Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
3. Suññata Vagga

Sutta 121

Cūḷa Suññata Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][nymo][ntbb][than][olds][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Pubbārāme Migāramātu pāsāde.|| ||

[2][pts][nymo][ntbb][than][olds] Atha kho āyasmā Ānando sāyaṇhasamayaɱ paṭisallāṇā vuṭṭhito yena Bhagavā ten'upasaɱkami,||
upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

[3][pts][nymo][ntbb][than][olds] Ekam idaɱ bhante, samayaɱ Bhagavā Sakkesu viharati nāgarakaɱ nāma Sakkānaɱ nigamo.|| ||

Tattha me bhante, Bhagavato sammukhā sutaɱ sammukhā paṭiggahitaɱ.|| ||

Suññatāvihārenāhaɱ Ānanda,||
etarahi bahulaɱ viharāmī ti.|| ||

Kacci me taɱ bhante,||
sussutaɱ suggahītaɱ.|| ||

Sumanasikataɱ sūpadhāritan ti.|| ||

Taggha te etaɱ Ānanda,||
sussutaɱ suggahītaɱ.|| ||

Sumanasikataɱ sūpadhāritaɱ.|| ||

Pubbe cāhaɱ Ānanda,||
etarahi ca suññatāvihārena bahulaɱ viharāmi.|| ||

[4][pts][nymo][ntbb][than][olds] seyyathā pi Ānanda, ayaɱ migaramātu pāsādo suñño hatthigavāssavaṭ avena,||
suñño jātarūparajatena,||
suñño itthi purisasannipātena,||
atthi c'ev'idaɱ asuññataɱ yad idaɱ bhikkhusaɱghaɱ paṭicca ekattaɱ.|| ||

Evam eva kho Ānanda, bhikkhu amanasikaritvā gāmasaññaɱ,||
amanasikaritvā manussasaññaɱ,||
araññasaññaɱ paṭicca manasikaroti ekattaɱ.|| ||

Tassa araññasaññāya cittaɱ pakkhandati pasīdati santiṭṭhati vimuccati.|| ||

So evaɱ pajānāti:||
Ye assu darathā gāmasaññaɱ paṭicca,||
te'dha na santi.|| ||

Ye assu darathā manussasaññaɱ paṭicca te'dha na santi.|| ||

Atthi c'evāyaɱ darathamattā yad idaɱ araññasaññaɱ paṭicca ekattan ti.|| ||

So Suññam idaɱ saññāgataɱ gāmasaññāyāti pajānāti.|| ||

Suññam idaɱ saññāgataɱ manussasaññāyāti pajānāti.|| ||

Atthi c'ev'idaɱ asuññataɱ yad idaɱ araññasaññaɱ paṭicca ekattan ti.|| ||

Iti yaɱ hi kho tattha na hoti,||
tena taɱ suññaɱ samanupassati.|| ||

Yaɱ pi tattha avasiṭṭhaɱ hoti taɱ santaɱ idaɱ atthīti pajānāti.|| ||

Evam pi'ssa esā Ānanda,||
yathābaccā avipallatthā parisuddhā suññatāvakkan ti bhavati.|| ||

[5][pts][nymo][ntbb][than][olds] Puna ca paraɱ Ānanda,||
bhikkhu amanasikaritvā manussasaññaɱ amanasikaritvā araññasaññaɱ paṭhavisaññaɱ paṭicca manasikaroti ekattaɱ.|| ||

Tassa paṭhavisaññāya cittaɱ pakkhandati pasīdati santiṭṭhati vimuccati.|| ||

Seyyathā pi Ānanda,||
usabhacammaɱ saɱkusatena suvihataɱ vigatavasikaɱ evam eva kho Ānanda,||
bhikkhu yaɱ imissā paṭhaviyā ukkūlavikūlaɱ nadīviduggaɱ khāṇukaṇṭakādhāraɱ pabbatavisamaɱ,||
taɱ sabbaɱ amanasikaritvā paṭhavisaññaɱ paṭicca manasikaroti ekattaɱ.|| ||

Tassa paṭhavisaññāya cittaɱ pakkhandati pasīdati santiṭṭhati vimuccati.|| ||

So evaɱ pajānāti:||
Ye assu darathā manussasaññaɱ paṭicca,||
te'dha na santi.|| ||

