti,
pitisambojjhaŋgaɱ
tasmiɱ samaye bhikkhu bhāveti,
pītisambojjhaŋgo
tasmiɱ samaye bhikkhuno bhāvanāpāripūriɱ gacchati.

Pītimanassa kāyo pi passambhati cittam pi passambhati.
Yasmiɱ samaye bhikkhave, bhikkhuno pītimanassa kāyopi passambhati,
cittam pi passambhati,
passaddhisambojjhaŋgo
tasmiɱ samaye bhikkhave, bhikkhuno āraddho hoti,
passaddhisambojjhaŋgaɱ
tasmiɱ samaye bhikkhu bhāveti,
pasmaddhisambojjhaŋgo
tasmiɱ samaye bhikkhuno bhāvanāpāripūriɱ gacchati.

Passaddhakāyassa sukhino cittaɱ samādhiyati.
Yasmiɱ samaye bhikkhave, bhikkhuno passaddhakāyassa sukhino cittaɱ samādhiyati,
samādhisambojjhaŋgo
tasmiɱ samaye bhikkhuno āraddho hoti,
samādhisambojjhaŋgaɱ
tasmiɱ samaye bhikkhu bhāveti,
samādhisambojjhaŋgo
tasmiɱ samaye bhikkhuno bhāvanāpāripūriɱ gacchati.

So tathāsamāhitaɱ cittaɱ sādhukaɱ ajjhupekkhitā hoti.
Yasmiɱ samaye bhikkhave,
bhikkhu tathāsamāhitaɱ cittaɱ sādhukaɱ ajjhupekkhitā hoti,
upekkhāsambojjhaŋgo
tasmiɱ samaye bhikkhuno āraddho hoti,
upekkhāsambojjhaŋgaɱ
tasmiɱ samaye bhikkhu bhāveti,
upekkhāsambojjhaŋgo
tasmiɱ samaye bhikkhuno bhāvanāpāripūriɱ gacchati.

[40][bd.] Evaɱ bhāvitā kho bhikkhave,
cattāro satipaṭṭhānā evaɱ bahulīkatā
satta sambojjhaŋge paripūrenti.

 


 

[41][bd]. Kathaɱ bhāvitā ca bhikkhave, satta bojjhaŋgā?
Kathaɱ bahulīkatā vijjāvimuttiɱ paripūrenti?
Idha, bhikkhave,, bhikkhu
satisambojjhaŋgaɱ bhāveti
vivekanissitaɱ
virāganissitaɱ
nirodhanissitaɱ
vossaggapariṇāmiɱ;
dhammavijayasambojjhaŋgaɱ bhāveti
vivekanissitaɱ
virāganissitaɱ
nirodhanissitaɱ
vossaggapariṇāmiɱ;
viriyasambojjhaŋgaɱ bhāveti
vivekanissitaɱ
virāganissitaɱ
nirodhanissitaɱ
vossaggapariṇāmiɱ;
pītisambojjhaŋgaɱ bhāveti
vivekanissitaɱ
virāganissitaɱ
nirodhanissitaɱ
vossaggapariṇāmiɱ;
passaddhisambojjhaŋgaɱ bhāveti
vivekanissitaɱ
virāganissitaɱ
nirodhanissitaɱ
vossaggapariṇāmiɱ;
samādhisambojjhaŋgaɱ bhāveti
vivekanissitaɱ
virāganissitaɱ
nirodhanissitaɱ
vossaggapariṇāmiɱ;
upekkhāsambojjhaŋgaɱ bhāveti
vivekanissitaɱ
virāganissitaɱ
nirodhanissitaɱ
vossaggapariṇāmiɱ.|| ||

Evaɱ bhāvitā kho bhikkhave,
satta bojjhaŋgā evaɱ bahulīkatā
vijjāvimuttiɱ paripūrenti.|| ||

Idam avoca Bhagavā.
Attamanā te bhikkhū Bhagavato bhāsitaɱ abhinandun ti.|| ||

Ānāpānasati suttaɱ aṭṭhamaɱ

 


 


[1]PTS text (Chalmers) abbreviates here and for the next section: vedanasu -- pe -- citte -- pe; here I have included the first clause, subsequent clauses are as for the previous and following satipatthanas.


 

Contact:
E-mail
Copyright Statement   Webmaster's Page