Ye assu darathā araññasaññaɱ paṭicca,||
te'dha na santi.|| ||

Atthi c'evāyaɱ darathamattā yad idaɱ paṭhavisaññaɱ paṭicca ekattan ti.|| ||

So puññamidaɱ saññāgataɱ manussasaññāyāti pajānāti.|| ||

Suññam idaɱ saññāgataɱ araññasaññāyāti pajānāti.|| ||

Atthi c'ev'idaɱ asuññataɱ yad idaɱ paṭhavisaññaɱ paṭicca ekattan ti.|| ||

Iti yaɱ hi kho tattha na hoti.|| ||

Tena taɱ suññaɱ samanupassati.|| ||

Yaɱ pi tattha avasiṭṭhaɱ hoti.|| ||

Taɱ santaɱ idaɱ atthīti pajānāti.|| ||

Evam pi'ssa esā Ānanda,||
yathābaccā avipallatthā parisuddhā suññatāvakkan ti bhavati.|| ||

[6][pts][nymo][ntbb][than][olds] Puna ca paraɱ Ānanda,||
bhikkhu amanasikaritvā araññasaññaɱ amanasikaritvā paṭhavisaññaɱ ākāsānañcāyatanasaññaɱ paṭicca manasikaroti ekattaɱ.|| ||

Tassa ākāsānañcāyatanasaññāya cittaɱ pakkhandati pasīdati santiṭṭhati vimuccati.|| ||

So evaɱ pajānāti:||
Ye assu darathā araññasaññaɱ paṭicca,||
te'dha na santi.|| ||

Ye assu darathā paṭhavisaññaɱ paṭacca te'dha na santi.|| ||

Atthi c'evāyaɱ darathamattā yad idaɱ ākāsānañcāyatanasaññaɱ paṭicca ekattan' ti.|| ||

So Suññam idaɱ saññāgataɱ arañña saññāyāti pajānāti.|| ||

Suññam idaɱ saññāgataɱ paṭhavisaññāyāti pajānāti.|| ||

Atthi c'ev'idaɱ asuññataɱ yad idaɱ ākāsānañcāyatanasaññaɱ paṭicca ekattan ti.|| ||

Iti yaɱ hi kho tattha na hoti.|| ||

Tena taɱ suññaɱ samanupassati.|| ||

Yaɱ pi tattha avasiṭṭhaɱ hoti,||
taɱ santaɱ idaɱ atthīti pajānāti.|| ||

Evam pi'ssa esā Ānanda,||
yathābaccā avipallatthā parisuddhā suññatāvakkan ti bhavati.|| ||

[7][pts][nymo][ntbb][than][olds] Puna ca paraɱ Ānanda,||
bhikkhu amanasikaritvā paṭhavisaññaɱ,||
amanasikaritvā ākāsānañcāyatanasaññaɱ,||
viññāṇañcāyatanasaññaɱ paṭicca manasikaroti ekattaɱ.|| ||

Tassa viññāṇañcāyatanasaññāya cittaɱ pakkhandati pasīdati santiṭṭhati vimuccati.|| ||

So evaɱ pajānāti:||
Ye assu darathā paṭhavisaññaɱ paṭicca,||
te'dha na santi.|| ||

Ye assu darathā ākāsānañcāyatanasaññaɱ paṭicca te'dha na santi.|| ||

Atthi c'evāyaɱ darathamattā yad idaɱ viññāṇañcāyatanasaññaɱ paṭicca ekattan' ti.|| ||

So Suññam idaɱ saññāgataɱ paṭhavisaññāyāti pajānāti.|| ||

Suññam idaɱ saññāgataɱ ākāsānañcāyatanasaññāyāti pajānāti.|| ||

Atthi c'ev'idaɱ asuññataɱ yad idaɱ viññāṇañcāyatanasaññaɱ paṭicca ekattan ti.|| ||

Iti yaɱ hi kho tattha na hoti.|| ||

Tena taɱ suññaɱ samanupassati.|| ||

Yaɱ pi tattha avasiṭṭhaɱ hoti.|| ||

Taɱ santaɱ idaɱ atthīti pajānāti.|| ||

Evam pi'ssa esā Ānanda,||
yathābaccā avipallatthā parisuddhā suññatāvakkan ti bhavati.|| ||

[8][pts][nymo][ntbb][than][olds] Puna ca paraɱ Ānanda,||
bhikkhu amanasikaritvā ākāsānañcāyatanasaññaɱ amanasikaritvā viññāṇañcāyatanasaññaɱ ākiñcaññāyatanasaññaɱ paṭicca manasikaroti ekattaɱ.|| ||

Tassa ākiñcaññāyatanasaññāya cittaɱ pakkhandati pasīdati santiṭṭhati vimuccati.|| ||

So evaɱ pajānāti:||
Ye assu darathā ākāsānañcāyatanasaññaɱ paṭicca te'dha na santi.|| ||

Ye assu darathā viññāṇañcāyatanasaññaɱ paṭicca, te'dha na santi.|| ||

Atthi c'evāyaɱ darathamattā,||
yad idaɱ ākiñcaññāyatanasaññaɱ paṭicca ekattan' ti.|| ||

So Suññam idaɱ saññāgataɱ ākāsānañcāyatanasaññāyāti pajānāti.|| ||

Suññam idaɱ saññāgataɱ viññāṇañcāyatanasaññāyāti pajānāti.|| ||

Atthi c'ev'idaɱ asuññataɱ yad idaɱ ākiñcaññāyatanasaññaɱ paṭicca ekattan ti.|| ||

Iti yaɱ hi kho tattha na hoti.|| ||

Tena taɱ suññaɱ samanupassati.|| ||

Yaɱ pi tattha avasiṭṭhaɱ hoti.|| ||

Taɱ santaɱ idaɱ atthīti pajānāti.|| ||

Evam pi'ssa esā Ānanda,||
yathābaccā avipallattā parisuddhā suññatāvakkan ti bhavati.|| ||

[9][pts][nymo][ntbb][than][olds] Puna ca paraɱ Ānanda,||
bhikkhu amanasikaritvā viññāṇañcāyatanasaññaɱ amanasikaritvā ākiñcaññāyatanasaññaɱ n'eva-saññā-nāsaññāyatanasaññaɱ paṭicca manasikaroti ekattaɱ.|| ||

Tassa n'eva-saññā-nāsaññāyatanasaññāya cittaɱ pakkhandati pasīdati santiṭṭhati vimuccati.|| ||

So evaɱ pajānāti:||
Ye assu darathā viññāṇañcāyatanasaññaɱ paṭicca,||
te'dha na santi.|| ||

Ye assu darathā ākiñcaññāyatanasaññaɱ paṭicca,||
te'dha na santi.|| ||

Atthi c'evāyaɱ darathamattā,||
yad idaɱ n'eva-saññā-nāsaññāyatanasaññaɱ paṭicca ekattan' ti.|| ||

So Suññam idaɱ saññāgataɱ viññāṇañcāyatanasaññāyāti pajānāti.|| ||

Suññam idaɱ saññāgataɱ ākiñcaññāyatanasaññāyāti pajānāti.|| ||

Atthi c'ev'idaɱ asuññataɱ yad idaɱ n'eva-saññā-nāsaññāyatanasaññaɱ paṭicca ekattan ti.|| ||

Iti yaɱ hi kho tattha na hoti.|| ||

Tena taɱ suññaɱ samanupassati.|| ||

Yaɱ pi tattha avasiṭṭhaɱ hoti.|| ||

Taɱ santaɱ idaɱ atthīti pajānāti.|| ||

Evam pi'ssa esā Ānanda,||
yathābaccā avipallatthā parisuddhā suññatāvakkan ti bhavati.|| ||

[10][pts][nymo][ntbb][than][olds] Puna ca paraɱ Ānanda,||
bhikkhu amanasikaritvā ākiñcaññāyatanasaññaɱ amanasikaritvā n'eva-saññā-nāsaññāyatanasaññaɱ animittaɱ ceto-samādhiɱ paṭicca manasikaroti ekattaɱ.|| ||

Tassa animitte ceto-samādhimhi cittaɱ pakkhandati pasīdati santiṭṭhati vimuccati.|| ||

So evaɱ pajānāti:||
ye assu darathā ākiñcakaññāyatanasaññaɱ paṭicca,||
te'dha na santi.||
Ye assu darathā n'eva-saññā-nāsaññāyatanasaññaɱ paṭicca,||
te'dha na santi.|| ||

Atthi c'evāyaɱ darathamattā yad idaɱ imam eva kāyaɱ paṭicca sa'āyatanikaɱ jīvitapaccayā ti.|| ||

So Suññam idaɱ saññāgataɱ ākiñcaññāyatanasaññāyāti pajānāti.|| ||

Suññam idaɱ saññāgataɱ n'eva-saññā-nāsaññāyatanasaññāyāti pajānāti.|| ||

Atthi c'ev'idaɱ asuññataɱ yad idaɱ imam eva kāyaɱ paṭicca sa'āyatanikaɱ jīvitapaccayāti.|| ||

Iti yaɱ hi kho tattha na hoti.|| ||

Tena taɱ suññaɱ samanupassati.|| ||

Yaɱ pi tattha avasiṭṭhaɱ hoti.|| ||

Taɱ santaɱ idaɱ atthīti pajānāti.|| ||

Evam pi'ssa esā Ānanda,||
yathābaccā avipallatthā parisuddhā suññatāvakkan ti bhavati.|| ||

[11][pts][nymo][ntbb][than][olds] Puna ca paraɱ Ānanda,||
bhikkhu amanasikaritvā ākiñcaññāyatanasaññaɱ amanasikaritvā n'eva-saññā-nāsaññāyatanasaññaɱ animittaɱ ceto-samādhiɱ paṭicca manasikaroti ekattaɱ.|| ||

Tassa animitte ceto-samādhimhi cittaɱ pakkhandati pasīdati santiṭṭhati vimuccati.|| ||

So evaɱ pajānāti:||
ayam pi kho animitto ceto-samādhi abhisaɱkhato ābhisañcetayiko yaɱ kho pana kiñci abhisaɱkhataɱ ābhisañcetanitaɱ,||
tad aniccaɱ nirodhadhamman ti pajānāti.|| ||

Tassa evaɱ jānato evaɱ passato kāmāsavā pi cittaɱ vimuccati.|| ||

Bhavāsavā pi cittaɱ vimuccati.|| ||

Avijjāsavā pi cittaɱ vimuccati.|| ||

Vimuttasmiɱ vimuttam iti ñāṇaɱ hoti.|| ||

Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyāti pajānāti.|| ||

[12][pts][nymo][ntbb][than][olds] So evaɱ pajānāti:||
Ye assu darathā kāmāsavaɱ paṭicca,||
te'dha na santi.|| ||

Ye assu darathā bhavāsavaɱ paṭicca te'dha na santi.|| ||

Ye assu darathā avijjāsavaɱ paṭicca,||
te'dha na santi.|| ||

Atthi c'evāyaɱ darathamatthā,||
yad idaɱ imam eva kāyaɱ paṭicca sa'āyatanikaɱ jīvitapaccayā ti.|| ||

So Suññam idaɱ saññāgataɱ kāmāsavenāti pajānāti.|| ||

Suññam idaɱ saññāgataɱ bhavāsavenāti pajānāti.|| ||

Suññam idaɱ saññāgataɱ avijjāsavenāti pajānāti.|| ||

Atthi c'ev'idaɱ asuññataɱ yad idaɱ imam eva kāyaɱ paṭicca sa'āyatanikaɱ jīvitapaccayāti.|| ||

Iti yaɱ hi kho tattha na hoti.|| ||

Tena taɱ suññaɱ samanupassati Yaɱ pi tattha avasiṭṭhaɱ hoti,||
taɱ santaɱ idaɱ atthīti pajānāti.|| ||

Evam assa esā Ānanda,||
yathābaccā avipallatthā parisuddhā paramānuttarā suññatāvakkan ti bhavati.|| ||

[13][pts][nymo][ntbb][than][olds] Ye hi keci Ānanda,||
atītam addhānaɱ samaṇā vā brāhmaṇā vā parisuddhaɱ paramānuttaraɱ suññataɱ upasampajja vihariɱsu.|| ||

Sabbe te imaɱ yeva parisuddhaɱ paramānuttaraɱ suññataɱ upasampajja vihariɱsu.|| ||

Ye hi keci Ānanda,||
anāgatam addhānaɱ samaṇā vā brāhmaṇā vā parisuddhaɱ paramānuttaraɱ suññataɱ upasampajja viharisasanti.|| ||

Sabbe te imaɱ yeva parisuddhaɱ paramānuttaraɱ suññataɱ upasampajja viharissanti.|| ||

Ye hi keci Ānanda,||
etarahi samaṇā vā brāhmaṇā vā parisuddhaɱ paramānuttaraɱ suññataɱ upasampajajja viharanti.|| ||

Sabbe te imaɱ yeva parisuddhaɱ paramānuttaraɱ suññataɱ upasampajja viharanti.|| ||

Tasmāt iha Ānanda,||
parisuddhaɱ paramānuttaraɱ suññataɱ upasampajja viharissāmāti.|| ||

Evaɱ hi vo Ānanda, sikkhitabban ti.|| ||

Idam avoca Bhagavā attamano āyasmā Ānando Bhagavato bhāsitaɱ abhinandīti.

 


 

More Suññata Resources


 

Contact:
E-mail
Copyright Statement   Webmaster's Page